ཉིན་བཅུའི་རིང་གི་ཐའེ་ལན་ཌུའི་འགྲུལ་བཞུད།

36003


               རྩོམ་པ་པོ། ཐེ་བོ་སངས་རྒྱས།


བསྐལ་བ་ཕག་ལོའི་ལོ་སར་སྐབས།། བློ་མཐུན་འགའ་དང་ལྷན་ཅིག་ཏུ།། ཐའེ་གོར་བསྐྱོད་པའི་ཟིན་ཐོ་ཞིག། ཀློག་འདོད་མཁན་ཚོའི་གཟིགས་མོར་དགྲམ།། མཁས་པའི་ཁྲི་ལ་འགྱིང་དང་གཅིག། དུས་ཚོད་གསེར་དུ་ཤེས་དང་གཉིས།། ལེགས་བཤད་བདུད་རྩིས་སྐོམ་པ་གསུམ།། འདི་ལ་སྤྱན་ཟུར་མ་གཡོ་རོགས།། 


         ལམ་དུ་ཆས་པ།


ཕྱི་ལོ་༢༠༡༩ཟླ་༡ ཚེས་༢༦ གི་ཕྱི་དྲོ་ཆུ་ཚོད་བདུན་དང་ཕྱེད་ཀའི་ཐོག སྒྲོལ་མ་གླིང་གི་བོད་དགེ་དཀོན་མཆོག་རྒྱ་མཚོ་ལགས་དང་། ནོར་གླིང་ཉམས་ཞིབ་འགན་འཛིན་འབྲོང་དར་ལགས། ང་ཚོ་གསུམ་སྤྱི་སྤྱོད་རླངས་འཁོར་ཞིག་ལ་བསྡད་དེ། ཧི་མ་ཅལ་མངའ་སྡེའི་རྡ་རམ་ས་ལ་ནས་ཛ་ལན་ངྷ་ར་དང་། པན་ཇབ་བམ་ལྔ་ལེན་ཡུལ།ཧ་རི་ཡ་ན་བཅས་ཀྱི་ནང་ཁྱོན་སྤྱི་ལེ་བཞི་བརྒྱ་ལྷག་བགྲོད་མཐར་སྐྱ་རེངས་ཤར་སྐབས་ལྡི་ལིའི་མན་ཇུ་ཀ་ཏྲི་ལཱར་སླེབས།མན་ཇུ་ཀ་ཏྲི་ལཱ་ནི། སྐད་གྲགས་ཆེ་བའི་ཏཱ་ཇི་མཱལ་བང་སོ་འདེབས་མཁན་ཏེ། མུ་གྷལ་རྒྱལ་པོ་ཤཱ་ཛྷང་གི་རྒྱལ་ཁང་གཉིས་པ་ལཱ་ལི་ཀེ་ལའམ་མཁར་རྫོང་དམར་པོ་ནས་བྱང་ཕྱོགས་སུ་སྤྱི་ལེ་བརྒྱད་དང་ཕྱེད་ཀའི་ས། ཆུ་བོ་ཆེན་པོ་བཞིའི་ཡ་གྱལ་ཡ་མུ་ནའི་གཙང་འགྲམ་དུ་ཆགས་ཡོད། གནས་དེར་བོད་པ་སྟོང་ཕྲག་བརྒལ་བ་གཞིས་ཆགས་པར་མ་ཟད། བོད་ཀྱི་ཁྱད་ཆོས་ཡོད་པའི་ལྷ་ཁང་དང་། མགྲོན་ཁང་། ཟ་ཁང་། འཚིག་ཇ་ཁང་། ཚོང་ཁང་། ཐང་ཁྲོམ་བཅས་སྲང་ཤར་དོག་མོར་གྱུར་པའི་ཁར་ཕྱོགས་བཞིའི་མགྲོན་པོས་དུས་བཞིར་འཁྲུག་ཆ་དོད་པོ་བྱེད། ས་གནས་བོད་མི་ཚོས་དུས་རབས་ཕྱེད་ཀ་ལྷག་སྲིད་འབྱོར་རིག་གསུམ་གྱི་བྱེད་སྒོ་འདྲ་མིན་སྤེལ་སའང་ཡིན། ང་ཚོ་M.T. (མན་ཇུ་ཀ་ཏྲི་ལཱའི་ཚིག་སྡུད)ལ་འབྱོར་དུས་བཟོ་གྲྭའི་དུད་ཞགས་དང་སྨུག་པ་འདྲེས་མས་གནམ་ངོར་ཡོལ་བ་འཐེན་འདུག་པས་ནམ་ལངས་སྐར་ཆེན་མཐོང་དཀའ། འགྲུལ་འཁོར་ལས་བབས་པ་ན་རྒྱ་གར་བ་འགས་འཚང་ཁ་བརྒྱབ་ཅིང་། གླ་འཁོར་ཨེ་དགོས། དོས་ཁལ་ཨེ་ཡོད། མགྲོན་ཁང་ཨེ་དགོས་སོགས་ཟེར་ནས་སུན་པོ་བཟོས།སོ་སོའི་ཅ་ལག་དག་དྲུད་ནས་ཤར་རྒྱག་ཤར་ཕྱོགས་མགྲོན་ཁང་དུ་བསྙེགས།མགྲོན་ཁང་སྒོ་ཁའི་གློག་གི་ཅོང་དྲིལ་མནན་པའི་ཡུད་ཙམ་ན། འགྱིག་གི་བསིལ་ལྷམ་དྲུད་པའི་རྒྱ་གར་བ་ཞིག་གིས་མིག་འཕུར་བཞིན་སྒོ་ཆེན་ཕྱེ་བྱུང་། ང་ནི་རྡོ་གཅལ་སྟེང་གི་ཁོའི་ཉལ་ཆས་དག་མཐོང་བས་ཁོག་འདར་དང་སྙིང་རྗེ་ལྷན་ཅིག་སྐྱེས། མདང་དགོང་རྒན་སེང་གེར་མངགས་པའི་ཁང་མིག་༣༠༧ཅན་གྱི་ལྡེ་མིག་སྤྲོད་རོགས་ཞེས་ཧིན་སྐད་རྡོ་ཆག་བཙན་སྒྲིག་བྱས། ཨ་དཱར་བྱང་བུ་རྣམས་པར་སློག་བརྒྱབ་ཅིང་གྲོགས་པོ་འབྲོང་དར་ལ་ཁང་མིག་ཅིག་བླངས། དེ་དུས་ལྡི་ལི་ནི་ཚ་བ་ཆེ་བའི་དཔེ་རུ་འདྲེན་ཟེར་ན་རྣ་བར་འགྲོ་དཀའ་བའི་ཚད་དུ་འདུགམགྲོན་ཁང་སྒོ་ཕྱེ་མ་ཐག་ཤར་སེ་ཉལ་ཐུལ་ནང་འཛུལ་ཅིང་དྲོད་ཁུགས་ཐབས་བྱས་པས་ཡུད་ཙམ་ན་རྨི་ལམ་གྱི་ཞིང་ཁམས་འགྲིམས། གཉིད་ལས་སད་དུས་ཚོུད་བརྒྱད་པ་ཡོལ་ཅིང་གྲོགས་དཀོན་རྒྱམ་ཡར་ལངས་ཏེ་ཁྲུས་ཁང་ནང་འཛུལ་འདུགཉིན་གཉིས་ཀྱི་སྔོན་ལ་ལྡི་ལིར་བྲེལ་སྟབས་ཀྱིས་བཤར་བའི་འགྲུལ་གྲོགས་ཤེར་རྒྱམ་དང་Jack གཉིས་ཀྱིས་ཁ་པར་ཐེངས་འགར་བཏང་འདུག་ལ། ཁྱེད་གཉིས་ལྡི་ལིའི་ཤར་ཕྱོགས་མགྲོན་ཁང་དུ་སླེབས་ཡོད་ཤག་རེད། ཁང་མིག་གང་དུ་ཡོད་ཅེས་དང་། གཙང་འགྲམ་གྱི་ལྷ་ས་ཟ་ཁང་དུ་ཞོགས་ཟས་ཟ་རུ་ཤོག་ཅེས་འཕྲིན་ཐུང་ཞིག་ཀྱང་བཞག་འདུག


དེ་ནས་ངས་ཁ་ངོ་བཀྲུ་བཤལ་རོབ་ཙམ་བྱས་ནས་ཡ་མུ་ནའི་འགྲམ་རྒྱུད་ཀྱི་ལྷ་ས་ཟ་ཁང་དུ་ཕྱིན།  དེར་གྲོགས་པོ་གཞན་སྐོར་ཞིག་དང་མཉམ་དུ་ཞོགས་ཇ་སྟབས་བདེ་ཞིག་ལ་རོལ། དེ་ནས་རྒན་སེང་གེ་དང་ང་ཚོ་མཉམ་དུ་འཚིག་ཇ་ཁང་ཞིག་ཏུ་འཛུལ་ནས་འཚིག་ཇ་འདྲ་འཐུང་ཞོར་ཅི་བགྲོས་མི་བགྲོས་བཤད། སྒོར་བུད་ནས་སྲང་ལམ་གྱི་རྒྱ་གར་མངར་ཇ་གྲགས་ཅན་དེ་བཏུང་བར་སོང་། རྒྱ་བལ་དུ་ཡུན་རིང་བཅའ་སྡོད་བྱེད་མཁན་ཚོར་ཇ་མངར་མོ་བཏུང་རྒྱུ་མ་བྱུང་ན་རུས་གསེང་ནས་ཟ་འཕྲུག་ལངས་མཁན་མང་། ཕི་གླིང་བ་ཚོས། རྒྱ་གར་ནི། ག་དུས་ཡིན་རུང་གསོལ་ཇའི་བར་གསེང་དང་། ག་བར་ཡིན་རུང་གསང་སྤྱོད་རེད། ཅེས་ཟུར་ཟ་བྱས་པར་བདེན་པའི་ཆ་ཞིག་ཡོད། ཆུ་ཚོད་བཅུ་པ་ཡས་མས་སུ་དཀོན་རྒྱམ་དང་ཤེར་རྒྱམ་དག་གྷོའུ་གྷང་གི་ཁྲོམ་ཉུལ་དུ་འགྲོ་འཆར་བསྒྲིགས།ང་ནི་དེ་སྔ་རྒྱལ་ཡོངས་འགྲེམ་སྟོན་ཁང་དུ་འགྲོ་མྱོང་མེད་པས་དེ་ལ་འགྲོ་འདོད་ཆེ་བས་ང་ཚོ་ཊུ་ཊུ་ཞིག་གི་ནང་བསྡད་དེ་ཝུ་ཐཱན་ས་ཝའི་ས་འོག་མེ་འཁོར་འབབ་ཚིགས་སུ་བསྐྱོད། ཁོ་བོ་རྒྱ་གར་སྒོ་ཆེན་“India Gate” ཉེ་འགྲམ་གྱི་འབབ་ཚིགས་བར་བསྐྱོད་ཅིང་བབས། ལམ་བར་ནས་བོད་པའི་སློབ་ཕྲུག་གསུམ་ལ་ཕྲད་ཅིང་ང་ཚོ་རྒྱལ་ཡོངས་འགྲེམ་སྟོན་ཁང་གི་སྒོ་ཁར་སླེབས། དེ་ནི་བརྗིད་ཆགས་པའི་ཁང་ཆེན་སུམ་ཐོག་ཅན་ཞིག་སྟེ།བྱ་འདབ་དང་། སྒོ་དང་སྒེའུ་ཁུང་། ཁྱམས་ར། ལན་ཀན། ཐེམ་སྐས་སོགས་རྒྱ་གར་གྱི་ཁང་བཟོའི་ཁྱད་ཆོས་ལྡན་ཅིང་སྤུས་ཀའང་འགྲན་ཟླ་བྲལ་བ་ཞིག་རེད། སྒོ་ཁར་ང་ཚོས་འཛིན་བྱང་རེ་ཉོས་ཏེ་ནང་དུ་འཛུལ་བ་ན། ཁང་མིག་རེ་རེ་བཞིན་རྡོ་ཆས་དུས་རབས་ཀྱི་གནའ་རྫས་དང་། རྡོ་བརྐོས་ཀྱི་ཕྱི་རོལ་པའམ་ནང་པའི་ལྷ་ལྷ་མོ་ངོ་མར་འཁྲུལ་འགྲོ་བ་རྣམས་དང་། ལྕགས་རིགས་ཀྱི་གོ་མཚོན་རིགས། ཤིང་བརྐོས་ཀྱི་ཅ་དངོས་སྣ་ཚོགས། གསེར་ཟངས་ཀྱི་འདྲ་སྐུ་ལུགས་མ།ས་རྫ། ཐང་ག་དང་། རྒྱན་ཆའི་རིགས་སོགས་བལྟས་ན་མི་ཚར་བ་གདའ།ཁང་ཕུག་ཏུ་གཞི་ཙན་དན་གྱིས་བྱས་པའི་ཀུན་དགའ་ར་བར་ཐའེ་བཟོ་བཀོད་དོད་པའི་གསེར་གྱི་རྒྱ་ཕིབས་ནང་སངས་རྒྱས་ཀྱི་རིང་བསྲེལ་རིན་པོ་ཆེ་ལྷང་ངེར་ལྷན་ནེར་བཞུགས།མཐའ་བཞིར་ལྕགས་ཐག་འཐེན་ཅིང་ལག་པ་འཆང་མི་ཆོག་ཅེས་བྲིས་འདུགདེར་རྒྱ་དཀར་ནག་སེར་གསུམ་གྱི་ལྟད་མོ་བས་པར་རྒྱག་པའམ་བརྙན་ལེན་པ་སོགས་བྱེད་བཞིན་འདུག་མོད། ངས་ནི་སངས་རྒྱས་ཀྱི་རིང་བསྲེལ་མདུན་ནས་ཕྱག་གསུམ་འཚལ་ཏེ་ཤུབ་བུར་གསོལ་བ་ཞིག་བཏབ། 


དེ་ནས་གཡས་སྐོར་དུ་ཁང་མིག་རེ་རེའི་ནང་གི་ལོ་རྒྱུས་ལྡན་པའི་ཅ་དངོས་དག་ལ་ལྟ་བཞིན་ཡོང་། གཡོན་ཟུར་ཞིག་ན་བོད་ཡིག་གི་མ་ཕྱི་རྒྱ་གར་གུབྟའི་ཡི་གེའམ་ཅི་ཞིག་ཡིན་པའི་དཔེ་མཚོན་རེའུ་མིག་ཅིག་གྱང་ངོས་སུ་བཀལ་འདུག་པ་འདྲ་པར་ཞིག་ཀྱང་བླངས་ཏེ་ཡོང་། དེ་མ་ཟད་བོད་ཀྱི་གསེར་སྐུ་དང་། ཐང་ག མཆོད་ཆ་སོགས་མང་ཙམ་མཐོང་། 


དེ་ནས་བོད་པའི་སློབ་ཕྲུག་གསུམ་པོར་བདེ་མོ་བཞག་སྟེ་བོད་སྒར་བསམ་ཡས་གླིང་གི་མགྲོན་ཁང་དུ་ཕྱིར་འབྱོར་དུས་རོགས་པ་ཚོ་མཐོང་སར་མི་འདུགཐང་ཆད་པའི་ཁར་ཁ་སྐོམ་ཞིང་གྲོད་ཁོག་ལྟོགས་པས་རྐྱེན་བྱས་ཏེ་ཉེ་འགྲམ་ཟ་ཁང་ཞིག་གི་དྲི་མ་ཞིམ་པོས་མགྲོན་དུ་བཀུག་སོང་། དགོང་དྲོ་འབྲོང་དར་ལགས་ཀྱིས་ང་ཚོ་བོད་ཟས་གླིང་གི་ཐོག་ཁར་མགྲོན་འབོད་བྱས། ཕྱིར་ཡོང་ནས་ང་ཚོའི་ཐོངས་མཆན་ཞུ་མཁན་ཨ་མདོའི་ཆོས་གྲགས་ལ་གནམ་གླ་དང་བཅས་པ་མི་རེར་ཁྱོན་ཧིན་སྒོར་༣༠༠༠༠ལྷག་སྔ་འདོན་བྱས་པ་རྩིས་བརྒྱབ།


ཕྱི་ཚེས་༢༨ལ་མན་ཇུ་ཀ་ཊི་ལ་དང་། པན་ཇབ་ཁྲོམ་ར། ཀམ་ར་ནཱ་ག་སོགས་སུ་ཉུལ་ནས་ཉི་མ་འཕུལ། ལག་དངུལ་རྣམས་ཨ་སྒོར་ལ་བརྗེས་པས་སྦ་ཁུག་ནི་དབུགས་ཤོར་བའི་ལྒང་ཕུག་ལྟར་ཆགས། དགུན་གོས་ཚུད་པའི་ཅ་ལག་འཐོལ་པ་རྣམས་རྒན་སེང་གེ་ལ་བཅོལ།  ནོར་གཏེར་ཟ་ཁང་དུ་དགོང་ཟས་རྒྱགས་ཚད་ཅིག་ཟོས་རྗེས་ཆུ་ཚོད་༡༡ཐོགཤེར་རྒྱམ་དང་དཀོན་རྒྱམ་Jack ང་ཚོ་མི་བཞི་པོས་གླ་འཁོར་ཞིག་གླས་ཏེ་ལྡི་ལིའི་རྒྱལ་སྤྱིའི་གནམ་ཐང་དུ་ཕྱིན། གནམ་ཐང་གི་འགག་སྒོ་ཕྱི་མར་ང་ཚོའི་ཕྱི་སྐྱོད་ལག་དེབ་ནང་གི་ཐོངས་མཆན་དང་གནམ་གྲུའི་འཛིན་བྱང་བསྟན་ཏེ་ལྟོ་ཕད་རྣམས་རྩིས་སྤྲད། འགག་སྒོ་ནང་མར་དེ་བཞིན་འགྲིམ་འགྲུལ་ཡིག་ཆ་ཁག་ལ་ཞིབ་བཤེར་དང་དྲི་བ་རེ་དྲིས་ཏེ་ཕྱིར་ཐོན་ཐེལ་ཙེ་བརྒྱབ། བཙན་བྱོལ་བོད་མིའི་ཕྱི་སྐྱོད་ལག་དེབ་སེར་པོ་འཆང་མཁན་རྣམས་ལ་རྒྱ་གར་གཙོས་པའི་གནམ་ཐང་ཁག་ནས་དཀའ་ངལ་འཐོལ་པ་རེ་རྒྱུན་མར་འཕྲད། ནམ་གུང་ཆུ་ཚོད་༠༣ཐོག་ཐའེ་རྟགས་ཅན་གྱི་གནམ་གྲུར་བསྡད་དེ་ཆུ་ཚོད་བཞི་མ་ཟིན་ཙམ་འཕུར། གནམ་གྲུའི་ནང་རྐུབ་བཀྱགས་དགུ་རེ་བསྟར་ཞིང་འགྲུལ་བ་བརྒྱ་ཕྲག་བརྒལ་བ་ཤོང་གི་འདུག གནམ་གྲུ་འཕུར་ནས་ཆུ་ཚོད་ཕྱེད་ཀ་ཙམ་ན་མཁའ་འགྲུལ་མ་གཉིས་རེས་བཟའ་བཏུང་འདྲུད་སྒམ་དེད་ནས་ཤ་ཡོད་དམ་ཡང་ན་ཞེས་འདྲི་ཞོར་ཟས་སྡེར་དང་བཏུང་བ་དག་ཕུལ། མི་རེར་རྣ་གཞུག་གསར་པ་རེ་འགྱེད་བརྒྱབ་པས་ངས་དུ་ཚོད་གཉིས་ཙམ་རིང་མདུན་ཐད་ཀྱི་བརྙན་འཕྲིན་ཆུང་ཆུང་ལས་གློག་བརྙན་ལ་བལྟས་ནས་ཡོང་། ཐའེ་མཁའ་འགྲུལ་མ་ཚོའི་ཞབས་ཞུའི་རྣམ་འགྱུར་བཟང་བ་ལ་དཔེ་ཞིག་མི་འདུགཕྱི་ཚེས་༢༩ཞོགས་ཀ་ས་གནས་ཆུ་ཚོད་དགུ་བ་ཡོལ་ཙམ་ན་ཐའེ་རྒྱལ་ས་བྷན་ཀོག་གི་རྒྱལ་སྤྱིའི་གནམ་ཐང་དུ་འབྱོར།


           ཉིན་དང་པོ།


དེབ་དཀར་ལས། “ལར་སྔོན་དུས་ཀྱི་སྲོལ་ལུགས་སོགས་ཇི་འདྲ་ཡིན་བསམ་པའི་ཚེ། རྒྱལ་ཁམས་གཞན་གྱི་ཡི་གེ་བྲིས་པའི་ལོ་རྒྱུས་སོགས་ལ་བལྟ་བ་ཙམ་ལས། རང་གི་མིས་རང་ཡུལ་གྱི་སྲོལ་ལུགས་འདི་འདྲའོ་ཞེས་ཞིབ་ཏུ་བྲིས་པ་ཞིག་ཤིན་ཏུ་རྙེད་དཀའ་བ་འདི་ཡུལ་ཀུན་ལ་འདྲ་བ་ཡིན།” ཞེས་གསུངས་པ་ལྟར་ཡིན་ན་ཟིན་ཐོ་འདི་མ་འོངས་པར་ཐའེ་ལན་ཌུའི་དཔྱད་གཞིའི་ཡིག་ཚགས་ཁྲོད་ཉར་ལས་ཆེ། ཨ་ལ་ཀུ་རེ་ཡིན། གཏམ་ཀུ་རེ་མ་བརྩེས་བཤད་སྲོལ་མེད།། ཟེར་བའི་བོད་ཀྱི་གཏམ་དཔེ་དེ་མ་ཐོས་སམ། ཕྱི་ཚེས་༢༩ཞོགས་པ་ས་གནས་ཆུ་ཚོད་༩ཡོལ་ཙམ་རེད། ང་ཚོ་བྷན་ཀོག་གི་སཱུ་ཝར་ན་བྷུ་མི་Suvarnabhumi international airport, Bangkok ཞེས་པའི་རྒྱལ་སྤྱིའི་གནམ་གྲུ་ཐང་དུ་འབྱོར་ཡོད། གནམ་ཐང་གི་ཁང་པ་བཞི་བརྩེགས་ཅན་ཕྱི་ནས་བལྟས་ན་འབྲུག་དཀར་པོ་གཉིས་ཞེང་དུ་དང་། གཅིག་འཕྲེད་དུ་བསྣོལ་ནས་བབས་པ་འདྲ་ཞིང་། ཀླད་ཁེབས་ནི་སྲ་རས་དཀར་པོའམ་ཅི་མཐའ་དམའ་ཞིང་དབུས་མཐོ་བ་གུར་གྱི་རྣམ་པ། ནང་ངོས་སུ་གཞུ་དབྱིབས་ལྟ་བུའི་ལྕགས་ཀྱི་གདུང་ཏལ་མ་ཕྲེང་བསྒྲིགས་ནས་ཕུབ་པ། མཚམས་མཚམས་སུ་རྒྱ་མཐོངས་ཤེལ་གྱི་སྒེའུ་ཁུང་པད་འདབ་ཀྱི་བཟོ་ལྟ་ཅན། དཀྱིལ་དབུས་ཀྱི་ཐོག་ཁར་གསེར་གྱི་མཆོད་སྡོང་དང་། ཤེལ་སྒོའི་གནམ་གཅལ་ཅན་གྱི་ཚོམས་ཆེན་དབུས་མར་སྐུ་མདོག་སྣ་ཚོགས་པའི་ལྷའམ་མི་བུ་དག་གིས་རྒྱ་མཚོ་ལས་གཡུ་འབྲུག་མགོ་བོ་གསུམ་པ་ཞིག་བཟུང་བའི་འདྲ་སྐུ་ཡ་མཚན་ཅན། གཞན་ཡང་།གློག་རྡུལ་རྩིས་འཕྲུལ་དང་། བརྡ་འཕྲིན། གློག་གི་འཁོར་སྐས། བསིལ་ལྷང་ལྷང་གི་གྲང་གློག ཀླུ་ཡི་བང་མཛོད་ལྟ་བུའི་ཁྲོམ་ར་སོགས་གྲ་རྒྱས་ཕུན་སུམ་ཚོགས་ཤིང་། ར་སྐོར་ནང་ལོགས་སུ་མེ་ཏོག་ལྡུམ་ར་བཅས་ལྟ་ན་སྡུག་པ་ཤ་སྟག་གོ། ཉིན་མཚན་ཁོར་མོ་ཡུག་ཏུ་གནམ་གྲུ་འབབ་འཕུར་མཚམས་མི་ཆད་ལ་ཕྱོགས་འགྲུལ་གྱི་འཚང་ཁ་ཆེ་བ་སྨོས་ཅི་དགོས། སྔ་ལོར་བྷན་ཀོག་ཏུ་ཕྱོགས་བཞི་མཚམས་བརྒྱད་ནས་འགྲུལ་བ་བྱེ་བ་གཉིས་དང་ས་ཡ་གཉིས་སླེབས་པས། འཛམ་གླིང་ནང་ལྗོངས་རྒྱུ་བ་ཆེས་མང་ཤོས་སུ་གྱུར་པར་རྒྱུ་མཚན་མེད་པ་ག་ལ་སྟེ། དགུན་གྱི་གྲང་རེག་ཟེར་བ་མིང་ཙམ་ཡང་མ་གྲགས་པ་དང་། བི་ཤྭ་ཀརྨས་པིར་གྱིས་བྲིས་འདྲའི་རྒྱ་མཚོའི་གླིང་ཕྲན། སྐབས་གསུམ་གནས་ནས་བབ་འདྲའི་རང་བྱུང་གི་རྦབ་ཆུ། ལོ་ངོ་སྟོང་ཕྲག་འགོར་བའི་གནའ་ཤུལ། ལྐུགས་པས་ཀ་ར་ཟོས་འདྲའི་བཟའ་བཏུང་གི་བྲོ་བཅུད། ཁུ་ཚུར་གཅིག་གིས་ཕ་རོལ་པོ་རྫོག་པའི་ཐའེ་དྲག་རྩལ། ཟ་འོག་ལ་ཅི་འདོད་དུ་ཕབ་འདྲའི་ཁབ་གཙགས་རི་མོ། ཐང་ཅིག་ལ་རྨི་ལམ་གྱི་ཞིང་དུ་ཁྲིད་པའི་སྐུ་མཉེད། འདོད་པའི་སྒྱུ་རྩལ་རེ་བཞིར་མཁས་པའི་གཟུགས་འཚོང་མ་སོགས་རྒྱང་རིང་གི་མག