ཨ་སྐྱབས་དར་རྒྱས་ཀྱི་བརྩམས་སྒྲུང་《འདྲེ་ཁང》ཞེས་པ།

3250



     ས་རུབ་ལ་ཉེ་འདུག སོག་ཤུལ་དཔོན་གྱིས་ང་རང་སྔགས་པ་ཞིག་ཡིན་པ་ཤེས་རྗེས། འདྲེ་ཁང་དུ་བཙན་གྱིས་གཡུག་ནས་ཁང་སྒོ་དམ་གྱིས་ཕྱི་རུ་འཐེན་ལ། ལྕགས་ཟྭ་ཁྲོག་གེར་བརྒྱབས་པའི་སྒྲ་དེས་ང་རང་ཕྱི་རུ་འགྲོ་བའི་རེ་བ་དེ་རྨེག་མེད་དུ་གཞོམ་སོང། སྔོན་ཆད་ཀྱི་མཛོད་ཁང་འདི་འདྲེ་ཁང་ལ་གྱུར་པ་ནས་བཟུང་། སོག་ཤུལ་སྡེ་བའི་ནང་དུ། གནལ་ལ་མུན་པ་ནག་པོ་འཐིབས། བར་སྣང་ལ་ས་རྡུལ་གྱི་ན་བུན་འཁྲིགས། ས་ལ་ཨ་བྲའི་དམག་གིས་གང་། ཕུ་ནས་འུག་པ་སྟོང་གིས་འུར་དིར་བྱས། འདབས་ནས་སྤྱང་མོ་སྟོང་གིས་ངུ་ཟུག་བྱས། ཐང་ནས་ཝ་སྦེ་མང་པོ་བརྒྱལ་ཞིང་ཟུག་པས་ལྟས་ངན་བཅོ་བརྒྱད་བྱུང་ལུགས་ལ་བལྟས་ན།  སོག་ཤུལ་སྡེ་བའི་མཛོད་ཁང་འདི་དངོས་གནས་འདྲེ་ཁང་ཞིག་ཏུ་གྱུར་ཡོད་པ་འདྲ།  

     འདྲེ་ཁང་ནང་ནག་ཐིབ་ཐིབ་བྱེད། ད་དུང་རུལ་དྲི་ངན་པ་ཞིག་ཀྱང་རླུང་བུས་ཁུར་ནས་ངའི་སྣ་ལམ་དུ་དྲུད་ཡོང་། ང་རང་ཆ་མེད་པའི་ཁང་སྟོང་འདི་ལ་ཡ་མཚན་སྐྱེས་ནས་ཅི་ཞིག་བྱ་དགོས་པའང་མ་ཤེས། ཁང་སྟོང་འདིའི་སྒོ་ནི་ཁྲོག་གེར་བརྒྱབས་ཟིན་པས་ང་ཁང་སྒོར་ཁེན་ནས་བསྡད།

    འདྲེ་ཁང་འདི་ནི་ས་སྟོང་ཉི་མ་དམར་པོ་ཞིག་ན་ཡོད་པས་ད་ནི་དངོས་གནས་འདྲེ་ཁང་འདིའི་ནང་འདྲེ་དང་། བདུད། ཀླུ་དང་བཙན། མ་མོ་སོགས་ཅི་ཞིག་ཡོད་ཀྱང་རང་ཉིད་གཅིག་པུས་ངོ་ཡ་བྱེད་པ་ལས་རོགས་པ་བྱེད་མཁན་ཞིག་གང་ན་ཡོད།

     ད་བར་འཇིགས་སྣང་ཆེན་པོ་སྐྱེས་པའི་སོག་ཤུལ་སྡེ་བའི་མི་རྣམས་ཀྱང་ཉིན་རེ་ལས་ཉིན་རེ་སྐྲག་པར་གྱུར་ནས་མཐར་ཁང་སྟོང་འདི་ལ་འདྲེ་ཁང་ཞེས་བཏགས་པ་དང་། དེ་ན་འདྲེ་འདུག་ཅེས་བཤད་དེ་ས་ཆ་གཞན་ལ་གནས་སྤར་སོང་།

     ཡུད་ཙམ་འགོར་བ་ན། ང་གཞི་ནས་གཉིད་ལས་སད་པ་བཞིན། རང་ཉིད་སྔགས་པ་ཞིག་ཡིན་པས་ཁང་སྟོང་ཞིག་གི་ནང་བཞག་པར་དེ་འདྲའི་སྐྲག་སྣང་ཡོང་དགོས་དོན་མི་འདུག་འདོད་དེ། དྲིལ་བུ་དང་གཡང་གཞི་བཏོན་ནས་གཅོད་འདོན་འགོ་བརྩམས།  

    གཉིད་རབ་རིབ་ཙམ་ཁུག་ནས་ཡུད་ཙམ་སོང་བ་ན། ཁང་པའི་དཀྱིལ་དབུས་སུ་མི་ཞིག་གིས་མཆོད་མེ་སྒྲོན་པའི་སྒྲ་ཐོས་བྱུང་ལ། མཆོད་མེའི་འོད་ཀྱིས་ཁང་པའི་ནང་འོད་ཆིལ་ལེར་སོང་།

      ཁང་པའི་དཀྱིལ་དུ་ལྭ་བ་ནག་པོ་གྱོན་ལ། ལག་ཏུ་ལྕགས་ཐག་བཟུང་བ། མགོ་སྐྲ་རྫོབས་ལ་འཕྱང་བ་དེའི་ངོ་ཕྱེད་བཀབས་ནས་མགོ་བོ་འཕྲེད་དུ་གཡུག་བཞིན། ཁ་ནས་ཧུ་ཤུ་སྒྲོག་གིན  སོ་སྒྲ་གྲོ་ཡོས་འཆའ་འཆའ་བྱེད་བཞིན་ང་ཡོད་སའི་ཕྱོགས་སུ་ནག་ཡོལ་ཡོལ་ཐོན་བྱུང་།

      ངས་ལག་གཡས་པས་མི་ལྤགས་རློན་པའི་གཡང་གཞི་དེ་ཀླད་ལ་བསྐོར་བ་དང་། ལག་གཡོན་པས་མི་རྐང་དཀར་པོའི་རྐང་དུང་ཉིན་དཀར་མོ་ལ་དུ་བ་འཐུལ་ལེ། མཚན་ནག་པོ་ལ་མེ་རི་འབར་ལེ་དེ་འབུད་བཞིན།  ང་ནི་མི་ཤ་གསོན་ཟ་བྱེད་མཁན། མི་ཁྲག་དྲོན་མོར་འཐུང་བའི་ཤི་འདྲེ་མགོ་མེད་ཟེར་བ་དེ་ཡིན། དོ་དགོང་ར་ཚེ་ཟད་འཕར་ཚང་སྒོ་ལ་ཐོན་པའི་འདྲེ་རྒན་ཁྱོད་དམར་གསོད་གཏོང་རྒྱུ་ཡིན་ཞེས་གཡང་གཞི་ཀླད་ལ་བསྐོར་དེ་ལྭ་ནག་གྱོན་པའི་མི་དེར་ལན་གསུམ་བྲབས་པ་ན། ལྭ་ནག་གྱོན་པའི་མི་དེས་ཤུགས་རིང་འདེབས་བཞིན་ས་ལ་འགྱེལ་སོང་བ་དང་། གཡང་གཞི་ཤུགས་ཀྱིས་བསྐོར་པའི་དབང་གིས་མཆོད་མེ་ཡང་གཟིམ་ཟིན་པས་ང་རང་ཅི་བྱེད་འདི་བྱེད་མེད་པར་སླར་ཡང་སྒོ་རྒྱབ་ལ་ཁེན་ནས་ངལ་གསོ་དགོས་བྱུང་།

      དེ་ནི་ཕལ་ཆེར་མཚན་དཀྱིལ་ཞིག་ལ་སླེབས་ཡོད་དམ།  ཁང་པའི་ཕྱི་རོལ་དུ་རླུང་བུ་ཤུགས་ཀྱི་ལྡང་བའི་སྒྲ་ལས་ཅི་ཡང་མི་འདུག

       ང་སླར་ཡང་སྒོ་རྒྱབ་ལ་ཁེན་ནས་གཉིད་དུ་ཡུར་སོང་།

       ཕྱི་ཉིན། སོག་ཤུལ་དཔོན་གྱིས་ཁང་སྒོ་ཕྱེ་དུས། མཐོ་རི་བོས་ཉི་འོད་ཀྱི་གསེར་ཞྭ་གྱོན་ནས་ཡུན་རིང་ཞིག་ལོན་འདུག

      ཞལ་ངོ་སྨུག་ནག་ཅན་གྱི་སོག་ཤུལ་དཔོན་པོ་ཧ་ལས་པའི་ཉམས་ཀྱིས“ཨ་ཁུ་སྔགས་པ་ལགས། ཁྱོད་བདེ་བར་བཞུགས་འདུག དངོས་གནས་མིང་དོན་མཚུངས་པའི་སྔགས་པ་ཞིག་རེད”ཟེར།

   “ཁྱོད་ཀྱིས་ང་ལ་མགོ་སྐོར་བཏང་སོང་། ང་སྤྲང་པོ་ལ་ཟས་སྦྱིན་རྒྱུ་མེད་རུང་། ཁྱོད་ཀྱིས་ང་རང་མགོ་གཡོག་བཏང་བ་ནི་མི་ངན་ཞིག་གི་ལས་ཀ་རེད།” ང་ཚིག་པ་ཟ་བཞིན་ཁོ་ལ་ཁ་ཡ་བྱེད་འདོད་མེད་པར། ཁུར་བོ་ཁུར་ནས་ལམ་དུ་འགྲོ་གྲབས་བྱས།

     སོག་ཤུལ་དཔོན་གྱིས་ཁ་བཏགས་དཀར་པོ་ཞིག་བཏོན་ནས་ངའི་རྗེས་བཞིན་འབྲངས་ཏེ“ཨ་ཁུ་ལགས་། དགོངས་པ་མ་ཚོམས། དོན་དག་ནི་འདི་འདྲ་ཞིག་རེད།  ང་ལ་དཀའ་ཁེག་ཞིག་ཡོད། ”ཟེར།

       “ཁྱི་ཁ་ཚུམས།” ངས་ཁོ་ལ་དེ་ལྟར་གཤེ་གཤེ་བཏང་རྗེས། ཁོའི་ཉོག་གཏམ་དེ་ཚོ་ལ་ཉན་འདོད་གཏན་ནས་མ་བྱུང་།

      སོག་ཤུལ་དཔོན་གྱིས་ལག་ཟུང་ཐལ་མོ་སྦྱར་དེ་སྔར་བཞིན་ངའི་རྗེས་སུ་འབྲངས་ནས “ཨ་ཁུ་སྔགས་པ་ལགས་། ཁྱོད་དངོས་གནས་དགོངས་པ་མ་ཚོམས།  མདངས་དགོང་འོ་བརྒྱལ་མྱངས་སོང་། ཁང་སྟོང་འདི་སྔོན་ཆད་མཛོད་ཁང་ཆེན་པོ་ཞིག་ཡིན། ཕྱིས་སུ་ངེད་སོག་ཤུལ་སྡེ་བའི་མཛོད་ཁང་སྲུང་མཁན་སེམས་ཁ་མ་བདེ་ནས་རྐེ་ཐག་པ་བྱས་དེ་རང་ཤི་བརྒྱབས་སོང་ལ། དེ་རྗེས་ཁང་པའི་ནང་དུ་། མི་ལ་ལས་མཛོད་ཁང་དུ་མཚན་གུང་མཆོད་མེ་བཀལ་ནས་སུ་ཞིག་གིས་ཁ་བརྡ་བྱེད་པའི་པའི་སྒྲ་ཐོས་ལ། མི་ལ་ལས་རྐེ་ལ་ལྕགས་ཐག་འདོམས་པ་བཅོ་བརྒྱད་དྲུད་པའི་མི་ཞིག་གིས་མི་མགོ་སྐམ་པོ་འགའ་ཁུར་ནས་ཡར་རྒྱུག་མར་རྒྱུག་བྱེད་བཞིན་པ་མཐོང་ལ། དེ་ནས་ལོ་མང་པོ་ཞིག་གི་རིང་ལ། མཛོད་ཁང་འདིའི་གམ་དུ་ཉིན་དཀར་མི་རེ་འགྲོ་ཕོད་པ་མ་ཟད་། མཚན་མོ་ནང་དུ་འགྲོ་ཕོད་མཁན་གཅིག་ཀྱང་མ་བྱུང་། ནང་གི་ཅ་ལག་རྩ་ཆེན་ཚོ་ཡང་གདོན་ནོན་རེད་ཟེར་ནས་བདག་པོ་བྱེད་མཁན་མ་བྱུང་ལ། ཚང་མས་འདི་ལ་འདྲེ་ཁང་ཞེས་པའི་མིང་ཞིག་ཀྱང་བཏགས་ཡོད”ཅེས་བདེན་ཅོག་ཅོག་གིས་བཤད།

    “ཧིན། ཁྱོད་ཀྱིས་ལབ་མ་རྒྱག  དེ་ན་ཁྱོད་ཀྱིས་ང་འདྲེ་ཁང་དུ་བཅུག་ནས་གསོད་འདོད་པ་ཡིན་ནམ། ”

  “མིན་ལགས།  འོན་ཀྱང་ང་ཚོའི་སྡེ་བའི་ནང་དུ་ད་བར་སྔགས་པ་ཡིན་ཟེར་མཁན། གཅོད་པ་ཡིན་ཟེར་མངན།   མཐུ་དང་ནུས་པ་ཡོད་ཟེར་བའི་ཁ་ཕོ་ཅན་མང་པོ་ཞིག་ཡོང་ཡང་དོན་དངོས་སུ་མཚན་མོ་ཁང་པའི་ནང་དུ་བཅུག་ན།  ཕྱི་ཉིན་སེམས་ཐོག་ལ་ཡོད་མཁན་ནི་ནི་ཁྱོད་གཅིག་པུ་མ་གཏོགས་མེད་ལ།  ཁྱོད་ཀྱིས་དངོས་ནས་འདྲེ་ཁང་ནང་གི་འདྲེ་རྒན་དེ་དངོས་སུ་བཏུལ་ཡོད་པ་འདྲ”ཟེར།  

    “དེ་འདྲ་ཞིག་ཡིན་ན།  ངེད་གཉིས་ཀྱིས་ཁང་པའི་ནང་དུ་བསྐྱལ་ལྟ་བཞིག་བྱ། ”

     “ལགས་སོ། ཐུགས་རྗེ་ཆེ། ”

     འདྲེ་ཁང་ཟེར་བའི་ཁང་པ་འདིའི་ནང་དུ་འབྲུ་རིགས་དང་། ཇ་སྒམ། མལ་སྟན་སོགས་མང་པོ་ཞིག་བརྩིགས་ནས་འདུག་ལ། འདི་ནི་སོག་ཤུལ་སྡེ་བའི་ཐུན་མོང་གི་མཛོད་ཁང་ཞིག་ཡིན་ཡང་། ལོ་མང་པོའི་རིང་ལ་མཛོད་ཁང་ནང་དུ་ཁང་བདག་དཔྱངས་ནས་རང་ཤི་བརྒྱབས་པ་དང་། མི་མང་པོས་ལྕགས་ཐག་ནག་པོ་དྲུད་པའི་འདྲེ་དེ་མཛོད་ཁང་ནང་དུ་འགྲོ་བཞིན་ཡོད་པའི་སྐད་ཆ་གཅིག་གིས་བཅུ་ལ་བཤད། བཅུ་ཡིས་བརྒྱ་ལ་བཤད་པའི་རྗེས་སུ། སོག་ཤུལ་སྡེ་བའི་མི་ཚོས་ཐ་ན་མཛོད་ཁང་ཞེས་པའི་མིང་དེ་གླེང་ཡང་། མི་ལ་ན་ཚ་དང་། ཕྱུགས་ལ་གྱོང་ཁ་ཡོང་བའི་རྣམ་རྟོག་བྱེད་ལ། མཛོད་ཁང་གི་འདྲེ་ཡི་སྐོར་ནས་ཁ་བརྡ་བྱས་ན། སྐྲག་ནས་ལུས་ཀྱི་བ་སྤུ་གཟེང་ལ། བུད་མེད་ཚོ་གཅིག་པུར་སྒོར་གཅིན་ཡང་གཏོང་ན་འགྲོ་མི་ཕོད་པའི་ཚད་དུ་སླེབས་ཡོད།
 
      ཨ་ཙི།  ལྭ་ནག་གྱོན་པའི་འདྲེ་རྒན་དེ་དངོས་གནས་ཤི་སོང་བ་ཡིན་ནམ། གང་ལྟར་ཁང་དཀྱིལ་དུ་ལྕགས་ཐག་ནག་པོ་དུམ་བུ་ཞིག་དང་། མེས་འཚིག་པའི་རེ་ལྡེ་ནག་པོ་ལང་མ་ཞིག་ལྷུང་འདུག དངོས་པོ་དེ་དག་མཐོང་བ་ན།སོག་ཤུལ་དཔོན་ཕྱི་ནུད་བྱེད་བཞིན“འདྲེ་བཏུལ་འདུག འདྲེ་བཏུལ་འདུག”ཅེས་ལབ་སོང་།

     ངས“འདྲེ་ཁང་གི་ཤུལ་དུ་བདུད་འདུལ་མཆོད་རྟེན་ཞིག་བཞེངས་ན། སེམས་ཅན་ལ་བདེ་སྐྱིད་ཡོང་ངེས། འདྲེ་དེ་བཏུལ་ཡོད་མེད་མི་ཤེས་རུང་། ས་འདི་ནས་སྡོད་མི་ཕོད་པ་ཞིག་བཟོས་ཡོད་ཤས་ཆེ”ཞེས་ལབ།

     སོག་ཤུལ་དཔོན་སླར་ཡང་ངའི་ལག་མགོར་དམ་དུ་འཇུས་ནས་ཧ་ཅང་ཡིད་ཆེས་ཡོད་པའི་ཉམས་ཀྱིས“ཨ་ཁུ་སྔགས་པ་ལགས། ངས་སེམས་གཏིང་ནས་ཁྱེད་ལ་བཀའ་དྲིན་ཆེ་ཞུས་པ་ཡིན། ད་ནི་མི་སེམས་བདེ་ལ་འབབ་ངེས”ཞེས་ལབ་བྱུང་།  

       ཉིན་དེ་ནས་བཟུང་། སོག་ཤུལ་སྡེ་བས་ང་ལ་འདྲེ་འདུལ་བླ་མ་ཞེས་མིང་གསར་པ་ཞིག་བཏགས་བྱུང་།  

                                  ༢༠༡༩    ༢   ༡༡


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།