རོང་བོ་དགེ་འདུན་ལྷུན་གྲུབ་ཀྱི་སྙན་ངག་ཚན་པ་གསུམ།

639

16997219_1329725867084910_804784474_n.jpg


            སྟོང་ཁམས།

 

འགུལ་བའི་ལྗོན་པ་གྲིབ་མས་གནོན་པ་དང་འདྲ་བའི།།

སྣང་བ་དེ་ཀོ་རླུང་དང་ལྷན་ཅིག་འཁྲིགས་པ་དེས།།

འདུ་བྱེ་མ་ལུས་དེང་ཡང་རྨི་ལམ་དུ་གྱུར་ཚེ།།

བྱེད་པོ་ཁྱེད་ནི་ས་དང་ཆུ་ལ་སྤྲུལ་ནས་ཤོག།

འཛིངས་པའི་ཡལ་ག་དེ་ན་བྱི་འུ་དག་གིས་ཅ་ཅོ་འདོན།།

ལོ་མའི་ཚོགས་ཀྱིས་ཟིལ་བ་འཐུ་བཞིན་དཔྱིད་ཀྱི་དུས་ལ་སྒུག།

ཁྱེད་ནི་འབྱམས་སུ་ཀླས་པའི་འཆར་ཡན་ལམ་དུ་ཕྱིན་ནས་ནི།།

གླེགས་བམ་དེ་ལ་ཡི་གེ་སྟོག་ཕྲག་བྲིས་ནས་རྒས་པར་གྱུར།།

མཚན་མོར་འཁྱག་པའི་གྲིབ་མ་དེ།།

མེ་ལོང་ངོས་སུ་ཆག་པ་ན།།

སོར་མོའི་ཚོགས་ཀྱིས་རུབ་བརྒྱབ་ནས།།

རང་གི་གདོང་ལ་མེ་ཏོག་འབྲི།།

17006034_1329725727084924_1552994192_n.jpg


            དད་པ།


དུད་པའི་གདོང་ལ་མིག་དེ་ཅིའི་ཕྱིར་གཡོ།།

དབྱངས་ཀྱི་རས་པ་དེ་འང་འཕྲད་དམ་ཅི།།

སྨུག་པའི་ནང་ནས་སྒྲ་སྒྲོག་མཁན་དེ་ཡིས།།

ཁྱེད་དྲུང་སྙེགས་པ་དེ་ལ་རྣ་བ་གཡོར།།

ས་འང་མ་ལགས་རླུང་ཡང་མ་ལགས་པའི།།

སྤྲུལ་བའི་སེམས་ཀྱི་ནགས་ཀློང་དུས་རྟག་ཏུ།།

འདྲེན་པ་ཁྱེད་ཀྱི་ཞབས་རྡུལ་ལ་བཏུད་ནས།།

དངོས་གྲུབ་ཡུར་བ་ལས་ནི་འཐོབ་པར་རེ།།

རྙེད་པའི་གྲིབ་མ་འདི་འང་བོར་འགྲོ་དུས།།

ཁྱེད་ནི་སྲིད་པའི་རྩེ་ནས་ངུ་བར་བྱེད།།

ཅི་ཞིག་དང་འདྲོགས་མིག་ཟུང་ཡིབ་པའི་ཚེ།།

དྲུང་སྲོང་བ་རྣམས་དཀའ་ཐུབ་ལས་ཀྱིས་ངལ།།

ཟགས་པའི་ཆོས་ཀྱིས་རབ་གདུང་བའི།།

ང་ནི་གནས་མེད་ཤིང་དྲུང་བ།།

བསྒོ་བའི་བཀའ་ལ་ཉམས་བྱས་ཏེ།།

འདུ་བྱེད་ཇི་སྙེད་ཉོན་མོངས་སོ།།

ཁྱེད་ནི་ཏིང་འཛིན་མ་ལུས་སྒུལ་བའི་སྤྲིན་པའི་ནང་གི་གླང་བོ་སྟེ།།

མིག་འོད་འཚེར་འཚེར་རྐང་གདུབ་སིལ་སིལ་གང་ལ་རྒྱུ་བའི་ས་དེ་ན།།

དབྱིངས་ལ་ཞུཊ་པའི་རྣམ་པར་ཤེས་དག་གྱེས་བྲལ་ཁུར་གྱིས་རབ་མནར་ནས།།

རང་གི་འདུ་བྱེད་རྩོལ་བ་དང་བཅས་ཡན་པོར་བོར་ལ་བག་མི་ཚ།།

ལྷ་ཡི་ལྷ་དེས་ཁྱེད་ཉིད་དང་།།

དབྱེར་མི་ཕྱེད་པའི་བསམ་གཏན་པ།།

བརྒྱ་ཕྲག་མ་ལུས་ཅིག་ཅར་དུ།།

བཀྱེ་བ་མ་ལགས་ཁྱེད་གཅིག་བུ།།

མཁའ་ལ་སྤྲུལ་བའི་ཉི་ཟླ་དང་།།

ས་ལ་འགྱུ་བའི་སྤྲིན་ཉིད་དུ།།

མ་བཅོས་པ་ཡི་ཚུལ་གྱིས་སུ།།

བདག་གི་སྐྱབས་སུ་མངགས་པར་མཐོང་།།

17012851_1329725693751594_1913498998_n.jpg


          དགོན་མཐའི་ཀ་ཕྲེང་།


ཀ་བ་གདུང་མ་ཚོན་གྱིས་བྱུགས་ཤིང་།།

ཁ་དོག་ལེགས་པའི་བླ་རས་བྲེས་པའི།།

ག་བུར་སྤོས་དྲི་མཆེད་པའི་དགོན་པ།།

ང་ཅག་སྐྱབས་གནས་དགེ་འདུན་བཞུགས་ས།།

ཅ་ཅོའི་ཆོས་སྐད་ཅུང་ཟད་ཐོན་ཞིང་།།

ཆ་ལུགས་ཆ་མ་ཆོ་རིགས་སྟོན་པའི།།

ཇ་རོ་སྙིགས་མ་ལྟ་བུ་རེ་འགའ།།

ཉ་གང་ཉིན་(1)ལ་ཕེབས་འདི་མཚར་བ།།

ཏ་རིན་མི་དྲག་མགོ་མཐོ་འགའ་ཞིག།

ཐ་ཤལ་ལས་པའི་ཚོང་བ་འགའ་ཞིག།

ད་རུང་མགོ་བོ་ཀྲོག་ཀྲོག་བྱེད་བཞིན།།

ན་སོ་རྒས་རུང་སྒར་མཐར་བསླེབས་འདུག།

པ་ཊ་བཞིན་དུ་ཁོག་པ་འཁྱོག་ཅིང་།།

ཕ་རོལ་ཚུར་རོལ་གཉིས་ཀ་བྱེད་པའི།།

བ་མིན་བོད་མིན་ལྕེ་གཉིས་འདི་ཚོ།།

མ་རུང་མ་དག་ཀུན་ཀྱི་གཞི་རྩ།།

ཙ་གི་ཙིག་གེ་ཙམ་ཞིག་མ་རེད།།

ཚ་རྒྱུ་ན་རྒྱུ་མེད་པ་འདི་ཚོས།།

ཛ་དྲག་དོན་ཞིག་ཡོད་ཁུལ་བྱས་ནས།།

ཝ་ལྟར་ཁ་ཟས་ཁོ་ན་བསམས་འདུག།

ཞྭ་བཞིན་བཀུར་འོས་དགེ་འདུན་འདི་རྣམས།།

ཟ་མ་ཏོག་ལྟར་རིན་ཆེན་སྣོད་ཡིན།།

འ་བུ་ཁྱོད་ཚོས་དགྲ་ལ་མ་བརྩི།།

ཡ་མཚན་གཤིས་ཀ་དྲང་མོ་ཏག་ཏག།

རྭ་ཅོ་བཞིན་དུ་རང་སེམས་འཁྱོག་ན།།

ལ་དགུར་བརྒྱབ་ཀྱང་ཀུན་མཐུན་རྙེད་དཀའ།།

ཤ་ཚའི་དོན་ཞིག་ངེས་ངེས་འདོད་ན།།

ས་འདིའི་འགྲོ་ལུགས་བཞིན་དུ་རྩིས་ཤིག།

ཧ་ནས་ཨའི་བར་བསྒྲིགས་པའི་རྩོམ་འདི།།

ཨ་དོན་ཟབ་མོའི་དོན་ཞིག་མ་ལགས།།

ཧ་ཧ་དེ་རིང་མཐོང་ཚུལ་འགའ་རེ།།

ཨ་ཁུ་ང་ཡིས་བཀབ་ནས་བྲིས་ཡོད།།

(1)བཅོ་ལྔའི་ཉིན།
                གསལ་བཤད། སྙན་ཚོམས་ཀྱི་བར་བཅུག་ལ་ཆེད་དུ་བདམས་པའི་པར་རིས་འདི་དག་ནི། ཧི་མ་ལ་ཡའི་རི་འདབ་ཀྱི་འཚོ་བ་བྲིས་པའི་རི་མོ་ལེགས་པོ་འགའ་ཡིན་ལ། རི་མོ་པBalami shresthaསོགས་ཀྱིས་བྲིས་པ་རེད། ངེད་དྲ་བའི་རྩོམ་སྒྲིག་ཁང་གི་བར་བཅུག་ཏུ་བཀོལ་ཆོག་པའི་བདག་དབང་སྤྲད་ཡོད་སྟབས། གང་འདོད་བཤུ་སྤེལ་བྱ་མི་རུང་།


རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།