མི་རྣམས་གཙང་བོ་ལྟར་འགྲུལ་བཞུད་ལ་ཕྱོགས་ཡོད་

  གཙང་བོ་ལྟ་བུའི་འགྲུལ་བཞུད། 

འཇིག་རྟེན་གྱི་གླིང་རེ་རེ་བཞིན་

སེམས་ལ་གཤོག་པ་ཐོགས་ནས་

འཕུར་འདོད་ཀྱི་ཕུགས་འདུན་

མི་རེ་རེར་སྔ་མོ་ནས་ཡོད་

མི་ནི་

སེམས་ལ་གཤོག་པ་ཐོགས་པའི་བྱ་ཞིག་ཡིན་

ལོ་དང་ཟླ་བ་ཀུན་ལ་

གླིང་རི་གླིང་ཕྲན་བསྐོར་ནས་

འཛམ་གླིང་གི་དགའ་སྐྱོ་རེ་རེ་བཞིན་

ཉིན་རེའི་ལས་བྱ་ལྟར་སེམས་ལ་འབྲི་བཞིན་ཡོད་

རང་དབང་མེད་པའི་མི་རྣམས་

སེམས་ལ་གཤོག་པ་ཐོགས་ནས་

སེམས་ཀྱི་རྒྱལ་ཁམས་ཉུལ་བཞིན་ཡོད་

རང་ལ་རྒྱང་ཐག་རིང་བས་

རང་དབང་དང་བདེ་སྐྱིད་ཀྱི་ཕྱོགས་སུ་

འཕུར་ནས་འགྲོ་བཞིན་ཡོད་

གཙང་བོ་ལྟ་བུའི་འགྲུལ་བཞུད་ཀྱི་ལམ་སྣེ་

དམག་འཁྲུགས་དང་འཇབ་རྒོལ་ལ་ཟུག་ཡོད་

རང་མལ་ཤོར་བའི་མི་སེར་དག་ལའང་

གཤོག་པ་མེད་པ་ག་ལ་ཡིན་

རེ་ཞིག་གཤོག་པར་གས་ཆག་ཤོར་བ་ཙམ་ཡིན་

                                                 2016.1.1ལ།

ཕ་ཡུལ་ནས་ཕ་ཡུལ་དྲན་པ།

 

རྨི་ལམ་དང་འཇའ་ཚོན་ལྟ་བུའི་མཛེས་པ་

ཕ་ཡུལ་གྱི་ཁ་སང་དང་འདས་སོང་གི་གཏམ་རྒྱུད་རེད་

ཁྱེད་ཀྱིས་རྒྱང་རིང་ནས་ཕ་ཡུལ་དྲན་པ་ནང་བཞིན་

ངས་ཕ་ཡུལ་ནས་ཕ་ཡུལ་དྲན་

ཕ་ཡུལ་གྱི་ཁ་སང་དང་ད་ལྟ་  

མ་འོངས་པ་ལྷག་ཏུ་དྲན་

ཕ་ཡུལ་གྱི་རི་ཚོགས་དག་གིས་

སུ་ཞིག་ལ་མྱ་ངན་ཞུ་བ་དང་འདྲ་བར་

སྨྲ་བ་མེད་པར་ལོ་ཟླ་མང་པོ་འདས་

ལོ་ཟླ་དེ་དག་ལ་

སྨུག་པས་རི་རྒྱབ་གནོན་ཞིང་

དྲན་གདུང་གིས་སེམས་ལྗོངས་བསྲེགས་

ཁྱེད་ཀྱིས་རྒྱང་རིང་ནས་ཕ་ཡུལ་དྲན་པ་ནང་བཞིན་

ངས་ཕ་ཡུལ་ནས་ཕ་ཡུལ་དྲན་

ཕ་ཡུལ་གྱི་ཁ་སང་དང་ད་ལྟ་

མ་འོངས་པ་ལྷག་ཏུ་དྲན་

                                2015.12.27མཚན་མོར།

ཞོགས་པ་ཞིག་ལ་མཚན་གྱི་རྨི་ལམ་དྲན་པ།

 

མུན་པ་ནི་སྡུག་བསྔལ་ལ་ཁ་ཕྱོགས་ནས་ཚེས་པའི་

ཡུལ་ལུང་གང་ཞིག་གི་མངའ་ཐང་རེད

རྫོགས་མེད་ཀྱི་མུན་པ་ཇི་ལྟར་བརྒལ་ཡང

ང་སྔར་བཞིན་མུན་པ་ལས་བརྒལ་མ་ཐུབ

མཚན་གྱི་རྨི་ལམ་ལས་ཁྱེད་ནི་འོད་ཟེར་ཐོགས་པའི་

འགྲུལ་བཞུད་པ་ཞིག་རེད་ཟེར

ཁྱེད་ཀྱི་འགྲུལ་བཞུད་ཀྱི་ལམ་སྣེ་ན་གངས་དང་གཙང་བོ་ཡོད་སྐད

ད་རུང་ཚེ་སྲོག་གྲངས་མེད་ཀྱི་ཉམ་ཐག་པའི་ངུ་སྐད་དང

བཙན་པོ་སུ་ཞིག་གི་དབང་འོག་ན་ལུས་པའི་

ཕ་ས་དང་ཡུལ་མི་དག་གི་ཉམ་ཆུང་བའི་འཚོ་བ་དང་བདེ་སྡུག་ཡོད

ཁྱེད་ནི་ངས་མཚན་ལ་རྨིས་པའི་རྨི་ལམ་ཞིག

ཞོགས་པ་ཞིག་ལ་སླར་ཡང་དྲན་པའི་

རྨི་ལམ་ཞིག་གི་མངའ་ཐང་

ང་ལ་འདི་ལས་ཇི་ཡང་ལྷག་མེད

ཁྱེད་ཀྱི་འགྲུལ་བཞུད་དང་ཕུགས་བསམ

ཉི་མ་དང་ཟླ་བ་བཞིན་གོ་ལའི་ཁྱོན་ལ་ཕྱོགས

འཇིག་རྟེན་ཆེ་དྲག་པའི་ཡིན་ནམ

ད་རུང་ཉི་འོད་ཀྱི་བྱམས་བརྩེ་མ་བརྒྱབ་སའི

རི་ལུང་དང་ཚེ་སྲོག་ཡོད་ངེས

སྐྱེ་འཆིའི་ལམ་ཡིག་ལྟ་བུའི་ཁྱེད་ཀྱི་བརྩེ་བ

ཞོགས་པ་ཞིག་ལ་སླར་ཡང་དྲན་པའི་མཚན་གྱི་རྨི་ལམ

རི་བོ་ཧི་མ་ལ་ཡི་རྨི་ལམ

ཡར་ཀླུང་གཙང་བོའི་རྨི་ལམ

དབུས་པས་སྐྱིད་ཆུའི་འགྲམ་ནས་རྨིས་པའི་རྨི་ལམ

ཁམས་པས་རྒྱལ་མོ་དངུལ་འགྲམ་ནས་རྨིས་པའི་རྨི་ལམ

ཨ་མདོ་བས་མཚོ་སྔོན་པོའི་གཞུང་ནས་རྨིས་པའི་རྨི་ལམ

ངས་ཞོགས་པ་ཞིག་ལ་མཚན་གྱི་རྨི་ལམ་དྲན་དོན

རྨི་ལམ་ནང་གི་མཇལ་འཛོམས་དང

འོད་ཟེར་ཐོགས་པའི་ཁྱེད་ཀྱི་འགྲུལ་བཞུད

སྲོག་གི་སྙིང་བོར་སྦྱིན་པའི་བརྩེ་བ

ཁམས་གསུམ་གྱི་འགྲོ་འོང་ལ

གནང་བའི་ཐུགས་འདུན་ཟབ་མོར

རྨི་ལམ་ལས་མཇལ་བས་ཡིན

                                             2016.3.28ཉིན།

 

               རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།