ས་དམར་གྲགས་པའི་གསར་བྲིས་སྙན་ངག་ཆེད་འགོད།

278

IMG_0424.JPG


           སྐད་ཆའི་མདོ།


སེམས་པ་བསྲོ་བྱེད་ཀྱི་རྡོ་བའི་འབར་ལྕོག་དེ་ཐལ་བར་གྱུར་སོང་།

མིག་ནང་གི་མེ་ཏོག་དེའི་འདབ་མའང་རྙིད་སོང་།

ཤ་དང་རུས་པས་གྲུབ་པ་མ་ལུས།

ཚིག་དང་ངག་གིས་གྲུབ་པར་བྱའོ།།

རུས་པ་ཆག་སོང་བའི་སེམས་ཀྱི་ཀ་བ།

ལྷུ་དང་ཆ་ཡང་མ་འགྲིག།

དེ་ཡང་།  མི་རྣམས་ཀྱི་ལས་སོ།།

མི་སྡུག་པའོ།།

                ༢༠༡༦།༦།༧ཉིན་དབུས་སུ་གྲུབ།
IMG_5536.JPG


           རུས་པའི་ལྷུ་ལྷོད་ཚུལ།

 

རྡོ་བ་རེ་འགར་འདབ་མ་དང་ཡལ་ག་རྒྱས་འདུག།

འཆར་ཡན་གྱི་མདུད་པའི་སྣེ་རུ་བཏགས་པའི་ལུས་ཀྱི་གྲིབ་མ།

སེམས་སུ་བསྡུ་མཁན་དེ་མ་མཐོང་།

ལུས་ཀྱི་ཁྲག་རྩ་ཡོད་ཚད་རྩིད་སྐུད་བཞིན་དུ་གྲིམ་ཡང་།

རྒྱང་མར་དེད་པའི་མདའ་རྩེ་དེ།

ང་ཡི་གྲིབ་མར་ཕོག་སྟེ།

རྣམ་ཤེས་རྨས།

                  ༢༠༡༦།༧།༡༠ཉིན་དབུས་སུ་གྲུབ།
24.jpg

 

              བྱིན་རླབས།

 

ཉི་འོད་ཀྱིས་རིས་མེད་དུ་གནང་བའི།

རིང་བསྲེལ་དཀར་པོ་ཏིལ་འབྲུ་ཙམ་ཞིག་འཕུར་ཡོང་སྟེ།

ཁྱོད་ཀྱི་སྤྱི་གཙུག་གི་བུ་ག་ནས།

ནས་འབྲུ་རྡོག་གཅིག་ལྟར།

འབུས་པར་བྱས་སོ།།

                           ༢༠༡༦།༦།༡༢ཉིན་གཡོས་ཁང་དུ་གྲུབ།
29.jpg


             ཉིན་དེར།


ཆར་བས་ཤུགས་ཀྱིས་བརྡུངས་པའི་སེམས་ཀྱི་རུས་པ།

ཉི་འོད་སྤར་མོ་གང་གིས་མིག་ནང་དུ་སྦས་ཀྱང་།

རྡོ་བའི་ངོས་ཀྱི་རི་མོ་ཛ་ཛོར་དག

སྣང་དོགས་ཅི་ཡང་མེད་པར་རེ་རེ་བཞིན།

ཆར་བས་བསུབས།

ངག་གི་གྲིབ་མ་ཁོ་ནས་འཐག་པའི་གཟུགས་ཀྱི་ལག་ཕྱིས་འདིས།

ཁྱེད་ཀྱི་ཁ་མིག་སོགས་ཡག་པོར་ཕྱིིས་རྗེས།

ས་གཙང་ས་ཞིག་ཏུ་འཇོག་གནང་རོགས།

ཆུ་དྭངས་མོ་ཞིག་གིས་བཀྲུ་གནང་རོགས།

མ་རིག་པའི་སེམས་ཀྱིས་མ་སྒྲིབ་པ་ཙམ་གྱིས།

ང་ཡིས་སངས་རྒྱས་དང་རང་གི་ཨ་མར་མཇལ་ཆོག

རུས་པའི་ནང་གི་སྤྲིན་རུས་དེ་དག་ཡལ་རྗེས།

རྗེ་བོ་ལྟ་བུའི་ཁྱེད་ཀྱིས་ང་རང་མ་བརྗེད་པར་གྱིས་དང་།

ཤ་ཟད་དེ་རུས་པར་ཐུག་པའི་གས་ཁ་ལས།

ལྗང་བུ་ཞིག་འཁྲུང་སྲིད།

                                    ༢༠༡༦།༦།༡༦ཉིན་དབུས་སུ་གྲུབ།
IMG_5510.JPG


           ལྷ་སའི་མཚན་མོར་ཕུལ་བ།


ལྷ་སའི་མཚན་མོ་འདིའི་ང་ཡི་ཟུངས་ཁྲག་ལས་ཀྱང་དམར་བའི།

འབར་ལྕོག་ཅིག་མཆུ་སྣེ་གཉིས་ཀྱིས་བཟུང་ནས་འདུག།

ང་ཡིས་ཁྱེད་ཀྱི་བྱེ་ཐང་གི་རླུང་ཚ་མོ་དེ།

ཕྱིར་ཟློག་པར་སྒུག་ཡོད།

ད་ནི་ང་ཡིས་ཁྱོད་ལ་དབྱངས་གསལ་གྱི་སོ་སྒོ་གཉིས་བརྡར་ཏེ།

གཏམ་རྒྱུད་ཅིག་བཤད་ཆོག་པར་ཞུ།

ང་ཡིས་ཁྱོད་ལ་དབང་བའི་ལྡེ་མིག་ཅིག་བཟོས་ཡོད།

དེ་ནི་ཁྱོད་ལ་དབང་བའི་ལྡེ་མིག་དེ་རེད་མི་འདུག་ན་ཨང་།

ཁྱོད་ཀྱི་དྲན་པ་ལྟ་བུའི་སྣང་བ་དེ་གཙང་བཞེས་གནང་སྟེ།

ལམ་འགྲམ་གྱི་མེ་ཏོག་རེ་ཟུང་གིས།

ང་ལ་སྒོ་དང་སྒེའུ་ཁུང་སོགས་ཅི་ཡང་མེད་པའི།

ཁང་བ་ཞིག་བསྐྲུན་གནང་རོགས།

ཁ་རོག་གེར་སྡོད་པ་ནི།

རང་གིས་རང་ཉིད་དུར་དུ་སྦས་པ་དང་འདྲའོ།།

ལམ་གྱིས་རྐང་ལག་རིང་དུ་བསྲིངས་ཏེ་འདུག་ན་ཡང་།

དེ་ནི་འཆི་བའི་ཕྱོགས་ཀྱི་སྐར་ཁུང་ཞིག་ལས་མ་འདས་པས།

བཟོད་པར་གསོལ། སྙིང་ཉེ་ལགས།

ང་རང་ཤ་བཟའ་མཁན་གྱི་དཔོན་དམག་ཅིག་གི།

མཐའ་སྲུང་མཁན་དུ་གྱུར།

ཁྱོད་རང་མ་ཞེད་པར་གྱིས།

ང་ཡིས་མེ་ལས་དབལ་ཚ་བའི་ལྷ་སའི་ནམ་མཁའ་ནས།

གསོལ་ཇ་ཕོར་བ་གང་བསྐོལ་ཡོད།

ག་ལེར་བཞེས་རོགས་གནང་དང་།

རྟེན་འབྲེལ་འཛོམས་པོ་བྱུང་ན།

སང་ལོ་དབུས་ནས་མཇལ་ཡོང་།

                         ༢༠༡༦།༦།༢༣ཉིན་དབུས་སུ་གྲུབ།
21.jpg

 
     མིང་མེད་ཞིག་དང་འདྲ་ལེ།


རྩྭ་རྒོད་འདི་དག་གཡག་རྭ་ཞིག་དང་འདྲ་ལེ།

ལྷ་སའི་ནམ་མཁའ་ན་ལུས་པའི་རྣམ་ཤེས་དག་དང་འདྲ་ལེ།

ལྷམ་ཡ་གཅིག་ལས་མེད་པའི་བར་སྐོར་དང་།

ཆང་ཁང་གི་སྒེའུ་ཁུང་འདྲ་ལེ།

སོག་རུས་ཆུ་ཡིས་ཕིག་པའི་ཁུང་བུ་ལས།

ཉི་མ་མིག་གིས་བཟུང་།

འུར་གྱིས་བཏང་།

ཅི་བྱའམ།

རི་རྩེ་ཞིག་ཏུ་ལྷ་ས་བཀླགས་པས།

ང་ཡི་ལག་པ་གས་སོང་།   ལག་པའི་རུས་པ་གས་སོང་།

རུས་པའི་ནང་གི་རྡོ་བ་དེའང་གས་སོང་།

བཟོ་ལྟ་མི་འདྲ་བ་མང་པོར་གྱུར།

ཞྭ་མོ་སེར་པོ་ཞིག་གི།

སྲུབས་ཀ་ནས་འབུས་པ་གང་ཞིག།

ཁབ་དང་སྐུད་པ་འདྲ་ལེ།

ཆང་མ་དང་ཆང་གཞས་འདྲ་ལེ།

ངག་གི་ཤོག་ལེབ་འདིའི་ངོས་སུ།

ང་ཡི་གྲིབ་མ་འཚེམ་ཤོག།

                      ༢༠༡༦།༧།༣ཉིན་གཡོས་ཁང་དུ་གྲུབ།

 

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།