ཀླད་ཀོར་གྱི་བརྩམས་སྒྲུང་《དེ་རིང་གི་སྨར་ཁམས་རྫོང》

62531

 

         ང་རང་བསྡད་སའི་རླངས་འཁོར་འདི་གཞུང་ལམ་གྱི་ཀྱོག་མཚམས་ཆེན་པོ་ཞིག་བརྒྱུད་པ་དང་ཁ་ལོ་པས་དུང་སྒྲ་བར་མེད་དུ་རྡུང་།  ངས་ཅི་བྱུང་བ་ཡིན་ནམ་སྙམ་གྱིན་ཆར་བས་བརླན་པའི་སྒེའུ་ཁུང་ནས་མདུན་ཕྱོགས་སུ་ལྟ་སྐབས་མདུན་ཕྱོགས་ཀྱི་དངོས་པོ་དེ་ལམ་ཁར་ཟུར་སོང་བས་ངས་དེ་ནི་ཅི་ཡིན་པ་གསལ་པོ་ཞིག་མཐོང་མ་ཐུབ། ད་ལྟ་མུན་རུབ་ཟིན་པ་མ་ཟད་ཆར་བའང་འབབ་བཞིན་ཡོད་པས་རླངས་འཁོར་གྱི་གློག་འོད་ཕོག་མེད་པའི་ལམ་ཁར་ཞིབ་པར་བལྟས་ཀྱང་དངོས་པོ་དེ་གསལ་པོ་ཞིག་མཐོང་མ་བྱུང་།

        ཁ་ལོ་པས་རླངས་འཁོར་བཞག་སོང་ལ་སྒེའུ་ཁུང་ཕྱེ་ནས་ཕྱི་རོལ་དུ “ཨ་རོགས  ཨ་རོགས”ཟེར། ངས་ཀྱང་སྒེའུ་ཁུང་ཕྱེ་བ་ན་གློ་བུར་ཐོན་ཡོང་བའི་གྲང་རླུང་ནང་གི་ཆར་ཐིགས་གྲང་མོ་རྣམས་ངའི་གདོང་ལ་བྱོ་ཡོང་བས་ལུས་པོ་ལ་གྲང་འདར་ཤོར་ཞིང་གཉིད་མ་སད་ཀྱི་རིག་པའང་ཇེ་དྭངས་སུ་སོང་། དེ་ནས་ངས་ལམ་ཁར་ལྕགས་རྟ་བཞོན་པའི་ཡུལ་བསྐོར་བ་དེ་གསལ་པོར་མཐོང་བྱུང་། 

      “རྒྱ་ཞིག་རེད”ཁ་ལོ་པ་ལ་དག་སེལ་བྱེད་པ་ན་ཁ་ལོ་པས་ཀྱང་སྒེའུ་ཁུང་ནས“ངས་དུང་བརྡ་ཅི་ཙམ་བཏང་ཡང་ལམ་མི་གཟུར་བ་ཅི་ཡིན”ཞེས་རྒྱ་སྐད་ཀྱིས་འབོད། ཡུལ་བསྐོར་བ་དེ་ལམ་ཁར་ལྕགས་རྟ་ལས་བབས་སོང་ལ་རླངས་འཁོར་གྱི་སྒེའུ་ཁུང་ནང་དུ་ལྟ་བཞིན་སྐད་ཆ་ཅི་ཞིག་བཤད་གྲབས་བྱེད་ཀྱང་ཁོའི་ལུས་པོ་འདར་སིག་སིག་བྱེད་བཞིན་འདུག་པས་མདོག་ཤོར་བའི་མཆུ་ཏོ་དེ་འགུལ་ཙམ་འགུལ་ཙམ་བྱེད་པ་ལས་སྐད་ཆ་ཅི་ཡང་ཐོན་མ་སོང་། ཁ་ལོ་པས་ཁོ་ལ་མི་རངས་བའི་རྣམ་འགྱུར་བསྟན་རྗེས་སྒེའུ་ཁུང་གི་ཁ་བརྒྱབ་གྲབས་བྱེད་ཀྱང་ཡུལ་བསྐོར་བ་དེས་སྒེའུ་ཁུང་གི་ཤེལ་སྒོ་དམ་དུ་བཟུང་འདུག་པས་བརྒྱབ་ཐུབ་མ་སོང་།  

          ཁ་ལོ་པས་རུམ་ནས་དུ་བ་བག་ཆ་ཞིག་བླངས་རྗེས་དུ་རྐང་གཉིས་ཡར་འཐེན་སོང་། དུ་རྐང་གཅིག་སྒེའུ་ཁུང་གི་ཁ་ན་འདར་བཞིན་པའི་མི་དེའི་ཁ་ནང་བཅུག་པ་དང་གཞན་དེ་རང་ཉིད་ཀྱི་ཁ་ནང་བཅུག་རྗེས་སོ་སོའི་དུ་བར་མེ་བསྒྲོན་སོང་།  ཡུལ་བསྐོར་བ་དེས་ཐ་མག་ཤུགས་ཀྱིས་བཞིབས་པས་གློ་ལུ་དྲག་པོ་ཞིག་ཤོར། སྒེའུ་ཁུང་གི་ཁ་རུ་ཁོའི་གདོང་སྐྱ་བོ་དེ་ཅི་ལྟར་དམར་པོར་འགྱུར་ཚུལ་ངས་གསལ་པོ་མཐོང་བྱུང་། གློ་བརྒྱབ་ཚར་རྗེས་ཁོའི་མགོ་སླར་ཡང་སྒེའུ་ཁུང་གི་ཁར་བརྐྱངས་པ་དང“སྨར་ཁམས། སྨར་ཁམས། གང་དུ། གང་དུ་ཡོད”ཅེས་སྐད་ཆ་ལྡབ་ལྡིབ་ངང་བཤད་མ་ཐག་ཁྲོས་ཡོད་པའི་ཁ་ལོ་པའང་གད་མོ་ཤོར་སོང་། 

         ཁ་ལོ་པས་མི་རིང་བའི་ས་ན་གཡོ་བཞིན་པའི་གློག་འོད་རབ་རིབ་དག་ལ་འཛུབ་མོ་གཏོད་ཀྱིན“སྨར་ཁམས་ལ་སླེབས་སོང”ཟེར། ཡུལ་སྐོར་བ་དེས་རང་ཉིད་ཀྱི་ལྕགས་རྟ་དེ་འཁྲིད་མ་འདེད་ཀྱིས་མདུན་དུ་ཕྱིན་སོང་། མོ་ཊས་ཁོ་རང་བརྒྱབ་ཏུ་བཞག་རྗེས་འདུན་དུ་བསྐྱོད། སྨར་ཁམས་རྫོང་གིས་ས་རྐོ་རྡོ་རྐོ་བྱེད་བཞིན་སྲང་ལམ་གསར་བཟོ་བྱེད་པའི་སྒང་ལ་ཆར་བ་ཆེན་པོ་ཞིག་བབས་འདུག་པས་སྲང་ལམ་ཡོད་ཚད་འདམ་པའི་ཞིང་ཁམས་སུ་གྱུར་འདུག  ཁང་པ་དང་མོ་ཊ་རྣམས་ནི་ཞིང་ཁམས་དེའི་དཀྱིལ་དུ་གནས་པའི་ཁེར་གླིང་དུ་གྱུར། 

          ང་རང་སྡོད་སའི་མོ་ཊ་དེ་འདམ་པའི་ཁྲོད་དུ་གཡས་གཡོ་གཡོན་གཡོ་བྱེད་བཞིན་འགྲོ་སྐབས་ངའི་སེམས་སུ་པེ་ཅིང་གི་ལུས་རྩལ་སློབ་ཆེན་ནང་སློབ་གཉེར་བྱེད་བཞིན་པའི་ཕ་ཡུལ་གཅིག་པའི་གྲོགས་པོ་རྒྱལ་མཚན་དྲན་བྱུང་།  ང་གཉིས་ཕལ་ཆེར་དུས་གཅིག་ལ་སློབ་གྲྭ་ནས་ཐོན་ནའང་ང་རང་ཅུང་སྔ་ཙམ་གྱི་པེ་ཅིང་ནས་ལམ་ལ་ཆས། ང་རང་མེ་འཁོར་དུ་ཡོད་དུས་ཁོས་ང་ལ་ཁ་པར་བརྒྱབ་ནས་ཁྲིན་ཏུའུ་རུ་ཡིན་གཅིག་མིན་གཉིས་འཛོམས་དགོས་ཟེར།  ངས་ལགས་སོ་ཟེར་ནས་ཁྲིན་ཏུའུ་རུ་ཁོ་རང་བསྒུགས་པ་ཡིན།  ཉིན་གཅིག་གི་རྗེས་སུ་ངས་ཁོ་ལ་ཁ་པར་བཏང་ནས་ཁྲིན་ཏུའུ་རུ་སླེབ་ཡོད་མེད་འདྲི་དུས་ཁོ་རང་ཁྲིན་ཏུའུ་ཡི་མེ་འཁོར་འབབ་ཚུགས་སུ་སླེབས་མ་ཐག་ཁ་ལོ་བ་ཞིག་གིས་ཁོ་རང་ཁ་བཀག་ནས་དར་རྩེ་མདོ་རུ་འགྲོ་ཞེས་ཨུ་ཚུགས་བྱེད་ཀྱིན་འདུག་པས་ཁོ་དེ་ནང་འཛུལ་བ་ཡིན་ཟེར།  

             ཉིན་དེར་ང་རང་ཡང་རླངས་འཁོར་དེ་འདྲ་ཞིག་བཀག་ནས་དར་མདོའི་ཕྱོགས་སུ་ཆས།  དར་མདོ་རུ་སླེབ་དུས་མཚན་མོའི་ཆུ་ཚོད་བཅུ་གཉིས་ཟིན་འདུག་ཅིང་ངས་ཁོ་ཡང་དར་མདོར་ཡོད་ངེས་སྙམ་གྱིན་ཁ་པར་བརྒྱབ་དུས་ཁོ་རང་འབའ་ཐང་གི་ཕྱོགས་སུ་ཆས་བཞིན་ཡོད་ཟེར།  ཁ་པར་གྱི་རྒྱབ་ལྗོངས་སུ་མོ་ཊའི་སྐད་གྲག་འོང་།  ཕྱི་ཉིན་ང་རང་འབའ་ཐང་དུ་སླེབས་དུས་ཁོས་སྨར་ཁམས་ཀྱི་འབུམ་མཚོའི་མགྲོན་ཁང་དུ་ང་རང་སྒུག་བཞིན་ཡོད་ཟེར།  དུས་ད་ལྟ་ངས་འདམ་ཟབ་ནས་གཡས་གཡོ་གཡོན་གཡོ་བྱེད་བཞིན་འགྲོ་བའི་རླངས་འཁོར་འདི་ནས་ཁོ་ལ་ཁ་པར་ཐེངས་གསུམ་ཙམ་བརྒྱབ་ཀྱང་འགྲོ་གི་མི་འདུག

          ངས་ཁ་ལོ་པ་ལ“འབུམ་མཚོའི་མགྲོན་ཁང་གི་སྒོ་ཁར་བཞག་རོགས”ཅེས་ཞུ་བ་ཕུལ། ཁ་ལོ་བས་མོ་ཊ་ལམ་འགྲམ་དུ་བཞག་སྟེ་གཡས་གཡོན་གང་སར་ཞིབ་ལྟ་ཡུན་རིང་བྱས་རྗེས“ངས་གང་དུ་སླེབས་པའང་ཤེས་ས་མི་འདུག”ཅེས་བཤད་བྱུང་བས་ཁ་ལོ་བས་རྩེད་མཚར་འདྲ་བྱེད་པ་མིན་ནམ་སྙམ་བཞིན་ངས་ཀྱང་སྒེའུ་ཁུང་ཕྱེ་ནས་ཕྱི་རོལ་དུ་ཞིབ་ལྟ་ཞིག་བྱས། ཕྱི་རོལ་གྱི་མོ་ཊའི་གློག་འོད་ཀྱིས་གསལ་མཚམས་མ་གཏོགས།  ཡོད་ཚད་ནི་མུན་པ་རེད།མཐར་ན་གློག་འོད་རབ་རིབ་ཙམ་གསལ་བའི་སྒེའུ་ཁུང་ཞིག་ཀྱང་མཐོང་རྒྱུ་མི་འདུག  དུས་རྒྱུན་རྒྱུས་ཤིན་ཏུ་ཆེ་བའི་སྨར་ཁམས་རྫོང་གི་སྲང་ལམ་གྱི་ཟུར་དག་ད་ལྟ་རྣམ་པ་ཡོངས་སུ་འགྱུར་འདུག་ལ་མ་འགྱུར་བ་དག་ཀྱང་གཏིང་རིང་བས་མུན་པས་བསྒྲིབས་ཟིན་པ་འདྲ།  ངས་གཡས་གཡོན་གྱི་མགྲོན་ཁང་དག་ངོ་ཤེས་རྒྱུ་ཕར་ཞོག  རང་ཉིད་སྡོད་པའི་རླངས་འཁོར་འདི་སྲང་ལམ་གང་དུ་སླེབས་ཡོད་པའང་ཤེས་ཀྱི་མི་འདུག

          ངས་ཁ་ལོ་བ་ལ“ང་རང་འདི་གར་འབབ་གི་ཡིན”ཟེར་བཞིན་མོ་ཊའི་གླ་ཆ་བརྩིས་རྗེས་མོ་ཊ་ལས་བབས་པ་ན་ས་ངོས་སུ་དང་པོ་སྤོ་བའི་རྐང་པ་དེའི་ལྷམ་ཡོད་ཚད་འདམ་དུ་ནུབ་སོང་།  ངས་ཁ་པར་གྱི་འོད་ལ་བརྟེན་ནས་སྲང་བར་ན་ཡར་ཉུལ་མར་ཉུལ་བྱེད་མཐར་གཞི་ནས་འབུམ་མཚོའི་མགྲོན་ཁང་རྙེད་ཙམ་བྱུང་། ངས་སྒོ་ཡོལ་ཕུད་ནས་ནང་དུ་ཐོན་པ་ན་མིང་ཐོ་འགོད་སའི་སྟེགས་བུའི་རྒྱབ་ཏུ་ཉལ་ཡོད་པའི་སྦྱིན་བདག་མའི་རྨི་ལམ་དཀྲོགས་པ་འདྲ།  མོས་མགོ་བོ་ཡར་བཀྱགས་ནས་ང་ལ་ལྟ་ཙམ་བྱེད།  ངས་མོ་ལ“ཕྱི་རོལ་གྱི་ཡོད་ཚད་འདམ་པ་རེད”ཅེས་ཐལ་ཡང་།  མོས་སྣང་དོགས་ཅི་ཡང་མེད་པར“མགྲོན་ཁང་ཡོད་ཚད་ཀྱང་འདམ་པ་རེད”ཟེར། 

           ངས་པར་ཁུག་ནས་ཐོབ་ཐང་ལག་འཁྱེར་ཡར་བླངས་ནས་མོ་ལ་སྤྲད་པ་དང“མི་གཅིག་སྡོད་སའི་ཁང་མིག་ཡོད་དམ”ཞེས་འདྲི་བ་ན“དཔང་ཡིག་མི་དགོས། མིག་གཅིག་སྡོད་སའི་ཁང་མིག་ལ་གླ་སྒོར་མོ་བརྒྱ་ཐམ་པ་རེད”ཟེར།   ངས་མོ་ལ་སྒོར་མོ་བརྒྱ་ཕར་སྤྲོད་ཞོར་དུ“དེ་རིང་མགྲོན་ཁང་དུ་མིང་ལ་རྒྱལ་མཚན་ཟེར་བ་ཞིག་བསྡད་ཡོད་མེད་མིང་ཐོ་འཚོལ་རོགས”ཞུ་བ་ན་མོས“མིང་ཐོ་འགོད་ཀྱིན་མེད་པས་བཙལ་མི་ཐུབ”ཟེར།རྒྱལ་མཚན་འཚོལ་བའི་རེ་བ་ཟད་སོང་སྙམ་གྱིན་ཐོབ་ཐང་ལག་འཁྱེར་དང་ལྡེ་མིག་བླངས་ནས་སྡོད་ཁང་འཚོལ་དུ་སོང་།  ང་རང་སྡོད་སའི་ཁང་མིག་དེ་ཆེ་རྒྱུ་མེད་ནའང་ཡོད་ཚད་སྤུས་དག་རེད་ལ་སྐུད་མེད་དྲ་བ་ཡོད་པར་མ་ཟད།  ཁྲུས་ཁང་ཡང་འདུག  རྒྱབ་ཁུག་དག་ཁང་པའི་ཟུར་ཞིག་ཏུ་བཞག་རྗེས་འདམ་གྱིས་སྦགས་པའི་གོས་ལྷམ་ཕུད་ནས་ཁྲས་ཁང་དུ་འཛུལ།  ཡིན་ཡང་ལུས་པོ་འཁྲུད་བྱེད་ཀྱི་ཆུ་དེ་སྐབས་རེར་ཚ་ལྷང་ལྷང་ངང་ངའི་མགོ་ཐོག་ཏུ་བྱོ་ཡོང་བས་ངས་ཨ་ཚ་ཚ་ཟེར་དགོས་བྱུང་།   མཚམས་རེར་ཆུ་ཚ་མོ་དེ་གློ་བུར་གྲང་ཤིག་ཤིག་ཏུ་འགྱུར་འགྲོ་བས་ཨ་ཆུ་ཆུ་ཟེར་དགོས་བྱུང་།

          ང་རང་གཅེར་བུའི་ངང་གློག་གིས་དྲོ་ལྷམ་ལྷམ་བཟོས་ཡོད་པའི་མལ་སར་འཛུལ་དུས་མཐོ་སར་གྲང་དྲག་པས་ཡིན་ནམ། ཉིན་གང་རླངས་འཁོར་ནང་བསྡད་པས་ངལ་དྲག་པས་ཡིན།  སྐད་ཅིག་ལ་རིག་པ་མག་མོག་ཏུ་གྱུར། ངས་ན་བུན་དུ་བསྐྱོད་པ་ལྟ་བུའི་རྨི་ལམ་སྲབ་མོ་ཞིག་རྨི་བཞིན་པ་འདྲ་ཡང་སྔས་འོག་ཁ་པར་གྱི་སྐད་འཕྲིན་ལས“ཏིང་ཏིང”ཞེས་སྒྲ་བར་མེད་དུ་གྲགས་ཡོང་བས་ང་རང་གཏིང་རིང་བའི་རྨི་ལམ་དུ་ལྷུང་མ་ཐུབ། གཉིད་མ་སད་ཀྱིས་ལག་ཉུལ་ཞིག་བྱས་ནས་ཁ་པར་ཚུར་བླངས་པ་དང་མིག་རུབ་རུབ་ཀྱིས་སྐད་འཕྲིན་ཁ་ཕྱེ་ནས་བལྟ་དུས།  མ་གཞི་སྐད་མང་པོ་རྒྱག་ས་དེ“འབུ་ཚ་སྡེ་བའི་གྲོགས་ཚོམས”ཟེར་བའི་གྲོགས་པོའི་ཚོམས་དེ་ཡིན་འདུག  ང་དང་འབྲེལ་བ་མེད་པའི་སྐད་ཆ་ཁ་ཤས་ཤིག་གིས་ངའི་གཉིད་ཀྱི་བདེ་བ་དཀྲོགས་པ་དྲན་ཚེ།  གྲོགས་ཚོམས་ནང་གི་སྒོ་ཁར་ལངས་ནས་སྐད་ཅོ་རྒྱག་མཁན་དག་ལ་སུན་སྣང་འགོག་མེད་དུ་སྐྱེས། 

         ཡིན་ཡང་ངའི་གཉིད་ཀྱི་བདེ་བ་དཀྲོགས་ནི་དཀྲོགས་ཟིན་པས་མཚར་སྣང་གི་སེམས་པ་ཞིག་གིས་གྲོགས་ཚོམས་དེ་འཛུབ་མོས་མནན་པ་དང་ཅི་བྱུང་བལྟས་པ་ན་དེའི་ནང་དུ་སྐད་ཆ་ཉིས་བརྒྱ་ལྷག་འཚང་ཡོད་པ་གསལ་འོང་། གྲོགས་ཚོམས་དེ་ནི་ང་ཚོ་འབུམ་ཚ་སྡེ་བའི་ཕོ་གསར་ཁྱུ་གཅིག་གིས་བཙུགས་པ་རེད་ལ་ཟླ་གཅིག་གི་སྔོན་དུ་མི་ཞིག་གིས་ང་རང་ནང་འཇུག་བྱས་སོང་།  གྲོགས་ཚོམས་དེ་ནི་རིག་གཞུང་དང་རྩོམ་རིག  སྙན་ངག་གི་གྲོགས་ཚོམས་བཞིན་ལྟ་བ་ཆེན་པོ་མང་པོ་དྲག་ཆར་འབབ་འདྲ་བརྡོལ་རྗེས་མི་ཚང་ཚང་མ་ཁུ་སིམ་མེར་བསྡད་པ་དང་མི་འདྲ་བར།  ཉིན་ཀུན་འུར་ཟིང་ངེར་བྱེད་པའི་གྲོགས་ཚོམས་ཤིག་རེད། ང་ཚོའི་སྡེ་བའི་གསར་འགྱུར་ཆུང་ཆུང་དག་གླེང་བ་མ་ཟད།  སང་ཉིན་གང་གི་ཕྱོགས་སུ་དབྱར་རྩྭ་རྐོ་བར་འགྲོ་རྒྱུ་ཁ་ཆད་བྱེད་ཅིང་།  ཚོགས་འདུ་འཚོགས་བརྡ་དང་སུ་ཚང་གི་ཞིང་ནང་དུ་སུ་ཚང་གི་ཕག་མ་འཛུལ་སོང་བ་ལ་སོགས་ཀྱང་འདི་ནས་འབོད་འོང་བས་ང་རང་པེ་ཅིང་གི་སྲང་ལམ་ག་གེ་མོ་ཞིག་གི་ཐོག་ཏུ་འགྲོ་སྐབས་སྐད་དེ་དག་ཉན་ཐེངས་རེར་སྐབས་སྐབས་སུ་གློ་བུར་དགོད་ཤོར་ལ་མཚམས་མཚམས་སུ་སྐྱོ་སྣང་ཞིག་ཤར་རེ་སྐྱེས་ཡོང་།  དེ་རིང་རྫོང་ཁ་འདི་འབུམ་མཚོའི་མགྲོན་ཁང་ནས་མིག་རུབ་རུབ་ཀྱིས་སྐད་འཕྲིན་གྱིས་ངོས་སུ་ལྟ་བཞིན་དོན་དག་ཅི་ཞིག་བྱུང་བ་ཡིན་ནམ་སྙམ།

           ངས“འབུ་ཚ་སྡེ་བའི་གྲོགས་ཚོམས”ཀྱི་སྐད་བརྡ་ཆེས་ཐོག་མ་ནས་འཛུམ་མོས་མནན་ནས་བཀླགས། ང་ཚོའི་སྡེ་བའི་ཕོ་གསར་སངས་རྒྱས་ཀྱིས“དེ་རིང་ཞོགས་པར་ང་རང་འབུ་རྐོ་བར་སོང་ནས་རི་སྐེད་ལ་སླེབས་དུས་མི་རྐྱང་ཚེ་བསམ་གྱིས་ཁོ་ཚང་གི་བོང་བུ་དེ་བཞོན་ནས་སྡེ་འདབ་ཀྱི་ཕྱོགས་སུ་འགྲོ་བཞིན་འདུག”ཟེར། ཕོ་གསར་གཞན་རྣམས་ཀྱིས་དེའི་ལན་དུ“ཡིན་མི་སྲིད། ཁྱོད་རང་ལ་མིག་འཁྲུལ་བྱུང་བ་མིན་ནམ”ཟེར་འདུག  ཕོ་གསར་སངས་རྒྱས་ཀྱི་སྐད་ཆ་དེ་ལ་མི་རྣམས་དོགས་པ་སྐྱེས་པ་ཡང་ཁག་མི་འདུག  ང་ཚོ་སྡེ་བའི་མི་རྐྱང་ཚེ་བསམ་ཞོགས་སྔ་ལངས་བྱེད་པ་ནི་ངོ་མ་ཞོགས་པའི་ཉི་མ་ནུབ་ནས་ཤར་ཡོང་བ་དང་ཨ་ན་མ་ན་རེད། མི་རྐྱང་ཚེ་བསམ་ཞོགས་པ་ཡར་ལངས་ནས་ཕྱི་རོལ་དུ་ཐོན་པའི་གནས་ཚུལ་དེ་ངས་མཐོང་མ་མྱོང་ལ་ཐོས་ཀྱང་མ་མྱོང་།  ང་རང་ཕ་ཡུལ་དུ་ལོག་ཐེངས་རེར་རྔུལ་ཆུ་ཁྲོམ་ཁྲོམ་གྱིས་སྟོན་རྔ་བའམ་ཁུར་པོ་ཁུར་ནས་འགྲོ་དུས་མི་རྐྱང་ཚེ་བསམ་ཁོ་ཚང་གི་རྩྭ་ཡང་སྐྱེས་ཟིན་པའི་ཁང་པའི་ཐོག་ཏུ་ཙོག་ནས་པི་ལྦང་དཀྲོལ་འོང་། 

         ངས་ངལ་རྩོལ་བྱེད་སྐབས་སུ་པི་ལྦང་གི་སྒྲ་དེ་ཐོས་མ་ཐག་སུན་སྣང་ཞིག་ངང་གིས་སྐྱེས་ནའང་ཡུལ་མི་ཚོ་ནི་དེ་ལས་ལྡོག་སྟེ་པི་ལྦང་གི་སྒྲ་དེ་ཞིང་ཁའི་སྟར་སྡོང་ནས་གྲག་པའི་བྱེའུ་ཡིས་སྒྲ་བཞིན་རྒྱུན་ལྡན་ཞིག་ཏུ་ངོས་འཛིན་གྱི་ཡོད་པ་འདྲ།  པི་ལྦང་གི་སྒྲ་དེ་ཐོས་ཐེངས་རེར“ཚེ་བསམ་མལ་ལས་ལངས་འདུག  ཆུ་ཚོད་གཉིས་པར་ཟིན་པ་འདྲ”ཞེས་ཟེར་ངེས། མི་རྐྱང་ཚེ་བསམ་མལ་ལས་ལངས་པ་འཕྱི་པོ་ཡིན་ནའང་དུས་ལྟར་མལ་ལས་ལངས་མཁན་ཞིག་རེད་ཟེར་ཆོག  རྒྱུ་མཚན་ནི་ཕྱི་དྲོའི་ཆུ་ཚོད་གཉིས་པར་མལ་ལས་ལངས་རྗེས་རང་ཁྱིམ་གྱི་ཁང་ཐོག་ཏུ་འོང་ནས་པི་ལྦང་དུས་ལྟར་དཀྲོལ་འོང་བ་རེད། དེ་ན་ཁོ་རང་ཆུ་ཚོད་དང་པོ་ལ་མལ་ལས་ལངས་མི་སྲིད་ལ་ཆུ་ཚོད་གསུམ་པ་ལ་མལ་ལས་ལངས་མི་སྲིད། 

         མི་རྐྱང་ཚེ་བསམ་གྱིས་ཆུ་ཚོད་གཉིས་པར་དུས་ལྟར་ལངས་ནས་པི་ལྦང་དཀྲོལ་བ་འོང་བ་དེ་ཡང་རྒྱུན་ལྡན་གྱི་སྣང་ཚུལ་ཞིག་ཡིན་པ་འདྲ། ང་ཚོ་འབུ་ཚ་སྡེ་བའི་སྡེ་འདབ་ཀྱི་སྟར་སྡོང་ཆེན་པོ་དེའི་འོག་ཏུ་འཛོམས་ནས་གཏམ་རྒྱུད་བཤད་རྒྱུར་དགའ་བའི་མི་རྒན་ཚོས་མི་རྐྱང་ཚེ་བསམ་གྱིས་པི་ལྦང་དཀྲོལ་མི་ཤེས་པའི་སྔོན་གྱི་བྱིས་དུས་ཀྱི་གཏམ་རྒྱུད་དག་གསལ་པོ་ཞིག་བཤད་རྒྱུ་མི་འདུག་པ་ལ་བལྟས་ན་མི་རྐྱང་ཚེ་བསམ་ཨ་མའི་མངལ་ནས་ཐོན་མ་ཐག་ཁོ་ཚང་གི་རྩྭ་སྐྱེས་པའི་ཁང་སྟེང་ནས་པི་ལྦང་དཀྲོལ་ཡོང་བ་འདྲ་ལ།  མི་རྐྱང་ཚེ་བསམ་འཇིག་རྟེན་འདི་ན་མེད་པའི་གོང་དུ་པི་ལྦང་གི་སྒྲ་དེ་ཆུ་ཚོད་གཉིས་པར་དུས་ལྟར་གྲག་འོང་པ་དང་ཡང་འདྲ།

        ཕོ་གསར་སངས་རྒྱས་ཀྱི་སྐད་ཆ་ལ་མི་ཀུན་བདེན་པར་བཟུང་བའི་སྐབས་དེར་ཕོ་གསར་ཟླ་བ་བཀྲ་ཤིས་ཀྱིས་ཀྱང“འབུ་ཚ་སྡེ་བའི་གྲོགས་ཚོམས”སུ“ངོ་མ་རེད།  དེ་རིང་ཞོགས་པར་ངས་ལྷ་བསང་བཏང་ནས་ཀཱི་སྒྲ་ལན་གསུམ་བརྒྱབ་ཚར་བ་དང་བོང་བུའི་དྲིལ་བུ་ཞིག་ཐོས་བྱུང་བས་མི་རྐྱང་ཚེ་བསམ་ཚང་གི་བོང་བུ་དེས་འདོགས་ཐག་བཅད་ནས་བྲོས་ཡོང་བ་ཨེ་ཡིན་སྙམ་གྱིན་དྲིལ་སྒྲ་གྲགས་ཕྱོགས་སུ་ལྟ་སྐབས།  མི་རྐྱང་ཚེ་བསམ་གྱིས་ཡིན་བསམ་བསམ་གྱིས་ཁོ་ཚང་གི་བོང་བུ་དེ་ཞོན་ནས་ཐོན་