འདུ་ཤེས་གཅིག་པ་བར་སྤྲིངས།
ཁྱེད་ནི་དུས་གསུམ་ཀུན་ཏུ་ཞུམ་པ་དེ་ཡིས་མཐུས།།
འགུལ་བའི་སྨིན་མ་ལ་འཁྲིལ་མིག་ཟུང་དུབ་གྱུར་ནས།།
ཡང་དག་འཇོག་གི་ངང་ལ་གཞོལ་བའི་དུས་དེ་ནི།།
བཏང་སྙོམས་གནས་སུ་བསྐྱུར་བར་རེ་ཞིག་མ་སྐྱོ་ཨང་།།
ལས་ཀྱི་དེ་ཉིད་མངོན་གྱུར་བས།།
སེམས་ཀྱི་ས་བོན་སྟོབས་རྒྱས་ནས།།
གདོང་གི་བ་སྤུའི་ཚོགས་རྣམས་སུ།།
བྲལ་བའི་ཟིལ་བ་ལ་ཆགས་པ།།
ཆུ་ཡི་ནང་གི་ཆུ་རླབས་བཞིན།།
རྒྱུན་མི་ཆད་པར་འཕེལ་བ་ལ།།
གདུང་བ་མི་མཛད་སྐྱེ་བོ་སུ།།
བློ་ཡིས་མ་ཟིན་པ་དེ་འང་དེ་ཡིས་དྲན་པར་བྱ།།
སྲེད་པས་མ་བཅངས་པ་དེ་ཡང་དེ་ཡིས་གཟུང་བར་བྱ།།
ངག་གིས་མ་འཁྲོལ་བ་དེ་ཡང་དེ་ཡིས་བསྒོམ་པར་བྱ།།
སྙིང་ལ་མ་ཡལ་བ་དེ་ཡང་དེ་ཡིས་འབྲི་བར་བྱ།།
ཟོལ་གྱིས་མ་འཁྱོག་ཡིད་ལ་རབ་གནས་པའི།།
ཤིན་ཏུ་གདུང་བའི་ཡི་གེ་ཚོགས་འདི་དག།
རིག་བྱེད་ཟིལ་བ་རྟག་ཏུ་གཡོ་ལྡན་པ།།
འབུལ་བར་བྲེལ་བའི་མཛུབ་མོའི་ཚོགས་རྣམས་འགུལ།།
བས་མཐའ་བར་སྤྲིངས་པ།
ངལ་བའི་རྐང་བ་མཛེས་པའི་མེ་ཏོག་གིས།།
དབེན་པའི་རི་བོར་གཟི་བརྗིད་ལྡན་བྱས་ཏེ།།
ཅ་ཅོའི་ངག་གི་རྒྱུད་དག་ལྷོད་པ་ན།།
བསམ་གཏན་པ་ཡི་སྒོམ་ལ་ཡང་དག་ཞུགས།།
རླུང་གིས་ཡོམ་པའི་ནགས་ཀྱི་ཚལ་དེ་འང་།།
མི་རྟག་པ་ཉིད་བཟུང་བའི་སེམས་ཀྱིས་ནི།།
སྐད་ཅིག་གར་གྱི་རྣམ་པར་བསྒྱུར་བའིསྐབས།།
འདབ་ཆགས་ཚོགས་རྣམས་གུས་པའི་ཉམས་ཀྱིས་འདུ།།
བསགས་པའི་ལྟུང་བ་མ་ལུས་འདག་སླད་དུ།།
ལུས་ཀྱི་ཤ་བས་ངག་གི་རྒྱུད་འདར་ཡང་།།
ཁྱེད་ནི་མི་གཡོ་མི་སྨྲའི་ངང་དུ་ནི།།
གཅིག་ཏུ་གཞོལ་བ་བདག་གིས་བསམ་མི་ཕོད།།
ནགས་ཀྱི་ཡི་གེ།
མུན་པ་དང་མཚུངས་ཁྱེད་ཀྱི་ནགས།།
ཀུན་ཏུ་གཡོ་བའི་སེམས་ཀྱིས་ནི།།
རྟག་པར་སྙིང་ལ་རབ་བཀོད་ནས།།
མིག་ནི་ཆུ་ཡིས་བྲན་པར་བྱས།།
ཀྱེ་མ་མ་ལ་བསགས་པའི་འབྲས།།
མི་ཐེག་ཡིད་ཀྱི་ངལ་བ་འདི།།
འཁོར་བ་ཉིད་དུ་རྟོགས་གྱུར་ཀྱང་།།
སྒྱུ་མ་ཉིད་དུ་འཛིན་མ་ནུས།།
མ་རྙོག་པ་ཡི་རིག་པའི་མདངས།།
རེ་ཞིག་སྡིག་སྒྲིབ་གྱིས་མནར་ཏེ།།
ཆུ་ཟླ་ཉིད་མཚུངས་ཆོས་འདི་དག།
དྲ་བར་འཐམས་བཞིན་ཞེ་ལ་བརྐོས།།
ཁྱེད་རང་འབའ་ཞིག་གང་དུ་འང་།།
ཡིད་ཀྱི་ཡུལ་དུ་མ་བཅིངས་པས།།
རླུང་ལ་རབ་ཞོན་སེམས་ཀྱི་འོད།།
གང་དུ་འཕྲོ་འམ་བདག་མི་རྟོགས།།
ཚིག་གི་གྱ་གྱུ།
ཉི་འོད་དེ་ཡིས་སེལ་བའི་རྡུལ།།
མ་བཟུང་བ་དེ་ཁྱེད་ཀྱི་མིག།
པདྨས་ནོན་པའི་བུང་བ་དང་།།
གཉིས་པ་མ་ཡིན་དེ་ཁོ་ན།།
ནགས་ཀྱི་ཚལ་ན་བག་ཡངས་སུ།།
རྟག་པར་རྒྱུ་དེ་མ་མཐོང་ངོ་།།
བདག་གི་སེམས་ཀྱི་རི་བོ་ལ།།
སྨུག་པ་དང་བཅས་ཞུགས་པར་གྱུར།།
སེམས་མེད་དེ་དག་གང་དུ་ཡིབ།།
སྡུག་བསྔལ་གྱིས་བཟུང་མི་གང་ཞིག།
དོགས་པའི་དྲ་བར་མངོན་འཆིང་བའི།།
ལུས་ཀྱི་བ་སྤུ་རྣམས་ཀྱང་དུད།།
དབྱིངས་དང་དབྱེར་མེད་སྒྱུ་མ་མཁན།།
སྔོ་ལྗང་ཞལ་གཅིག་ཕྱག་གཉིས་ཀྱིས།།
མཛེས་པ་རབ་རྫོགས་ལྷ་དེས་ཀྱང་།།
བརྩེ་བའི་ལྡ་ལྡི་སྦྱིན་མིན་པ།།
བསོད་ནམས་དམན་པ་དེང་ཁོ་བོ།།
ལས་ཀྱིས་མནར་དུ་བཅུག་གམ་ཀྱེ།།
ཟང་ཟིང་བས་བའི་འབྲོག་དགོན་པ།།
གང་ཞིག་རྩྭ་ཡི་སྤྱིལ་བུ་རུ།།
མཉམ་གཞག་མ་ཡིན་རེ་ཞིག་ཏུ།།
དྲན་པ་ལྕི་རྣམས་ངལ་བར་གྱུར།།
དེ་ནས་ཁྱེད་ཀྱི་ཁང་བུ་ནི།།
སྐར་མའི་འོད་ཀྱིས་འཐུང་བ་བཞིན།།
བདག་གི་མིག་ལ་མངོན་སུམ་དུ།།
ཟླ་འོད་འཛིན་པའི་ཤིང་བཞིན་གཡོ།།
མི་རྟག་པ་འང་དེ་ལྟར་ཞེས།།
གསུང་རྣམས་ཀུན་ཀྱང་རེ་ཞིག་ལ།།
རི་མོར་བྱེད་པ་བདག་གིས་ཤེས།།
ཉི་མ་འདི་འང་ཟླ་འདི་འང་།།
རབ་ཏུ་ལྕི་བའི་དབུགས་ཀྱིས་ནི།།
མང་དུ་གནོན་པའི་ཚུལ་མཐོང་ན།།
གང་ཞིག་ཡིད་ཀྱི་ཡུལ་ལ་འང་།།
བདག་ནི་གཡོ་མེད་བྱེད་པར་ངེས།།
ས་ལ་སྨིན་མིན་མཁའ་ཡི་རི་བོང་འཛིན།།
ཨུ་མའི་བདག་པོའི་སྐྲ་ཕྲེང་མཛེས་བྱེད་པ།།
ཁྱེད་ནི་མཚོ་ཡི་ནང་གི་ཟེའུ་འབྲུ་འཆང་།།
བདག་གི་སྙིང་ལ་དགའ་བསྐྱེད་དེ་ཡིན་ནམ།།
ཟགས་པའི་ཆུ་མའི་ཚོགས་ཀྱི་ཁར་འཕྱོ་བའི།།
རྣམ་པར་གདུང་བ་མཚོན་བྱེད་དེ་ཡིན་ནམ།།
གང་ཞིག་ལུས་སྐྱེས་རབ་ཏུ་འདར་བྱེད་པ།།
ནམ་དུ་སེམས་ཀྱི་འོད་ཟེར་གྱིས་དྲངས་སོ།།
