དོལ་པོ་པདྨ་དགོས་འབྱོར་གྱི་ཚིགས་བཅད་ཚན་པ་བཞི།

197

0423_1 (1).jpg

       མ་གཡར་བུ་མོ།

 

སྒྱུ་མའི་འཇིག་རྟེན་ཁྲ་ཁྲ་ཟིང་ཟིང་རེད།།

བལྟས་ན་མཛེས་ཀྱང་བསྔོགས་ན་མི་མཛེས་ཤིང་།།

ཡུན་གྱིས་གཞིགས་ན་སྙིང་ལ་གཡོ་འགུལ་གཏོང་།།

དེ་ནི་དུས་རབས་གསར་བའི་འཇིག་རྟེན་ཡིན།།

དང་པོ་ཐུག་དུས་མནའ་ཚིག་གན་རྒྱ་བཞག།

བར་དུ་བྱིས་པ་ངུ་ངག་ཀློང་དུ་དོར།།

རང་རང་ས་ན་སྟ་གོན་གསར་བ་རེ།།

ཤར་ནུབ་ཀུན་ན་དར་བའི་ལུགས་ངན་ཞིག།

ཨ་ཕའི་བྱམས་བརྩེ་མིག་ལོག་ཁ་རྡུང་ཡིན།།

ཨ་མའི་བརྩེ་བའང་ནམ་མཁའི་དབྱིངས་ལ་སྤུར།།

སྔ་དྲོའི་ཤིང་མཁན་གོང་མོའི་ཆུ་ལེན་སྟེ།།

མ་གཡར་བུ་མོའི་སེམས་པ་འཁྱག་པས་བསྡམ།།

ཁྱིམ་མཚེས་ན་ཟླ་མིག་ཆུའི་གྲོགས་སུ་འགུག།

མ་མཐོང་ས་ནས་ངུ་སྐད་ཤུགས་ཀྱིས་འདོན།།

ལུས་ལ་གྱོན་པ་ཧྲལ་པོ་སྟོད་སྨད་གཡོགས།།

མ་གཡར་བུ་མོའི་ལས་དབང་སྙིང་ལ་གཟན།།

ཕ་མ་ཕྲུ་གུར་བརྩེ་བའི་སྣང་བརྙན་དེ།།

མ་གཡར་བུ་མོའི་སེམས་ལ་མི་མཛའ་ཞིང་།།

སྟོད་ལ་འཚང་པའི་མི་མངོན་ན་ཟུག་ཅིག།

མིག་མཐའ་མཆི་མས་བརླན་པའི་གཞི་མར་གྱུར།།

བྱམས་ལྡན་ཨ་མ་བྲལ་བའི་ལས་དབང་གིས།།

ཨ་ཕའི་བརྩེ་བ་ཉེ་རིང་དབྱིངས་ལ་ལྡིང་།།

ངལ་རྩོལ་ཡོད་ཚད་ཕྲག་པར་སྤུངས་ནས་འཇོག།

མཐོང་ན་སྐྱོ་བ་མ་གཡར་བུ་མོ་ཡིན།།

ཡར་ལ་བལྟས་ན་བར་སྣང་སྟོང་པ་དང་།།

མར་ལ་བལྟས་དུས་ས་གཞི་སྐྱ་བོ་ལས།།

ང་ལ་དབང་པ་གང་ཡང་མི་འདུག་ཅེས།།

མཚམས་རེར་མ་གཡར་བུ་མོས་སྨྲེ་ངག་འདོན།།

འཆི་བྲལ་གསོན་བྲལ་གཉིས་ཀའི་སོ་མཚམས་ན།།

ས་གཞི་འདི་ན་མ་གཡར་བུ་ཕྲུག་མང་།།

ལས་འབྲས་དགེ་སྡིག་རྣམ་བཞག་ཇི་ལྟར་ཡང་།།

འཇིག་རྟེན་ཡ་རབས་ལུགས་དང་འགལ་བར་སོམས།།

དམངས་རྣམས་འདུ་འཛོམས་དགའ་སྤྲོས་བྲོ་འཁྲབ་ཀྱང་།།

མ་གཡར་བུ་མོ་ཕྱུགས་རྫིར་རི་ཁྲོད་ཉུལ།།

རི་བོའི་རྩེ་ནས་ཆིག་ལབ་ཁྲི་མ་འབུམ།།

སྐྱོ་གདུང་ཀློང་ནས་ནམ་མཁའི་ལྷ་ལ་བཅོལ།།

ཕ་འཛོམས་མ་འཛོམས་ཅན་གྱི་བུ་ཕྲུག་ཚོ།།

ལུས་ལ་རྒྱན་སྤྲས་བཞིན་ལ་མདངས་དང་ལྡན།།

མ་གཡར་བུ་མོ་མི་ཚོགས་ཟུར་དེ་ན།།

དྲན་གདུང་དབྱིངས་ན་སེམས་ཀྱི་གཤོག་སྒྲོ་ལྡིང་།།

        ཕ་མ་གཉིས་འཛོམས་མེད་པའི་བུ་ཕྲུག་མང་པོ་གཞན་འོག་ན་དཀའ་སྡུག་གིས་འཚོ་བའི་སྣང་བརྙན་ཡིད་ལ་འཁོར་ནས་པདྨ་དགོས་འབྱོར་གྱིས་བལ་ཡུལ་མཆོད་རྟེན་བྱ་རུང་ཁ་ཤོར་ཉེ་འདབས་སུ་/2016/05/10/ ཉིན་བྲིས།

        ཕ་ཡུལ།

 

ཕུ་ཡི་གངས་རི་དཀར་པོ།།

ཕ་མ་ཡིན་ན་དགའ་བ།།

འགྱུར་མེད་ལྷམ་མེར་བཞུགས་དུས།།

བྱམས་བརྩེའི་བདེ་སྐྱིད་མྱོང་འདོད།།

བར་གྱི་བྲག་རི་དམར་པོ།།

གཉེན་ཉེ་ཡིན་ན་དགའ་བ།།

གཅིག་མགོ་གཅིག་ལས་མཐོ་དུས།།

ང་ཡིས་རེ་སྤོབས་རྟས་ཆོག།

མཛེས་སྡུག་ཁྲ་ཆིལ་སྤང་ལྗོངས།།

མཛའ་གྲོགས་ཡིན་ན་བཟང་གི།

སེམས་ཆུང་ཉོབ་སྣང་མེད་པར།།

རྩེད་དགའི་དུས་ཚོད་འདའ་འོས།།

མདའ་ཡི་གཙང་ཆབ་སྔོན་མོ།།

མི་ཚེ་ཡིན་ན་སྐྱིད་པ།།

ངལ་མེད་དལ་གྱིས་རྒྱུ་ནས།།

རྒྱ་མཚོའི་ཀློང་ལ་ཆས་འགྲོ།།

                        30/03/2016

    ཐུགས་བསམ་བཞེས་རོགས།

 

གནའ་བོའི་རིག་གཞུང་ཁོ་ན་གཙིགས་ཆེ་རུ་མ་འཛིན།།

དེང་རབས་རིག་གསར་ཁོ་ནའི་རྗེས་འབྲང་ཡང་མ་གནང་།།

གནའ་དེང་ཟུང་དུ་སྦྲེལ་ན་བདེ་སྐྱིད་ཀྱི་གཞི་མ།།

དཔྱོད་ལྡན་སྐྱེས་བུ་དག་གི་སྙིང་དབུས་སུ་འཆང་དགོས།།

ཕན་དང་མི་ཕན་ལམ་ལུགས་ཡོད་ཚད་དག་མི་དགོས།།

མ་ཡིན་ཡིན་འདོག་བྱེད་པའི་སྣང་བ་ཡང་མི་བརྗིད།།

ངོ་ཚ་ཁྲེལ་བག་ཀྲད་པ་རྙིང་ཧྲུལ་བཞིན་དོར་ནས།།

མདོར་ན་མཐའ་གཉིས་སྤངས་པའི་དབུ་མ་ལ་ཆས་དགོས།།

ཡུལ་མི་ཕན་ཚུན་དགའ་སྐྱོ་རོགས་འདེགས་ཀྱི་སྲོལ་བཟང་།།

མཛའ་བརྩེའི་འདུ་ཤེས་མ་སྨད་གཞུང་ལམ་གྱི་ངོས་སུ།།

ཆབ་དཔལ་རིག་གསུམ་རྨོངས་མུན་སེལ་འདོག་གིས་ངང་ནས།།

ཤེས་བཞིན་ཡལ་བར་དོར་ལ་ངོ་ཚ་ཞིག་དགོས་སོ།།

ཤེས་རིག་ཕ་མཐའ་ཡངས་པོ་སྔ་ས་ནས་བརྒལ་ཡང་།།

མི་མཁོའི་གཉིས་གནོད་སྦྱོར་བ་སྣ་ཚོགས་ཤིག་བརྩམས་ན།།

ཁྱེད་ཀྱིས་རིག་གནས་སྦྱངས་པའི་དགོས་དོན་དང་འགལ་པས།།

དཔྱོད་ལྡན་སྐྱེས་བུ་དག་གིས་འཛེམ་གཟོན་རེ་གནོངས་ཤིག །

གཞན་ལ་མིག་དཔེ་ལྟ་བའི་འདུ་ཤེས་ཤིག་མེད་ན།།

རང་གི་སྐྱོན་ཡོན་ཇི་ཡོད་འབྱེད་ཐབས་དེ་དཀའ་བས།།

དེ་ཕྱིར་ལེགས་པར་འདོད་པའི་སྐྱེས་བུ་ཡི་ཚོགས་རྣམས།།

བསམ་པའི་སྒོ་མོ་ཅིས་ཀྱང་ཡངས་པ་དེ་གལ་ཆེ།།

གཞན་མགོ་སྐོར་ཐབས་ཁོ་ནའི་རྐང་ལམ་ལ་ཆས་ནས།།

འཆི་དུས་འགྱོད་པས་གདུངས་པ་བླུན་པོ་ཡི་ངང་ཚུལ།།

ཡ་རབས་གཤིས་དྲང་གཞན་ཕན་གཞུང་ལམ་དེར་སྐྱོད་དང་།།

ཚེ་གཅིག་མི་ལུས་ཐོབ་པའི་གཟི་བརྗིད་དུ་བརྩི་ཆོག །

རིག་གནས་སྦྱངས་ཞེས་ཕྱག་ཁྱེར་གཅིག་རྫིག་དང་གཉིས་རྫིག །

རིག་གནས་མཁས་ཞེས་གཞན་ལ་འཕྱ་སྨོད་ཀྱི་ཟུར་ས།།

རིག་གནས་ཡོད་ཅེས་ང་རྒྱལ་སྤོབས་པ་དང་ངར་ཁ།།

མདོར་ན་དོན་དམ་རིག་གནས་ཁྱེད་ཉིད་ལ་ལྡན་ནམ།།

དམན་ས་བཟུང་ལས་བདེ་སྐྱིད་ལྷག་པ་ཞིག་མེད་ལ།།

ཉམ་ཆུང་ཚུགས་ལས་རྐང་ལམ་བདེ་བ་ཞིག་མེད་པས།།

སྨྲ་བ་ཉུང་ཞིང་རྟག་ཏུ་དོན་ཆེན་ལ་བརྩོན་པའི།།

འཇིག་རྟེན་ཡ་རབས་སྐྱེས་བུས་སྙིང་དབུས་སུ་འཆང་རོགས།།

ཁ་ཞེ་གཉིས་མིན་བཟང་པོའི་གཤིས་གོམས་ཤིག་ལྡན་ཚེ།།

གོམ་པ་གར་སྤོས་ས་ལ་སྣུམ་ཞག་གིས་འཁྱིལ་འོང་།།

མདོར་ན་འབུ་སྲིན་ཚུན་ནས་ལེགས་པ་ཞིག་འདོད་པས།།

དཔྱོད་ལྡན་མི་བུ་དག་གིས་ཐུགས་བསམ་རེ་བཞེས་དང་།།

                                                            ༡༧/༡༢/༢༠༡༣/

         འཁྲེང་སེམས།

 

སྟོད་གངས་དཀར་ཏི་སེ་བརྗིད་ཆེ་ཡང་།།

ས་མི་ཡུལ་འདི་ན་སྙན་པ་ཙམ།།

ཡིད་ཁྱེད་ལ་འཁྲེང་བཞིན་བསྒུགས་མོད་ཀྱང་།།

གནམ་སྔོན་མོའི་འོག་ནས་ཁ་ཐག་རིང་།།

གནས་ཤེལ་རི་འབྲུག་སྒྲ་གྲགས་ཆེ་ཡང་།།

ལྷོ་རྒྱ་མཚོའི་མཐིལ་ན་མཐོང་དུས་མེད།།

ང་ཁྱེད་ལ་དགའ་ཞིང་དུངས་ན་ཡང་།།

སེམས་ལུས་ཀྱིས་མ་འཁྱོགས་ངལ་དུབ་ཆེ།།

དྲིན་ཨ་མའི་ཞལ་རས་མཇལ་འདོད་ཀྱང་།།

ས་ལེ་དབར་སྟོང་གིས་བར་ཆོད་ནས།།

སྙིང་བརྩེ་བའི་ཕུ་ནུ་གཉེན་ཉེ་སོགས།།

གནས་མི་ཡུལ་འདི་ནས་དྲན་གདུང་བརྩེགས།།

གངས་དཀར་རྫོང་མཐོན་པོའི་ཉེ་འདབས་སུ།།

ངའི་ཆུང་འདྲིས་བྱམས་པ་ལུས་ནས་ཡོད།།

དྲིན་ཟླ་མེད་ཕ་རྒན་གཤེགས་ཤུལ་དེར།།

ཁོང་གསོན་བྲལ་གྱུར་བས་སྐྱོ་བ་ཨང་།།

ཁོད་སྙོམ་པའི་སྤང་ལྗོངས་སྔོན་པོའི་སྟེང་།།

ནོར་གནག་ལུག་རྗེས་སུ་ཕྱུགས་རྫིར་བརྒྱུགས།།

ཚོན་སྣ་ལྔའི་མེ་ཏོག་ཕྲེང་བ་དག །

ལུས་རྩེད་འཇོས་སྐེ་ལ་གོན་པ་དྲན།།

ཁོང་ཆུང་འདྲིས་སྙིང་ལ་དྲན་ཐེངས་རེར།།

སྤང་བདེ་མོ་མིག་ལམ་མངོན་འཆར་ཞིང་།།

ནོར་གནག་ལུག་ངུར་སྒྲའང་རྣ་བར་ཐོས།།

དྲིན་ཆེ་བའི་ཕ་རྒན་དེ་བས་དྲན།།

                                         1/2/2012

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།