“འབ”དང་ “ཨ་མ”ལས་འཕྲོས་པའི་གནས་ལུགས།

11954


ཐེའུ་རང་།

   ས་ལྒང་འདིར་འཚོ་བའི་སྐྱེ་འགྲོ་མཐའ་དག་ལ་ཐུན་མོང་མ་ཡིན་པའི་རང་རང་གི་སྐད་སྒྲ་དང་། གཤིས་ཀ སྣང་བརྙན་རེ་ཡོད། ལྷན་སྐྱེས་ཀྱི་སྒྲའམ་གཟུགས་སམ་གཤིས་ཀ་དེ་ནི། སུ་ཞིག་གིས་ལད་མོ་དང་། སྦྱོང་བརྡར། ལྐོག་གཤུ། རྐུ་འཕྲོག་སོགས་བྱ་ནུས་པ་ཞིག་ཡེ་མ་ཡིན་ཏེ།   མྱི་ཞིག་གིས་ཁྱིའི་ལད་མོ་བྱས་ཏེ“འབ། འབ།”ཅེས་ཟུག་སྐད་བཏོན་ནའང་། ཁྱི་སྐད་དག་མོ་མ་འཇོན་པར་གཞན་པའི་རྣ་ལམ་དུ “ཨ་མ། ཨ་མ”ཞེས་འབོད་པའི་སྒྲར་གོ་བ་དང་།  ཞིམ་བུའི་ལད་མོ་བྱས་ཏེ། “མེའུ། མེའུ།” ཞེས་གྲག་ནའང་། གཞན་གྱི་རྣ་ལམ་དུ “མ་ངུ་མ་ངུ”ལྟ་བུར་གོའང་སྲིད། 

   སྤྱིར་བཏང་དུ། སྲོག་ཆགས་ཤིག་གིས་སྲོག་ཆགས་གཞན་གྱི་ལད་མོ་བྱེད་པ་ལ།  རྒྱུ་མཚན་གཉིས་ཡོད། གཅིག་ནི་རང་གི་ལུས་རྟེན་ལ་མ་མགུ་ཞིང་གཞན་གྱི་ལུས་རྟེན་ལ་སྨོན་པ། གཉིས་ནི་འཁྲབ་སྟོན་ནོ།། འཁྲབ་སྟོན་ལའང་རིགས་གཉིས་སུ་དབྱེ་རིགས་ཏེ། གཅིག་ནི་འཁྲབ་སྟོན་གཙང་མ་སྟེ། སྒྱུ་རྩལ་གྱི་ཁོངས་སུ་གཏོགས་པ་དང་། གཅིག་ནི་གོང་དུ་ཞུས་ཟིན་ལྟར། ཚོགས་སྡེ་དང་རིགས་རྒྱུད་དང་། ལུས་རྟེན་གཞན་པའི་གྲས་སུ་འཚང་འདོད་ཀྱིས་སྤྲེལ་ལད་འཁྲབ་ཅིང་གཞན་རྐུབ་ལྡག་པའོ།། 

   ཁྱོད་རང་སྒྱུ་རྩལ་ལ་བྱང་ཆུབ་པ་ཞིག་ཡིན་ནའང་ཆོག  རང་གི་ལུས་རྟེན་དང་ཚོགས་སྡེ་ལ་ངོ་ལོག་སྟེ། རིགས་རྒྱུད་དང་ལུས་རྟེན་གཞན་པའི་གྲས་སུ་འཚང་འདོད་མཁན་ཞིག་ཡིན་ནའང་ཆོག  ཁྱོད་ཀྱིས་སྐད་སྒྲ་དང་ཆ་བྱད་དང་རྣམ་འགྱུར་རྣམ་པ་སྣ་ཚོགས་སུ་ཇི་ལྟར་བསྒྱུར་ནའང་།  རྩ་བའི་ཆ་ནས། སྲོག་ཆགས་གཞན་གྱི་སྒྲ་གཟུགས་གཤིས་གསུམ་ཨ་ན་མ་ན་ཞིག་ཡོང་བ་དཔེ་མི་སྲིད་ལ། ཁྱོད་ནི་ནམ་ཡང་ཁྱོད་ལས་གཞན་སུ་དང་གང་ལའང་འགྱུར་མི་སྲིད་དོ།།

   དེ་བས།  ཧ་གོ་དགོས་པ་ཞིག་ལ།  མྱི་ཞིག “འབ། འབ” ཅེས་ཟུག་ནའང་ཆོག  ཁྱི་ཞིག་གིས “ཨ་མ། ཨ་མ”ཞེས་བོས་ནའང་ཆོག  རང་གི་རིགས་རྒྱུད་དང་ཁ་བྲལ་ཚེ། མྱི་དེས་ཁྱི་གྲལ་མི་ཆོད་ལ། ཁྱིས་ཀྱང་མྱི་གྲལ་མི་ཆོད་དོ།།

   ད་རུང་ཡང་ཧ་གོ་དགོས་པ་ཞིག་ལ། ཁྱིས་དགྲ་བོ་དང་རྐུན་མ་ལ་ཟུག་ཅིང་འཛིན་པ་དང་། མྱིས་རང་གི་ཚེ་སྲོག་གི་བསྐྱེད་ཡུམ་ལས། གཞན་སུ་ཡིན་ལ་ཨ་མ་ཞེས་མི་འབོད་པ་དེའོ།།

0

One Response to “འབ”དང་ “ཨ་མ”ལས་འཕྲོས་པའི་གནས་ལུགས།

  1. མེ་དཔལ། ལགས་ཀྱིས:

    བཀླགས་ཟིན།
    ངོ་མས་ཡག་པོར་བདོག
    རྩོམ་སྟངས་དང་བསམ་གཞིག་གི་འཆར་ཡན་ལ་ཡིད་མོས་བྱུང་ཡོད།
    རྗེས་སུ་ཡི་རངས་དང་བཅས་ནམ་ཡང་རྒྱབ་སྐྱོར་ཡོད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།