གསལ་བྱེད་སུམ་ཅུ་དང་ངའི་དོལ་པོའི་ཕྲུ་གུ་ཚོ།

 

ཀ་ཁ་ག་ང་།

མཆོད་བསྟོད་ཀྱིས་སྦར་བའི་མར་མེ་མིན།

ཁོ་ཚོར་གནང་རོགས།

ཅ་ཆ་ཇ་ཉ།

སྨོན་ལམ་གྱིས་སྒྲེང་བའི་དག་ཞིང་མིན།

ཁོ་ཚོར་སྐྱུར་རོགས།

ཏ་ཐ་ད་ན།

ཁེ་ཕན་གྱིས་གཅོད་པའི་བརྩེ་དུང་མིན།

ཁོ་ཚོར་ཁྲིད་རོགས།

པ་ཕ་བ་མ།

རང་རང་གིས་བསགས་པའི་ནག་ཉེས་མིན།

ཁོ་ཚོར་གཅེས་རོགས།

མར་མེའི་དག་ཞིང་།

བརྩེ་དུང་གི་ནག་ཉེས།

རེ་རེའི་སེམས་ཀྱི་ལྟེང་ཀ་རུ་མེར་ཞིང་།

རེ་རེར་ཟློས་པའི་གནས་བབ།

ཐུག་ཐུག་ལ་བཅོལ་རུང་།

ཨ་ལན་མེད་ལ་ཡ་ལན་མེད་པས།

གངས་རི་ར་བའི་སྐོར་བའི་ཞིང་ཁམས།

སེམས་ལ་སྐྱུར་ཞིག་ལང་སྟེ།

མཐའ་དམག་སུ་ལ་བྲེད་ཤ་ལངས།

ཙ་ཚ་ཛ་ཝ།

ཨ་མས་གྱེར་བའི་སྐྱབས་འགྲོ་ཡིན།

ཁོ་ཚོར་སྐྱོབ་རོགས།

ཞ་ཟ་འ་ཡ།

ཕན་ཚུན་གྱིས་གླེང་བའི་ལས་དབང་ཡིན།

ཁོ་ཚོར་དྲན་རོགས།

ར་ལ་ཤ་ས།

དབུས་ཀྱི་མཐའ་ཀློད་པའི་སྐྱོ་གར་ཡིན།

ཁོ་ཚོར་སྲུང་རོགས།

ཧ་ཨ།

རེ་སྒུག་གི་དྲིལ་བུ་རུ་སྨོན།

སྐྱབས་འགྲོ་ལས་དབང་།

སྐྱོ་གར་གྱི་རེ་སྒུག

རེ་རེའི་སེམས་ལ་ཤིག་ཤིག་འཚང་ཞིང་།

རེ་རེར་སྒུར་པའི་ལོ་ནག་ལ།

འཇིགས་པ་ཐམས་ཅད།

དྲན་དྲན་ལ་བསྐུར་རུང་།

ཕྱི་མིག་མེད་ལ་རྒྱང་ལྟ་མེད་པས།

གངས་རི་ར་བའི་སྐོར་བའི་ཞིང་ཁམས།

མ་ཆུང་ལ་སྡུག་ཅིག་ཐོགས་ཏེ།

མཐའ་དམག་སུ་ལ་མཐེ་བོང་ཀེར།

                 2014/12/2/-12-13