《མཚན་མོ》བོད་འགྱུར་དེབ་ཀྱི་འགྱུར་འབྲེལ་བསམ་ཚུལ།

1979


                 ____རྩོམ་པ་པོ། ཤེད་བུ།



ངས་དེབ་འདི་ལ་བཀླགས་བྱང་ཞིག་བྲིས་ཡོད། དེ་ནི་བཀླགས་བྱང་རང་གི་རྩ་འཛིན་ལྟར་བྲིས་པ་ལས་འགྱུར་གྱི་སྤུས་ཀ་དང་ཡིག་ནོར་སོགས་ལ་ཇུས་གཏོགས་གང་ཡང་བྱས་མེད། ཡིན་ནའང་། དྲ་ལམ་དུ་རིན་མེད་ངང་བགོ་འགྲེམས་བྱེད་པའི་ལྷག་བསམ་དེ་ནི་ང་ལ་མེད།དཔལ་ལྡན་ཆོས་ཀྱི་གྲགས་པའི་རྣམ་འགྲེལ་རྩ་བར། བྱམས་སོགས་རྨོངས་དང་འགལ་མེད་ཕྱིར།། ཤིན་ཏུ་ཉེས་པ་ཚར་གཅོད་མིན།། ཞེས་ཐབས་ཀྱི་ཆར་གཏོགས་པ་འདི་དག་རྨོངས་པ་དང་དངོས་འགལ་གྱི་ཤེས་པར་མི་གཏོགས་པས། ལྷག་བསམ་ཞར་གོག་ལ་གཟབ་དགོས་པར་སྐུལ་བ་ལྟར་ནམ་རྒྱུན་གཟབ་གྱིན་པའི་ཁུལ་ཡིན། གང་ལྟར། སྒྲུང་གཏམ་གྱི་ནང་སྙིང་བཏོན་པའི་བཀླགས་བྱང་དེ་ཀློག་བསམ་ན་འཛམ་གླིང་གི་ཚགས་པར་རིན་གོང་ཆེ་ཤོས་ཡུ་སྒོར་ལྔ་ཅན་གྱི་<<བོད་ཀྱི་ཡིག་ཟམ>>ཚགས་པར་ཉོ་དགོས་པ་ཡིན། ཧེ་ཧེ།


ཨ་ཁུ་པདྨ་འབུམ་ལགས་ནི། ངས་རྩོམ་པ་པོ་རྒན་པ་རུ་ངོས་འཛིན་གྱིན་ཡོད། ཡིག་འབྲུ་རེ་རེ་བཞིན་འགན་ཁུར་རམ་ཡང་ན་རྒྱུ་མཚན་མེད་པར་མི་གཡུགས་པར་སྙམ་ཡོད། ང་ཁོང་ལ་ཆ་རྒྱུས་མེད་ཀྱང་ངའི་གྲོགས་པོ་དག་གིས་ཨ་ཁུ་པདྨ་འབུམ་ཞེས་བླ་ན་མེད་པ་ཞིག་ཏུ་བཤད་བཤད་པས་ང་ཡང་ཁོང་ལ་རྩིས་འདང་ཆེ་བ་ཞིག་རེད། ལྷག་པར་རྒན་ཧོར་གཙང་འཇིགས་མེད་དང་གླེང་མོལ་གྱི་སྐབས་ཤིག་ལ། “ང་ནི་པདྨ་འབུམ་ལྟ་བུའི་གཟབ་ནན་ཅན་དེ་འདྲ་མིན། ཁོང་ལྟ་བུ་དག་གི་ཡིག་འབྲུ་རེ་རེ་ཡིན་ཡང་བསམ་བློ་གཏོང་ས་ཡོད་རེད་”ཅེས་གདེང་འཇོག་གནང་མྱོང་བ་ནས་ངས་ཁོང་གི་རྩོམ་ཡིག་དག་ལ་དམིགས་བསལ་དོ་སྣང་དང་ཞིབ་ཚགས་ཀྱིས་ལྟ་བཞིན་ཡོད། དེའི་ཕྱིར། ཁོང་གི་འགྱུར་རྩོམ་འདི་རེ་བ་ཆེན་པོ་དང་དོ་སྣང་ཆེན་པོས་ཐེངས་གསུམ་ལ་བཀླགས་པ་ཡིན། དེ་ཡང་ཐོག་མར་འཕྲུལ་དེབ་ལས་ཐེངས་གཅིག་བཀླགས། དེས་མ་ཚིམ་པར་ཤོག་ཐོག་ལ་དཔར་ནས་བཀླགས། བཀླགས་བྱང་འབྲི་ཕྱིར་བསྐྱར་དུ་མགྱོགས་ཀློག་ཅིག་བྱས་པ་ཡིན། ཡིན་ནའང་། འདོད་པ་མི་ཁེངས་པའི་ངོས་དེ་སྔར་བཞིན་རེད། དེའི་ཕྱིར་བཀླགས་བྱང་གཅིག་དང་། འགྱུར་༡༠༨ཀྱི་ལས་གཞི་གཞན་དག་གི་སྐབས་ལ་ཐུགས་སྣང་གནང་བར་ཅུང་ཙམ་ཨེ་ཕན་གྱི་བསམ་པས་ཀུན་ནས་བསླངས་ཏེ། འགྱུར་འདིའི་བློ་ཁ་མི་ཁེངས་པའི་ངོས་ཟུར་ཙམ་ཞུ་བར་འདོད་སོང་། འབྲེལ་ཡོད་སུ་ལའང་ཕོག་ཐུག་མི་ཡོང་བའི་རེ་བ་ཐོག་མར་ཞུ།


སྔོན་ཤིག་ལ། ངས་སྐད་འཕྲིན་གྱི་ཚོམས་༼ལ་རྩེ་ཇ་ཁང༽་ནང་།༼ཁོ་ཤིན་ཏུ་མང་བའི་དེང་སྐབས་ཀྱི་འགྱུར་རྩོམ་ཆ་བོ༽ཞེས་འགྱུར་ཡིག་ཅིག་གི་ཤོག་ངོས་གཅིག་གཉིས་ཤིག་ལས་ཁོ་ཡིག་བདུན་ཅུ་ལྷག་ཟུར་འདོན་བྱས་ནས་གླེང་མྱོང་བ་ལྟར། འགྱུར་༡༠༨ཀྱི་གསེར་གྱི་དབུ་ཁྱུད་དུ་བསླངས་པའི་<<མཚན་མོ>>བོད་འགྱུར་དེབ་འདིའི་ཡིག་ཕྲེང་དང་པོའི་ཚིག་དུམ་གཅིག་དེའི་ནང་། “ཁོའི་མི་ཚེ་ལ་ཁོ་ལ་རུས་མིང་ཞིག་ཡོད་མ་མྱོང་བ་ལྟར་ཁོ་ཚོས་ཁོ་ལ་དཀོར་གཉེར་མོ་ཤི་ཞེས་འབོད། ” ཅེས་སྒྲུང་གི་མགོ་འཛུགས་ཀྱི་ཚིག་དུམ་གཅིག་ནང་ཁ་ལ་ཤིན་ཏུ་མི་བདེ་བའི་ཁོ་ཡིག་བཞི་བྱུང་བ་མ་ཟད། ཡིག་ཕྲེང་གཉིས་པའང་ཁོ་ནི་ཞེས་ཁོ་སྒྲ་ཞིག་གིས་མགོ་བཙུགས་པ་དེ་ཡིས་ང་ལ་ཐང་ཆད་པའི་སྣང་བ་ཞིག་བྱུང་། 


དེ་ནི་སྒྲ་སྦྱོར་བམ་གཉིས་ལས། བསྣོར་ན་བདེ་ཞིང་གོ་བ་བསྐྱེད་པ་ཞིག་ཡོད་ན། ཚིགས་སུ་བཅད་པ་ནི་རྩ་བ་བཞི་པའམ་དྲུག་པའང་རུང་སྟེ། ཚིགས་སུ་བཅད་པ་གཅིག་གི་ནང་ན་གོ་བདེ་བ་བསྣོར་ཞིང་བསྒྱུར་ཅིག རྐྱང་པ་ལ་ནི་དོན་གང་སྙེགས་པ་ཡན་ཆད་ཀྱི་ཚིག་དང་དོན་གཉིས་ཀ་ལ་གར་བདེ་བར་བསྣོར་ཞིང་བསྒྱུར་ཅིག ཅེས་པའི་ལམ་སྟོན་ལ་ཐུགས་གཞིག་མ་མཛད་པའི་སྐྱོན་དུ་སེམས། འགྱུར་རྩོམ་མང་པོ་ཞིག་བོད་སྐད་དུ་བསྒྱུར་ཐུབ་མེད་པའི་གནད་ཀྱང་བསྒྱུར་གཞི་གཙིགས་ཆེན་དུ་བཟུང་ནས་གོ་རིམ་དཀྲུག་པ་དང་ལྡོག་པ་སོགས་ཀྱི་བྱེད་ཐབས་མ་བརྒྱུད་པའི་རྐྱེན་རེད་སྙམ། ཚབས་ཆེན་པོས་བཤད་ན། འདི་དག་སྐད་ཡིག་དར་འཕེལ་གྱི་མཐུན་པའི་རྐྱེན་ལས་ཀྱང་བོད་སྐད་རིན་པོ་ཆེ་སྐད་ཡིག་གཞན་གྱི་མི་སེར་སྤེལ་ཡུལ་གྱི་རམ་འདེགས་སུ་འགྲོ་བཞིན་པའི་ཚོར་བ་སྟེར་གྱིན་འདུག འདི་ལྟར་བཤད་ན། དྲིན་ལོག་གི་རྣམ་པ་ཅུང་འདུག་ནའང་བཤད་དགོས་པ་དེ་གསང་རན་མ་རེད། 


འགྱུར་༡༠༨ཀྱི་ལས་གཞི་འདི་ཧ་ཅང་ལེགས་པས། ལས་གཞིའི་དོ་དམ་ཚོགས་ཆུང་ལྟར་ང་ཡང་ཧ་ཅང་རྩིས་འདང་ཆེ། རྩོམ་སྒྲིག་གམ་དོ་དམ་ཚོགས་ཆུང་གིས་གླེང་བརྗོད་ཤོག་ངོས་གཅིག་གཉིས་ཤིག་ཡོད་པའི་ནང་དུ་ཡིག་ནོར་དང་དོན་ནོར་གཉིས་ཀ་ཡོད་པས། འདི་ཚོས་གཟབ་ནན་བྱེད་ཀྱིན་མེད་པའི་སྣང་ཚུལ་དེར་ཧ་ཅང་ཕངས་པོ་བྱུང་། དཔེར་ན། གླེང་བརྗོད་དེ་རུ་“མདོ་སྨད་རེབ་གོང་རོང་བོ་དགོན་གྱི་སྙན་ངག་པ་དགེ་འདུན་ལྷུན་གྲུབ་ལགས་ཀྱིས་མཐའ་མའི་ཀློག་གཤེར་གནང་བ་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུའོ།།” ཞེས་བྲིས་པ་འདིའི་ནང་ཀློག་གཤེར་ཞེས་བ་བཤེར་དགོས་ས་ལ་ག་གཤེར་བྲིས་ནས་ཡིག་ནོར་སྤེལ་འདུག་པ་དང་། དོན་ནོར་ལ་མཚོན་ན། རེབ་གོང་ལ་རོང་བོ་དགོན་ཟེར་བ་གཉིས་ཡོད། རོང་ན་གཅིག་ཡོད་ལ་འབྲོག་ན་གཅིག་ཡོད། ཨ་ལགས་རོང་བོ་དགོན་ཟེར་བའང་གཉིས་ཡོད། ཡིན་ནའང་། རྣམ་ཀུན་ཁྱད་ཚིག་མ་སྦྱར་བར་རོང་བོ་དགོན་ཞེས་བརྗོད་ན་རོང་གི་རོང་བོ་དགོན་ལས་རོང་བོ་དགོན་པར་མི་གོ འདི་ནི་ཀློག་མཁན་རེབ་གོང་བ་ཞིག་གིས་བལྟས་ཙམ་ནས་དོན་ནོར་ཡིན་པ་ར་འཕྲོད། ཤོག་ངོས་གསུམ་ལ་བདག་རྒྱག་མི་ཐུབ་པའི་དོ་དམ་ཚོགས་ཆུང་ཞིག་གིས། དེབ་བརྒྱ་ལ་ཇི་ལྟར་རྩོམ་སྒྲིག་དང་དོ་དམ་བྱེད་ཨང་། ཀུ་རེ་ཡིན་ཏེ། རེ་བ་ཆེ་ས་ནས་བྱེད་དུས་ཡིག་ནོར་དོན་དོར་འདི་ཙམ་ཡང་མིག་ལ་ཧ་ཅང་གཟན་པོ་འདུག 


ཡིག་ཕྲེང་དང་པོའི་ཁོ་སྒྲ་མང་པོའི་འཇུག་ཡུལ་གྱི་མི་དེ་ལ་”དཀོར་གཉེར་མོ་ཤི་”ཞེས་བཏགས་འདུག དེ་ནི་བོད་སྐད་རྐྱང་བའི་ངོས་ནས་བསམས་ན། ཇོ་སྒར་ཞིག་གི་འདུ་ཁང་དཀོར་གཉེར་མ་ཤི་སོང་བའི་གོ་བ་སྟེར་བས་གད་མོ་བྲོ་བ་ཞིག་རེད། ཡིན་ནའང་།  སྐབས་འདིར་དྲན་པར་འཁོར་བ་ནི། སྒྲ་བསྒྱུར་བམ་གཉིས་ལས། ལྷ་བཙད་པོ་ཁྲི་ལྡེ་སྲོང་བཙན་གྱིས་བསྐུལ་ནས་བཀས་བཅད་དེ་མི་བཅོས་པར་བཞག་པ་རྫོགས་སོ་ཞེས་ཆོས་རྒྱལ་གྱིས་བཀས་བཅད་པ་ནས་བཟུང་། བོད་ཀྱི་ལོ་ཙཱ་བ་གསེར་རིའི་ཕྲེང་བ་ལྟར་བྱོན་པ་དག་གིས་མི་མིང་ས་མིང་སོགས་སྒྲ་བསྒྱུར་བྱེད་སྐབས། འ་ཆུང་འདོགས་པ་དང་དབྱངས་ཉིས་བརྩེགས་འདོགས་པ་སོགས་སྒྲའི་ལུགས་སུ་བྱས་ནས་བོད་སྐད་དུ་གོ་བ་མེད་པ་དང་རྒྱ་གར་སྐད་སོར་འཇོག་བྱས་ཡོད་དེ། སྒྲ་སྦྱོར་བམ་གཉིས་ལས།  གཽ་ཏ་མ་ལྟ་བུ་གཽའི་སྒྲ་ལས་ཚིག་དང་།ཕྱོགས་དང་།ས་དང་། འོད་དང་། རྡོ་རྗེ་དང་། བ་ལང་དང་། མཐོ་རིས་ལ་སོགས་པ་རྣམ་པ་དུ་མར་སྙེགས་པ་དང་། ཀཽ་ཤི་ཀ་ལྟ་བུ་རྩྭ་ཀུ་ཤ་ཐོགས་པ་དང་། མཁས་པ་དང་། པདྨ་ལ་དགའ་བ་དང་། འུག་པ་དང་། མཛོད་ལྡན་ལ་སོགས་པའི་སྒྲའི་ལུགས་ལས་དྲངས་ཤིང་བསྒྱུར་ན་སྣ་གྲངས་མང་པོ་ཞིག་ཏུ་སྙེགས་ལ། བསྒྱུར་བ་རྣམས་གཅིག་གི་ནང་དུ་ནི་སྣ་གྲངས་དེ་ཀུན་འདུ་བར་ཡང་མི་བཏུབ་སྟེ། གཅིག་ཏུ་ཆད་པར་བྱར་ཡང་གཏན་ཚིགས་ཆེན་པོ་མེད་པ་རྣམས་ནི་མི་བསྒྱུར་བར་རྒྱ་གར་སྐད་སོ་ན་ཞོག་ཅིགཅེས་དང་། མེ་ཏོག་ཅེས་པ་ལ་སོགས་པ་གང་ལ་བྱ་བའི་མིང་གཅིག་བླ་ཐབས་སུ་སྣོན་ལ་རྒྱ་གར་སྐད་སོ་ན་ཞོག་ཅིག ཅེས་གསུངས་པ་བཙན་པོའི་ཁྲིམས་རྒྱ་དང་དངོས་སུ་འགལ་ཞིང་། འགྱུར་གྱི་སྐྱོན་དུ་སོང་འདུག 


དེ་ཡང་མི་གོ་ན། མཁས་དབང་ཟམ་གདོང་རིན་པོ་ཆེ་དབུ་བཞུགས་ཀྱིས། སྒྲ་སྦྱོར་བམ་གཉིས་དང་བྱེ་བྲག་རྟོགས་བྱེད་ཆེན་མོ་སོགས་ཀྱི་དགོངས་པ་གཞི་ལ་བཞག་ནས་ཡིག་སྒྱུར་གྱི་རྩ་འཛིན་ལམ་སྟོན་བཅུ་གཅིག་གཏན་འབེབས་གནང་ཡོད་པ་ལས་བདུན་པར། “ཡུལ་གཞན་གྱི་སྒྲ་རང་སོར་བཞག་པའམ་ཟུར་ཆག་པ་རྣམས་ཀྱི་དག་ཆ་གཏན་འབེབ་སྐབས་བོད་སྐད་རང་གི་གོ་དོན་མི་སྟེར་བ་གཙོ་བཟུང་། ” ཞེས་པ་དང་ཡང་དངོས་སུ་འགལ་འདུག་པས། ༼མོ་ཤི༽ཡིས་མཚོན་པའི་མི་མིང་དང་ས་མིང་མང་པོ་ཞིག་ནི་བྱུང་རྒྱལ་དུ་བྲིས་པའི་སྣང་བ་འཁོར་ལ། སྔོན་གྱི་དུས་ན་ཆོས་རྒྱལ་གྱིས་བཀས་བཅད་པ་དང་དེང་གི་ཆར་ཡང་ཤེས་རིག་ལས་ཁུངས་ཀྱིས་རྩ་འཛིན་དུ་གཏན་ལ་ཕབ་པའི་དོན་ཚན་བཅུ་གཅིག་བཅས་ལོ་རྒྱུས་དང་སྙིང་དོན་ལ་ཁྲིམས་ཀྱི་དབང་ཚད་ལྡན་པའི་རྩ་ཆེའི་ལམ་སྟོན་དག་ལ་ཅི་མི་སྙམ་ནའང་།རྣམ་དབྱེ་དང་པོ་ངོ་བོ་ཙམ་སྟོན་པའི་གོ་དོན་ལ་བསམ་གཞིགས་ཤིག་བྱེད་དགོས་ཏེ། མིང་རྐྱང་རྣམས་ནི་རྣམ་དབྱེ་དང་པོ་ངོ་བོ་ཙམ་སྟོན་པའི་གནས་བབ་ལས་བརྒལ་ཏེ་གོ་བ་ཡ་མཚན་ཅན་སྟོན་པའི་ཚིག་ཏུ་བསྒྱུར་ན་ག་ལ་འགྲིག 


ད་དུང་དེབ་འདི་རུ་བོད་པའི་སྤྱི་ཚོགས་དང་བོད་ཡིག་ནང་ཡོངས་སུ་གྲགས་པ་རྣམས་སུའང་། ཁོ་ཚོའི་རྩ་འཛིན་གྱི་ཐིག་ཤིང་དེས་གཞལ་ཏེ། ཕལ་ཆེར་དབྱིན་ཡིག་གི་དབྱངས་Iཡོད་ཚད་ལ་གི་གུ་འདོགས་རྐྱང་དང་། Zརིག་ཚད་ལ་བཟའ་སྒྲ་དང་ཚི་སྒྲ། མིང་མཐར་Dཡོད་ན་ཡང་འཇུག་ད་ཡིག་འབྲི་རྐྱང་བྱས་ཡོད་པ་འདིས་ཤུགས་རྐྱེན་ཅི་ཞིག་སྟེར་བཤད་དཀའ་བ་ཞིག་རེད། ཁྱོད་ཚོས་བཟུང་བའི་ཐིག་ཤིང་དེས་ཁྱོད་ཚོར་ཚད་གཞལ་ཐུབ་པའི་དབང་དུ་བཏང་ནའང་བོད་སྐད་དུ་གྱུར་ཚར་བའི་རྒྱལ་ཁབ་དང་གྲོང་ཁྱེར་གྱི་མིང་དག་བོད་ཡིག་གིས་ཁྱབ་ཚད་ཀུན་ལས་གསར་བསྒྱུར་བྱེད་དཀའ་བས། བོད་ཡིག་གི་གནས་ཚུལ་སྤྱིའི་དགོས་པ་དགག་བྱ་དང་། སྔོན་བྱས་ཆུད་ཟོས་སུ་མི་གཏོང་བར་གུས་ཞབས་བརྩི་མཐོང་གི་རིན་ཐང་ཅུང་འཇོག་དགོས་པར་འདོད། འགྱུར་༡༠༨ཀྱི་སྒྲ་སྒྱུར་རྩ་འཛིན་དེ་སྔར་གྱི་རྩ་འཛིན་དག་ལས་ལེགས་པ་ཞིག་ཡིན་ན་ནི་ང་ཚོས་ངེས་པར་ལག་བསྟར་ཞུ་འོས། དེབ་འདིའི་ནང་གི་སྒྲ་བསྒྱུར་དག་ལས་དཔག་ན་སྙིང་བོ་ཆེ་མེད་པར་འདོད། 


ཆོས་རྒྱལ་ཆེན་པོ་རྣམས་ཀྱང་གནམ་དུ་གཤེགས། xxxxxxxསྐབས་འདི་འདྲ་ལ། ང་ཚོ་ས་མགོ་རིལ་ནས་སྙིང་རྡོ་རིལ་དུ་གྱུར་ཏེ། བོད་ཀྱི་རིག་པའི་གཞུང་ལུགས་ཀྱི་བང་མཛོད་ཆེན་པོའི་གསེར་གྱི་ཀ་བ་དང་དངུལ་གྱི་གདུང་མ་ཡོད་ཚད་ལ་ABCDཐེབས་ཆག་རེ་ཤེས་པའི་ང་རྒྱལ་གྱིས་ཅི་མི་སྙམ་པར་ཁབ་གཙག་འབིག་གཙག་བྱེད་རྐྱང་བྱེད་པ་འདི་ནི་ཇི་འདྲའི་བཟོད་པར་དཀའ་བ་ཞིག་རེད་ཨང་། འདི་ངའི་ན་ཟུག་ཡིན། ཚོགས་གཏམ་མིན། ཧེ་ཧེ།


ངས་དེབ་འདི་དང་འབྲེལ་ཏེ་བཀླགས་བྱང་གཅིག  རྩོམ་སྒྲིག་པའི་གཏམ་གཅིག ཟུར་བཀོད་བསམ་ཚུལ་གཅིག་བཅས་རྩོམ་ཡིག་གསུམ་སྤེལ་རྗེས། སྒྱུར་བ་པོ་དང་དོ་དམ་མི་སྣ་བཅས་ལ་ཞུ་འདོད་པ་ནི། ངས་འདི་ལྟར་ཤུགས་ཆེན་པོས་བསམ་ཚུལ་སྤེལ་དོན་ནི། གཅིག རེ་བཞག་ཆེ་དྲག་པ། གཉིས། ངས་དེབ་འདི་སྒྲུང་གཏམ་གྱི་དོན་དག་ལ་ལྟ་བ་ཙམ་མིན་པར་འགྱུར་གྱི་ལེགས་ཉེས་ལའང་དོ་སྣང་བྱས་ནས་བཀླགས་པ། གསུམ། འགྱུར་རྩོམ་ཞེས་བོད་ཡིག་གི་ལམ་ནས་རྒྱ་སྐད་དང་དབྱིན་སྐད་བཤད་མཁན་གྱི་དེབ་མང་དག་ཅིག་མཐོང་ནས་སུན་སྣང་སྐྱེས་ཡོད་པ་མ་ཟད། དེ་དག་བོད་ཡིག་རིན་པོ་ཆེ་ཡིག་རིགས་གཞན་གྱི་མི་སེར་སྤེལ་ཡུལ་ལ་རམ་འདེགས་བྱེད་ཀྱིན་པའི་དོགས་པ་ཞིག་སེམས་ལ་ནད་དུ་གྱུར་ཡོད་པ་བཅས་ཀྱི་རྐྱེན་གྱིས་ཁ་ཡག་གི་ཁ་བཏགས་འཐེན་མ་ཐུབ་པ་ལས་གཞན་གྱི་བསམ་བློ་ཅི་ཡང་མེད། 


གཞན་དུ་ན། དགེ་འདུན་རབ་གསལ་གྱིས་བསྒྱུར་བ་<<རྒད་པོ་དང་རྒྱ་མཚོ>>རྡོ་རྗེ་ཚེ་བརྟན་གྱིས་བསྒྱུར་བ་<<བྱོལ་སོང་གི་གཞིས་ཀ>>སོགས་དང་བསྡུར་བ་ཡིན་ན།<<མཚན་མོ་>>འདི་འགྱུར་ཡག་པོ་ཞིག་རེད་དེ། ཆུང་ཚེ་རིང་གིས་བསྒྱུར་བ་<<བོད་མི་གསར་བརྗེ་བ་ཞིག་>>དང་། ཤེས་རབ་དར་རྒྱས་ཀྱིས་བསྒྱུར་བ་<<ཀ་ལིམ་པོང་གི་ཐུག་པ་ལས་བཟོ་བ་>>ལྟ་བུ་དག་དང་བསྡུར་ན། དཔུང་བ་མཉམ་གཤིབ་བྱེད་ཐུབ་པ་ཞིག་མ་རེད།  འགྱུར་བརྒྱ་རྩ་བརྒྱད་ནི་སྒྲིག་འཛུགས་རང་བཞིན་ཅན་ཞིག་དང་། དེ་ཡང་དཔལ་རྒྱལ་བ་ཀརྨ་པའི་མཚན་གནས་དང་འབྲེལ་ཏེ་ཡོད་པས། དམིགས་རྒྱ་སྣ་ཚོགས་དམིགས་འོག་ཏུ་ཆུད་དགོས་པ་སྨོས་མེད་དང་།ལྷག་པར་དཔལ་རྒྱལ་བ་ཀརྨ་པ་དང་དོ་དམ་མི་སྣ་ཚོས་ནན་ཏན་དང་ཡང་ཡང་བསྒྲགས་པའི་སྐད་ཡིག་གི་ཚེ་བསྲིངས་ཐབས་དང་ཀློག་མཁན་དཀྱུས་མ་དག་གིས་ཀློག་བདེ་ཞིང་གོ་ཐུབ་པ་ཅེས་པ་དེར་ད་དུང་ཐུགས་གཞིགས་ནན་མོ་མ་མཛད་ན་ཅུང་དཀའ་སེ་ཡོད་པའི་སྣང་ཚུལ་བྱུང་། 


ལྟོས་བཅས་ཀྱིས་བཤད་ན། xxxསྒྲིག་འཛུགས་རང་བཞིན་ཅན་གྱི་འགྱུར་ཡིག་སྟེ།xxxxxxxཀློག་བདེ་ཞིང་གོ་ཐུབ་པ། བོད་ཀྱི་ཕ་སྐད་ལ་འགན་ཁུར་བ་བཅས་ཀྱི་ཁྱད་ཆོས་ལྡན་པའི་དཔེ་ལྟ་བྱ་ཡུལ་དེ་དག་གི་རྗེས་སུ་རྐང་པ་སྤོ་ཐུབ་པ་ཞིག་བྱུང་ན་ཅི་མ་རུང་སྙམ། ཁྱེད་ཅག་གིས་དཀའ་ལས་རྒྱག་བཞིན་པར་གུས་བརྩི་ཡོད། ཡག་ཐོག་ལེགས་རྩེག་ཡོང་ཆེད་ཞུས་པ་ཡིན། 


ངས་བསམ་ཚུལ་འདི་xxxནང་གི་འགྱུར་གྱི་གནས་བབ་ལ་བལྟས་ནས་གླེང་བ་ལས་གཞིས་བཞུགས་མཁས་པ་དག་གི་འགྱུར་སོགས་ལ་ཅི་ཡང་བཤད་ཀྱིན་མེད་ལ། བཤད་པའི་སྤོབས་པའང་མེད། དུས་དང་རྣམ་པ་ཀུན་ཏུ་ཡི་རངས་ཁོ་ནའི་ཐལ་མོ་སྙིང་ཁར་ཟུམ་ཡོད། 


ལས་འཆར་གྱི་རྩ་འཛིན་ལམ་སྟོན་དོན་ཚན་བཅུ་གཅིག་ཅན་དེ་ནི་གཤམ་གྱི་འདི་རེད། 


༡། ཇི་ལྟར་ཡང་བོད་སྐད་ཀྱི་རང་གཤིས་མ་ཉམས་པ།

༢། བྱེ་བྲག་རྟོགས་བྱེད་དང་སྒྲ་སྦྱོར་བམ་པོ་གཉིས་པའི་དགོངས་དོན་གཙོ་བཟུང་།

༣། རྒྱ་གར་དང་རྒྱ་ནགཉི་ཧོང་སོགས་ཀྱི་རྩ་འཛིན་ཁག་ནས་ལེགས་ཆ་ལེན་རྒྱུ།

༤། འབྲི་སླ་བ་དང་བརྗོད་བདེ་བ། ཡིད་ལ་བཟུང་སླ་བ།

༥། བཀའ་བསྟན་གཙོས་པའི་སྔ་མོའི་ཐ་སྙད་བེད་མེད་དུ་མ་ལུས་པ་དང་། གོ་དོན་གསར་པ་སྦྱོར་ཐབས།

༦། ལེགས་སྦྱར་དང་ཧིན་དི་སོགས་ཀྱི་ཐ་སྙད་སྦྱོར་ཐབས་བོད་ཀྱི་སྐད་ལ་མི་འཚམས་པ་རྣམས་བཙན་ཐབས་ཀྱིས་མི་སྦྱོར་བ།

༧། ཡུལ་གཞན་གྱི་སྒྲ་རང་སོར་བཞག་པའམ་ཟུར་ཆག་པ་རྣམས་ཀྱི་དག་ཆ་གཏན་འབེབ་སྐབས་བོད་སྐད་རང་གི་གོ་དོན་མི་སྟེར་བ་གཙོ་བཟུང་།

༨། བོད་ཀྱི་ནང་ད་བར་བཟོས་ཟིན་པའི་བརྡ་ཆད་རྣམས་རྨང་གཞིར་འཇོག་རྒྱུ་ཡང་ཆབ་སྲིད་ཀྱི་བསམ་བློའི་དགོས་གལ་གྱིས་བཏགས་པ་དང་རྩ་བའི་ལྟ་གྲུབ་དང་མི་མཐུན་པ་རྣམས་ལ་ཞུ་དག་དང་བསྐྱར་བཅོས་བྱ་རྒྱུ།

༩། གསར་གཏོད་དང་གསར་བྱུང་གི་ཚིག་དེའི་ཐོག་མའི་འབྱུང་ཁུངས་དང་གོ་དོན་ལ་ཁུངས་གཏུགས་གང་ཐུབ།

༡༠། མདོར་ན་བོད་ཀྱི་སྐད་ཡིག་དེ། རྒྱ་སྐད་ཀྱིས་གཙོས་པའི་སྐད་ཡིག་གཞན་གྱི་མི་སེར་སྤེལ་ཡུལ་དུ་མ་གྱུར་བ་བྱ་རྒྱུ།

༡༡། བརྡ་ཆད་དང་སྐད་ཀྱི་རིག་གནས་ལ་མཁས་པའི་ཁྱད་ལས་པས་དཔྱད་པ་སོང་བ་དགོས་རྒྱུ་བཅས།


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།