བོད་ཀྱི་རི་མོའི་ལོ་རྒྱུས་ངོ་སྤྲོད་མདོར་བསྡུས། (ཕྱི་དུམ།)

1775

_____ཚངས་དབང་དགེ་འདུན་བསྟན་པ།

16296028_1301217643269066_1921550709_n.jpg
16344189_1301217659935731_1515327142_n.jpg

བཙན་པོ་དང་སིལ་བུར་ཐོར་བའི་དུས་སྐབས་ཀྱི་རི་མོ།

       ཞ་ལུའི་ལྡེབས་རིས་ངོས་སུ་ཡོད་པའི་སྤྲེལ་མགོ་བོད་ལྭ་ཅན་དེ་ནི་དུས་རབས་བཅུ་གཅིག་གི་སྐབས་ཀྱི་ཡིན་ནམ་བསམ། འདི་ལ་བཤད་ཚུལ་འདྲ་མིན་སྣང་སྟེ། ལ་ལས་བོད་ཀྱི་མིའི་འབྱུང་ཁུངས་ནི་སྤྲེའུ་བྱང་ཆུབ་སེམས་དཔའ་དང་། བྲག་སྲིན་མོ་གཉིས་ལ་བརྟེན་ནས་བྱུང་བ་ཡིན་པས། བོད་མི་ཚོས་སྤྲེའུ་ལ་དད་མོས་ཡོད་པས་དད་རྟེན་དུ་བཞེངས་ཟེར། ཡང་སྐོར་ཞིག་གིས་རཱ་མ་ནཱའི་རྟོགས་བརྗོད་དུ་བཤད་པའི་སྤྲེའུ་ཧ་ནུ་མན་ཐ་བྱ་བ་དེ་ཡིན་སྐད། ཡང་ཁ་ཅིག་གིས་སངས་རྒྱས་ཤཱཀྱ་ཐུབ་པ་ལ་སྤྲེའུ་ཞིག་གིས་ཤིང་ཐོག་ཕུལ་བའི་མཛད་པ་ཡོད་པ་དེའི་ནང་དོན་ཡིན་ཡང་ཟེར། ངེད་ཀྱིས་ནི་ལྔ་པ་ཆེན་པོའི་གསུང་འབུམ་ན་བཞུགས་པའི་<བྱང་ཆུབ་སེམས་པ་ཧ་ནུ་མནྠའི་སྒོ་ནས་ཐིག་ལེ་བསྲུང་བ། >ཞེས་ཆོ་ག་ཞིག་ཡོད་པ་དེ་ནང་དུ། སྤྲེལ་གཟུགས་ལ་བརྟེན་ནས་མི་ཁ་དང་སྡང་བ་ཞི་བྱེད་ཀྱི་ནང་དོན་ཡོད་པ་དེ་དང་འབྲེལ་བ་ཡོད་པ་མིན་འགྲོ་སྙམ། གང་ལྟར་བོད་དུ་སྤྲེལ་གཟུགས་ཀྱི་རི་མོ་མང་པོ་མཐོང་རྒྱུ་འདུག

16296026_1301217649935732_670171852_n.jpg

      དུས་རབས་བཅུ་གཅིག་པའི་ཡར་སྔོན་གྱི་སྐུ་ཐང་མང་ཤོས་ལ་དབུ་རྒྱན་རིགས་ལྔ་ཅན་མེད། དབུ་རྒྱན་གསུམ་པ་ཡིན། རྒྱལ་ལུགས་ཀྱི་སྐུ་བརྙན་ལ་མགུལ་རྒྱན་ཡོད། རྣམ་སྣང་གི་སྐུ་ཡིན་ཡང་མགུལ་རྒྱན་ཡོད། མུ་ཏིག་གི་ཕྲེང་ཞགས་ལྟ་བུ་དང་། གཟི་ཞགས་དང་། བྱུ་རུའི་ཕྲེང་བ་སོགས་ཡོད། ཧ་ལམ་ཞིག་གོང་ཁ་གཡོན་ཕྱོགས་སུ་འཁོར་བ་འབའ་ཞིག་ལས་དེང་སང་ནང་བཞིན་གཡས་ཕྱོགས་སུ་འཁོར་བ་ཧ་ཅང་ཉུང་། བཙན་པོའི་ཆ་ལུགས་ལྟར་སྐྲ་སླས་མ་གཉིས་མདུན་ལ་བཞག་ཡོད། གོང་བའི་ཁ་ཡངས་ཤིང་ནང་འབྱར་ཅན་ཡིན། དབྱར་ཁར་ཐེར་མ་དང་ཟ་འོག་གི་རིགས་གྱོན་ཞིང་། དགུན་ཁར་ཚར་རྩག་དང་སློག་གོས་མནབས་པ་ཤོས་ཆེ། གྲ་ཐང་གི་ལྡེབས་རིས་དང་རྒྱལ་ལུགས་ཀྱི་རྣམ་སྣང་དག་ལ་རྐང་འབོབ་དང་ཞབས་ལྷམ་མནབས་ཡོད་པ་སོགས་ཅི་རིགས་འདུག 

16343641_1301217613269069_839791377_n.jpg

     བཙན་པོའི་རྒྱལ་རབས་ཀྱི་དུས་སུ་རྟེན་བཞེངས་མང་ཤོས་ནི་རྣམ་པར་སྣང་མཛད་ཡིན་པའི་རྒྱུ་མཚན་ནི་སྤྱོད་རྒྱུད་ཀྱི་ཆོས་བརྒྱུད་དར་འཕེལ་ལ་འབྲེལ་བ་འདུག དུས་རབས་བཅུ་གཅིག་པའི་སྔོན་དུ་བོད་ལ་རྣལ་འབྱོར་རྒྱུད་དང་བླ་མེད་ཀྱི་རྒྱུད་དར་མེད་པས། དེའི་རིགས་ཀྱི་ལྷ་སྐུ་ཉུང་བའི་རྒྱུ་མཚན་དེ་རེད།    

       བཙན་པོའི་རྒྱལ་རབས་ཀྱི་སྐབས་སུ། བོད་དམག་གིས་དར་ལམ་ལ་དབང་བསྒྱུར་བྱས་རྗེས་དར་གོས་དང་ཟ་འོག་གི་སྟེང་ལ་བཙན་པོའི་རིག་གནས་དང་འབྲེལ་བའི་རི་མོ་འདྲ་མིན་ཕབ་སྟེ་བཙན་པོའི་དར་གོས་ཞེས་ཐུན་མིན་གྱི་ལག་རྩལ་དང་མཚོན་རྟགས་མཚོན་པའི་ཟ་འོག་གི་དར་གོས་མང་དུ་བཟོས། བཙན་པོའི་དར་གོས་ལ་ཁྱད་ཆོས་མངོན་གསལ་ཞིག་ཡོད་པ་ནི། ངང་པ་མཇིང་བསྣོལ་དང་། སེང་གེ་མཇིང་བསྣོལ། བྱ་མ་རྟ། གྱི་ལིང་། གྱི་ལིང་ཁ་སྤྲོད། བྱ་མ་བུམ། ཤ། གཙོད། མི་མཐུན་ཕྱོགས་ལས་རྣམ་རྒྱལ་སོགས་མང་ངོ་།། ངང་པ་མཇིང་བསྣོལ་གྱི་རི་མོའི་མཚོན་བྱ་ནི་གཙོ་བོ་མཛའ་མཐུན་གྱི་དོན་ཡིན། དཔེར་ན་ལོ་རྒྱུས་ཐོག་རྒྱ་བཟའ་ཀོང་ཇོ་སྲོང་བཙན་གྱི་བཙུན་མོར་བསུ་བའི་སྐབས་སུ། སློང་རྟགས་སུ་ངང་པའི་ཆང་སྣོད་སོགས་འབུལ་བར་བཤད། སེང་གེ་མཇིང་བསྣོལ་ནི་དབང་ཐང་གི་མཚོན་དོན་ཡིན། དེ་ལྟར་རེ་རེ་ནས་མཚོན་དོན་མི་འདྲ་བ་ཡིན་པ་ཤེས་དགོས།

16344331_1301217686602395_111724831_n.jpg

    གོས་རིས་ལ་མེ་ཏོག་གི་རིགས་ཀྱང་ཧ་ཅང་མང་ཡང་གཙོ་བོ་པདྨ་འདབ་བརྒྱད་དང་། འདབ་ལྔ་ཅན་ཤོས་ཆེ། འདབ་བརྒྱད་ནི་ས་གཞི་དང་། ཤེས་རབ། མོ། འཁྱིལ། སྲིབས། མཚན་སོགས་ནང་དོན་དུ་མ་ཞིག་ལ་འཇུག འདབ་ལྔ་ཅན་ནི་ཚེ་སྲོག་གི་འབྱུང་ཁུངས་ལ་འབྲེལ་ཡོད་པ་དང་། ཡ་ཧུ་དཱ་བ་པ་རྣམས་ཀྱིས་འདི་ལ་ཚེ་སྲོག་གི་རི་མོ་ཟེར། དོན་དུ་འབྱུང་བ་རྣམ་ལྔ་དང་། དབང་ལྔ་སོགས་དང་འབྲེལ་བ་ཡོད་པས་དེའི་མཚོན་དོན་གྱི་རི་མོའོ།།

    ལར་བཤད་ན། བཙན་པོའི་རྒྱལ་རབས་ཀྱི་རིག་གནས་ནང་དུ། སྐབས་དེའི་བཙན་པོའི་རྒྱལ་ཁབ་ཀྱི་ཕྱོགས་བཞི་ན་ཡོད་པའི་རྒྱ་གར་དང་། བལ་པོ། ཐོ་གར། དྲི་ཟའི་ཡུལ། ཨུ་རྒྱན། ཏ་ཟིག ལི་ཡུལ། བྷར་མ། བྷང་གཱ་ལ། རྒྱ་ནག ཧོར་སོགས་ཀྱི་རིག་གནས་གོམས་སྲོལ་སོགས་ནང་འདྲེན་བྱས་ཡོད་པས། རྒྱལ་ཁབ་དེ་དག་གི་རིག་གནས་ཀྱི་ཤུགས་རྐྱེན་ཡང་མི་དམན་པ་ཞིག་ཐེབས་ཡོད་པ་མངོན་གསལ་རེད། དེ་འདྲ་ཡིན་ཕྱིར། བཙན་པོའི་རྒྱལ་རབས་སྐབས་ཀྱི་སྒྱུ་རྩལ་རི་མོ་ལའང་གོང་དུ་བཤད་པའི་རྒྱལ་ཁབ་དེ་དག་གི་སྒྱུ་རྩལ་དང་། རིག་གནས་ཀྱི་ཤུགས་རྐྱེན་ཐེབས་ཡོད་པའང་བཤད་མ་དགོས་པ་ཞིག་རེད། མདོར་ན། བཙན་པོའི་རྒྱལ་རབས་ཀྱི་རི་མོ་ནི་སྐབས་དེའི་བོད་བཙན་པོའི་སྤྱི་ཚོགས་ལ་ཐད་ཀར་འབྲེལ་བ་ཡོད་པས། ནང་དོན་ཟབ་ལ་ལོ་རྒྱུས་ཀྱི་དོན་སྙིང་ཡང་ཤིན་ཏུ་ཆེ་བ་མ་ཟད། དུས་སྐབས་དེར་མཚོན་ན་བོད་བཙན་པོའི་དམག་ཆས་དང་འབྲེལ་བའི་རིག་གནས་ནི་འཛམ་གླིང་གི་ཨང་དང་པོ་ཡིན་ཞེས་ཏ་ཟིག་གི་ལོ་རྒྱུས་དང་། ཐང་རྒྱལ་རབས་ཀྱི་ལོ་རྒྱུས་ཡིག་ཚང་སོགས་སུ་གསལ་བོར་འཁོད་ཡོད་པས། ངས་འདི་ནས་རིགས་ཞེན་གྱིས་འུར་བསྟོད་བྱས་པ་དེ་འདྲ་གང་ཡང་མིན། གཙོ་བོ་སྐབས་དེའི་བོད་པ་ཚོའི་ཤེས་འཇོན་དང་སྙིང་སྟོབས་ནི་དེང་སང་ནང་བཞིན་འདི་འདྲའི་ནུས་མེད་གཉོམ་ཆུང་ཞིག་གཏན་ནས་ཡིན་མི་འདུག་གོ་སྙམ།    

16295604_1301217696602394_1804113597_n.jpg

    འོ། དེ་ནས་མཐའ་མའི་རི་མོ་རུ་ངང་པ་མཇིང་བསྣོལ་ཅན་འདི་བཞག་སྟེ་མཇུག་རྫོགས་དགོས་དོན་ནི་གཙོ་བོ་སྡེ་བ་འདི་ལ་ནང་མཐུན་ཡོང་རྒྱུའི་རེ་བ་དང་། སྒོས་སུ་རང་རེའི་སྐྱབས་རྗེ་དམ་པ། སྒོ་དམར་སྤྲུལ་པའི་སྐུ་རིན་པོ་ཆེ། ཕུར་མཇལ་བླ་མ་བསྟན་འཛིན་མཐུ་སྟོབས་གྲགས་པའི་སྐུ་ཚེ་བརྟན་ཅིང་མཛད་འཕྲིན་རྒྱས་པའི་སྨོན་ལམ་དང་བཅས་བཀྲ་ཤིས། ཁ་བྲོ།།

                                                   2017/1/24
0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།