སྒོ་ཤེར་གྱི་གསར་བྲིས་ཚིགས་བཅད《ཁ་བ་བབས་བྱུང》ཞེས་པ།

394

23804349_1616465261744301_643376771_n.jpg


 

སྤྲིན་པའི་དཔུང་གདང་གནམ་སའི་བར་ན་སྦྲེལ། །

ཁ་བ་ལྷབ་ལྷུབ་ཁ་བ་ཅན་དུ་བབས། །

ཉི་མའི་ངོ་མདངས་འཁྱག་པས་བསྡམས་སོང་ངོ་། །

གྲང་རེག་རུས་པའི་གསེང་ལ་ཟུག་བྱུང་ངོ་། །

ཁ་བའི་འདབ་མ་ས་ལ་བབས་པའི་དུས། །

ད་ལོའི་གྲང་རེག་སེམས་ངོར་ལྗིད་སེ་བབས། །

ཙག་དང་བསེར་བུ་དྲོད་དུ་སྒྲོག་པ་ཡི། །

གཏམ་དག་དགུན་རླུང་ལས་ཀྱང་ལྷག་པར་གྲང་། །

རི་ལུང་ཐམས་ཅད་ཁ་བས་གཡོགས་པ་ཡིས། །

འགྲོ་སའི་ལམ་ཞིག་མཐོང་དུ་མེད་པ་ན། །

ཐོ་ཡོར་འདྲ་བའི་ལམ་འགྲོ་མང་པོ་ཞིག །

མདུན་དུ་བསྐྱོད་པའི་སྤོབས་སེམས་ལྷོད་པར་གྱུར། །

འགྲུལ་བ་ཁ་ཁེར་མདུན་ནས་མདུན་དུ་ཆས། །

སེམས་གསོའི་ནང་གཏམ་ཤུབ་བུར་ཟློ་བཞིན་ཆས། །

ཙག་རླུང་བར་མེད་ལྡིང་བའི་ཤུར་སྒྲའི་ཁྲོད། །

སྒོ་ཁྱིའི་ཟུག་སྐད་རྣ་བར་ཡང་ཡང་འཁྱིལ། །

མཚན་མོའི་སྐར་ཚོགས་གྱ་མ་གྱུ་ཡི་འོག །

མགྲོན་པོའི་ཁ་ཤ་འདར་མ་འདར་གྱིས་སྐྱོད། །

རྒྱང་ན་མེ་འོད་གསལ་མ་གསལ་ཞིག་མཐོང་། །

མཐོང་ཚུལ་འཁྲུལ་སྣང་མིན་ན་དགའ་བ་ལ། །

                                                 2017/11/22/ ཉིན། ཁ་བ་ལྷབ་ལྷུབ་འབབ་པའི་ཁྲོད་དུ་སྦྱར།

 

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།          

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།