ཁྲི་སེམས་དཔའི་སྙན་ངག་ཚན་པ་གསུམ།

402

13956773_1139968522727313_1308669838_n.jpg

 
   གཞིས་ཀ་རྩེའི་མགྱོགས་བྲིས།


དབྱར་ཁ་ལ་སྐྱོ་ཉམས་ཅུང་ཟད་མངོན་ཞིང་།

རྒྱང་རིང་གི་རི་ཚོགས་འཛུམ་མདངས་མེད་པར།

ནས་འབྲུའི་སྙེ་རླབས་རླབས་ལ་གཡེང་།

མཁའ་དབུགས་ཁྲོད་མཚམས་མེད་པར་འཕུར་བའི་ཉི་འོད་ཀྱིས།

གསེར་ཏོག་དང་རྒྱ་ཕིབས་ལ་མཆུ་སྦྱོར་ཡང་ཡང་བྱེད།

འདི་ནི་གཞིས་ཀ་རྩེ་ཡིན།

སྐྱེས་ཆེན་བཞུད་སོང་།

འཇའ་ཚོན་ཡལ་ཤུལ་གྱི་མཁའ་དབྱིངས་སུ།

ཁ་བཏགས་དཀར་པོ་གྲངས་མེད་ཕར་སྐྱོད་ཚུར་སྐྱོད།

སྣང་བ་ཞིག་ལ། གང་དུ་བལྟས་ཀྱང་།

མྱ་ངན་གྱི་གདུང་བས་ད་དུང་ཡང་ས་གཞི་ལྗིད་ཏིག་གེར་མནན་འདུག

གཞིས་ཀ་རྩེ། འདི་ནི་རི་ཚོགས་ཀྱིས་བསྐོར་བའི་གྲོང་རྡལ་ཞིག

རྣང་ཞིང་གི་དབུས་སུ། རྡོ་ཁང་མང་པོ་ལོ་ཏོག་དང་ལྷན་ཅིག་ཉི་འོད་ལ་རོལ།

རྒྱ་ལྕང་སྟུག་པོར་འཁྲུངས་པའི་རྩེ་མོར།

བྱེའུ་མང་པོ་ཕར་འཕུར་ཚུར་འཕུར།

གཞིས་ཀ་ཆེན་པོ་དེ་ཚོ།

སྐུ་དྲག་གི་རྨི་ལམ་བཞིན་སྐྱ་ཐིང་ཐིང་།

གཞིས་ཀ་རྩེ་རུ་ལོ་རྒྱུས་ནི་ཉི་ནུབ་ཀྱི་འཁྲེང་ཞེན་དང་འདྲའོ།།

IMG_0742.JPG


      བདེ་མོ་འཇོག་སྟངས་ཤིག    


སྣང་བའི་ཁམས་སུ་གཡེང་བའི་དགའ་སྐྱོའི་ལོ་མ་དེ་དག

དྲན་ངོགས་ཀྱི་རི་སྒང་ལ་ཟགས་སོང་།

མེ་ཏོག་འཛུམ་པའི་དབྱར་ཁ་ཞིག

ད་ནི་ཁྱོད་ཀྱི་དུས་ཚིགས་ནང་ཡོད་མི་སྲིད།

ཚོར་བས་སྦངས་པའི་ལང་ཚོའི་ངར་ཞགས་དེ་ཡང་།

དགུན་གྱི་དུས་ལ་སྨིན་མི་སྲིད།

སྲོད་ཀྱི་མཁའ་ལ་བཏབ་པའི་འཛོམས་ཆིངས་དེ།

མུན་ནག་གི་མཆེ་བ་རྣོན་པོས་བལྡད་ཅིང་བསྐྱུགས་པས།

འདས་པའི་ལོ་ཟླ་གང་ཞིག་ལ།

ངས་སེམས་ཀྱིས་བདེ་མོ་འཇོག

ལོ་འདི་དག་ལ།

དགའ་བ་མང་ཙམ་ཕྱི་ལ་ངོམས།

ལོ་འདི་དག་ལ།

སྐྱོ་བ་ཉུང་ཙམ་ཁོག་ཏུ་སྦས།

འགྲམ་པ་སྐྱོར་ཐེངས་རེ་ལ།

འགྱུར་ཁུགས་ཀྱིས་སྟོང་བའི་གཏམ་རྒྱུད་ག་ཚོད་ཅིག

མགྲིན་པར་ཁེགས་ཏེ་ནང་སེམས་ཀྱི་གཡང་དུ་བསད་པ་སུ་ཡིས་ཤེས།

རླུང་བུ་ཕར་ཅམ་ཚུར་ཅམ།

སེམས་པ་ཕར་གཡོ་ཚུར་གཡོ།

ཤུགས་ཀྱིས་བཏེགས་པའི་བརྩེ་བ་ལྗིད་མོ།

འོད་ལ་ཞེན་པའི་འབུ་མེ་ལྕེབས་བཞིན།

བསླུ་བྲིད་དང་འཇིགས་སྐྲག་གི་རབ་ཁ་ནས།

ཉེན་མཆོངས་གྲངས་མེད་ཀྱི་སྨག་ལ་འཐིམ།

བདེ་མོ་བྱོས།

ན་ཟུག་གིས་འབར་བའི་རྨི་ལམ།

ལྕུག་ལྕུག་ཏུ་འདར་བའི་ལས་དབང་།

ཟླ་བ་ཟད་པོ་ཞིག་གི་འོད་སྣང་།

རི་རབ་ཀྱི་ཁོང་དུ་སྐྱོ་སྣང་གིས་ཟགས་དུས།

མུན་ནག་གི་རྔམས་ཁ་རྩུབ་ནས་རྩུབ་ཏུ་ཕྱིན།

རླུང་ཁར་འཕྱོ་བའི་རྩྭ་ལོས་མཚན་མོའི་གདུག་རྩུབ་གྱོན་ནས།

ཉིན་ཞག་གི་ཕྲེང་བར་སྦྲེལ་བའི་སེམས་དོན་གྱི་རི་མོ།

འབྲོང་ཁྱུ་གཤར་ཤུལ་གྱི་རི་སྒང་ལ་བྲིས་མྱོང་།

བདེ་མོ་བྱོས། རི་རབ་ཀྱི་བརྟན་བརླིང་།

བདེ་མོ་བྱོས། སྒམ་དཀྱེལ་གྱི་ས་གཞི།

རྒྱང་བཞུད་རིང་མོ་ཞིག་གི་སྟ་གོན།

སེམས་ཁ་ནས་ཡང་ཡང་སྐྱོམས་མྱོང་།

དགུན་ཁ་ཧྲིལ་པོ་ཞིག་གི་ཁེར་རྐྱང་།

དུས་ཚོད་ཀྱི་བསླེས་པའི་ཐ་གུར་བརྒྱུས་མྱོང་།

སྟོང་འདང་ཡོད་ཚད་ཀྱི་གདན་སྟེང་དུ།

རང་ཉིད་མི་རུ་བཞེངས་ཏེ་འཇིག་རྟེན་ལ་ལྟད་མོ་བལྟས་མྱོང་།

ངས་ཁ་བ་ལྟ་བུའི་ནང་སེམས་ལ་བདེ་མོ་འཇོག

ང་ཡི་མེ་ཏོག ང་ཡི་མེ་ཏོག་ཐམས་ཅད་དཀར་པོ་ཡིན།

སྙེ་རླབས་ཀྱི་གྲ་ཁ་སྣོག་པའི་རླུང་བུ་འཚབ་འཚུབ།

ཁྱོད་ཀྱིས་ང་ཡི་མེ་ཏོག་བཅོམ་སོང་།

ཡིད་ཀྱི་གཏེར་ལ་བཅུག་པའི་སྐྱོ་དབྱངས་དེ།

སུ་ཡིས་བསྔོག སུ་ཡིས་བསྔོག

སྙན་ངག་གིས་བཞད་པའི་དུས་ཚིགས་དེར་བདེ་མོ་འཇོག

བདེ་མོ་འཇོག

རྡོ་གོར་མ་ཞིག་ལ་སྙིང་གཏམ་གླེང་ནས།

མཚན་གཞུང་ཞིག་མེ་ཕུང་གིས་གསལ་བ་དེ་ང་ཡིན་ནམ།

བདེ་མོ་འཇོག

ཁ་གཡང་དང་ཀུ་ཅོ་ཡོད་ཚད།

དུར་དུ་སྦ་རོགས།

IMG_0760.JPG


    གཞས་ཤིག་བཏང་ན་བསམས་བྱུང་།


ངའི་སེམས་ཁོང་གི་གཞས་དེ།

ཁྱེད་ལ་ད་རག་བར་དུ་གཏོང་མ་ཐུབ།

ངའི་སེམས་ཁོང་གི་གཞས་དེ།

ཚེར་མས་ཁེངས་པའི་ལམ་ཕྲན་ཞིག་ཡིན།

ངའི་སེམས་ཁོང་གི་གཞས་དེ།

སྨག་རུམ་གྱིས་བཅོམ་པའི་མཚན་མོ་ཞིག་ཡིན།

ལོ་མང་པོར་ངའི་སེམས་ཁོང་ནས་མྱུ་གུ་བཞིན་འབུས་ཏེ།

དུས་ཚིགས་རེས་མོས་སུ་འཁོར་ནའང་།

དབྱངས་རྟ་བྲལ་བའི་གཞས་དེ་ངག་གི་སྒོ་མོ་བརྒལ་མ་ཐུབ།

ངའི་གཞས་དེ་སྡུག་སྨྲེ་ཞིག་ཡིན་ཀྱང་སྲིད།

ངའི་གཞས་དེ་འཁང་ར་ཞིག་ཡིན་ཀྱང་སྲིད།

ཡང་ན། འཛེར་སྒྲ་ཞིག  ངུ་སྐད་ཅིག  ད་དུང……

གང་ལྟར་ངའི་སེམས་ཁོང་དུ་ཡུན་རིང་སྦས་པའི་གཞས་དེ།

བསྟོད་གླུ་ཞིག་ཡིན་མི་སྲིད།

ལོ་མང་པོར་སེམས་ཀྱི་སྨྱུག་ཕད་དུ་ཡང་ཡང་བཙགས་པའི།

ན་ཟུག་མ་ལུས་གཞས་འདི་ཡིན་ལ།

ཁ་བ་བུ་ཡུག་གི་ཀློང་ནས་ཨམ་གཙིགས་བསྡམས་ཤིང་།

དངན་པ་ཡང་ཡང་འཐེན་པ་ཡང་གཞས་འདིའི་ཆེད་དུའོ།།

ས་སྲོད་རེ་རེར་ཉི་ནུབ་ཀྱི་རྔམ་བརྗིད་ཁྲོད།

ཐེངས་ག་ཚོད་ལ་ལག་པས་འགྲམ་པ་བསྐྱོར་བ་སུ་ཡིས་ཤེས།

ཨ། ཤར་གྱི་རླུང་དང་།  ལྷོ་ཡི་སྤྲིན།

གཞས་འདིས་ས་ཆེན་གྱི་བར་སྣང་ལ་རྡུལ་འཚུབ་འདྲེན་མི་ནུས།

གཞས་འདིས་ཕ་བོང་གི་སྙིང་ཁོང་ལ་བྲག་ཅ་སློང་མི་ཐུབ།

གཞས་འདི་ང་ཡི་ན་ཟུག་དང་། 

ང་ཡི་སེམས་ཁྲལ། 

ང་ཡི་ཡིན།

མཚན་མོ་རེ་རེར་རི་སྒང་གི་ཟེ་བ་རླུང་གིས་གཡོ་ཞིང་།

མུ་མེད་ཀྱི་མུ་མེད་སྟོང་བའི་མཐའ་ལ་བསྲིངས་ནའང་།

གཞས་འདིའི་ཕྱིར་དུ་ངའི་ཁེར་རྐྱང་གི་གདུང་བ་ཁོག་ལ་བཅུག


རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།