ངས་ནི་ཁྱོད་ཀྱི་ཕྱི་མིག་རུམ་ནས་འཆི་འགྲོ། (ཞར་བཀོད་ལྔ།)

329

13957443_1136950829695749_1755655758_n.jpg

ངས་ནི་ཁྱོད་ཀྱི་ཕྱི་མིག་རུམ་ནས་འཆི་འགྲོ།

 

ང་ལ་ལྷ་ཡི་ཟས་གོས་ཉེ་བར་མ་བསྐུར།།

ང་ནི་མུན་པའི་ཤོག་ལྷེ་ཕྲན་ཙམ་ཡིན་པས།།

ང་ལ་འཆི་ཁའི་ཁ་ཆེམ་གློ་བུར་མ་བཤད།།

ངས་ནི་ཁྱེད་ཀྱི་མིག་ཤེལ་ཕུད་ནས་ཆས་འགྲོ།

ང་ལ་མཇུག་མཐའི་བརྩེ་བ་རིང་སར་མ་གྱེས།

ང་ནི་ཚེར་མའི་རྨི་ལམ་བཀྲུ་མཁན་ཡིན་པས།།

ང་ལ་ཨ་གསར་ཆང་གི་བར་སྟོང་མ་འཇོག།

ངས་ནི་ཁྱེད་ཀྱི་སྒེའུ་ཡོལ་ཕྱེས་ནས་ལྡིང་འགྲོ།

ང་ལ་ཀུ་རེ་ཚིག་གི་ཤུན་པ་མ་གནང་།།

ང་ནི་ཁུ་སིམ་ཁྲོད་ཀྱི་སྣང་བ་ཡིན་པས།།

ང་ལ་སང་ལོའི་གྱེས་ཁའི་ཚོར་བ་མ་འདྲི།།

ངས་ནི་ཁྱོད་ཀྱི་ཕྱི་མིག་རུམ་ནས་འཆི་འགྲོ།

            མཚན་གཞས།

 

དོ་ནུབ་མེ་ལྕེའི་ཐ་སྙད་འུར་ན་བསམ།།

སྙིང་གི་པི་ཝང་འཆི་བས་དཀྲོལ་ན་བསམ།།

སྒྱུ་མའི་ཆོན་ཐག་རླུང་གིས་བསེད་ན་བསམ།།

རྣམ་ཤེས་སོར་མོའི་རྩེ་རུ་འཁོར་ན་བསམ།།

ཁ་ཆེམས་ཅོག་ཙེའི་སྟེང་དུ་བྲིས་ན་བསམ།།

ཕྱི་མའི་སྐ་རགས་ལག་པས་ཟིན་ན་བསམ།།

ངུ་ཞོར་བྱེ་མའི་ཁང་ཁྱིམ་བརྩིག་ན་བསམ།།

འགྲོ་ཞོར་ལས་ཀྱི་བཟའ་ཚང་རྙེད་ན་བསམ།།

        ང་ཡི་ཉིན་མཚན་གཉིས།

 

ང་ཉིད་གབ་ཚིག་ཅིག་གི་ཤུལ་ལམ་བསྙེག་དགོས།།

དེ་ལ་པི་ཝང་འབྲུག་མགོའི་རྒྱུད་སྐུད་བསྣར་ཡོད།།

སླར་ཡང་ཞག་སྨག་ཅིག་གི་ངོ་སོ་འཚོལ་དུས།

གནམ་བསྐོས་ལས་ཀྱི་བྱམས་པའི་ཞེ་འདང་བོར་བ།།

ང་ཡི་འདི་དང་ཕྱི་མའི་ལམ་ཆས་ཙམ་མོ།།

ང་ཉིད་བྱི་ལ་ཞིག་གི་སྡེར་མོར་འཇུ་དགོས།།

དེ་ལ་བལ་སྐུད་དམར་པོའི་སྐོར་ཐག་འཐེན་ཡོད།།

ཡང་བསྐྱར་ཇ་ཕོར་ནང་གི་རི་མོར་བལྟ་དུས།

ཚེ་རབས་རླུང་གིས་ཁུར་བའི་རྨི་ལམ་འཁྲུངས་བ།།

ང་ཡི་ཉིན་མཚན་གཉིས་ཀྱི་ངལ་གསོ་ཙམ་མོ།།

ང་ཉིད་སྔོ་རྩྭ་ཞིག་གི་རྩེ་མོར་འགྲེང་དགོས།།

དེ་ལ་ས་སྲོད་མང་པོའི་གྲིབ་མ་བཏགས་ཡོད།།

ནམ་ཞིག་དཀར་དམར་གོས་ཀྱི་འཇམ་མཉེན་ཚོལ་དུས།

བུ་ལོན་ལན་ཆགས་ཟད་པའི་རོགས་ཤིག་རྙེད་པ།།

ང་ཡི་ཤི་གསོན་བར་གྱི་ཁ་རླངས་ཙམ་མོ།།

                            2/16/4-14ཉིན།

             ཁ་ཆར།

 

ང་ནི་འཆི་ཁར་གྲགས་པའི་བྱེའུ་ཞིག།

མི་ཚེའི་ལས་བསྐལ་གསུབ་ཞིང་ཨ་ཐང་ཆད།

མཚན་སྨག་སྟོང་བའི་ངོས་སུ་སྤར་ཁ་ཕྱེས།།

ལན་གཅིག་འདྲིས་པའི་མི་ལ་གློ་བུར་གྱེས།།

                  ༢

དོ་ཞག་མི་ཚེའི་འཆིང་ཐག་ངག་གིས་འཁྲོལ།།

གཞས་ཆུང་ཟ་ཟིས་སྣང་བ་རྒྱང་ལ་འུར།།

ཉིན་མཚན་རེ་ལ་སྐྲ་ལོ་རླུང་གིས་བསེད།།

དགེ་སྡིག་ཇ་ཆང་མ་འདྲེས་སོ་སོར་བཞུར།།

འཆི་ཁའི་ལག་པ་སྙིང་གི་ཆུང་མར་བསྲིང།།

སྤྱན་མིག་བག་རྟ་ཤི་བའི་རོ་ལ་གཡེང་།།

       གཙང་བོ་རབ་མེད།

 

དོ་ཞག་མིག་གིས་མཐོང་བ་ལ་ཁའི་ཆར་བ།།

དེ་རུ་རྒྱང་ཐག་རིང་བ་མི་ཚེའི་ལས་འཕྲོ།།

ལན་གཅིག་ཞེ་འདང་ལྕི་བ་སྔོན་མའི་ལོ་ཟླ།

ཕྱི་ལྡོག་སྤུ་ཙམ་ཨེ་ཡོད་གཙང་བོ་རབ་མེད།

འདི་ན་དབྱར་གྱི་ཚ་བ་སྒྱུ་མའི་གོས་ཆེན།།

མི་ཞིག་ཤིང་ཅོག་འོག་ཏུ་ལྐོག་ཉལ་བྱས་འདུག།

ང་ཡིས་ཉེ་འགྱང་གང་སར་ཀི་ཞིག་བཏབ་པ།།

གློ་བུར་རྨི་ལམ་འཁྲུག་པའི་ཁ་ཆེམས་མ་ཡིན།།

རྟ་ཁྱུ་སྨག་ལ་འདྲེས་སོང་དབུ་ནག་སྡེ་བ།།

བྱམས་པའི་ལག་གདུབ་ཆག་སའི་ལྷས་ར་འདི་རུ།།

ཨ་ཁུའི་རྫི་གླུ་ཁྱེར་ཤོག་འུར་ཆ་ཁྲ་བོ།།

            རི་རྩེའི་རྟ་ཁྱུ།

 

དང་ཐོག་འུ་གཉིས་དབྱེར་མེད་གཞན་གྱི་གྲིབ་མར་ཁེན།།

གློ་བུར་མི་ཚེའི་གནས་མལ་དགུན་ཁའི་ཙག་ལ་ཤོར།།

སྨྲེང་བའི་གཞས་ཆུང་ངག་གིས་མ་འཁྲོལ་ཁ་ཁར་ལུས།།

དབུ་ནག་སྡེ་བར་དཔྱིད་ཁའི་འཇའ་འོད་མག་མོག་འཐིབ།།

དང་ཐོག་ཕར་ཚུར་ཉི་མའི་དྲོད་ཀྱིས་བཟི་ཤིང་ཉལ།།

གློ་བུར་སྒེར་གྱི་མིག་ཤེལ་མཚན་མོའི་རླུང་གིས་གཏོར།།

སྐྱིད་སྡུག་སྨག་ལ་འཐབ་པའི་ལས་སྐལ་རྨང་ནས་ཚར།།

སྲིད་པའི་གོད་ཆག་འདི་ཕྱི་བར་གྱི་ལྟ་མོར་གྱུར།།

དང་ཐོག་ཕྱི་ནང་ཆ་ཤེས་རེ་ལ་འོ་དྲི་འཐུལ།།

གློ་བུར་མ་ཤི་གསོན་ལ་རེ་བའི་རྨི་ལས་སད།།

ཇི་སྲིད་སྙིང་དང་མཆིན་པའི་ན་ཚ་མ་ཞུ་བར།།

ལས་འཕྲོ་ཨ་སྔོན་སྟོང་བའི་ངོས་སུ་ཅི་ཞིག་འབྲི།།

ལ་ཁའི་འཇའ་སྣེ་མ་ཟིན་ཨ་གསར་མཆི་མས་བརླན།།

རི་རྩེའི་རྟ་ཁྱུ་ལ་ཡང་སྨྲེང་བའི་ལྷན་པ་ཐེབ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།