མར་བཟའ་བློ་སྒྲོལ་གྱི་གསར་བྲིས་སྙན་ངག་ཁག་གཉིས།

3089


མི་ཚེའི་ད་ཚོད་ཅིག



ཁང་སྟོང་དེའི་ནང་དུ་མཛེས་སྡུག་གི་རྨི་ལམ་གཤོང་ཐབས་བྲལ།
ཆགས་སྡང་བླུག་སའི་སྙིགས་ཟོམ་སྐྱོར་དགོས་མི་འདུག
སེམས་པ་ཤུལ་དུ་བཞག་སྟེ་ལ་མོ་རྒྱག་དགོས་ཡང་མི་འདུག
ཕྱིར་ལ་ལོག་ཐབས་མེད་པར་ཐུགས་ནོངས་གང་ཡང་མི་དགོས།
སོ་སོའི་ཞེ་གྱོང་ལ་འབབ་སོ་མེད་པ་ནི།
ཡོལ་བའི་ངོས་ཀྱི་ཉི་ཟླ་འཁྱག་པར་གྱུར་བས་ལོས་ཡིན།

བདེ་སྐྱིད་དང་ཐུག་ཙམ་གྱིས་ལུས་པོ་སྦྲིད་པར་བྱེད་པའི་ན་ཚོད།
དུས་ཚོད་ཀྱི་རྨ་ཁར་འཚང་བའི་གཙང་པོ་ནག་ནག
ཧབ་ཆ་ཡལ་རྗེས་ཀྱི་མི་སེམས་གྲང་མོ།
ཏག་ཏག་ལོ་ན་གཞོན་དུས་ཀྱི་སྣང་བ་སྐྱོར་བྱེད་དག
རི་མོའི་ངོ་ན་མཆོང་བའི་གཟིག་མོ་ཐིག་ལེ་ཅན་དེ་ཨང་།

ཁྱོད་ཀྱི་ཁེར་རྐྱང་གི་ནང་དུ་སེང་གེ་རྨས་མ་ཞིག་བསྐུང་འདུག
གཡུ་རལ་གྱི་ནང་དུ་རྟ་ཁྱུ་ཞོགས་པའི་སྲོད་ཀ་ལྷོད་མོ་ཞིག་ཀྱང་བབས་འདུག
ཚེ་ཡི་སྐུད་པ་རེ་རེས་འཁེལ་བའི་སྐྱོ་ཡུས་ཀྱི་ནམ་ཚ་དག
ཕྱི་འཕྲོར་ལུས་པའི་མེ་ལོང་དུ་འཛར་གྱིན།
ཨམ་ཕྲག་ནང་གི་ན་ཚོད་འཁྱག་པ་དེ་བཙེམ་པར་བརྩོན།





སྣང་བའི་ཟོམ་ལ་ལྷུང་བའི་དར་དཀར་ཡུག་གཅིག



གཏམ་ལ་གཏད་པ་ཡོད་པས།།
སྣང་བའི་ཞེ་ལ་བབས་སོང་།།
ལས་འཕྲོའི་ཚེ་སྐུད་རིང་མོ།།
འདི་ལ་འཐེན་རྒྱུ་བྱུང་ན།།
སེམས་པ་གཞན་ལ་མི་གཡོ།། 

བྱུར་དམར་ཁུད་ལ་ལྷུང་བ།།
སེམས་པའི་ཕྲ་ལ་བརྐོས་ཡོད།།
ཕྲ་རྒྱན་ལྷུང་འགྲོ་མ་བསམ།།
བློ་འགྱོད་དེ་འདྲ་མི་གནང་།།
སྣང་བའི་ཉིན་སྲིབ་སྲུང་དགོས།།

ལོ་ཆང་ལོ་ཡག་ཁམ་པ།།
དམ་ཚིག་གཙང་མས་ཕབ་པས།།
ཞེ་སེམས་དག་མོས་བསྙལ་ཡོད།།
བདུད་རྩི་བསིལ་མའི་ཆབ་རྒྱུན།།
སྣང་བའི་གཞིས་ལ་མཆོད་ཡོང་།།

ཡིད་གཞུངས་ཆུ་མོ་ཤག་ཤག།
སྡུག་པའི་ཐང་ལ་བསྲིང་ན།།
མཛའ་གཅུགས་གཏམ་གྱི་དང་བ།།
ཚེ་ཡི་མཐའ་ལ་བསྐྱལ་ཡོང་།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།