dd

127

༄། །གླུ་བྱ་འཕུར་མ།
             {རྒྱ་གར}ཇོ་བོ་ཉི་དབང་མགོན་པོས་བརྩམས།
                 འབལ་གཞུང་ཁྱུང་ཐར་རྒྱལ་གྱིས་བསྒྱུར།
 ༡ 
 གང་སར་ངེས་མེད་འཁྱམས་པའི་བྱ་ཁྱུ་ཞིག།
 དབྱར་ཁའི་དུས་ཚིགས་འདི་ལ་འཕུར་ནས་ཡོང་།།
 བདག་གི་སྒེའུ་ཁུང་ཁར་བབས་གླུ་དབྱངས་བླངས།
 སླར་ཡང་གཤོག་འགྱུར་གཅིག་གིས་ཕྱི་ཕྱིར་འཕུར།།
  
 སྟོན་གྱི་སྡོང་ལོ་སེར་ཐིག་ལྷུང་བ་དག།
 རེ་ཞིག་སྨྲ་བ་མེད་པར་ཁ་ཁུ་སིམ།།
 ཡིན་ཡང་སྐྱོ་བའི་དབུགས་རིང་ཐེངས་གཅིག་གིས།།
 རྒྱུས་མེད་ཡུལ་ལུང་དག་ཏུ་འཐོར་བར་གྱུར།།
 ༢
 འགྲུལ་བཞུད་རིང་མོའི་ལམ་ཆུང་མ་བོར་བའི།།
 འཇིག་རྟེན་འདི་ཡི་རུ་བ་ཆུང་ཆུང་ཀྱེ།།
 གང་དུ་བཞུད་ཀྱང་ཉིད་ཀྱི་ཞབས་རྗེས་དེ།།
 བདག་གི་ཡིག་འབྲུའི་གསེབ་ཏུ་འཇོག་རོགས་ཀྱེ།།
 ༣
 རང་གི་མཛའ་མོའི་མདུན་དུ་འཇིག་རྟེན་འདིས།།
 ཚུལ་འཆོས་གདོང་འབག་བཤུས་ནས་ཆུང་ངུར་གྱུར།།
 སྙན་པའི་དབྱངས་རྟ་ལྟ་བུའི་ཆུང་ངུར་གྱུར།།
 གཏན་གྱི་འོ་སྦྱོར་ཇི་བཞིན་ཆུང་ངུར་གྱུར།།
 ༤
 ས་ཆེན་འདི་ཡི་དྭངས་གཙང་མིག་ཆུ་ཡིས།།
 ཁོ་མོའི་འཛུམས་མདངས་དྲོན་མོ་བཀྲུས་པ་དང་།།
 ལྷན་ཅིག་ལང་ཚོ་གསར་བའི་རང་མདངས་ཡང་།།
 ཉམས་སུ་མ་བཅུག་མཛེས་སྡུག་སྔར་ལས་ལྷག།
 ༥
 མུ་མེད་བྱེ་ཐང་སྐྱ་མོའི་སེམས་ཁོང་དུ།།
 རྩྭ་རྐང་གཅིག་ཀྱང་རེ་བའི་དྲོད་འཁོལ་ཉིད།།
 ཡིན་ཡང་རྩྭ་རྐང་འདི་ཡིས་མགོ་བོ་གཡུག།
 དགོད་བཞིན་དགོད་བཞིན་རྒྱང་རིང་གནས་སུ་ཡལ།།
 ༦
 གལ་ཏེ་དགུང་གི་ཉི་མ་སེར་པོ་འདི།།
 ནུབ་པར་ཁྱོད་ཀྱིས་མིག་ཆུ་བསིལ་ལགས་ན།།
 ཁྱོད་ཀྱི་སྐར་ཚོགས་དག་ཀྱང་མི་འགྱངས་པར།།
 ཅང་མེད་སྟོང་བའི་དབྱིངས་སུ་ཡལ་བར་ངེས།།
 ༧
 ཀྱེ་ཀྱེ་གར་ལ་རོལ་བའི་ཆུ་ཕྲན་ལགས།།
 ཁྱེད་ཀྱི་བཤུལ་ལམ་རིང་མོའི་བྱེ་འདམ་འདིས།།
 ཁྱེད་ལ་ད་དུང་སྲི་ཞུ་བསྒྲུབ་ལགས་ན།།
 ཁྱེད་ཀྱིས་ད་དུང་འདི་དག་འཁྱེར་སྲིད་དམ།།
 ༨
 ཁོ་མོའི་རེ་བ་བཅོལ་སའི་ཡིད་འོངས་ཀྱི།།
 ཞལ་རས་དེ་ནི་ཨེ་མ་ཉམས་སུ་དགའ།།
 མཚན་གྱི་ཆར་ཆུ་ཇི་བཞིན་མངོན་ཆུང་གིས།།
 བདག་གི་རྨི་ལམ་ཡོངས་སུ་དཀྲོགས་པར་བྱས།།
 ༩
 དེ་ཡང་སྐབས་ཤིག་འཁྲུལ་བའི་རྨི་ལམ་དུ།།
 ང་ཚོ་ཕན་ཚུན་ཆ་རྒྱུས་མེད་པ་འདྲ།།
 གཉིད་ལས་སད་དུས་ང་ཚོ་མ་གཞི་ནས།།
 ཕན་ཚུན་བརྩེ་བའི་ཞགས་པས་བཅིངས་པ་རྟོགས།།
 ༡༠
 བདག་གི་སེམས་སུ་ཡུན་རིང་ཉར་བ་ཡི།།
 དྲན་པའི་གདུང་བ་མ་ལུས་ཞི་བར་གྱུར།།
 ཚུལ་དེ་ས་སྲོད་དུས་ཀྱི་ཉི་མའི་འོད།།
 འཇམ་ཐིང་ཐིང་གིས་ནགས་རིར་འཕྲོས་པ་བཞིན།།
 ༡༡
 གང་ནས་སུ་ཡི་ཡིན་པ་མི་ཤེས་པའི།།
 ཤིན་ཏུ་ལྐོག་གྱུར་ཡིན་པའི་ལག་པ་བྱུང་།།
 སྒྱིད་ཅིང་ལུག་པའི་བསིལ་རླུང་ལྡང་བ་ལྟར།།
 བདག་གི་སེམས་ལ་དབྱངས་རྟ་ལྷོད་ཀྱིས་དཀྲོལ།།
 ༡༢
 “རྒྱ་མཚོ་ཁྱེད་ཀྱིས་གསུངས་པ་ག་རེ་ཡིན།།”
 “འགྱུར་མེད་རྟག་བརྟན་ཐེ་ཚོམ་དེ་ཡིན་ནམ།།”
 “ནམ་མཁའ་ཁྱེད་ཀྱི་ཨ་ལན་ག་རེ་ཡིན།།”
 “མི་སྨྲའི་བརྟུལ་ཞུགས་འཛིན་པ་དེ་ཡིན་ནམ།།"
 ༡༣
 ཀྱེ་ཀྱེ་འཆར་སྒོ་མང་པའི་སེམས་པ་ཀྱེ།།
 རེ་ཞིག་སྒྲ་འཛིན་དབང་པོ་གཡོར་ཞིག་དང་།།
 འཇིག་རྟེན་འདི་ཡི་ཤུབ་བུའི་སྐད་ཆ་དག།
 ཁྱེད་ཀྱི་བརྩེ་བར་སྙེག་པ་ཡིན་ནམ་ཅི།།
 ༡༤
 ཁྱེད་ཀྱི་གསར་བཏོད་ལྡན་པའི་སྙིང་སྟོབས་དེ།།
 མཚན་མོའི་སྨག་རུམ་ཇི་བཞིན་བག་ལ་ཞ།།
 དེ་ཡི་རླབས་ཆེན་རིན་ཐང་རྨད་བྱུང་ཡང་།།
 ཤེས་རིག་འཕྲུལ་གཟུགས་ཞོགས་པའི་ན་བུན་ཙམ།།
 ༡༥
 གཡང་གཟར་ཤིན་ཏུ་མཐོ་བ་རྐྱེན་བྱས་ཏེ།།
 ཉིད་ཀྱིས་རང་གི་ལྷད་མེད་བརྩེ་བ་དེ།།
 གྲོག་རོང་གཟར་པོའི་རྒྱལ་མཚན་རྩེར་མཆོད་ནས།།
 བླ་མེད་སྤྱོད་ཚུལ་འཛིན་འདི་མི་རིགས་སོ།།
 ༡༦
 ཞོགས་པར་ང་རང་སྒེའུ་ཁུང་འགྲམ་དུ་བསྡད།།
 འཇིག་རྟེན་འདི་ནི་ལམ་གྱི་རྒྱུ་འགྲུལ་ཞིག།
 ཏོག་ཙམ་བསྡད་དེ་ང་ལ་མགོ་ལྕོག་ལྡེམ།།
 སླར་ཡང་ཁ་ཁུ་སིམ་པར་ལམ་དུ་ཆས།།
 ༡༧
 བསམ་བློ་ཕྲ་ཞིང་ཞིབ་པ་འདི་དག་ནི།།
 སྡོང་ལོ་ཤག་ཤག་གཡོ་བའི་སྒྲ་དབྱངས་ཏེ།།
 སྒྲ་དབྱངས་འདི་དག་བདག་གི་སེམས་ངོགས་སུ།།
 དགའ་སྐྱིད་སྤྲོ་བའི་སྒྲ་རུ་བསྐྱིལ་ལགས་སོ།།
 ༡༨
 ཁྱོད་ཀྱིས་རང་ཉིད་ངོ་མ་མཐོང་མི་སྲིད།།
 མཐོང་ཡང་དེ་ནི་གྲིབ་གཟུགས་ཙམ་དུ་ཟད།།
 ༡༩
 ཀྱེ་ཀྱེ་སྐྱབས་མགོན་བདག་ནི་ཇི་འདྲའི་བླུན།།
 གཞན་དག་ཁྱེད་ཀྱི་སྙན་པའི་གླུ་དང་ལྷན།།
 འུར་སྒྲ་སྒྲོག་བཞིན་མཛེས་པའི་གར་བྱེད་ཀྱང་།།
 བདག་ནི་རྣ་བ་བླགས་ཏེ་མཉན་པ་ཙམ།།
 ༢༠
 བདག་གིས་ལེགས་པའི་ལམ་འགྲོ་གདམ་ཐབས་བྲལ།།
 ལེགས་པའི་ལམ་དེས་བདག་ཉིད་གདམ་པར་ངེས། 
 ༢༡
 གློག་སྒྲོན་རྒྱབ་ཏུ་ཁུར་བའི་མི་རྣམས་ཀྱིས།།
 རང་རང་གྲིབ་གཟུགས་མདུན་དུ་འཕྲོས་པ་མཐོང་།།
 ༢༢
 བདག་ཉིད་གང་དུ་འཚོ་ཞིང་གནས་འགྱུར་བ།།
 དེ་ནི་བདག་གི་འཚོ་བའི་ཁ་དོག་སྟེ།།
 བདག་ལ་མཚོན་ན་རྟག་བརྟན་འགྱུར་མེད་ཀྱི།།
 ཁྱད་མཚར་དེ་ནི་འཚོ་ཞིང་གནས་པ་འོ།།
 ༢༣
 བདག་གི་དྲི་བར་ལྗོན་འདབ་སོགས་ལའང་།།
 རང་བྱུང་ཆར་རླུང་ལྟ་བུའི་དྲིས་ལན་འདུག།
 འོན་ཏེ་ཁྱོད་རང་སུ་ཡིན་སྒམ་བརླིང་འདི།།
 དྲིས་ཚེ་བདག་ནི་མེ་ཏོག་རྐང་གཅིག་ཟེར།།
 ༢༤
 སྐུ་ཉིད་ནམ་ཞིག་ངལ་བར་གྱུར་བའི་ཚེ།།
 ངལ་གསོ་གནང་བ་འདི་ཡང་ལས་དོན་ཉིད།།
 དེ་ནི་སྤྱན་ལྕིབས་སྤྱན་དང་འབྲེལ་བ་བཞིན།།
 སོ་སོར་འབྱེད་པའི་ཆོས་གཞན་མ་དམིགས་སོོ།།
 ༢༥
 མི་ནི་བཙས་མ་ཐག་པའི་ཕྲུ་གུ་སྟེ།།
 ཁོ་ལ་སྟོབས་དང་ནུས་པ་ཅི་འབྱུང་པ།།
 ཐམས་ཅད་དུས་ཚོད་ཅིག་གི་གོ་རིམ་དང་།།
 འཚར་ལོངས་འབྱུང་བའི་ནུས་ཤུགས་ཁོ་ན་འོ།།
 ༢༦
 སྐྱབས་མགོན་མཆོག་གིས་ང་ཚོའི་དྲིན་གཟོ་ལ།།
 རེ་བས་སྒུག་པ་ཉི་མ་སེར་པོ་དང་།།
 ས་གཞི་གནང་བ་འདི་ཙམ་མ་ཡིན་པར།།
 མེ་ཏོག་བསྩལ་བའི་རྒྱུ་མཚན་དེ་ཡིས་སོ།།
 ༢༧
 འོད་ནི་གཅེར་བུར་བུད་པའི་བྱིས་པ་བཞིན།།
 ལྗང་ལོའི་གསེབ་ཏུ་དགའ་སྐྱིད་རྩེད་འཇོར་གཡེང་།།
 མི་ནི་གདོད་ནས་གཡོ་སྒྱུའི་བདག་ཉིད་ཅིག།།
 ཡིན་པ་ད་དུང་ཚོར་གྱིན་མེད་པ་འདྲ།།
 ༢༨
 ཨ་ཨ་རེ་ཞིག་གསོན་དང་མཛེས་སྡུག་ཀྱེ།།
 མེ་ལོང་མདུན་དུ་རང་རློམ་ང་རྒྱལ་གྱིས།།
 དེ་ཡི་ངོ་བསྟོད་རྗེས་སུ་མི་འབྲང་བར།།
 བརྩེ་བའི་ཀློང་ནས་རང་ཉིད་ཚོལ་ཅིག་ཀྱེ།།
 ༢༩
 བདག་གི་སེམས་པས་ཁོ་མོའི་རླབས་ཀྱི་ཕྲེང་།།
 འཇིག་རྟེན་འདི་ཡི་རྒྱ་མཚོའི་འགྲམ་ལ་མཆོད།།
 “ང་རང་ཁྱོད་ལ་དགའ”བའི་དབུགས་འབྱུང་དང་།།
 མིན་ཆུ་དྲོན་མོས་བཞག་པའི་དྲན་ཤིང་ངོ་།།
 ༣༠
 ཀྱེ་ཀྱེ་དཀར་གསལ་དུང་གི་ཟླ་བ་ལགས།།
 ཁྱེད་ཀྱིས་ད་དུང་སྐུ་མགྲོན་སུ་ལ་སྒུག།
 འཆར་ཁའི་ཉི་མ་སེར་པོའི་གཟི་བྱིན་ལ།།
 བརྩེ་བའི་གུས་ཕྱག་འབུལ་པ་ཡིན་ནམ་ཅི།།
 ༣༡
 སྔོ་ལྗང་ལོ་འདབ་གཡོ་བའི་ལྗོན་ཤིང་ཞིག།
 བདག་གི་སྒེའུ་ཁུང་འགྲམ་ནས་སྐྱེས་ཏེ་བྱུང་།།
 འདི་ནི་ས་གཞིའི་མགྲིན་པ་ལས་བརྡོལ་བའི།།
 རེ་བའི་སྒྲ་དབྱངས་ཤིག་དང་གཉིས་སུ་མེད།།
 ༣༢
 སྐྱབས་མགོན་དེ་ཡི་ཐུགས་རྗེའི་རོལ་གར་ན།།
 རང་གིས་གསར་བསྐྲུན་བྱས་པའི་ཞོགས་པ་དེ།།
 རང་ལ་མཚོན་ན་ནམ་ཡང་ཁྱད་མཚར་གྱི།།
 གཟིགས་མོ་བླ་ན་མེད་པ་ཞིག་ཏུ་མཐོང་།།
 ༣༣
 ཚེ་དང་སྲོག་གིས་འཇིག་རྟེན་ནོམ་ལ་བཏགས།།
 བརྩེ་ཞིང་དུངས་བས་མི་ཚེའི་རིན་ཐང་རྙེད།།
 ༣༤
 ཐན་པས་གདུང་ནས་སྐམ་པའི་ཆུ་གྲོག་འདིས།།
 སྔར་སོང་འདས་པའི་དོན་ལ་ཅི་མི་སྙམ།།
 ༣༥
 བྱེའུ་ཆུང་དེ་ཡིས་སྤྲིན་དཀར་ཡིན་ན་བསམ།།
 སྤྲིན་དཀར་དེ་ཡིས་བྱེའུ་ཆུང་ཡིན་ན་བསམ།།
 ༣༦
 རྦབ་ཆུས་གླུ་དབྱངས་ལེན་བཞིན་རང་ཉིད་ལ།།
 རང་དབང་ཐོབ་པས་གླུ་སྐད་ཡོད་དོ་ཟེར།།
 ༣༧
 བདག་ནི་འདི་ལྟར་སྐྱོ་བས་མནར་དོན་ཅི།།
 ཁོང་གི་ཐུགས་དགོངས་དེ་འདྲ་མ་ཡིན་ནོ།།
 ཁོང་གི་མཁྱེན་པའི་ཡུལ་དུ་མ་གྱུར་པའི།།
 དགོས་མཁོ་ཆུང་ཆུང་ཞིག་གི་ཆེད་དུའོ།།
 ༣༨
 བདག་མོ་ཁྱེད་ཀྱིས་རང་གི་ཐབ་ཚང་དུ།།
 རྐང་ལག་གཉིས་ཀྱིས་གཡོས་སྦྱོར་སྙན་ཆ་དཀྲོལ།།
 དེ་ནི་རི་ཁུག་དག་ཏུ་བཞུར་བ་ཡི།།
 ཆུ་ཕྲན་རྡེའུ་ཟེགས་བརྒྱུད་པའི་དབྱངས་དང་འདྲ།།
 ༣༩
 མཐོན་པོ་དགུང་ལ་བཏེགས་པའི་ཉི་མ་དེ།།
 དམའ་བ་རྒྱ་མཚོ་ཆེན་པོའི་མཐའ་ལ་ལྷུང་།།
 དེ་ནི་ཁོང་གིས་མཇུག་མཐའི་གུས་ཕྱག་ཅིག།
 ཤར་ཕྱོགས་གནམ་སའི་མཚམས་དེར་འབུལ་ཕྱིར་རོ།།
 ༤༠
 བཞེས་འདོད་ཡི་ག་མེད་པར་རྐྱེན་བྱས་ཏེ།།
 ཉིད་ཀྱིས་བཟའ་བཅར་ལེ་བདའ་མ་བྱེད་ཅིག།
 ༤༡
 གཡུ་ལོ་ཐགས་སུ་བཀྲ་བའི་ནགས་ཚལ་འདིས།།
 ས་ཆེན་འདི་ཡི་ཕུགས་བསམ་མཚོན་པ་བཞིན།།
 སྔ་རྟིང་བཏེགས་ནས་ཡངས་པའི་ནམ་མཁའ་ལ།།
 ལྐོག་ལྟའི་ཚུལ་དུ་སྨོན་ལམ་འདེབས་པར་བྱེད།།
 ༤༢
 ཁྱེད་ཀྱིས་མེ་ཏོག་ལྟ་བུའི་འཛུམས་མདངས་ཤིག།
 བསྟན་པ་ཙམ་ལས་ཅི་ཡང་མ་སྨྲས་མོད།།
 བདག་གིས་རྒྱུ་མཚན་དེ་ལ་རྐྱེན་བྱས་ཏེ།།
 ཉིན་མཚན་ཁོར་མོ་ཡུག་ཏུ་ཁྱོད་ལ་བསྒུག།
 ༤༣
 རྒྱ་མཚོའི་གཏིང་གི་ཉ་སྲིན་གྲག་འགུལ་དབེན།།
 སྐམ་སའི་གཅན་གཟན་བྱ་ཚོགས་འུར་སྒྲས་ཁེངས།།
 ང་ཚོ་འཇིག་རྟེན་གཅིག་ཏུ་འཚོ་ན་ཡང་།།
 རང་རང་ལས་ཀྱི་བྱ་བྱེད་ཐ་དད་དོ།།
 ༤༤
 འཇིག་རྟེན་སོམ་ཉིའི་རྒྱུད་སྐུད་སྟེང་ན་ཤུད།།
 སེམས་གཅོང་སྐད་ཀྱིས་འགྱུར་ཁུགས་དབྱངས་སུ་དཀྲོལ།།
 ༤༥
 ཁོས་ནི་རང་གི་རལ་གྲི་ལྷ་ཚོགས་སུ།།
 བསྒོམས་པས་རང་གྲི་རྒྱལ་ཞིང་རང་ཉིད་ཕམ།།
 ༤༦
 ང་ཚོའི་དད་པའི་ཡུལ་གྱི་སྐྱབས་མགོན་དེས།།
 རང་གི་གསར་བཏོད་ཁྲོད་ནས་རང་ཉིད་རྙེད།།
 ༤༧
 གྲིབ་མས་ཁོ་མོ་རང་གི་གདོང་འབག་གྱོན།།
 དེའི་རྗེས་གསང་བའི་ངང་དང་ཞི་འཇམ་ངང་།།
 རང་གི་བབ་བརླིང་ལྡན་པའི་བརྩེ་བ་དེས།།
 འོད་ཀྱི་སྣང་བའི་ཞབས་རྗེས་སྙེག་པར་ཐལ།།
 ༤༨
 སྐར་མའི་ཚོགས་དག་སྲིན་བུ་མེ་ཁྱེར་ལྟར།།
 ཉམ་ངའི་གཡང་དུ་ལྷུང་བར་ག་ལ་སྐྲག།
 ༤༩
 བདག་ནི་དབང་ཤུགས་འོག་གི་འཁོར་ལོ་དང་།།
 འཁོར་ལོའི་འོག་ཏུ་བཙན་གྱིས་གཅུན་པ་ཡི།།
 གང་ཟག་གསོན་པོའི་གྲས་ཀྱི་དེ་མིན་པར།།
 སྐྱབས་མགོན་མཆོག་ལ་སྙིང་ནས་ཐུགས་རྗེ་ཞུ།།
 ༥༠
 སེམས་པ་འདི་ནི་ཀུན་ནས་བག་ཚ་བས།།
 བློ་ཁོག་ཡངས་ཤིང་ཤེས་རྒྱ་ཆེ་བ་མིན།།
 ལས་ཀྱི་སྣེ་མོ་གཅིག་ལ་འཇུས་པ་ནས།།
 གཞན་ཏུ་མི་གཏུབ་རང་བཞིན་གཅིག་པར་མཐོང་།།
 ༥༡
 ཁྱོད་ཀྱི་དང་བའི་རྟེན་དེ་ས་རྡུལ་གྱི།།
 ཁམས་སུ་འཐོར་བའི་རྒྱུ་མཚན་དེ་ཁོ་ནས།།
 སྐྱབས་མགོན་མཆོག་གི་ས་རྡུལ་ཙམ་ཞིག་ཀྱང་།།
 ཁྱོད་ཀྱི་དང་རྟེན་དེ་ལས་འཕགས་པར་ཤེས།།
 ༥༢
 འགྲོ་བ་མི་ཡིས་རང་གི་ལོ་རྒྱུས་ལས།།
 རང་ཉིད་ཧྲིལ་བོ་མངོན་པར་བྱེད་ཐབས་བྲལ།།
 ཡིན་ཡང་ཟུར་བལྟས་ལེབ་མཐོང་ཙམ་ཞིག་ཏུ།།
 མངོན་པར་ཅིས་ཀྱང་འབད་པས་བརྩོན་པ་ལགས།།
 ༥༣
 སྒྲོན་མེས་མོ་ལ་ཨ་ཅག་ཅེས་འབོད་སྐབས།།
 གློག་སྒྲོན་ཁྲོས་ནས་དམོད་མོ་མང་ཙམ་བྱས།།
 ཡིན་ཡང་དཀར་གསལ་དུང་ཟླ་ཤར་བ་ན།།
 གློག་སྒྲོན་འཛུམ་བཞིན་ང་ཡི་ཨ་ཅེ་ལགས།།
 ང་ཡི་བརྩེ་བའི་ཨ་ཅེ་ལགས་ཞེས་བོས།།
 ༥༤
 ངེད་གཉིས་རྒྱ་མཚོའི་རླབས་དང་ཆུ་སྐྱར་བཞིན།།
 ཕན་ཚུན་འཕྲད་ཅིང་ཤིན་ཏུ་ཉེ་བར་གྱུར།།
 ཆུ་སྐྱར་འཕུར་རྗེས་རླབས་ཀྱང་ཕྱི་ཕྱིར་བཀྱེད།།
 ངེད་རང་གཉིས་ཀྱང་རང་སར་ངང་གིས་གྱེས།།
 ༥༥
 དགུང་གི་ཉི་མ་སེར་པོའི་རྟོད་ཐག་ཆད།།
 ང་ནི་མཚོ་ཁར་གཡེང་པའི་ཁེར་རྐྱང་གི།
 གྲུ་ཆུང་ཞིག་དང་འདྲ་བར་རྦ་རླབས་ཀྱི།།
 མཛེས་པའི་བྲོ་དང་སྙན་པའི་གཞས་ལ་འཁོར།།
 ༥༦
 ང་ཚོའི་ཚེ་དང་སྲོག་གི་ནོར་བུ་འདི།།
 ཆོས་ཉིད་གནམ་གྱི་རྒྱལ་མོས་གནང་བ་སྟེ།།
 ནམ་ཞིག་སྦྱིན་པའི་སྟོབས་ཀྱིས་འབུལ་ནུས་ན།།
 དུས་དེར་ཁྱོད་ལ་སླར་ཡང་འཐོབ་པར་འགྱུར།།
 ༥༧
 ང་ཚོ་ནམ་ཞིག་བག་ཡོད་ཁེངས་སྐྱུང་གི།
 སྤྱོད་ལམ་ཉིད་ལ་གནས་པར་གྱུར་བའི་ཚེ།།
 ད་ནི་ཚང་མ་ཧ་ཅང་རླབས་ཆེན་གྱི།།
 མཆོག་གི་དུས་དེར་ཤིན་ཏུ་ཉེ་བས་སོ།།
 ༥༨
 མཆིལ་བས་ནགས་ཀྱི་རྨ་བྱ་མཐོང་བའི་མོད།།
 མཇུག་སྒྲོར་ཕངས་སེམས་དང་བཅས་སེམས་ཁྲལ་བྱས།།
 ༥༩
 “སྐད་ཅིག་མ་དེར་མ་སྐྲག་མ་འཇིགས་ཤིག།”
 རྟག་བརྟན་རང་སྒྲས་དེ་ལྟར་དབྱངས་ཀྱིས་བསྙད།།
 ༦༠
 མཚོ་རླུང་ཆེན་པོར་གློ་བུར་ལམ་ནོར་ཐེབས།།
 རེ་ཞིག་རང་མགོ་འཁོར་ནས་ཉེ་ལམ་བསྙེག།
 ཡིན་ཡང་མཚམས་ཤིག་ཤེས་མེད་ཚོར་མེད་ངང་།།
 འཚོལ་ཅིང་སྙེག་པའི་རྒྱུན་དེ་འགག་པར་གྱུར།།
 ༦༡
 གཞན་གྱི་ཆང་ཕོར་ནང་གི་ཝུ་བ་དེ།།
 དྲག་ཏུ་འཕྱུར་ཡང་མི་འགྱངས་ཉམས་པར་འགྱུར།།
 དེ་བས་གྲོགས་པོ་ཁྱོད་ཀྱིས་རང་ཉིད་ཀྱི།།
 ཆང་ཕོར་ནང་གི་བདུད་རྩི་གཙང་བཞེས་གནོང་།།
 ༦༢
 ཕུན་སུམ་ཚོགས་པས་གཞན་གྱི་བརྩེ་བའི་སླད།།
 རང་ཉིད་ཀུན་ནས་མཛེས་པར་སྤྲས་པ་ལགས།།
 ༦༣
 འགྲོ་བའི་སྐྱབས་མགོན་བླ་ན་མེད་པ་དེས།
 “བདག་གིས་ཁྱོད་ལ་གསོ་བཅོས་བྱས་པ་ཡིས།
 ད་གཟོད་ཁྱོད་ལ་གནོད་འཚེ་བཟོས”ཞེས་གསུངས།
 “བདག་ཉིད་ཁྱོད་ལ་ཤིན་ཏུ་སྙིང་ཉེ་བས།།
 ད་གཟོད་ཉེས་ཆད་བཅད་པ་ཡིན”ཅེས་གསུངས།།
 ༦༤
 མེ་དཔུང་ཆེན་པོས་འོད་སྣང་བསྩལ་བ་ལ།།
 ཁྱོད་ཀྱིས་གུས་པས་ཐུགས་རྗེ་ཞུ་དགོས་མོད།།
 ཤུགས་ཀྱི་སྒྲོན་མེ་འདེགས་མཁན་མ་བརྗེད་རོགས།།
 ཁོང་ནི་ད་དུང་མུན་པའི་ཀློང་དུ་འོ།།
 ༦༥
 རྩྭ་ཕྲན་ཁྱོད་ཀྱི་ཞབས་རྗེས་ཆུང་ན་ཡང་།།
 ཞབས་ཀྱིས་མནན་པའི་ས་གཞི་ཁོད་ཡངས་འདི།།
 ཁྱོད་རང་ཁོ་ནར་གཏོགས་ཤིང་དབང་བ་ཡི།།
 གནམ་ས་ཁ་སྦྱོར་ཡིན་པ་ཤེས་པར་གྱིས།།
 ༦༦
 གང་བུ་གསར་དུ་འབུས་པའི་མེ་ཏོག་གིས།།
 རེ་བའི་ཡུལ་ལ་སྨོན་ལམ་བརྒྱབ་པ་ནི།།
 “ཀྱེ་ཀྱེ་བརྩེ་བར་འོས་པའི་འཇིག་རྟེན་ཀྱེ།།
 བདག་གི་མཛེས་པ་རྟག་ཅིང་བརྟན་པར་ཤོག།”
 ༦༧
 དཀོན་མཆོག་དེ་ནི་གཞན་ལས་ཁྱད་འཕགས་ཕྱིར།།
 བཙན་པོའི་རྒྱལ་ཁབ་དག་ལ་སུན་པ་བྱུང་།།
 ཡིན་ཡང་བརྩེ་བའི་སྣང་བ་དག་པའི་ཕྱིར།།
 མེ་ཏོག་ཉམ་ཆུང་དག་ལ་དེ་ལྟ་མིན།།
 ༦༨
 རང་རང་ནོར་འཛོལ་ཁྲོད་ཀྱི་ཕམ་ཉེས་དེ།།
 ལམ་གྱི་འཇིགས་རུང་དགྲ་བོ་ཡིན་ན་ཡང་།།
 ཡང་དག་བདེན་པས་ལམ་གྱི་ཕམ་ཁ་དེ།།
 ངེས་པར་བརྒྱུད་དགོས་འགག་འཕྲང་ཞིག་ཏུ་བརྩི།།
 ༦༩
 “བདག་ལ་རང་གི་བཏུང་ཆུ་ཉུང་ཙམ་ལས།།
 མེད་ཀྱང་བཀྲེས་ཤིང་སྐོམ་པས་གདུང་རྣམས་ལ།།
 གཏོང་ཕོད་ཆེན་པོ་ལྡན”ཞེས་རྦབ་ཆུ་ཡིས།།
 ནམ་ཡང་སྙན་པའི་གཞས་ཆུང་དབྱངས་སུ་གྱེར།།
 ༧༠
 སྐབས་དེའི་མེ་ཏོག་མཆོད་པའི་བདེ་སྐྱིད་ཀྱི།།
 དད་པའི་ཤུགས་ཀྱི་འབྱུང་ཁུངས་ག་རེ་ལགས།།
 ༧༡
 རྣོ་གཅོད་སྟ་རེས་ཤིང་ལ་ཡུ་བ་གཡོར།།
 ལྗོན་ཤིང་རང་ཡང་འཐད་ནས་རང་དགར་བྱིན།།
 ༧༢
 ཧ་ཅང་ཁེར་རྐྱང་ཡིན་པའི་ས་སྲོད་དེ།།
 ཆར་སྤྲིན་འཐབ་པའི་སེང་རས་ཀུན་ནས་གཡོགས།།
 དེ་ཡི་གཉོམ་ཞིང་དུངས་པའི་འཁུན་བུ་དེ།།
 བདག་གི་སེམས་ཀྱི་ལྷིང་འཇགས་བརྒྱུད་ནས་ཚོར།།
 ༧༣
 གང་དུ་ཚངས་པར་སྤྱོད་པའི་ཕུན་ཚོགས་དེ།།
 ལྷད་མེད་བརྩེ་བ་ལས་བྱུང་ནོར་བུ་ཡིན།།
 ༧༤
 རྒྱ་མཚོའི་རླངས་པ་རྔུབས་པའི་དབུགས་འབྱུང་གི།
 སྨུག་སྤྲིན་དེ་ནི་བརྩེ་དུང་ཇི་བཞིན་དུ།།
 དྲན་པའི་རི་རྩེར་རྩེད་འཇོ་སྣ་ཚོགས་བགྱིད།།
 བར་བར་ཡིད་འོངས་འགྱུར་བག་སྣ་ཚོགས་སྟོན།།
 ༧༥
 འཇིག་རྟེན་འདི་ལ་མ་དག་འཁྲུལ་བའི་བློས།།
 གོ་བ་ལོག་པར་ལེན་མཁན་ང་ཚོ་ཡིན།།
 “འཇིག་རྟེན་འདི་ཡིས་ང་ཚོ་བསླུས་སོང”ཞེས།།
 འུར་ཟིང་སློང་མཁན་དེ་ཡང་ང་ཚོ་ཡིན།
 ༧༦
 སྙན་ངག་མཁན་གྱི་རླུང་དེ་གང་སར་རྒྱུ།།
 རྒྱ་མཚོའི་ཀློང་དང་ནགས་ཚལ་མཐུག་པའི་ཀློང་།།
 བརྒྱུད་དེ་གང་གི་གླུ་སྐད་འཚོལ་ཅིང་སྙེག།
 ༧༧
 བཙས་མ་ཐག་པའི་ཕྲུ་གུ་རེ་རེ་ཡིས།།
 ལྷ་རྣམས་ང་ཚོ་འགྲོ་བ་མིའི་རིགས་ལ།།
 ཡིད་སེམས་གཏན་ནས་ཆད་པ་མ་ཡིན་པར།།
 ད་དུང་ཚང་མར་རེ་བ་མེ་སྟག་ཙམ།།
 འདུག་ཅེས་ལྷ་ཡི་བཀའ་ལུང་སྒྲོག་པར་བྱེད།།
 ༧༨
 སྔོ་རྩྭས་ཁོ་མོར་ནན་གྱིས་ཞུ་བ་ནི།།
 ཟླ་བོ་ས་གཞི་འདི་རུ་འབྱུང་བར་རེ།།
 སྡོང་བོས་རང་གི་ནམ་མཁའ་སྔོ་བསང་མར།།
 ཁེར་རྐྱང་འཚོ་བའི་ལམ་བུ་འཚོལ་ཅིང་སྙེག།
 ༧༩
 མིས་ནི་རང་གིས་བསྐྲུན་པའི་འཛུགས་སྐྲུན་ལ།།
 རང་ཉིད་ཁོ་ནས་འཛིང་རགས་རྒྱག་པར་བྱེད།།
 ༨༠
 ཀྱེ་ཀྱེ་གྲོགས་པོ་ཁྱོད་ཀྱི་གསུང་སྐད་དེ།།
 བདག་གི་སེམས་སུ་སྙན་པའི་དབྱངས་ཀྱིས་འབབ།།
 དེ་ནི་རྒྱ་མཚོ་སྐྱོམ་པའི་སྒྲ་དབྱངས་བཞིན།།
 ནགས་ཚལ་སྟུག་པོའི་ཀློང་དུ་ཁྱབ་པར་གྱུར།།
 ༨༡
 མུན་པ་དགུ་རྩེག་ཁྲོད་ཀྱི་མེ་ཕུང་དང་།།
 རྣམ་བཀྲའི་སྐར་ཚོགས་དབུས་ཀྱི་མེ་སྟག་གཉིས།།
 དོན་དམ་གང་གི་ཆེད་དུ་བརྩོན་བྱེད་པ།།
 མཐར་ཐུག་དེ་ནི་ཅི་དང་གང་ཡིན་ནམ།།
 ༨༢
 ཐོག་མའི་སྐྱེ་བ་དབྱར་ཁའི་མེ་ཏོག་ལྟར།།
 མཚར་སྡུག་ལང་ཚོའི་མཛེས་པ་ཀུན་ནས་གྲོལ།།
 མཐའ་མའི་འཆི་བ་སྟོན་ཁའི་སྡོང་ལོ་ཡི།།
 ལྷིང་ཞིང་འཇགས་པའི་མཛེས་པ་དེ་དང་འདྲ།།
 ༨༣
 རང་ཉིད་མི་བཟང་བཅོ་བར་འདོད་པ་དེས།།
 སྒོ་ཡི་ཕྱི་ནས་སྒོ་མོ་རྡུང་བར་བྱེད།།
 གཞན་ལ་བརྩེ་བ་ལྡན་པའི་མི་དེ་ཡིས།།
 མཐོང་ཙམ་ཉིད་ནས་སྒོ་མོ་ཕྱེས་ཏེ་ཡོད།།
 ༨༤
 མི་རྟག་ཚེ་ཡི་འདུ་བྱེད་སྟོང་བའི་དུས།།
 རྣམ་པ་མང་པོ་འདྲེས་ནས་གཅིག་ཏུ་གྱུར།།
 འཇིག་རྟེན་དཀར་ངོགས་འདི་ན་འཚོ་བའི་དུས།།
 གཅིག་དེ་སོ་སོར་གྱེས་ནས་ཐ་དད་གྱུར།།
 སྐྱབས་མགོན་མི་མངོན་དབྱིངས་སུ་གཤེགས་པ་ན།།
 ཆོས་ལུགས་ཐམས་ཅད་གྲུབ་མཐའ་གཅིག་ཏུ་གྱུར།།
 ༨༥
 སྒྱུ་རྩལ་མཁན་ནི་རང་བྱུང་འཇིག་རྟེན་འདིའི།།
 མཛའ་བོ་ཡིན་ལ་བྲན་གཡོག་དེ་ཡང་ཡིན།།
 རང་བྱུང་ཁམས་ཀྱི་རི་ཆུ་ནགས་གསུམ་གྱི།།
 བདག་པོ་དེ་ཡང་སྒྱུ་རྩལ་མཁན་ཉིད་དོོ།།
 ༨༦
 ཀྱེ་ཀྱེ་འབྲས་བུ་ཁྱོད་ནི་བདག་ཉིད་དང་།།
 ཕན་ཚུན་བར་ཐག་ཅི་ཙམ་རིང་བ་ལགས།།
 ཀྱེ་ཀྱེ་མེ་ཏོག་བདག་ནི་ཁྱོད་ཉིད་ཀྱི།།
 སེམས་ཀྱི་གསང་བའི་ཁང་བར་བཞུགས་པ་ལགས།།
 ༨༧
 འདོད་འདུན་དེ་ནི་མུན་ཁྲོད་འབའ་ཞིག་ལས།།
 ཉིན་མོར་མཐོང་ཐབས་བྲལ་བའི་མི་ལའོ།།
                                      ༨༨
                          ཆུ་ཟིལ་ཆུང་ཡང་ཁ་ཕོ་མི་ཆུང་སྟེ།།
                          མཚེའུར་ཐད་ཀར་ཅོ་འདྲི་བྱེད་པ་ནི།།
                          ཁྱེད་ནི་པད་འདབ་འོག་གི་ཟིལ་ཆེན་དང་།།
                          ང་ནི་སྟེང་གི་ཟིལ་བ་ཆུང་ངུའོ།།
                                         ༨༩
                           རལ་གྲི་ཤིན་ཏུ་རྣོ་ཞིང་དབལ་ལྡན་པས།།
                           རང་ཉིད་རྟུལ་བར་གྲི་ཤུབས་ཡིད་ཚིམ་འདུག།
                                         ༩༠ 
                              ཤིན་ཏུ་གནག་ཅིང་སྟུག་པའི་མུན་ཁྲོད་དུ།།
                              གཅིག་ནི་གཅིག་སྟེ་བསེ་རུའི་རྣམ་པར་གྲུབ།།
                              གསལ་ཞིང་འཚེར་བའི་འོད་ཀྱི་སྣང་བའི་ཁྲོད།།
                              གཅིག་དེ་གཟུགས་ཀྱི་རྣམ་པ་དུ་མར་མངོན།།
                                             ༩༡
                             སྟོབས་ལྡན་གླང་པོ་འཁུར་བའི་ས་ཆེན་འདིས།།
                             ཉམ་ཆུང་རྩྭ་ཕྲན་མང་པོ་རང་ཉིད་ཀྱི།།
                             གྲོགས་སུ་བཀུག་སྟེ་རྒྱང་རིང་མགྲོན་པོ་ལ།།
                             རང་ཉིད་ལྷག་ཏུ་བརྩེ་བའི་འཇོན་ཐང་ངོམ།།
                                             ༩༢
                             ལྗང་ལོའི་སྐྱེ་འཆི་འཁོར་བའི་རླུང་འཚུབ་སྟེ།།
                             དྲག་ཏུ་ཁྱུད་མོར་འཁོར་ཞིང་བར་སྣང་གི།།
                             བགྲང་ཡས་གཟའ་སྐར་འབར་བའི་གཞལ་ཡས་སུ།།
                             དལ་གྱིས་རྒྱུ་ཞིང་ཡུན་གྱིས་འཁོར་བར་བྱེད།།
                                             ༩༣
                             དབང་ཐང་ན་རེ་ཀྱེ་ཀྱེ་འཇིག་རྟེན་ལགས།།
                             ཁྱེད་ནི་བདག་ལ་དབང་བ་ཡིན་ནོ་སྨྲས།།
                             བརྩེ་དུང་ན་རེ་ཀྱེ་ཀྱེ་འཇིག་རྟེན་ལགས།།
                             བདག་ནི་ནམ་ཡང་ཁྱེད་ཀྱི་ཡིན་ནོ་སྨྲས།།
                             འཇིག་རྟེན་གྱིས་ནི་དབང་ཐང་དམ་ལ་བཏགས།།
                             གསེར་ཁྲིར་བཅིངས་ཏེ་ནམ་ཡང་འགུལ་མེད་བཟོས།།
                             བརྩེ་དུང་ཉིད་ལ་བརྩེ་བའི་རང་དབང་གནང་།།
                                            ༩༤
                              སྨུག་སྤྲིན་ལང་ལོང་རྣམ་པར་གཡོ་བ་འདི།།
                              ས་གཞིའི་འདོད་མོས་ཡིན་ཡང་སྨུག་སྤྲིན་གྱིས།།
                              ས་གཞིའི་ཡིད་ཀྱི་མེ་ཏོག་མ་རྙིང་བའི།།
                              མཚར་སྡུག་ཉི་འོད་ཀུན་ནས་སྒྲིབ་པར་བྱས།།
                                           ༩༥
                              རེ་ཞིག་གྲག་འགུལ་མེད་པར་དལ་ཅག་གེར།།
                              ལྷོད་ལ་བོབས་ཤིག་བདག་གི་སེམས་པ་ཀྱེ།།
                               གཡུ་ལོ་རྣམ་བཀྲའི་ལྗོན་ཤིང་འདི་དག་ཀྱང་།།
                              རྩེ་གཅིག་དད་པས་གསོལ་བ་འདེབས་མཁན་ལགས།།
                                           ༩༦
                             དུས་མཐའི་སྐད་ཅིག་ཙམ་གྱི་འུར་ཟིང་གིས།།
                             རྟག་བརྟན་རོལ་མོར་འཕྱ་ཞིང་སྨོད་པར་བྱེད།།
                                           ༩༧
                              དགའ་སྐྱོ་ཆགས་སྡང་དབང་དུ་གྱུར་བ་ཡི།།
                              འདས་པའི་དུས་ཀྱི་ལོ་ཟླ་མང་པོ་ཞིག།
                              ཡིད་ཀྱི་མེ་ལོང་ངོས་སུ་ཤར་བ་ན།།
                              སེམས་ཀྱི་རང་དབང་འཆི་བ་ཡིན་པ་རྟོགས།།
                                            ༩༨
                             བདག་གི་བླ་དང་སྲོག་གི་གདུང་བ་ནི།།
                             བག་གསར་གདོང་གི་སེང་རས་དེ་ག་ཡིན།།
                             སྲབ་འཇམ་སེང་རས་གང་དེ་བཤུ་བ་ལ།།
                             ནམ་གུང་སྐར་མ་ཚང་རག་བར་དུ་བསྒུག།
                                            ༩༩
                             མི་རྟག་འཆི་བས་གསེར་དངུལ་ལོངས་སྤྱོད་ལ།།
                             བླ་ན་མེད་པའི་རིན་ཐང་མཆོག་ཏུ་བསྩལ།།
                             འཚོ་ཞིང་བཞུགས་རྣམས་རང་གི་ཚེ་སྲོག་གིས།།
                             རིན་བྲལ་ནོར་བུ་བླུ་བའི་སྐལ་བ་བྱུང་།།
                                             ༡༠༠
                            སྤྲིན་དཀར་འདི་ནི་ཧ་ཅང་ཁེངས་སྐྱུང་གིས།།
                            སྔོ་བསང་ནམ་མཁའི་མཐའ་རུ་རྒྱུ་བའི་དུས།།
                            མཚར་སྡུག་འོད་སྟོང་འབར་བའི་སྐྱ་རེངས་ཀྱིས།།
                            དམ་དུ་འཁྱུད་ཅིང་ཀུན་ནས་དམར་བར་བྱས།།
                                              ༡༠༡
                            ས་རྡུལ་འདི་ནི་ཧ་ཅང་ཉམ་ཆུང་སྟེ།།
                            རྒྱུན་ཏུ་གཞན་གྱིས་རྐང་བར་བརྫི་ན་ཡང་།།
                            རང་གིས་བསྐྱངས་པའི་མཛེས་སྡུག་མེ་ཏོག་ཚོགས།།
                            རྣམ་པར་གྲོལ་ནས་དྲིན་ལན་མཇལ་བར་བྱེད།།
                                              ༡༠༢
                            ཉིད་ནི་མེ་ཏོག་དག་གི་མཛེས་སྡུག་ལ།།
                            མ་ཆགས་འགྲུལ་བཞུད་རིང་མོའི་རྒྱུན་སྐྱོང་དང་།།
                            མེ་ཏོག་དག་ནི་ཉིད་ཀྱི་ཁོར་ཡུག་ཏུ།།
                            མཚར་སྡུག་འདབ་སྟོང་ཀུན་ནས་གྲོལ་བར་འགྱུར།།
                                             ༡༠༣
                           རྩ་བ་འདི་ནི་ས་འོག་ཡལ་འདབ་སྟེ།།
                            ཡལ་འདབ་འདི་ནི་དབྱིངས་ཀྱི་རྩེ་མོའོ།།
                                              ༡༠༤
                           དཔྱིད་ཀྱི་དཔལ་མོས་རང་གི་སྒྲ་དབྱངས་ཀུན།།
                           དལ་གྱིས་བསྡུས་ཤིང་ཧ་ཅང་ལྷིང་འཇགས་ངང་།།
                            གཤོག་རྩལ་ངོམ་བཞིན་སྟོན་གྱི་དུས་ཚིགས་ཁྲོད།།
                            རང་གི་སྔར་མལ་གནས་ཚང་འཚོལ་ཞིང་རྒྱུ།།
                                              ༡༠༥
                           ཁྱོད་ཀྱིས་རང་གི་ས་ནས་རང་ཉིད་ཀྱི།།
                           གཟེངས་རྟགས་བླངས་ཏེ་གྲོགས་ལ་མ་གཡོར་ཅིག།
                           དེ་ནི་ཁོ་ལ་བརྙས་བཅོས་ཚད་མེད་ཀྱི།།
                           ར་རིའི་གྲིབ་ནག་གདོང་ལ་བྱུགས་པ་ཡིན།།
                                               ༡༠༦
                          འདས་དོན་དྲན་པའི་ཚོར་བ་དེ་དག་གིས།།
                          བདག་གི་སེམས་པའི་རི་ལུང་དལ་གྱིས་བསྒུལ།།
                          སྔོ་དྲེག་ཆགས་པའི་ལྗན་ལྗིན་ཆུ་བལ་གྱི།།
                          འབྱར་བག་སྡོང་རྒས་སྟེང་ལ་འབྱར་བ་བཞིན།།
                                               ༡༠༧
                          བྲག་ཅས་རང་གི་གདོད་མའི་སྐད་སྒྲ་ལ།།
                          འཕྱ་ཞིང་སྨོད་པའི་ལས་དག་རྩོམ་དོན་ཡང་།།
                          དེ་ནི་རང་གི་སྐད་སྒྲ་དངོས་མིན་པའི།།
                          བདེན་པའི་བཞིན་རས་གསལ་བའི་ཆེད་དུ་ཡིན།།
                                               ༡༠༨
                          སྟོབས་དང་འབྱོར་བས་སྙེམས་པ་དག་གིས་ནི།།
                          རང་ལ་ལྷ་ཡིས་དངོས་གྲུབ་བསྩལ་ལོ་ཞེས།།
                          ངོ་སོའི་གཏམ་གྱི་ཆེ་བ་བརྗོད་པའི་དུས།།
                          ལྷ་ཆེན་ངོ་ཚས་བཞིན་རས་དུད་པར་གྱུར།།
                                              ༡༠༩
                          ངས་ནི་རང་གི་གྲིབ་མ་རང་ཉིད་ཀྱི།།
                          བཤུལ་ལམ་རིང་པོར་དཔར་ཏེ་ཡོང་བ་ནི།།
                          ང་ལ་གཞན་གྱིས་བློ་དོགས་མ་སྐྱེས་པའི།།
                          སྣང་གསལ་འོད་ཀྱི་སྒྲོན་མེ་ཡོད་པས་ཡིན།།
                                              ༡༡༠
                         མི་རྣམས་འདུ་འཛི་ཆེ་བའི་ཁྲོམ་ཚོགས་སུ།།
                         འདུས་ནས་ཕན་ཚུན་འཚང་རྒྱག་བྱེད་དོན་ཡང་།།
                         རང་གི་ཁེར་རྐྱང་འཚོ་བའི་ཁུ་སིམ་དེ།།
                         ཀུན་ནས་སྦ་ཞིང་གསང་བའི་ཆེད་དུའོ།།
                                             ༡༡༡
                         ལས་ཀྱི་རྒུད་པའི་མཐའ་ནི་འཆི་བ་དང་།།
                         ཕུན་ཚོགས་དགེ་བའི་མཐའ་ནི་སངས་རྒྱས་སོ།།
                                            ༡༡༢
                         རྟ་མཆོག་བདུན་གྱིས་འདྲུད་པའི་ཤིང་རྟ་འདིས།།
                         ནམ་རྒྱུན་འོད་ཀྱི་ལྭ་བ་འབའ་ཞིག་མནབས།།
                         ཆུ་འཛིན་དཀར་པོས་སྒེག་པའི་ཉམས་དང་བཅས།།
                         དེ་ལ་མཚར་སྡུག་ལྡན་པའི་སྨད་གཡོགས་སྤྲས།།
                                           ༡༡༣
                         ཕན་ཚུན་མཇིང་བ་བསྣོལ་བའི་རི་རྩེའི་ཚོགས།།
                         བྱིས་པ་སྐོར་ཞིག་འཚོགས་ནས་འུར་ཟིང་ངེར།།
                         ལག་པ་མང་པོ་མཐོན་པོར་ཡར་བསྲིངས་ཏེ།།
                         གནམ་གྱི་སྐར་མ་ལེན་འདོད་དེ་དང་འདྲ།།
                                           ༡༡༤
                         མི་ཚོགས་འཚང་ཁ་ཅི་ལྟར་ཆེ་ན་ཡང་།།
                         ལམ་བུ་འདི་ནི་ཧ་ཅང་ཁེར་རྐྱང་སྟེ།།
                         ནམ་ཡང་ལྷིང་འཇགས་གོས་སུ་གྱོན་པ་ལས།།
                         བརྩེ་བའི་དངོས་པོ་ཐོབ་པའི་སྐལ་བ་ཕྲ།།
                                           ༡༡༥
                         དབང་ཆས་རང་གི་ཆེ་བ་བརྗོད་པའི་དུས།།
                         ནམ་མཁར་ལང་ལོང་རྒྱུ་བའི་སྤྲིན་པ་དང་།།
                         ས་རུ་འཐོར་བའི་སྟོན་ཁའི་སྡོང་ལོ་སོགས།།
                         ཤིན་ཏུ་ཁྲེལ་ཞིང་ཁོང་དགོད་གཏིང་ནས་ཤོར།།
                                             ༡༡༦
                          ས་ཆེན་འདི་ཡིས་དེ་རིང་ཉི་འོད་ཀློང་།།
                          ང་ལ་ཤུབ་བུར་ཅི་ཞིག་ལབ་པ་འདི།།
                          ཐགས་ཁྲིའི་གམ་གྱི་བུ་མོས་བརྗེད་ཟིན་པའི།།
                          གཏམ་ཞིག་གནའ་བོའི་དབྱངས་རྟར་དྲངས་དང་མཚུངས།།
                                              ༡༢༧
                          རྩྭ་ལྗང་འདིས་ནི་རང་ཉིད་རླབས་ཆེན་གྱི།།
                          འཇིག་རྟེན་འདི་རུ་སྐྱེས་པར་ངོམ་སོ་བྱེད།།
                                              ༡༡༨
                          རྨི་ལམ་འདི་ནི་ངེས་པར་གླེང་མོལ་གྱི།།
                          དགོས་མཁོ་ཡོད་པའི་ཆུང་མ་དེ་ག་ཡིན།།
                          གཏུ་མུག་གཉིད་ནི་རེ་ཞིག་འཇམ་ཅག་གེར།།
                          བཟོད་བསྲན་བྱེད་པའི་ཁྱོ་བོ་དེ་རང་ཡིན།།
                                             ༡༡༩
                         མཚན་མོས་འདས་པའི་ཉིན་མོར་འོ་སྦྱོར་བཞིན།།
                         ང་རང་འདས་རྗེས་ཁྱོད་ཀྱི་ཡུམ་ཆེན་དེས།།
                         ཁྱོད་ལ་ཚེ་སྲོག་གསར་བ་སྩོལ་ཏོ་ཞེས།།
                         རྣ་བར་ཤུབ་ཤུབ་འབའ་ཞིག་བཟླ་བར་བྱེད།།
                                             ༡༢༠
                        ཀྱེ་ཀྱེ་མུན་པ་བདག་གིས་སྐུ་ཉིད་ཀྱི།།
                        མཛེས་པ་མྱངས་ཤིང་ཉིད་ཀྱི་མཛེས་པ་དེ།།
                        སྙིང་སྡུག་སྒེག་མོས་སྒྲོན་མེ་གཟིམས་རྗེས་ཀྱི།།
                        སྐད་ཅིག་མ་དེའི་མཛེས་པ་དེ་དང་འདྲ།།
                                             ༡༢༡
                        ངས་ནི་ལོ་ཟླར་འགྲོགས་ནས་བཞུད་ཟིན་པའི།།
                        འཇིག་རྟེན་འདི་ཡི་ཕུན་སུམ་ཚོགས་པ་གང་།།
                        གང་དུ་གནས་ཀྱང་ཐབས་ཤེས་ཟུང་འབྲེལ་གྱིས།།
                        ཕྱི་ཕྱིར་རང་གི་འཇིག་རྟེན་འདི་རུ་དྲངས།།
                                              ༡༢༢
                         ཀྱེ་ཀྱེ་གྲོགས་པོ་བདག་གིས་མཚོ་འགྲམ་ནས།།
                         རླབས་ཀྱི་རང་སྒྲར་ཉན་ཐེངས་རེ་རེ་བཞིན།།
                         ས་སྲོས་དུ་མར་ཉིད་ཀྱི་རླབས་ཆེན་གྱི།།
                         བསམ་བློའི་ལྷིང་འཇགས་ངང་གིས་ཚོར་བར་འགྱུར།།
                                               ༡༢༣
                         ཉ་མོ་དགུང་སྔོན་མཐོན་པོར་འདེགས་པ་དེ།།
                         བྱ་རིགས་རྣམས་ཀྱིས་དགེ་བའི་ལས་སུ་འདོད།།
                                               ༡༢༤
                         ཁྱོད་ཀྱིས་ཟླ་འོད་ཀློང་ནས་རང་ཉིད་ཀྱི།།
                         བརྩེ་བའི་འཕྲིན་ཆུང་བདག་ལ་སྐུར་ཤོག་དང་།།
                         ངས་ནི་མིག་ཆུར་འདྲེས་པའི་འཕྲིན་ལན་དེ།།
                         སྔོ་ལྗང་རྩྭ་ཐང་ཆེན་པོར་བཞག་ཡོད་ཅེས།།
                         མཚན་མོས་ཉི་མ་སེར་པོར་དེ་ལྟར་བརྗོད།།
                                             ༡༢༥
                         སྐྱེས་ཆེན་དག་ནི་སོ་སྐྱེས་འཕགས་པ་དེ།།
                         ལས་ཀྱིས་གནང་བའི་ལྷ་ཡི་སྲས་པོ་ལགས།།
                         གཤེགས་པའི་དུས་ཀྱང་རང་གི་བྱིས་དུས་ཀྱི།།
                         དུས་རབས་འཇིག་རྟེན་འདི་ལ་བཞག་ནས་འགྲོ།།
                                             ༡༢༦
                         གཙང་པོའི་ཀློང་གི་ཆུ་རྡོ་འཇམ་པོ་དེ།།
                         ལྷོད་ཀྱིས་བཞུར་བའི་གཙང་པོའི་མཉེས་གཤིན་གྱིས།།
                         མཛེས་ཤིང་འཇམ་པོར་བཟོས་པ་དེ་མ་གཏོགས།།
                         སྲ་མཁྲེགས་ལྕགས་ལ་བརྡར་ནས་བྱུང་བ་མིན།།
                                             ༡༢༧
                         སྦྲང་མས་སྦྲང་རྩི་བླངས་རྗེས་མེ་ཏོག་ལ།།
                         འགྲོ་ཁར་ཡང་ཡང་ཐུགས་རྗེ་ཞུས་ནས་འགྲོ།།
                         ཕྱེ་ལེབ་དག་ནི་ང་རྒྱལ་རང་སྣང་གིས།།
                         མེ་ཏོག་ཡོང་ནས་བཀའ་དྲིན་འབུལ་བར་སྒུག།
                                              ༡༢༨
                         གལ་ཏེ་ཁྱོད་ཀྱིས་ཡོད་ཚད་བདེན་དོན་གྱི།།
                         གནས་ལུགས་ཟབ་མོ་འཆད་པར་མི་སྒུག་ན།།
                         བདེན་པའི་གཏམ་ཙམ་སྨྲ་བ་དེ་ཁོ་ནར།།
                         དེ་འདྲའི་དཀའ་ལས་ཆེ་བ་མ་མཐོང་ངོ་།།
                                            ༡༢༩
                        “སྲིད”ཀྱིས“མི་སྲིད”པ་ལ་གཏམ་འདྲི་དོན།།
                         “ཁྱེད་ཀྱི་བཞུགས་སྒར་ས་གནས་གང་ཡིན་ལགས”
                         “སྲིད”ཀྱིས་ལན་དུ་“ང་ནི་ནུས་མེད་ཚོའི་།།
                          སྐྱིད་པོའི་རྨི་ལམ་ནང་ན་ཡོད”ཅེས་སྨྲས།།
                                            ༡༣༠
                         གལ་ཏེ་ཁྱོད་ཀྱིས་ཕལ་བའི་གཏམ་གླེང་དག།
                         ཉན་པར་མི་འདོད་གཏན་དུ་བཀག་པ་ན།།
                         བདེན་ལུགས་དག་ཀྱང་དེ་བཞིན་སྒོ་ཆེན་འདིའི།།
                         ཕྱི་རུ་རྒྱང་ཕུད་བཏང་བ་ཁོ་ན་འོ།།
                                             ༡༣༡
                        ང་རང་ནམ་རྒྱུན་གདུང་བས་མནར་སྐབས་སུ།།
                        སེམས་ཀྱི་སྡུག་བསྔལ་མཐའ་དག་ཚོར་ན་ཡང་།།
                        སྡུག་བསྔལ་དེ་རང་བསྐྱེད་པའི་རྒྱུ་དང་རྐྱེན།།
                        ཆུ་བུར་མིག་གིས་བཙལ་ཀྱང་མཐོང་མ་གྱུར།།
                                            ༡༣༢
                       བགས་ཕེབས་སྐབས་ཀྱི་འགུལ་སྐྱོད་དེ་ནི་བྱ་བ་དང་།།
                       ལྷིང་འཇགས་དུས་སུ་རྒྱ་མཚོ་སྐྱོམ་པ་རླབས་ཕྲེང་ངོ་།།
                                            ༡༣༣
                       ལྗང་ལོས་བརྩེ་བ་བསྐྱངས་པས་མེ་ཏོག་བཞད།།
                       མེ་ཏོག་དད་པས་ཕྱུག་པས་འབྲས་བུ་སྨིན།།
                                       ༡༣༤
                       ལྗོན་པའི་རྩ་བ་འདི་ཡིས་ཡལ་འདབ་ལ།།
                       འབྲས་བུ་སྨིན་པར་བརྩེ་བས་བསྐྱངས་ན་ཡང་།།
                       དྲིན་ལ་དྲིན་དུ་མི་ཤེས་དྲིན་ལན་ཀྱང་།།
                       མཇལ་བའི་བློ་དེ་ནམ་མཁའི་པདྨོ་བཞིན།།
                                       ༡༣༥
                      ཆར་བ་ཤག་ཤག་འབབ་པའི་ས་སྲོད་དུ།།
                      འཐོར་རླུང་ངེས་མེད་ལྡང་ཞིང་ལྷིང་འཇགས་དབེན།།
                      བདག་གིས་ལྕུག་ཕྲན་ཕན་ཚུན་གཡོ་བའི་ཚུལ།།
                      མཐོང་བས་སྐྱེ་དངོས་མང་པོའི་ཆགས་འཇིག་དྲན།།
                                       ༡༣༦
                      དོ་ནུབ་ཆར་རླུང་འདི་ནི་སྟོབས་ཆེན་གྱི།།
                      བྱིས་པ་སུ་ཞིག་དུས་མིན་མཚན་སྨག་ཁྲོད།།
                      གཉིད་ལས་སད་དེ་རྩེད་འཇོ་སྣ་ཚོགས་དང་།།
                      ཀུ་ཅོ་བཏོན་ཏེ་འུར་ཟིང་བཟོས་དང་མཚུངས།།
                                        ༡༣༧
                      ཀྱེ་ཀྱེ་རྒྱ་མཚོ་ཁྱེད་ཀྱིས་དྲག་ཆར་གྱི།།
                      མཛའ་མོའི་རྗེས་སུ་རང་གི་བརྩེ་བ་དེའི།།
                      རྦ་རླབས་གཡོས་ཏེ་ཇི་ལྟར་བརྒྱུག་ན་ཡང་།།
                      དེ་ནི་དོན་མེད་ཙམ་དུ་མ་ཟད་དམ།།
                                        ༡༣༨
                      བདག་ནི་ཚུལ་འཆོས་འདི་ལ་ངོ་གནོང་ཞེས།།
                      ཤོག་དཀར་ངོས་ཀྱི་ཡི་གེས་སྨྲས་པ་ན།།
                      ཁྱོད་རང་མཐོང་བས་བདག་ནི་དབུལ་གྱུར་ཚུལ།།
                      སྔར་ལས་རྟོགས་ཞེས་བྱ་བས་ཀུན་ལ་བསྒྲགས།།
                                         ༡༣༩
                      སྐད་ཅིག་མི་སྡོད་འགྲོ་བའི་དུས་ཚོད་འདི།།
                      འགྱུར་བ་མང་ལ་སྐྱེན་པའི་རྒྱུ་འབྱོར་ཡིན།།
                      ཆུ་ཚོད་འཁོར་ལོས་འགྱུར་ལྡོག་ཙམ་མ་གཏོགས།།
                      ལོངས་སྤྱོད་འབྱོར་བའི་ཕྱོགས་ནས་ཅི་ཡང་དབེན།།
                                          ༡༤༠
                      ཆོས་ཉིད་བདེན་པས་གོས་ཆེན་མནབས་པ་དང་།།
                      ཅུང་ཙམ་གཅུན་པའི་སྣང་བ་འཆར་ན་ཡང་།།
                      འཆར་ཡན་ཁྲོད་དུ་རང་གི་འགུལ་སྐྱོད་ནི།།
                      རང་དབང་ལྡན་ལ་ཤིན་ཏུ་སྐྱིད་པར་བསམ།།
                                           ༡༤༡
                      སྔོན་ཆད་གང་སར་འགྲུལ་བཞུད་བྱེད་པའི་སྐབས།།
                      ང་རང་ལམ་བུ་ཁྱོད་ལ་སུན་པ་བྱུང་།།
                      ད་ནི་ཁྱོད་ཀྱིས་གང་སར་ཁྲིད་པ་ཡིས།།
                      ང་རང་ཁྱོད་ལ་དགའ་ཞིང་བརྩེ་བར་གྱུར།།
                                           ༡༤༢
                      སྐར་ཚོགས་རྣམ་པར་བཀྲ་བའི་ཀློང་ཡངས་ནས།།
                      སྐར་མ་ཞིག་གིས་བདག་གི་ཚེ་སྲོག་གི།
                      སྔུན་ནས་ཁྲིད་དེ་མུན་པའི་ལྐོག་གྱུར་གྱི།།
                      འཇིག་རྟེན་འདི་ལས་རིང་དུ་བརྒལ་ན་བསམ།།
                                         ༡༤༣
                      ལྷ་ལྕམ་ཁྱེད་ཀྱི་འཇམ་མཉེན་ཕྱག་སོར་གྱིས།།
                      བདག་གི་ཉེར་སྤྱད་དག་ལ་རེག་ཙམ་ནས།།
                      ཚོར་སྣང་སར་བའི་རྩེ་དགའ་རྒྱས་པ་དང་།།
                      ལྷན་ཅིག་གོ་རིམ་ཡོད་པའི་སྒྲ་དབྱངས་བྱུང་།།
                                         ༡༤༤
                      སྐྱོ་ཞིང་གདུང་བའི་སྐད་སྒྲ་དེ་དག་ནི།།
                      ནམ་ཡང་འདས་པའི་ལོ་ཟླ་དེ་ལ་གཏོགས།།
                      ཡིན་ཡང་ཤིན་ཏུ་གནག་པའི་མུན་ཁྲོད་དུ།།
                      ང་རང་ཁྱེད་ལ་དགའ་ཞེས་བརྩེ་གླུ་ལེན།།
                                         ༡༤༥
                      དྲག་ཏུ་འབར་ཞིང་མཆེད་པའི་མེ་ལྕེ་དེས།།
                      ང་ཡི་ཉེ་སར་བཅར་ནས་མ་ཡོང་གསུངས།།
                      ང་རང་འཚིག་ནས་ཐལ་བར་གྱུར་ན་ཡང་།།
                      དེ་ལས་སྐྱོབ་པའི་དཔུང་གཉེན་མཛོད་ཅིག་ཀྱེ།།
                                         ༡༤༦
                      ཕྱི་རུ་ང་ལ་ཁྲ་ཆིལ་དགུ་ཆིལ་གྱི།།
                      སྐར་ཚོགས་ནམ་མཁའ་གང་གིས་བལྟས་ནས་ཡོད།།
                      འོན་ཀྱང་ང་ཡིས་རང་གི་གཞིས་ཁྱིམ་གྱི།།
                      མར་མེ་དེ་ཡི་འོད་སྣང་མཐོང་མ་བྱུང་།།
                                        ༡༤༧
                     ཤིན་ཏུ་ཉམ་ངར་གྱུར་བའི་ཐ་སྙད་ཀྱི།།
                     རྡུལ་དག་འཚུབ་ནས་ཁྱེད་རང་བསྒྲིབ་གྱུར་ཀྱང་།།
                     ཉིད་ཀྱིས་ཁ་ཁུ་སིམ་ཞིང་ལྷིང་འཇགས་ངང་།།
                     རང་གི་རྣམ་ཤེས་གཙང་མར་འཁྲུད་པར་རིགས།།
                                        ༡༤༨
                     ཚེ་སྲོག་ཁྲོད་དུ་གས་སྲུབས་མང་པོ་ཤོར།།
                     དེ་ལས་འཆི་བའི་སྐྱོ་གདུང་དབྱངས་སུ་མཆེད།།
                                        ༡༤༩
                    འཇིག་རྟེན་འདི་ཡིས་ནམ་ལངས་ཡོས་བུའི་དུས།།
                    བྲང་ཁོག་ཕྱེས་ནས་འོད་ཀྱི་སྙིང་ཆུང་བསྟན།།
                    ཕྱི་རུ་ཐོན་ཤོག་བདག་གི་སེམས་པ་ཀྱེ།།
                    ཁྱེད་ཀྱི་བརྩེ་བ་བསྣམས་ནས་མཇལ་བར་འགྲོ།
                                        ༡༥༠
                    བདག་གི་སེམས་ནི་འོད་དུ་འཚེར་བ་ཡི།།
                    ལྗང་ལོའི་གསེབ་དུ་ལྷག་པར་འོད་དུ་འཚེར།།
                    བདག་གི་སེམས་པར་དྲོད་འཇམ་ཉི་འོད་ཀྱིས།།
                    བྱིལ་བྱིལ་གནང་རྗེས་སྙན་པའི་གླུ་དབྱངས་ལེན།།
        
                    བདག་གི་ཚེ་སྲོག་འདི་དང་ལྷན་ཅིག་ཏུ།།
                    འདུས་བྱས་ཐམས་ཅད་ནམ་མཁའ་སྔོན་པོར་ཐིམ།།
                    དུས་ཀྱི་འཁོར་ལོ་འཁོར་བའི་མུན་ཁྲོད་དུ།།
                    དགའ་ཞིང་སྤྲོ་བས་ཀུན་ནས་མྱོས་པར་གྱུར།།
                                      ༡༥༡
                    སྐྱབས་མཆོག་དེ་ཡི་ཐུགས་རྗེའི་བྱིན་སྣང་ནི།།
                    བསིལ་ཞིང་འཇམ་པའི་རླུང་བུའི་ཁྲོད་དུ་ལས།།
                    དྲག་ཏུ་ལྡང་ཞིང་རྩུབས་སྤྱོད་ཆེ་བ་ཡི།།
                    ཁ་ཆར་རླུང་འཚུབ་ཁྲོད་དུ་ཡོད་པ་མིན།།
                                      ༡༥༢
                    རྨི་ལམ་ཁྲོད་དུ་འདུས་བྱས་དངོས་པོ་དག།
                    གང་སར་རུབ་ནས་ཡོང་སྟེ་ང་རང་མནན།།
                    ཡིན་ཡང་འདི་ནི་འཁྲུལ་སྣང་ཙམ་ཞིག་སྟེ།།
                    རྨི་ལམ་རྨི་ལམ་ཉིད་ལས་མ་འདས་སོ།།
                   ཡིན་ཡང་ང་རང་གཉིད་ལས་སད་པའི་དུས།།
                   དེ་དག་ཐམས་ཅད་ཁྱེད་ཀྱི་ཕྱི་ནང་དུ།།
                   ཀུན་ནས་རུབ་ཅིང་འདུས་པ་ཚོར་བའི་རྗེས།།
                   ང་ལ་གཞི་ནས་རང་དབང་ཐོབ་པར་གྱུར།།
                                    ༡༤༣
                   སུ་ཞིག་བདག་གི་རྒྱུད་འཛིན་ཡིན་ནོ་ཞེས།།
                   ནུབ་ཁའི་ཉི་མས་དེ་ལྟར་དྲིས་པ་ན།།
                   མགོན་ལགས་བདག་གིས་འབད་པས་བསྒྲུབ་བོ་ཞེས།།
                   མར་མེ་དེ་ལྟར་ལན་དུ་ལྡོན་པར་བྱེད།།
                                    ༡༥༤
                   མེ་ཏོག་འདབ་མ་བཏོག་ནས་རྒྱན་སྤྲས་ཀྱང་།།
                   མེ་ཏོག་དེ་ཡི་མཛེས་སྡུག་འཐོབ་མི་འགྱུར།།
                                     ༡༥༥
                  གང་དུ་འོད་དང་སྒྲ་ཡིས་མ་དམིགས་པའི།།
                   ལྷིང་འཇགས་འདི་ནི་སྦས་པའི་སྐད་སྒྲ་དེ།།
                   བྱ་ཚང་དག་གིས་གཉིད་དུ་ཡུར་བ་ཡི།།
                   འདབ་ཆགས་དེ་དག་རུམ་པ་ཉིད་དང་མཚུངས།།
                                     ༡༥༦
                   ཆེན་པོ་དག་ནི་ཆུང་བར་འགྲོགས་ན་ཡང་།།
                   ཕལ་བ་དག་ནི་རིང་དུ་བཀྱེད་ནས་འགྲོ།
                                    ༡༥༧
                  མཚན་ཞག་རིང་མོས་ཧ་ཅང་གསང་བའི་ངང་།།
                  མེ་ཏོག་སར་བའི་ཞལ་འཛུམ་ཕྱེས་ན་ཡང་།།
                  ཉིན་མོ་ཡོང་ནས་དྲིན་གྱི་གཏང་རག་ཏུ།།
                  བསྟོད་པའི་སྙན་ཚིག་མང་པོ་བདག་གིར་བཞེས།།
                                    ༡༥༨
                  དབང་ཐང་གིས་ནི་རང་གི་བསམ་ཚོད་ལ།།
                  རང་གི་ལུས་དང་སྲོག་ཀྱང་བློས་བཏང་ནས།།
                  མྱ་ངན་ཁུར་གྱིས་ནོན་པའི་སྡུག་བསྔལ་དག།
                  རང་ལ་དྲིན་ལན་ལོག་མཇལ་བྱས་པར་འདོད།།
                                   ༡༥༩
                 དང་ཐོག་ང་ཚོས་རང་གི་ཕུན་ཚོགས་ལ།།
                 ཡིད་རབ་ཚིམ་ནས་སྤྲོ་བ་བསྐྱེད་པའི་དུས།།
                 དགའ་སྐྱིད་དགོད་སྒྲ་འབར་བའི་སྒྲ་དབྱངས་ཁྲོད།།
                 ཐོབ་པའི་འབྲས་བུ་དག་དང་བྲལ་བར་འགྱུར།།
                                    ༡༦༠
                 ཆར་བས་ས་གཞི་ཆེན་པོར་འོ་སྦྱོར་གྱིས།།
                 བདག་ཅག་ཁྱེད་ཀྱི་རེ་བའི་ཁྱེའུ་སྟེ།།
                 ད་ནི་ནམ་མཁའ་མཐོན་པོའི་དབྱིངས་རུམ་ནས།།
                 ཉིད་ཀྱི་གཞིས་ཁྱིམ་དྲོན་མོར་འབྱོར་རོ་ཞེས།།
                 ཧ་ཅང་གཅོམ་ཆུང་ངག་གིས་སྨྲ་བར་བྱེད།།
                                    ༡༦༡
                 སྡོམ་གྱི་དྲྭ་རྒྱས་ཟིལ་ཐིགས་འཛིན་པའི་ཚུལ།།
                 མཛད་ཀྱང་དོན་གྱིས་སྦྲང་བུ་དག་བཟུང་ངོ་།།
                                    ༡༦༢
                 ཀྱེ་ཀྱེ་བརྩེ་དུང་ཁྱེད་ཀྱིས་ཕྱག་ཟུང་དུ།།
                 སྐྱོ་བའི་སྒྲོན་མེ་ཐོགས་ཏེ་སླེབས་ཙ་ན།།
                 བདག་གིས་ཁྱེད་ཀྱི་ཞལ་རས་མཐོང་བ་དང་།།
                 ད་དུང་ཁྱེད་ལ་བདེ་སྐྱིད་ལྡན་པ་རྟོགས།།
                                    ༡༦༣
                 མཁས་པའི་ལེགས་བཤད་གསུང་ལ་མ་ཉན་ན།།
                 ནམ་ཞིག་ཁྱོད་ཀྱི་འོད་སྣང་ཡལ་འགྱུར་ཞེས།།
                 སྲིན་བུ་མེ་ཁྱེར་གཏམ་གྱི་ཆེ་བ་ལ།།
                 ནམ་མཁའི་སྐར་མས་ལན་དུ་མ་སྨྲས་སོ།།
                                    ༡༦༤
                ཉི་ཟེར་འོད་ཀྱི་ཁུ་བས་བྲན་པ་ཡི།།
                ས་སྲོད་དུས་ཀྱི་འཛུམ་འོད་གསལ་བའི་ཁྲོད།།
                ཞོགས་པའི་འདབ་ཆགས་ཁྱུ་ཞིག་འཕུར་ཡོང་ནས།།
                བདག་གི་ལྷིང་འཇགས་འཁྱིལ་བའི་ཚང་ལ་བབས།།
                                     ༡༦༥
                ངང་ཁྱུ་གློ་བུར་ནམ་མཁར་འཕུར་བ་ལྟར།།
                བདག་གི་དྲན་པའི་མཚོ་མོ་དྲག་ཏུ་གཡོས།།
                བར་བར་ཁ་ཁུ་སིམ་ཞིང་ལྷིང་འཇགས་དུས།།
                ཕན་ཚུན་གཤོག་འགྱུར་རྡེབ་པའི་སྒྲ་ཡང་ཐོས།།
                                    ༡༦༦
               ཆུ་ཡུར་འདིས་ནི་ཧ་ཅང་སྤྲོ་སྣང་ངང་།།
               གཙང་བོ་དག་ནི་ནམ་ཡང་རང་ཉིད་ཀྱི།།
               ཆེད་དུ་ཉིན་ལ་ཉིན་དང་མཚན་མཐུད་ནས།།
               སྙན་པའི་སྒྲ་དང་བཅས་ཏེ་འབབ་པར་འདོད།།
                                   ༡༦༧
               འཇིག་རྟེན་འདི་ཡིས་སྐྱོ་ཞིང་གདུང་བའི་ངང་།།
               བདག་ལ་བརྩེ་བའི་འོ་སྦྱོར་བྱས་པ་དང་།།
               དེ་ཡི་ལན་དུ་སྙན་པའི་གླུ་སྐད་ཀྱིས།།
               ཕྱི་ཕྱིར་དྲིན་བཟོ་བྱེད་པར་རེ་ཞིང་སྒུག།།
                                   ༡༦༨
               བདག་སེམས་ངལ་བས་དུབ་པའི་གནོན་ཤུགས་དེ།།
               དྲན་པའི་ཕྱི་རུ་འགྲོ་འདོད་རྣམ་ཤེས་སམ།།
               ཡང་ན་རྣམ་ཤེས་དེ་ཡིས་བདག་སེམས་ཀྱི།།
               སྒོ་གླེགས་བརྡུང་སྟེ་ཕེབས་འདོད་ཡིན་ནམ་ཅི།།
                                   ༡༦༩
               བདག་གིས་བསམ་ཞིང་འདོད་པའི་དོན་རྣམས་ནི།།
               རང་གི་ཕ་སྐད་ཕུན་སུམ་ཚོགས་པ་ཡི།།
               སྐད་བརྡའི་འཚོ་བ་རོ་བཅུད་མངར་པོའི་ཀློང་།།
               ལང་ཚོ་རྒྱས་ཤིང་འཚར་ལོངས་བྱུང་བ་ལགས།།
                                  ༡༧༠
               བདག་གི་སེམས་ཀྱི་དཀར་གཙང་ཕོར་བ་རུ།།
               དུས་ཀྱི་ལྷིང་འཇགས་ཞོ་རུ་བསྙལ་བ་ན།།
               གང་ལ་གང་མཐུན་དེ་ལ་དེར་མཐུན་པའི།།
               ལྷད་མེད་བརྩེ་བས་ཡོངས་སུ་གཏམས་པར་གྱུར།།
                                 ༡༧༡
               ཁྱེད་རང་དོན་ཆེན་ལས་ལ་ཞུགས་པ་དང་།།
               མ་ཞུགས་ཕྱི་བཤོལ་བྱས་པ་གང་ཡིན་རུང་།།
               ང་ཚོས་བྱ་བ་དོན་ཆེན་བསྒྲུབ་རན་ཞེས།།
               བརྗོད་དུས་གཞི་ནས་དུས་ཀྱིས་འཕྱིས་པ་ལགས།།
                                ༡༧༢
               ཕལ་བའི་མེ་ཏོག་ཚོགས་རྣམས་རང་ཉིད་ཀྱི།།
               གྲོགས་སུ་བཀུར་བར་ཉི་དགའ་མེ་ཏོག་གནོང་།།
               ཡིན་ཡང་ཁྲི་གདུགས་ཉི་མས་འཛུམ་དམུལ་དམུལ།།
               ང་ཡི་གཅེས་ཕྲུག་ཚོ་ཞེས་འཚམས་འདྲི་བྱེད།།
                                ༡༧༣
              གང་དུ་སུ་ཡིས་ལས་དབང་བཙན་པོ་བཞིན།།
              བདག་ཉིད་མདུན་ནས་མདུན་དུ་སྐྱོད་པར་བྱེད།།
              དེ་ནི་རང་གི་རྒྱབ་ནས་དེད་པ་ཡི།།
              བདག་ཉིད་བདག་གི་མགོན་དེ་མ་ཡིན་ནམ།།
                                ༡༧༤
              སྤྲིན་དཀར་གཡོན་མས་དགྱེས་པའི་འཛུམ་ཞལ་གྱིས།།
              བདུད་རྩིའི་ཆར་རྒྱུན་གཙང་པོའི་ཕོར་བར་དྲངས།།
              རང་ཉིད་གཅིག་པུར་དབེན་པའི་རི་ལ་ཕྱིན།།
              ལྷིང་འཇགས་གོས་སུ་གྱོན་ཏེ་ངལ་གསོ་བསྟེན།།
                                 ༡༧༥
               བགྲོད་ལམ་རིང་པོར་བདག་གིས་རང་ཉིད་ཀྱི།།
               བུམ་ཆུ་ས་ཕྱོགས་ཀུན་ཏུ་གཏོར་ཞིང་ཡོང་།།
               ཁྱིམ་དུ་འབྱོར་རྗེས་ལྷག་མའི་ཆུ་ཐིགས་ཙམ།།
               ལུས་པ་གཞི་ནས་རང་གི་ལོངས་སྤྱོད་དོ།།
                                 ༡༧༦
              ཕོར་བའི་ནང་གི་ཆུ་དེ་འོད་དང་ལྡན།།
              རྒྱ་མཚོའི་ནང་གི་ཆུ་དེ་མུན་པས་གབ།།
              གནས་ལུགས་ཕྲན་བུ་ཡིག་འབྲུས་འཆད་ནུས་ཀྱང་།།
              ཆེན་པོ་དག་ལ་སྨྲ་བ་ཉུང་བར་བྱ།།
                               ༡༧༧
              ཁྱོད་ཀྱི་མཛུམ་མདངས་ཁྱོད་ཀྱི་སྐྱེད་ཚལ་དུ།།
              རྣམ་པར་གྲོལ་བའི་མཛེས་སྡུག་མེ་ཏོག་ཡིན།།
              ཁྱོད་ཀྱི་ཞལ་གསུང་ཁྱོད་ཀྱི་རི་སྒང་དུ།།
              རླུང་གིས་བསྐྱོད་པའི་ནགས་མའི་ཤག་སྒྲ་ཡིན།།
              ཁྱོད་ཀྱི་སེམས་པ་ང་ཚོ་ཀུན་ལ་གསལ།།
              འགྲོགས་ཤིང་འདྲེས་པའི་སྐྱེས་མ་དེ་ཡིན་ནོ།།
                                ༡༧༨
              བདག་ལ་བདོག་པའི་ལེགས་སྐྱེས་ཆུང་ངུ་དེ།།
              རང་ཉིད་དགའ་བའི་སྙིང་གི་མཛའ་མོར་འབུལ།།
              ཤེས་རིག་དཔལ་གྱི་ལེགས་སྐྱེས་ཆེན་པོ་དེ།།
              ལས་ཀྱིས་འབྲེལ་བའི་སྐྱེ་འགྲོ་ཡོངས་ལ་འབུལ།།
                                ༡༧༩
               སྐྱེས་མ་ཁྱོད་ཀྱི་མིག་ཆུའི་ཕྲེང་བ་ཡིས།།
               འཇིག་རྟེན་འདི་ཡི་བརྩེ་སེམས་ཀུན་ནས་བརླན།།
               ཚུལ་འདི་རླབས་ཕྲེང་འཕྱོ་བའི་རྒྱ་མཚོ་མས།།
               ཡངས་པའི་ས་ཆེན་ཀུན་ནས་བསྐོར་བ་བཞིན།།
                                  ༡༨༠
              འཆར་ཀའི་ཉི་གཞོན་འོད་ཀྱི་རྩེ་དགའ་ཅན།།
              བདག་ལ་ཕྱོགས་ཏེ་བརྩེ་བས་འཚམས་འདྲི་བྱེད།།
              སྦྲང་ཆར་སིལ་མའི་སྐྱོ་བའི་ནུ་མོ་དེས།།
              བདག་གི་སེམས་པར་སྙིང་གཏམ་མ་ལུས་བརྗོད།།
                                ༡༨༡
               བདག་གི་ཉིན་མོའི་མེ་ཏོག་འདི་ཡིས་ནི།།
               རང་གི་འདབ་མ་ལྷུང་ནས་འཐོར་བ་བརྗེད།།
               སྲོད་དུས་རྣམ་པར་གྲོལ་བའི་མེ་ཏོག་དེ།།
               ཕྱིར་དྲན་ཁྲོད་ཀྱི་གསེར་མདོག་འབྲས་བུར་གྱུར།།
                                ༡༨༢
               བདག་ནི་མཚན་ལམ་རིང་མོའི་ལམ་ཕྲན་དང་།།
               འདྲ་བར་ཁུ་སིམ་ཁ་རླངས་རྔུབས་པ་དང་།།
               ཕྱིར་དྲན་རིང་མོའི་ཁྲོད་ཀྱི་རྡོག་སྒྲ་ལ།།
               ཞིབ་ཏུ་བསན་ཞིང་རེ་ཞིག་བསམ་པ་ལགས།།
                                ༡༨༣
               བདག་ལ་མཚོན་ན་སྲོད་ཀྱི་ནམ་མཁའ་འདི།།
               སྒེའུ་ཁུང་ཞིག་དང་འདྲ་བར་ཕྱེས་ནས་ཡོད།།
               སྒྲོན་མེ་ཞིག་དང་འདྲ་བར་འབར་ནས་ཡོད།།
               སྒྲོན་མེའི་ངོགས་ཀྱི་རེ་སྒུག་དེ་དང་འདྲ།།
                                ༡༨༤
               དོན་ཆེན་བསྒྲུབ་པའི་སྐྱེ་བོས་ལྡོག་ཕྱོགས་ཀྱི།།
               མི་མཐུན་བྱ་བའི་དུས་ཚོད་རྙེད་མི་ཐུབ།།
                                 ༡༨༥
               བདག་ནི་འབྲས་ལྡན་དུས་ཀྱི་ཆུ་འཛིན་དེ།།
               རེ་ཞིག་བདུད་རྩིའི་ཆར་གྱིས་སྟོང་ན་ཡང་།།
               སྨིན་ལེགས་སྙེ་མ་དུད་པའི་འབྲས་ཞིང་དུ།།
               ད་གཟོད་རང་གི་ཕུན་ཚོགས་དངོས་སུ་མཐོང་།།
                               ༡༨༦
               ཁོ་ཚོས་ཕན་ཚུན་བར་ལ་ཕྲག་དོག་དང་།།
               དམར་གསོད་བྱེད་པར་མི་རྣམས་བསྔགས་བརྗོད་ཐོབ།།
               ཡིན་ཡང་ལྷ་དབང་ངོ་ཚས་མ་བཟོད་པར།།
               རང་གི་མཁྱེན་རབ་རྩྭ་ལོའི་གསེབ་ཏུ་སྦས།།
                                ༡༨༧
               ཞབས་ཟུང་འཁོར་ལོའི་མཛུབ་མོ་འདི་དག་ནི།།
               སྔོན་ཆད་མཁོ་མེད་དོར་བའི་ཕྱག་མཛུབ་ཡིན།།
                                ༡༨༨
               ཤིན་ཏུ་གནག་ཅིང་སྟུག་པའི་མུན་པ་འདིས།།
               ནམ་ཡང་འོད་ཀྱི་ཕྱོགས་སུ་གོམ་ཆེན་སྤོ།།
               དམུས་ལོང་དག་ནི་གཤིན་རྗེའི་གྲོང་ཁྱེར་དུ།།
               ཕན་ཚུན་འགྲན་པ་བཞིན་དུ་རྒྱུགས་པ་ལགས།།
                                 ༡༨༩
              ཁྱི་ཕྲུག་དག་ནི་སྲིད་པའི་ཁམས་ཆེན་པོས།།
              རང་གི་འཇིག་རྟེན་འཕྲོག་པར་སེམས་འཚུབ་སྐྱེ།།
                                 ༡༩༠
               མ་བྲེལ་དལ་བུར་བཞུགས་ཤིག་བདག་སེམས་ཀྱེ།།
               ཉིད་ཀྱིས་དོན་མེད་ས་རྡུལ་མི་གཙུབས་རོགས།།
               འཇིག་རྟེན་འདིས་ཀྱང་སྐུ་ཉིད་གར་བཞུགས་སར།།
               རྐང་བ་འཇོག་སའི་ལམ་ཞིག་བཙལ་ནས་འོངས།།
                                ༡༩༡
               ཉག་ཕྲན་གཞུ་མོའི་ལྟོངས་ལས་གློད་ཁ་མར།།
               གཞུ་མོ་གུག་ནས་ཉག་ཕྲན་མདའ་མོ་ལ།།
               ཁྱོད་ཀྱི་རང་དབང་དེ་ནི་བདག་ཉིད་ཀྱི།།
               རང་དབང་ཡིན་ཞེས་གོ་བའི་གཏམ་དུ་བྱས།།
                               ༡༩༢
              ཀྱེ་ཀྱེ་ལྷ་ལྕམ་ཁྱེད་ཀྱི་བཞད་སྒྲ་ལས།།
              ཚེ་སྲོག་འབྱུང་བའི་དབྱངས་སྙན་འཁྲོལ་བ་ཐོས།།
                                ༡༩༣
               ཡོད་ཚད་ཤེས་རྟོག་ཡིན་པའི་བློ་གྲོས་ནི།།
               ཡུ་བ་མེད་པའི་རལ་གྲི་ངོ་གཉིས་འདྲ།།
               དེས་ནི་རང་ཉིད་སྤྱོད་པའི་སྐྱེ་བོ་དེའི།།
               ལག་པར་ཁྲག་དང་བཅས་པའི་རྨ་ཤུལ་བཟོ།།
                              ༡༩༤
               ལྷ་ཆེན་རང་གི་སྐར་མ་འོད་ཆེན་ལས།།
               མི་ཡུལ་ཁམས་ཀྱི་སྒྲོན་མེར་ལྷག་ཏུ་དགྱེས།།
                              ༡༩༥
               འཇིག་རྟེན་འདི་ནི་དྲག་ཆར་རླུང་འཚུབ་ཀྱིས།།
               ཀུན་ནས་གཅུན་པའི་གོ་ལ་དེ་ཡིན་ཡང་།།
               མཛེས་སྡུག་སྙན་འཇེབས་ལྡན་པའི་རོལ་དབྱངས་ཀྱིས།།
               དེ་དག་མ་ལུས་ཞི་བའི་དབྱིངས་སུ་བཏེགས།།
                              ༡༩༦
               མཚམས་སྤྲིན་ན་རེ་ཀྱེ་ཀྱེ་ཉི་གཞོན་ལགས།།
               བདག་གི་སེམས་ལ་ཉིད་ཀྱི་འོད་ཕོག་པས།།
               ད་ནི་བདག་གི་རང་སེམས་འོད་གསལ་བ།།
               གསེར་གྱི་རྟེན་སྒམ་ཞིག་དང་གཉིས་སུ་མེད།།
                               ༡༩༧
               ཉེ་སར་བཅར་ཚེ་ཁྱེད་རང་གསོད་སྲིད་ཅིང་།།
               རྒྱང་དུ་བགྱེད་ཚེ་ཁྱེད་རང་འཐོབ་ཀྱང་སྲིད།།
                                ༡༩༨
               འཛིང་འབུའི་ཙི་སྒྲ་ཆར་བའི་ཤག་སྒྲ་སོགས།།
               མཚན་སྨག་རིང་པོར་བདག་གི་རྣ་བར་ཟུག།
               ཚུལ་དེ་བྱིས་པའི་དུས་ཀྱི་འདས་དོན་དག།
               སླར་ཡང་རྨི་ལམ་ཡུལ་དུ་བྱོན་པ་འདྲ།།
                               ༡༩༩
               མཚར་སྡུག་འདབ་སྟོང་གྲོལ་བའི་མེ་ཏོག་དག།
               སྐར་ཚོགས་ཡལ་བའི་ནམ་མཁར་གདོང་ཕྱོགས་ཏེ།།
               བདག་གི་ཟིལ་ཐིགས་མ་ལུས་འཐོར་རོ་ཞེས།།
               འཇིག་རྟེན་མྱ་ངན་འོ་དོད་དབྱངས་སུ་གྱེར།།
                              ༢༠༠
               དམར་ནག་མེ་ཡིས་བསྲེག་པའི་བུད་ཤིང་ལས།།
               ཚ་བའི་མེ་ལྕེ་དྲག་ཏུ་མཆེད་པ་ལ།།
               འདི་ནི་བདག་གི་མཛེས་པའི་མེ་ཏོག་དང་།།
               མཐའ་མའི་འཆི་བ་ཡིན་ཞེས་གཏམ་དུ་བྱ།།
                               ༢༠༡
               དུག་སྦྲང་གིས་ནི་རང་གི་ཁྱིམ་མཚེས་ཀྱི།།
               སྦྲང་མའི་གཞིས་ཁྱིམ་ཆུང་བར་དོགས་པ་སྐྱེས།།
               འོན་ཀྱང་སྦྲང་མའི་ཚོགས་ཀྱིས་དུག་སྦྲང་ལ།།
               ཁང་བ་དེ་ལས་ཆུང་བ་བསྐྲུན་པར་གདམས།།
                                 ༢༠༢
               མཚོ་འགྲམ་ན་རེ་ཀྱེ་ཀྱེ་གཙང་པོ་ལགས།།
               བདག་གིས་ཁྱེད་ཀྱི་མཛེས་པའི་རླབས་རིས་དེ།།
               ཅིས་ཀྱང་གཟུང་བར་ནུས་པ་མིན་ན་ཡང་།།
               སེམས་ཀྱི་ལོངས་སྤྱོད་ཁོ་ནར་དབང་བར་འཚལ།།
                                   ༢༠༣
               དཀར་གསལ་ཉིན་མོ་འོད་དང་ལྡན་པ་འདིས།།
               ས་ཡི་གོ་ལའི་འུར་ཟིང་དང་བསྟུན་ནས།།
               སྟོང་ཁམས་ཆེན་མོའི་མཐའ་མེད་ལྷིང་འཇགས་ལ།།
               མི་མཐུན་གནོད་པའི་ལས་དག་བྱེད་པར་བརྩམས།།
                                   ༢༠༤
               ནམ་མཁའ་སྔོན་པོ་གཡུ་ཡི་གུར་ཁང་དུ།།
               སྙན་པའི་གཞས་ལ་ཕ་མཐའ་མེད་པ་ཚོར།།
               དོགས་མོ་ས་གཞི་ཡངས་ཤིང་ཆེ་བ་འདིར།།
               མཛེས་པའི་རི་མོ་བསམ་པའི་ཡུལ་ལས་འདས།།
               སྙན་ངག་གནམ་ས་གང་ལ་མི་ལྟོས་པར།།
               ཐ་སྙད་ཕུན་སུམ་ཚོགས་ཤིང་ཚིག་གྲུབ་མཛེས།།
               འགུལ་སྐྱོད་ལྡན་ཞིང་འཕུར་སྐྱོད་ནུས་པ་ཡི།།
               སྙན་པའི་རོལ་མོ་འཇིག་རྟེན་ཀུན་ཏུ་འཁྲོལ།།
                                   ༢༠༥
               འགྲོ་བའི་ཉི་མ་གསེར་གྱི་འོད་རིས་ཅན།།
               ནུབ་ཕྱོགས་མངོན་དགའི་རི་ལ་ཕྱོགས་པའི་དུས།།
               ཤར་ཕྱོགས་སྐྱ་རེངས་སྒེག་མོ་ཁུ་སིམ་མེར།།
               མདུན་དུ་འགྲེང་ནས་བསུ་བ་བྱེད་པ་མཐོང་།།
                                   ༢༠༦
               ཁོ་བོ་ནོར་འཁྲུལ་དང་བཅས་རང་ཉིད་ཀྱི།།
               རང་ཚུགས་མེད་པའི་འཇིག་རྟེན་འདིར་བཞག་སྟེ།།
               གཞན་དག་བོས་ནས་བདག་ལ་དགག་བཞག་དང་།།
               ཁྱད་གསོད་བྱེད་པའི་ལས་དག་སྤོངས་རོགས་ཀྱེ།།
                                   ༢༠༧
               སྙན་པའི་གཏམ་གྱི་ངོ་སོ་འདི་དག་གིས།།
               བདག་ནི་ངོ་ཚས་ཀུན་ནས་དུད་པར་བྱས།།
               དྲང་པོའི་གཏམ་གྱི་བདེན་པ་འདི་ལྟ་སྟེ།།
               བདག་གིས་ལྐོག་ཏུ་དེ་ལ་རེ་ཞིང་བསྒུག།
                                   ༢༠༨
               བདག་གིས་རེ་ཞིག་ངལ་གསོ་བསྟེན་པའི་དུས།།
               ཟང་ཟིང་བྱ་བས་སུན་པོ་མི་བཟོ་རོགས།།
               ས་སྲོད་དུས་ཀྱི་རྒྱ་མཚོའི་ལྷིང་འཇགས་བཞིན།།
               བདག་ལ་བར་ཆད་ཅི་ཡང་མེད་པར་ཞུ།།
                                   ༢༠༩
               ཀྱེ་ཀྱེ་ལང་ཚོ་དར་བབས་གཞོན་ནུ་མ།།
               ཁྱོད་ཀྱི་ལྷད་མེད་མཆོག་གི་བརྩེ་བ་དེ།།
               དྭངས་བའི་མཚོ་ལ་གསལ་བའི་ཟླ་བ་བཞིན།།
               དྲི་མེད་གཤིས་ཀྱི་མེ་ཏོག་ཀུན་ནས་འཛུམ།།
                                    ༢༡༠
               དངོས་པོའི་རང་བཞིན་ཕུན་སུམ་ཚོགས་པ་དེ།།
               རང་ཉིད་གཅིག་པུར་འཛོམས་པ་མ་ལགས་ཏེ།།
               རྒྱུ་རྐྱེན་རྟེན་འབྲེལ་མང་པོ་མཉམ་གཅིག་ཏུ།།
               འཛོམས་པས་ད་གཟོད་ཕུན་སུམ་ཚོགས་པ་ལགས།།
                                       ༢༡༡
              ལྷ་ཆེན་མཆོག་གི་ཕྱག་གཡས་བྱམས་བརྩེ་ཡི།།
               རི་མོ་མངོན་པར་གསལ་བ་དེ་ཡིན་ཡང་།།
               འོན་ཀྱང་ཁོང་གི་ཕྱག་གཡོན་གདུག་རྩུབས་ཀྱི།།
               རལ་གྲིའི་སོ་ཁ་རྣོ་བ་དེ་ཡིན་ནོ།།
                                   ༢༡༢
               བདག་གི་མཚན་ལྗོངས་རིང་མོ་རྒྱུས་མེད་ཀྱི།།
               ནགས་ཚལ་སྟུག་པོ་བརྒྱུད་ནས་སླེབས་པ་དང་།།
               སྐར་མའི་ཚོགས་དག་ཧ་ཅང་ལྷིང་འཇགས་ངང་།།
               མི་གསལ་ལྡབ་ལྡིབ་འབའ་ཞིག་སྨྲ་བར་བྱེད།།
                                   ༢༡༣
               མཚན་མོའི་སྨག་རུམ་འདི་ནི་གཡང་ཁུག་སྟེ།།
               དེ་ལས་སྐྱ་རེངས་སྒེག་མོའི་གསེར་འོད་འཚེར།།
                                   ༢༡༤
               རིང་ནས་བདག་གི་ཡིད་ལ་འདོད་པའི་དོན།།
               ཁ་དོག་སྣ་ལྔའི་མཛེས་སྡུག་འཇའ་ཚོན་བཞིན།།
               བརླན་དང་སྨུག་པས་བཟུང་བའི་མི་ཚེ་ལ།།
               ལན་ཅིག་གཡོར་བའི་སྐལ་བ་དེ་རིང་བྱུང་།།
                                   ༢༡༥
               སྐྱེ་བོ་རྣམས་ཀྱི་ལག་ཏུ་ཐོགས་པ་ཡི།།
               མཛེས་སྡུག་རྣམ་པར་གྲོལ་བའི་མེ་ཏོག་དེ།།
               མཆོད་པའི་རྫས་ཀྱི་ཚུལ་དུ་ཕྱིར་ལེན་པར།།
               ལྷ་ཆེན་མཆོག་ནི་རེ་ཞིང་སྒུག་པ་ལགས།།
                                   ༢༡༦
               ང་ཡི་སེམས་ཀྱི་གདུང་སེམས་ཟབ་མོ་འདིས།།
               ང་རང་ཡོངས་སུ་བཅིངས་ཏེ་དམ་དུ་བསྡམས།།
               ད་དུང་ང་ཡི་མཚན་ལ་ཅི་ཟེར་ཞེས།།
               བདག་ལ་ཚིག་མགོ་བསྐོར་ནས་འདྲི་བར་བྱེད།
                                  ༢༡༧
               མེ་ཏོག་རྣམས་ནི་མཛེས་སྡུག་འདབ་སྟོང་གྲོལ།
               འབྲས་བུའི་ཚོགས་དག་ཕུན་ཚོགས་སྙེ་མས་དུད།།
               འོན་ཀྱང་བདག་ལ་འདབ་ལོའི་ཁེངས་སྐྱུང་གི།
               གྲིབ་བསིལ་སྩོལ་བའི་དངོས་གྲུབ་གནང་བར་ཞུ།།
                                  ༢༡༨
               བདག་གི་རང་ཚུགས་མེད་པའི་སེམས་པ་འདིས།།
               རླུང་བུ་ལྡོམ་པོ་ཞིག་ལ་ཁ་གཏད་དེ།།
               དེ་ཡི་གཡོར་གྲུ་མཐོན་པོར་བཏེགས་པ་དང་།།
               རྒྱུས་མེད་གླིང་ཕྲན་ཞིག་ཏུ་བསྐྱོད་པར་བརྩམས།།
                                 ༢༡༩
               རྗེ་བོ་ངན་པ་གཏུམ་དྲག་ཆེ་ན་ཡང་།།
               འབངས་ཀྱི་སེམས་ནི་བྱམས་བརྩེའི་འོད་ཀྱིས་ཁེངས།།
                                 ༢༢༠
               ཀྱེ་ཀྱེ་ང་རང་ཉིད་ཀྱི་ལྷུང་བཟེད་དུ།།
               སྤྲུལ་བསྒྱུར་ཆོག་པའི་གདམས་པ་གནང་བར་ཞུ།།
               བདག་གིས་ཁྱེད་དང་ཁྱེད་ཀྱི་ནང་མིའི་སླད།།
               ལྷུང་བཟེད་གཙང་མའི་ཆབ་ཀྱིས་བཀང་ཡང་ཆོག།
                                   ༢༢༡
               ས་ཆེན་འདིས་ནི་དྲག་ཆར་རླུང་འཚུབ་ཀྱི།།
               བརྩེ་བའི་དངོས་པོ་ཉམས་སུ་མ་བཞེས་པས།།
               སྐྱོ་ཞིང་གདུང་བས་མནར་བའི་ལྷ་ཆེན་བཞིན།།
               མི་འདོད་སྨྲེ་ངག་ཀུན་ཏུ་སྒྲོག་པར་བྱེད།།
                                 ༢༢༢
               འཇིག་རྟེན་ཆེན་པོ་འདི་ཉིད་གཙང་པོ་ལྟར།།
               བཞུར་ནས་ཚར་ཏེ་སྟོང་བར་ག་ལ་འགྲོ།།
               འཆི་བ་ཞེས་པའི་རྒོད་པོ་མཐུར་མེད་འདི།།
               གོས་ཀྱི་སྲུབས་ཀ་ཞིག་ཀྱང་མིན་པས་སོ།།
                                ༢༢༣
               རིན་ཆེན་ཚེ་སྲོག་འདི་ཡིས་བརྩེ་བ་དོར།།
               དེ་བས་སྔར་ལས་ཕུན་སུམ་ཚོགས་པར་གྱུར།།
                                ༢༢༤
               གྲོགས་པོ་ཁྱོད་ཀྱི་རྨད་བྱུང་སེམས་བསྐྱེད་དེ།།
               དབང་ཕྱོགས་ལྷུན་པོར་འཕགས་པའི་ཉི་གཞོན་བཞིན།།
               སྐྱ་རེངས་གསལ་བའི་ཁྲོད་དུ་ཁེར་རྐྱང་ངང་།།
               བཞུགས་པའི་དངུལ་དཀར་གངས་རི་དེ་དང་འདྲ།།
                                 ༢༢༥
               མྱང་འདས་ཆུ་མིག་དག་གིས་ཁུ་སིམ་ངང་།།
               དབེན་འཇགས་གོས་སུ་གྱོན་པའི་གཙང་པོ་དག།
               ཡོངས་སུ་སྡུད་ཅིང་གསོན་ཤུགས་འབར་བ་ཡི།།
               ཚེ་སྲོག་གསར་བའི་དབུགས་རྒྱུན་སྩོལ་བར་བྱེད།།
                                 ༢༢༦
               ཀྱེ་ཀྱེ་བདག་གི་སྐྱབས་མགོན་དམ་པ་ཀྱེ།།
               འབྱོར་བས་ཕྱུག་ཀྱང་སེམས་ཁམས་སྟོང་བའི་མིས།།
               སེམས་ཁམས་སྟོང་ཡང་འབྱོར་བས་ཕྱུག་པ་ཚོར།།
               འཕྱ་སྨོད་དང་བཅས་ཁྲེལ་དགོད་བྱེད་པར་ཐལ།།
                                  ༢༢༧
               ཚེ་སྲོག་གསར་བའི་འགུལ་སྐྱོད་དེ་ཉིད་ཀྱིས།།
               རང་གི་རོལ་དབྱངས་ཁྲོད་དུ་ངལ་གསོ་བསྟེན།།
                                 ༢༢༨
               རྐང་བས་ས་རྡུལ་གཙུབ་པ་ཙམ་ཞིག་ལས།།
               རང་ལ་འཐོབ་བྱ་ཅི་ཡང་ཡོད་མ་ཡིན།།
                                 ༢༢༩
               ང་ཚོའི་རུས་མིང་དག་ནི་མཚན་ལྗོངས་ཀྱི།།
               རྒྱ་མཚོའི་རླབས་གཉེར་ངོས་ཀྱི་འོད་ཐིག་བཞིན།།
               ཐེངས་གཅིག་གསལ་ཞིང་འཚེར་བ་དེ་ཡི་རྗེས།།
               ཅང་མེད་སྟོང་བའི་དབྱིངས་སུ་ཡལ་ཏེ་འགྲོ།
                                  ༢༣༠
               རིག་རིག་མིག་གིས་རྒྱ་སེའི་མེ་ཏོག་གི།
               མཛེས་སྡུག་ལོངས་སུ་སྤྱོད་པ་དེ་དག་གིས།།
               མེ་ཏོག་དེ་ཡི་གཟེངས་ཤིང་རྣོ་བ་ཡི།།
               ཚེར་མ་དག་ཀྱང་མཉམ་དུ་མཐོང་བར་མཛོད།།
                                 ༢༣༡
               དགུང་སྔོན་མཐོན་པོ་བསྟོད་པའི་རྒོད་པོ་དེའི།།
               གཤོག་པར་གསེར་ཆུས་བྱུགས་པ་དེ་ནས་བཟུང་།།
               མཛེས་པའི་གཤོག་འགྱུར་ངོམ་པའི་སྟོབས་དང་བྲལ།།
               རིག་རིག་མིག་གིས་ཡང་ཡང་ནམ་མཁར་བལྟ།།
                                  ༢༣༢
               བདག་གི་ཕ་སའི་མཛེས་སྡུག་མེ་ཏོག་དེ།།
               རྒྱུས་མེད་ཡུལ་ལུང་དག་ཏུ་བཞད་པ་ན།།
               ཞིམ་པོའི་དྲི་བསུང་སྔར་བཞིན་འཐུལ་ན་ཡང་།།
               དེ་ཡི་མིང་ལ་ཐ་སྙད་གཞན་ཞིག་འབོད།།
                                   ༢༣༣
               སེམས་ཀྱི་ཡུལ་ལྗོངས་ཕ་མཐའ་མི་མངོན་པས།།
               བར་ཐག་དུས་དང་ཡུལ་གྱིས་བསྐལ་བར་གྱུར།།
                                    ༢༣༤
               དཀར་གསལ་བཅོ་ལྔའི་དུང་གི་ཟླ་བ་འདིས།།
               བདུད་རྩིའི་འོད་སྣང་དགུ་ཚིགས་ངོགས་སུ་སྤྲོས།།
               མུན་པ་དགུ་རྩེགས་འཐིབ་པའི་ཁེར་རྐྱང་གི།།
               མྱ་ངན་ཐིག་ལེ་རང་ཉིད་ཁོ་ནར་བཞག།
                                 ༢༣༥
               འདི་ནི་ཞོགས་པ་རེད་ཅེས་མི་གསུང་རོགས།།
               ཁ་སང་སྤྱད་པའི་ཐ་སྙད་མི་འདོར་རོགས།།
               ཉིད་ཀྱིས་ཐོག་མར་མཐོང་བ་ཡིན་པའི་ཕྱིར།།
               འདི་ལ་མིང་དུ་གདགས་པར་མི་མཛད་དེ།།
               ཁྱེའུ་འུ་ཉམ་ཆུང་ཞིག་ཏུ་བལྟ་བར་འཚལ།།
                                ༢༣༦
               དུད་སྤྲིན་ནག་པོ་འཕྱུར་ཏེ་ནམ་མཁའ་འགེངས།།
               རླུང་ནག་འཚུབ་མའི་རྡུལ་གྱིས་ས་གཞི་གཡོགས།།
               དེ་དག་ད་དུང་རང་ཉིད་དམར་ནག་གི།
               མེ་ཡི་གྲོགས་མཆོག་ཡིན་པར་རང་ཉིད་འདོད།།
                                ༢༣༧
               ང་རང་ནམ་ཡང་སེམས་ནས་མ་འདོར་ཅེས།།
               བདུད་རྩིའི་ཆར་ཐིགས་ཡོང་ནས་ཞུས་པ་ན།།
               བ་སྤུའི་རོལ་བ་འཛིན་པའི་མ་ལི་ཀ།།
               ཤུགས་རིང་དང་བཅས་ཀུན་ནས་འཐོར་བར་གྱུར།།
                                  ༢༣༨
               མངོན་ཆུང་དབྱིངས་སུ་གབ་པའི་ཚོར་བ་ཀྱེ།།
               བདག་ལ་དེ་འདྲའི་ཞེད་སྣང་མི་དགོས་ཏེ།།
               བདག་ནི་ཐ་སྙད་མང་པོར་ཚིག་རྒྱན་གྱི།།
               གོས་ཆེན་བཟོ་བའི་སྙན་ངག་པ་ཞིག་ལགས།།
                                  ༢༣༩
               བདག་གི་སེམས་ཀྱི་ལྷིང་འཇགས་རིང་མོ་ལ།།
               ཟ་ཟིའི་འུར་ཟིང་སྒྲ་དབྱངས་སྒྲོག་པ་ནི།།
               འོད་ཀྱིས་རྣམ་པར་སྦྲུམ་པའི་སྐྱ་མདོག་གི།
               དབྱངས་རྟ་ཞིག་གིས་ཀུན་ནས་འཁྱུད་པ་འདྲ།།
                                   ༢༤༠
               མེ་ཏོག་རྣམ་པར་བཀྲ་བའི་མཛེས་སྡུག་གི།
               མེ་སྟག་འཚུབ་པའི་ཤོག་སྦགས་འདི་དག་གིས།།
               དབྱིངས་ཀྱི་སྐར་མའི་ཚོགས་ལ་བསྙད་བསྐོས་རྗེས།།
               རང་ཉིད་རང་གི་བེམ་པོར་འགྲོགས་ནས་ལྷུང་།།
                                    ༢༤༡
               ཁྱོད་ཀྱིས་ང་རང་ཁྲིད་དེ་འདུ་འཛི་དང་།།
               འཁྲུག་ཆ་དོད་པའི་བདག་གི་ཉིན་མོ་བརྒལ།།
               ས་སྲོད་བརྒྱུད་དེ་མཚན་མོའི་ལྷིང་འཇགས་ཀྱི།།
               དོན་སྙིང་ངོ་མ་བཙལ་བར་སྒུག་དུ་བཅུག།།
                                  ༢༤༢
               མི་ཚེ་འདི་ནི་རྒྱ་མཚོར་བརྒལ་བ་བཞིན།།
               ང་ཚོ་ཚང་མ་གྲུ་ཆུང་གཅིག་ཏུ་འཛོམས།།
               མི་རྟག་འཆི་བ་ཞེས་པའི་མཚོ་འགྲམ་ལ།།
               ཐོན་རྗེས་ཕན་ཚུན་སོ་སོར་བྲལ་བར་གྱུར།།
                                 ༢༤༣
               བདེན་པའི་ངོ་བོ་གསལ་ཞིང་དྭངས་པ་ཡི།།
               འཐུང་ན་མི་མཐུན་མེད་པའི་ཆུ་ཕྲན་དེ།།
               ནོར་འཁྲུལ་སྟོང་གིས་ཕྱུག་པའི་ཆུ་རྐའི་ནང་།།
               ནམ་ཡང་གྲག་མེད་དལ་གྱིས་བཞུར་དགོས་བྱུང་།།
                                  ༢༤༤
               དེ་རིང་གློ་བུར་སེམས་ཀྱི་བུ་ཆུང་འདིས།།
               ཕ་ཡུལ་དྲན་པའི་གདུང་བ་དྲག་ཏུ་ཕྱིན།།
               དུས་ཀྱི་རྒྱ་མཚོ་བརྒལ་བའི་བདེ་སྐྱིད་ཀྱི།།
               དུས་དེར་ཕ་ཡུལ་འདི་ཉིད་ལྷག་ཏུ་དྲན།།
                                 ༢༤༥
               ཡངས་པའི་མཁའ་རུ་གཤོག་འགྱུར་ལ་བྲེལ་བའི།།
               འདབ་ཆགས་ཚོགས་ཀྱི་ཀྱུར་ཀྱུར་གླུ་སྐད་དེ།།
               སྐྱ་རེངས་སྒེག་མོས་གསེར་ལྡན་འཛིན་མའི་གཞིར།།
               བཞག་པའི་དུས་ཀྱི་སྙན་འཇེབས་བྲག་ཅ་ལགས།།
                                 ༢༤༦
               ཁྱོད་རང་ང་རྒྱལ་ཁེངས་དྲེགས་ཆེ་བ་ཡིས།།
               བདག་ལ་འོ་སྦྱོར་ཞིག་ཀྱང་རང་ཉིད་ཀྱི།།
               ངོ་ཚར་རྩི་བ་འདི་ནི་ཅི་ཞིག་ཅེས།།
               ཞོགས་པས་མེ་ཏོག་ལྕེ་ཚར་ཅོ་འདྲི་བྱེད།།
                                 ༢༤༧
               མེ་ཏོག་སེར་ཆེན་ན་རེ་ཉི་མ་ལགས།།
               བདག་གིས་ཁྱེད་ལ་བསྙེན་བཀུར་ཅི་ལྟར་བགྱི།།
               ཉི་མས་ལན་དུ་ཉིད་ཀྱི་རྣམ་དག་གི།།
               བརྩེ་བས་ལྷིང་འཇགས་ངང་དུ་བཞུགས་པས་ཆོག།
                                  ༢༤༨
               དལ་བརྒྱད་འབྱོར་བཅུའི་ལུས་རྟེན་རིན་པོ་ཆེ།།
               ཐོབ་ནས་སྙིང་རྗེའི་སེམས་དང་ལྡན་པ་ཡི།།
               མི་རྣམས་དུས་ཀྱིས་གཅན་གཟན་ལ་འགྱུར་སྐབས།།
               གཅན་གཟན་ལས་ཀྱང་གདུག་རྩུབས་ཆེ་བར་མཐོང་།།
                                  ༢༤༩
               རྔམས་ནག་ཆུ་འཛིན་འཐབ་པའི་རོལ་གར་ལ།།
               ཁྲི་གདུགས་ཉི་མའི་བྱམས་བརྩེ་ཕོག་པ་ན།།
               ད་གཟོད་ནམ་མཁའི་དབྱིངས་ཀྱི་མེ་ཏོག་ཏུ།།
               འགྱུར་ཞིང་མཛེས་སྡུག་གར་གྱི་རི་མོར་འགྱུ།།
                                   ༢༥༠
               རྣོ་དང་དབལ་གཉིས་ཅི་ལྟར་འཛོམས་ཡང་རུང་།།
               རལ་གྲིའི་སོ་ཁས་རང་ལ་གཏོགས་པ་ཡི།།
               གྲི་ལྟག་རྟུལ་བར་རང་ཉིད་གླེན་སྤྱོད་ཀྱི།།
               ཁྲེལ་དགོད་དེ་དག་གནང་བ་མི་རིགས་སོ།།
                                   ༢༥༡
               མཚན་མོའི་དུས་ཀྱི་ལྷིང་འཇགས་རིང་མོ་འདི།།
               མར་མེ་ཚེ་འབར་ཞིག་དང་གཉིས་སུ་མེད།།
               ནམ་མཁའ་ཕྱེད་དུ་གཏུབ་པའི་དགུ་ཚིགས་འདི།།
               དེ་ཡིས་བསྒྲོན་པའི་འོད་ཀྱི་ཟེར་མ་ལགས།།
                                  ༢༥༢
               དུས་ཀྱིས་དེད་པའི་མི་རྟག་འཆི་བ་འདི།།
               རྒྱ་མཚོ་ཆེན་པོའི་མཚམས་མེད་གླུ་སྒྲར་རྟོག།
               ཉིན་ལ་མཚན་མཐུད་མཚན་ལ་ཉིན་མཐུད་ནས།།
               ཚེ་དང་སྲོག་གི་འོད་ཟེར་ཁོ་ནར་རྡེག།
                                  ༢༥༣
               མེ་ཏོག་འདབ་མ་རྣམ་པར་གྲོལ་བ་ལྟའི།།
               རི་རྩེ་འདི་ཡིས་ཉི་མའི་འོད་སྣང་འཐུང་།།
               གཡོ་མེད་ཏིང་འཛིན་རོལ་བའི་ས་འཛིན་འདི།།
               མཛེས་པའི་མེ་ཏོག་ཅིག་དང་མི་འདྲའམ།།
                                 ༢༥༤
               ཆོས་ཉིད་བདེན་པའི་ནམ་མཁའ་སྔོ་བསངས་མར།།
               དོན་དམ་ལོག་པའི་སྤྲིན་ནག་འཁྲུགས་པ་དང་།།
               དངོས་པོའི་གཤིས་ཀྱི་ཆོས་ཉིད་ལྡོག་གྱུར་ཚེ།།
               བདེན་པའི་གཞུང་ལུགས་དག་ཀྱང་རྫུན་པར་འགྱུར།།
                                ༢༥༥
               ཀྱེ་ཀྱེ་གསོན་དང་བདག་གི་སེམས་པ་ལགས།།
               འཇིག་རྟེན་འགུལ་སྐྱོད་ཁྲོད་ནས་རང་ཉིད་ཀྱི།།
               མཛེས་སྡུག་ཚོལ་དང་དེ་ནི་གྲུ་ཆུང་ཞིག།
               རླུང་དང་གཙང་པོར་རྒྱུ་བའི་རོལ་སྒེག་འདྲ།།
                              ༢༥༦
               འདྲེན་བྱེད་ཟུང་འདིས་རང་གི་མྱོང་སྟོབས་ཀྱི།།
               ཤེས་པ་དེ་ལ་ང་རྒྱལ་མི་སྐྱེ་བར།།
               ཆེད་དུ་སྦྱར་བའི་གདོང་གི་མིག་ཤེལ་ལ།།
               ང་རྒྱལ་རང་སྣང་གཞན་ལས་མཐོ་བར་བྱེད།།
                               ༢༥༧
               བདག་ནི་རང་གི་འཇིག་རྟེན་ཆུང་ཆུང་འདིར།།
               བདེ་བར་འཚོ་ཡང་འདི་ཉིད་ཇེ་ཆུང་དུ།།
               འགྱུར་བར་ཧ་ཅང་སྐྲག་པས་ལྷ་ཆེན་ལགས།།
               ཁྱོད་ཀྱིས་བདག་ནི་རང་གི་འཇིག་རྟེན་དུ།།
               དྲངས་ཏེ་རང་དབང་བདེ་སྐྱིད་ལྡན་པའི་ངང་།།
               འདས་དོན་ཡོད་ཚད་བརྗེད་པའི་གནང་བ་སྩོལ།།
                                 ༢༥༨
               ཟོལ་གྱིས་བཅོས་པའི་འཆོལ་མོའི་འཛུམ་དཀར་དེ།།
               ནམ་ཡང་དབང་ཤུགས་འོག་ནས་རྫུན་པར་འགྱུར།།
                                ༢༥༩
               བདག་གི་སེམས་པ་འདི་ནི་གང་ཉིད་ཀྱི།།
               གླུ་ཆུང་དབྱངས་སུ་གྱེར་བའི་རླབས་འགྲོས་ཁྲོད།།
               ཉི་འོད་ངོམས་མེད་འཐུང་བའི་ལྗང་མདོག་གི།
               འཇིག་རྟེན་འདི་ལ་དུངས་སེམས་འབུལ་བར་རེ།།
                                ༢༦༠
               ལམ་ཕྲན་འདི་ཡི་འགྲམ་གྱི་རྩྭ་ཕྲན་ཀྱེ།།
               དབྱིངས་ཀྱི་སྐར་མར་དགའ་བ་མ་ལྷོད་དང་།།
               ཁྱོད་ཀྱི་མཚར་སྡུག་ལྡན་པའི་རྨི་ལམ་ཀྱང་།།
               ཡིད་འོངས་མེ་ཏོག་ཚལ་ནས་འཁྲུངས་པར་འགྱུར།།
                                ༢༦༡
               ཁྱོད་ཀྱི་འགྱུར་ཁུགས་མང་པའི་རོལ་དབྱངས་དེ།།
               རྣོ་དབལ་ཤིན་ཏུ་ཚ་བའི་རལ་གྲི་བཞིན།།
               གྲོང་ཁྱེར་ཆེན་པོ་འདི་ཡི་འུར་ཟིང་གི།
               རྔམས་མཐུག་བྲང་ཁོག་སྟོབས་ཀྱིས་གཤག་པར་མཛོད།།
                                ༢༦༢
               མཉེན་ལྕུག་རང་དབང་ལྡན་པའི་སྡོང་ལོ་འདི།།
               བྱིས་པ་ཞིག་གི་ལག་ཟུང་དང་འདྲ་བར།།
               བདག་གི་སེམས་ཀྱི་སྟོང་ལྡན་པི་ཝང་གི།
               རྒྱུད་སྐུད་དག་ནི་ཀུན་ནས་འདར་བར་བྱེད།།
                                 ༢༦༣
               མེ་ཏོག་ཆུང་ཆུང་དེ་ནི་ས་རྡུལ་ཁྲོད།།
               ཡོངས་སུ་ཐིམས་ཏེ་གཟིམས་པར་གྱུར་ན་ཡང་།།
               ཕྱེ་ལེབ་ཚོགས་ཀྱིས་ཟིལ་དངར་འཚོལ་བ་ཡི།།
               ལམ་བུ་འཚོལ་ཅིང་ཀུན་ཏུ་རྒྱུ་བ་ལགས།།
                                ༢༦༤
               བདག་ནི་འཇིག་རྟེན་འདི་ཡི་བཞི་མདོ་རུ།།
               ཁེར་རྐྱང་གྲོགས་སུ་བསྟེན་དུས་མཚན་མོ་སླེབས།།
               ཀྱེ་ཀྱེ་གཞིས་ཁྱིམ་དྲོན་མོའི་འཇིག་རྟེན་ཀྱེ།།
               བདག་ལ་ཉིད་ཀྱི་སྒོ་མོ་འབྱེད་རོགས་མཛོད།།
                                ༢༦༥
               བདག་གིས་ཁྱེད་ཀྱི་ཉིན་མོའི་གླུ་དབྱངས་བླངས།།
               མཚན་མོར་ཁྱེད་ཀྱི་སྒྲོན་མེ་ཐོགས་ནས་ནི།།
               དྲག་ཆར་རླུང་འཚུབ་འཐབ་པའི་མུན་ནག་གི།
               བགྲོད་ལམ་རིང་པོ་ཅིས་ཀྱང་བརྒལ་བར་བྱས།།
                                ༢༦༦
               བདག་གིས་ཁྱེད་ཉིད་རང་གི་གཞིས་ཁྱིམ་དུ།།
               གདན་འདྲེན་ཞུ་བའི་སྤོབས་པ་མ་མཆིས་ཀྱང་།།
               རིང་ནས་སེམས་ཀྱིས་འཚོས་པའི་སྙིང་སྡུག་ཀྱེ།།
               བདག་གི་ཁེར་རྐྱང་ཁྲོད་དུ་འབྱོན་པར་ཞུ།།
                               ༢༦༧
               མི་རྟག་འཆི་བ་འདི་ནི་ཚེ་སྲོག་ལ།།
               རྣམ་པར་རྟོག་པའི་འཚོ་བ་ཉིད་དང་མཚུངས།།
               རྐང་བ་ཡར་འདེགས་མར་འཇོག་གང་བྱས་ཀྱང་།།
               དེ་ནི་ལམ་དུ་ཞུགས་པའི་ཆེད་དུ་ཡིན།།
                                ༢༦༨
               བདག་གིས་མེ་ཏོག་དང་ནི་ཉི་འོད་ཀྱི།།
               གོ་དོན་སླ་མོ་དེ་དག་རྟོགས་པར་གྱུར།།
               ད་ནི་ཉིད་ཀྱིས་བདག་ལ་སྡུག་བསྔལ་དང་།།
               མི་རྟག་འཆི་བའི་བདེན་པ་གསུང་བར་ཞུ།།
                                ༢༦༩
               མཚན་མོའི་མེ་ཏོག་འདི་དག་འཕྱི་དྲགས་པས།།
               ཞོགས་པས་བརྩེ་བའི་འོ་སྦྱོར་གནང་བའི་དུས།།
               དངངས་ཤིང་འདར་བཞིན་ཤུགས་རིང་ནར་ནར་ངང་།།
               ས་ཆེན་མ་མའི་པང་དུ་འཐོར་བར་གྱུར།།
                                ༢༧༠
               ཤུགས་རིང་རླུང་གིས་གཡོ་ཞིང་བསྐྱོད་པ་ཡི།།
               སྐྱེ་དངོས་ཁྲི་ཕྲག་མང་པོའི་སྐྱོ་གདུང་ཁྲོད།།
               བདག་གིས་ནམ་ཡང་འགྱུར་བ་མི་མངའ་བའི།།
               སྐྱེད་ཡུམ་མཆོག་གི་རྟག་བརྟན་གླུ་སྒྲ་ཐོས།།
                                ༢༧༡
               ཀྱེ་ཀྱེ་ས་ཆེན་བདག་ནི་ཁྱེད་ཉིད་ཀྱི།།
               ཉེ་བར་བཅར་དུས་མགྲོན་པོ་རྒྱུས་མེད་ཅིག།
               ཁྱིམ་དུ་སྡོད་དུས་སྐུ་མགྲོན་རྩིས་ཆེན་ཞིག།
               ཁྱེད་དང་འབྲལ་དུས་གྲོགས་པོ་འདང་ཅན་ཞིག།
                               ༢༧༢
               ང་རང་ཁྱེད་དང་བྲལ་ཏེ་བཞུད་པའི་སྐབས།།
               སེམས་ཀྱི་བརྩེ་བ་ཁྱེད་ཀྱི་ཕྱོགས་ནས་ལུས།།
               ཚུལ་དེ་ནུབ་རིར་བཞུད་པའི་ཉི་མ་ཡི།།
               འོད་ཞགས་ལྷིང་འཇགས་ནམ་མཁར་འཁྱིལ་བ་བཞིན།།
                                ༢༧༣
               ལྷིང་འཇགས་ཁྲོད་དུ་དལ་གྱིས་རྒྱུ་བ་ཡི།།
               སྲོད་ཀྱི་སྐར་མ་བདག་གི་སེམས་ཀྱིས་སྦར།།
               དེའི་འཕྲོར་མཚན་མོ་རིང་པོའི་མུན་ནག་གིས།།
               བདག་ལ་བརྩེ་བའི་དུངས་པ་ཤུབ་བུར་གླེང་།།
                               ༢༧༤
               ཀྱེ་ཀྱེ་ཡུམ་ཆེན་ཉམ་ཆུང་ཁོ་བོ་ནི།།
               མུན་པ་དགུ་རྩེགས་གྱོན་པའི་ཁྱེའུ་ཞིག།
               མཚན་མོའི་སྨག་རུམ་སྟུག་པོའི་ཐུ་འོག་ནས།།
               ཁྱེད་ཀྱི་ཕྱོགས་སུ་ལག་ཟུང་ཤུགས་ཀྱིས་བསྲིངས།།
                                ༢༧༥
               ཉིན་མོའི་ལས་དག་ཡོངས་སུ་རྫོགས་པ་དང་།།
               བདག་གི་མགོ་བོ་ཉིད་ཀྱི་པང་དུ་བསྙེས།།
               ཀྱེ་ཀྱེ་ཡུམ་ཆེན་ད་ནི་བུ་ཆུང་ང་།།
               སྐྱིད་པའི་རྨི་ལམ་གྲོང་དུ་འཇུག་པར་འཚལ།།
                               ༢༧༦
               མར་མེ་མང་པོ་མཉམ་དུ་ཚོགས་པ་ན།།
               འོད་དེ་ཡུན་རིང་གསལ་ཞིང་གསལ་བར་འགྱུར།།
               སོ་སོར་གྱེས་ཚེ་དུས་ཀྱི་སྐད་ཅིག་མར།།
               མི་གསལ་རབ་རིབ་ངང་དུ་ཡལ་བར་འགྱུར།།
                                ༢༧༧
               བདག་ནི་འདི་ནས་ཚེ་དུས་བྱས་པ་ན།།
               སྔོན་ཆད་ཁྱོད་ལ་དགའ་ཞིང་དུངས་མྱོང་ཞེས།།
               ཚིག་དེ་བདག་གི་ཚབ་ཏུ་སྐུ་ཉིད་ཀྱི།།
               ལྷིང་འཇགས་ཁྲོད་དུ་འཇོག་རོགས་འཇིག་རྟེན་ཀྱེ།།
                                  ༢༧༨
               བདག་ཅག་རྣམས་ནི་རང་གི་འཇིག་རྟེན་འདིར།།
               ལྷག་ཏུ་བརྩེ་ཞིང་དུངས་པ་ཟབ་པ་ནི།།
               སྣོད་བཅུད་གཡང་དུ་ཆགས་པའི་འཇིག་རྟེན་འདིར།།
               འཚོ་ཞིང་བཞུགས་པ་དོན་ཡོད་ཁོ་ནའི་ཕྱིར།།
                                  ༢༧༩
               མི་རྟག་ཚེ་ཡི་འཕེན་པ་རྫོགས་རྣམས་ལ།།
               མི་ནུབ་སྲིད་པར་དགེ་བའི་མཚན་སྙན་དང་།།
               མི་ཡུལ་འདི་རུ་འཚོ་ཞིང་བཞུགས་རྣམས་ལ།།
               མི་འགྱུར་བརྩེ་བའི་དངོས་གྲུབ་མཆོག་དེ་སྩོལ།།
                                 ༢༨༠
               བདག་གིས་དེ་རིང་སླར་ཡང་ཁྱེད་ཉིད་མཐོང་།།
               ཁྱེད་ནི་གཉིད་མ་སད་ཀྱི་ཁྱེའུ་ཆུང་ཞིག།
               སྐྱ་རེངས་ཁྲོད་དུ་རང་གི་སྐྱེད་ཡུམ་མཆོག།
               མཐོང་བས་འཛུམ་དང་བཅས་ཏེ་གཉིད་པ་འདྲ།།
                                   ༢༨༡
               བདག་ནི་འདི་ནས་ཚེ་དུས་བྱས་ནས་ཀྱང་།།
               སླར་ཡང་ཚེ་ཡི་འཕེན་པ་རྫོགས་པར་འགྱུར།།
               འཁོར་བའི་སྐྱེ་འཆི་རེས་སུ་བརྗེ་བ་འདི།།
               རྫོགས་པའི་མཐའ་དེ་དམིགས་སུ་མ་མཆིས་སོ།།
                                 ༢༨༢
               བདག་གིས་མི་ཚོགས་བརྡོལ་ཏེ་བཞུད་པའི་སྐབས།།
               ཉི་ཁྱམས་སྟེང་གི་ཁྱེད་ཀྱི་མཛུམ་ཞལ་མཐོང་།།
               བདག་ནི་སྙན་པའི་གླུ་ལ་དབྱིངས་ཞུགས་པས།།
               འདི་ཡི་འུར་ཟིང་ཡོད་ཚད་རྨང་ནས་བརྗེད།།
                                ༢༨༣
               མི་ལ་བརྩེ་བའི་དངོས་པོ་ཡོད་གྱུར་ན།།
               རིན་ཆེན་ཚེ་སྲོག་འདི་ལ་དོན་སྙིང་ལྡན།།
               དེ་ནི་ཆང་ཕོར་བཀྲ་ཤིས་རྟགས་བརྒྱད་མ།།
               བདུད་རྩི་ཆང་གིས་ཡོངས་སུ་གཏམས་པ་བཞིན།།
                                ༢༨༤
               ཁོང་རྣམས་སོ་སོར་རང་གི་དགོན་པ་རུ།།
               མར་མེ་ཕུལ་ཏེ་ཞལ་འདོན་དབྱངས་སུ་གྱེར།།
               ཡིན་ཡང་བྱེའུ་ཆུང་འདིས་ནི་སྐྱ་རེངས་ཁྲོད།།
               ཁྱེད་ཀྱི་མཚན་ནས་འབོད་བཞིན་དགའ་བས་མྱོས།།
                                ༢༨༥
               བདག་ནི་འདི་ནས་ཉིད་ཀྱི་ཁེར་རྐྱང་གི།
               ཀློང་དུ་ཁྲིད་དེ་སེམས་ཀྱི་རི་ལུང་ཀུན།།
               སྐྱོ་གདུང་ན་བུན་སྟུག་པོས་བསྒྲིབས་པ་དང་།།
               ལྷན་ཅིག་སྙན་པའི་གླུ་ཡིས་རྫོགས་པར་གྱིས།།
                                 ༢༨༦
               ཁོ་ཚོ་རང་གིས་བདམས་པའི་འཇིག་རྟེན་དུ།།
               འཚོ་བའི་གནང་བ་སྩོལ་རོགས་དཀོན་མཆོག་ལགས།།
               བདག་ནི་ནམ་ཡང་ཉིད་ཀྱི་སྐར་ཚོགས་ལ།།
               འཁྲེང་ཞིང་དེ་ལས་འདའ་བ་མེད་དོ་ཀྱེ།།
                                   ༢༨༧
               བརྩེ་བ་མཚོ་ལས་ཟབ་པའི་སྡུག་བསྔལ་གྱིས།།
               བདག་གི་མི་ཚེའི་རི་ལུང་ཀུན་ནས་བཅིངས།།
               ཇི་ལྟར་དྲག་ཏུ་འཁྲུགས་པའི་རྒྱ་མཚོ་བཞིན།།
               རྩེ་དགས་མྱོས་པའི་ནགས་མའི་ཚལ་ཡངས་སུ།།
               འདབ་ཆགས་ཚོགས་ཀྱིས་གླུ་དབྱངས་ལེན་པ་འདྲ།།
                                    ༢༨༨
               གལ་ཏེ་ཁྱེད་ལ་མོས་པ་ཡོད་ལགས་ན།།
               རིན་ཆེན་སྒྲོན་མེ་འདི་ནི་གཟིམ་པར་གྱིས།།
               བདག་གིས་ཁྱེད་ཀྱི་མུན་པ་དགུ་རྩེགས་ཀྱི།།
               གོ་དོན་རྟོགས་ཤིང་དེ་ལ་དགའ་བར་འགྱུར།།
                                    ༢༨༩
               བདག་གིས་ཚེ་འདིའི་མཐའ་མའི་ཉིན་མོ་དག།
               བསྐྱལ་ཏེ་ཉིད་ཀྱི་མདུན་དུ་འགྲེང་བའི་དུས།།
               ཉིད་ཀྱིས་རྨ་ཤུལ་འདི་དག་གཟིགས་ངེས་ལ།།
               བདག་གི་གསོ་ཐབས་དག་ཀྱང་མཁྱེན་པར་ངེས།།
                                   ༢༩༠
               གང་ཚེ་བདག་གིས་འཇིག་རྟེན་གཞན་ཞིག་གི།
               ཉི་འོད་རྣམ་པར་འཚེར་བའི་མཚར་སྡུག་ཁྲོད།།
               བདག་གིས་ས་ཡི་གོ་ལའི་འོད་ཟེར་ལས།།
               མི་ཡི་བརྩེ་བ་སྔར་ནས་མྱངས་སོ་ཞེས།།
               སྙན་པའི་གཏམ་དག་གླུ་རུ་ལེན་པར་སྲིད།།
                                 ༢༩༡
               འདས་སོང་འཚོ་བའི་ཁྲོད་ནས་འཕུར་ཡོང་བའི།།
               བདག་གི་ཚེ་སྲོག་ཕྲ་མོའི་སྤྲིན་པ་འདིས།།
               དྲག་ཆར་རླུང་འཚུབ་འདྲེན་པར་མི་སྲིད་ཀྱང་།།
               སྲོད་ཀྱི་ནམ་མཁར་མཛེས་པའི་ཚོན་གྱིས་བྱུགས།།
                                  ༢༩༢
               བདེན་ལུགས་ཀྱིས་ནི་རང་ལ་རྒོལ་བ་ཡི།།
               ཆར་རླུང་བསླངས་ནས་འཇིགས་ཟིལ་ངོམས་བྱས་ཀྱང་།།
               ཆར་རླུང་དེས་ནི་བདེན་པའི་ས་བོན་དག།
               ཕྱོགས་སུ་གཏོར་ཏེ་ཡུལ་ཀུན་ཁྱབ་པར་བྱས།།
                                  ༢༩༣
               མདང་གི་ཆར་རླུང་དེས་ནི་དེ་རིང་གི།
               ཞོགས་པར་གསེར་མདོག་ཞི་བདེའི་ཅོད་པན་བསྒྲོན།།
                                  ༢༩༤
               བདེན་ལུགས་དེ་ཡིས་མཐའ་མའི་ཞལ་ཆེམས་ཤིག།
               མི་ཡུལ་འདི་རུ་ཆེད་དུ་བཞག་ན་ཡང་།།
               ཞལ་ཆེམས་དེ་ཡིས་བདེན་ལུགས་གསར་བ་དག།
               སླར་ཡང་ཕྱི་མ་ཕྱི་མར་སྦྲུམ་པར་བྱེད།།
                                 ༢༩༥
               ཁོང་གི་མཚན་སྙན་ཁོང་གི་འཚོ་བ་ལས།།
               འདས་ཤིང་གཞན་ལས་ཁྱད་དུ་འཕགས་པ་ཞིག།
               མིན་པར་ཕལ་བའི་སྤྱོད་ཚུལ་ལ་གནས་པ།།
               ཁོང་ལ་བསོད་ནམས་ཕུན་སུམ་ཚོགས་པའོ།།
                                  ༢༩༦
               ཇི་ལྟར་ཞོགས་པའི་ཉི་འོད་འཕྲོས་པའི་ཚེ།།
               ཕྱོགས་བཞིའི་ན་བུན་རིམ་གྱིས་ཡལ་བ་བཞིན།།
               བདག་གིས་རང་ཉིད་བརྗེད་ཀྱང་ཁྱེད་ཉིད་ཀྱི།།
               མཛེས་པའི་མཚན་སྙན་སེམས་ཀྱི་ཟབ་སར་བཞུགས།།
                                   ༢༩༧
               ལྷིང་འཇགས་གོས་སུ་གྱོན་པའི་མཚན་ལྗོངས་ལ།།
               སྐྱེད་ཡུམ་མཆོག་གི་ལྷད་མེད་མཛེས་པ་མངའ།།
               ཅ་ཅོ་འདུ་འཛིས་ཁེངས་པའི་ཉིན་མོ་ལ།།
               གཞོན་ནུའི་དར་བབས་ལང་ཚོའི་མཛེས་པ་མངོན།།
                                    ༢༩༨
               མེ་ཏོག་ལྟ་བུའི་མཛུམ་མདངས་སྟོན་པའི་དུས།།
               འཇིག་རྟེན་ཁོང་ལ་དགའ་བ་ཉིད་དུ་འགྱུར།།
               ཁོང་གིས་དྲག་པོའི་ཧབ་དགོད་བྱེད་པའི་དུས།།
               འཇིག་རྟེན་ཁོང་ལ་ཧ་ཅང་སྐྲག་པར་འགྱུར།།
                                     ༢༩༩
               དཀོན་མཆོག་འདིས་ནི་མི་ཡི་བློ་གྲོས་ཁྲོད།།
               སླར་ཡང་གཞོན་དུས་རྙེད་པར་རེ་ཞིང་སྒུག།
                                     ༣༠༠
               ཕྱི་ནང་སྣོད་བཅུད་དགེ་བའི་འཇིག་རྟེན་འདི།།
               ཁྱེད་ཀྱི་བརྩེ་བའི་རྣམ་པར་བཞེངས་པ་ཚོར།།
               དེ་བས་བདག་ཀྱང་རང་གི་བརྩེ་བ་ཡིས།།
               འཇིག་རྟེན་འདི་ལ་དྲི་མེད་ཁ་དག་འབུལ།།
                                   ༢༣༡
               དགུན་གསུམ་འཁྱག་པས་བསྡམས་འདྲའི་བདག་སེམས་ལ།།
               ཁྱེད་ཀྱི་ཉི་འོད་ལྟ་བུའི་འཛུམ་མདངས་ཕོག།
               ད་ནི་དཔྱིད་ཀའི་མེ་ཏོག་ཇི་བཞིན་དུ།།
               མཚར་སྡུག་རྣམ་པར་གྲོལ་བར་ཐེ་ཚོམ་ཅི།།
                                   ༣༠༢
               ལྷ་ཆེན་འདི་ཡིས་རང་གི་བརྩེ་བའི་ཁྲོད།།
               “མཐའ་གནས”བར་ལ་འོ་དག་སྐྱེལ་བར་བྱེད།།
               སྲེད་པས་བདག་གིར་བཟུང་བའི་མི་རྣམ་ནི།།
               “མཐའ་མེད”བར་ལ་འོ་དག་སྐྱེལ་བར་བྱེད།།
                                   ༣༠༣
               ཁྱེད་ཀྱིས་གྲངས་མེད་བསྐལ་བར་ཚོགས་བསགས་པས།།
               ད་ནི་སངས་རྒྱས་གོ་འཕང་ཐོབ་པ་ལགས།།
                                    ༣༠༤
               ལྷ་ཡིས་མི་སྨྲའི་བརྟུལ་ཞུགས་འཛིན་པ་དེ།།
               མི་ཡི་བསམ་བློ་སྨིན་པའི་སྨྲ་བརྗོད་ཡིན།།
                                   ༣༠༥
               གཏན་གྱི་འགྲུལ་བཞུད་པ་ཁྱོས་འཁྱམས་པོ་ངའི།།
               གླུ་ལས་རང་གི་ཞབས་རྗེས་རྙེད་ཐུབ་བམ།།
                                   ༣༠༦
               ཀྱེ་ཀྱེ་པྭ་ལགས་བདག་གིས་སྐུ་ཉིད་ལ།།
               ཁྲེལ་མེད་བྱ་བའི་ལས་དག་མ་བརྩམས་ཨང་།།
               ཁྱོད་ཀྱི་ཕྲུ་གུ་རྣམས་ཀྱི་ལུས་སྟེང་དུ།།
               ཉིད་ཀྱི་གཟི་མདངས་རྣམ་པར་འཕྲོ་བ་ལགས།།
                                 ༣༠༧
               ཉིན་འདི་སྐྱོ་ངལ་སྟོང་གི་ཉིན་ཞིག་སྟེ།།
               ཉི་འོད་ཟ་ཟི་ལམ་ལམ་འཕྲོ་བ་དེ།།
               ཁྲོ་གཉེར་ཀུན་ནས་བསྡུས་པའི་ཆུ་འཛིན་འོག།
               བརྙས་བཅོས་ཐེབས་པའི་ཉམ་ཆུང་བྱིས་པ་བཞིན།།
               དཀའ་སྡུག་འཐབ་པའི་གདོང་ལས་མིག་ཆུ་ཡི།།
               བཞུར་ཤུལ་གསལ་ལ་རླུང་བུའི་ངར་སྒྲ་ཡང་།།
               དུས་ཀྱིས་ཤི་རྨས་ཐེབས་པའི་འཇིག་རྟེན་འདིའི།།
               སྐྱོ་བའི་ངུ་ངག་ཅིག་དང་གཉིས་སུ་མེད།།
               འོན་ཀྱང་བདག་གིས་གསལ་བོར་རྟོགས་པ་ནི།།
               བདག་ནི་སྔར་བཞིན་རང་གི་རྐང་ལམ་བརྒྱུད།།
               བརྩེ་བའི་གྲོགས་པོར་མཇལ་བར་འགྲོ་བ་ལགས།།
                                  ༣༠༨
               དོ་ནུབ་ཏ་ལའི་ལོ་མ་ཤག་ཤག་འབབ།།
               རྒྱ་མཚོ་ཆེན་པོར་རྦ་རླབས་ལང་ལོང་འཕྱུར།།
               ཀྱེ་ཀྱེ་ཚེས་ཆེན་བཅོ་ལྔའི་ལྷ་ཟླ་ལགས།།
               ཁྱེད་ནི་འཇིག་རྟེན་འདི་ཡི་བླ་སྲོག་དང་།།
               ཀུན་ནས་མཚུངས་ཤིང་བརྩེ་བའི་གསང་བ་དེ།།
               འཇིག་རྟེན་ག་ཤེད་ཅིག་ནས་གནས་མཆོག་འདིར།།
               མི་སྨྲའི་བརྟུལ་ཞུགས་བཟུང་སྟེ་དྲངས་པ་ལགས།།
                               ༣༠༩
               མདང་ནུབ་མལ་དུ་ཉལ་བའི་རྨི་ལམ་དུ།།
               གསལ་ཞིང་འཚེར་བའི་སྐར་མ་འོད་ཆེན་ཞིག།
               འོད་ཟེར་རྣམ་པར་འཕྲོ་བའི་གླིང་ཕྲན་ཞིག།
               རྨིས་པ་དེ་རུ་བདག་ཀྱང་སྐྱེ་བར་འགྱུར།།
               ལང་ཚོའི་ཁོ་ལག་རིམ་གྱིས་རྫོགས་པ་ན།།
               བདག་གི་ཚེ་སྲོག་དེ་ཡི་བྱ་གཞག་ཏུ།།
               འགྱུར་ཞིང་དོན་ཆེན་ངང་གིས་འགྲུབ་པའང་།།
               ཉི་འོད་འོག་གི་སྨིན་པའི་གྲོ་ཞིང་འདྲ།།
                               ༣༡༠
               སྦྲང་རྩིའི་ཆར་གྱིས་བྲན་པའི་བརླན་གཤེར་གྱི།།
               དྲི་བསུང་ཡུལ་ཕྱོགས་ཀུན་ཏུ་ལྡང་བ་དེ།།
               ལྷིང་འཇགས་རོལ་བར་འབྱམས་པའི་མི་ཚོགས་ལས།།
               མཆེད་པའི་རྒྱ་ཆེན་བསྟོད་གླུ་དེ་དང་འདྲ།།
                                ༣༡༡
               ཐོབ་པའི་བརྩེ་བ་ཤོར་བའི་དུས་ཡོད་ཅེས།།
               སྨྲ་བ་བདེན་ལུགས་འབའ་ཞིག་ཡིན་ན་ཡང་།།
               བདག་ཅག་དུངས་པ་མཚོ་ལས་ཟབ་པའི་ཕྱིར།།
               དོན་དངོས་ཚད་མར་དམིགས་སུ་མ་མཆིས་སོ།།
                               ༣༡༢
               ང་ཚོའི་རྣམ་པར་ཤེས་པའི་ཕུན་ཚོགས་དེ།།
               འཆི་བདག་བདུད་ཀྱིས་འཕྲོག་པར་ནུས་མ་ཡིན།།
               དེ་ནི་རྟེན་འབྲེལ་ངོ་བོ་རོ་གཅིག་ཏུ།།
               གྲུབ་ཚུལ་ང་ཚོས་ནམ་ཞིག་རྟོགས་པར་ངེས།།
                                ༣༡༣
               ས་སྲོད་ཉི་ཟེར་ཕྲ་མོ་འཐབ་པའི་འོག།།
               ལྷ་ཆེན་མེ་ཏོག་བསྣམས་ཏེ་བདག་མདུན་སླེབས།།
               བདག་གིས་སྔོན་ཆད་བཏུས་པའི་མེ་ཏོག་འདི།།
               ཁོང་གི་རྫ་བུམ་ནང་དུ་ལྷག་པར་མཛེས།།
                                ༣༡༤
               ཀྱེ་ཀྱེ་བདག་གི་བླ་ཡི་རྒྱུད་སྐུད་དག།
               དམ་ལྷོད་སྙོམས་པོར་བསྒྲིག་པ་དེ་ཡི་ཚེ།།
               ཉིད་ཀྱི་རྒྱུད་སྐུད་རེ་རེའི་དབྱངས་རྟ་ལས།།
               རྩེ་དགའི་སྒྲ་དབྱངས་ཕྱོགས་སུ་མཆེད་པར་བྱེད།།
                                 ༣༡༥
               བདག་ལ་རང་གི་འཚོ་བ་སྐྱེལ་ཆོག་པའི།།
               གནང་བ་རྩོལ་རོགས་བདག་གི་རྗེ་བོ་ཀྱེ།།
               བདག་ནི་རང་དབང་ཉིད་ལ་གནས་གྱུར་ཚེ།།
               འཆི་བ་དེ་ཡང་དོན་སྙིང་ཆེ་བར་འགྱུར།།
                               ༣༡༦
               འགྲོ་བ་མི་ཡི་བདེན་པའི་ལོ་རྒྱུས་ཀྱིས།།
               བྲན་གཡོག་དག་ལ་རྒྱལ་ཁ་ཐོབ་པར་སྒུག།
                               ༣༡༦
               ལྷིང་འཇགས་ཁྲོད་ཀྱི་ཞོགས་པའི་ཉི་འོད་དེ།།
               སྟོན་སྡུད་རྗེས་ཀྱི་ཞིང་སར་འཕྲོས་པ་བཞིན།།
               ཁྱོད་ཀྱི་བརྩེ་བའི་ཟུར་མིག་རྣོན་པོ་དེ།།
               བདག་གི་སྙིང་ལ་ཟུག་པ་ད་གཟོད་ཚོར།།
                                ༣༡༨
               དྲག་ཏུ་མཆེད་ཅིང་འཕྱོ་བའི་རྦ་རླབས་ནི།།
               རྒྱ་མཚོ་ཆེན་པོ་དེ་ཡི་དབུས་སུ་སྟེ།།
               བདག་ནི་སྐོམ་པས་གདུང་བས་ཆུ་འདོད་ལྟར།།
               གླུ་སྒྲ་མཆེད་པའི་མཚོ་སྙིང་དེ་ལ་རེ།།
                                ༣༡༩
               མཚན་མོའི་སྔོན་འགྲོའི་རོལ་དབྱངས་འདི་ཉིད་ནི།།
               ཉི་ནུབ་དབྱངས་རྟ་གསར་བའི་ཁྲོད་ནས་བརྩམས།།
               སྨྲ་བསམ་བརྗོད་ལས་འདས་པའི་མུན་ནག་ལ།།
               ཕུལ་བའི་གཟི་བརྗིད་ལྡན་པའི་བསྟོད་གླུ་ཉིད།།
                               ༣༢༠
               བདག་ནི་རི་བོ་མཐོན་པོའི་རྩེ་རུ་འཛེགས།།
               མྱ་ངམ་ཐང་གི་གྲགས་པ་རབ་འབར་བའི།།
               གནས་འདི་མཐོ་ཚད་ཅིག་ལས་རང་ཉིད་ལ།།
               ཆགས་ས་ཞེན་ཡུལ་ཅི་ཡང་མེད་པ་ཚོར།།
               ཀྱེ་ཀྱེ་ཐར་བར་འཁྲིད་པའི་ས་མཁན་ལགས།།
               འོད་ཀྱི་འཇིག་རྟེན་མུན་པས་མ་བསྒྲིབ་སྔོན།།
               བདག་ནི་ལྷིང་འཇགས་ལྡན་པའི་རི་ཀླུང་དེར།།
               འཁྲིད་པར་གསོལ་བ་སྙིང་གི་དཀྱིལ་ནས་འདེབས།།
               གནས་དེར་ད་གཟོད་མི་ཚེའི་དོན་སྙིང་དག།།
               གསེར་གྱི་ཤེས་རབ་མཆོག་ཏུ་སྨིན་པས་ཆོག།
                                 ༣༢༡
               ས་སྲོད་འདི་ཡི་རབ་རིབ་སྣང་བའི་ཁྲོད།།
               དངོས་པོ་ཁ་ཤས་མཐོང་བ་སྒྱུ་འཕྲུལ་ཙམ།།
               མཆོད་རྟེན་ཞབས་རིམ་མུན་པའི་ཁྲོད་དུ་ཡལ།།
               ལྗོན་པའི་རྩེ་མོ་སྣག་ཚས་རབ་རིབ་ཏུ།།
               ཡོངས་སུ་བཏང་བའི་ནག་ཐིག་དེ་དང་འདྲ།།
               འོན་ཀྱང་བདག་གིས་སྐྱ་རེངས་གསར་བར་སྒུག།
               ང་རང་སྟུག་པོའི་གཉིད་ལས་སད་པའི་ཚེ།།
               འོད་ཟེར་སྣང་བས་ཀུན་ནས་འཁྱུད་པ་ཡི།།
               ཁྱོད་ཀྱི་གྲོང་ཁྱེར་གང་དེ་མཐོང་ཡང་སྲིད།།
                                 ༣༢༢
               བདག་གིས་མ་མྱངས་སྡུག་བསྔལ་གཅིག་ཀྱང་མེད།།
               འཇིག་རྟེན་འདི་ལ་རེ་ཐག་ཆད་ཀྱང་མྱོང་།།
               མི་རྟག་འཆི་བས་མཐའ་རུ་དེད་ཀྱང་མྱོང་།།
               དེ་བས་བདག་གིས་ད་གཟོད་རླབས་ཆེན་གྱི།།
               འཇིག་རྟེན་འདི་ལ་བདེ་སྐྱིད་ལྡན་པར་འདོད།།
                                ༣༢༣
               བདག་གི་མི་ཚེ་ཧྲིལ་བོར་དབུལ་ཕོངས་དང་།།
               ཁ་ཁུ་སིམ་པའི་ལྷིང་འཇགས་འཚོ་བ་ཡོད།།
               དེ་ནི་བྲེལ་ཟིང་ཆེ་བའི་ཉིན་མོ་ལ།།
               འོད་དང་དབུགས་ཀྱི་བར་སྟོང་ཐོབ་པ་ལགས།།
               བདག་གི་མི་ཚེ་ཧྲིལ་བོར་བབ་ཆགས་དང་།།
               ཆོག་ཤེས་བསྟེན་པའི་ཕལ་བའི་འཚོ་བ་ཡོད།།
               དེ་ནི་བྲེལ་བས་བསྒྲུབ་པའི་བྱ་གཞག་ལས།།
               བྱུང་བའི་གནས་སྐབས་ཙམ་གྱི་ཞིང་ཁམས་ཡིན།།
                                  ༣༢༤
               སྔོན་ཆད་བདག་གིས་ཁས་བླངས་དམ་བཅས་པའི།།
               བྱ་གཞག་མ་འགྲུབ་བདག་པོས་རྒྱབ་ནས་འཐེན།།
               ད་ནི་བདེ་བར་འཆི་བའི་རྐྱེན་ངན་གྱི།།
               བར་ཆད་འདི་དག་ཟློག་པའི་འཕྲིན་ལས་མཛོད།།
                                  ༣༢༥
                “བདག་ནི་ཉིད་ཀྱི་བརྩེ་བར་ཡིད་ཆེས”ཞེས།།
               མཇུག་མཐར་གུས་པོས་འདི་ཙམ་སྨྲ་བར་བྱེད།།
       
 གསལ་བཤད། རྒྱ་གར་གྱི་སྙན་ངག་མཁན་པོ་རྭ་བྷིན་བྷ་ར་ན་སི•་ཐེ་ཀོར་རམ་ཇོ་བོ་ཉི་དབང་མགོན་པོས་མཛད་པའི་གླུ་བྱ་འཕུར་མ་ཞེས་པ་འདི་ཁོ་བོས་དེ་སྔོན་རྩོམ་རིག་པ་དང་ལོ་ཙྭ་བ་ཆེན་པོ་པེན་ཞིན་དང་ཀྲིན་ཀྲུན་ཏའོ་གཉིས་ཀྱིས་བསྒྱུར་བའི《ཐེ་ཀོར་གྱི་སྙན་ངག་འདེམས་སྒྱུར།》ཞེས་པ་གཞིར་བཟུང་ནས་ཚིག་ལྷུག་གི་རྣམ་པར་བསྒྱུར་ཁུལ་བྱས་པ་ཡིན་མོད།ད་ལྟ་ཡང་བསྐྱར་བལྟ་དུས་མ་ཡིག་ལས་གོལ་བ་དང་ཚིག་སྦྱོར་སོགས་གང་གི་ཐད་ནས་ཀྱང་རང་གི་བློར་འབབ་པ་ཞིག་བྱུང་མེད་པར་མ་ཟད།ཧ་ཅང་བསྒྱུར་ཉེས་སུ་སོང་འདུག་པའི་ཚོར་བ་ཞིག་དང་སྐྱོ་བ་ཞིག་བྱུང་།དེའི་ཕྱིར་བདག་གིས་ཡང་བསྐྱར་སེང་ཕྲུག་རྟ་མགྲིན་རྡོ་རྗེ་ཡི་འགྱུར《བྱེའུ།》ཞེས་པ་དང་ཁམས་གསེར་ཐིག་གི་འགྱུར《འཕུར་བྱའི་ཚོམས།》དང་།རང་གི་སྔོན་གྱི་འགྱུར《འདབ་ཆགས་ཀྱི་མཆོད་པ།》སོགས་གཞིར་བཟུང་ནས་ཚིགས་བཅད་ཀྱི་རྣམ་པར་བསྒྱུར་བ་ཡིན་ལ།ཁམས་གསེར་ཐིག་གི་འགྱུར་དེ་དབྱིན་ཡིག་ལས་ཐད་ཀར་བསྒྱུར་ཡོད་པས་མ་ཡིག་དང་ཐག་ཉེ་བར་མཐོང་ནས་དེ་ལ་གཞི་བྱས་ཤིང་ཚིག་སྦྱོར་ཁ་ཤས་ཀྱང་དེ་ལས་ཐད་ཀར་བླངས་ཡོད་པས་སྐུ་ཉིད་ལ་དགོངས་དག་ཐུགས་བདེན་ཞུས་པ་ཡིན།ཐེ་ཀོར་གྱི་སྙན་ངག་འདི་ཚིག་ལྷུག་སྙན་ངག་ཅིག་ཡིན་ན་ཡང་འདིར་ཚིག་བཅད་དུ་སྡེབས་དོན་ནི་བོད་རང་གི་རྩོམ་རིག་གི་བརྗོད་པ་དང་ཧ་ཅང་མཐུན་ལ་སྙན་ངག་གི་ཉམས་དང་དམིགས་བསལ་གྱི་ཁྱད་ཆོས་ལྡན་པར་མཐོང་ནས་དེ་ལྟར་བསྒྱུར་བ་ཡིན་མོད།ནོར་འཁྲུལ་དུ་གྱུར་བའི་བསྒྱུར་ཉེས་ནི་ད་དུང་གཡོལ་ཐབས་མེད་པ་ལགས་ན།ཤེས་ནས་སྨྲ་བའི་མཁྱེན་ལྡན་དག་གིས་བླང་དོར་དང་སྐྱོན་བརྗོད་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།།
0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།