མོག་བུ་ཡེ་ཤེས་སྐྱབས་ཀྱི་སྙན་ངག་རིང་མོ་ཞིག (ཁག་དང་པོ།)

206

13692271_1124659350924897_1862247284_o.jpg

              __མོག་བུ་ཡེ་ཤེས་སྐྱབས།《གངས་རྒྱན་མེ་ཏོག》རྩོམ་སྒྲིག་ཁང་གི་རྩོམ་སྒྲིག་པ། སྔ་ཕྱིར་དུས་དེབ་དང་དྲ་ཚིགས་སུ་སྙན་ངག

《གཡག་གོང་གི་ཚོ་བ》《འབྲོག་པ། 》《ཚེ་ཚེ་རབས་རབས་སུ་དྲན་ཤིང་ཡིན་ནམ། 》  ལྷུག་རྩོམ་《དགུང་ཉི་མ་འགྱ་ལ་ཁད་རེད། 》

 བྱིས་པའི་གླུ་ཚིག《ནེའུ་སོ་ཨོང་རིལ》སོགས་བཀོད་མྱོང་།

 

ཉི་ཟླའི་འོད་ལ་གཤར་ནས་འབྲོག་མོར་སྙོབ་པ།

བོར་ཟིན་པ་འཚོལ་བ་ཇི་བཞིན་འབོར་འགྱུར་ཀྱང་འཚོལ་རྒྱུ་གལ་ལ།

དེ་འཚོལ་བར་བདེ་སྐྱིད་དང་སྡུག་བསྔལ་གཉིས་ཀ་འཁུར་ཐུབ་དགོས་སོ།། 

ཁ་བྱང་གི་སྐྱོར་མ།

གཅིག  སྣ་ཐིག་གི་སྣེ་མོ།

རི་རབ་དང་གཙང་པོ་བསྲུངས་པའི་གངས་ཀྱི་གཤོག་པ།

གནམ་སའི་བར་ཐག་ལ་བྲེས་པའི་འོད་ཀྱི་རྨུ་ཐག

གདོད་མ་ནས་གྲུབ་ཅིང་རྙེད་པའི་རི་མོ།   རི་མོའི་ནང་གི་ནོར་བུ།

སེམས་སུ་རྨ་ཁ་གཙགས་ཤིང་སྙིང་རུས་རྡོ་ཡིས་བཅགས་ནས་བུད་སོང་བ་ཞིག

གངས་རིའི་པང་ལ་བཏབ།  གཙང་པོའི་སྙིང་ལ་བསྙལ།

ཉི་ཟླ་གཉིས་ཀྱི་འོད་ལ་གཤར་ནས་བལྟས་ཚེ་འོ་མའི་མེ་ཏོག་འཁྲུངས་ཡོང་།

འཛམ་གླིང་སྒང་ལ་འཕྲོས་ཡོང་།  བབ་ཆགས་ཀྱི་དྲི་བྲོ་ཞིང་ལྷིང་འཇགས་ཀྱི་མངར་འཁྱེར་ཡོང་།

དེ་ནི་ཁྱེད་ཡིན་ངེས།  འབྲོག་མོ།   ཡང་ན་བོད་མོ།  ཐ་སྙད་ཀྱི་ཡིད་བརྙན།

གཉིས།  ཁ་རླངས་ཀྱི་དྲོད་ཁོལ།

རྩྭ་མགོར་ཆགས་པའི་ཟིལ་བ་དྭངས་མོ།

ཉི་འོད་ཀྱིས་དཀྲོལ་མ་ཐུབ་པར་ལྷོད་བག་གིས་བཟི་དུས།

ཁྱེད་ཀྱིས་ཡིད་འོང་གི་ཁ་རླངས་བརྒྱབ་ནས་བསྲོས།

ཁྱེད་ཀྱིས་མཛེས་སྡུག་གི་ལག་པ་བསྲིངས་ནས་དཀྲོལ།

པགས་སྩག་གི་འདབ་མ་བརླན་ཤིག་ཤིག   སྒྱེ་མོ་དྲུད་དེ་ཨོང་བ་འཐུ་བའི་འབྲོག་མོ།

ང་ཐོག་མར་ཁྱེད་ལ་འཕྲད་བྱུང་།

སྐད་ཆ་ཅི་ཡང་མ་བཤད་ནའང་།   ཁྱེད་དང་འུ་གཉིས་ལ་འདྲ་ས་ཞིག་ཡོད་པ་ཚོར་བྱུང་།

དེ་ནས།  ངས་ཁྱེད་སྙན་ངག་ཏུ་བཅུག

ཁྱེད་ཀྱི་སྒྱེ་མོའང་སྙན་ངག་ཏུ་བཅུག

སྐྱ་རེངས་སྐྱ་མདའ་མ་བཀྱགས་གོང་།

ཞལ་དང་ལག་པ་གཙང་མར་བཀྲུས་ནས་ནོར་རྡང་དུ་སོང་ཡོད་ངེས།

སྒྲོལ་མ་འདོན་ཞོར་དང་འབྲི་མོ་བཞོ་ཞོར་བྱས་ཡོད་ངེས།

སྐབས་སྐབས་སུ་གློ་བུར་བའི་ལ་གཞས་གསལ་ལ་མི་གསལ་བ་ཞིག་ཀྱང་བླངས་ཡོད་ངེས

ཁྱེད་ལ་འཕྲད་དུས་ཐོག་མར་འདི་དག་དྲན་འོངས།

འབྲོག་མོ།  ཞོགས་པ་སྔ་མོ་ཞིག་ཡིན་ནའང་།

ཁྱེད་ཀྱིས་ལས་ཀ་ལས་ནས་ཡུན་རིང་འགོར་སོང་བ་སྨིན་མར་འགོས་པའི་ཟིལ་བས་བཤད་བྱུང་།

འོན་ཀྱང་།  ཁྱེད་འཛུམ་ཙམ་བྱེད་པ་ལས་ཁ་གྲགས་མ་བྱུང་།

སྒང་མཐོན་པོ་དག་གི་རྩེ་ནས་བཞུར་འོངས་པའི་ལ་གཞས།

ཁྱེད་ཀྱི་མཁུར་ཚོས་ལས་ཀྱང་དམར་པོའི་ཞོགས་པར་གྲགས་འོངས།

ཞོགས་པ་སྔ་མོ་ཟེར་དུས།   ཁྱེད་ཀྱིས་ད་ནི་ཉིན་གུང་ལོན་སོང་ཟེར།

འབྲོག་མོ།   འུ་གཉིས་ཀྱི་ཞོགས་པའི་བར་ཐག་ཀྱང་རིང་བ་ལ།

ཁྱེད་ཀྱིས་འོ་བརྒྱལ་མྱངས་སོང་།   མིག་ཟུང་དུ་དཀའ་ལས་བབས་མེད་པ་དེ་མཚར་རོ།

ཁྱེད་ཀྱི་རྐང་རྗེས་སུ་བལྟས་ནས་ངས་ཅི་ཡང་ཞུ་མ་ནུས།

རྐང་བ་ཤེད་ཀྱིས་བླངས་ནས་མེ་ཏོག་མི་གཅོད་པའི་ཁྱེད།

ཁྱེད་ཀྱི་སྟངས་སྟབས་ལ་ཅེར་ནས་ངས་ཁ་རླངས་ཀྱང་རྒྱགས་མ་ཕོད།

ལག་པ་རྒྱང་ལ་གཡུག་ནས་འབུང་མ་མི་དཀྲོགས་པའི་ཁྱེད།

ངང་ཆུང་གི་འབྲོག་མོ།  སེམས་ཆུང་ངང་ཕྱི་མིག་ཀྱང་མེད་པར་བུད་སོང་།

རྒྱབ་གཟུགས་སུ་ང་དང་སྤང་ལྗོངས་གཅུད་ནས་སོང་།  ལྷིང་འཇགས་ཀྱང་བཅུས་ནས་སོང་།

འབྲོག་མོ།  གོམ་པ་དལ་གྱིས་བླངས་ནས་སོང་།  པགས་སྩག་གི་གོང་ཁ་ང་ལ་བཞག་ནས་སོང་།

གོང་བའི་གསེང་གི་ཁ་རླངས་ང་ལ་བཞག་ནས་སོང་།  ཁ་རླངས་ཀྱི་དྲོད་ཁོལ་གྱིས་ང་རུམ་ནས་བསྡད།

ངས་ཁྱེད་ཧ་ཅང་དྲོ་ཞེས་བཤད་དུས།  ཁྱེད་ཀྱིས་གོ་ཡོད་ཚོད་མ་རེད།

འུ་གཉིས་ཐུག་དུས།  ཁྱེད་ཀྱི་ལག་པར་འོ་དྲི་ཐི་ལི་ལི།

འོ་དྲིས་ནམ་མཁའ་བཀབ་ནས་ལག་བརྡ་ཞིག་བྱས་ནས་བུད་སོང་།

འུ་གཉིས་ཐུག་དུས།  ཁྱེད་ཀྱི་ཁ་རླངས་ལ་རྩམ་དྲི་ཀྱི་ལི་ལི།

རྩམ་དྲིས་སྤང་ཐང་གཡོགས་ནས་ཁོང་དགོད་ཅིག་བྱས་ནས་བུད་སོང་།

འུ་གཉིས་ཐུག་དུས།   ཁྱེད་ཀྱིས་མཁུར་ཚོས་ལན་བུས་གབ་ཡོད།

མགོ་བོ་སྒུར་ནས་ངོ་གདོང་གོང་བའི་གསེང་ལ་སྦེད། ལག་པའི་ནང་དུ་འུར་ཆ་ཡང་ཡང་བཤར།

མིག་ཟུང་ཀེམ་ཀེམ་གྱིས་གདོང་ལ་མི་ལྟ།     འགྲོ་ཁར་ཕྱི་མིག་ཟད་པོ་དག་ཀྱང་མི་འཇོག

སྐད་མགོ་མཐོན་པོའི་ངང་ནས་ཨ་ལན་མི་སྤྲོད།  དྲི་ཚིག་མང་པོ་བཞག་ནས་ཀྱང་མི་འགྲོ།

ཁ་རོག་གེར་ཡོང་ནས་ཁ་རོག་གེར་བུད་འགྲོ།

འོན་ཀྱང་།  ཁྱེད་ཀྱི་རྐང་རྗེས་ཀྱི་གསེབ་ཏུ་རྒྱང་རིང་བྲིས་ཡོད།

འོན་ཀྱང་།  ཁྱེད་ཀྱི་གྲིབ་གཟུགས་ཀྱི་ཀློང་དུ་མ་འོངས་བཏེགས་ཡོད།

གནམ་སའི་དྲོད་ཁོལ་གྱིས་འཚོས་པའི་བུ་མོ།

རླུང་གི་གདུག་རྩུབ་ཀྱིས་མགར་བའི་བུ་མོ།

ཁྱེད་ལ་འཕྲད་དུས།

ཁྱེད་ཀྱིས་གཞན་གྱི་ཕ་མིང་དང་ཆོ་ལོ་མི་འདྲི།

ཁྱེད་ཀྱིས་རང་གི་རུས་མིང་དང་སྐྱེ་ཁུངས་ཀྱང་མི་གཤུར།

འོན་ཀྱང་།  ཁྱེད་ཀྱི་སྐད་ཆའི་ཁ་དོག་ལ་འབྲོང་རྒོད་ཀྱི་རྣམ་ཤེས་འཐོགས་ཡོད།

འོན་ཀྱང་།  ཁྱེད་ཀྱི་གོས་ཚར་གྱི་གོང་ཁ་ན་གཡང་འབྲིའི་ཚེ་སྲོག་འཁྱིལ་ཡོད།

འུ་གཉིས་ལན་ཚིགས་ཐུག་ནས་དེ་མུར་གྱེས།

ཡང་ན་འུ་གཉིས་གཏན་དུ་གྱེས་མ་མྱོངས།

འོ་མགོ་ལྷ་ལ་མཆོད་ཤེས་ཤིང་འོ་གཞུག་བེའུ་ལའང་སྐྱུར་ཤེས་པའི་ཁྱེད།

ཚིག་མགོ་ཨ་ཡིས་དྲངས་ཤིང་ཚིག་རྔ་ཡ་ཡིས་སྡུད་པའི་ཁྱེད།

སྐད་ཆ་མང་པོ་མེད་ལ་སྐད་ཆ་ལྷག་མའང་མེད་པའི་ཁྱེད།

མདོར་དེད་ན་བརྡ་སྤྲོད་ཀྱི་མེ་ལྕེ་ཞིག་སྟེ།   འབྲོག་མོ།  ཡང་ན་བོད་མོ།   ཐ་སྙད་ཀྱི་ཡིད་བརྙན།

འུ་གཉིས་ཐུག་དུས།  ཁྱེད་ཀྱིས་སྒྱེ་མོ་དྲུད་ནས་ཨོང་བ་འཐུ་བའི་སྒང་ཡིན།

མིག་ཟུང་ཀེམ་ཀེམ་གྱིས་གཡས་ལ་བལྟ་ཞིང་གཡོན་ལ་ཅེར།

སྐེད་པ་ལྡེམ་ལྡེམ་གྱིས་ཕར་ལ་འགྲོ་ཞིང་ཚུར་ལ་ཡོང་།

ག་ལེར་ག་ལེར་ལྕི་བ་ཁ་ལོ་བསྒོར་ནས་ལྟ།

ག་ལེར་ག་ལེར་ཨོང་བ་སྒྱེ་མོར་བཅུག་ནས་འཐུ།

ལྕི་འོག་ནས་ས་འབུ་ནག་རིང་དག་གིས་གཅུ་སྐོར་བྱེད་དུས།

བཛྲ་ས་ཏྭ་དང་མ་ཎིའི་དབྱངས་རྟར་གཅུད་དེ།  ཕྱིར་ཁ་མལ་དུའང་འཇོག

ཡང་།  ཨོང་བ་ཡང་མོར་སྦྲུགས་ཏེ་ས་འབུ་ནག་རིང་དག་རེ་རེ་བཞིན་ལྷུང་རྗེས།

སླར་ཡང་ཨོང་བའི་སྣེ་མོ་ཞིག་བཅད་ནས་ཕྱིར་ས་འབུ་ནག་རིང་ལ་སྤྲོད་ངེས།

ཁྱེད་ཀྱིས་ཞིབ་ཚགས་ཀྱི་ངང་ནས་ཞི་དུལ་གྱིས་ཨོང་བ་འཐུ།

ཁྱེད་ཀྱི་ཞི་དུལ་གྱི་ཁྲོད་ནས་ཞི་འཇམ་གྱི་མཛེས་པ་མངོན།

འབྲོག་མོ།   ཁྱེད་ཀྱིས་ད་དུང་ཨོང་བ་འཐུ་དགོས།

འབྲོག་མོ།  ཁྱེད་ཀྱིས་ད་དུང་ས་འབུ་ནག་རིང་ལ་དག་ལ་སེམས་ཆུང་གི་དྲོད་ཁོལ་སྟེར་དགོས།

ལུག་ཁྱུ་དེད་དེ་རི་སྒང་ལ་ཐོན་དུས་ཤིག་ལའང་།   ང་ཁྱེད་ལ་འཕྲད་བྱུང་།

རྔུལ་ཆུ་སྐྲ་འདབས་སུ་ཀྲིག་ཀྲིག་བྱེད་ནའང་དབུགས་ལེན་པའི་སྒྲ་འང་ཡང་མོར་བྱེད།

ངོ་གདོང་དུ་བབས་པའི་སྐྲ་ལོ་ཕར་ལ་འདེད་ཙམ་བྱས།   ལུག་ཁྱུར་ཡང་ཡང་ལྟ།

ལ་གཞས་སྙན་དྭངས་ངེ་བ་རེ་ལེན།  འུར་ཆ་གཟི་ཐག་ཆོད་པ་རེ་འཕེན།

ལུག་ཁྱུ་གང་ལ་འཁོར་ན།  གོམ་ཁ་དེ་རུ་ཕྱོགས་ནས་འགྲོ།

རི་སྒང་གི་མཐོ་ས་དང་ལ་ལུང་གི་གཟར་ས་དེད་ནས་འགྲོ།

མིག་ཐག་ཡོད་ས་དང་རྩྭ་ཆུ་མནོག་སར་གཟས་ནས་འགྲོ།

འགྲོ་ཞོར་དུ་འུར་ཆའི་ཆ་རེ་དཀྲི་སྲིད།  འུར་ཆས་སྤྲིན་དཀར་དང་ལུག་ཁྱུ་མཉམ་དུ་བསྡུས་འགྲོ།

ལྷན་ཅིག་ང་ཡི་སེམས་པའང་བསྡུས་འགྲོ།  འུར་ཆ་རུམ་ལ་བསྡུས་རྗེས་སླར་ཡང་ལ་གཞས་ལེན།

ལ་གཞས་ཀྱིས་ནམ་མཁའ་དང་ས་གཞི་ཡང་མོར་བཀྲུ།  ལྷན་ཅིག་ང་ཡི་ཡ་ཆུང་ཡང་བཀྲུས་འགྲོ།

གྲིབ་སོ་རི་ནས་གུག་དུས།   ལུག་ཁྱུ་རི་ལ་བཀྲམས་ཡོང་།

གྲིབ་རྟིང་གཞོང་ལ་ལྷུང་དུས།   འབྲི་མོ་རྡང་ལ་འཁོད་ཡོད།

ཁྱེད་གཅིག་པུས་ཉིན་མཚན་གཉིས་ཀ་འཚོས།

ཁྱེད་གཅིག་པུས་གནམ་ས་གཉིས་ཀ་བསྲུངས།

ཐབ་ཚང་གི་མེ་ལྕེ་ལམ་ལམ་འབར་ཏེ།  མཁུར་ཚོས་ཀྱི་ཁ་གཏད་དུ་ལངས།

གཡས་ཀྱི་ཕ་ལོར་ཆང་འདྲེན།  གཡོན་གྱི་མ་ལོར་ཇ་འདྲེན།

མཚན་མོའི་ཀློང་གི་གར་སྟབས་ཡིད་འོང་།

ལྷིང་འཇགས་ཀྱི་འབྲོག་ཐང་གི་བརྙན་རིས་གསོན་པོ།

གཡས་ལ་གར་སྟབས་ཤིག་ཤིག  མོ་ལས་ཆེ་འཚགས་ཆུང་འཚགས།

གཡོན་ལ་འཛུམ་རིས་ལམ་ལམ།  ཕ་མ་མིང་སྲིང་སྤྲོ་སྤྲོ།

མེ་ལྕེ་ལས་ཀྱང་དམར་པོའི་མཚམས་སྤྲིན་གྱི་ངོ་གདོང་།   མཁུར་ཚོས་ཀྱི་ངོས་ན་སྣུམ་ཞག་འཁྱིལ་བའི་འབྲོག་མོ།

འཇའ་རིས་ཀྱིས་རི་མོ་གཙགས་པ་བཞིན་མཛེས་ཨང་།  འོ་མའི་མར་ལོ་ལས་ཀྱང་ཞིམ་ཨང་།

ཧྲག་བར་དང་ཁ་ཚུབ་ལས་ཤོར་འོངས་པའི་ཙག་དང་ཆར་བ།

ཨ་ཕའི་ངོ་གདོང་དུ་ལྷུང་མི་དགོས་པ་ཁྱེད་ཀྱིས་ཡིན།

ཨ་མའི་ལག་མགོ་རུ་འབབ་མི་དགོས་པ་འང་ཁྱེད་ཀྱིས་ཡིན།

འབྲོག་མོ།  འབྲོག་མོ།   འབྲོག་མོ།

ང་རྒྱལ་ལ་བཀལ་བའི་སྦྲ་ཕུར་ཆོན་གསུམ།

གནམ་གྱི་ཁ་རྒྱན་དུ་ལངས་ནས་འདུག་པ་ཁྱེད་ཀྱིས་ཡིན།

དྭངས་གཙང་ལ་འཁྱུད་པའི་མར་རྩམ་ཞོ་གསུམ།

ས་གཞིའི་སྙིང་རུས་སུ་འཁྱིལ་ནས་འདུག་ཐུབ་པའང་ཁྱེད་ཀྱིས་ཡིན།

ཐབ་ཚང་གི་མེ་ལྕེ་ལས་ཀྱང་དྲོ་བའི་འབྲོག་མོ།

ཉིན་ལ་རི་རབ་དང་གཙང་པོ་བསྲོ།

མཚན་ལ་ཕ་མ་དང་མིང་སྲིང་བསྲོ།

ལུག་ཁྱུ་འབའ་སྐད་དིར་རེ་རི་ལ་ཞོགས་དུས།

ཁྱེད་ཀྱི་པགས་སྩགས་འདབ་ཁ་འགྱོ་ལོ་ལོ་བསླེབས་ཡོང་།

ནོར་ཁྱུ་ངུར་རིང་ངུར་ཐུང་གིས་གཞོང་ལ་ཞོགས་དུས།

ཁྱེད་ཀྱི་དགོ་དགོའི་འཇོ་དབྱངས་ལྷང་ལྷང་ངང་ཐོན་ཡོང་།

ཁྱེད་ཡོད་དུས།   ལུག་ཁྱུ་རི་ལ་ལྷིང་འཇགས་སེ་བཀྲམས།

ཁྱེད་ཡོད་དུས།   ནོར་ཁྱུ་ན་ནས་དལ་གོ་ལེར་འདུག

ཙག་དང་རླུང་གིས་བྲིས་པའི་མུན་པའི་དོང་།

ལག་པའི་ཕྱི་ནང་ལ་སྒང་གཤོང་དུ་བབས་པས།

མཚན་ལ་རྨི་ལམ་དུའང་ཁྲག་དང་མིག་ཆུ་བབས་ནའང་།

ཁྱེད་ཀྱིས་སུ་ལའང་འཁང་ར་བྱེད་མི་སྲིད།   ཉི་ཤར་རེ་རེར་ཁྱེད་སྔར་བཞིན་སྔ་མོར་ལངས་ངེས།

ཉི་ཤར་རེ་རེ་ཁྱེད་ཀྱིས་སྔར་བཞིན་འཛུམ་མདངས་དང་དྲོད་ཁོལ་གྱིས་བསུ་ངེས།

“འབྲི་མར་སེར་པོ་ཟེར་ན།  སེར་པོ་གསེར་གྱིས་མ་རེད།

འབྲི་འོ་དཀར་པོ་ཟེར་ན། དཀར་པོ་དངུལ་གྱིས་མ་རེད།

ཨ་ཅེ་འབྲོག་མོ་ཟེར་ན།  སུ་དང་གང་གིས་མ་རེད།

རླུང་དང་ལོ་ཟླ་ལན་སོང་།   ལས་དང་བསམ་པ་ལན་སོང་།

འབྲོག་མོ་གང་ལ་བུད་སོང་།  རྐང་རྗེས་གང་དུ་བོར་སོང་།”

ཐབ་ཚང་གི་མེ་ལྕེ་དམར་པོ་གཟིམས་སོང་།  མེ་ལྕེའི་མཁུར་ཚོས་ཀྱང་བོར་སོང་།

མེ་ལྕེ་ལམ་ལམ་གྱི་ཐབ་མགོ་ནས།   དྲོད་ཁོལ་དང་བརྩེ་བ་འཁྱགས་སོང་།

ང་ཡི་འབྲོག་མོ།   གློ་བུར་དུ་མིག་ལ་འཁྱུད་ནས་བོར་སོང་།  ཨེ་བདེན།  བོད་ཀྱི་བུ་མོ།  ཐ་སྙད་ཀྱི་ཡིད་བརྙན།

གསུམ།  ཐུག་འཕྲད་ཀྱི་འཁྱགས་ཤ།

ཐུག་འཕྲད་ཀྱི་རྫ་བུམ་ལས་བདུད་རྩི་ཁོ་ན་བཞུར་ཡོང་བ་མ་ཡིན་ཏེ།

ཁྲག་དང་རྣག་གི་འདྲེས་སྦྱོར་ཡང་བཞུར་ཡོང་བ་རེད།

དཔེར་ན།  ཁྱེད་ལ་འཕྲད་པ་ལྟ་བུ།  ང་ཡི་འབྲོག་མོ།

མུན་ནག་གི་མཚན་མོ་ལ་སྐྲག་དགོས་པ་མ་ཡིན་ཏེ།

ཉིན་མོ་དཀར་དཀར་ལ་མྱིག་བར་ནས་བོར་འགྲོ་བ་དག་ལ་ཅི་བྱ།

དཔེར་ན།  གངས་རི་དང་སྤང་རི།  གཙང་པོ་དང་སྦྲ་ནག

ཡང་ན།  ཁྱེད།  ཐ་སྙད་ཀྱི་ཡིད་བརྙན།

ལོ་དང་ཟླ་བའི་སྣེ་ལ་ཐ་གུ་ཞིག་བཏགས་ནས་ཁྱེད་སྣེ་མོ་དེ་རུ་བཀལ།

ང་ལམ་ལ་ཆས་དགོས་བྱུང་བས་མཇུག་མཐའི་གདམས་གསེས་དེ་ལྟར་བྱས།

ཕྱིར་ཡོང་དུས།  ཐག་པ་དུག་སྦྲུལ་ཁྲ་ཁྲ་ཞིག་ཏུ་གྱུར་ནས་ང་ཉེ་སར་གཅར་ཐུབ་མ་བྱུང་།

ཁྱེད་ཀྱང་དུག་སྦྲུལ་གྱི་སྣེ་མོའི་སྣེ་མོ་ཞིག་ཏུ་བུད་སོང་བ་འདྲ།   ཨ་ཅི་བྱ།

ངས་གློ་བུར་དུ་ཁྱེད་མེད་པ་ཤེས་དུས།   སྐད་ཆ་བཤད་ས་ཞིག་བོར་སོང་བ་ཤེས་སོང་།

བརྡ་སྤྲོད་ཀྱི་སྐད་ཆ་དག་ཀྱང་རྙིང་འདུག་པ་ཤེས་སོང་།  འོན་ཀྱང་།

ངས་ཁྱེད་ངེས་པར་རྙེད་དགོས་པའང་ཤེས་ཡོད།  འབྲོག་མོ།

སྤྲིན་པ་ངུས་ངུས་ནས་ཆར་བའང་ཚར་འདུག

གངས་རིའི་དྲན་གདུང་གི་གློ་བ་འང་ནག་པོ་རེད།

ཁྱེད་འགྲོ་ཁར།  ཕྱི་མིག་ཀྱང་མ་བཞག་གམ།

འབྲོག་མོ།  མིག་ལ་རྨ་ཁ་མང་པོ་འཐོགས་ནས་འགྲོ་མི་ཕོད་པ་ཞིག་མིན་ནམ།

ཁྱེད་ཇི་ལྟར་སོང་བ་ཡིན།  ཁྱེད་ཅིའི་ཕྱིར་སོང་བ་ཡིན།

ཡང་ན།  ཁྱེད་རང་ཉིད་ཀྱིས་ཀྱང་མ་ཤེས་པ་ཡིན་ནམ།

ཉ་མོ་དག་གཙང་པོར་ཞེ་འཁྲེང་ནས་སྐམ་རིད་ཀྱི་གཤོག་པ་རྡོ་རུ་གླན།

གཙང་པོ་ཅི་སྨྲ།  གཙང་པོའི་ཀློང་གི་རྡོ་བ་ལའང་ཞེ་འདངས་དང་བརྩེ་བ་ཆགས་ཡོད་ཟེར།

དེ་ནི་ཁྱེད་ཀྱིས་ང་ལ་བཤད་མྱོངས་པའི་སྐད་ཆ་ཞིག་ཀྱང་ཡིན་པ་འདྲ།  འབྲོག་མོ།

ཞེན་ཆགས་ཀྱི་མིག་ཟུང་ད་དུང་གངས་རིར་འཁོར་ནས་ཡོད་དམ།

ཞེ་འདངས་ཀྱི་འོ་མ་ད་དུང་སྤང་ལ་འཁྱིལ་ནས་ཡོད་དམ།

དྲོད་ལམ་ལམ་གྱི་བརྩེ་བ་མཐའ་དག་ཕ་ཡུལ་དུ་བསྙེས་ནས་ཡོད་དམ།

གློ་བུར་དུ་འཁྱུག་ནས་འབབ་པའི་སྤྲིན་པ་དག་དང་འདྲ་བར།

ཁྱེད་གློ་བུར་དུ་གར་སོང་ཆ་མེད་དུ་གྱུར་དུས།   ངས་ཐ་ན་ཁྱེད་ཡོད་མྱོང་བའི་བདེན་དཔངས་ཤིག་ཀྱང་མ་རྙེད།

ཁྱེད་ཀྱི་མགོ་རྐང་ལག་དང་བར་སྐེད་པ་གང་ནའང་རྟགས་གསལ་པོ་ཞིག་ཡོད་པའང་མ་དྲན།

ངས་རང་ཉིད་ཀྱིས་ཐོག་མར་མཐོང་བའི་འཛུམ་མདངས་ཙམ་ལ་བློས་བསླང་བྱས།

འཛུམ་མདངས་ཀྱི་མེ་ལོང་ནས་ཁྱེད་ཁ་ཚང་ཞིག་རྙེད་པར་རེ་སྒུག་བྱས།

ལམ་གྱི་གཡས་གཡོན་ནས་གློ་བུར་དུ་འཇུར་ཡོང་བར་སྒུག

ལམ་གྱི་མགོ་རྔ་ནས་གར་སྟབས་ཀྱིས་མངོན་ཡོང་བར་སྒུག

ལམ་དང་ལམ་གྱི་སྣེ་ན་བདག་པོ་ཆ་མེད་དག་གིས་རང་གི་བུ་མོ་ཁྲིད་ནས་འགྲོ་བཞིན་འདུག

ལམ་དང་ལམ་གྱི་འགྲམ་ན་བུ་མོ་ཆ་མེད་དག་གིས་རང་གི་འཛུམ་མདངས་འཁྲུད་ཀྱིན་འདུག

ལམ་སྣ་མ་སྣ་ཚོགས་ན་བུ་མོ་ཆ་མ་ཆོ་རིགས་འདུག

ངས་དེ་དག་རེ་རེ་ཁྱེད་ཨེ་ཡིན་གྱིས་བལྟས།

བུ་མོ་ཚོས་སྐྱ་ཐག་ཆོད་པའི་ངོ་གདོང་ཅེར་ནས་འདུག

“ཁྱེད་ཀྱིས་ཨོང་བ་འཐུ་མྱོང་ངམ།  ཁྱེད་ཀྱིས་མེ་ཁ་གསོ་ཤེས་སམ”

ཁོ་ཚོས་མགྲིན་གཅིག་ཏུ་“ལོས་ཤེས་ཟེར། ”

ཁོ་ཚོས་མགྲིན་གཅིག་ཏུ་“ཅི་བྱེད་ཟེར། ”

“ཨོང་བ་འཐུ་ཤེས་པས་ཅི་བྱེད མེ་ཁ་གསོ་ཤེས་པ་ཅི་བྱེད།

ཅི་བྱེད། ཅི་བྱེད། ཅི་བྱེད།

ངས་རང་གིས་རང་ལ་འདྲི་དུས་ཀྱང་ཨ་ལན་གསལ་པོ་ཞིག་མ་རྙེད།”

ངས་ཁོ་ཚོའི་མཁུར་ཚོས་མཐོང་བྱུང་།

ཁོ་ཚོའི་མཁུར་ཚོས་ཁྱེད་དང་མི་འདྲ་བར་དཀར་པོ་རེད།

ཁ་དོག་དཀར་པོ་ཡིན་པའི་མཁུར་ཚོས་ནི་ཤོག་བུ་ཞིག་སྟེ།

ཚོན་སྣ་ཚོགས་བཟུང་པའི་གནམ་འོག་གི་སྐྱེས་པ་མང་པོས།

ལག་པ་སྔ་གཞུག་བརྩད་ནས་རང་གི་དགའ་ཕྱོགས་ལྟར་དུ་ཁ་དོག་བྲིས་ཆོག

ངས་ཁོ་ཚོར་ཁྱེད་ཚོའི་མཁུར་ཚོས་དམར་པོ་མིན་ནམ་ཞེས་དྲིས།

ཁོ་ཚོས་མགྲིན་གཅིག་ཏུ་ “ལོས་ཡིན་ཟེར།”

ཁོ་ཚོས་མགྲིན་གཅིག་ཏུ་“ཅི་བྱེད་ཟེར།”

ངས་མཁུར་ཚོས་དཀར་པོ་ལ་མཁུར་ཚོས་ཟེར་རམ་ཞེས་དྲིས།

ཁོ་ཚོས་མགྲིན་གཅིག་ཏུ་“ལོས་ཟེར་ཟེར།”

ཁོ་ཚོས་མགྲིན་གཅིག་ཏུ་ “ཅི་བྱེད་ཟེར།”

“མཁུར་ཚོས་དམར་པོ་ཡིན་ན་ཅི་བྱེད།

ཅི་བྱེད།  ཅི་བྱེད།  ཅི་བྱེད།

ངས་རང་གིས་རང་ལ་འདྲི་དུས་ཀྱང་ཨ་ལན་གསལ་པོ་ཞིག་མ་རྙེད།”

ཁོ་ཚོ་ཆབས་གཅིག་ཏུ་ལམ་ལ་ཆས་སོང་།

ཁོ་ཚོས་འཕྱ་དགོད་ཀྱི་མིག་མདངས་ཁྲོད་ང་བསྐྱུར་ནས་བུད་སོང་།

ངས་ཁོ་ཚོའི་རྒྱབ་གཟུགས་ཁྲོད་ནས་སྐྲ་ལོ་མཐོང་བྱུང་།

ངས་ཁོ་ཚོའི་སྐྲ་ལོའི་ཁ་དོག་ནག་པོ་མིན་པ་མཐོང་བྱུང་།

སླར་ཡང  མགྲིན་གཅིག་ཏུ་ལོས་ཡིན་ཟེར་བའི་སྐད་གདངས་དྲན་བྱུང་།

ངས་ཁོ་ཚོ་འབོད་འདོད་མ་བྱུང་།  ང་ཁོ་ཚོར་བཅར་མ་སོང་།

ངས་ཁོ་ཚོར་འབྲོག་མོ་ཞེས་པའི་ཐ་སྙད་ཀྱང་འདོགས་མ་ཐུབ་པར་ས་རུབ་སོང་།

ཁོ་ཚོ་རེ་རེ་བཞིན་མུན་པའི་གསེབ་ཏུ་འཛུལ་སོང་།

མུན་པའི་ཁ་དོག་ལ་བལྟས་ནས་ངས་ཁྱེད་ཀྱི་སྐྲ་ལོ་དྲན་བྱུང་།

“སྐྲ་ལོ་ནག་པོ་ཡིན་པས་ཅི་བྱེད།

ཅི་བྱེད།   ཅི་བྱེད།  ཅི་བྱེད།

ངས་རང་གིས་རང་ལ་འདྲི་དུས་ཀྱང་ཨ་ལན་གསལ་པོ་ཞིག་མ་རྙེད།”

ཟུར་མང་པོའི་རྨི་ལམ་ཞིག་གི་སྣེ་མོ་འབྲི་བ་ལས་ཀྱང་།

ཟུར་གཅིག་གི་སྒང་ནས་བུ་མོ་ཞིག་འཚོལ་རྒྱུ་དཀའ་བོ་འདུག

འོན་ཀྱང་།  ངས་ཁྱེད་གློ་བུར་དུ་སོང་བ་ཁས་ལེན་ཐབས་མི་འདུག

མུ་མཐུད་དུ་བསམ་གཞིག་བྱས།   མུ་མཐུད་དུ་ཁྱེད་ད་དུང་ཡོད་ཡོད་ཡིན་པའི་བདེན་ཁ་བཙལ།

ངས་སེམས་ལ་གསོག་པའི་ཐ་སྙད་མང་པོ་ཞིག་བསྔོགས་ནས།

ཁྱེད་ཀྱི་མགོ་དང་སྐྲ།  རྐང་བ་དང་ལག་པ།

སོ་དང་སེན་མོ་སོགས་འབྲི་བར་སྟ་གོན་བྱ་དུས།

ཁྱེད་གློ་བུར་དུ་བར་ནས་བོར་སོང་བ་ཚོར།  ཕྱིར་འཚོལ་སའི་ཁ་ཕྱོགས་ཀྱང་རྙེད་ཁག་པ་ཚོར།

ཐ་ན་སྐྱ་ཐིག་ཙམ་འབྲི་རྒྱུའང་ཧ་ཅང་དཀའ་བ་ཤེས་སོང་།

སྐར་མ་ཆག་པོ་དག་ཁང་རྩེག་གི་སྒེའུ་ཁུང་ལས་འཇུར་འོངས་ཏེ།

ཁྱེད་ཀྱི་མིག་ཟུང་དྲན་དུ་བཅུག

འོན་ཀྱང་།  སྐར་མར་བལྟས་ནས་ཁྱེད་ཀྱི་མིག་ཟུང་འབྲི་ཐུབ་པ་མ་རེད།

དེའང་བརྙན་འཕྲིན་ལས་ཤོམ་འགྲོ་བ་ཡིན་ཟེར་བའི་གྲིབ་གཟུགས་འཕྱོར་བོ་དག་གིས།

ཁྱེད་ཀྱི་སྐྱ་རིས་ཀྱི་ཡང་རིས་ཙམ་ཡང་འབྲི་མི་ཐུབ་པ་ནང་བཞིན།

གློ་བུར་དུ་བུད་འགྲོ་བའི་རླུང་འཚུབ་ལྟ་བུའི་ཁྱེད།

རླུང་འཚུབ་ཀྱི་ཤུལ་དུ་འཐིབས་པའི་ས་རྡུལ་ཡང་མེད་པའི་སྐབས་སུ།

གཡའ་དྭངས་པའི་ནམ་མཁའ་ན་ཁྱེད་སྐུངས་ས་མེད་པ་ཤེས་ཡོད།

རྡུལ་དག་པའི་ས་གཞི་ན་ཁྱེད་སྦེད་ས་མེད་པའང་ཤེས་ཡོད།

ཁྱེད་གློ་བུར་དུ་བུད་སོང་བའི་སྡུག་བསྔལ་སུས་ཐེག

ཁྱེད་གློ་བུར་དུ་བུད་སོང་བའི་གཏམ་རྒྱུད་སུས་ཐེག

ཁྱེད་ངོ་མས་བུད་སོང་ངམ།   མདོ་དབུས་མཐོ་སྒང་ཧྲིལ་པོ་འཛུམ་མདངས་སུ་གཅུད་ནས་བུད་སོང་ངམ།

འཇིག་རྟེན་གྱི་སྐྱ་ཡ་འཁྱགས་སིབ་བེར་བཏང་ནས་བུད་སོང་ངམ།

ཁྱེད་ངོ་མས་བུད་སོང་ངམ།

འཛམ་གླིང་སྒང་ལ་གཏམ་རྒྱུད་ཙམ་བཞག་ནས་བུད་སོང་ངམ།

ལོ་རྒྱུས་ཀྱི་ཕྱེད་ཀ་ནག་འཐིབ་བེར་བཏང་ནས་བུད་སོང་ངམ།

རྨི་ལམ་གྱི་རླབས་རྒྱུན་འཕྲོ་རིམ་འཕྲོ་ལངས་ནས་ང་གསོད་རྩིས་བྱས།

མཚན་མོ་དག་ཁྱུར་མེད་བྱས་ནས་འཇིག་རྟེན་ཉིན་དཀར་ལ་སྒྱུར་རྩིས་བྱས།

འོན་ཀྱང་།  ཁྱེད་གློ་བུར་དུ་བོར་སོང་བས།   ངས་ལྷིང་འཇགས་ཀྱི་མུན་ནག་བདམས་པ་ཡིན།

མུན་ནག་ཁྲོད་ཀྱི་གསང་བ་བདམས་པ་ཡིན།

གསང་བའི་གཞོང་གི་མཛེས་སྡུག་གི་སྡུག་བསྔལ་བདམས་པ་ཡིན།

                         (མུ་འགོད།)

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།