ཡོང་ཁུངས།   རྫ་ཆུའི་རླབས་སྒྲ།      རྩོམ་པ་པོ།   བཙན་འབངས།     སྤེལ་དུས།  2016-05-14 13:10:08    ཀློག་གྲངས།：260

[ནང་དོན་གནད་བསྡུས།]    བཅད་མ།……

                                                         དགུན་ཟླ།       

ལྷགས་རླུང་འུར་འུར་ལྡང་བའི་ནམ་ཟླ་དེ་དང་།།

རྩྭ་རྐང་རླུང་གིས་བཅགས་པའི་དུས་ཚུགས་ཤིག་ནི།།

ཁ་བའི་འདབས་མ་གྲོལ་བའི་ཉིན་མོ་ཞིག་ཡིན།།

འཇིག་རྟེན་དཀར་པོར་སྣང་བའི་ཡུལ་ལྗོངས་དེ་རེད།།

ཁ་སྣ་ཙག་གིས་བཅིངས་བའི་དུས་ཡུན་དེ་དང་།།

གཙང་བོར་ཆབ་རོམ་ཆགས་པའི་རི་ལུང་དེ་ནི།།

པགས་རྩག་སྐ་རགས་ཀློད་པའི་མི་ཕོ་ཞིག་ཡིན།།

གངས་ལ་ཞབས་རྗེས་གསལ་བའི་ས་གཞི་དེ་རེད།།

ཁུ་ཡུག་ལྷོ་རུ་སྤྱུགས་པའི་ལོ་ཟླ་ཞིག་དང་།།

མེ་ཏོག་སད་ཀྱིས་ཁྱེར་བའི་སྤང་གཞུང་དེ་ནི།།

གངས་ཆར་བུ་ཡུག་འཚུབ་པའི་གནམ་གཤིས་ཤིག་ཡིན།།

དྲོད་གྲང་ཀོར་ཐིག་མན་གི་དགུན་ཟླ་གསུམ་རེད།།                                     

                                                                                015.10.24

                        མི་ལོ་20འི་ཕར་ཚུར།

ཉིན་མཚན་མིག་ལྡེབ་ཙམ་གྱིས་བཞུར།།

ལོ་ཟླ་སེ་གོལ་གཅིག་གིས་ཚར།།

གཏམ་རྒྱུད་ཕྱིར་འོང་མེད་སར་ལུས།།

ཉིན་ཐོ་བསྐུངས་ཡིག་གཅིག་གིས་རྫོགས།།

རྒྱབ་ལ་མི་ལོ་ཉི་ཤུའི་ཚུར།།

མདུན་ཕྱོགས་རྨི་ལམ་སྟོང་གི་ཕར།།

ན་ནིང་དབྱར་ཟླ་ལྗང་ཁུ་རེད།།

ད་ལོའི་དགུན་ཟླ་དཀར་པོ་རེད།།

སང་ལོ་སྟོན་ཟླ་མཐོང་བ་ན།།

དཔྱིད་དཔལ་བསུ་བའི་གླུ་དབྱངས་ལེན།།                             

                                          015.11.27

                       འགྲོ་འོང་།

ལོ་ཟླ་ཕར་ཕར་ཕྱིར་འོང་མེད་སར་འགྲོ།།

འཇིག་རྟེན་མར་མར་རྒུད་པའི་དུས་ལ་ཆས།།

མི་ཚེ་སྲིད་པའི་ཐང་གི་བྱ་སྒྲོ་ལྟར།།

འཁོར་བའི་རླུང་ཆེན་ལྡང་བའི་ཁུག་ན་ཡོད།།

ཉིན་རེར་ཉི་མར་བལྟས་ནས་འགྲོ་འོང་བྱེད།།

མཚན་རེར་ཟླ་བ་རུམ་སྟེ་རྨི་ལམ་གཏོང་།།

འདས་སོང་ཕྱིར་དྲན་ཞིག་གི་ཕར་བསྐྱལ་ཏེ།།

མ་འོང་བསམ་གཞིག་ཅིག་གི་བསུ་བར་བྱེད།།                                          

                                          1.1.016

         རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།