གཅན་ཆེད་འབར་གྱིས་གསར་དུ་བྲིས་པའི་ལྷུག་རྩོམ་ཁག་གཉིས།

46325

 

གནམ་གྲུའི་ནང་གི་མགྱོགས་བྲིས།

 

སྤྲིན་གྱི་བང་རིམ་དུ་ལྷ་དང་ལྷ་མོའི་ཚོགས་ཡོད་པའི་བག་ཆགས་དེ་ད་དུང་ཐོར་མི་འདུག། སྐབས་འདིར།  ང་ཡང་ལྷ་དང་ལྷ་མོའི་ཚོགས་བཞིན་གནམ་གྲུར་བསྡད་དེ་སྤྲིན་གྱི་བང་རིམ་རྒལ་གྱིན་ཡོད། བྱིས་པ་དེའི་སེམས་ནང་གི“ལྷ་ཡུལ”ནས་སྐྱོད་ཀྱིན་ཡོད།

གནམ་གྲུའི་སྒེའུ་ཁུང་ནི་མིག་ཟུང་ཆུང་ཆུང་ཞིག་དང་འདྲ།  ངས་མིག་ཟུང་ཆུང་ངུ་འདི་ལས་ཕ་མཐའ་བྲལ་བའི་ནམ་མཁའ་དང་ནམ་དུ་ཡང་ལག་སྙོབ་བྱེད་འདོད་པའི་སྤྲིན་པ་ཕང་ཕུང་དག་མ་གཏོགས་མཐོང་གིན་མི་འདུག་པས།   ང་རང་འཇིགས་ཡེར་བར་བྱས་བྱུང་སྟེ།

ཆག་ཀྲུམ་དུ་འགྱུར་བཞིན་པའི་ས་ནག་གི་སྒལ་གཞུང་དུ་ང་ཡིས་མཐོང་བ་འདི་ལས་མོད་ཅིང་།  ཐ་ན།  འདུ་འཛི་དང་ཇག་རྐུན།  གཡོ་སྒྱུ་དང་ཕྲག་དོག། གནོད་སེམས་དང་བརྣབ་སེམས་རབ་ཏུ་བདོ་ནའང་ང་ཡིས་མཐོང་སྙིང་ཏེ་བོར་འདོད་པའང་འདི་ཡིན་ཏེ།  ང་ཡིས་དུས་ཚོད་ཀྱི་རྣང་མ་རུ་སྐྱེས་སྟོབས་ཀྱི་དཔལ་འབར་བའི་མི་ཡུལ་གྱི་གདུག་རྩུབ་དག་ལ་མིག་གིས་འཚོ་འདོད་ཅིང་།  ང་ཡིས་ནམ་ཞིག་ལ་དུས་ཚོད་ཀྱི་གས་སྲུབས་ནས་ཉམ་ཆུང་གིས་འཚར་སྲིད་པའི།  མི་ཡུལ་གྱི་དགེ་བའི་མེ་ཏོག་གི་གོ་རིམ་ལ་སེམས་ཀྱིས་བཤིབས་འདོད།

བྲེ་སྒམ་དུ་བླུགས་པའི་ནས་འབྲུ་བཞིན།  གནམ་གྲུའི་འཁོར་སྒམ་དུ་ང་ཚོའི་དབར་བར་ཐག་མེད་ནའང་།  མི་ཡུལ་ནས་ཀྱང་ལག་རྡང་སྦྲེལ་མ་མྱོང་བ་ཇི་བཞིན་གནམ་གྲུ་འདི་རུའང་རླབས་ཆེ་བའི་ལག་འཇུ་ཅི་ཡང་མེད་པར།  འགྲུལ་བཞུད་ལམ་གྱི་མི་རྣམས་དབེན་སིམ་མེར་སྡོད་པ་དེ་ནི་པུར་སྒྲོམ་དུ་ཉལ་བ་དང་མཚུངས་ལ།  ཉི་མར་བསྐམས་ཟིན་པའི་ས་བོན་བཞིན།  མི་ཡུལ་ནས་ང་ཚོས་རང་ཉིད་སྐྱེ་རྒྱུ་ཡོད་པ་བརྗེད་ཡོད་ཀྱང་།   བར་ཐག་ཅི་ཡང་མེད་པའི་འཁོར་སྒམ་དུའང་མི་རྣམས་ཀྱི་རང་ཉིད་ལ་མཛེས་སྡུག་གང་རུང་ཞིག་སྐྱེ་རྒྱུ་ཡོད་པ་ཡོངས་སུ་བསྙེལ་ཚར་འདུག

གནམ་གྲུ་འདི་ནང་གི་མི་རྣམས་ཀྱིས་རིག་རིག་མིག་གིས་ལྐོག་ལྐོག་སུད་སུད་དུ་ཅི་ཞིག་ལ་ལྟ་བཞིན་མཆིས།  མ་གཞི་མི་ཡུལ་ནས་ཀྱང་ང་ཡི་ཉེ་དུ་རྣམས་ཀྱི་དམིགས་ཡུལ་མི་དྲང་པར།  མཚམས་མཚམས་སུ་ང་ལ་འཕུལ་ཐོ་རྡེག་པ་དང་།   མཚམས་མཚམས་སུ་རིག་རིག་མིག་གིས་ལྐོག་ལྐོག་སུད་སུད་དུ་ང་ལ་ལྟ་བཞིན་ཡོད་ནའང་།  ངས་ཉེ་དུ་དག་རང་ཉིད་ཀྱི་ལག་ཟུང་གི་འཇིག་རྟེན་དུ་བཞག་སྟེ“ལྷ་ཡུལ”ལ་བསྲིངས་མྱོང་།

གློ་རྡེག་ཏུ།  བློ་བཟོ་བདེ་པོ་ཁྱོན་ནས་མ་བྱུང་། གནམ་གྲུ་འདི་ཡང་འབྱམས་ཀླས་པའི་འཇིག་རྟེན་བཞིན་དེའི་གཏིང་མཐའ་དཔོག་དཀའ་ན། དེ་ལས་ཀྱང་ངའི་སྙིང་ཉེ་ཞིང་མཐའ་མི་མངོན་པའི་མི་ཡུལ་ན་དུས་ཚོད་འདི་གའི་རིང་ལ་དཔོག་དཀའ་བའི་དོན་དག་ཅི་ཞིག་འབྱུང་བཞིན་ཡོད་དམ།  ངས་སྔར་བཞིན་མི་ཡུལ་འདིའི་དགྲ་ཟུན་དང་དགེ་སྡིག་གི་ས་བོན་མཐའ་དག་ཆུད་ཟོས་མེད་པར་ལག་མཐིལ་དུ་བཞག་སྟེ་གཅེས་སྐྱོང་བྱེད་འདོད་ཨང་།

གནམ་གྲུ་འདི་ད་དུང་ཡང་སྤྲིན་གྱི་བང་རིམ་རྒལ་གྱིན་འདུག།  གནམ་གྲུ་ནང་གི་མི་རྣམས་ཀྱིས“ལྷ་ཡུལ”ནས་ཁུ་སེམ་མེར་གཉེར་མའི་མདུད་པ་ཤུགས་ཀྱིས་རྒྱག་གིན་འདུག།  གློ་བུར་དུ།   ང་རང་ཐང་ལ་འབབ་འདོད་བྲོ་བྱུང་།  གནམ་གྲུ་ནང་གི་མི་རྣམས་ཀྱི་སྔུན་ལ་ས་སྒང་དུ་འབབ་འདོད་བྲོ་བྱུང་།

༢༠༡༧ལོའི་ཟླ༧པའི་ཚེས༦ནས་༧པར།

 

(བསམས་བྱུང་ལ་བྲོ་བྱུང་ཟེར་བ་ནི་མངའ་རིས་ཀྱི་ཡུལ་སྐད་དུ་འབྱུང་།)

 

དགུན་ཁ།   ཡི་གར་འོང་།

 

དགུན་ཁ་ཡི་གར་འོང་།   ཕ་ཡུལ་གྱི་དགུན་ཁ་ཡི་གར་འོང་།

 

ཐ་ན།   ཚོན་གྱིས་མ་སྤྲས་པའི་སྐྱ་ཐིང་ཐིང་དེའང་ཡིད་དུ་འོང་དེ།   རི་ཀླུང་སྐྱ་ཐིང་ཐིང་། མཁར་གྱང་སྐྱ་ཐིང་ཐིང་།  སྲང་ལམ་སྐྱ་ཐིང་ཐིང་། མི་རྣམས་སྐྱ་ཐིང་ཐིང་།  སུ་དང་གང་གིས་མ་བསླད་པའི་སྐྱ་ཐིང་ཐིང་གི་ཕ་ཡུལ།  སྐྱ་ཐིང་ཐིང་གི་ཕ་ཡུལ་གྱི་དགུན་ཁ་ཇི་འདྲའི་མཛེས་ཨང་།

སྨུག་པ་སྲབ་བུ་ཞིག་གིས་ཡོངས་སུ་བཟུང་ཡོད་ལ།   ཆབ་རོམ་ནར་མོ་ཞིག་གིས་ཁྱོན་ནས་བཀླུབས་པའི་ཕ་ཡུལ།  ཕ་ཡུལ་དུ་ཙག་བསེར་བུ་ཞིག་རྒྱ་སྟག་ངར་མ་བཞིན་ལྡིང་སྟེ་ཕ་ཡུལ་གྱི་རྐང་མར་ཁེངས་ཤིང་།  མི་ཚོགས་ཀྱི་ཞལ་རས་ཕྱིད་ནའང་།   ཕ་ཡུལ་གྱི་དགུན་ཁ་འདི་ཇི་འདྲའི་སྙིང་དུ་སྡུག་སྟེ།  སྨུག་པ་སྲབ་བུ་དེ། ཆབ་རོམ་ནར་མོ་དེ།  ད་དུང་ཙག་བསེར་བུ་དེ། དེ་དག་ནི་ཚོན་གྱིས་མ་བཏབ་པའི་ཕ་ཡུལ་ཏེ།  ཕ་ཡུལ་གྱི་སྐྱིད་སྡུག་གི་རི་མོ་ཁོ་ན་ཡིན་ལ།  ཕ་ཡུལ་གྱིས་སླར་ཡང་ཕ་ཡུལ་རྙེད་སོན་བྱུང་བའི་མཚན་མ་དེ་མ་ཡིན་ནམ།

དགུན་ཁ་འདིར། ས་གད་པ་དང་རྡོ་གད་ནའང་།   དུད་ཁྱིམ་གྱི་མེ་ལྕེ་དམར་ལྷེམ་ལྷེམ་དུ་ཡོད་ཅིང་།  ཕོ་སྤྱང་གི་གདོང་བ་གད་པ་དང་མོ་སྤྱང་གི་ནུ་མ་གད་ནའང་།  བྱིས་པ་ཚོའི་འཛུམ་མདངས་མེ་ཏོག་གི་ཐོའུ་བཞིན་ལྷུག་ལྷུག་ཏུ་བཞད།   དགུན་ཁ་འདིར་ལྕགས་ཀྱི་བ་མ་ཐབ་ལ་འཛུགས་དགོས་ནའང་།  ཕ་ཡུལ་ནི་བྲེད་དངངས་དང་ཁྲལ་ཁྲུལ་མེད་པར་སྒམ་བརླིང་གིས་ཁྱོགས་ཤིང་།  ཚུལ་འཆོས་དང་གཡོ་སྒྱུ་མེད་པར་ཞི་དུལ་གྱིས་གནས།

དགུན་ཁ་འདིར།   ཕ་ཡུལ་ནས་རྣ་བ་ཀྲོག་ཀྲོག་གིས་མཉན་ན།  འབུ་སྲུན་གྱི་དབུགས་རྒྱུན་ཐོས་འོངས་ཤིང་།  མིག་ཟུང་ཀེམ་ཀེམ་གྱིས་བལྟས་ན།   སྲང་ལམ་གྱི་དོན་སྙིང་མཐོང་འོངས་ཏེ།   ད་དུང་རེག་བྱ་ཡིས་རེག་ན་རི་ཀླུང་དང་མཁར་གྱང་།   སྨུག་པ་དང་ཆབ་རོམ་གྱི་མ་བཅོས་པའི་རེག་བྱ་མྱོང་ཐུབ།  ཐ་ན།  རྩེ་གཅིག་གིས་ཉམས་སུ་མྱངས་ན་རྩེ་གཅིག་ཏུ་བཞུགས་པའི་ཕ་ཡུལ་གྱི་མ་ནོག་པའི་རང་བཞིན་མྱོང་ཐུབ་སྟེ།  ལྷེམ་ལྷེམ། ལྷེམ་ལྷེམ་བྱེད་པའི་ཕ་ཡུལ་གྱི་དབུགས་རྒྱུན་ཡང་ཐོས་ཐུབ།

དགུན་ཁ་འདིར།  སྐྱ་ཐིང་ཐིང་གི་ཕ་ཡུལ་དང་སྐྱ་ཐིང་ཐིང་གི་དགུན་ཁའི་པང་དུ་གནས་པའི་སྐྱ་ཐིང་ཐིང་ཡོད་ཚད།  དེ་དག་གི་མ་བཅོས་པའི་སྐྱ་ཐིང་ཐིང་གི་སྒྲ་དབྱངས་ཇི་འདྲའི་སྙན་ཞིང་མ་བཅོས་པའི་སྐྱ་ཐིང་ཐིང་གི་གཟུགས་དབྱིབས་ཇི་འདྲའི་མཛེས་ཨང་།  དགུན་ཁ་འདིར།  ངས་ཕ་ཡུལ་གྱི་ལྷིང་འཇིགས་ཡོད་ཚད་ཀྱི་དོན་སྙིང་རྟོགས་ཤིང།  ངས་ཕ་ཡུལ་གྱི་གཅེར་བུ་ཡོད་ཚད་ཀྱི་ཕྱི་ནང་མཐོང་འོངས།

དགུན་ཁ་འདིར།  ང་རང་ཕ་ཡུལ་དང་ཐག་ཉེ་རུ་གྱུར་ཅིང་ཕ་ཡུལ་ང་དང་ཐག་ཉེ་རུ་སྙེན་གྱིན་འདུག་ལ། ད་ལོའི་དགུན་ཁ་འདིར།  ངས་ད་གཟོད་དགུན་ཁ་ཡི་གེར་འོངས་ཤིང་།  དགུན་ཁའི་དུས་ཀྱི་སྐྱ་ཐིང་ཐིང་གི་ཕ་ཡུལ་དེ་བས་ཀྱང་ཡིད་དུ་འོང་བ་ཚོར། \

 ༢༠༡༧ལོའི་ཟླ༧པའི་ཚེས༣ནས༨།

 

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

 

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།