ལས་དབང་ལྟར་སྨོན་ལམ་བརྒྱབ་པ། (ཞར་བཀོད་གཅིག)

269

IMG_1529.JPG

 

ཕན་ཚུན་འཕྲད་དེ་ཡིད་འོང་ཆུ་ཕྲན་མིག་གི་མཐའ་ནས་འཕྱུར།།

ཆུ་བོ་རབ་མེད་གླིང་བུའི་བུ་གར་ལོ་མའི་བྱིའུ་འཕུར་བ་ཡང་།།

ཅི་ཕྱིར་དེང་ནས་བཟུང་སྟེ་ཡིད་ཙམ་མ་འགོར་རྡོ་ལ་ཐོགས།།

དེའི་ཚེ་ཆུ་ནང་ཞུགས་པའི་འགྲོ་བས་བདག་ལ་ཚིག་ལན་བྱུང་།།

ཤིན་ཏུ་དྭངས་བའི་ཆུ་ནང་ཟླ་འོད་དང་འགྲོགས་ནས།།

གྲང་བའི་ཉམ་ཐག་པདྨ་རླབས་ཀྱི་བརྩེ་བས་གསལ་བར་བྱས།

དེ་ནས་ཇ་སྐོལ་མེ་འབུད་ཡིད་མཐུན་སྒུག་པའི་ལོང་མ་བྱུང་།།

ལམ་འཛོལ་བྱུང་ལྟར་བྲང་ཁའི་སྙིང་ཆུང་ལིང་ལིང་འདར་བ་མཐོང་།།

འཁོར་བའི་རྒྱ་མཚོས་སྣུབ་པའི་མི་དག་རྗེས་སུ་འཛིན་པའང་མཐོང་།།

དེ་ལྟར་ནམ་ཡང་ལྷན་ཅིག་སྐྱོ་བའི་ཤུགས་ཀྱིས་འགྲོགས་པར་ཤོག།

དེ་ལྟར་ནམ་ཡང་གདུང་བའི་རྒྱུན་དང་ལྷན་ཅིག་བདེ་བར་ཤོག།

                          2016.7.15.ཉིན་སྲང་ལམ་ཞིག་ནས་ཙོག་པུར་བསྡད་དེ་བྲིས།

       སྙན་ངག་པའི་མཚན་མོ།

 

ཁང་པའི་དཀྱིལ་དུ་འཁྱག་རོམ་སྔོན་པོ་བབས།།

སྙིང་རྗེའི་མིག་ནང་ཆུ་ཐིགས་བསགས་པའི་མཐར།།

སྔོན་གྱི་གངས་རི་ལས་ལ་གཏོགས་སོ་སྙམ།།

ཞག་སྨད་རྨི་ལམ་སྣེ་མོ་གཉིས་སུ་གྱེས།།

གཅིས་གིས་རི་མོ་འབྲི་ཞིང་གཅིག་གིས་བསུབ།།

སྐབས་ཤིག་འོ་བྱེད་རྒྱང་རིང་ཁུར་ནས་འོང་།།

མདུན་རྒྱབ་གཉིས་ནས་རྟ་དཀར་མང་པོ་འདྲོག།

སླད་མར་སྣང་ཚད་གྲིབ་མ་མི་དམིགས་པས།།

མེ་ལོང་ས་ལ་བརྡབ་དགོས་བློ་ཡང་ཤར།།

གཅིག་གིས་ཉིན་གྱི་མིག་ལ་གཙང་བོ་འདྲེན།།

ཚེ་ཡི་མུ་ཏིག་འཚེར་ཀྱང་ཅི་ཞིག་རུང་།།

གངས་རི་གྱོན་པའི་སེང་གེའི་ངག་སྒོ་འདར།།

གཅིས་གིས་མཚན་མོའི་ཞིང་ཁར་ནས་ཆང་བསྙལ།།

དེ་ནས་ཁྲུང་ཞུ་མ་ཡི་ལན་བུའི་འོད།།

རང་སར་མི་སྡོད་སྨུག་པའི་རྗེས་སུ་འཕུར།།

གར་འོང་མེད་པའི་སྤྲིན་སྟེང་དཀྱིལ་དྲུང་བསྡད།།

ལོ་བརྒྱའི་སྡིག་སྒྲིབ་བ་གམ་རས་གྱིས་བཏུམ།།

སྐམ་ཞིང་རིད་པའི་ངོ་གདོང་ཕྱེད་ཀ་ལ།།

འཁོར་བའི་ལྷིང་འཇགས་འབྲི་ཞིང་རྒྱ་སེ་ཡིས།།

མཚན་མོ་བརྒྱན་ཞིང་《མཇུག་མཐའི་མུན་ནག》་ནང་།།

ཞག་སྨད་ཅིག་གི་རྨི་ལམ་གསལ་བར་བྱས།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།