ཤེས་རབ་ཀྱི་བཅད་རྩོམ་འགའ་ཞིག་ཕྱོགས་གཅིག་ཏུ་བཏུས་པ།

510

 

འཇིགས་མེད་བཤད་པ།

 

ཤིན་ཏུ་གྲང་ལྷགས་ཚ་བའི་དགུན་ཟླ་རིང་མོ། །

དེ་ཡི་འོག་ཏུ་མྱུལ་བའི་འགྲོ་བ་སེམས་ཅན། །

དེ་དང་ཆ་འཇོག་བྲལ་བའི་བདག་གི་ཆགས་སྲེད།།

དེ་དང་མཚུངས་པ་མེད་པའི་བྱམས་པ་སྙིང་རྗེ། །

དེ་དང་འགལ་བ་མེད་པའི་བྱ་དངོས་ཙག་ཙིག །

དེ་དང་འུབ་ཀྱིས་བསྡུས་ན་འཁོར་བ་ཞེས་པ། །

རི་བསིལ་སྒོང་ངའི་གསེང་གི་མལ་ཁྲི་འདི་ཡིན། །

དེ་དང་ཉེ་བར་བཞག་པའི་བདག་མེད་རྟ་ཁྱུ། །

དེ་ལ་གདོང་ཀ་རྒྱག་པའི་ལུས་པོའི་འཁྲུག་སྤྱོད། །

དེ་དང་འབྲེལ་བ་མེད་པའི་ལམ་གྱི་དངུལ་ལོ། །

དེ་དང་ལྟོས་པ་མེད་པའི་ལྔ་བའི་རྫོགས་ལམ། །

དེ་དང་གཅིག་པོ་མེད་པའི་སྐྱེ་བ་ད་དངོས། །

ལན་གཅིག་སྙན་ངག་ནང་གི་ཡི་གེ་བརྒྱ་པས། །

ཧྲིལ་གྱིས་བཤད་པ་བཤད་དེ་ལོ་སར་བྲིས་སོ།།

2016/ 02/ 08ཐོལ་གྱིས་བྲིས།         
 

  སྐད་ཆ་འཕར་མ།

 

ཕ་གའི་སྒང་ནས་ཁུར་བའི་སྤྱང་ཟམ་དེ།།

ནུབ་ཀྱི་འོག་ལ་འཐེན་པའི་དར་ཡུག་དེ། །

ཆུ་སྣ་མང་དུ་འདུས་པའི་སུམ་མདོ་དེ། །

ང་ཡི་ཀླད་ཁྲག་དམར་པོ་ཝུ་བཞིན་སོབ།།

ང་ཡི་སྒྱིད་ཤ་ལེབ་མོ་གཟེར་མྱིག་ཕུད།།

ང་ནི་སྔོན་ནས་ཐོན་ཏེ་སྔོན་ནས་འགྲན།།

གྲལ་གྱི་གོལ་ས་འཁྲུག་སྟེ་ཆ་ལང་རྡེབ།།

རྩི་ཡི་མེ་ཏོག་རྣམས་ནི་ཆག་ཆག་བཏང་།།

ལམ་གྱི་དེའུ་འབུར་རི་ནས་རོ་ལངས་རྒྱག།

ལམ་གྱི་ཉག་ག་དེ་ནས་བླ་ཡང་གསོས། །

བར་དུ་སྤྲིན་པའི་ཚོགས་ནི་ཁ་ཤ་ཐམ།།

ང་ཡི་ཁང་མགོར་གྲེ་འགྱུར་ཐ་ལ་སྒྲོག །

གནམ་ནི་རུབ་ཅིང་བྱེ་མའི་རྡུལ་ཡང་ཟག།

རླུང་གི་ལྡང་མཚམས་མིག་གི་ས་ཡང་རྐོས།།

དེ་དང་འཚང་ཁ་ཉི་ལེར་བར་སྣང་གཏོལ།།

ངས་ནི་གོམ་པ་ལེན་བཞིན་རྣ་རྩ་འཕྲུག །

ཆུ་བོའི་རྒྱབ་ཀྱི་བསིལ་མའི་དངོས་གྲུབ་དྲན།།

རི་ཚོགས་གམ་གྱི་རྟ་ཐོག་ཕ་བང་སྒོམ། །

འཁོར་བའི་ཕྱི་མོ་ཉན་ཐོས་དགྲ་བཅོམ་ཡང་།།

ང་ནི་ཕར་ཕྱིནད་དྲུག་མའི་གཡང་དུ་འཕེན།།18.jpg

 བར་སྐབས་ཤིག་གི་སྐྱོ་ངལ།

 

བསམ་པའི་རི་རྩེར་ནམ་ཡང་ཆུ་ཟླ་འཁོར། །

སྐྱོ་བ་དེ་ལ་འཁོར་བའི་དཔེ་འཇོག་མེད། །

ཡིད་ཀྱི་ཉིན་སྲིབ་རྟག་ཏུ་དགུན་ཁ་ཚེས། །

སེམས་གཅོང་དེ་ལ་ཨེམ་ཆི་ཡོད་རབས་མེད། །

 ༢༠༡༥།༡༢།༠༡། ཧོས་པེ་ནས་བྲིས།

 

གོ་ལྡོག་པའི་ཉི་མ།

 

ལ་མོའི་རྒྱབ་ཏུ་སེམས་ཀྱི་སྟོན་ཁ་མཐོང་། །

དེ་ཡི་མོད་ལ་ཁ་བ་ག་ལེར་འཚུབ། །

བདག་ནི་ཉི་མ་རེ་རེར་སྙན་ངག་བྲིས། །

གདོང་ག་འདི་ལ་རྨི་ལམ་ཤེད་ཀྱིས་འཚང་། །

 ༢༠༡༥།༡༡།༣༠ ཧོས་པེ་ནས།43.jpg

  མིང་མེད།

 

གཅེར་བུ་ཐང་ལ་བུད་པ། །

ཚེར་མའི་མེ་ཏོག་རེད་འགྲོ། །

ཕྱེ་ལེབ་མིག་ཆུ་ཕུད་ཙམ། །

ལྕམ་མོའི་འོ་ཁ་སྲིང་ཙམ། །

ནང་ལ་ལྕེབ་པ་མེད་ཀྱང་། །

དཀར་ལམ་མེ་ལ་ཟགས་འོང་། །

སྒྲོལ་མས་ནང་ཆང་ཁུར་ཤོག །

ང་ཡི་རྨི་ལམ་དལ་འགྲོ།།

 ཁྲིན་ཏུའུ་ཡི་གཉིད་ལབ།

 

གྲོང་ཁྱེར་ཞེས་པ་རྣམ་པར་རྒྱལ་བ་དེ། །

འཁོར་བའི་མཛེས་པ་ལོངས་སུ་སྤྱད་བྱར་རྟོགས། །

མཛེས་མ་དེ་ཡང་གྲོང་གི་རི་དྭགས་ཏེ། །

བག་ཙམ་འཛུམ་མུར་ཁྲོད་ནས་སེམས་ངོགས་སྟོན། །

                                                       ༢༠༡༢།༡༡།༢༦། ཁྲིན་ཏུའུ་ནས9.jpg

  བབ་ཅོལ།

 

རྨི་ལམ་གྱི་གཏིང་སོ་ཆད་དེ། །

མཛེས་སྡུག་གི་རལ་བ་བསིགས་ཏེ། །

ངམ་ནག་གི་སྤུ་གྲི་སྟུག་སྟུག །

མཚན་ལམ་གྱི་གཤོག་པ་གཅོད་དམ། །

དཀར་ནག་གི་འཇའ་རིས་མོག་པོ། །

མུན་གླིང་གི་འདྲེ་སོ་རྣོ་པོ། །

རླུང་ནག་གི་གཤེད་མ་ཅོ་རིང་། །

ཁེར་རྐྱང་གི་གློ་གྲི་ཟུངས་དང་། །

ཆུ་བོ་འདིའི་བཞུར་སྒྲ་དེ་ཅི། །

བྱ་བྱེའུ་འདིའི་གནས་ཚང་གང་ཅི། །

ཁོ་བོ་འདིའི་གྲིས་རིས་དེ་གང་། །

ཡོད་ཚད་ལ་དམར་གསོད་བྱོས་དང་། །

མགོ་བོ་དེ་གནའ་ནས་བྲེག་ཚར། །

སྐྲ་ལོ་དེ་ལོ་ཟླས་འཆོས་ཟིན། །

རབ་མེད་ཀྱི་བྱང་ཁོག་སྟོད་དུ། །

མཆོད་ཆང་གི་གཡའ་མོ་སྒུག་ཆོག །

ཚོགས་ཞིང་གི་ལྷ་མོ་ཉེར་གཅིག  །

རོ་སྒྲུང་གི་བདུད་མོ་ཉེར་བདུན། །

ང་རུས་ཀྱི་མི་མོ་ཞེ་བདུན།  །

དམར་ཁྲག་གི་གཏོར་མ་དབུལ་ཆོག །

སྲིད་ཁམས་འདི་བཟོ་བོ་ཁོ་ན།  །

སོ་སྐྱེས་འདི་དམྱལ་བའི་མགྲོན་པོ། །

དབུགས་ལྡན་འདི་ལྷ་ཡི་རྐང་རྩེད། །

དག་སྣང་འདི་ཉལ་ཐ་སྐམ་པོ། །

བྱེ་རླུང་གི་འཇིགས་པ་ཞེས་ཀྱང་། །

འཁོར་བ་ཡི་མཛེས་སྡུག་ཟེར་ཡང་། །

ས་བཅུ་ཡི་ལམ་ལྔ་ཟེར་ཡང་། །

སོ་གཉིས་ཀྱི་འགྲམ་ཤ་གཉེར་འདྲ། །

ཡོད་ཚད་ནི་ཁྲམ་ཤིང་ངར་མ ། །

སྟོང་ཉིད་ནི་སྨིག་རྒྱུའི་འཇགས་མ། །

འུག་ཚང་གི་འཁོར་བ་སྐྱེས་པའི། །

ལང་ཚོ་འདི་ཅི་ཞིག་བྱུང་ངམ། །

གཟེར་རྒྱུག་འདི་རྩད་པ་བྱུང་སྟེ།།

ལས་སྐལ་འདི་ཆང་གིས་བཙོས་ཏེ།།

མི་ཚོགས་ནི་བ་ལང་སྤུན་གཉིས།།

ནམ་མཁའ་ནི་ཆུང་མར་ལེན་ནོ།།

 

རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱོའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།