ཙོང་ཁ་ཚེ་བརྟན་རྒྱལ་གྱི་གསར་བྲིས་ཆེད་འགོད།

427

IMG_8695.JPG


      ཧེ་རོ་སྒང་གྲོང་གསེབ།*


ང་ངའི་མགྲོན་པོ་ཡིན་ཚུལ།

སུ་ཞིག་གི་མིག་ཆུ།

ཞེད་སྣང་ལ།

ང་དང་འབྲེལ་བའི་གཏམ་རྒྱུད་དག

ཕམ་ཁ་མིན་པར་སྨོན།

ངས་མིག་ཟུང་མ་བཙུམ་པའི་སྔོན་ཏུ།

དྲན་ཆོག་པ་མེད་དམ།

རླུང ཡང་རླུང་གིས།

ང་ཁུར་ཚེ།

མར་མེ་རྐང་གཅིག་སྒྲོན་ནས་ངུ་མཁན།

གྱེས་ཟིན་པའི་ཁྱོད་ཡིན་སྲིད།

དྲན་གདུང་བསྐུར་སའི་མི་དེ།

གར་སོང་ཆ་མེད།

བརྩེ་དུང་ཞུ་སའི་མི་དེ།

གར་སོང་ཆ་མེད།

རེ་བ་བཅོལ་སའི་མི་དེ།

གར་སོང་ཆ་མེད།

རང་སེམས་ལ་ཟགས་པ་ཐམས་ཅད།

སྙོབ་ཐབས་མེད་ཚེ།

ཁྱོད་ཟེར་བ།

ང་དང་ཉེ་བ།

གཞན་ལ་སློང་ཨེ་ཆོག

མགོ་སྒུར་སྒུར་གྱིས་འགྲོ་སྟངས་ཤིག

ངའི་མི་ཚེར་དབང་བ།

ཐོར་ཟིན་པའི་ཡིག་འབྲུ་རེ་རེ།

ཕ་གའི་འཇིག་རྟེན་གཅིག་པུ།

ཚུར་གའི་མར་མེའི་སྨོན་ལམ།

གློ་བུར་གྱི་གོམ་ཁ།

ལྗིད་ཏིག་ཏིག

དར་ཆ་ཟད་པོ།

ཀྱེ་ཧུད དར་ཆ་ཟད་པོ།

             2017/11/30/12/3

           ཧེ་རོ་སྒང་གྲོང་གསེབ་ནི་ཁོ་བོ་གནས་ཚང་བཅོལ་ནས་མི་ལོ་བཅུ་བཞི་ལྷག་འགོར་ན། ངས་མཚན་གུང་གི་ཆུ་སྒྲ་ཉན་པ་གཅིག་དང་ནམ་སྨད་ཀྱི་བྱ་སྐད་ཉན་པ་གཉིས་བཅས་ཏེ་ཧེ་རོ་སྒང་ཞེས་པའི་དོན་དག་བཙལ་མ་འདོད་ལ་འདྲི་མ་འདོད།
IMG_6740.JPG


    ཡང་རི་མགོར་གངས་འབབ་ཐེངས་ཤིག


རླུང་ལ་ཐོགས་པའི་ཁྱོད།

སུ་ཞིག་གི་དུས་ཚིགས།

ཡང་ན་རྒྱང་རིང་ནས་འོང་བའི་མགྲོན་པོ་ལྟར།

ང་དང་འཕྲད་པ་ཐེངས་གཅིག་མིན།

ཉི་འོད་ལ་སིམ་པའི་ཁྱོད།

སུ་ཞིག་གི་མེ་ཏོག

ཡང་ན་རྒྱང་རིང་ལ་ཤོར་བའི་འཁྱམས་པོ་བཞིན།

ང་དང་གྱེས་པ་ཐེངས་གཅིག་མིན།

རླུང་ལ་ཐོགས་པའི་ཁྱོད།

གངས་ཀྱི་འདབ་མ།

ཉི་འོད་ལ་སིམ་པའི་ཁྱོད།

གངས་ཀྱི་འདབ་མ།

                   2017/12’12–/13

IMG_6834.JPG


              རྡོ་རྗེ་གདན།


ཐོས་པའི་ཞིང་ཁམས་ཤིག

ཕ་རོལ་ཞིག

བཙལ་བའི་ཞིང་ཁམས་ཤིག

ཕ་རོལ་ཞིག

མར་མེ་གཉོམ་པོ།

འདར་ཙམ་འདར་ཙམ།

མུན་པ་སྟུག་པོ།

གཡོ་ཙམ་གཡོ་ཙམ།

ལས་དབང་བཟློག་པའི་སྐལ་བ།

ག་རེ་རེད།

ལས་དབང་དམད་པའི་མི་ཚེ།

ག་རེ་རེད།

ཕ་རོལ་ཕ་རོལ།

བྱང་ཕྱོགས་ཡིན་ནམ།

ངག་ལྐུགས་ལྐུགས་ཀྱིས་བོས་མྱོང་བ་དག

ནམ་ཡང་སྟོང་སྟོང་ཞིག

                      2017/22-26

IMG_6903.JPG


 མདང་དགོང་ངས་རང་ལ་སྒྲུང་ཞིག་བཤད།


འཛུམ་གྱི་ངོ་གདོང་།

དགའ་བ་དང་སྤྲོ་བ སྐྱེ་བ་སོགས།

ངས་ང་ལ་བསྩལ་བ།

སྡུག་བསྔལ་མིན་བསམ།

མིག་ཆུའི་ངོ་གདོང་།

སེམས་ཁྲལ་དང་སྡུག་བསྔལ འཆི་བ་བཅས།

ངས་ང་ལ་འབུལ་བ།

བདེ་བ་མིན་སྙམ།

                     2018/1/9

IMG_6928.JPG


                 ལྷ་མོ།

 
གསོལ་བ་ཐེངས་གཅིག་གིས།

ཁྱོད་སུའི་འཇིག་རྟེན་ན་ཡོད།

མིག་ཟུང་གཏད་ས་མི་འདུག

བརྐྱངས་ཕྱག་ཐེངས་གཅིག་གིས།

ཁྱོད་སུའི་རྨི་ལམ་ལ་འཁོར།

ལག་ཟུང་བཟེད་ས་མི་འདུག

བསྐོར་བ་ཐེངས་གཅིག་གིས།

ཁྱོད་སུའི་སེམས་ཁོང་ལ་འཛུལ།

མིག་ཆུ་བྱོ་ས་མི་འདུག

                         2018/01/14-15

IMG_6775.JPG

 
       བར་འདི་ནས།


ལམ་རེ་རེ།

གྱ་གྱུ་མིན་ན།

ཡུལ་རེ་རེ།

སྟོང་བ་མིན་ན།

འཛུམ་རེ་རེ།

ཐག་རིང་མིན་ན།

ང་དགའ་འོས།

ང་སྐྱིད་འོས།

                  2018/01/20

རྫ་ཆུའི་རླབས་སྒྲའི་པར་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།