སེར་ལེགས་འཕྲིན་གྱི་གསར་བྲིས་སྙན་ངག་《མ་འགག་པའི་གླུ》ཞེས་པ།

6429






དེ་ཁོ་ན་ཉིད་ཀྱི་གངས་རི

ཕྱེད་ཀ་ཉི་ནུབ་ལ་ཕྱོགས་ཀྱང་
ཕྱེད་ཀ་ང་ལ་དབང་བའི་གངས་རི

དངོས་ཡོད་ལས་རྣམ་པར་
རྒྱལ་བའི་གངས་རི

འཁྱོག་གཟུགས་ཀྱི་རྩ་དོན་
མཐའ་འཁོར་གྱི་ཡུལ་ལྗོངས་ལ་འདྲེས་པའི་གངས་རི

བྱས་པ་མི་རྟག་པའི་གནས་ལུགས་
བྲང་ཁོག་ལ་རུམ་པའི་གངས་རི

སྣང་བརྙན་གྱི་དཔེར་བརྗོད་
ལུང་སྐད་ཀྱིས་མཚོན་པའི་གངས་རི

རྒོད་འཕྲུ་དང་རྣོ་མིག་
ཐང་ལ་ལྷུང་མ་མྱོང་བའི་གངས་རི

ས་སྲོད་ཀྱི་མདངས་ལ་
འཁྲེན་པའི་གངས་རི

རང་བྱུང་གི་ཁྱད་མཚར་ལ་གཉེན་
བསྡེབས་པའི་གངས་རི

གསེར་ཡུམ་དང་གཡུང་དྲུང་གི་རྩིག་ལྡེབས་ཆེན་མོ
གངས་རི

སྐྱེ་རྒྱུད་ལ་དྲི་མ་མེད་པའི་
གངས་རི

འཇིག་རྟེན་ལ་ཞེད་སྣང་
བྲལ་བའི་གངས་རི

མགྲིན་པ་དག་སྣང་གི་བཅུད་ཀྱིས་
གཏམས་པའི་གངས་རི

བཀྲག་མདངས་དང་རྟོགས་བརྗོད་ལ་
རབ་ཁ་མེད་པའི་གངས་རི

དོན་ཟབ་མོའི་ཐིགས་པ་ལས་
གྲུབ་པའི་གངས་རི

བདེ་བ་ཆེན་པོས་རྟགས་དང་
རྒྱས་བཏབ་པའི་གངས་རི

བརྩེགས་མ་དང་
སྐུང་ཡིག་མང་བའི་གངས་རི

ཟུར་མ་ཆག་པའི་
གངས་རི

གདོད་མའི་ཁ་བཤད་ཚིག་ལ་
གནས་པའི་གངས་རི

མཚན་མོ་ཁོ་ནར་བསྐྱེད་རྫོགས་ལ་
གོམས་པའི་གངས་རི

བསྐལ་བའི་ཡར་སྔོན་གྱི་མི་ཕོའི་
སྐྱེས་ལྷ་གངས་རི

མྱ་ངན་མེད་པའི་སྒྲུང་དཀར་པོ་བཀླུབས་པའི་
གངས་རི

ཤུགས་བསྟན་དང་ཟབ་ཚད་ལ་
ལག་པས་མི་སྙོབ་པའི་གངས་རི

རྩེ་མོ་ལས་སྣང་བ་མཐོ་བའི་
གངས་རི

མཐོ་བ་གཞན་དྲིང་མི་
འཇོག་པའི་གངས་རི

རྣམ་འགྱུར་ཐོག་ལྟར་ཚ་བའི་
གངས་རི

དུས་གསུམ་ཁོར་མོ་ཡུག་ལ་
མདོག་དང་རྔམ་པས་འགྱིང་བའི་གངས་རི

སྲིད་པའི་བས་མཐའ་རུ་གཏོགས་པའི་
གངས་རི

བསྐལ་བའི་བར་དུ་དལ་ཅག་གེར་
གནས་ཐུབ་པའི་གངས་རི

ཉི་ཟླའི་པང་གི་གཙང་ཞིང་དཀར་བའི་ཁ་ཆད་  
གངས་རི

སྒྱུ་ལས་དང་ཡིད་སྤྲུལ་ལྷོད་ལ་
བབ་པའི་གངས་རི

རང་གཤིས་དང་ང་རྒྱལ་ལྷང་ལ་
བུད་པའི་གངས་རི

གཟུངས་སུ་བདེན་རྫུན་གྱི་དབྱེ་བ་
བཞུགས་པའི་གངས་རི

གསང་བའི་ཞལ་ལྕེ་བདག་འཛིན་གྱིས་
ངར་བའི་གངས་རི

དུས་ཚོད་ཀྱི་ཕ་རོལ་ཏུ་ཕྱིན་པའི་
གངས་རི

ཤེས་པ་སྲ་ཞིང་མཁྲེགས་པའི་
གངས་རི

མཐོ་རིས་དང་རྩ་ལག་འབྱམས་
ཀླས་པའི་གངས་རི

རྩ་བ་རྡོ་རྗེ་གདན་ནས་ཡ་ཡོ་
མི་མཛད་པའི་གངས་རི

ཐུགས་དམ་ལ་གས་ཆག་མ་
སོང་བའི་གངས་རི

ངང་རྒྱུད་ཤིན་ཏུ་རིང་བའི་གངས་རི


༢༠༢༠/༡/༢༣

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།