---

---

     གྲིབ་མ་འཁྱག་པའི་ནང་གི་ང་།

---

བུམ་པའི་ནང་གི་མེ་ཏོག་རྙིད་ཚར་དུས།
དགུན་ཟླ་སླེབས་ཤིང་།
Mari ཁྱེད་རང་སོང་ཤུལ་ཏག་ཏག་རེད།
སྐབས་དེར་བདག་གིས་སྡོང་རྩ་ཞིག་སྙེགས་ཤིང་།
རང་ལུས་ཤོང་ཙམ་གྱི་སྐྱིབས་ཤིག་འཚོལ་བཞིན་ཡོད།
སྡོང་མགོ་རུ་བྱིའུ་དག་གིས་ཀྱུར་ཀྱུར་གྱིས་སྐད་འབྱིན་པ་དེས།
ང་ལ་ཞེ་སུན་བཟོས་ཏེ་ཡིད་མུག་པར་བྱས་ཀྱང་།
བདག་གིས་ལག་པ་གཉིས་ཀར་ཤུགས་ཅུང་ཟད་བསྣན།

མཚན་མོའི་གཙང་པོ་དེའང་ནག་ཤུར་ཤུར་གྱིས་བཞུར་བ་ཙམ་ལས།
Mari ཁྱེད་ཀྱི་སྒྲུང་ཅི་ཡང་བཤད་མ་སོང་།
སྐབས་དེར་གཙང་པོའི་ཁར་ལྟུང་བའི་སྐར་ཕྲན་རེ་གཉིས།
བདག་གི་མིག་ལམ་དུ་མོག་མོག་པོར་གྱུར།

ཉི་མ་དེའི་སང་ཉིན་ནི།
Mari  གྲིབ་མ་འཁྱག་པོ་ནང་གི་ང་རེད།
ལྷ་སྒྲུང་ནང་གི་མི་སྣ་མང་པོ་ཞིག་རྨི་ལམ་དུ་བབས་ཤིང་།
བྱིན་རླབས་ཀྱི་རྒྱ་སེ་མེ་ཏོག་དམར་ལ་འཇོལ་བ་རེ་འགའ།
ཡུད་ཙམ་རིང་ངས་མཐོང་ཡང་།
དེ་དག་ཀྱང་རེ་རེ་བཞིན་གཙང་པོར་ནུབ་སོང་།

Mari ཁོག་ལྟིར་ནང་གི་འོ་ཇ་འཁྱགས་ཤིང་།
དྲི་བསུང་ལ་འཁོར་བའི་བུང་བ་དག་ཀྱང་གཤོག་པའི་ཁུད་དུ་ཡིབ།
Mari ཐག་པ་དེ་ཇེ་ཐུང་དུ་གྱུར་བ་ནས།
སེམས་ཀྱི་འོད་ཟེར་དག་ཀྱང་དགུན་ལ་བྲོས་སོང་།

---

     སེམས་ཀྱི་མདུད་སྣེ་མ་རྙེད་པ།

---

ཁྱེད་རང་གཙང་ལ་སྟོད་ནས་ཕེབས་པའི་བོང་བ་ཞིག
སྐེ་དྲིལ་སིང་སིང་གིས་ངའི་རྣ་བ་ཀྲོང་ངེར་བྱས།
ཁྱེད་རང་འོང་སའི་ལམ་དུ།
ཚ་ཕོག་རྒྱག་སའི་བྲག་སྐྱིབས་དང་།
གཙང་པོར་བགྲོད་བྱེད་ཀྱི་གྲུ་རྫིངས་རྟ་མགོ་མ།
ལམ་གྲོགས་སུ་གྱུར་བའི་སྤྲང་མོ་པི་ཝང་ཐོགས་མཁན།
ད་རུང་རྣ་དབང་གསོ་བའི་ཨ་ཁུ་པདྨ།
རང་ལ་གཏན་དུ་ཁ་མི་འབྲལ་བའི་གྲིབ་མ་སོགས་ཡོད་ངེས།

ཡིད་ལ་རྟོག་བཟོ་བྱས་པའི་ཉི་མ་ལྷ་ས།
བར་སྐོར་ལམ་དང་གཙུག་ལག་ཁང་།
སྟེང་ལ་རྫ་གཡམ་སྔོན་པོ་བརྒྱབ་པའི་གཡུ་ཐོག་ཟམ་པ།
འཆར་ཡན་ཁྲོད་ཀྱི་མོན་པ་ཚངས་དབྱངས་རྒྱ་མཚོ།
ར་ཁུས་མྱོས་པའི་ཨ་མདོ་བ་དགེ་འདུན་ཆོས་འཕེལ།
ད་དུང་དེའི་ཆང་ཕོར་ཁ་རུ་ཡོམ་པའི་ལྷ་སའི་ཟླ་བ།
རེ་རེ་ནི་ཁྱེད་ཀྱི་སྙིང་ཁར་བླུགས་ཡོད།
ཁྱེད་རང་གིས་རང་གི་གྲིབ་མའི་གཡས་སུ་བུད་དེ།
གནའ་གཏམ་འཆད།
ཁྱེད་རང་གིས་རང་གི་གྲིབ་མའི་གཡོན་དུ་བུད་དེ།
སེམས་ཉིད་ངལ་གསོའི་མེ་ལོང་ལ་ལྟ།

ཁྱེད་རང་གི་སེམས་སུ་འདུ་འཛིས་ཁེངས་པའི་གྲོང་ཁྱེར་ནི།
གཙང་པོའི་ཀླུང་གི་གད་སྙིགས་སུ་འགྱུར་བཞིན་ཡོད།
ལམ་འགྲམ་གཡས་གཡོན་གྱི་གློག་ཞུ་དག་ནི།
མིའི་རིགས་ཀྱི་གྲིབ་མ་གསོད་མཁན་གྱི་གཤེད་མ་རུ་གྱུར་བཞིན་ཡོད།
ཁྱེད་རང་ནི་གང་དུ་འགྲོ་འམ།
ཁ་མི་གྲག་པའི་རི་བོའི་ཚོགས་ཀྱི་པང་དུ་ལོག་འདོད་དམ།

---

           མཚན་མོ།

---

 
ཁྱེད་ལ་ལགས་སོ་ཞུ་མཁན།
སྒོ་ཁྱིའི་ཟུག་སྐད་དེ་ཡིན་ནམ།
ཁྱེད་ལ་མིག་ཟུར་གཡོ་མཁན།
ལཱ་སྒྲོན་གྱི་དུ་བ་དེ་ཡིན་ནམ།

མཚན་མོ་ནི་རྦབ་རླབས་ཤིག་དང་མཚུངས་པར།
བར་མེད་དུ་རུམ་ཁར་བླུགས་འོང་དུས།
བྱིའུ་ཆུང་ཆུང་དག་ཁྱེད་ཀྱི་རྨི་ལམ་ལས་འཕུར་སོང་།
ཁ་བ་འབབ་ཤུགས་ཆེ་བའི་ཁྲོད་ཀྱི་རྐང་རྗེ་རེ་གཉིས་ཀྱང་།
འཁྱག་རོམ་གྱི་སྦུབས་སུ་ཉལ།
སྐབས་དེ་དུས།
ཁྱེད་རང་དགུན་གྱི་ཕྱི་ནང་སློག་མཁན་གྱི་ར་བཟི་བ་དེ།
དམར་རྗེན་རྗེན་གྱི་འགྲུལ་བཞུད་པ་མཐའ་མ་དེ།

---

      ཟིལ་བ་ཆགས་པའི་རྨི་ལམ།

---

དེ་ནི་གྲོང་ཁྱེར་གྱི་དུ་བས་མ་སྦགས་པའི་ནམ་མཁའ།
འོད་གསལ་གསལ་གྱིས་ངང་དུ་འཚོ།
དེ་ནི་འུར་ཟིང་གིས་རྣ་བ་མ་སྨྱོས་པའི་ལུ་གུ།
སྤང་རྩྭར་ཡན་ནས་འདུག

ཉི་མ་རེ་རེ་སྐུད་པ་ལྟར་དཀྲི་གིན།
སྟོན་ལྗོངས་ཤིག་གི་ཁྲོད་འཚང་པའི་ཕྱེ་མ་ལེབ།
ཁྱེད་ཀྱི་མཛེས་སྡུག་གི་ཕྱིར་དུ།
མིག་ཟུང་ཀེར་བ་དང་རྡོག་སྒྲ་གཏོང་བའི་ལས་ལ་རྔམ།

ཁྱེད་ནི་སྤེན་མའི་གསེབ་ཏུ་ཟུག་པའི་ཉི་འོད་དེ།
སུ་ཞིག་གི་ལུས་དང་གྲིབ་མ་སྲུང་མཁན་ཡིན།

---

སྒྱུ་འཕྲུལ་གྱི་ཕོ་བྲང་། ཡུལ་ནམ་མཁའ་ལྡིང་།

---

པ་སངས་ལགས། 
ཡུལ་ནམ་མཁའ་ལྡིང་(༡)རྙེད་ནས་མི་ལོ་ག་ཙམ་ཕྱིན།
ཡུལ་ནམ་མཁའ་ལྡིང་ན།
སྡུག་བསྔལ་མེད། ཅ་ཅོ་མེད། ཟང་ཟིང་མེད།
སྒྲིབ་པ་སྦྱངས་ཟིན་པ་དག་ཁོ་ན་ཐར་ས་ཞིག་རེད་ཟེར་བ་བདེན་ནམ།

སྡིག་སྒྲིབ་ཅན་གྱི་ངེད་ཚོ།
ཉོན་མོངས་ཅན་གྱི་རི་ལུང་དང་ནགས་ཚལ་དག
གཏན་ནས་གནས་དེར་ཐར་བ་མེད་པ་བདེན་ནམ།

པ་སངས་ལགས་(༢)དེད་དེད་མཐར། 
ཡུལ་ནམ་མཁའ་ལྡིང་ནི་གངས་རིས་བསྐོར་ཅིང་།
མཚོ་མོས་བསྲུངས་པ།  སྤྲིན་དཀར་གྱིས་བཏུམས་ཤིང་།
ཤེས་རབ་ཀྱི་རལ་གྲིའི་རྩེ་རུ་འཁྲིལ་བ་ཞིག་རེད་དམ།

ཚངས་དབྱངས་རྒྱ་མཚོས་མཐོང་བའི་གངས་ཀྱི་སེང་གེ་དང་།
དགེ་ཆོས་རྙེད་པའི་ལོ་རྒྱུས་ཀྱི་གླེགས་བམ་དག་ནི།
ཡུལ་ནམ་མཁའ་ལྡིང་ནས་བསྐྲུན་པའི་གྲུ་ཆུང་དེ་རུ་བླུགས་ནས།
སེམས་ཅན་སྐོམ་གདུང་གིས་མནར་བའི།
ཧྥེ་གླིང་གི་བྱང་ཕྱོགས་ཀྱི་ས་ཧ་ར་བྱེ་ཐང་གི་སེམས་ཅན་གྱི་ཆེད་དུ།
ཡང་ན། དེ་ལས་ཁ་གཞན་དུ་ཕྱོགས་ནས།
གྲང་ངར་གྱིས་གཅུན་པའི་པཱ་ཐ་ཀི་ཉེ་ཡ་ཐང་ཆེན་གྱི་གནམ་སའི་ཆེད་དུ།
བདུད་རྩི་རུ་སྤྲུལ་ནས། ཡི་གེ་རུ་སྤྲུལ་ནས་འོང་བ་རེད་དམ།

པ་སངས་ལགས། ཡུལ་ནམ་མཁའ་ལྡིང་ནི།
རྐང་བས་བརྟོལ་ས་དང་མིག་གིས་ཟིན་ས་ཞིག་ཡིན་ནམ།
བསྒོམས་ནས་རྙེད་རྒྱུ་ཞིག་དང་། ཞིག་ནས་འཐོབ་རྒྱུ་ཞིག་རེད་དམ།

པ་སངས་ལགས། ཁྱེད་གངས་འདབས་སུ་ཉལ་ནས།
མི་ལ་རས་པ་ལྟ་བུའི་སྤྱོད་པར་ཞུགས་ནས།
ཁྱེད་གང་སར་འཁྱམས་ནས།
འབྲུག་པ་ཀུན་ལེགས་བཞིན་སྨྱོན་པར་བརྫུས་ནས།
ཡུལ་ནམ་མཁའ་ལྡིང་ནི་གནས་གང་ཞིག་ནས་མཐོང་སོང་།

པ་སངས་ལགས། ངས་ཡི་གེ་དག་ལས།
ཡུལ་ནམ་མཁའ་ལྡིང་ནི་རྩོམ་པ་པོའི་གྲིབ་མའི་ཁྲོད་བཙལ་འདོད།
སྨྲ་རའི་ཁྲོད་བཙལ་འདོད། མིག་ཟུང་གི་འོད་ལས་བཙལ་འདོད།

---

ཟུར་བཤད། གར་སྟབས་བསྒྱུར་བའི(དམུ་རྡོ)ཞེས་པའི་ཤོག་ངོས་བརྒྱ་ལྷག་ཟིན་པའི་སྙན་ངག་རིང་མོ་འདི་རྩོམ་མཁན་ནི་སྙན་ངག་པ་གཉན་ཡིན་ཞིང་། ད་སྔར་སྤྱི་ཚོགས་སུ་བཀྲམ་མི་འདུག སྙན་ངག་པ་ཁོང་འབྲོག་དགོན་པ་ཞིག་ཏུ་སོང་ནས་ཟླ་གཅིག་ཙམ་ལ་མཚམས་སུ་བསྡད་དེ་མཇུག་གྲུབ་པར་བཤད།

མཆན། ༡ ཡུལ་ནམ་མཁའ་ལྡིང་ནི་སྙན་ངག་རིང་མོ་ཞིག་གི་བློས་བསླངས་ཁྲོད་ཀྱི་གནས་ཤིག ༢ པ་སངས་ནི་སྙན་ངག་རིང་མོ་ཞིག་གི་བློས་བསླངས་ཁྲོད་ཀྱི་མི་སྣ་ཞིག།

---

       རྣམ་རྟོག་གི་ཕུག་པ།

---

 རྨི་ལམ་དེ་དྭངས་ཤུལ་དུ།
ཁྱེད་ནི་བྱང་ཐང་གི་ཕ་རོལ་ན།
སྲིན་འབུ་ཆུང་ཆུང་ཞིག

མྱ་ངམ་ཐང་གི་སྡུག་བསྔལ་གྱིས་ཟིན་པའི་ཉི་རྒས་ལ།
ཁྱེད་ནི་གྲིབ་མ་གྱོན་པའི་བྱེའུ་ཞིག
མགྲིན་པ་འགགས་ནས་སྐོམ་ལ་བསྒུགས་ཤིང་།
ཁ་བའི་ཁྲོད་ཀྱི་རླུང་ལ་ཐིམ།

ཁྱེད་ནི། ཉི་འོད་རེ་རེས་བོར་ཚར་བའི་སྒེའུ་ཁུང་འགྲམ་གྱི་མི་སྐྱ་བོ།
འཁྲུལ་སྣང་ལ་འཆར་བའི་བར་སྐོར་གླིང་གི་ནང་མ་ཁང་།
འུར་འུར་ཟང་ཟིང་གིས་བཟུང་བའི་ཁྲུང་ཞུ་བ་དག
སོ་སོ་རང་མལ་དུ་ལོག་དུས།
ཁྱེད་ཀྱི་དུས་ཚོད་ནི་སྒོ་ལྕགས་བརྒྱབ་པའི་ཁྲོམ་ར་ཞིག

འགྲེ་ལྡོག་རྒྱག་པའི་སྐམ་སའི་ཉ་མོ།
རྡོ་ལེབ་ཚ་བོའི་སྟེང་གི་གྲོག་མ་བགྲེས་པོ།
ཕ་གིའི་གྱང་རྩར་བསྙེས་པའི་ཁྱེད་ཀྱི་ལོ་ཟླ།
རེ་རེ་བཞིན་གཙང་བོའི་ཀློང་ལ་འབྱིང་དུས།
དུས་ཚོད་མི་འདུག  སྣང་བ་མི་འདུག  རྨི་ལམ་མི་འདུག
ཁྱེད་ནི། རླུང་གཡོ་བ་བཞིན་རླུང་ལ་ཐིམ།
ཆུ་འཕྱོ་བ་བཞིན་ཆུ་ཡིས་ཁྱེར།
མེ་འབར་བ་བཞིན་ཚ་བས་གདུང་།
ནམ་མཁའ་སྟོང་བ་བཞིན་སྟོང་བར་གྱུར།

སྐབས་དེ་དུས་ཀྱི་ཁྱེད།
དབྱངས་གཉིད་པའི་གླུ་བ།
ཚིག་གིས་ཕོངས་པའི་འཆད་འཁྲིད་པ།
ཉིང་ཏིག་གང་ལའང་བླ་འཁྱམས་པ་དེའོ།།
 

---