སེ་གླིང་རྒོད་ཚང་ལ་མཇལ་བ།

22033



ན་ནིང་སྟེ་ཕྱི་ལོ༢༠༡༨ལོའི་ཟླ་༡༠ཚེས༡༠ཉིན། ཨ་མ་དང་སྲིང་མོ། གྲོགས་བདའ་ཚང་སྙེམས་གྲོལ། གྲོགས་ཐུབ་བསྟན་ཉི་མའི་ཕ་མ་གཉིས་བཅས་ངེད་ཅག་མི་ཟླ་དྲུག་འཕན་ཡུལ་ལ་གནས་བསྐོར་དུ་ཆས། ནམ་མ་གསལ་ཙམ་ལ་གཡུ་ཐོག་ལམ་ཁུལ་གྱི་མགྲོན་ཤག་ནས་བུད་དེ། ཐོག་མར་འདམ་གཞུང་དང་དེ་ནས་རྭ་སྒྲེང་བརྒྱུད། ཉི་མ་ཕྱེད་ཡོལ་དུས་སུ་སེ་གླིང་རྒོད་ཚང་ལ་འབྱོར། དགོང་མོ་དེར་ཆར་བབས་དྲགས་པ་དང་། འཕྱི་པོ་སོང་ཙང་། ཞིབ་མཇལ་བྱེད་ལོང་མ་བྱུང་བར་སྨོན་ལམ་རེ་དང་པར་རེ་བརྒྱབ་སྟེ་ངེད་ཅག་སླར་ཡང་འཕན་པོ་ཆག་ལ་བརྒྱུད་ནས་ལམ་ལ་ཆས། རྗེས་ནས་ཕྱིར་ཕ་ཡུལ་དུ་ཐོན་པའི་ཉིན་ཞིག་ཨ་མས་ཉེ་མི་གཞན་ཞིག་ལ་ཁ་བརྡ་གླེང་སྐབས༼ངེད་ཆ་ད་རེས་བྲག་དམར་སེ་གླིང་རྒོད་ཚང་ལ་མཇལ་བ་རེད་གདའ༽ཞེས་སྤྲོ་སྣང་འཁོལ་བས་བཤད་པ་ཐོས། དེ་ནས་བཟུང་ནམ་ཡིན་རུང་ངའི་སེམས་ལ་བྲག་དམར་སེ་གླིང་རྒོད་ཚང་ཞེས་པ་འཁོར་ཡོང་ལ། ཨ་མའི་སྤྲོ་སེམས་འཁོར་བོའི་ཁ་བརྡ་དེ་དང་སྣང་བརྙན་དེའང་འཁོར་ཡོང་།


རེད་དེ་སེ་གླིང་ལས་བྲག་དམར་སེ་གླིང་ཞེས་པ་རྣམ་ཐར་སོགས་ནས་མཇལ་རྒྱུ་མ་བྱུང་མོད། གང་ལྟར་གནས་འདི་ནི་སྟག་ལུང་བཀའ་རྒྱུད་པ་མང་པོས་གཏན་སྤངས་རྣལ་འབྱོར་ལ་བརྩོན་སའི་རི་ཁྲོད་ཅིག་ཡིན་འདུག་གོ། དུས་རབས་བཅུ་གཉིས་པའི་སྟོད་ལ་ཞང་སྟོན་ཁང་མོ་ཆེས་སྟག་ལུང་ཐང་པ་བཀྲ་ཤིས་དཔལ་ལ་གནས་གཞིར་ངོ་སྤྲད་པ་དང་། འདི་ཡི་བྲག་སྐྱིབས་ནས་སྟག་ལུང་ཐང་པས་ལོ་བདུན་སྒྲུབ་པ་མཛད་མཐར་སློབ་མའི་ཚོགས་བསྐྱངས་པ་བྲག་ལྷས་སུ་མི་ཤོང་བའི་ཚོད་དུ་འཕེལ་བར་བཤད་དོ།། རྣམ་ཐར་འགའ་ན་བྲག་སླེ་དང་བྲག་གླེ་ཞེས་ཀྱང་བྲིས་གནང་ཡོད་དོ།། གནམ་མ་བརྩེགས་དགུང་ན་མཐོ་བ་དེ།།  སེང་གླིང་བྲག་སྐྱ་རྡོ་རྗེའི་རྫོང་།། གནས་རང་བཞིན་འབར་ལ་བཀྲ་ཤིས་པའི།། རི་བོ་བག་ཡངས་ནགས་ཀྱིས་བརྒྱན།། སྟེང་གི་གནམ་ནི་འཁོར་ལོ་འདྲ།། འོག་གི་ས་ནི་པད་མ་འདྲ། ཤར་རི་དམའ་ཞིང་ནུབ་རི་མཐོ།། བྱང་རི་སྐྱོར་ཞིང་ལྷོ་རི་གཞོལ།། རི་སུལ་སྣ་ཚོགས་རྩི་ཤིང་རྒྱས།། པད་མ་སྟོང་ལྡན་མེ་ཏོག་བཀྲ།། བྱ་རྒྱལ་མང་པོ་འཁོར་ཞིང་ལྡིང་།།  བྱ་ཕྲན་མང་པོ་སྐད་སྙན་སྒྲོགས།། ཞེས་དང་།


དཔལ་ཆེན་པོ་ཏཻ་ལོ་ཕྱིན་ཆད་ནས།། ང་བན་ཆུང་བཀྲས་དཔལ་ཡན་ཆད་དུ།།  བདེ་གཤེགས་བརྒྱུད་པ་མ་གཏོགས་པ།། ཁོང་སོ་སྐྱེའི་བར་ཆོད་མེད་དོ་གསུངས།། ཞེས་སྟག་ལུང་ཐང་པས་གནས་འདིའི་རང་བྱུང་གི་བཀོད་པ་ལ་སྦྱར་བའི་མགུར་ཡང་བཞེངས་སོ།།


སྟག་ལུང་ཐང་པ་དང་། སྟག་ལུང་སངས་རྒྱས་ཡར་བྱོན། སྟག་ལུང་ནམ་མཁའ་བཟང་པོ་སོགས་ཀྱིས་རིམ་བཞིན་རི་ཁྲོད་བཟུང་སྟེ། གནས་འདི་ནས་ངེསམེད་ཀུན་རྟོག་གི་རྒྱུ་བ་རླུང་ལ་བསྐུར་མྱོང་བའི་རྣམ་ཐར་ནི་རབ་ཏུ་འབེལ་ལོ།། ད་ལྟ་འཕན་ཡུལ་ཕོད་མདོ་གྲོང་གི་ཁོངས་དང་། སྟག་ལུང་དགོན་དང་སྤྱི་ལེ་ལྔ་ཡས་མས་ཀྱི་གནས་སུ་བཞུགས། སྟག་ལུང་ཐང་པའི་སྒྲུབ་གནས་ཐོག་མ་དང་། རྫོང་ཆེན་པོ་དྲུག་གི་ཡ་གྱལ་སེང་གླིང་བྲག་སྐྱ་རྫོང་ནི་འདི་ཉིད་དོ།།  


མཚན་གྱི་རྣམ་གྲངས་གསོལ་སྟངས་ནི་འགའ་ཙམ་མཆིས་ཏེ།  སེང་གླིང་རྒོད་ཚང་དང་། སེ་གླིང་རྒོད་ཚང་། སེ་གླེ་རྒོད་ཚང་བཅས་སོ།།


ངག་དབང་རྣམ་རྒྱལ་གྱི་སྟག་ལུང་ཆོས་འབྱུང་དུ་སེང་གླིང་དང་། སྟག་ལུང་ཆོས་རྗེ་ནམ་མཁའ་བཟང་པོའི་རྣམ་ཐར་དུ་སེ་གླེ།  ཀཿ ཐོག་པ་ཆོས་ཀྱི་རྒྱ་མཚོའི་དབུས་གཙང་ལམ་ཡིག་དུ་སེ་གླིང་རྒོད་ཚང་ཞེས་གསལ་ལོ།། དེ་དག་རེ་རེའི་འགྲེལ་ཚུལ་ནི་སྟང་ལུང་ཐང་པའི་རྣམ་ཐར་མོས་གུས་ཀྱི་སྙེ་མ་དང་། འཕན་ཡུལ་གནས་བཤད་དགེ་ལེགས་ཀུན་འབྱུང་མ་རུ་རིམ་བཞིན་གསལ་ལོ།། དཔེ་ཆ་དེ་རྣམས་དཔེ་སྐྲུན་ཁོངས་སོ་སོའི་དཔར་མ་དང་། སྐུ་དྲིན་ཆེ་བའི་ནང་བསྟན་དཔེ་ཚོགས་ཀྱི་གློག་རྡུལ་དཔེ་ཆའི་རྣམ་པར་ཡང་བཞུགས་སོ།།


བཙན་པོ་ནོ་མོན་ཧན་གྱིས་རྒྱལ་བ་རྒོད་ཚང་པའི་གདན་ས་སི་ལི་རྒོད་ཚང་ཞེས་པ་དང་། བཤེས་གཉེན་ཚུལ་ཁྲིམས་ཀྱིས་བསྒྲིགས་པའི་ལྷ་སའི་དགོན་ཐོ་རུ་རྒོད་ཚང་པ་མགོན་པོ་རྡོ་རྗེའི་གདན་ས་གསེར་གླིང་རྒོད་ཚང་ཞེས་བྲིས་པ་གཉིས་ནི་ནོར་བཤད་ཡིན་པ་འདྲ་ཡང་ཁོ་ཚོད་གཅོད་མི་ཐུབ་མོད། འགོས་ལོའི་དེབ་སྔོན་དུ་རྒོད་ཚང་པས་སེང་གེ་གླིང་དང་རང་ཉོང་ཐང་གཉིས་སུ་ལོ་གཅིག་བཞུགས་པ་གསུངས་ཤིང་།  རྒོད་ཚང་རས་པའི་མཚན་གྱི་རྣམ་གྲངས་སུ་རྩེ་ལེ་རྒོད་ཚང་པ་སྣ་ཚོགས་རང་གྲོལ་ཞེས་གསལ་བ་དེ་ལ་གོ་ནོར་རེ་བྱུང་བ་ཨེ་ཡིན་སྙམ་མོ།། ཡང་གཏན་ནས་མིན་ཡང་སྲིད་དོ།།


དང་པོ་བྲག་ཕུག་གི་རྣམ་པ། བར་ལམ་སྒྲུབ་དགོན་གྱི་ངོ་བོ། སྔ་ཕྱིའི་འཕེལ་འགྲིབ་ཀྱི་བྱུང་བ། ད་ལྟ་ནང་རྟེན་གྱི་གཙོ་བོ། ཚོང་དཔོན་ནོར་བཟང་དང་འབྲེལ་བའི་གཏམ་རྒྱུད་ཀྱི་ཆ་སོགས་ནི་གནས་བཤད་དགེ་ལེགས་ཀུན་འབྱུང་མ་རུ་གསལ་ཙམ་མཆིས་སོ།། ད་དུང་རྣལ་འབྱོར་བ་མང་པོའི་དག་སྣང་གིས་འདི་རུ་གཟིགས་པ་ངོ་མཚར་ཆེ་ལ། དངོས་ཡོད་ཀྱི་ཉམས་དགའ་བའི་བཀོད་པའང་ཡིད་འོང་ཞེ་དྲག་ཅིག་ཡོད་ཅེས་ཞུའང་འདོད་དོ།། ཏལ་ཙམ་ནི་ཞུས་ཀྱང་ཞུས་སོ།།



          2019/11/21ཉིན་རྫ་སྐྱེས་ཕུར་བས་ཟིན་ཐུང་གི་རྣམ་པར་བྲིས་སོ།།


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།