གཡུང་མོས་གསར་དུ་བྲིས་པའི་མགུར་རྩོམ་ཁག་བཞི།

5089

IMG_6367.JPG

             རས་པ་ཞིག་གི་ཕྱི་ནང་།

                                                          –––– ཀུན་བཟང་ཡེ་ཤེས་སྙིང་པོར་ཕུལ་བ།  

  སེམས་རྟོག་པའི་རི་མོ་མགུར་ལ་དྲངས།། 

མགུར་སྙན་མོ་ཕར་ཀའི་བྲག་ལ་བླངས།།

བྲག་སྐྱ་མོས་ཨ་ལན་མི་གདའ་ཡང་།།

སྐྱིད་སྣང་བ་མཚོ་མོ་རང་འཁྱིལ་ཡིན།།

ཤིང་ལྗོན་པའི་དྲི་བཟང་རླུང་དང་བསྡེབས།།

རླུང་བསིལ་བུའི་རྐང་ཆུང་རྩྭ་ལ་ཐོགས།།

རྩྭ་རྩི་ཐོག་ལྡེམ་པའི་རི་ལུང་ན།།

ཤྭ་ཡུ་མོའི་རྩེད་བྲོ་ཡིད་དུ་འོང་།།

གནས་དབེན་པའི་བྲག་ཕུག་སྐམ་པོ་ན།།

རྒྱུ་ནོམ་པ་སོག་རུང་མ་སོག་རུང་།།

དོན་གཉུག་མ་ཡེ་ཤེས་མཁའ་འགྲོ་མས།།

དབུ་པང་དུ་བཞག་ནས་འཛུམ་ཆུང་སྟོན།།

བརྡ་ལག་ཏུ་སྤྲད་ཅིང་གམ་དུ་བཞུགས།།

                                                  2017.10.28

IMG_6404.JPG

            དྲན་མགུར་མེ་ལོང་མ།


ལམ་ཀྱག་ཀྱོག་བརྒྱུད་པའི་སྣེ་མོ་ན།།

གནས་བྱིན་ཆེན་ཤུག་དྲི་ཐུལ་ལེ་ཡོད།།

རྫ་ཁྲ་ཡག་རི་དྭགས་རྒྱུ་ལམ་ན།།

རྒོད་ཐང་དཀར་གཤོག་སྒྲོ་སྤུངས་སེ་ཡོད།།

ཤིང་ལྕང་མ་གུག་པའི་རྩེ་མོ་ན།།

བྱེའུ་མཆིལ་བ་འུར་ཟིང་ཉིལ་ལེ་ཡོད།།

ཆུ་རང་རྡོལ་གཡས་སུ་འཁྱིལ་བ་ན།།

ལས་ཟླ་དཀར་ཚེས་པའི་རང་གཟུགས་ཡོད།།

ཁྱེད་ཕེབས་སམ་ཡིད་ཀྱི་ཐིག་ལེ་མ།།

རི་ལ་ལུང་ཞབས་ཐང་ཕེབས་རྐྱེན་གྱིས།།

སྐུ་ངལ་བ་བྱུང་ན་ངལ་གསོ་མཛོད།།

ཞལ་མེ་ཏོག་འཛུམ་པའི་སྐྱེད་ཚལ་ནས།།

སྤྱན་བུང་བའི་འཕུར་ཕྱོགས་ང་ལ་གཏོད།།

ངའི་སེམས་པ་ཁྱེའུ་ལག་རིང་པོས།།

སྐྱེམས་ཞིམ་པོའི་མཆོད་ཁ་ཁྱེད་ལ་ཡོད།།

སྤྲིན་དར་དཀར་ཡོལ་བའི་ཀློང་རུམ་ན།།

དགུང་ཉི་མའི་འོད་མདངས་ལམས་སེ་ལམ།།

རླུང་ཟ་ཟི་ལྡང་བའི་ཉག་ག་ན།།

མདོག་སྣ་ལྔའི་དར་ལྕོག་ལྷབས་སེ་ལྷབ།།

གྲོགས་ན་ཟླ་འཛོམས་པའི་གཞི་དཀྱིལ་ན།།

སེམས་སྤྲོ་བའི་གླུ་ཆུང་སེངས་སེ་སེང་།།

མི་སྣ་ཚོགས་བགྲོད་པའི་རྐང་ལམ་ན།།

སྨན་ན་ཆུང་གོམ་འགྲོས་ལྡེམས་སེ་ལྡེམ།།

ཁྱེད་ཕེབས་སམ་ཡིད་ཀྱི་ཐིག་ལེ་མ།།

ཁངས་ཕར་འབབ་ལྷགས་པ་ཚུར་འཁོར་གྱིས།།

སྐུ་བསིལ་བ་བྱུང་ན་མེ་ཁ་གསོས།།

སྨག་རབ་རིབ་འཐིབ་པའི་ཁང་ཁྱིམ་ནས།།

ཐུགས་ཉི་མའི་འཆར་ཕྱོགས་ང་ལ་གཏོད།།

ངའི་སེམས་པ་ལུག་ཆུང་ཚ་དཀར་འདིས།།

དྲོད་འཇམ་པོའི་མཆོད་ཁ་ཁྱེད་ལ་ཡོད།།

                                      2017.11.1

21.jpg

            དཔེ་འཇོག


དགུང་ཨ་སྔོན་ཁ་ཞེང་ཚད་མེད་རེད།།

དེའི་དཔེ་ལ་ཁྱོད་ཀྱི་བྱམས་བརྩེ་འཇོག

དུང་ཟླ་བའི་རང་མདོག་འགྱུར་མེད་རེད།།

དེའི་དཔེ་ལ་ང་ཡི་འདང་འདུན་འཇོག།

ཆུ་པདྨའི་མཛེས་སྡུག་ལྷན་སྐྱེས་རེད།།

དེའི་དཔེ་ལ་ཁྱོད་ཀྱི་བློ་རིག་འཇོག།

ཆབ་ཆུ་བོ་བཞུར་རྒྱུན་ཆད་མེད་རེད།།

དེའི་དཔེ་ལ་ང་ཡི་སྙིང་གཏམ་འཇོག།

སྟོད་གངས་དཀར་དབུ་འཕང་ཇེ་མཐོ་རེད།།

དེའི་དཔེ་ལ་ཁྱོད་ཀྱི་ལས་བསོད་འཇོག།

འབྲོང་བྲེ་ལོའི་སྙན་གྲགས་ཇེ་དར་རེད།།

དེའི་དཔེ་ལ་ང་ཡི་རླུང་རྟ་འཇོག།

… … …

དཔེ་འདི་ཚོ་ཡི་གེ་དྲུག་མ་རེད།།

དོན་བྲག་རིའི་ངོས་ལ་རང་དོད་རེད།།

མིག་ཁྲ་ཆུང་ལས་སྐལ་མ་དམན་ན།།

ཚིག་སྙན་མོ་འཇའ་ཚོན་རང་ཤར་རེད།།

                                         2017.11.26

IMG_6303.JPG

              ཞིང་བཀོད།


ཕྱི་ཅང་མེད་ནམ་མཁའ་སྟོང་པ་ལ།།

བློ་གཟེགས་པོ་ཁྱེའུ་ཤེས་མེད་འདིས།།

འོད་ཟ་ཟི་ཅན་གྱི་ཉི་ཟླ་བྲིས།།

དབུ་དགུང་ལ་སྙེག་པའི་གངས་རི་བྲིས།།

སྤང་ན་ཁུད་རེ་ལ་སྡེ་རེ་བྲིས།།

ལུག་གཡང་དཀར་སྤྲིན་དང་འདྲེས་ལེ་བྲིས།།

ཕྱུགས་སྒོ་ཟོག་འབྲོང་དང་ནོར་ལེ་བྲིས།།

ཡང་རྫ་སྤང་གཉིས་ཀྱི་འདྲེས་མཚམས་ན།།

སྨན་བུ་མོ་མེ་ཏོག་འདྲ་བ་བྲིས།།

ངག་སྙན་འཇེབས་གླིང་བུའི་འགྱུར་ཁུགས་ལ།།

ཞེ་དུང་བའི་ཚིག་འབྲུ་གསལ་བ་བྲིས།།

ལུས་གོམ་ཆུང་སྤོས་པའི་རྗེས་ཤུལ་དུ།།

བག་མེད་པའི་རི་དྭགས་འཆི་བ་བྲིས།།

དབྱངས་གསལ་བྱེད་སྦྲེལ་བའི་ཆོ་ག་ལ།།

ཡིད་རྟེའུ་ཆུང་ཤོར་བའི་སེམས་ཅན་ང་།།

ལུས་འབྱུང་བཞི་རང་སར་ཐིམ་པའི་རྗེས།།

ཞིང་དེ་རུ་སྐྱེས་ན་བློ་རེ་བདེ།།

                             2017.11.30


0

One Response to གཡུང་མོས་གསར་དུ་བྲིས་པའི་མགུར་རྩོམ་ཁག་བཞི།

  1. རོལ་སྐུད། ལགས་ཀྱིས:

    འདི་ནི་རྩོམ་ཡག་རྨད་དུ་བྱུང་བ་ཞིག་གོ ཨེ་མ་ཧོ།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།