འཛམ་གླིང་སྙན་ངག་གི་ཉིན་མོར་ཕུལ་བའི་སྙན་ངག་ཁག་བཞི།

1054

 

ཁྭ་ཏ་དཀར་པོ།

 

@གཅན་མེ་སྟག

 

ད་ནིངས།   བདག་གི་ཁང་ཀླད་དུ།

ཁྭ་ཏ་དཀར་པོ་ཞིག་བབས་འདུག

ཨ་ཡ་མཚན།

 

ངའི་མིག་ལ་ལིང་ཏོག་འགོས་པ་ཡིན་ནམ་བསམས།

ཕྱིར་འཁོར་ནས་མེ་ལོང་དུ་ཡང་ཡང་བལྟས།

ཁྭ་ཏས་ཕྱི་གོས་ནག་པོ་ཕུད་ཟིན་ནམ་བསམས།

རྒྱང་ཤེལ་བཟུང་སྟེ་ཡང་ཡང་བལྟས།

 

ཁྭ་ཏ་དཀར་པོ་ཞིག་ཡིན་ན་ཇི་འདྲའི་མཛེས།

སྤྲིན་རིམ་ལས་ཤོར་བའི་ཟླ་བ་ཞིག་དང་འདྲ་བར།

ཤུན་པགས་བཤུས་པའི་སྒོ་ང་ཞིག་དང་འདྲ་བར།

ཁྭ་ཏ་དཀར་པོ་ཞིག་ཡིན་ན་ཇི་འདྲའི་མཛེས་སྙམ།

 

སྐབས་རེར།   བདག་གིས་དེ་ནི་ངང་བ་ཞིག་གོ་བསམས།

ཡིན་ནའང་ངང་བ་ཁང་ཀླད་དུ་འཕུར་མི་ནུས་སོ་སྙམ།

ལན་རེར།   དེ་ནི་ཞོགས་པར་འཚབ་འཚུབ་ཏུ་འོང་བའི།

ཁ་དོག་བརྗེས་པའི་སྐྱ་ཀ་ཞིག་ཨེ་ཡིན་བསམས།

 

ཡིན་ནའང་དེ་ཡོད་ཚད་ཁ་གྲགས་པ་ཙམ་གྱིས་ཤེས་སོང་།

ཁྭ་ཏའི་རང་གཤིས་ལ་འགྱུར་བ་མི་འདུག

དེ་ཡོད་ཚད་ལྡིང་ཙམ་ལྡིང་ཙམ་གྱི་འགྲོ་སྟངས་དེས་ཀྱང་ཤེས་སོང་།

རྒྱབ་ཏུ་སྦས་པ་ནི་སྔར་བཞིན་སྐྱུགས་བྲོ་བའི་རྔ་སྒྲོ་དེ་རེད།

 

ཡིན་ནའང་དེ་ཡོད་ཚད་བདག་རང་ཡ་མཚན་པའི་རྒྱུ་རྐྱེན་མ་རེད།

རྒྱུ་རྐྱེན་གཙོ་བོ་ནི།

ཁྭ་ཏ་དེས་རང་ཉིད་ཇི་ལྟར་བཀྲུས་ཏེ་དཀར་པོ་ཆགས་པ་ཡིན་པའི།

དོགས་གཞི་དེ་རེད།

བཤལ་འདྲུད་རྒྱག་གིན་རྒྱག་གིན་འགྲོ།

 

@བདའ་ཚང་སྙེམས་གྲོལ།

 

འཁོར་བའི་ལ་འོག་འདི་རུ་འཁོར་འདས་ཀྱི། །

རི་རྩེའི་ཉི་འོད་མཐོང་དོགས་མི་འདུག་ན། །

ད་ནི་སྒྱུ་མའི་རྟ་ལ་སྒྱུ་མའི་སྒ །

བསྟད་དེ་འཁོར་བའི་ལ་ཐང་གཅོད་དུ་འགྲོ། །

ཕྱུགས་ཕྱུང་མེ་ཏོག་འཐུ་ཞིང་སྣོམ་ཞིང་འགྲོ། །

སྡུག་གི་བཤལ་ཐག་རྩད་ནས་མི་ཆོད་ཀྱང་། །

བདེ་བ་ཅུང་ཟད་རྙེད་པར་ཇི་ལྟར་བསྙོན། །

འཁོར་བ་སྒྱུ་མའི་རྟ་གླང་ཡིན་ཡང་བླ། །

ང་རང་རྟ་གླང་འདེད་མཁན་ཡིན་ཡང་རུང་། །

ཆོས་རྣམས་སྐྲ་ཤད་འཛག་པ་ལྟར་སྣང་སྟེ། །

བདེན་པ་རྡུལ་ཙམ་མེད་ཀྱང་བླ་འོ་སྙམ། །

ང་ཡིས་འཁོར་བའི་ཆུ་འཁྱག་འཐུང་བཞིན་དུ། །

འཁོར་བའི་གྲང་ངར་སེམས་ཀྱིས་མྱོང་བཞིན་དུ། །

ད་དུང་འཁྲུལ་བའི་བདུད་རྩིར་སྣོམ་བཞིན་དུ། །

འཁོར་བའི་འཇུག་ངོགས་དེ་ལ་བསྙེག་པར་བྱ། །

སྙན་ངག

 

         @གཅན་ཆེད་འབར།

 

ནམ་མཁའ་ནི་སྙན་ངག་ཡིན

འོན་ཀྱང་ཟུར་ཞིག་སྙན་ངག་མིན

ས་གཞི་ནི་སྙན་ངག་ཡིན

འོན་ཀྱང་ཟུར་ཞིག་སྙན་ངག་མིན

ཕ་ཡུལ་ནི་སྙན་ངག་ཡིན

འོན་ཀྱང་ཟུར་ཞིག་སྙན་ངག་མིན

གཞིས་ཁྱིམ་ནི་སྙན་ངག་ཡིན

འོན་ཀྱང་ཟུར་ཞིག་སྙན་ངག་མིན

ཉེས་དམིགས་ནི་སྙན་ངག་ཡིན

འོན་ཀྱང་ཟུར་ཞིག་སྙན་ངག་མིན

སྙན་ངག་ནི་སྙན་ངག་ཅིག་ཡིན

འོན་ཀྱང་ཟུར་ཞིག་སྙན་ངག་མིན

རེད་དེ།  སྙན་ངག་གི་རྐྱེན་གྱིས

སྙན་ངག་མིན་པའི་ཟུར་དག་རིག་གིན་མི་འདུག་ཅིང

སྙན་ངག་གི་རྐྱེན་གྱིས

སྙན་ངག་མིན་པའི་ཟུར་དེ་དག་ཀྱང

སྙན་ངག་ཏུ་སྤྲུལ་སོང་ཨང

 

༢༠༡༧ལོའི་ཟླ༣པའི་ཚེས༢༡ཉིན་ཐད་སོར་སྦྱར་བས་དགེའོ།།

 

 འཛམ་གླིང་སྙན་ངག་གི་ཉིན་མོར་བུ་མོ་དག་ལ་ཕུལ་བ།

 

@རྫ་སྐྱེས་ཕུར་བ།

 

འཁོར་བའི་ཐང་གི་སྨན་ཆུང་རེ།།

སྙན་ངག་སྟོང་དང་དགུ་བརྒྱས་འབྲི།།

ཞལ་དང་འཛུམ་དང་ལང་ཚོ་ཡི།།

འོད་གསལ་ཉག་མ་བཞིན་དུ་འབྲི།།

སྨིན་མ་ཚེས་གསུམ་ཟླ་བ་ནི།།

ཡིད་འོང་སྲིད་པའི་ཆུ་བོར་འབྲི།།

ནུ་ཟུང་ཁྱུང་གི་སྒོ་ང་ཡང་།།

འཇམ་མཉེན་པད་སྡོང་ཚལ་དུ་འབྲི།།

མཁུར་ཚོས་ཁམ་བུ་སྨུག་ཆུང་གཉིས།།

སྦྲང་ཆང་འོ་མས་བསྐྱེད་པར་འབྲི།།

ཟུར་མིག་གཡོ་བའི་ངད་ཁ་ལ།།

ཕྱེ་ལེབ་གཤོག་འགྲོས་བྱེད་པ་འབྲི།།

འཛུམ་ཆུང་ནང་གི་ཉི་འོད་ལ།།

བརྩེ་བའི་ནམ་མཁའ་ལངས་པ་འབྲི།།

སྐྱེ་མཆེད་རེ་རེའི་ཡང་སྟེང་ལ།།

འཁོར་བའི་ཁང་ཆུང་བཞེངས་པ་འབྲི།།

ཁང་ཆུང་དེ་ཡི་རབ་གསལ་ནང་།།

ལས་ཀྱི་མེ་ཏོག་སྨིན་པ་འབྲི།།

འཁོར་བ་ཐམས་ཅད་བདེ་བ་དང་།།

སྣང་བ་ཐམས་ཅད་མཛེས་པའི་ཕྱིར།།

སྙན་ངག་དམ་པས་ཁྱོད་ལ་ནི།།

སྲིད་ཁམས་དག་པའི་སྙན་ངག་འབྲི།།

ཁྱོད་ནི་འཚོ་བའི་འོད་ལས་གྲུབ།།

ཁྱོད་ནི་བརྩེ་བའི་རྡུལ་གྱིས་གྲུབ།།

ཁྱོད་ནི་རང་གི་མདངས་ཀྱིས་གྲུབ།།

ཁྱོད་ནི་ཁྱོད་ཀྱི་མིག་ལས་གྲུབ།།

 

རི་མོ་པས་བར་བཅུག་རི་མོའི་བདག་དབང་ངེད་དྲ་བར་སྤྲད་ཡོད་པས།   ཆོག་མཆན་མེད་པར་གཏན་ནས་བཀོལ་མི་རུང་།
0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།