མཚན་གཞས། (ཞར་བཀོད་གཅིག)

4558

                            རྩོམ་པ་པོ། ལྗང་སྨྱུག

      མཚན་གཞས།

 
མགུར་སྙན་མོ་དྭངས་གཙང་ཆུ་ཆུང་འདི།།
ངའི་མདང་སུམ་གཉིད་ཀྱི་གཉིད་རོགས་ཡིན།།
ལམ་སྐྱ་མོ་སྟེང་གི་རྡོ་བ་དེ།།
ངའི་མིག་ལ་ཕོག་པའི་མེ་ཏོག་ཡིན།།

འདི་ཚེ་སྲོག་ཞིག་གི་དབུ་ཁྱུད་ཡིན།།
འདི་བརྩེ་བ་ཞིག་གི་ཆུ་མགོ་ཡིན།།
འདི་མི་སེམས་ཤིག་གི་ཕྱེད་ཀ་ཡིན།།
འདི་བཤད་ན་མི་ཐུབ་སྟོང་ཉིད་ཡིན།།

ཡུལ་འདི་སྣང་མིག་དང་མཛེས་དང་གཅིག །
བློ་ཁྲ་མོ་ཞེན་ཆགས་ཆེ་དང་གཉིས།།
སྤྱིར་བདེན་པའི་སྒྲོ་འདོགས་མ་ཆོད་པས།།
བཙན་ཐབས་སུ་རལ་གྲི་མི་གཡུགས་སོ།།

མདངས་ཆེ་ལུགས་བཤད་ན་འདི་འདྲ་རེད།།
མདངས་བལ་དཀར་ཁ་ཆུ་ཅན་ཞིག་ཡིན།།
འགྱུར་མི་བྲ་ཞོ་འཐུང་རུས་པ་ཡིན།།
འགྱུར་མི་འདོད་གཏན་ཚིགས་བཀོད་ཟིན་ནོ།།

  མ་ངེས་པའི་འདི་དག

 
ཁེར་རྐྱང་ལོ་མ་ལྗང་ཁུ་འཁྱག་རླུང་གིས་བསྡམས་ཤིང་།།
ཁྲུང་ཁྲུང་སྐེ་རིང་ཁྱུ་གཅིག་རང་ཡུལ་ལ་ལོག་དུས།།
སྒེར་ཡང་སྒྱུ་མའི་རྟ་ལ་སྒ་སྲབ་ཤིག་སྤྲད་དེ།།
ཕ་ཡུལ་རི་ཐང་ཀུན་ཏུ་ཐེངས་གཅིག་ལ་ཉུལ་འགྲོ།།

མཁའ་མཐའི་སྤྲིན་པ་དམར་སེར་རྒུམ་ཆང་གིས་བཟི་ནས།།
མིག་ཟུང་ལིང་ལིང་འཁོར་བའི་རི་ཆུ་ལ་ཞིབ་ལྟ།།
ཅང་མེད་ལས་ཀྱི་བུ་ཆུང་ཆུ་ཆེན་གྱི་བརྒྱུད་ནས།།
ལྷན་སྐྱེས་ངག་རིག་འབུམ་གྱི་མགུར་མ་ཞིག་བཞེངས་དགོས།།

ཀུན་བརྟགས་རྨི་ལམ་ཁྲ་བོས་མགོ་བསྐོར་དེ་ཆེ་སོང་།།
བདེན་འཛིན་བུ་མོའི་མིག་ཟུང་གཡོ་སྒྱུ་ཡིས་ཁེངས་སོང་།།
འདི་སྣང་འཁྲུལ་གྱིས་བཀོད་པའི་ཆོ་ག་རུ་བསམ་ན།།
དབེན་པའི་རི་སུལ་ནགས་ཀྱི་བུ་ཆུང་ཞིག་དྲན་འོང་།།

རས་གཟན་དམར་པོ་རླུང་གི་ཁ་མཐའ་ན་བཞད་ཡོད།།
ལྷན་སྐྱེས་ངག་ལ་མཛེས་པའི་ཕྱེ་ལེབ་དེ་འཁྲུངས་པའི།།
ཁེར་རྐྱང་བདེན་པ་ཁུར་བའི་ཚངས་དབྱངས་པའི་ཞལ་ནས།།
ངག་ལ་དབྱངས་ཀྱི་སྦྲང་ཆར་དངོས་གྲུབ་དུ་སྩོལ་ཤོག །

སྣང་སྲིད་འཁོར་འདས་འདི་ཚོ་རང་སེམས་སུ་ཤེས་ན།།
རང་བྱུང་རིག་པའི་མཛེས་པ་འདི་ཉིད་དུ་གདའ་སྐད།།
འཇིག་རྟེན་བདེན་པའི་རང་གཤིས་འདི་ཉིད་རང་ཡིན་སྐད།།
འཚོ་བའི་སྙིང་པོ་དོན་གྱི་གནས་ལུགས་སུ་ངེས་སོ།།


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།