སྐྱེ་བ་སྔོན་མའི་རང་ལ་གདམས་པ།

320

15822074_1277653632292134_123227866_n.jpg


 

སྐྱེ་བ་སྔོན་མའི་རང་ལ་གདམས་པ།

ཁྱོད་རང་སེམས་ཕྲ་མོའི་འོད་འཁྱིམས་ཏེ། །

མཚན་མུན་པ་མཐོང་ན་དགའ་སྣང་མེད། །

ལ་གོར་དུ་བཞུད་ཅིག་ཚེ་ཕྱི་མར། །

ཚེ་འདི་ཡི་དུ་བའི་ཨ་ལོང་རྒྱུག །

དབུགས་རེ་ལ་ལུག་བརྒྱ་རི་བ་ཁྱོད། །​​

ཨ་ཙ་རའི་སྣ་རྡེའུ་མ་བྱས་གོང་། ། ​

ནང་ཟན་གྱིས་དགྲོང་ན་ཅི་ཞིག་བྱ། །​​

ཚུལ་དེས་ཀྱང་འདན་མས་ཕྱི་ནུར་བྱོས། །

སྤུ་རེ་ལ་རྟ་བརྒྱ་འབབ་པ་ཁྱོད། །​​

རང་དབང་གི་ཆེད་དུ་མ་འགྱེལ་གོང་། ། ​

ས་མདའ་ཡིས་རྨས་ན་ག་རེ་བྱེད། ། ​​

ཚུལ་དེས་ཀྱང་འདན་མས་ཕྱི་ནུར་བྱོས། །

རྨ་རེ་ལ་འབྲི་བརྒྱ་རན་པ་ཁྱོད། ། ​​

གནས་ལུགས་ཀྱི་ཆེད་དུ་མ་ཤི་གོང་། ། ​​

ལྐོག་རྙི་ཡིས་རྫོགས་ན་ཅི་ཙིག་བྱེད། །​​

ཚུལ་དེས་ཀྱང་འདན་མས་ཕྱི་ནུར་བྱོས། །

སྤྱིར་སྨུག་ཅིང་སེར་བའི་ངོ་གདོང་དེ། །

སྨན་ཅོ་ཐོགས་བརྒྱ་ཡི་སེམས་རྟེན་རེད། །

དེའི་ཚབ་ཏུ་སུས་ཀྱང་མི་ལོ་སྟེ། །

གནད་དེས་ཀྱང་འདན་མས་ཕྱི་ནུར་བྱོས། །

སྒོས་སྐམ་ཞིང་རིད་པའི་ལུས་པོ་དེ། །

ལོ་ཉི་ཁྲིའི་སྔོན་གྱི་བུ་ལོན་རེད། །

དེའི་དོད་དུ་སུས་ཀྱང་མི་འོང་སྟེ། །

འགངས་དེས་ཀྱང་འདན་མས་ཕྱི་ནུར་བྱོས། །

ཁྱོད་ཤི་ན་དབྱངས་ཅན་འགྲམ་པའི་ཆང་། །

ཁྱོད་འདྲ་བར་འཐུང་མཁན་གང་ན་ཡོད། །

ལྷ་འཇམ་དཔལ་བཞུགས་ཀྱང་ལན་ཆགས་ཏེ། །

ལོ་རྒས་པའི་གྱོལ་ཚུལ་གན་ལ་ལྟོས། །

ཁྱོད་ཤི་ན་དབྱངས་ཅན་འགྲམ་པའི་ཆང་། །

ཁྱོད་འདྲ་བར་འཐུང་མཁན་གང་ན་ཡོད། །

བདུད་དགའ་རབ་འཚོ་ཡང་ཐོ་ཙམ་སྟེ། །

བློ་འཁུམས་པའི་ཤུགས་རིང་གན་ལ་ཉོན། །

ཁྱོད་ཤི་ན་དབྱངས་ཅན་འགྲམ་པའི་ཆང་། །

ཁྱོད་འདྲ་བར་འཐུང་མཁན་གང་ན་ཡོད། །

ཀླུ་མི་མགོན་ལྷགས་ཀྱང་ལྷག་མ་སྟེ། །

རྩལ་ཉམས་པའི་ཆོབ་སྒྲ་གན་ལ་སོམས། །

ལར་གཤིན་ཡུལ་ངག་གི་ལུང་བ་འདིར། །​​

གླུ་ཐན་ཐུན་མི་ལེན་མེད་ན་ཡང་། ། ​​

ཁྱོད་ནང་བཞིན་དབྱངས་ཀྱི་ཁྲུས་རྫིང་ནས། །​

སེམས་ཐིག་ལེ་གཏོར་མཁན་ད་དུང་མེད། ​།

རྐྱེན་དེ་སླད་འདན་མས་གོམ་གསུམ་ཁྱེད། །

དོན་ལོག་འཁྱེར་བྱས་ཀྱང་བྱེད་དུ་ཆུགས། །

རྐྱེན་དེ་སླད་ཚ་ཞང་ཐེངས་གསུམ་གཡོལ། །

རྩིས་འཕྲོ་མ་སྐྱེ་བ་བདུན་འཕྲོར་རྒྱོབས། །

                                                  2010-8-13 སེང་རྡོར་གྱིས་བརྩམས།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།