སེམས་པ་འཐོར་ཚུལ། (ཞར་བཀོད་གསུམ།)

258

 

     རྩོམ་པ་པོ།   དྲན་དཀར།   

 

16118375_1291569074233923_1309291216_n.jpg

       སེམས་འཐོར་ཚུལ།

 

བྱང་ཐང་དབུས་སུ་རླུང་བུ་ངར་ཁ་བཙན་སོང་།།

གནམ་མཐའི་ཉི་དྲོད་ཚལ་བ་ཚལ་བུར་གཏོང་འགྲོ།།

འཇག་མས་ཆོ་ངེ་འདོན་པའི་སྲོད་ཞོགས་རེ་རེར།།

སྟོན་ལོ་འཐོར་བའི་ཚུལ་དང་བདག་སེམས་མཚུངས་ཨང་།།

ལས་ཀྱི་མདུན་དུ་སུ་ཡང་འཁོས་ཀ་ཆུང་སོང་།།

འདུན་པའི་ཡུལ་དང་བསྐལ་བ་བསྐལ་བར་གྱེས་འགྲོ།།

ཕྱིར་དྲན་བྱུང་བ་སློག་པའི་ཐུན་མཚམས་རེ་རེར།།

རི་སྤྱང་ལྡོམ་པའི་ཚུལ་དང་བདག་སེམས་མཚུངས་ཨང་།།

གཉུག་མའི་ཐང་དུ་རང་རེ་གོམས་ལོབས་ཆེ་སོང་།།

བཅོས་མའི་རྫུ་བག་འཕྲལ་མ་འཕྲལ་མར་འགྱུར་འགྲོ།།

འཆར་སྒོ་རང་སར་གྲོལ་བའི་གྲུ་ག་རེ་རེར།།

བྱེའུ་ཆུང་གཟེབ་ལས་ཤོར་དང་བདག་སེམས་མཚུངས་ཨང་།།

གཞོན་པའི་སྣང་བ་ཞོགས་ཁའི་ཟིལ་བ་འདྲ་བྱུང་།།

དྭངས་བའི་དབལ་ཁ་མྱུར་བ་མྱུར་བར་ཡལ་འགྲོ།།

ལུས་སེམས་ལོ་ཟླས་མནར་པའི་ཉིན་ཞག་རེ་རེར།།

མྱ་ངན་ཁུར་བའི་མི་དང་བདག་སེམས་མཚུངས་ཨང་།།

       ཕུང་གསུམ་པ།

 

སྲིད་པའི་འདུ་ལོང་ཀུན་ལ་ཡི་ཆད་སྐྱེས་ཤིང་།།

མཆོག་གསུམ་སྐྱབས་ཀྱི་ངོ་བོར་རྩེ་གཅིག་དད་པའི།།

ཉིན་མཚན་རྣལ་འབྱོར་སྒྲུབ་ལ་ལྷོད་མེད་གཞོལ་མཁན།།

རྣམ་དག་ཆོས་པའི་གྲལ་དུ་ཚུད་ཀྱིན་མི་གདའ།།

སྣང་བའི་རི་མོ་རྒྱ་མཚོའི་རླབས་ལ་འབྲི་ཤིང་།།

ཡིད་ཀྱི་ཐིག་རིས་བརྒྱ་རྩ་བརྒྱད་དུ་བགོ་བའི།།

གཉུག་མའི་དབྱངས་ཀྱི་ང་རོ་གཅིག་བུར་གྱེར་མཁན།།

སྙན་ངག་སྨྲ་བའི་གྲལ་དུ་བརྩི་ལོ་མི་འདུག།

སྔོན་བྱུང་མཁས་པའི་དཔྱད་དོན་ཡང་ཡང་བཤེར་ཞིང་།།

ལྷན་སྐྱེས་བློ་ཡི་སྣང་ཚུལ་བརྟགས་ཤིང་དཔྱད་དེ།།

ཕྲ་རགས་ཤེས་བྱའི་གསང་བ་ནན་གྱིས་སྔོག་མཁན།།

བློ་ཆེན་མཁས་པའི་གྲལ་དུ་ཚུད་ཐབས་མ་བྱུང་།།

རྒྱ་བོད་གཞུང་བརྒྱའི་དགོངས་མཐིལ་ཐུགས་སུ་ཆུད་ལ།།

སྣ་ཚོགས་གྲུབ་མཐའི་བཞེད་མཚམས་སྤུ་རིས་གསལ་ཞིང་།།

རང་ལ་རང་གི་རང་ལུགས་འཐད་ལྡན་ཡོད་མཁན།།

དོན་དམ་གྲུབ་མཐའ་མཁན་དུ་བགྲང་ལོ་མི་འདུག།

སྔོན་བྱུང་ལེགས་ཉེས་རི་མོ་ཡིད་ལ་གསལ་ཞིང་།།

མ་འོང་འབྱུང་འགྱུར་ལམ་བུར་བརྒལ་ཞིང་བརྟག་སྟེ།།

སྔ་གཞུག་དུས་ཀྱི་འགྱུར་བག་ཚོད་དགམ་བྱ་མཁན།།

དུས་ཀྱི་ལམ་སྟོན་པ་དང་ཁ་ཐག་རིང་སོང་།།

           གཞིས་ཀའི་སྨྲེང་བ།

 

ཁང་སྐྱ་ཁུར་བའི་རླུང་པོས་གདོང་ལྕག་གཞུ།།

ཟོག་ནག་ཡན་སའི་རི་ལུང་ཁ་བས་འདན།།

རྩི་ཐོག་ཟད་པའི་ས་འབུར་རེ་རེ་ན།།

ཨ་བྲ་ཙི་གུས་ཙོག་པུར་གནམ་ལ་ལྟ།།

སྒོ་རའི་ཕྱི་ནང་བར་ཡང་བུ་ཡུག་རྒོད།།

བཙའ་བའི་གདོང་ལ་ཐལ་བའི་བམ་ཁ་མཐུག།

དེ་ལྟ་ན་ཡང་ཨ་མའི་ཐབ་རྩ་དྲོ།།

དེ་མིན་འབྲོག་ཐང་དབེན་པར་ཡ་རེ་ང་།།

ཕུག་བསམ་བོར་བའི་མི་རྣམས་ཚེ་ཐག་རིང་།།

ཕར་འགྲོ་ཚུར་འོང་རེ་རེར་དུས་ཚོད་འདེད།།

འོད་ཀྱི་རྨི་ལམ་འཐུ་བའི་སྐྱེ་བོ་རྣམས།།

ཁ་ལག་གཉིས་ཀས་དུས་ཚོད་རེ་རེ་འཛིན།།

རེ་པའི་སྒྱེ་མོ་ཇི་ཙམ་ཆེ་གྱུར་བ།།

དེ་ཙམ་སྡུག་གི་ཁུར་བོ་ལྕི་གྱུར་བས།།

གང་དུ་རྒན་གཞོན་བར་མའི་སྐྱེ་བོ་ཀུན།།

རང་གིས་ཐེག་པའི་དགའ་སྡུག་ཁུར་ཅིང་འགྲོ།།

བདེ་གཟར་འཚོ་བའི་ལམ་བུ་ཅི་བས་རིང་།།

དགའ་སྐྱོ་ནང་གི་ཡིད་འགྱུ་དེ་བས་མོད།།

ཡི་ཆད་ཁ་བ་འབབ་པ་མང་མང་བས།།

ངེས་འབྱུང་རྨི་ལམ་མཁན་ཚོ་ཁག་མེད་སྙམ།།



                               ༢༠༡༣/༡/༢༥/དགོང་མོར།

        ཆིག་ལབ།


 

༔རླུང་བུའི་འགྲོས་ནི་གཏད་སོ་བྲལ། །

གང་དུ་རྒྱུ་བའི་ཧྲག་བར་ནས།།

མི་ཤིགས་མདུད་པའི་རྣམ་ཤེས་ཁམས།།

ཁྱོད་ཀྱི་དཔལ་ལ་ཐོགས་པར་གྱུར།།


རང་སྣང་འོད་ཀྱི་གཞལ་ཡས་ནས།།

དག་པ་ལྷ་ཡི་ཞིང་དུ་འཁྲུངས།།

གཞོན་པའི་ལང་ཚོའི་ཟིལ་ཤུགས་ཀྱང་།།

རྡོག་མགོར་ཤུད་དེ་འོབས་ལ་འཕངས།།


མཛའ་མཐུན་མི་འགྱུར་གཡུང་དྲུང་རིས།།

ལོ་ཟླའི་ཁྱོན་ནས་བྲག་ལ་བརྐོས།།

གྱེས་གདུང་སེམས་གཞས་སྐྱུར་བའི་དབྱངས།།

བྲག་ཅ་བརྒྱུད་ནས་དབྱིངས་ལ་འཕུར།།

སྙིང་ལ་བྲིས་པའི་ཡིག་འབྲུ་རེ།།

མཚན་མོ་སྨག་ལ་བཀླག་པར་བརྩམས།།

ཡིག་འབྲུ་རེ་རེའི་གས་སྲུབས་ནས།།

འཛུམ་ཆུང་རེ་རེ་མོག་པོར་སོང་།།

 

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།