གཅན་མེ་སྟག་གི་སྙན་ངག་ཅིག་ལ་མཆན་དུ་བཏབ་པའི་ཐོལ་རྩོམ་འགའ།

403

IMG_4101.JPG
                                     @གཅན་རང་སད།


གཉུག་གཤིས་ཤེལ་དཀར་ཞུན་མའི་མཚོར།།

སྒྱུ་རྩལ་རླུང་གིས་རྣམ་གཡོ་བའི།།

སྙན་ངག་ཨུཏྤལ་རྒྱ་མོ་ཡིས།།

ཚོར་བའི་ངང་མོ་རྒྱུན་མར་བཅིངས།།

ཀུན་རྟོག་ནམ་མཁའི་ཁྱོར་མ་ན།།

ཚོར་བའི་རྒྱུ་སྐར་སྣ་ཚོགས་འཛུམ།།

རིགས་ཤེས་ཟླ་བ་གཅིག་པུ་ཡིས།།

ངག་རིག་གསེར་གྱི་ཀུན་ད་འབྱེད།།

                                                  @གཅན་མེ་སྟག

བདེན་པའི་ཟླ་བ་མེ་ལོང་གི།

དཀར་ཆ་དེ་དང་འགྲོགས་པ་ན།།

སྙན་ངག་རྡོ་ཡི་སྲ་མཁྲེགས་ཀྱིས།།

བདག་གི་མགོ་བོ་གཅོག་པ་ཉིད།།

@གཅན་རང་སད།

སྦང་མ་རྒྱབ་ཁལ་ལོངས་པ་ལས།།

བདུད་རྩིའི་ཐིགས་པ་གཞིབ་པ་ཉིད།།

ཚོར་བའི་འོ་མ་བསྲུབས་པ་ལས།།

ཡང་ཏིག་དོན་གྱི་མར་ལོ་འབྱུང་།།

མེ་ལྕེ་གྱེན་དུ་འབར་བ་ནི།།

བཟློགས་མེད་དངོས་པོའི་གཤིས་ལུགས་ཏེ།།

ཚོར་བའི་སྤྲིན་པ་མཐོར་འཕགས་ན།།

སྙན་ངག་དམ་པའི་ཆར་ཤ་སྦྲུམ།།

@གཅན་མེ་སྟག

ཤར་ལ་ཤར་གྱི་རི་རྩེ་ཞིག།

ནུབ་ལ་ནུབ་ཀྱི་ཆུ་ཕྲན་ཞིག།

ངམ་ངམ་འབར་རམ་ཆལ་ཆིལ་འབབ།།

སྙན་ངག་ལ་ནི་ཅི་ཞིག་མཁོ།།

@གཅན་རང་སད།

སྙན་ངག་འཚོ་བའི་བསྡུས་གཟུགས་ཏེ།།

སྲེག་བཅད་བརྡར་བའི་གསེར་གོང་ཉིད།།

རྐང་གདུབ་གཙུག་རྒྱན་གང་བཟོ་བ།།

བྱེད་པོ་རང་གི་མོས་པ་ཙམ།།

@གཅན་མེ་སྟག

ཁྱོད་ཀྱི་དེ་ལ་ཧ་ཅང་འཐད།།

ལ་ལས་སྙན་ངག་གཙུག་ཏུ་བཀུར།།

ལ་ལས་སྙན་ངག་བརྫི་བར་བྱེད།།

ང་ནི་སྐྱག་དྲི་དེ་ལ་དགའ།།

@རོང་བོ་དགེ་འདུན་ལྷུན་གྲུབ།

སེམས་འདི་གཡོ་འམ་གང་ལ་འཕྲད།།

ངག་དེ་འདར་རམ་རྒྱུ་ཅི་ཞིག།

ལུས་སྐྱེས་ཚོགས་དག་ལྷན་ཅིག་ཏུ།།

འཇིགས་ཤིང་བཤུམས་པ་ཅི་ཡིས་ནོངས།།

@གཅན་མེ་སྟག

གཡོ་ཞིང་གཡོ་བ་ཤིང་མ་རེད།།

འདར་ཞིང་འདར་བ་ངག་མ་རེད།།

ལུས་ནི་གཡོ་བ་སྡུག་བསྔལ་དང་།།

ངག་ནི་འདར་བ་ཉེས་པས་སོ།།

@གཅན་རང་སད།

རླུང་བུས་དར་ལྕོག་བསྒུལ་ལོ་ཞེས།།

བྱིས་པའི་ཚོགས་དག་ཅ་ཅོ་སྒྲོག།

དོན་ལ་རླུང་དང་དར་ལྕོག་གཉིས།།

མ་གཡོས་རྣམ་རིག་བསྐྱོད་པ་ཙམ།།

@གཅན་མེ་སྟག

རྣམ་ཤེས་གཡོ་བ་དར་འདྲ་སྟེ།།

མཛེས་མ་མཐོང་དུས་དེ་ལ་གཡོ།།

གསེར་དངུལ་མཐོང་དུས་དེ་ལ་གཡོ།།

མི་གཡོ་འདོད་པ་ཅི་སྟེ་འགྲུབ།།

@གཅན་རང་སད།

འཇིག་ཚོགས་ལྟ་བའི་གོ་ར་ན།།

ཕྲ་རྒྱས་ལྕགས་ཀྱི་ཁང་པ་ཡི།།

སྒོ་དྲུག་དག་ཏུ་རྒྱུ་བྱེད་པའི།།

མཇུག་མེད་སྤྲེའུས་སུ་མ་བསླུས།།

@གཅན་རང་སད།

རྩྭ་ཡི་ཁམ་ཟས་ལྷག་མར་བཅས།།

རི་དྭགས་གྲིབ་མ་འདར་བ་ནི།།

བརྩེ་བའི་རླུང་དང་འགྲོགས་པ་ཡི།།

དགའ་སྐྱོའི་ཇག་མདའ་ཕྲ་མོས་སོ།།

@རོང་བོ་དགེ་འདུན་ལྷུན་གྲུབ།

སིལ་སིལ་སྒྲ་དེས་དཀྲོགས་སམ་ཁྱེད་ཀྱི་ནགས།།

གཡོ་བཞིན་གཡོ་བཞིན་རབ་ཏུ་ངུ་བ་ནི།།

དྲང་སྲོང་བ་རྣམས་སྐྱོ་བའི་རྒྱུར་གྱུར་ནས།།

བརྟུལ་ཞུགས་ཇི་སྙེད་གང་དུ་བོར་རམ་ཀྱེ།།

@གཅན་མེ་སྟག

ཨེ་མ་ཨེ་མ་ང་ཡི་ནགས་ཚལ་ཅི་སྟེ་གཡོ།།

རི་དྭགས་ཚོགས་ཀྱང་འདྲོགས་སྟེ་བྱེར་བ་ཅི་ཡི་དོན།།

གང་ན་དྲང་སྲོང་གང་ན་སྐྱོ་བ་གང་ན་གང་།།

ཨ་རོ་ཨ་རོ་ང་ནི་རི་དྭགས་ང་ནི་ང་།།

@རོང་བོ་དགེ་འདུན་ལྷུན་གྲུབ།

གྲིབ་མ་དེའང་སེམས་དང་བཅས།།

ཁྱེད་ཀྱི་རྗེས་སུ་ཕྱོགས་པ་དེས།།

སྣང་བ་དེའང་རླུང་བུ་བཞིན།།

གང་ལ་འཁྲིད་པའི་གཞི་ཅི་ཞིག།

@གཅན་མེ་སྟག

མཛེས་མའི་རྗེས་སུ་སོང་བའི་མིག།

བརྒྱ་བྱིན་ལྕགས་ཀྱུས་འགུགས་མིན་ན།།

ལུས་ཀྱི་གྲིབ་དང་སྣང་བ་དེ།།

སུ་དང་གང་གིས་འགུག་བྱེད་དམ།།

@རོང་བོ་དགེ་འདུན་ལྷུན་གྲུབ།

རི་དྭགས་དེ་ནི་སྨུག་པའི་ཁྲོད་དུ་འམ།།

རྨི་ལམ་དུ་གྱུར་མེ་ལོང་ངོས་སུ་ནི།།

བྲོས་པའི་རྗེས་སུ་སྙེགས་པས་ངལ་བ་ལ།།

འཇིག་པ་མི་མངའ་གང་ཁྱེད་དགའ་བྱེད་བཞིན།།

@རྫ་སྐྱེས་ཕུར་བ།

དགའ་སྤྲོ་དེ་བཞིན་སྐྱོ་གདུང་དེ་བཞིན་ཏེ།།

ལས་ཀྱི་ཁ་བ་ཞི་ཞིང་ཆུ་རུ་འཐིམ།། 

ཆུ་ནི་མི་མཐོང་རྡུལ་ཕྲན་དག་ལ་འཐིམ།།

རྡུལ་ཕྲན་དག་ཀྱང་སྟོང་བའི་རླབས་ལ་འཐིམ།།

སྟོང་བའི་རླབས་ནི་གང་དུ་འཐིམ་མམ་ལགས།།

@གཅན་མེ་སྟག

སེམས་ལ་སེམས་འདྲེས་འཇིག་རྟེན་སྐྱིད་ལ་རོལ།། 

རྐང་ལ་རྐང་འདྲེས་མི་ཚེ་ལས་ཀྱིས་བསྐྱལ།།

ལས་དང་སེམས་ཀྱིས་མྱོང་བ་སྟོང་ལགས་ན།། 

སྟོང་བར་གྱུར་བའི་འཇིག་རྟེན་སུ་ཡིས་སྐྱོང་།།

@རྫ་སྐྱེས་ཕུར་བ།

སྨུག་པའི་ཤམ་བུ་གཡོ་ཚུལ་ལ།།

བལྟས་ན་བུ་མོ་ཞིག་ཡིན་འདྲ།། 

སྒྱུ་མའི་གྲུ་རྫིངས་འགུལ་སྟངས་ལ།། 

བསམ་ན་ལྷ་མོ་དེ་ཡིན་འདྲ།།

སྟོང་བའི་ཚུལ་དེ་མ་ངེས་པས།།

གཅན་བུ་མེ་སྟག་ལ་བྲིས་སོ།།

@གཅན་མེ་སྟག

སྟོང་བ་ཡིན་པ་ཤེས་བཞིན་དུ།།

མཛེས་མ་རིག་ན་འདོད་ཆགས་སྐྱེས།།

ལྷ་མོ་མི་མོ་གང་ཡིན་རུང་།།

སྟོང་རུང་ཅིག་གིས་ལས་ན་འདོད།།

@རྫ་སྐྱེས་ཕུར་བ།

བདེན་ནོ་ཚུལ་དེ་མྱོང་བར་ཐུག།

བཤད་ན་དེ་ནི་སྟོང་བར་ཐུག།

གང་ལྟར་མཐོང་ན་ཟ་འདོད་སྐྱེས།། 

དཔེར་ན་ཁམ་བུ་སྨུག་ཆུང་བཞིན།།

ཆུ་ནི་ཅིའི་ཕྱིར་ཆུ་ཡིན་པ།།

དངོས་སྟོབས་རིགས་པས་མ་ཤོད་སྐད།།

དེའི་ཕྱིར་ཆོས་གྲགས་སོགས་ཀྱིས་ཀྱང་།།

གྲགས་པའི་རྟགས་ཉིད་ལོགས་སུ་བཞེད།། 

དེ་ཙམ་གྱིས་ཀྱང་མ་ཤོད་རབ།། 

འོན་ཀྱང་རྟོག་རྩལ་འཕྲུལ་གྱི་བུ།།

སྙན་ངག་མཁན་གྱི་ཤོད་ལེ་ཡོད།།

དཔེར་ན་གཅན་བུ་མེ་སྟག་བཞིན།། 

དཔེར་ན་ནག་མོ་ཁོལ་ལགས་བཞིན།།

 

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།