གཅན་མེ་སྟག་གིས་ལོ་མཇུག་བྲིས་པའི་སྙན་ངག་ཚན་པ་གཉིས།

672

IMG_1532.JPG

                 ཉན་པ།

སྡོང་བོས་སྡོང་བོ་ལ་ཉན་ཡོད

བྱེའུས་བྱེའུ་ལ་ཉན་ཡོད

མུན་ནག་གི་སྒེའུ་ཁུང་ལ་ལྕགས་ཀྱི་ལྷན་པ་བརྒྱབ་ནའང

གྱང་ལྡེབས་ལ་རྣ་བ་སྦྱོར་མཁན་ཞིག་ཡོད་པ་ཤེས་སུ་ཆུགས

IMG_6911.JPG

     གྲིབ་མ་མེད་པའི་མི།


ཉེ་སར་བཅར་དྲགས་ན་རྫི་མའི་མདེའུ་མཐོང་ཐུབ་ལ

འགྲམ་པ་གླན་དྲགས་ན་རྣ་བ་ཧྲོག་གེར་འགུལ་བའང་ཚོར་ཐུབ

ཁྱོད་ཀྱིས་ཁྱོད་རང་ཧི་མ་ལ་ཡའི་དབུལ་ཕོངས་དང་ཉེ་ཞིང

ངས་ང་རང་ངག་རྒྱུན་ཁྲོད་ཀྱི་སེང་གེ་དེ་དང་ཉེ་རབ་བཤད

གནས་འདི་ནས   ཅི་ཡང་མ་ལྷག་པའི་ངེད་གཉིས

བར་སྣང་དུ་བྱེའུ་ཆུང་ཞིག་འཕུར་བ་ལ་ཧ་ལས་མདོག་བྱེད

རི་རྒྱབ་ཏུ་འབྲུག་སྒྲ་ཞིག་གྲགས་པ་ལའང་སྙིང་ན་མདོག་བྱེད

མ་གཞིར  ཁྱོད་དང་ང་གཉིས་ནི་རུས་རྐང་གི་ལྷུ་ཚིགས་མེད་པའི་སྤུན་གཉིས་ཏེ

འཇིག་རྟེན་དུ་གྲིབ་མ་མེད་པའི་གཟུགས་ཕུང་གཉིས་རེད

ཁེར་རྐྱང་གི་ཉིན་དང་མཚན་ལ

ཁྱོད་དང་ང་གཉིས

རྡུལ་དྲེག་ཙམ་ཡང་འགོས་མེད་པའི་མེ་ལོང་ཞིག་གི་ཁ་གཏད་དུ

བརླན་བཤེར་ཙམ་ཡང་གཟུང་མེད་པའི་མིག་ཟུང་དག་གི་ཁ་གཏད་དུ

གཅེར་བུར་བསྡད་དེ  གྲིབ་མ་མེད་པར་བསྡད་དེ

དྲོད་འཇམ་གྱིས་ཁ་རླངས་གསོན་པོས་ཀྱང་གཡོ་མི་སྲིད་པའི

ལུས་ཀྱི་སྤུ་ཉག་རེ་རེའི་ཁོང་གསེང་དུ་ཉུལ་དུས

རུས་པའི་ནང་རིམ་ན་བླ་ཡི་ཐོ་ཐེམ་མེད་ཅིང

དབུགས་ཀྱི་དཀྱིལ་འཁོར་ན་ཚེ་ཡི་འཕེན་པ་བྲལ་ལ

སྐྲ་ལོའི་གཞུང་རྐང་ན་སྲོག་གི་རྒྱུན་ཐག་མེད་པ་ཤེས་མ་ནུས

སྐྱེ་བའི་གྲིབ་མ་འཆི་བ་དང་། བདེ་བའི་གྲིབ་མ་སྡུག་བསྔལ་ཡིན་པའང་ཤེས་མ་ནུས

ཡུན་རིང་གི་རེ་སྒུགས་ཁྲོད

རྨ་ཆེན་གངས་ཀྱི་ཐེམ་པ་གང་ཞིག་ན

ངེད་གཉིས་ཀྱི་སེམས་ངལ་གསོ་ནུས་པའི

སྤྲུལ་བའི་བྱ་ཆེན་གང་ཞིག་ཡོད་པར་རློམ་ཞིང

སྐབས་དང་སྐབས་སུ

དེ་ཉིད་དྲག་རླུང་བཞིན་ལྡིང་བའི་གཤོག་སྒྲ་དང

ཆར་སྤྲིན་བཞིན་འཁྲིགས་པའི་སྡེར་འོད་དག

ཉི་ཟེར་ཁོང་གསེང་གི་གྲིབ་སོ་ནག་པོ་ཇི་བཞིན

ངེད་གཉིས་ཀྱི་རྨི་ལམ་ཕར་ངོགས་ནས་འོད་ཆེམ་མེར་འཁྱུག་པ

བག་ལ་ཉལ་བའི་སེམས་ཉིད་ཀྱིས་ཚོར་ཐུབ་ཟེར

སྨག་ནག་གི་ཁང་མིག་འདིར

ཁྱོད་དང་ང་གཉིས་ཀྱི་གདོང་ལ་གདོང་ཕྱོགས་ཏེ

ཨུ་ཚུགས་ཀྱིས་སྡོད་སྐབས

གནས་འདིའི་ནམ་མཁའ་རུ

མེ་ལྟར་ཚ་བའི་ཉི་འོད་མེད་པ་ཚོར

སོང་ས་བསྡད་ས་རུ  ལྕི་བའི་མེ་ཕུང་དེ་ཆེས་ཆེར་སྦར་ནའང

ལུས་རྒྱབ་ཏུ་གྲིབ་མ་མེད་པའི་ངེད་གཉིས

གྲིབ་མའི་ཁུགས་སོ་རུ་སྐུང་བའི་བྱི་ལོང་དག་དང་འདྲ་བར

བླ་མའི་མཇལ་རྟེན་དུ་འཁུར་བའི་མགོ་བོ་འདི

རྨོངས་རྟུལ་འདི

རྩྭ་མགོ་ཤིང་སྣེ་རུ་འཕྱན་པའི་བལ་རྩིད་ཇི་བཞིན

མཐའ་མཇུག་གི་གནས་མལ་སྟོང་བའི་ལམ་འཕྲང་དུ་གཡེང་དགོས་པ

ཅིས་ཀྱང་ཤེས་མི་འདུག་ཨང


0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།