ཨ་སྐྱབས་དར་རྒྱས་ཀྱི་བརྩམས་སྒྲུང་གསར་པ་གཉིས་ཆེད་འགོད།

63851



        __ངའི་རུས་མིང་ལ་ཨ་སྐྱབས་དར་རྒྱས་ཟེར།1985ལོར་གསེར་རྟ་རྫོང་མཁན་ལེབ་ཡུལ་ཚོའི་ཨ་སྐྱབས་སྡེ་བ་རུ་སྐྱེས།2009ལོར་ཀྲུང་དབྱང་མི་རིགས་སློབ་ཆེན་ནས་སློབ་མཐར་ ཕྱིན།རྩོམ་རིག་ནི་ཁོའི་དགའ་སྐྱོ་ཆགས་སྡང་དང་།མི་ཚེའི་རིན་ཐང་གླེང་སའི་ཁ་ཕྱོགས་ ཤིག་ཏུ་བཟུང་ནས་ད་བར《སྦྲང་ཆར》དང་།《གངས་དཀར་རི་བོ》《བོད་ཀྱི་རྩོམ་རིག་སྒྱུ་རྩལ》《མི་རིགས་རྩོམ་རིག》《ལྷོ་ཁའི་རྩོམ་རིག》《དཀར་མཛེས་ཚགས་པར》《གངས་ལྗོངས་ཉི་གཞོན》སོགས་གཞུང་སྒེར་གྱི་དུས་དེབ་དང་དྲ་ཚིགས་སོགས་སུ་སྒྲུང་ གཏམ་མི་ཉུང་བ་ཞིག་སྤེལ་ལ།2015ལོར་སློབ་རའི་འཚོ་བ་བརྗོད་བྱ་བྱས་པའི་དཀར་ མཛེས་ཁུལ་གྱི་བོད་ཡིག་གི་སྒྲུང་རིང་ཐོག་《ལམ་འགྲོ་བ》པར་དུ་བསྐྲུན་ལ།2011ལོར་སྒྲུང་ ཐུང《ཀུན་དགའ》ལ《གངས་དཀར་རི་བོ》དུས་དེབ་ཀྱི་སྒྲུང་གཏམ་ཕུལ་བྱུང་བྱ་དགའ་དང་།2015ལོར་སྒྲུང་ཐུང《གཡག་རོག་རོག》ལ་སྐབས་དྲུག་པའི་སི་ཁྲོན་གྲངས་ཉུང་མི་རིགས་རྩོམ་རིག་གསར་རྩོམ་ཕུལ་བྱུང་བྱ་དགའ་ཐོབ།


མཁའ་འགྲོ་མ། 


       བཀྲ་ཤིས་པའི་ཁ་བ་དཀར་པོ་ནི་བར་སྣང་ནས་ལྡིང་སྐོར་བྱེད་བཞིན་གསེར་ལུང་སྡེ་བའི་དཔོན་རྒན་ཟླ་བ་ཚང་གི་མཐིང་སྨུག་སྦྲ་སྟེང་དུ་ལྷུང་བྱུང་།  སང་ཉིན་ནི་དཔོན་རྒན་ཟླ་བ་ཚང་གི་བུ་ཉི་མའི་བཀྲ་ཤིས་གཉེན་སྟོན་ཡིན་པས་སྦྲ་ནང་དུ། གཉེན་སྟོན་ལ་གྲ་སྒྲིག་བྱེད་པའི་མི་ཚོས་འུར་ཟིང་གིས་ཁེངས་འདུག 

         མཚམས་ཤིག་ལ།  སྦྲ་ཡི་ཡར་སྒྱེད་ཀྱི་གོ་འགྲམ་དུ་ལྷོད་གྱི་ལེར་སྡོད་པའི་དཔོན་རྒན་ཟླ་བས་དོན་དག་གལ་ཆེན་ཞིག་ཡིད་ལ་འཁོར་ནས།  “ཡ། ཉི་མ།  ཁྱོད་ཀྱིས་ཤ་གསེས་ནས་སྡོད་ཁོམ་ག་ལ་ཡོད།  ཁྱོད་ལ་མོ་འབྲོང་དགོན་པར་སོང་ནས་སྤྲུལ་ཐོག་རྒོད་གཉེན་སྟོན་གྱི་གཡང་འབོད་འདོན་དུ་ཆིབས་བསུ་བྱ་དགོས”ཟེར།  ལྕགས་ཐབ་མར་སྒྱེད་དུ་སྡོད་པའི་བུ་ཉི་མས་ཀྱང་གཡག་ཤ་ཚང་ར་དེ་གསེས་མཚམས་བཞག་ནས་སྣང་བ་དགའ་ཡ་ལེར “ཨ་ཕ་ལགས། ང་ད་ལྟ་སོང་ནས་སྤྲུལ་སྐུ་ཐོག་རྒོད་གདན་དྲངས་ཡོང”ཞེས་སྦྲ་སྒོར་བུད་ནས་འཕྲུལ་རྟའི་ཕྱོགས་སུ་སོང་བ་ན། དཔོན་རྒན་ཟླ་བ་ཡང་གོ་འགྲམ་ནས་ཡར་ལངས་ཏེ“འོ།  ལམ་ནས་གཟབ་གཟབ་བྱོས།  དེ་རིང་ལམ་ན་ཁ་བ་ཆེ་བས་དལ་མོ་སོང”ཞེས་ཟེར་ཞོར་ཐབ་ཀ་ན་ལས་ཀ་གཞན་དག་ལས་བཞིན་པའི་མི་ཚོར་ཁ་བཀོད་འཐེན་དུ་སོང་། 

   ཉིན་དེར། གསེར་འབྲོང་རི་སྨུག་པོའི་རི་རྩེ་ནས་སྤྲིན་པ་དཀར་པོ་ལུག་ཁྱི་འདྲ་བ་དག་ཤར་རླུང་གིས་དེད་ནས་ནུབ་ཕྱོགས་སུ་སོང་ལ།  གསེར་ལུང་གི་ནུབ་ལམ་ས་ནས་ཚེ་འདི་ཕྱི་མེ་ལོང་བལྟས་པ་བཞིན་གསལ་བའི་མཁའ་འགྲོ་མ་ཞིག  རླུང་བུའི་འགྲོས་ལས་མྱུར་བའི་འཁོར་ཆུང་ཞིག་ལས་དལ་གྱིས་བབ་པ་ན།  ལག་ཏུ་མཇལ་དར་བཟུང་ལ། དབུ་ཕྱག་བུད་བུད་འཚལ་བའི་གསེར་ལུང་སྡེ་བའི་ རྒན་དར་གཞོན་གསུམ་འཚང་ག་ཤིག་ཤིག་གིས་མཁའ་འགྲོ་མའི་མདུན་དུ་ལུང་བསྟན་ཞུ་བར་ཕེབས། 

    དེ་རིང་ཇི་འདྲའི་སྟབས་ལེགས་པའི་ཉིན་མོ་ཞིག་རེད་ཨང་།  མཁའ་འགྲོ་མ་གསེར་ལུང་སྡེ་བར་ཕེབས་ཉིན།  དཔོན་རྒན་ཟླ་བ་ལགས་ཀྱིས་ཁ་ཤ་ལྷབ་ལྷབ་ཏུ་འདར་བཞིན།  མིག་ལ་མཆི་མ་འཁོར་ནས་བུ་ཉི་མའི་ནད་གཞི་དྲག་ཐབས་ཀྱི་ལུང་བསྟན་ཞུ་བར་ཕེབས་བྱུང་།

    མ་གཞི།  དཔོན་རྒན་ཟླ་བ་ཚང་གི་བུ་ཉི་མས་གསེར་ལུང་སྡེ་བའི་གཟུགས་ལང་ཚོ་སེང་ལྕམ་འབྲུག་མོ་འདྲ་ལ།  མཚན་སྙན་གྲགས་ཁུ་བྱུག་སྔོན་མོར་འགྲན་པའི་ན་ཆུང་མ་ཚེ་རིང་སྒྲོལ་མ་བག་མར་ལེན་པར་གཉེན་ཐག་བཅད་རྗེས།  གསར་བུ་ཉི་མས་འཕྲུལ་རྟ་གྱི་ལིང་འཕུར་ཤེས་འདྲ་བ་ཞིག་ཞོན་ནས་སྤྲུལ་སྐུ་ཐོག་རྒོད་གཉེན་སྟོན་གྱི་གཡང་འབོད་ལ་ཆིབས་བསུ་བྱེད་དུ་སོང་།

     ཉིན་དེར། ཁ་བ་ནི་བྱ་རོ་དང་བྱེའུ་རོ་བཞིན་སེར་སྣ་མེད་པར་གསེར་ལུང་སྡེ་བའི་རི་ལུང་ཐང་གསུམ་ཁེངས་བྱུང་ལ། གསེར་ལུང་ལམ་ཆེན་དུ་འགྲོ་འོང་བྱེད་པའི་མི་ཚོས་ཙག་རླུང་བཙན་པོ་དེ་ལ་ད་ལོ་ཅི་འདྲའི་དགུན་དུས་འཁྱག་པོ་ཞིག་རེད་ཅེས་འཁང་ར་བྱེད་ཀྱིན་འདུག 

      ལམ་དུ་ཁངས་དར་ཆེ་བས་གསར་བུ་ཉི་མའི་འཕྲུལ་རྟ་ཐང་ལ་བསྒྱེལ་ཏེ་རྐང་པ་བཅགས་ནས་གཉེན་སྟོན་ཕྱིར་འཐེན་བྱེད་དགོས་བྱུང་།  བཀྲ་མི་ཤིས་པའི་རྐྱེན་ངན་དེར་དཔོན་རྒན་ཟླ་བས་རྣམ་རྟོག་ཟ་བཞིན། དང་ཐོག་ཁོས་གསེར་ལུང་སྡེ་བའི་སྨན་པ་བོས་ནས་རང་ཁྱིམ་དུ་སྨན་བཅོས་བྱས་མོད།  བུ་ཉི་མའི་རྐང་པ་སྐྲངས་ནས་གདུང་མ་ལྟ་བུ་ཞིག་ཏུ་གྱུར་ལ། ན་ཟུག་ཀྱང་ཇེ་ཆེར་སོང་བས་ མཐར་འུ་ཐུག་ཐབས་ཟད་དུ་གྱུར་ནས་གསེར་ལུང་སྨན་ཁང་དུ་སོང་།

    སྨན་པས“ནད་པ་འདི་དུས་ལྟར་སྨན་ཁང་དུ་མ་ཡོང་བས་སྨན་བཅོས་བྱེད་པའི་དུས་ཚོད་ལེགས་ཤོས་ཡོལ་ཟིན་པས་།  ད་ནི་ནད་པའི་བརླ་མཚམས་ནས་མ་བཅད་ན་རྐང་པ་དྲག་པའི་ཐབས་བཀོད་མི་འདུག”ཟེར།  གསར་བུ་ཉི་མའི་དོན་དག་དེ་གོ་བ་ན། ཁ་སྐྱལ་བ་འདྲ་ཞིག་གདངས་ལ།  མགོ་བོ་འཕྲེད་དུ་གཡུག་གཡུག་བྱེད་བཞིན“མིན།  གཏན་ནས་མིན། ང་ལ་རྐང་པ་མེད་ན།  ང་མ་འོངས་པར་ཆུང་མ་ཚེ་རིང་སྒྲོལ་མར་ཅི་ལྟར་འགྲོགས་དགོས”ཞེས་སྨན་པས་བཤད་པ་དང་ལེན་མ་བྱས་ནས་ཁོང་ཕ་བུ་གཉིས་ཕྱིར་གསེར་ལུང་སྡེ་བར་ཡོང་ནས་རང་ཁྱིམ་དུ་སྨན་བཅོས་བྱས་མོད།  བུ་ཉི་མའི་རྐང་ནད་ཉིན་རེ་བཞིན་ཇེ་སྡུག་ཏུ་སོང་ལ།  ཕ་ཟླ་བའི་སེམས་ནད་ཀྱང་ཉིན་རེ་བཞིན་ཇེ་ཆེར་སོང་། 

     མཁའ་འགྲོ་མའི་མདུན་དུ་ལུང་བསྟན་ཞུ་བར་ཕེབས་པའི་མི་ཚོགས་ཀྱིས་ཁེངས་འདུག་ལ། མི་ཚོགས་ཀྱི་ཁྲོད་ན་དཔོན་རྒན་ཟླ་བ་ཡང་བཙན་གྱིས་མདུན་ཕྱོགས་སུ་འཚང་གིན་འདུག

    མཁའ་འགྲོ་མས་དཔོན་རྒན་ཟླ་བས་ཞུ་རྟེན་ལ་ཕུལ་བའི་དར་དང་སྒོར་མོ་ཁུག་མའི་ནང་དུ་བཅུག་ལ། དེ་ནས་བརྩེ་བའི་སྤྱན་གྱིས་དཔོན་རྒན་ཟླ་བ་ལ་གཟིགས་ཞོར།  “ཁྱོད་ཀྱི་བུའི་ནད་གཞི་ནི་འདི་འདྲ་ཞིག་རེད། ཉིན་དེར། གསར་བུ་ཉི་མས་འཕྲུལ་རྟ་ཞོན་ནས་ཡར་འགྲོ་བ་དང་།   གཞི་བདག་ཁྱུང་མགོས་སྣ་ལོ་ཞོན་ནས་མར་ཡོང་བ་གདོང་ཐུག་བརྒྱབ་འདུག་ལ། གཙོ་བོ་གཞི་བདག་ཁྱུང་མགོ་ལ་རྨས་ཚབས་ཆེན་ཞིག་བྱས་འདུག་པས། གཞི་བདག་ཁྱུང་མགོ་རྨས་ལས་མ་དྲག་ན་ཁྱོད་ཚང་ལ་དེ་བའི་གནོད་ཆེ་ལ།  གལ་ཏེ་དྲག་ཀྱང་གཞི་བདག་ལ་ཕོགས་ཐུག་ཚབས་ཆེན་བྱས་འདུག་པས་བུ་ཉི་མ་ནད་ལས་ཐར་བ་དཀའ་མོ་རེད”ཅེས་གསུངས་།

      དཔོན་རྒན་ཟླ་བས་ཁ་ནས་སྨེ་སྔགས་འདོན་ཞོར།  ལག་པས་བྲང་ལ་རྡུང་བཞིན་ཕྱིར་ཁྱིམ་དུ་ལོག ལམ་བར་དུ་ཁོའི་ཡིད་ལ་འགྱོད་པ་བཟོད་གླགས་བྲལ་བ་ཞིག་སྐྱེས།  དེ་ནི་ལོ་དེའི་ཡར་སྔོན་གྱི་ཉིན་ཞིག་གི་དོན་དག་ལོས་ཡིན།  ཁོས་དཔོན་ཆེན་པོ་དང་ཁ་བཙན་པོའི་གཡོ་སྒྱུ་ལ་བརྟེན་ནས་གསེར་ལུང་སྡེ་བའི་བུ་མོ་ཚེ་རིང་སྒྲོལ་མ་ལྷ་ལུང་སྡེ་བའི་དབུལ་ཕོངས་དུད་ཁྱིམ་དོན་གྲུབ་ཚང་ལ་མནའ་མར་སྟེར་ཟིན་པ་བཙན་འཕྲོག་བྱས་པ་མིན་ནམ།  ད་ནི་ཚེ་རིང་སྒྲོལ་མའི་ཁོག་གི་བྱིས་པ་དེ་ཡང་སུས་ཡིན་མི་ཤེས་པས་དངན་པ་རིང་པོ་ཞིག་བྱེད་དགོས་བྱུང་ལ།  དེ་བས་ཀྱང་ཚབས་ཆེ་བ་ཞིག་ལ།  བུ་མོ་ཚེ་རིང་སྒྲོལ་མི་ནི་གཟུགས་ལང་ཚོ་ལྷ་ཡི་བུ་མོ་དང་འདྲ་ལ་གསེར་ལུང་སྡེ་བའི་མི་ཚོས་ནམ་རྒྱུན་དེ་ནི་གཞི་བདག་ཁྱུང་མགོའི་སྲས་མོ་ཡིན་ཟེར་བའང་བདེན་སྲིད།  དཔོན་རྒན་ཉི་མས་དེ་ལྟར་བསམ་བཞིན་སྔངས་སྐྲག་གཟིལ་བུན་པ་ཞིག་དང་མཉམ་དུ་རིངས་པར་ཁྱིམ་ལ་ཐོན། 

       ཉིན་ཁ་ཤས་འགོར་རྗེས།  ཏག་ཏག་མཁའ་འགྲོ་མའི་ལུང་བསྟན་བཞིན།  གསར་བུ་ཉི་མ་ཚེ་ལས་འདས་སོང་།  གསེར་ལུང་སྡེ་བར་མཁའ་འགྲོ་མའི་དད་འདུན་སྔར་བའི་ཇེ་ཆེར་སོང་ལ།  ལུང་བསྟན་ཞུ་མཁན་དེ་ལས་ཀྱང་མང་དུ་སོང་། 

                                                               2016.3.5


བརྩེ་བ་གང་དུ་ལུས་སོང་།


          ཉིན་དེར།  ང་ཕ་ཡུལ་གསེར་ལུང་ལ་ཡོང་བའི་ཡུལ་སྐོར་བ་འགའ་དང་ལྷན་དུ་རླངས་འཁོར་

གཅིག་ལ་བསྡད་ནས་ཡོང་། 

     མཚམས་ཤིག་ལ།  ངའི་གམ་དུ་སྡོད་པའི་ཡུལ་སྐོར་བ་ཞིག་གི་སུ་ཞིག་ལ་ཁ་པར་བཏང་བྱུང་།  “ང་ད་ཐེངས་གསེར་ལུང་གི་འབྲོང་དགོན་པ་ན་ཡོད། འབྲོང་དགོན་པ་ནི་དངོས་གནས་བློ་ཡུལ་ལས་འདས་པའི་ཡག་པོ་རེད།  འོན་ཀྱང་གསེར་ལུང་ཞེས་པའི་ས་ཆ་འདིའི་ཁྲོམ་བར་གྱི་ཁྱི་དང་མི་ལ་མང་ཉུང་མི་འདུག   ཧ་ཧ”ཞེསས་ཕ་རོལ་པོ་ལ་ཀུ་རེ་དང་བདེན་གཏམ་འདྲེས་མའི་སྐད་ཆ་དེ་ལབ་པ་ན། ང་ནི་ངོ་མི་ཤེས་པའི་ཡུལ་སྐོར་བ་དེའི་གམ་ནས་གློ་བུར་དུ་ཚིག་པ་ཟོས་ཤིང་། སེམས་སུ་ངའི་ཕ་ཡུལ་དུ་ཁྱི་མང་ན་ཁྱོད་ཀྱིས་གསོ་མི་དགོས་པས་ཇུས་གཏོགས་བྱེད་དོན་ཅི་ཡོད་ཅེས་ཅུང་ཙམ་མིན་ན་ངག་ལས་ཤོར།  དེ་ནི་ང་མི་ཚེ་འདིར་ཐེངས་དང་པོ་མིའི་སྟེང་ལ་ཁོང་ཁྲོ་ལངས་ཤིང་ཁྱིའི་སྟེང་ལ་སྙིང་རྗེ་སྐྱེས་པའི་ཉིན་ཞིག་རེད།

        ང་སྔ་དྲོའི་ལས་ཚོགས་སུ་ཞུགས་ནས་ཁྱིམ་ལ་ཐོན་དུས།  ཨ་མ་ལགས་ཀྱང་དགེ་བསྙེན་ཚང་གི་ཆོས་ཞུས་ནས་ཕྱིར་ཁྱིམ་ལ་ཐོན་པ་དང་དུས་མཉམ་རེད་འདུག 

        ཨ་མས་ནམ་རྒྱུན་དགེ་བསྙེན་ཁང་ལ་བསྔོ་སྨོན་འཇོག་གིན་ཡོད། དེ་རིང་ཡང་ནམ་རྒྱུན་དང་འདྲ་བར།  ཨ་མས་ང་ལ་ཇ་ལྡུག་ཞོར“ཁྱོད་ལ་ཁོམ་པ་ཡོད་ན་བསྔོ་སྨོན་ཡི་གེ་ཅིག་བྲི་རོགས”ཟེར།  

       ངས་སྨྱུ་གུ་དང་ཤོག་བུ་གྲ་སྒྲིག་བྱེད་ཞོར“དེ་རིང་ཅི་ཞིག་བྲི་དགོས”ཞེས་དྲིས།

      ཨ་མས་ལག་གི་མ་ཎི་འཁོར་ལོ་སྐོར་མཚམས་བཞག་ནས“སྡེ་དཔོན་ནག་ལོའི་ཆུང་མ་བླ་བདེ་མ་ཁྱི་ནད་ལས་ཤི་སོང་།  སྙིང་རྗེ། བླ་བདེ་མ་ན་ཡུན་རིང་སོང”ཟེར །

      ངས་དེ་ལ་ལན་ཅི་ཞིག་ལྡོན་དགོས་པ་མི་ཤེས་པས་ཨ་མའི་བཀའ་བཀོད་བཞིན“བླ་བདེ་མ་བདེ་འགྲོ་ཐོབ་ཕྱིར་འོད་མཚན་གསུང་བར་ཞུ”ཞེས་བྲིས་པ་ན། ཨ་མས་ཡི་གེ་མི་ཤེས་པས་ང་ལ་ད་རུང་གཟབ་ནན་ངང་ལྟ་བཞིན“ཁྱོད་ཀྱིས་བསྔོ་སྨོན་ཡི་གེ་དེ་ཁ་གསལ་པོ་ཞིག་ཕྲིས”ཞེས་ནན་གྱིས་བཤད་བྱུང་།

      གསེར་ལུང་ཞེས་པའི་ས་ཆ་འདི་ནི་ངའི་ཕ་ཡུལ་ཡིན་ལ། འདི་གའི་མང་ཚོགས་ཀྱིས་ཐུམ་འབུའི་ནད་ལ“ཁྱི་ནད”ཅེས་ཟེར་ལ།  ཚེས་བཅོ་ལྔ་དང་གནམ་གང་གི་དུས་སུ། ཁྱི་ལྡོམ་རྣམས་ཕྱོགས་གཅིག་ཏུ་བསྡུས་ནས་ཁྱི་ཡི་ལྟོ་ལྡུད་པ་ལ“ཁྱི་དགེ”ཅེས་འབོད་པ་དང་། ད་རུང་གསེར་ལུང་གི་ཁྱི་གསོ་ར་བ་སོགས་གསེར་ལུང་ལ་ཁྱི་མང་བས་ཁྱི་དང་འབྲེལ་བའི་ཐ་སྙད་མང་པོ་ཅིག་བྱུང་ཡོད། དེ་ནི་ངའི་ཕ་ཡུལ་གསེར་ལུང་ལ་གང་ཞིག་ནས་འགྱུར་ལྡོག་འགྲོ་བཞིན་པའི་ཡིན་ནམ། ཡང་ན་དོན་དག་གཞན་པ་ཞིག་ཡིན།

      གང་ལྟར།  མི་སུ་ཞིག་ཡིན་ཡང་ཕ་ཡུལ་ནི་རིན་པོ་ཆེ་ཞིག་དང་འདྲ་བར་སོ་སོའི་སེམས་ནང་ན་ནམ་ཡང་འོད་དུ་འཚེར་བཞིན་ཡོད།  ང་ཡང་དེ་དང་འདྲ་བར་ཕ་ཡུལ་ཞེས་པའི་ཐ་སྙད་འདི་གླེང་མ་ཐག་སེམས་སུ་གསེར་གཞོང་ཐང་ལ་བཞག་འདྲའི་སྙིའི་ཞོ་མར་ཐང་དང་། དར་དཀར་རླུང་གིས་བསྐྱོད་འདྲའི་སྙི་ཆུ་དལ་བ་རིང་མོ།  འབྲོང་སྙིང་སྡེར་ནང་བཞག་འདྲའི་གཞི་བདག་འབྲོང་རི་སྨུག་པོ།  དོམ་ནག་ཁྲག་གིས་བཟི་འདྲའི་འབྲོག་ཁྱི་རྒྱ་རྒྱ་མིག་བཞི།  ད་རུང་སེམས་ན་སྙིང་རྗེ་དང་། ལག་ན་འཁོར་ལོ། ཁ་ན་མ་ཎི།  གདོང་ན་འཛུམ་དཀར་བཞད་པའི་ཕ་ཡུལ་གྱི་མི་དག་དྲན་ཡོང་ལ།  ཕ་ཡུལ་གསེར་ལུང་དྲན་པ་ནི་ས་མཐའ་ནས་ཨ་མ་དྲན་པ་དང་འདྲ་ལ། ཕ་ཡུལ་གསེར་ལུང་གླེང་བ་ནི་སྙན་ངག་མཁན་ཞིག་གིས་སྙན་ངག་གླེང་བ་དང་འདྲ།

     འོན་ཀྱང་།  ད་ལྟ་ཕ་ཡུལ་གསེར་ལུང་ལ་བསམ་བློ་གཏོང་དུས།  དེ་ནི་རེ་སྦྲ་སྨུག་པོ་ཇེ་ཉུང་དང་།

ལྕགས་ཁང་གྲུ་བཞི་ཇེ་མང་ལ་སོང་བའི་གོ་རིམ་ཞིག་རེད་ལ། གསེར་ལུང་ཞེས་པའི་ས་ཆ་འདི་གའི་གྲུ་ཟུར་གང་རུང་དུ་ཨེ་ཛི་ནད་དུག་ཁུར་བའི་མི་ནད་པ་ཅན་དང་།  ཐུམ་འབུའི་ནད་དུག་ཡོད་པའི་ཁྱི་ནད་པ་ཅན། རྒྱུ་འབྲས་གོ་ལྡོག་གཏོང་བའི་སེམས་ནད་པ་ཅན་དག་འཚང་ག་ཤིག་ཤིག་དང་། ཆར་རྗེས་ཤ་མོ་བཞིན་བརྡོལ་བྱུང་བ་ན། ངས་ནམ་རྒྱུན་དེ་དག་ནི་འདི་གའི་འཚོ་གཞེས་གནང་བའི་ཕ་ཡུལ་གསེར་ལུང་གི་མི་ཚོའི་སྲོག་ལ་རྔམ་པའི་འཆི་བདག་གཤེད་མ་ཞིག་རེད་འདོད། དེ་ནི་ང་ཕ་ཡུལ་ནས་ཕ་ཡུལ་ལ་སེམས་ཁྲལ་ཇེ་ཆེར་སོང་བའི་གནད་དོན་གཞན་པ་ཞིག་རེད། 

      ཉིན་ཁ་ཤས་སྔོན།  ཨ་མ་ལགས་བཟའ་བཏུང་ལ་ཡི་ག་དེ་ཙམ་མི་འདུག་པས་ངེད་གཉིས་སྨན་ཁང་ལ་བརྟག་དཔྱད་བྱེད་དུ་སོང་།

       སྨན་པས་ཧ་ཅང་སྐྱོ་བའི་ཉམས་ཀྱིས“ཨ་མ་ལགས་ཀྱི་ནད་གཞི་ནི་ཁྱི་ནད་རེད”ཟེར། ད་ནི་གཤགས་བཅོས་དགོས་ན་ཨ་མ་ལགས་དགུང་ལོ་མཐོ་བ་དང་།  སྨན་བརྟེན་དགོས་ན་འཐུང་ཡུན་རིང་ལ། ད་རུང་ཨ་པུན་ཏ་ཙོ(阿苯达唑)ཟེར་བའི་སྨན་འདིས་ཁྱི་ནད་ཚོད་འཛིན་ཙམ་ལས་མཆིན་འབུ་རྩ་བ་ནས་གསོད་མི་ཐུབ་པས།  ངས་སྨན་པའི་སྐད་ཆ་དེ་གོ་བ་ན་སྔངས་སྐྲག་གཟིལ་བུན་པ་ཞིག་སྐྱེས་ནས་ཨ་མ་ལ“སྨན་པས་ཁྱོད་ལ་ནད་ཆེན་པོ་མི་འདུག མཆིན་པ་ལ་ནད་ཆུང་ཆུང་ཞིག་འདུག་པ་དེ་ལ་སྨན་འཐུང་ན་དྲག་སྐྱེད་ཡོང་ས་རེད།  ནད་ཀྱིས་ཟིན་ནས་ཡུན་རིང་ལོན་མི་འདུག”ཅེས་དབུ་སྐོར་རྫུན་ཞུ་བྱས།  

      ཨ་མ་ལགས་ཀྱིས་ངའི་སྐད་ཆ་ལ་དོ་སྣང་དེ་ཙམ་མི་བྱེད་པར“ཨ་མའི་མ་ལོ།  ཁྱོད་སེམས་ཁྲལ་མི་དགོས། ང་ནི་ལོ་མཐོ་བས་ནད་ཅི་ཞིག་གིས་སོང་ཡང་དེ་ནི་ཆོས་ཉིད་ཅིག་རེད། གལ་ཏེ་ང་རང་མཆིན་ནད་ཀྱིས་ཤི་སོང་ཡང་དེ་ནི་ཚེ་སྔོན་མའི་ལས་རེད”ཟེར།

      ཉིན་དེ་ནི་ང་ལ་མཚོན་ན།  འཇིག་རྟེན་འདིར་རང་གི་ཆེས་སྙིང་བའི་མིའི་སྟེང་ལ་སྙིང་རྗེ་སྐྱེས་པ་དང་། ཕ་ཡུལ་གྱི་ཁྱིའི་སྟེང་ལ་ཐེངས་དང་པོ་ཁོང་ཁྲོ་ལངས་པ་ཡིན།

     དེ་ནས་བཟུང་།  ང་ནི་སྒོ་ཁའི་རྒྱ་རའི་ནང་དང་།  གསེར་ལུང་གི་སྲང་ལམ།  འབྲོང་དགོན་པའི་ར་སྐོར།  གཞུང་ལས་ཁང་གི་སྒོ་འགྲམ་སོགས་གང་རུང་ན།  ཡར་མར་ལ་ཉུག་ཉུག་བྱེད་བཞིན་པའི་ཁྱི་ལྡོམ་ཚོའི་སྟེང་ལ།  ཁ་སྤོ་ཁ་དང་། ཞེ་སྤོ་གཏིང་ནས་ལངས་ཏེ་གསེར་ལུང་སྡེ་བའི་ཡུལ་མི་ཚོར་ “ཁྱི་ནད”ཀྱི་ཉེན་ཚབས་རང་བཞིན་དེ་སྐྱ་མི་ལ་འགྲོ་བཤད་དང་། རྐང་ཐང་ལ་འདུག་བཤད་བྱས།

       ང་ནི་གསེར་ལུང་ཞེས་པའི་ས་ཆ་འདིའི་སློབ་ཆེན་པ་ཐོག་མ་ཡིན། མི་ལོ་བཅུ་དྲུག་གི་རིང་ལ།   སློབ་ཆུང་ནས་སློབ་ཆེན་བརྒྱུད་དེ་ཕྱིར་ཕ་ཡུལ་གསེར་ལུང་ལ་སླེབས་དུས། ངས་ཡུལ་མི་ཚོར་ས་གནས་འདིར་དམིགས་བསལ་གྱི་ཡོད་པའི“ཁྱི་ནད”ཀྱི་ཉེན་ཚབས་རང་བཞིན་ཞིག་ཀྱང་གསལ་བཤད་བྱེད་མ་ཐུབ་ན། ང་ནི་མིང་དོན་མི་མཚུངས་པའི་ཕ་ཡུལ་གྱི་སློབ་ཆེན་པ་ཤི་བོ་ཞིག་མིན་ནམ། 

      མ་གཞི། ངའི་ལས་དབང་ནི་ཕ་ཡུལ་གསེར་ལུང་གི་ཕྱུགས་རྫི་ཆུང་ཆུང་ཞིག་ནས།  གསེར་ལུང་སྲིད་གཞུང་གི་ཟླ་ཕོགས་ལེན་པའི་གཞུང་ཞབས་པ་ཞིག་ཏུ་གྱུར། 

      ད་ལྟ།  ང་གཞུང་ལས་ཁང་ཞེས་པའི་རྡོ་ཁང་གྲུ་བཞི་འདིའི་ནང་ཙོག་ནས་ཕ་ཡུལ་གསེར་ལུང་གི་ལས་དབང་ལ་བསམ་བློ་གཏོང་དུས།  ང་ནི་འདང་རྒྱག་ཅི་ཡང་མེད་པའི་བྱིས་པ་བསམ་མེད་ཅིག་ནས་ཕ་ཡུལ་གསེར་ལུང་ལ་སེམས་ཁྲལ་ཧ་ཅང་ཆེ་བའི་མི་དར་མ་ཞིག་ཏུ་ཆགས་འདུག འདི་ནི་དུས་ཚོད་ཟེར་བའི་ཆོས་ཉིད་ཀྱིས་བསླངས་པའི་སྒྱུ་མ་ཡིན་ནམ།  ཡང་ན་ང་རང་ནམ་རྒྱུན་རྨི་ལམ་གྱིས་བསླུས་པ་བཞིན་འཁྲུལ་སྣང་གཞན་ཞིག་རེད།   འདི་ནི་ཕ་ཡུལ་གྱི་རེ་སྦྲ་སྨུག་པོ་རུས་གུར་ལ་བསྒྱུར་བ་དང་། རུས་གུས་ལྕགས་གུར་ལ་བསྒྱུར་བ། ལྕགས་གུར་ལྕགས་ཁང་ལ་བསྒྱུར་བ། མི་སེམས་ལྕགས་སེམས་ལ་བསྒྱུར་བའི་གོ་རིམ་རེད་འདོད།  ངས་འདི་ལྟར་རང་ཉིད་གཅིག་པུས་གཟའ་སྤེན་པའི་ངལ་གསོའི་དུས་ཚོད་དག་གློག་ཀླད་ཀྱི་མཐེབ་གཞུང་ངོས་ཀྱི་སེམས་ཁྲལ་ཞིག་ཏུ་བསྒྱུར།

       ཉིན་དེར།  ངའི་ལས་ཁུངས་ཀྱི་འགོ་བས། “དེ་རིང་གོང་རིམ་ནས་ཁྱི་ནད་སྔོན་འགོག་དང་།  ཁྱི་གསོད་ལས་སྒྲུབ་རུ་ཁག་ཅིག་གསེར་ལུང་སྡེ་བར་ཡོང་གིན་ཡོད། ཉིན་གུང་། ང་དང་ལས་གྲོགས་ཚོས་གསེར་ལུང་གི་འབྲུག་མོའི་སྦྲ་གུང་གླིང་ནས་ལས་སྒྲུབ་རུ་ཁག་ལ་སྣེ་ལེན་དགོས”ཟེར།  དེ་ནི་ངས་འབྲུག་མོའི་སྦྲ་གུར་གླིང་ཟེར་བའི་ལྕགས་གུར་ཁྲ་ཁྲ་དེའི་ནང་ནས་མི་སེམས་ཁྲ་ཁྲ་ཅན་དག་ལ་སྣེ་ལེན་ཁྲ་ཁྲ་ཞིག་བྱེད་དགོས་ཟེར་བ་རེད་འདོད། 

       འབྲུག་མོའི་སྦྲ་གུར་གླིང་དུ་འགྲོ་ཐེངས་རེར།  ང་དབྱར་གྱི་མེ་ཏོག་དང་།  སྤང་གི་འཇམ་མཉེན་གྱི་སྟེང་ན།  དབྱིབས་རུས་གུར་དང་འདྲ་ལ་རང་བཞིན་ལྕགས་ལས་གྱོང་བའི་མིང་སྙན་མོ་ཅན་གྱི་གུར་གྲོང་དེའི་ནང་ནས་ང་རང་ཐེངས་ག་ཚོད་ལ་ཝུ་ཆང་གིས་བཟི་བ་བརྗེད་ཟིན་ཀྱང་། དེ་རིང་དབུ་ཁྲིད་ཁ་སྤུ་མཐུག་པོ་ཅན་དེས“མང་ཚོགས་ཀྱི་ཚེ་སྲོག་གི་བདེ་འཇགས་ཆེད།  ཐུམ་འབུའི་ནད་དུག་ཡོད་པའི་ཁྱི་ལྡོམ་དག་རྨག་རྨེད་བཟོ་རྒྱུ་ཡིན”ཟེར། འདི་ནི་གསེར་ལུང་ཞེས་པའི་ས་ཆ་འདིའི་མང་ཚོགས་རྣམས་འུར་ཟིང་ངེར་སོང་བའི་ཁྱི་གསོད་ལས་འགུལ་སྤེལ་དགོས་ཞེས་པའི་གསར་འགྱུར་དེ་རེད།  

      ཁྱི་གསོད་ལས་སྒྲུབ་རུ་ཁག་གསེར་ལུང་སྡེ་བར་ཐོན་ཉིན་དེར།  སྡེ་དཔོན་ནག་ལོས་གསེར་ལུང་སྡེ་བར་ཚོགས་འདུ་གལ་ཆེན་ཞིག་བསྡུས། དེ་ནི་སྡེ་མི་གཅིག་ཀྱང་ཆད་ལུས་མི་ཆོག་པའི་ཚོགས་འདུ་གལ་ཆེན་ཞིག་ཡིན་སྐད། དགུང་ལོ་མཐོ་བའི་ངའི་ཨ་མ་ལགས་ཀྱང་ཚོགས་འདུ་ལ་ཞུགས།

ཚོགས་འདུའི་ཐོག་ཏུ།  སྡེ་དཔོན་ནག་ལོས་དོན་གྱི་རྡོག་རྩ་གཅིག་ཏུ་བསྒྲིལ་ནས་བཤད་དོན། “དེ་རིང་ནི་གསེར་ལུང་སྡེ་བར་དཀའ་ངལ་ཅན་གྱི་དུད་ཁྱིམ་གྱི་དབུལ་སྐྱོར་སྒོར་མོ་བགོ་བའི་ཉིན་ཞིག་རེད།  དེ་དང་མཉམ་དུ་ད་ལོ་ནི་གསེར་ལུང་སྲིད་གཞུང་གིས་གསེར་ལུང་སྡེ་བར་ཁྱི་ནད་ཅན་མང་བས་ཟླ་མཇུག་ཚུན་ཆད་ལ་ཁྱི་གསོད་ལས་འགུལ་ཞིག་ཀྱང་སྤེལ་དགོས་པའི་དོན་དག་གལ་ཆེན་ཞིག་ཀྱང་ཡོད་པས།  ད་ནི་འབྲོག་ཁྱིམ་རེའི་སྒོ་ཁྱི་གཉིས་རེ་མ་གཏོགས་བདག་པོ་བྱེད་མི་ཆོག་ལ། རབ་ན་སྒོ་ཁྱི་མེད་མཁན་ཚོའི་ཁྱི་ལྡོམ་རེ་གཉིས་གསོ་ཐུབ་ན་ངས་གནང་སྦྱིན་སྒོར་མའི་ནང་ནས་སྒོར་ཉིས་བརྒྱ་རེའི་བྱ་དགའ་ཡོད་ལ། གལ་ཏེ་དུད་ཁྱིམ་སུ་ཞིག་གིས་ཁྱི་ལྡོམ་མ་གསོས་ན་མར་སྦྱིན་སྒོར་མོའི་ནང་ནས་སྒོར་ཉིས་བརྒྱ་རེའི་ཆད་གཅོད་ཡོད”ཅེས་བསྒྲགས། 

དེར་འདུས་ཀྱི་མང་ཚོགས་རྣམས་དང་།  ལྷག་ཏུ་སྡེ་བའི་དབུལ་ཕོངས་དུད་ཁྱིམ་སྡུག་ཤོས་དབང་པོ་སྐྱོན་ཅན་བཀྲ་ཁོས་ཀྱང“ང་ཚོ་ནི་བོད་གོང་བ་ཅན་དང་།  ཕྲེང་བ་ཅན་ཡིན་པས་ད་ཐེངས་ཁྱི་ལྡོམ་ཚོའི་མགོ་ཐོག་ལ་དེ་འདྲའི་སྡུག་ཅིག་ཡོང་ན་ང་ཚོའི་ངེས་པར་དུ་སྡེ་དཔོན་ནག་ལོར་རྒྱབ་སྐྱོར་དགོས”ཞེས་བགྲོ་གླེང་ཚོགས་འདུ་ཚ་ངར་ཅན་ཞིག་གསེར་ལུང་སྡེ་བ་རུ་འཚོགས་སོང་།

       ཉིན་དེའི་ཕྱི་དྲོ། ང་རང་ཁྱིམ་དུ་ལྡོག་པའི་ལམ་བར་དུ།  སྡེ་དཔོན་ནག་ལོས་ཁ་པར་བཏང་བའི་ནང་དོན་ལ་བསམ་གཞིག་བྱས།  སྡེ་དཔོན་ནག་ལོས་ཁྱི་ནད་སྔོན་འགོག་དང་ཁྱི་གསོད་ལས་འགུལ་གྱི་ཚོགས་འདུ་དེ་གསེར་ལུང་སྡེ་བར་འཚོགས་པ་ན། གསེར་ལུང་སྡེ་བའི་ཡུལ་མི་ཚོའི་བྱ་སྤྱོད་ནི་དངོས་གནས་སུས་ཀྱང་བློ་ཡུལ་ལ་ཤོང་དཀའ་བ་ཞིག་རེད།  དེ་སྔོན་འདི་གའི་མི་དག“ཁྱི་ནད”ཀྱིས་གཅིག་གཅིག་གཉིས་གཉིས་ཀྱིས་ཤི་ནའང་།  གསེར་ལུང་སྡེ་བར་མཚོན་ན། དེ་ནི་དེ་འདྲའི་དོན་ཆུང་ཞིག་དང་སེམས་ཁྲལ་ཅི་ཡང་མེད་པའི་བཟོ་སྟོན་ལ། གསེར་ལུང་སྡེ་བར་ཐུམ་འབུའི་ནད་དུག་ཅན་གྱི་ཁྱི་ལྡོམ་དང་།  ཨེ་ཛིའི་ནད་དུག་ཅན་གྱི་སྨད་འཚོང་མ།  རྒྱུ་འབྲས་རྨང་ནས་བོར་བའི་སྒོར་གྱི་སྨྱོ་ནད་ཅན་གྱི་མི་ལྡོམ་དག་ཇེ་མང་དུ་སོང་ཡང་། དེ་ལ་ཁ་ཡ་མི་བྱེད་པར་དལ་ཅག་གེར་སྡོད་པར་དགའ། འོན་ཀྱང་།  དེ་རིང་གློ་བུར་དུ། གསེར་ལུང་སྲིད་གཞུང་གཉིད་ལས་སད་པ་བཞིན། ཀྲུང་དབྱང་གིས་ཐེངས་དང་པོར་བོད་མའི་ཁོག་ནང་གི་འབུའི་ཆེད་དུ་འཚོགས་པའི་ཚོགས་ཐོག་གི་བཀའ་དེ་མ་ཐེག་པར་ཁྱི་གསོད་ལས་འགུལ་ཞིག་སྤེལ་དགོས་ཟེར་ན། མཐོ་སྡེ་དཔོན་ནག་ལོ་དང་དམའ་མི་སེར་བཀྲ་ཁོ་ཡན་གྱི་གོ་རྟོགས་དམའ་ལ།  ད་ནི་ཁྱི་ལྡོམ་དག་ཁྱོད་ཚོའི་ཚེ་སྲོག་གི་བདེ་འཇགས་ཆེད་གསད་དགོས་ཟེར་ན། ཚང་མ་སྙིང་རྗེ་དང་ཤ་ཚ་ཟེར་མཁན་དག་དག་ལ་འགྱུར་དོན་ཅི་རེད།  དོན་དངོས་སུ།  ཕ་ཡུལ་གསེར་ལུང་གི་མི་དག་ནི་རང་སྲོག་ལས་ཁྱི་སྲོག་གཅེས་མཁན་རྐྱང་རྐྱང་ཡིན་ནམ།  གནད་དོན་འདིར་སུས་ཀྱང་འགྲེལ་བཤད་དཀའ་ལ།  ངས་ཀྱང“སྐུ་ངལ”དང་དུ་ལེན་རྩིས་མེད།

     ངས་འཇེབ་འཁོར་གྱི་སྣུམ་སྣོན་ཤུགས་ཀྱིས་གནོན་བཞིན་གསེར་ལུང་སྲང་ལམ་བརྒྱུད་དེ་རང་ཁྱིམ་གྱི་ཕྱོགས་སུ་ཡོང་གིན་ཡོད།  དེ་རིང་འབྲུག་མོའི་སྦྲ་གུར་གླིང་གི་ཚོགས་འདུའི་དོན་སྙིང་ནི་ཧ་ཅང་གལ་ཆེ་བར་འདོད།  དེ་ནི་མཐོ་གོང་རིམ་དཔོན་པོ་ཚོས་དམའ་འབངས་མི་སེར་ལ་བཅངས་བའི་ལྕགས་སེམས་སྲ་མོ་དེ་མི་སེམས་སྙི་མོ་ལ་འགྱུར་བའི་སྟ་གོན་མིན་ནམ་སྙམ། 

  ད་ལྟ། ཉི་འོད་ཤིན་ཏུ་ཚ། རླངས་འཁོར་ནང་དུ་ཡང་ཚ་དུབ་ཀྱིས་ཁེངས་འདུག་ལ། ངས་གསེར་ལུང་སྲང་ལམ་གྱི་གེ་སར་ཕོ་བྲང་རྒྱབ་ཕྱོགས་སུ་བསྐྱུར་ནས་མདུན་དུ་འགྲོ་བཞིན་དེ་ལྟར་བསམ་གཞིག་བྱེད་ཞོར།  མི་ནི་ཕ་ཡུལ་ན་འཚོ་ཞིང་གཞེས་པའི་དུས་སུ།  ཇི་འདྲའི་སེམས་ཁྲལ་བྱེད་དགོས་པའི་དོན་དག་མང་བ་ལའང་བསམས།

       ང་ཁྱིམ་དུ་ཐོན་དུས།  ཨ་མའི་ཁ་བ་ལྟར་དཀར་བའི་སྐྲ་ལོ་དཀར་པོ་དེ་སྒེའུ་ཁུང་ལས་ལྡང་བའི་བསིལ་རླུང་གིས་སྐྱོད་ཙམ་སྐྱོད་ཙམ་བྱེད་ལ། འོ་ཇ་དཀར་ཡོལ་གང་བརྩེ་བའི་ཕྱག་གིས་བཏེགས་ནས་ངའི་གམ་དུ་འོང་ཏེ་སྐད་གདངས་དམའ་མོས“དེ་རིང་། དགེ་བསྙེན་ཚང་གི་ཇ་མ་མཐོ་རིས་པོ་ཡང་། ཁྲིན་ཏུའུ་སྨན་ཁང་ནས་ཁྱི་ནད་གཤགས་བཅོས་བྱས་པ་སྟབས་མ་ལེགས་པར་ཚེ་ལས་འདས་པ་དེ་བདེ་འགྲོ་ཐོབ་ཕྱིར།  ངེད་དགེ་བསྙེན་ཚང་གི་མི་ཚོས་སྒོར་ཉིས་བརྒྱ་རེ་བསྡུས་ནས། ཚེས་བཅོ་ལྔའི་ཉིན་གསེར་ལུང་སྡེ་བ་ནས་ཁྱི་དགེ་བྱེད་རྩིས་ཡིན།  དགེ་བ་ཁ་ཞོར་ལག་ཞོར་ཡིན་པས་ཁྱོད་ཀྱིས་དེའི་ནང་དུ་འབྲེལ་འཇོག་བྱེད་དམ།  ད་ནི་ཁྱི་ལྡོམ་ལས་ངན་དག་གི་མགོ་ལ་དུས་ངན་ཞིག་ཤར་བ་འདྲ”ཞེས་སྐྱོ་ཉམས་དང་བཅས་བཤད།

    ངས་ཨ་མས་ཀྱང་ནམ་རྒྱུན་འཐུང་བཞིན་པའི་ཨ་པུན་ཙོ་ཏ(阿苯达唑)ཟེར་བའི་སྨན་དེ་ཡིད་ལ་འཁོར་བ་ན།  ཁྱིའི་སྟེང་ལ་སྙིང་ནས་ཚིག་པ་ཟ་ཞོར།  “ཨ་མ་ལགས། ཀྲུང་དབྱང་གི་དབུ་ཁྲིད་ཀྱང་གསེར་ལུང་གི་ཁྱི་ནད་དེས་གཉིད་མི་ཁུག་པར་བྱས་ལ། གསེར་ལུང་སྲིད་གཞུང་གིས་ཁྱི་གསོད་ལས་སྒྲུབ་རུ་ཁག་ཀྱང་གྲ་སྒྲིག་བྱས་ཟིན་པས་ད་ནི་ཁྱི་ལ་སྙིང་རྗེ་བྱེད་པའི་དུས་མིན་པར།  མི་ལ་སྙིང་རྗེ་དགོས་པའི་དུས་ཡིན”ཞེས་གནས་ལུགས་ལུང་པ་གང་ཆུ་བཞུར་བཞུར་བྱས།

   རླུང་བུ་ཞིག་ཤུགས་ཀྱིས་སྒེའུ་ཁུང་ནས་ལྡང་འོངས་ཏེ། མདུན་ཅོག་ཐོག་གི་ཁྱི་གསོད་ལས་སྒྲུབ་རུ་ཁག་གི་གོང་རིམ་ཡིག་ཆ་དེ་ཅལ་གྱིས་ཐང་དུ་གཡུག་བྱུང་ཡང་། ཨ་མ་ལགས་ད་རུང་ངའི་ཚིག་ཐག་ཆོད་པོའི་ངང་བཤད་པའི་སྐད་ཆ་ལ་ཧ་ལས་ཤིང་ཅུང་ཡིད་མི་ཆེས་པའི་ཉམས་ཀྱིས“ཁྱོད་ནི་ནམ་ཞིག་ལ་འདི་འདྲའི་སྙིང་རྗེ་མེད་པའི་སྡིག་རྒན་ཞིག་ཏུ་གྱུར་བ་རེད།  འདི་བ་ཚང་གིས་གནའ་བདེ་འཇགས་བྱེད་དུས།  ཉེས་མེད་ཀྱི་ཁྱི་ཚང་མ་ངན་བསད་བྱས་སོང་ལ། ད་ཐེངས་ཀྱང་སྡེ་དཔོན་ནག་ལོས་བཤད་སྟངས་ལ་གཞིག་ན། ཁྱི་ཚང་མ་གསད་ན་ལ་ཐང་མི་འདུག  ཨོཾ་མ་ཎི་པདྨེ་ཧཱུྃ༔  ངོ་མ་སྙིང་རེ་རྗེ”ཟེར་ནས་མིག་ལ་མཆི་མ་འཁོར་ཞིང་རེ་ཞིག་ལ་སྐད་ཆའང་བཤད་མི་ཐུབ་པར་ང་ལ་བལྟས་ནས་སྨྲ་བ་མེད་པར་གྱུར།  

   ངས་ཡང་བསྐྱར་རང་ཉིད་ལ་གནས་ལུགས་གནམ་གྱིས་མི་ཁེབས་པ་ཞིག་ཡོད་པའི་ཟོལ་གྱིས“ཨ་མ་ལགས།  གསེར་ལུང་སྡེ་བར་མི་གྲངས་ལྔ་བརྒྱ་ལྷག་འདུག་ལ།  གོ་ཐོས་སུ་ཁྱི་ལྡོམ་སུམ་བརྒྱ་ལྷག་ཡོད་པ་དང་།  དེའི་ནང་དུ་གསེར་ལུང་སྨན་ཁང་དུ་བརྟག་དཔྱད་བྱས་ཟིན་པའི་ཁྱི་ནད་ཅན་གྱི་སྡེ་མི་བདུན་ཅུ་ལྷག་འདུག་ཟེར།  ད་ནི་ཁྱི་གསོད་ལས་འགུལ་མ་སྤེལ་རང་སྤེལ་རེད”ཅེས་ཡང་བསྐྱར་སློབ་གསོའི་ཚུལ་དུ་བཤད། 

དེ་དུས།  ཨ་མས་མ་ཎི་འཁོར་ལོ་སྐོར་བཞིན་ཅི་ཞིག་ལ་བསམ་བློ་གཏོང་གིན་འདུག་ལ།  ཡུད་ཙམ་འགོར་རྗེས།  ངའི་གདོང་ལ་གཟབ་ནན་གྱིས་ལྟ་ཞོར“ངའི་མཆིན་ནད་ནི་ཁྱི་ལས་འགོས་པ་ཡིན་མིན་མི་ཤེས།  གང་ལྟར་ནི་ཁྱི་ནི་གནའ་ནས་ད་བར་ངེད་ཚང་གི་ནོར་སྲུང་མཁན་ཡིན་ལ། འུ་ཚང་གི་སྒོ་ཁྱི་དོམ་ནག་དང་། ཧཱ་པ་སེར་ཐོ་གང་ཡིན་ཡང་། གནད་འགག་གི་དུས་སུ་སྲོག་ཀྱང་གཏོང་ཕོད་མཁན་ཞིག་ཡིན་པར་ང་ལ་དོགས་པ་སྤུ་ཙམ་མེད། དེ་བས། ད་ནི་འུ་ཚང་གི་སྒོ་ཁྱི་ལ་ཐུམ་འབུའི་ནད་ཙམ་གྱི་མི་ཚད་ཨེ་ཛིའི་ནད་འགོས་ཡོད་ཀྱང་གསོད་རྩིས་མེད།  ཁྱོད་ནི་སྲིད་གཞུང་གི་ཟླ་ཕོགས་ལེན་པའི་ལས་བྱེད་པ་ཞིག་ཡིན་པ་བདེན་མོད།  ཚོགས་འདུ་གང་ལ་སོང་ཡང་སྒོ་ཁྱི་གསད་དགོས་ཞེས་དོན་གྱི་ལག་ལེན་ཕར་ཞོག་ཁ་ཐོག་ཙམ་ལ་ཡང་ལེན་མི་ཆོག”ཟེར། 

         སྐབས་དེར། ངའི་ཨ་མ་ལགས་ཀྱི་མཚོ་མོ་བཞིན་གཏིང་ཟབ་ལ་འགྱུར་བ་མེད་པའི་བརྩེ་བའི་སྤྱན་ཟུང་ལ་སྔར་མཐོང་མ་མྱོང་བའི་གཟབ་ནན་དང་།  སྙིང་རྗེ།  རེ་བ་དང་ཡིད་ཆེས་ཀྱི་འོད་ཅིག་འཕྲོས་འདུག་པ་མཐོང་ལ།  དེ་དང་མཉམ་དུ་ངས་ནི་ཅི་ཞིག་བཤད་དགོས་པ་མི་ཤེས་ལ་འབྲུག་མོའི་སྦྲ་གུར་ནང་གི་ཚོགས་འདུའི་ཐོག ངས་ཁྱི་གསོད་ལས་སྒྲུབ་རུ་ཁག་ལ་ཁྱི་གསོད་ལས་འགུལ་མགྱོགས་མྱུར་ངང་སྤེལ་དགོས་པའི་གལ་ཆེའི་རང་བཞིན་གྱི་གཏམ་བཤད་བྱས་པ་དག   དུས་གཏན་དུ་ཨ་མ་ལགས་ལ་གསང་དགོས་བྱུང་། 

                                                             2016.2.18


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།