ས་བུ་ཆེ་ཡིས་མེ་ལྕེར་མཆན་དུ་བསྟབས་པ།

782

 

རྩོམ་དང་པོ་དེ་ཡི་ལྟ་ཚུལ་བཞི་ལ་མི་འཐད།

 

༡ ཚོར་ཤེས་དང་དཔྱོད་ཤེས་ཁ་ཁ་བྱེད་པ་དེ། ནུབ་ཕྱོགས་དུས་རབས་བར་མའི་ལྷ་རིག་སྨྲ་མཁན་དག་གི་ལྟ་བ་བླངས་ཡོད་རེད་བསམ་གི དེ་ཚོའི་ལྟ་བ་དེ་མུ་མཐུན་དུ་དུས་རབས་འདི་ནང་དུ་རྒྱུད་འཛིན་བྱེད་མཁན་བྱུང་བཞིན་ཡོད་པ་རེད་མོད་ཀྱང་། རིག་པ་ཅན་སུས་ཀྱང་དེ་ཡི་སྐྱོན་གང་ཡིན་མཐོང་ཐུབ་ཀི་རེད་དྲན། ལྷ་རིག་སྨྲ་མཁན་ཞིག་ལ་མཚོན་ན། ཚོར་ཤེས་ནི་རྫས་ལས་བྱུང་བས་དེ་མི་དགེ་ཅན་དང་།  ངན་བསླད་ཅན། བསླུ་བྲུད་ཅན་ཡིན་པ་དང་། དཔྱོད་ཤེས་ནི་ལྷ་ཆེན་པོའི་བྱིན་རླབས་ལས་བྱུང་བ་ཡིན་པས། དེ་ནི་བསླུ་མེད་དང་མཐོ་སར་འཇོག་པ་རེད། རྒན་པ་མེ་ལྕེ་ཡིས་ཕལ་ཆེར་བཤད་སྟངས་འདི་ཡི་དེང་རབས་བརྗོད་སྟངས་ཤིག་སྐྱོང་གིན་ཡོད་པ་རེད།  ཁོང་གིས་ཚན་རིག་ནས་བཤད་ཀྱིན་ཡོད་པས། དཔྱོད་པའི་འབྱུང་གཞི་ཚོར་བ་ཡིན་པ་དེ་དགག་བཞིན་ཡོད་ས་རེད། རྩོམ་འདི་ལས་དེ་འདྲ་མངོན་པར་འཆད་མེད་ཀྱང་། དེ་ལ་ཕྱོགས་ཞན་ཡོད་པ་ནི་ང་ཚོས་དཔྱད་ཙམ་གྱིས་མཐོང་ཐུབ། དེ་བས། དུས་རབས་བར་མའི་ལྟ་བ་སྐྱོང་མཁན་གྱི་རྙིང་ཞེན་པ་ཞིག་གིས་དེང་རབས་ཀྱི་གཞོན་ནུ་ལ་ལམ་སྟོན་ཨེ་འོས་སམ། ཡང་ན་ལྷ་རིག་སྨྲ་མཁན་ཞིག་གིས་ནང་པའི་རྗེས་འཛིན་པ་ལ་ལམ་སྟོན་ཨེ་ཐུབ་བམ། །

༢ ཁོང་གིས་ཚོར་བ་དེ་དོར་དགོས་དཔྱོད་པ་ལེན་དགོས་ཟེར་བ་ལ་འདང་ཟིག་རྒྱོབ་དང་། དེ་ནི་འོ་མ་མི་དགོས། ཞོ་དགོས་ཟེར་བ་དང་མི་འདྲའམ། འཇིག་རྟེན་ཤེས་བྱ་ཇི་སྙེད་པ། ཚོར་བས་ཚད་མར་མ་བྱས་ནས་བདེན་པར་གྲུབ་པ་ཞིག་གང་ན་ཡོད། ཆོས་ལུགས་ཕལ་མོའི་ནང་གི་ལུང་སྟོན་ལ་ཁུངས་བསྐྱལ་བ་མ་གཏོགས། ནང་ཆོས་དང་ཚན་རིག་སོགས་ཀྱིས་འཇིག་རྟེན་ཤེས་བྱ་དང་ཚོར་བ་གཉིས་ཁ་ཁར་ཕྱེ་བ་མ་རེད། ཤེས་བྱ་ཡིན་ན་དབང་བོ་ལས་ཐོབ་དགོས། དཔྱོད་ཤེས་ཟེར་བ་དེའི་རྨང་གཞི་ཡང་ཚོར་ཤེས་ཡིན་ངེས། །

༣ ཡང་ང་ཚོའི་སློབ་གསོའི་ལམ་ལུགས་འདི་ལ་སྐྱོན་མང་པོ་ཡོད་པ་ལས་ཆེ་ཤོས་ནི། སྒོང་ང་ཐམས་ཅད་སླེ་བོ་གཅིག་གི་ནང་ཏུ་བླུགས་བཞག་ཡོད་པ་དེ་རེད། འོན་ཏེ་འདི་ལ་ཉེས་འགན་འཁུར་མཁན་ཞིག་དགོས་ན། དེ་ཏག་ཏག་གཞོན་རབས་སློབ་མ་ཚོ་ཡིན་རྒྱུ་མ་རེད། སྐྱོན་དེའི་འགན་ཁུར་བ་ཞིག་ནང་ནས་བཙལ་དགོས་ན། ཏག་ཏག་རྒན་རབས་ཚོས་སློབ་གསོའི་ལམ་ལུགས་ཆ་ཚང་ཞིག་ཀྱང་ལེགས་གྲུབ་ཐུབ་མེད་པ་དེ་ལ་ཐུག་ཡོད། དེ་བས་ཚང་མས་སྙན་ངག་དང་། གློག་བརྙན་དང་བརྩམས་སྒྲུང་སོགས་ལ་ཤི་འཐམ་རོ་འཐམ་བྱེད་པ་བདེན་མོད། དེ་ཡི་ནག་ཉེས་ནི་གཞོན་རབས་ལ་འགེལ་ཐབས་མེད། གཞོན་རབས་ནི་སློབ་གསོ་དེ་འདྲ་ཞིག་མྱོང་མཁན་ཙམ་ཡིན་པ་ལས་སློབ་གསོ་དེ་འདྲ་ཞིག་འཛུགས་མཁན་ནི་མ་ཡིན་ནོ། །

༤ གཞོན་ནུས་ཕྲེང་བ་བཏགས་ན་ནག་ཉེས་དང་རྨོངས་རྟགས་ཤིགག་གང་ལ་ཡིན། ཆོས་ལ་དད་པ་ཅན་གྱིས་ཆོས་ལ་དད་པ་བྱེད་ལོས་ཆོག ཆོས་སྒྲུབ་ཀྱིན་མེད་ཀྱང་ཕྲེང་བ་བཏགས་ན་ཡང་བོད་མིའི་ཆ་ནས་ཤིན་ཏུ་འོས་པ་ཡིན་ཏེ། དེ་ནི་དྲག་པོའི་སྤྱི་ཚོགས་འོག་གི་གཉེན་པོའི་ངོ་རྒོལ་ཞིག་ཡིན་པ་དང་། སྔ་ཚེ་མི་ནག་རྣམས་ཀྱིས་འདྲ་མཉམ་རྩོད་སྐབས། སྐྲ་ཟིང་ཟིང་དང་རྣ་རྒྱན་ཆེན་པོ་བཏགས་པ་དང་ངོ་བོ་གཅིག་རེད། དེ་ནི་མི་རིགས་ཀྱི་ངོ་རྟགས་འཚོལ་བའི་ཐབས་ཤེས་ཞིག་རེད། གལ་ཏེ་ཆོས་ལུགས་དུག་མཐོང་གི་གུ་དོག་དེའི་ནང་དུ་ལྷུང་བ་ཡིན་ན། ཕྲེང་བ་རིག་ན་འདྲེ་རིག་པ་ལྟར་བྱུང་བ་ཡིན་མོད། སྤྱི་ཚོགས་ཀྱི་ཆེ་ཕྱོགས་ནས་དེ་འདྲའི་དོ་སྣང་ཡོད་པ་མ་རེད། དེ་བས་གཞོན་པ་ཚོས་ཕྲེང་བ་བཏགས་ན་ང་རྒྱལ་དང་གཟི་བརྗིད་ཅིག་ཏུ་བརྩི་རྒྱུ་དང་། དེའི་ཐོག་ནས་མ་ཎི་དང་ཁ་འདོན་ཐུབ་ན་རབས་ཡིན། །

རྩོམ་གཉིས་པའི་ནང་ཁོང་གིས་སྙན་ངག་པ་རྒན་རབས་ཚོས་སློབ་ཆེན་པ་མགོ་སྐོར་མ་བཏོང་ཟེར་ནས་བརྗོད་འདུག  དེ་ཡིན་ན་ཁོང་གིས་ཀྱང་གཞོན་རབས་ལ་ལམ་སྟོན་བྱེད་དགོས་ས་མ་རེད། ཁྱོད་ཚོས་གཞོན་ནུ་དག་ལུག་ཁྱུ་ཞིག་ཏུ་མཐོང་ནས་དེ་ལ་ངེས་པར་ཏུ་ལུག་རྫི་ཞིག་དགོས་པ་དྲན་ཡོད་དམ། གཞོན་ནུའི་ལམ་ནི་རང་རང་གིས་ཤེས་རབ་དང་འཇིག་རྟེན་ཤེས་བྱ་ལས་ཐོབ་ཐུབ་པ་ཡིན། དེ་ལ་སྙན་ངག་པས་བསླུ་བྲུད་མི་དགོས་པ་བདེན་མོད། དེ་ལ་དཔྱོད་ཤེས་ཅན་གྱི་རྒན་རབས་དག་གི་ལམ་ཁྲིད་ཀྱང་མི་དགོས་པ་དེ་བས་བདེན། ང་ཚོ་གཞིས་ནང་ལ་མཚོན་ན། ལོ་སུམ་བཅུ་ཡན་གྱི་མི་རབས་དེ་དག གལ་ཏེ་གྲྭ་བ་དང་གྲྭ་ལོག་འདྲ་མིན་ན། ཆ་ཚང་གི་སློབ་གསོ་རག་ཡོད་མཁན་དུ་ཡོད། མི་རབས་དེ་ལ་རེ་བ་ཅི་ཡང་བཅོལ་དགོས་དོན་མེད། དེ་དང་ལྡོག་ནས། རེ་བ་གཞོན་རབས་ལ་བཅོལ། ལམ་སྟོན་དགོས་ན་གཞོན་རབས་ཀྱིས་ཕྱིར་རྒན་རབས་ལ་དགོས་པ་རེད་འདོད། །

 

 རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

 

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།