རྨ་ལྕམ་རོག་ཏི་རྒྱལ་མོའི་བསང་མཆོད་འཕྲུལ་དགའི་རོལ་མོ།

34930

 

མཛད་པ་པོ།   འབུམ་གསར་མཐུ་སྟོབས་མགོན་པོ།

 

ཧྲི༔ འཁོར་འདས་གདོད་མའི་ཀློང་དུ་རྫོགས་པའི་འཕྲུལ།།

རང་རིགས་ཨོ་རྒྱན་སྣང་སྲིད་འདུལ་བྱེད་རྩྭལ།།

འཇའ་ཟེར་འོད་ཕུང་འཁྲིག་དབུས་དྭངས་མའི་སྐུ།།

ཆས་བཞི་རབ་རྫོགས་སྲིད་གསུམ་ཟུལ་གནོན་གསལ།།

སྐྱཻ༔ རྨ་རྫ་ཆོས་ནོར་དགེ་བཅུས་ཕྱུག་པའི་ལྗོངས།།

འཆི་མེད་གྲོང་ཁྱེར་ལས་འཕག་སའི་ཐིག་ལེར།།

རྫ་སྤང་གཡུ་ཡི་མདོག་འཆང་ནོར་བུའི་ཚལ།།

རྩེ་མོར་ཆར་སྤྲིན་སྨུག་པོ་ལང་ལོང་འཁྲིག།

རྐེད་པ་སྣ་ཚོགས་མེ་ཏོག་རྣམ་པར་བཀྲ།།

རྩ་བར་རི་དྭགས་མང་པོས་རྩེ་བྲོ་བསྒྱུར།།

ཕྱི་བལྟས་ས་འཛིན་དབང་པོའི་རྣམ་པ་ལ།།

ནང་དུ་རིན་ཆེན་ཕོ་བྲང་ཉམས་དགའ་བ།།

ལྷ་ཀླུ་དྲང་སྲོང་དུ་མའི་བསྟི་གནས་མཆོག།།

རཏྣ་ར་གའི་འཕྲེང་བས་ཁོར་ཡུག་སྤྲས།།

ངོ་མཚར་བཀོད་པས་ཡོངས་སུ་བརྒྱན་པའི་དབུས།།

ལྷ་སྨན་ཀླུ་མོ་ཡིད་འོང་འོད་ཆགས་མ།།

སྟོན་ཟླ་རབ་དཀར་ཞལ་འཛུམ་དམར་མདངས་ཆགས།།

སྣག་སྣུམ་དབུ་སྐྲའི་ལན་ཚར་ཟུར་ཕུད་ལྔར།།

གསེར་གྱི་མེ་ཏོག་ཆུ་ཤེལ་མར་གད་དང་།།

ཨིནྟྲ་ནི་ལ་འབྲོམ་བུའི་རྒྱན་གྱིས་བརྒྱན།།

ཆུ་དར་མཐིང་ཀ་གསེར་གྱི་ཧ་ལོ་རིས།།

རྨ་བྱའི་སྒྲོ་ཐུལ་རྐེད་འཆང་གཡང་ལུགས་གསོལ།།

འདོད་འབྱུང་གསེར་གྱི་གའུ་རིན་པོ་ཆེ།།

ནོར་བུའི་རྒྱན་འཕྲེང་དོ་ཤལ་ལྔ་བརྩེགས་སྤྲས།།

གཡུ་མདོག་ས་ལྷམ་ནོར་བུའི་ཕྲ་ཅན་མནབས།།

ཕྱག་གཡས་རྩྭ་མཆོག་ཀུ་ཤའི་ཆུན་པོ་དང་།།

གཡོན་པས་གསེར་ཞོང་མར་ཁུས་བཀང་བ་ཐོགས།།

གཉེན་ལྕུགས་འཁྲིལ་ལྡེམས་གཞོན་ཚུལ་སྒེགས་པའི་འགྲོས།།

ཟུར་ནས་ལྟ་ཞིང་ཟོལ་ནས་འགྱིང་ཞིང་འགྲོ།།

ཉེ་བར་འདུ་ཞིང་བསྒྲུབ་མཆོག་བུ་བཞིན་སྐྱོང་།།

འཁོར་དུ་ལྷ་ཀླུ་མི་ཡི་བུ་མོ་འབུམ།།

རཏྣའི་ཁང་བཟང་ལས་ཐོན་མཁའ་ལ་ཆས།།

སྤྲིན་ལ་རྟེན་བཅས་ན་བུན་ལམ་ནས་རྒྱུ།།

ཚུར་བྱོན་བདག་ཉིད་གསང་སྔགས་སྟོན་པ་མཆོག།

པདྨ་ཀ་རའི་ཐུགས་སྲོག་ཟག་མེད་ཀྱིས།།

འོད་ཟེར་དམར་འོད་ཉི་མ་འབུམ་ལྡན་གཞིས།།

རབ་བསྡུས་ཆགས་པའི་ཡིད་འོང་ཤེལ་གྱི་གུར།།

སུམ་རྩེན་གནས་བསྙེགས་ནོར་བུའི་ཕྱུར་བུར་གཏམས།།

འཇའ་ཚོན་དུ་མའི་དྲ་བས་སྤྲས་པའི་དབུས།།

མཛེས་བྱེད་པདྨ་དམར་པོའི་གདན་ལ་བཞུགས།།

བྷྲུཾ༔ལས་བྱུང་བའི་གསེར་གྱི་ཡོལ་གོར་ནང་།།

སྟོང་གསུམ་ཁྱབ་པའི་སྣོད་ཡངས་ཟག་མེད་ཀྱིས།།

བདེ་སྟོང་ཡེ་ཤེས་ཁྱབ་བདལ་ཆེན་པོའི་འཕྲུལ།།

ངོ་བོ་ཉིད་དག་རྣམ་པ་དབང་པོ་ལྔའི།།

གང་བཞེད་དེར་འཆར་སོ་སོའི་བྱེད་ལས་ཀྱིས།།

འདོད་པ་ཀུན་ཚངས་དཔག་བསམ་ཤིང་ཆེན་ལྟར།།

དྲི་ཞིམ་ཤིང་སྤོས་སྨན་སྣ་འབྲུ་ཡི་རིགས།།

མེ་ཡི་ཆོ་གས་རབ་སྦྱངས་དུ་བའི་སྤྲིན།།

བེཌུར་མདོག་སྣང་འཆི་མེད་ལམ་ཀུན་ཁྱབས།།

དུད་པའི་ཆ་ཤས་རེ་ལས་འཕྲོས་པ་ཡིས།།

སྣ་ཚོགས་རིན་པོ་ཆེ་ཡི་གཞལ་མེད་ཁང་།།

ཤེལ་གྱི་གུར་ཁྱིམ་གཡུ་སྦྲ་མཐིང་འོད་འབར།།

མེ་ཏོག་པདྨ་བརྩེགས་པའི་ཁང་བཟང་དང་།།

སྐྱེད་མོའི་ཚལ་དང་ཡུལ་ལྗོངས་བྱེ་བ་ཕྲག།

མཚོ་རྫིང་དལ་བབས་གསེར་གྱི་བྱེ་མ་ཆགས།།

འཁོར་ཡུག་ལྗོན་ཤིང་ནགས་ཀྱི་ཚལ་ཆེན་གཏིབ།།

སྤྲིན་གྱི་གླང་པོ་ཤ་སྐྱང་འདོད་འཇོ་བ།།

འབྲོང་གཡག་ཞོལ་ཆེན་དྲེལ་རྟ་རྔོག་ཆགས་ཁྱུ།།

འབྲི་དང་ལུག་སོགས་བདག་ཏུ་བཟུང་བ་འབུམ།།

ཁུ་བྱུག་རྨ་བྱ་ཁྲུང་ཁྲུང་འཇོར་མོ་སོགས།།

འདབ་ཆགས་ཆུ་གནས་སྲོག་ཆགས་ཇི་མཆིས་དང་།།

གཞོན་ནུ་དཔལ་རྩལ་ལྡན་པ་གོ་རྨོགས་ཆས།།

ཕ་རོལ་འཇོམ་པའི་མཚོན་ཐོག་རྟ་ཞོན་ཁྲི།།

དར་ཟབ་གོས་བཟང་ནོར་བུའི་དོ་ཤལ་དང་།།

གསེར་གྱི་རྣ་ཆ་སོར་གདུབ་ཕྱག་ཞབས་རྒྱན།།

ཁྱད་པར་དབང་པོ་མྱོས་བྱེད་གཞོན་ནུ་འབུམ།།

འདོད་པའི་རྒྱུ་རྩལ་ལ་མཁས་ལིང་ཁ་བསྒྲེངས།།

ཤིང་ཏོག་བུ་རམ་སྦྲང་རྩི་ལ་སོགས་པའི།།

དཀར་མངར་ཁ་བའི་རོ་ནུས་དྲུག་ལྡན་ཟས།།

འབྲུ་བཅུད་སྟོང་སྦྱར་གསེར་གཡུའི་ཞལ་སྐྱེམས་དང་།།

དམར་ཚོར་ལ་སོགས་ཟག་མེད་མཆོད་རྫས་རིགས།།

སྲིད་ན་ཇི་མཆིས་དངོས་དང་བློས་སྤྲུལ་བས།།

ནམ་མཁར་ས་གཞིའི་ཁྱོན་ཡང་གང་བར་འབུལ།།

བདག་ཅག་མ་རིག་འཁྲུལ་བའི་རྐྱེན་དབང་གིས།།

དཀར་དམར་ཐབ་གཞོབ་བྲག་བཤིག་ཆུ་གཉན་དཀྲུགས།།

མནའ་ཟོས་དམ་ཉམས་རི་དྭགས་གཤོལ་བ་སོགས།།

བག་མེད་ལས་ཀྱིས་ཐུགས་དང་འགལ་བའི་རིགས།།

མ་ལུས་བསང་མཆོད་འདི་ཡིས་དག་གྱུར་ནས།།

ཉེ་བའི་གྲོགས་དང་བྱམས་པའི་མགོན་མཛོད་ཅིག།

བྱིས་སུ་བགྲོད་ན་ཕར་འགྲོའི་སྐྱེལ་མ་དང་།།

ཚུར་ལ་བསུ་མ་ཚོང་རྒྱལ་དོན་གྲུབ་ཅིང་།།

དགྲ་ཇག་རྐུན་གྱོད་མི་ཁ་སྦྱོར་ངན་ཞི།།

ལམ་འཕྲང་ཆུ་གླའི་སྒྲོལ་འདོན་གེགས་མེད་བསྒྲུབ།།

གཞི་རུ་འདུག་ན་མངའ་ཐང་སྲིད་སྡེ་སྤེལ།།

གཞན་སྣང་དབང་བསྡུས་དཀོར་ནོར་ཕྱ་གཡང་ཁུག།

བློ་ཡི་དྲ་བར་ཁམས་གསུམ་དབང་ཤེས་བསྡུས།།

སྨྲ་བའི་ལྕེ་ཡི་བརྗོད་པ་དོན་ལྡན་ཞིང་།།

དགྲ་གྱོད་སྦྱོར་ངན་ཕྲག་དོག་ཅན་གྱི་རིགས།།

མཐུ་ཡིས་འཇིག་ཤིང་སྟོབས་ཀྱིས་སྤ་ཀོང་ཏེ།།

སྐྱབས་གྲལ་བདག་ལ་མགོན་པོར་བརྟེན་པར་མཛོད།།

ནམ་ཟླ་དུས་བཞི་མི་སྙོམ་དྭངས་པའི་སའི།།

འབྱུང་དགྲ་སྒང་གཤོང་སྣོད་བཅུད་འཁྲུགས་པའི་རྐྱེན།།

སད་སེར་གང་རླུང་ནད་མཚོན་མུ་གེའི་ཚོགས།།

ཐམས་ཅད་མིང་གི་ལྷག་མར་གཞོམ་པར་མཛོད།།

ས་ལ་བཅུད་སྨིན་རྩི་བཅུད་གཞོན་དཀར་རྒྱས།།

འབྲུ་ནོར་ལོངས་སྤྱོད་འདོད་པའི་དོན་རྣམས་འཕེལ།།

རྔོག་ཆགས་གནགས་ཕྱུག་གོད་བྲལ་ཁྲི་འབུམ་རྒྱས།།

གནོད་སྦྱིན་འབྱོར་བ་དུ་མའི་བདག་ཚིམ་མཛོད།།

ཁྱད་པར་དཀར་མོ་ལུག་གི་འཕེལ་གཡང་ལ།།

མི་མཐུན་གློ་འབྲུམ་རྩྭ་དུག་ཨོར་འགགས་དང་།།

གཉན་ལྷེད་རྒྱུ་འབུ་སྔོ་ཤིག་འགོང་ཡམས་སོགས།།

ཁྱོད་མཐུས་ཚར་ཆོད་ཁྲི་ལུག་བྱེ་བ་འཕེལ།།

རྣལ་འབྱོར་བདག་ལ་མ་དང་སྲིང་མོ་བཞིན།།

ལུས་དང་གྲིབ་བཞིན་མི་འབྲལ་སྙིང་ཉེ་བའི།།

རྨ་གཡང་ཚེ་ནོར་འདོད་དགུ་ཅི་མངའ་བ།།

ཁྱོད་དང་གཉིས་སུ་མེད་པར་མྱུར་དུ་སྩོལ།།

སྲིད་གསུམ་དྲེག་པ་ཀུན་གྱི་ཆེ་བཙན་རྗེ།།

མཚོ་སྐྱེས་རྡོ་རྗེའི་བཀའ་དང་ཐ་ཚིག་བཞིན།།

རྨ་རི་རབས་འབྱམ་རྡོར་རྗེ་དྲག་མོ་ཁྱོད།།

གནས་གསུམ་མཁའ་འགྲོའི་གྲལ་དུ་མངའ་གསོལ་སྟོད།།

ཁྱོད་ནི་སྐྱེ་འཆིའི་ལས་བྲལ་ཡིད་ལུས་ལ།།

འཇའ་ཚོན་ལྟར་བཀྲ་མཛེས་སྡུག་མཚར་བའི་སྐུ།།

འཆི་མེད་བུ་མོའི་ཁེང་འཕྲོགས་སྨིན་ལེགས་ཀྱི།།

སྐུ་ཡི་རྣམ་འགྱུར་ཅིར་ཡང་བརྫུ་དེར་བསྟོད།།

སྙན་པའི་གླུ་ཆུང་འགྱུར་ཁུག་དང་ལྡན་ཞིང་།།

དམ་བུ་ར་ཡི་སྒྲ་ལས་རྣ་བར་སྙན།།

འཇིག་རྟེན་མེས་པོའི་ཡིད་ཀྱང་བསླུ་བྱེད་པའི།།

ཐོས་འཛིན་དགའ་བ་སྐྱེད་པའི་དཔལ་མོར་བསྟོད།།

ཁྱོད་ཉིད་ཞི་རྒྱས་དབང་དྲག་ལས་གང་ལ།།

ཐོགས་མེད་སྤྲིན་གྱི་ལྕུག་མ་ལས་མྱུར་པའི།།

ནད་ཞིས་སྨན་དང་ཚེ་ཡི་བདུད་རྩི་དང་།།

དབང་གི་ལྕག་ཀྱུ་དགྲ་འཇོམས་མཚོན་ཆ་ལྟར།།

འཕྲིན་ལས་རྣམ་བཞིའི་བྱེད་པོར་མངའ་མཛད་བསྟོད།།

སངས་རྒྱས་བསྟན་སྐྱོང་ནག་ཕྱོགས་དགྲ་འདྲེ་ཐུལ།།

གསང་ཆེན་ཆོས་སྤེལ་བསྟན་འཛིན་སྐུ་ཚེ་བསྲོང་།།

སྦྱིན་བདག་སྟོབས་བསྐྱེད་རྣམ་དཀར་འབྱོར་བ་སྤེལ།།

ས་ཡུལ་གནས་བརྟན་མཐའ་འདྲེའི་རྒྱུ་ལམ་ཆོད།།

རྫོགས་ལྡན་དང་པོ་ཇི་བཞིན་འགྲུབ་པར་མཛོད།།

མཆོད་ན་དགྱེས་པའི་རྟག་མཚན་དངོས་སུ་སྟོན།།

རྟེན་ན་གྲོགས་དང་མེལ་ཚེ་སྲུང་མ་མཛོད།།

ནད་ལ་རྩི་ཐོག་དགྲ་འདྲེའི་གཉའ་བར་ནོན།།

མཐུ་རྩལ་མ་ཆུང་བརྩེ་གདུང་ཆེ་བར་མཛོད།།

རང་གི་གནས་མཆོག་ཕོ་བྲང་ལ་བསྐྱོད་ཚེ།།

རླུང་གི་ཤུགས་འཆང་སྤྲིན་གྱི་རྟ་ལ་ཞོན།།

མགྲོན་དུ་འབོད་ཚེ་ཁྱོད་སྐུལ་དྲན་ཙམ་གྱིས།།

སྣང་ཐོག་རིག་པའི་འཕྲུལ་ལས་འཛུམ་ཞལ་ངོམ།།

ས་མ་ཡཱ་ལྷ་རྒྱལ་ལོ།། 

    ཞེས་པ་ས་བྱི་ཟླ་བ༦ པའི་ཚེས༩ ཕྱི་དྲོ་དབང་གི་དུས་སུ་ཡུལ་སྐྱོང་རོག་ཏི་རྒྱལ་མོ་གཙོ་འཁོར་གྲགས་ཅན་སྤྲིན་གྱི་ལྡིང་ཁང་ནས་གུས་འདུད་ཉེ་བའི་ས་ཆར་གསང་ཁྲིའི་དེའུ་ཀླུ་ཡི་ཕོ་བྲང་འབར་བའི་བསྟི་གནས་རྒྱུ་རྩལ་ངོམ་པའི་སྣང་བ་ཤར་བའི་དགའ་སྟོན་དུ། ལྷ་བསང་འཕྲུལ་དགའི་རོལ་མོ་འདི་ཉིད་ཚེས་བཅུའི་ཉིན།  རྒྱལ་དབང་པདྨ་འོད་འབར་གྱི་བྱིན་རླབས་ཆ་ཙམ་ཐོབ་པ་རིག་རྩལ་ཐོག་མེད་གླིང་བའམ་འཆི་མེད་རྒྱལ་བའི་རྡོར་རྗེས་གང་ཤར་གྱི་ཚིག་རིས་ཐོལ་བྱུང་དུ་བྲིས་པ་འདི་ཡུལ་ལྷ་འཁོར་བཅས་དགྱེས་པའི་རྒྱུར་གྱུར་ཅིག།

 

 

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།