གྲིབ་མ།

ཁྱོད་ཀྱི་རྗེས་སུ།

ངའི་རྣམ་ཤེས་འགྱེལ་ན།

ཁྱོད་ནི་ནག་ཐིགས་ཤིག

ཁྱོད་ཡམ་ཡོམ།

ཁྱོད་མུན་ནག་མ་ཡིན།

ཁྱོད་གཡོ་གཡོ།

ཁྱོད་རླུང་བུ་མ་ཡིན།

ཁྱོད་བཞུད་བཞུད།

ཁྱོད་སྤྲིན་པ་མ་ཡིན།

ཁྱོད་ཀྱི་རྗེས་སུ།

ངའི་གོམ་ཁ་ནོར་ན།

ཁྱོད་ནི་ཕུང་བོ་ཞིག

ཁྱོད་བྲེལ་བྲེལ།

ཁྱོད་གཙང་བོ་མ་ཡིན།

ཁྱོད་ཉིལ་ཉིལ།

ཁྱོད་ཁ་བ་མ་ཡིན།

ཁྱོད་འཕུར་འཕུར།

ཁྱོད་བྱེའུ་མ་ཡིན།

ཁྱོད་ཀྱི་རྗེས་སུ།

ངའི་སྣང་བ་འཁྲུགས་ན།

ཁྱོད་ནི་ཡིག་རྡོག་ཅིག

ཁྱོད་བོར་བོར།

ཁྱོད་ནི་གཏམ་རྒྱུད་མ་ཡིན།

ཁྱོད་བཙལ་བཙལ།

ཁྱོད་ནི་ཟློས་གར་མ་ཡིན།

ཁྱོད་ཅེར་ཅེར།

ཁྱོད་ནི་ཁྱོད་མ་ཡིན།

                     2016/12/17-19བྱང་རྡོ་ལ་རྡར་རི་འདབས་སྦྱར།

          ཁེར་རྐྱང་།

   
བགད་ཆོག་པའི་ཁེར་རྐྱང་།

  ཁེར་རྐྱང་ནི་མདུད་པ་ཞིག

  དྲན་ཆོག་པའི་ཁེར་རྐྱང་།

 ཁེར་རྐྱང་ནི་ཐོབ་ཤོར་ཞིག

གསང་ཆོག་པའི་ཁེར་རྐྱང་།

ཁེར་རྐྱང་ནི་གྲིབ་ནག་ཅིག

གབ་ཆོག་པའི་ཁེར་རྐྱང་།

ཁེར་རྐྱང་ནི་གོ་ནོར་ཞིག

ཉན་ཆོག་པའི་ཁེར་རྐྱང་།

ཁེར་རྐྱང་ནི་ཁ་དོག་ཅིག

འཇབ་ཆོག་པའི་ཁེར་རྐྱང་།

ཁེར་རྐྱང་ནི་སྨྲེ་སྔགས་ཤིག

ངུས་ཆོག་པའི་ཁེར་རྐྱང་།

ཁེར་རྐྱང་ནི་ལོ་ཟླ་ཞིག

                  2016/11-12/20

     ཁྱོད་གང་ན་ཡོད།

མིག་ཆུ་ལྟ་བུའི་ཁྱོད།

སུའི་རྨ་ཁ་ཡིན།

གབ་ཚིག་ལྟ་བུའི་ཁྱོད།

སུའི་དྲན་གདུང་ཡིན།

རྨི་ལམ་ལྟ་བུའི་ཁྱོད།

སུའི་མཚན་མོ་ཡིན།

སྤྲང་བོ་ལྟ་བུའི་ཁྱོད།

སུའི་ཆག་སྒོ་ཡིན།

                    2016/12/21

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།