ཕྱག་ཆེན་བརྒྱུད་པའི་གསོལ་འདེབས།*

60208


“ཕ་ཁྱོད་ཀྱི་སྐུ་དང་བདག་གི་ལུས།། ཕ་ཁྱོད་ཀྱི་གསུང་དང་བདག་གི་ངག། ཕ་ཁྱོད་ཀྱི་ཐུགས་དང་བདག་གི་ཡིད།། དོན་དབྱེར་མེད་གཅིག་ཏུ་བྱིན་གྱིས་རློབས།། ”


རྩོམ་པ་པོའི་ངོ་སྤྲོད།

པཎ་ཆེན་བློ་བཟང་ཆོས་རྒྱན། ཕྱི་ལོ་༡༥༧༠ལོར་གཙང་རོང་དུ་འཁྲུངས་པ་ནས། ཕྱི་ལོ་༡༦༦༢ལོར་གཤེགས་པའི་བར་ལ་དགོངས་ལོ་93བཞུགས། ཆུང་དུས་ཀྱི་མཚན་ལ་ཆོས་རྒྱལ་དཔལ་ལྡན་དུ་འབོད་ཅིང་། དགེ་ཚུལ་གྱི་མཚན་དུ་བློ་བཟང་ཆོས་ཀྱི་རྒྱལ་མཚན་ཞུ། ཁོང་ནི་པཎ་ཆེན་རིན་པོ་ཆེའི་སྐུ་འཕྲེང་བཞི་བ་ཡིན་ཞིང་། དགོངས་ལོ་བཅུ་བཞི་ལོན་དུས་ཤིག་ལ་དབྱངས་ཅན་མའི་ཞལ་གཟིགས་ཐུབ་པར་བཤད། མཁས་ཤིང་བཙུན་ལ། རྩོམ་པའི་བྱ་བར་མངའ་བརྙེས་པའི་རི་བོ་དགེ་ལྡན་པའི་སྐྱེས་བུ་ཆེན་པོ་ཞིག



ན་མོ་མ་ཧཱ་མུ་དྲཱ་ཡེ། །
ལྷུན་གྲུབ་སྐུ་གསུམ་གྱི་གཞལ་ཡས་སུ། །
དཔལ་དང་པོའི་སངས་རྒྱས་རིགས་ཀུན་གཙོ། །
ཁྱབ་བདག་རྡོ་རྗེ་འཆང་ཆེན་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

ཞིང་རབ་འབྱམས་ཕྱོགས་བཅུའི་འཇིག་རྟེན་ན། །
དུས་གསུམ་གྱི་རྒྱལ་བ་བསྐྱེད་པའི་ཡབ། །
མཁྱེན་རབ་འཕགས་པ་འཇམ་དཔལ་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

ཡུལ་བྱང་ཕྱོགས་ཁ་བ་ཅན་ལྗོངས་འདིར། །
ཐུབ་བསྟན་ལ་ཐུབ་དབང་གཉིས་པའི་རྗེ། །
རྗེ་བཙུན་བློ་བཟང་གྲགས་པ་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

འཇམ་དབྱངས་ཀྱི་སྲས་པོ་ཙོང་ཁ་པའི། །
སྒྲུབ་བརྒྱུད་ཀྱི་བསྟན་པ་འཛིན་པའི་གཙོ། །
རྟོགས་ལྡན་འཇམ་དཔལ་རྒྱ་མཚོ་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

སྙན་བརྒྱུད་ཀྱི་གདམས་པའི་མཛོད་ཕྱེ་ནས། །
སྐལ་ལྡན་གྱི་གདུལ་བྱ་སྨིན་མཛད་པའི། །
བ་སོ་ཆོས་ཀྱི་རྒྱལ་མཚན་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

རིམ་གཉིས་ཀྱི་རྣལ་འབྱོར་མཐར་ཕྱིན་ནས། །
འཆི་མེད་ཀྱི་རིག་འཛིན་སྐུ་བརྙེས་པའི། །
གྲུབ་མཆོག་དྷརྨ་བཛྲ་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

ཆོས་བརྒྱད་ཀྱི་འཆིང་བས་མ་གོས་པར། །
ངེས་དོན་གྱི་བསྟན་པའི་རྒྱལ་མཚན་འཛིན། །
བློ་བཟང་དོན་ཡོད་གྲུབ་པ་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

སྐུ་གསུམ་གྱི་ཕོ་བྲང་ཉམས་དགའ་བར། །
ངུར་སྨྲིག་གི་གར་གྱིས་འགྲོ་ཀུན་འདྲེན། །
མཁས་གྲུབ་སངས་རྒྱས་ཡེ་ཤེས་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

རྗེ་གྲུབ་ཐོབ་གོང་མའི་གདན་ས་རུ། །
དད་ལྡན་གྱི་གདུལ་བྱའི་དཔལ་དུ་ཤར། །
དྲིན་ཅན་རྩ་བའི་བླ་མ་ལ་གསོལ་བ་འདེབས། །
རྒྱུད་བདག་འཛིན་འཁྲི་བ་ཆོད་པ་དང་། །
བྱམས་སྙིང་རྗེ་བྱང་སེམས་འབྱོངས་པ་དང་། །
ལམ་ཟུང་འཇུག་ཕྱག་རྒྱ་ཆེན་པོ་ཡི། །
མཆོག་མྱུར་ཏུ་ཐོབ་པར་བྱིན་གྱིས་རློབས། །

རྗེ་བླ་མ་སངས་རྒྱས་སུ་མཐོང་བ་དང་། །
གནས་འཁོར་བ་ལ་ཞེན་པ་ལོག་པ་དང་། །
མ་འགྲོ་ཀུན་སྒྲོལ་བའི་ཁུར་ཁྱེར་ནས། །
ལམ་ཐུན་མོང་དང་ཐུན་མོང་མ་ཡིན་པའི། །
དཔལ་ཟུང་འཇུག་ཕྱག་རྒྱ་ཆེན་པོ་དེ། །
དུས་མྱུར་ཏུ་ཐོབ་བར་བྱིན་གྱིས་རློབས། །

         ཞེས་པའང་དགེ་སློང་བློ་བཟང་ཆོས་ཀྱི་རྒྱལ་མཚན་གྱིས་སྨྲས་སོ། །
སརྦ་མངྒ་ལམ།། །།

  *  ཕྱག་ཆེན་རིམ་པར་བརྒྱུད་པའི་གསོལ་འདེབས་འདི་ནི་དགེ་ལུགས་པའི་ཕྱག་ཆེན་བླ་རབ་ཀྱི་བརྒྱུད་པའི་གསོལ་འདེབས་ཤིག་ཡིན་པ་དང་། འདིར་རྩོམ་པ་པོའི་སྔོན་གྱི་བླ་བརྒྱུད་ལས་འཁོད་མེད་ཀྱང་། ཁོང་དང་ཁོང་གི་རྗེས་སུ་བྱོན་པའི་ཕྱག་ཆེན་བླ་བརྒྱུད་དུ་པཎ་ཆེན་བློ་བཟང་ཡེ་ཤེས་སོགས་སྐྱེས་ཆེན་བཅུ་དགུ་ཡས་མས་ཤིག་བྱོན་ཡོད།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།