འཇིག་རྟེན། (ཞར་བཀོད་གསུམ།)

247

 
རྩོམ་པ་པོ།  མི་ཉག་བཀྲ་ཤིས་ཆོས་ལྡན།
                 

             འཇིག་རྟེན།

 

ལྷན་འཛོམས་བར་ན་སྐྱིད་པའི་རླབས་ཤིག་འཕྱུར།།

གྱེས་བྲས་ཀློང་ན་སྐྱོ་བའི་ཉམས་ཤིག་གདའ།།

རྗེས་དྲན་དུས་སུ་བརྩེ་བའི་འོད་གོར་རེ།།

འདི་ནི་འཇིག་རྟེན་སྒྱུ་མའི་རང་བཞིན་ཡིན།།

འཛུམ་པའི་ཞལ་ལ་དགོད་པའི་དབྱངས་རྟ་འདྲེས།།

ཁྲོ་བའི་གདོང་ལ་གཏུམ་པོའི་ངུར་སྒྲ་རྒོད།།

དགའ་སྐྱོའི་གླིང་ན་སྲོག་ཀྱང་འཆོར་བར་དོགས།།

འདི་ནི་སྲིད་པ་རྒན་པོའི་བཀོད་སྒྲིག་ཡིན།།

བརྩེ་བའི་འདབ་མར་གཉེན་པའི་རྒྱན་གྱིས་སྤུད།།

སུན་པའི་སྣ་གཟེངས་མི་གཙང་དྲི་མས་བརླན།།

མིག་ཟུང་རྒྱང་དུ་བགྲད་པའི་ཤུགས་རིང་འདི།།

བྱེད་པོ་ཚངས་པ་ལྷ་ཡི་ཆོ་འཕྲུལ་ཡིན།།

གཉེན་འཇམ་ཕྱག་གིས་རླུང་རྟར་དམ་པོར་བཅངས།།

རྩུབ་རེག་རྐང་སེན་ཞིང་འབྲོག་ལྟེ་བར་རྩེན།།

རེ་འབྲས་རྨི་ལམ་ཡིན་པའི་བརྟུལ་ཞུགས་འདི།།

གནའ་རབས་མི་བོ་ཆེ་ཚོའི་སྐད་གདངས་ཡིན།།

         ཐོལ་རླུང་།

 

གྱ་གྱུ་གློག་ལ་སྡེབ་པའི་དབུགས་བྱུང་གིས།།

གྱ་ཚོམ་རྒྱུན་མར་ཁོལ་བའི་སེམས་འཁྲལ་ལ།།

གང་ལ་འཛེམས་མེད་བཏབ་པའི་དྲོད་ཚིག་འདི།།

གང་ཞིག་ཡིད་ལ་བསྒོས་པའི་རི་མོ་ཡིན།།

ཐོལ་བྱུང་རླུང་གིས་ཁུར་བའི་སྨྲེ་ངག་གིས།།

ཐོལ་གྱིས་འབུས་པའི་བཅོས་མའི་འཛུམ་ཟེར་ལ།།

འཆར་ཡན་མིན་པར་མནའ་ཡིས་བསྒགས་ན་ཡང་།།

འཆར་སྒོ་ཙམ་ལས་རེ་དོགས་ཡེ་ནས་བྲལ།།

འོད་ལ་སྙེགས་པའི་འཕྲིན་གྱི་བྱ་མ་རྟས།།

འོད་ཟེར་ཞུན་མའི་སེམས་ཀྱི་ཟླ་གོར་ལ།།

ཡང་རྩེ་སྙིང་གི་གསང་བ་བསྒུལ་ན་ཡང་།།

ཡང་དག་བདེན་པའི་ལན་ཞིག་རྙེད་ཐབས་དབེན།།

ལྷོད་བཞུད་སྤྲིན་པ་སྨུག་པོའི་ཕྱི་མིག་གིས།།

ལྷོད་ལ་བབ་པའི་བརྡ་ཞིག་མ་འཕེན་ནའང་།།

སུ་ལ་རྫོགས་པའི་དམ་བཅའི་ང་རོ་ལ།།

སུ་ཞིག་བློ་ལས་འགོངས་པའི་སྙན་པ་ཡོད།།

         འོད་ཟེར།

 

སེམས་པའི་ཕུགས་ན་བདེ་བའི་མཚོ་མོ་འཁྱིལ། །

བདེ་བའི་ལམ་སྣེ་སྙིང་གི་བུ་གར་འཛུལ། །

སྙིང་ལ་དམ་པོར་བགོས་པའི་བག་ཆགས་འདི། །

འཇིག་རྟེན་མགོ་རྟིང་སྒྱུར་བའི་འོད་ཟེར་ཡིན། །

སེམས་པའི་རི་མོ་གདོང་གི་སྐྱི་མོར་བྲིས། །

གདོང་གི་རི་མོས་སྐྱེ་འཆིའི་ལུང་བསྟན་ཕབ། །

སྐྱེ་འཆི་མཇའ་ལ་ཐིམ་པའི་མོས་པ་འདི། །

སྲིད་པ་རྡུལ་བཞིན་བརླག་པའི་འོད་ཟེར་ཡིན། །

སེམས་དང་སེམས་བྱུང་འདུ་འཛི་ཁྲོམ་ལ་ཆས། །

འདུ་འཛི་སྒྱུ་མའི་ཞིང་ནས་མཐོང་ལམ་གསལ། །

མཐོང་ཆོས་དགེ་ལ་འཕར་བའི་སེམས་རྩ་འདི། །

འཁོར་བ་དུག་ཏུ་སྒོམ་པའི་འོད་ཟེར་ཡིན། །

སྒྱུ་མའི་མེ་ཏོག 

སྲིད་པ་ཡོམ་ཡོམ་དུ་སྐྱོམས་དུས།།

རྣམ་ཤེས་སྒོ་འགྲམ་ན་འཕར་སྐད།།

གཟུགས་མེད་རླུང་བུ་དེ་རྒོད་པས།།

ཅི་ཡང་མེད་པ་རུ་ཡལ་འགྲོ།།

ཁ་འཆམ་ཡུག་གཅིག་ལ་སྦྲེལ་བའི།།

སེམས་པའི་རི་མོ་དེ་མཛེས་ནའང་།།

ཧོ་ལོའི་མེ་ཏོག་ལ་འཛུལ་པའི།།

སྣང་བ་གང་ཞིག་ཏུ་མཆིས་སམ།།

ཐོད་པ་འཇའ་རིས་ལ་དང་ཕྲད་ཐལ།།

རེ་བའི་ལང་ཚོ་དག་མ་སྨིན།།

འཕྲལ་དང་ཡུན་དུས་ལ་བརྒལ་བའི།།

འདས་པའི་འཇིག་རྟེན་འདི་ཅི་ཞིག།

ཕར་གའི་འཕྲང་ལམ་ན་བཞུད་པའི།།

རུས་པའི་རྐང་འཐུང་དག་དྲན་དུས།།

ཐུན་མཚམས་རྨི་ལམ་གྱི་སྙེ་མ།།

བར་དོའི་སྟ་གོན་རང་མེད་འགྲོ།།

ཡིད་ཆེས་ལུང་སྒྲུང་གིས་བཞེངས་པའི།།

གཏམ་གྱི་ཚོམ་བུ་དག་བསྟར་དུས།།

བློ་ཁེལ་གཏན་ཚིགས་ཀྱི་མདའ་མོ།།

རི་ལུང་ཐང་གསུམ་ནས་ཤོར་ཐལ།།

བདེན་པའི་ཚིག་གསུམ་ལ་ཁེན་པའི།།

རེ་བཞག་རྨི་ལམ་ལ་འདྲེས་རུང་།།

མཐོང་ལམ་སྙན་ངག་ལ་བརྒྱུས་པ།།

བདག་གི་སྟངས་སྟབས་ཀྱི་འཁྱུག་གར།།

 

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།