བསླུ་བྲིད་ཀྱི་རྒྱ་ལ་ཚུད་པའི་ང་རང་། (ཞར་བཀོད་བཞི།)

596

 

རྩོམ་པ་པོ།   བདག་པོ།     

བདག་པོ།

བསླུ་བྲིད་ཀྱི་རྒྱ་ལ་ཚུད་པའི་ང་རང་།


ཐ་སྙད་ཁྲི་ཕྲག་གི་ཕ་རོལ་ན
ཚག་ཚག་ཏུ་འབར་བཞིན་པའི་རྨི་ལམ་ཞིག་གིས
ང་རང་དུམ་བུ་དུམ་བུར་གཏོང་བཞིན
ཤུགས་ཆེན་པོས་ཡང་ཡང་འབར   དྲག་ཏུ་འབར
 
མནར་གཅོད་ཇི་ཙམ་མྱངས་པ་དེ་ཙམ་གྱིས
ང་རང་ཁྱོད་ཀྱི་བསླུ་བྲིད་ཀྱིས་ཡང་ཡང་བསྲེགས
 
གོམ་པ་གང་རེ་གང་རེས
ང་རང་འདུ་འཛི་ཆེ་བའི་སྲང་ལམ་དེ་རུ་ཞུགས
ཅ་ལག་གང་ཞིག་གིས་མགུ་བར་མ་ནུས
ཡོད་ཚད་སྐྱོ་སྣང་དང་བར་ཆད་དུ་གྱུར
 
དུས་རབས་འདིའི་མཐའ་མཚམས་སུ
རོ་སྒམ་ཞིག་པང་དུ་བླངས་ནས
བོར་སོང་བའི་མི་ཞིག་ཡང་བསྐྱར་འཚོལ་དུ་ཕྱིན
 
ཁྲུས་ལ་རོལ་བའི་གྲིབ་མ་དེས
ང་རང་འཇུས་སོང
 
                    2016

རྨི་ལམ་གྱི་ངོགས་སུ་ལུས་པའི་ཆར་ཆུ།


ཤིན་ཏུ་བཟོད་པར་དཀའ་བའི་མ་འོངས་པ་ཞིག
ལུས་སྟེང་དུ་བྲིས་པ་ནས་གཟུང
སྐྱེ་འཆི་ཡོད་ཚད་འགྲེལ་མི་ཐུབ་པའི
རྨི་ལམ་ཞིག་གི་གྲིབ་འོག་དུ་ལྷུང
 
དུས་ཚོད་ཀྱི་ཐག་སྒྲ་དང་མཉམ་དུ་འཆི་བཞིན་པ
རང་ཉིད་ཀྱི་མ་འོངས་པ་ཡིན་མིན་སུ་དང་གང་གིས་བརྗོད་ཐུབ་བམ
ཕུགས་བསམ་གྱི་མདུན་ནས་གཅེར་བུར་བུད་པའི་མི་དེ
མཐའ་མེད་པའི་རྨི་ལམ་ཞིག་རྨིས་པ་དང་ཅི་འདྲའི་མཚུངས
 
ཚེ་སྲོག་ནི
ཆུ་ཡི་གཉེར་མ་ཇི་བཞིན
ཤིན་ཏུ་ཉམ་ཆུང་བའི་ངང
རྣམ་ཤེས་ཀྱི་བེམ་གོག་ཏུ་འཛུལ་སྟེ
སྙིང་གི་འཕར་ལྡིང་མ་འཇགས་ཀྱི་བར་དུ་ལྡིང་ངེས་རེད
 
ནམ་མཁའ་ཧ་ཅང་རྒྱ་ཆེ་བ་བཞིན
ཁྱོད་ཀྱིས་རང་ངོ་ཟིན་དུས
མཐའ་མེད་པ་ནི་རང་ཉིད་ཡིན་པ་རྟོགས་པར་འགྱུར
 
རང་སེམས་ཀྱི་འཁྲུལ་སྣང་ཞིག་པ་ན
སྙན་ངག་ནི་འོད་དང
ཕུགས་བསམ་ནི་དྲོད་ཡིན
འཆི་བ་ནི་ཏིང་འཛིན་གྱི་ཚུལ་གྱིས་བསྒོམ་ཆོག་པའོ
                        
                   2016 

       བྱབས་ཁྲུས།


ང་ཡི་གྲིབ་མ་སུ་ཞིག་གིས་ཁྱེར་སོང
འབར་ཞུན་ལྟར་བརྡབས་པའི་ང་རང
ཁྱོད་ཀྱི་ཡིག་ཚགས་ལ་མ་ཐེབ་པའི་མིང་རྐྱང་དེ་ཡིན་ནམ
 
ཝུ་ཆང་བཞིན་ཁ་འཁྱིལ་བརྒྱབས་པའི་མི་ཚོགས་དག    གང་དུ་ཁྲིད་སོང
བཙོན་ཁང་སྟོང་བ་འདིས་ཅི་ཞིག་ལབ་འདུག
 
སྲང་ལམ་འདི་ཡི་ཚོང་པ་དེ་དག
མཆི་རྩི་དང་རྐང་སྣམ་འཚོང་མཁན་དུ་ལོག་པ་དེ་ཅི་ཡིན་ནམ
 
ཁྱོད་ཀྱི་རྣ་སྒོའི་དབུགས་དེ་སུ་ཞིག་གིས་བརྐུས་སོང
ར་མདའ་བ་དེ་དག་ཁྱོད་ཀྱི་དགྲ་བོར་གྱུར་སོང་བ་ཅི་ཡིན་ནམ
ཁྱོད་ཀྱི་རྗེས་སུ
ཧ་ཅང་བཀྲེས་སྐོམ་གྱིས་གདུང་བའི་རྟ་ཁྱུ་ཞིག་གིས
རང་དབང་མེད་པར་རྗེས་འདེད་བྱེད་འོང་བ་ཅི་ཡིན་ནམ
 
ཅི་ཞིག་ལ?
ཁེར་རྐྱང་གི་ལྕགས་སྒྲོག་དེ
ཁྱོད་ཀྱི་སྐེ་ལ་བླུགས་དགོས་པ་རེད
 
2016
 

         མཚན་མོ།


མཚན་མོ་འདི་བགྲོད་རོགས་བྱེད་མཁན་ནི
ཁྱི་ཡི་ཟུག་སྐད་རེད
སྐར་མདའ་རེད
ནག་ཅིང་མཐུག་པའི་མུན་པ་རེད
སྐྱོ་སྣང་དང་འཁྲུལ་སྣང་གིས་རུབ་པའི་རང་སེམས་སྟོང་པ་འདི་རེད
ད་དུང་གཅིག་ལྷག་ཡོད་པ་སྟེ
མལ་ཁྲིའི་རྩིབ་ངོགས་སུ་བཞུར་འོང་བའི་ཁེར་རྐྱང་རེད
 
ངའི་ལག་པས་གང་དུ་བསྙབ་ཀྱང
ཐོགས་པ་དང་བྲལ་བའི་ནམ་མཁའ་ཁོ་ན་མ་གཏོགས
ཅི་ཞིག་ལོངས་སུ་སྤྱོད་ཐུབ
 
ང་ཡི་ལོངས་སྤྱོད་ནི་སྟོང་བ་ཉིད་རེད
ཐོགས་རེག་དང་བྲལ་བའི
རྨི་ལམ་གྱི་ནམ་མཁའ་གཡའ་དག་པ་དེ་རེད
 
ནམ་ཞིག་ལ
རྣམ་ཤེས་ཀྱིས་ས་སྲོད་སྙེག་ཏེ
དྲན་པ་ཡོད་ཚད་མི་སྣང་བའི་སྟོང་བ་ཉིད་དུ་བསྡུས་ཚེ
ང་ཡི་མདུན་དུ
སྡིག་སྒྲིབ་ཀྱི་ཚང་ཆེན་པོ་ཅི་ཞིག་ལྷག་ཡོད་དམ།
 
                                        2016

           བཙིར་བ།


སྙིང་ཉེ་བའི་མི་ལགས
སྨག་ནག་གི་སྒལ་གཞུང་ནས་བཞུར་འོང་བའི
སྟོང་བ་ཉིད་ཀྱི་སྣོད་ཁ་དག
འཇིགས་སྐྲག་དང་སུན་སྣང་མེད་པར
ང་རང་གི་ཚུལ་གྱིས་ལོངས་སྤྱོད་དུ་སྒོམས་ཤིག
 
དབུལ་ཕོང་གིས་ལག་པ་སྐམ་འགྲོ
འདོད་པ་ཡིས་རང་ཉིད་གཞོམ་འགྲོ
དུག་རྫས་ཀྱིས་མ་བསླད་པའི་ཅ་ལག་ཉུང་ཉུང་རེད
ང་ཡི་ཆེད་དུ
ཕུགས་བསམ་ལ་མེ་ཞིག་བསྒོ་རོགས     སྙིང་ཉེ་བའི་མི
 
བྲེལ་འཚུབ་ཀྱིས་གསུབ་འགྲོ་བའི་ཉིན་དང་མཚན་མོ
དུས་ཚོད་ཀྱིས་བྲེག་ངེས་པའི་ང་དང་ཁྱོད་ཀྱི་རྨི་ལམ
ང་ཚོ་འཕྲད་པ་དང་གྱེས་པས་བཟི་དུས
འཇིག་རྟེན་འདིར་སྙིང་བོ་ཟེར་ཡ་ཞིག་ལྷག་ཡོད་དམ
སྙིང་ཉེ་བའི་མི་ལགས
 
སྐྱེ་བ་ནས་རྒས་པའི་བར
ལས་དབང་གི་གཏུབ་གྲི་འདིས
ཁྱོད་ཀྱི་མདུན་དུ་རྨི་ལམ་དང་སྡུག་བསྔལ་སྤུངས
ང་ཡི་མདུན་དུ་འཆི་བ་དང་མྱ་ངན་སྤུངས
དེ་ལྟར་ཉིན་མཚན་གཉིས་ཀྱི་ཁ་བར་ནས་ཡང་ཡང་བཙིར།
 
                           2016

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།