2019ལོའི་ཙོང་ཁ་ཚེ་བརྟན་རྒྱལ་གྱི་གསར་བྲིས་ཁག་ལྔ།

22720

Ctrl+c

  
  ཡང་རི་འགོར་གངས་འབབ་ཐེངས་ཤིག


མཛེས་སྡུག་ནི་ཁྱོད་མིན་ཏེ།
དྲན་གདུང་ཧྲིལ་བོ།
རྒྱང་རིང་ལ་ཤོར་ན།
ཕ་ཡུལ་ཟེར་བ།
ནམ་ཡང་གཏམ་རྒྱུད་ཅིག་ཡིན་ནམ།
                           
ལས་དབང་ཡིན་ན།
ངས་ཅི་ཞིག་ཞུ།
མིག་ལ་ལྷུང་བའི་འདབ་མ།
ཡང་ན་དུས་ཚིགས་ཤིག་གི་གོ་རིམ།
ངས་དྲན་པ།
ངའི་སྡུག་ཅིག
གང་ལ་སྦ་ཆོག་སྙམ།
 
མཛེས་སྡུག་ནི་ཁྱོད་ཡིན་ཏེ།
མངགས་བཅོལ་ཡོད་ཚད།
རྒྱང་རིང་མིན་ན།
ཕ་ཡུལ་ཟེར་བ།
ནམ་ཡང་སྙན་ངག་ཅིག་མིན་ནམ།
 
                       2019/01/08--/10

Ctrl+c

   བསམ་བློ་བཏང་ན།


       ཁ་ཁ
       ལས་དབང་རེད།
       སོ་སོ།
       ཕྱིར་དྲན་རེད།
       ད་དུང་ཅི་ཞིག
 
        ཀྱེ་ཀྱེ།
        མི་ཚེ་རེད།
        ཀྱེ་ཧུད།
        རྨི་ལམ་རེད།
        ད་དུང་གང་ཞིག
     
        སྟོང་སྟོང་།
        མི་ཡུལ་རེད།
        ཤག་ཤག
        ཆར་བ་རེད།
 
        ཅི་ཞིག་དང་གང་ཞིག་གིས།
        བསམ་བློ་བཏང་ན།
        ང་ལ་དབང་མྱོང་བ།
        བདེ་བ་མ་ཡིན།
 
                      2019/02/14--15

Ctrl+c

མཚན་མོ་རེ་རེར།


ཟླ་བ  ག་དུས་ཤིག་ལ་ཤར།
མུན་ནག་ལ་འབྱར་བའི་མཚན་མོ་རེ་རེར།
ངས་སུ་ལའང་ཟླ་བའི་སྐོར་འདྲི་མ་ཕོད།
 
ཟླ་བ སུ་ཞིག་གི་ཟླ་བ།
ངས་གཏམ་རྒྱུད་ནས་གོ་འམ།
དྲན་པའི་ཁྲོད།
མུན་པའི་མཚན་མོ་ཤར་ན་བསམ།
རྒྱང་རིང་དང་རྒྱང་རིང་།
ངའི་མིག་ལ་འཁོར་འཁོར་ཐམས་ཅད།
མུན་ནག་མིན་ན།
གཞན་ཞིག་ཨེ་ཡོད།

ཟླ་བ  ག་དུས་ཤིག་ལ་ཤར།
མུན་ནག་མངལ་གྱི་མཚན་མོ་རེ་རེ།
ང་ཁོ་ནར་བསྐྱུར་བ།
ངས་སུ་ལའང་བཤད་མ་ཕོད།

                            2019/01/24--30

Ctrl+c

ཁྲུང་ཁྲུང་འཕུར་དུས།


      ཁྲུང་ཁྲུང་འཕུར་དུས།
      ག་དུས་འཕུར་འོང་བསམ།
 
      དྲན་སྟངས་རེ།
      ཕ་རོལ་རེ།
      གཤོག་ཟུང་རེ།
      རྒྱང་མིག་རེ།
 
      ཁྲུང་ཁྲུང་འཕུར་དུས།
      ག་དུས་འཕུར་འོང་བསམ།
 
      བར་ཆད་རེ།
      གསོལ་འདེབས་རེ།
      འཁང་ར་རེ།
      ན་ཟུག་རེ།
       
      ཁྲུང་ཁྲུང་འཕུར་དུས།
      ག་དུས་འཕུར་འོང་བསམ།
 
      དུས་ཚིགས་རེ།
      ལོ་ཟླ་རེ།
      སྐྱེལ་མ་རེ།
      དབུགས་རྔུབ་རེ།
 
                               2019/02/02--14

Ctrl+c

མཚོ་མོར་སྤྲིངས་པའི་འཕྲིན་ཡིག


             1
ཁྱེད་དང་འཕྲད་པ་གཞན་ཞིག་ཡིན་སྲིད།
གཞན་གྱི་འཛུམ་མདངས་ཀྱིས།
ཁྱེད་ཉིད་འཇིག་རྟེན་གང་ལ་སླེབས་སོང་།
དྲན་པ་འཁྲུལ་བ།
རང་ཉིད་བརྗེད་པ།
རེ་རེ་འཕྲོར།
ལོ་དང་ཟླ་ལྷག་མ་སོང་།
 
          2
བདག་པོ་མེད་པའི་ལས་དབང་བསམ་ན།
ཕྱི་མིག་ཡོད་ཆོག
ཕྱི་མིག་མེད་དུས།
སེམས་ནི་ཟུག་རྔུས་ཟིན་ཏེ།
མིག་ལ་ཟགས་པ།
དེ་དུས་ཀྱི་ཁྱེད།
ངུ་སླ་བའི་བྱིས་པ་ཞིག
 
       3
རྨི་ལམ་ནི་རྨི་ལམ།
འཕྲད་དང་འཕྲད་པ་མ་ཡིན།
རྨི་ལམ་ནི་རྨི་ལམ།
གྱེས་དང་གྱེས་པའི་དབང་གིས།
བདེ་མོ་ཞིག
ང་ལ་བསྐུར་བ་ནི།
གསང་གཏམ་མིན།
 
         4
    
ལོ་དང་ཟླ།
དྲན་འཕྲོ་ཞིག
ཆར་དང་རླུང་།
ཞིང་ཁམས་ཤིག
དུས་འདིའི་ཡོད་ཚད།
གལ་ཏེ་ཟེར་ཨེ་ཆོག
ཨ་ཁ་ཁ
ང་ནི་ང་མིན་ནམ།
 
         5
ཁྱེད་ལ་ཡོད་པ་འཛུམ་མདངས་ཡིན་སྲིད།
འཛུམ་མདངས་དེ་གཏན་པར་སྨོན།
 
                                                  2019/02/15-16


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།