མེ་ལོང་ངོས་ཀྱི་རྡུལ་ཕྱེས་པ། (ཞར་བཀོད་བཞི།)

172

         མེ་ལོང་ངོས་ཀྱི་རྡུལ་ཕྱེས་པ།

སྔོན་གྱི་ནེའུ་གསེང་མཛེས་པོ།།

ད་ལྟའི་རྫིང་གི་རྡོ་ཕུང་།།

ལོ་རབས་དུ་ཡི་གཏམ་རྒྱུད།།

སྒྲོན་མེ་ཞིག་གི་འོད་མདངས།།

རི་མགོའི་རྩེ་ཡི་ཁ་བ།།

ལག་པའི་ནང་དུ་བཞད་ནས།།

རྡུལ་གྱི་ཕུང་བོ་འདི་དག།

རླུང་བུའི་ངོ་བོར་སོང་ཞིང་།།

ཨེ་མ་ང་ཡི་མི་ཚེ།།

རྡུལ་གྱི་གླེགས་བམ་སྐྱ་བོ།།

མེ་ལོང་ངོས་ལ་བཀོད་ནས།།

སྐད་གསེང་མཐོན་པོའི་ངུའོ།།

ཡིད་ཀྱི་མིག་ཤེལ་དཀར་པོ།།

དེ་རིང་ས་ལ་ལྷུང་ཐལ།།

ས་ཡི་རྡུལ་ཕྲན་ཚོམས་བུ།།

ང་ཡི་ངོས་ལ་བབས་སོང་།།

2015/9/18

          མེ་ལོང་གི་ཕ་རོལ། 

རི་སྤྱང་རྔམ་གྱིས་བརྒྱུགས།།

མེ་ཏོག་རླུང་གིས་སྤུར།།

བྱེ་རླུང་ནག་པོ་དེ།།

ཆུ་བོའི་འགྲམ་ནས་ཉལ།།

ལུག་གི་རྨིག་པ་ཡིས།།

རྩི་ཤིང་བཅད་པར་བྱས།།

རྡོ་བའི་ཚོགས་དེ་དག།

ཡིད་ལ་རྩུབ་པར་བྱེད།།

སྦྲང་མ་བརྒྱ་དང་གཅིག།

མེ་ཏོག་བརྒྱ་དང་གཅིག།

རླུང་བུ་བརྒྱ་དང་གཅིག།

ཁོ་བོའི་ཚོར་བ་ཡིན།།

ཉ་མོ་ཆུ་ལས་འགྲེང་།།

རི་བོ་ཡོམ་ཡོམ་བྱས།།

སྙན་ངག་ཚིག་འབྲུ་ཞིག།

མཁའ་ནས་ས་ལ་ལྷུང་།།

                     2015.8.27

          རང་བྱུང་ལྷ་མོ།

ཁྱོད་ཉིད་རྟོགས་པའི་བློ་ལ།།

མེ་ཏོག་པདྨ་འཁྲུངས་སོང་།།

པདྨའི་འདབ་མ་རེ་རེ།།

སྙིང་གི་གཏིང་ལ་འཐིམ་ཡོད།།

མཚན་ལྗོངས་རྨི་ལམ་ནང་ནས།།

རེ་བའི་ལྷ་མོ་མ་རྙེད།།

ཀུན་འགྲོའི་ངོས་ལ་ཅེར་ནས།།

དྲན་པའི་ཚིག་གསུམ་བྲིས་ཡོད།།

མ་བྲིས་རང་བྱུང་རི་མོ།།

དཔྲལ་བའི་ངོས་ལ་བཤམས་ཡོད།།

ལག་པའི་དཀྱིལ་ན་བཞད་ཡོད།།

སྙིང་གི་གསེབ་ན་སྦས་ཡོད།།

མེ་ལོང་ནག་པོའི་ངོས་ལ།།

མེ་ལོང་དཀར་པོ་བཏབས་ནས།།

ཡིག་འབྲི་རེ་གཉིས་བཀོད་ནས།།

བདེ་བ་ཅན་ལ་འགྲོའོ།།

                   2015.8.4

                   གཟོབས།

མདུན་གྱི་རི་བོ་པང་དུ་བླངས།།

དེ་ཡི་སྟེང་དུ་མེ་ཏོག་བཀྲམ།།

སྡོང་བོ་གཅིག་གི་ཡལ་ག་ལ།།

མི་རྟག་ཟིལ་བ་བཙན་གྱིས་མཆོངས།།

སྐར་མདའ་ཤུགས་ཀྱིས་ས་ལ་ལྷུང་།།

ཆར་བ་དག་ནི་ཤག་ཤག་སྒྲ།།

མེ་ལྕེབ་གཅིག་འཕྲོ་གཅིག་བྱས་ནས།།

ང་ཡི་ཕོ་བྲང་བཟི་བར་བྱས།།

གློག་སྒྲོན་ལ་ཡང་བཀབ་པར་བྱས།།

མིག་ནི་རབ་ཏུ་ཚ་བར་བྱས།།

ལྕགས་ཐབ་ལ་ཡང་ཤི་གསོན་སྟོན།།

རས་ཁྲ་དག་གི་ངོས་ཉིད་ལ།།

ཁྱོད་ཀྱི་འཇའ་ཚོན་བྱུགས་དོན་ཅི།།

ཀ་བ་དག་གི་བར་གསེང་ན།།

ཁྱོད་ཀྱི་ཕོ་བྲང་བཞེངས་དོན་ཅི།།

ཁོ་བོའི་རྨི་ལམ་རྨིས་པ་ན།།

སྡོམ་དང་མེ་ལྕེབ་ཁྱུ་དག་གིས།།

ཕོ་བྲང་ཀུན་ལ་འདོད་རྩལ་སྟོན།།

བློན་ཆེན་འགའ་ཡིས་བསྲེགས་པར་བྱས།།

                        2015.8.9

               རྟོག་བཟོའི་ལྷ་མོ།

དཀར་ཁུང་ཆུང་སོང་མ་ཟེར།།

ཉི་འོད་མ་མཐོང་མ་ཟེར།།

ཚུར་ལ་མི་ཡོང་མ་ཟེར།།

མྱི་གཅེས་རེད་ཅེས་མ་བརྗོད།།

སེམས་ནག་ཡིན་ཞེས་མ་གླེང་།།

དགའ་རོགས་མིན་ཞེས་མ་བཤད།།

མིག་ཟུང་གཞན་ལ་མ་འཁོར།།

དོག་ཆུང་རེད་ཅེས་མ་བརྗོད།།

ཡིད་ལ་འཁྲུངས་མེད་མ་ཟེར།།

ཁ་ཁ་ཡིན་ཞེས་མ་གསུང་།།

རྟོག་བཟོ་ཞིག་ཡིན་མ་ཟེར།།

འཁྲུལ་བ་རེད་ཅེས་མ་བརྗོད།།

གདོང་གི་མེ་ཏོག་དམར་ཆུང་།།

སུ་ཡི་སྟེང་དུ་ལྷུང་སྲིད།།

རླུང་གིས་བར་ཆད་མེད་ན།།

ཁོ་བོའི་ཐོག་ལ་བཞད་ཡོང་།།

བྱུ་རུའི་ལག་གདུབ་མཛེས་པོ།།

སུ་ཡིས་ཁྱོད་ལ་བསྟེར་སོང་།།

འཁྲུལ་བའི་ལམ་བཀག་མེད་ན།།

ཉིད་ཀྱིས་ཁྱོད་ལ་སྟེར་ཡོད།།

བར་སྐོར་ནང་གི་གཡུ་ཆུང་།།

སུ་ཡིས་ཉོ་རབ་ཡོད་ཐལ།།

ཚོང་དཔོན་དྲངས་མོ་ཡིན་ན།།

ང་ཡིས་ཁྱོད་སར་ཉོས་ཡོང་།།

                    2015.7.7

            (རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།)

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།