ནག་པོའི་སྙན་ངག་སྐོར་ཞིག་ཆེད་འགོད་བྱས་པ།

415

ḇᨗ´ḇᨗ´່´ḇ່.jpg

 


                                       __ནག་པོ།   མིང་དངོས་ལ་དགའ་བདེ་ཚེ་རིང་ཟེར།   སྙན་ངག་དང་འཁྲབ་གཞུང་།   གླུ་ཚིག་སོགས་མང་པོ་བརྩམས་ཡོད་ཅིང་།   བརྩམས་ཆོས་མང་པོ་དབྱིན་ཇི་དང་།  ཧྥ་རན་སི།   ཉི་ཧོང་།  ཡུ་གུར།   སོག་པོ་སོགས་ཀྱི་ཡི་གེར་བསྒྱུར་ཡོད།


 

      གེ་སར་རྒྱལ་པོ།


ཕ་གིའི་ཕོ་བྲང་ནག་པོའི་སྟེང་གི་དར་ཆ

ཁྱེད་ཀྱིས་བསྒྲེངས་པ་ཨེ་ཡིན་ནམ

གྲི་དངོའི་འོ་དོད་དེ་དག

རླུང་ནང་གི་གཟུགས་བརྙན་ཇི་བཞིན་ཁྲག་ལས་འགྱེལ་དུས

ཉེ་འཁོར་རུ་ཚ་སྨུག་ཅིག་འདུག་གམ

ཡང་དང་བསྐྱར་དུ་ས་ལ་འགྱེལ་བའི་བེམ་པོ་དག་གིས

ངའི་རྣམ་ཤེས་གཏོང་རོགས་ཟེར་བཞིན

པུས་མོ་སར་བཙུགས་ནས་ཞུ་བ་བྱེད་སྲིད་དམ

སེང་ལྕམ་འབྲུག་མོ་བོར་ཚར་དུས

ཕ་རོལ་བོ་ནི་རྒྱལ་ཕྲན་མི་འདྲ་བ་ཅི་ཙམ་ཡིན་པ

གོང་སྨན་རྒྱལ་མོའི་ལུང་བསྟན་དུ་བབས་ཡོད་དམ

མཛེས་སྡུག་མཚོན་བྱེད་ཀྱི་བུད་མེད་དེ

དཔེ་ཆ་དང་ལྡེབས་རིས་ངོས་སུ་མཐོང་མྱོང་བའི

ཧོར་གུར་དཀར་གྱི་འགུལ་གྱིན་པའི་ལྕེ་བར་ནས་མྱངས་འདོད་པའི

ལན་རེར་ཏིག་ཏའི་དྲི

ལན་རེར་ཙན་དན་གྱི་དྲི་ལྟ་བུའི

སྨན་ཆུང་དེ་དྲན་སྲིད་དམ

བར་དོ་སྒྲོལ་ཐུབ་མིན་ལ་དོན་སྙིང་མི་འདུག

ལག་སྙོབ་གང་འདོད་དུ་བྱས་ཀྱང

ར་རོར་གྱུར་པའི་མིག་གི་ལྟ་ཕྱོགས་ཀྱིས

གླིང་དཀར་སྟོད་ནི་གཏིང་ཟབ་ཀྱི་མུན་པ་ཞིག་ཏུ་ཆགས་འདུག་པས

རྐྱང་རྒོད་གཡེར་བའི་སྟེང་ནས

ཁྱེད་ཀྱི་ཤ་ཆང་སྤྱོད་མཚམས་བཞག་ནས་བརྩེ་གཞས་ཡང་ཡང་བཏང་བ་ནི

མེ་བཟའ་འབུམ་སྐྱིད་དྲན་པས་ཡིན་ནམ

རྙིད་ལ་ཉེ་བའི་མེ་ཏོག་ཆུན་པོ་འདིར

དུས་ཀྱི་ཆར་སུ་མ་བསུ་བར་ཚོད་ཚོད་ལ་སྐམ་དུ་བཅུག་པས

ཁྱེད་རང་འབྲོག་སྡེ་རེ་རེ་མྱུལ་ནས

ཕྱོགས་བཞིའི་དགྲ་བཞི་བཏུལ་རུང

སྙན་ངག་པ་ཞིག་གི་བརྩམས་ཆོས་ཀྱི་ཆུ་ཁར་གཡེང་ནས

དབུགས་ཀྱི་རྒྱུ་བ་འགག་འདུག

འཆི་ཁ་མར་གཟུང་སྔགས་གོ་དཀའ་བ་ཞིག་ཟློ་བར་བྱེད་ཀྱང

མ་འགག་བཟས་ཐོས་མ་བྱུང

                                                                2016/5/17

IMG_6238.JPG

 

         ས་བོན།


མེ་སྟག་གཉིས་ཀྱི་གཙུབ་བརྡར་ལས

རླུང་གི་སྒྲ་དབྱངས་ཐོས

སུ་ཞིག་གིས་རྒྱབ་ཕྱོགས་ནས་ང་རང་འབོད་པ་དང་འདྲ་ལ

ངས་ཁོ་ལ་ཅི་ཞིག་འཆད་སྲིད

ཉི་མ་ལྷ་ས་ནས་རྙེད་པའི་ནོར་བུ

སྡོད་ཁང་གི་ཉིན་སྲིབ་ནས་འཚོལ་གྱིན་པ་དེར

ཕོ་མོའི་དབྱེ་བ་མི་འདུག

སྐྱེ་བ་དུ་མའི་རྨི་ལམ་མཚམས་བཞག་པ་ཙམ་གྱིས

ལུས་ཀྱི་ས་རྡུལ་དཀྲུག་དཀྲུག་བྱས

ཁྱེད་རང་བྱོན་པ་ལེགས

                                          2016/5/16

IMG_6472.JPG

 

        ཆབ་ཆའི་སྙན་ངག


                   ༡

བདེ་སྐྱིད་ཐང་ནས་མོ་ཊར་ཆག་སྐྱོན་བྱུང

ཉི་མར་ལྡེའམ  རླུང་གི་རྩེ་མོས་ང་ལ་ཡང་ཡང་བསྣུན

བྲོ་ཁ་བོར་ཚར

ཕ་གི་རྟ་ཕོའི་རྒྱབ་ལ་ཁ་བ་སྟུག་པོ་ཞིག་བབས

པཎ་ཆེན་སྐུ་ཕྲེང་བཅུ་བ་ལགས་ཀྱིས

གཉེན་ཉེ་ཁྱོད་གང་དུ་ཆས་སོང་ཟེར

                   ༢

སྐད་ཅིག་མའི་རླུང་བུ་དེས

མེ་ཏོག་རྙིད་པ་ཅིག་ལ་བལྡགས་ནས་ཡར་བསླངས་ནའང

རང་བཞིན་གྱི་ཉིན་གཅིག་དུས་ཚོད་ནང་བཞིན་གྲུབ་པས

མེ་ལྕེར་གཡོལ་བར་བྱེད་པའི་སེམས་ཀྱི་འདོད་སྲེད

རྨི་ལམ་ནས་བོར་བའི་སྡོམ་པ་ཇི་བཞིན

ཕ་རོལ་བོའི་གདོང་ནས་མངོན་ཐུབ་བམ

                     ༣

སྡོད་མི་ཚུགས་པའི་ཞོགས་པའི་དུས་སྐབས་ཅིག་ལ

འཁྲབ་གཞུང་ཞིག་བྲི་བར་འདོད་དེ

ཤོར་དཀར་གྱི་ངོས་སུ་ཡང་ཡང་བཅར་ནའང

ཐ་སྙད་ཁ་ཤས་རྟ་ཕོ་བཞིན་འཚེར་བ་ལས

སྡོད་ཁང་གི་ནང་དུ

རེག་ཐུབ་པ་ཞིག་སྟོང་བ་ཉིད་ལས་མི་འདུག

                         ༤

མེ་ཏོག་འཁྱགས་པ་དག་གད་སྙིགས་སུ་དོར་ནས

ཉི་འོད་ནང་དུ་ལག་པ་བསྲིངས་ཙམ་བྱས

ཆུང་མའི་རྨི་ལམ་དུ

མེ་ཏོག་དེ་དག་བུད་མེད་གསུམ་དུ་གྲུབ་པ་དང

ངའི་སྐེ་རུ་འཐམས་ནས་ཀུ་ཅོ་བསྒྲགས

ལྡེབས་རིས་ངོས་ཀྱི་ཁྱེད་ནི

ཆང་ཁང་ཞིག་ནས་མཐོང་བ་ལྟར་འཛུམ་ཙམ་བྱས

                          ༥

ཆབ་ཆ་ནས་ཡུན་རིང་ཞིག་ལ་འདུག་ཁོམ་མ་བྱུང

ལམ་བར་གྱི་རྙེད་འདོད་པ་དག་ཀྱང་རེ་རེ་བཞིན་བོར་སོང

མགྲིན་པ་གཟེངས་སུ་བཏེགས་ནས་གཞས་ཤིག་བཏང་བའང

བགྲེས་པོ་ཞིག་གི་རྣ་ལམ་ནས་བོར་སོང

རྒྱང་རིང་ཞིག་ནས་ཕྱིར་ལྟ་བྱེད་དུས

ཉེན་རྟོག་པ་ཞིག་གིས་ག་ལེར་ཕེབས་གསུང་བྱུང

                                                    2015/12/28ཉིན་ཟི་ལིང་དུ།
333333333333.jpg

 

          ལྷ་སའི་སྙན་ངག


                         ༡

འབྲི་གུང་གཙང་པོས་རྒས་འཁོགས་ཀྱི་ས་འདི་སྦང་བ་བཞིན

ལྷ་སར་ཉེ་དུས་དབུགས་གཙང་མར་གྱུར

རྩེ་སྐོར་ནས་གཙུག་ལག་ཁང་གི་རྒྱ་ཕིབས་མཐོང་དུས

ཕྱག་ཕྲེང་རྙིང་པ་དེ་ལ་རེག་འདོད་ཅིག་མི་འདུག

མེ་འཁོར་གྱིས་དྲུད་ཡོང་བའི་ང་ཚོར་མཚོན་ན

སྟོད་གཞས་ནང་གི་པོ་ཏཱ་ལ་མཐོང་ཐུབ་མི་འདུག་སྟེ

ཁ་གྲགས་པ་ཙམ་ནས་ཇ་མངར་མོ་ཧུབ་འཐུང་བྱེད་དུས

ཉང་བྲན་གྱི་བུ་མོ་དེ་ཟས་ཅོག་གི་མཐའ་རུ་རྦད་དེ་ཧད་འདུག

                          ༢

ཕོ་བྲང་དམར་པོའི་རྒྱབ་ལོགས་སུ་ཉལ་འཕྱི་བར་གྱུར་དུས

སྡེ་སྲིད་ཀྱི་མིག་ཆུ་ནི་མཆོད་མེ་ཞིག་ཏུ་འཁྲུལ

གློ་བུར་ཏུ་ཆུང་མའི་དྲན་པ་ཇེ་གསལ་ཏུ་སོང་སྟེ

རྟ་ཕོ་ཁྱུ་གཅིག་གི་སྡུག་བསྔལ་མ་ལུས་པའམ

དར་ཟབ་གྱིས་རྒྱན་པའི་སྦལ་གདོང་མའི

བགྲང་མི་ཚར་བའི་སྐྱོ་གར་སྐོར་ཀྱང་འདྲི་རྒྱུ་བྱུང

                       ༣

བར་སྐོར་གྱི་གསང་བའི་སྒེའུ་ཁུང་མཐའ་རུ

ངས་ལྷ་སའི་སྦི་རག་འཐུང་བའི་གྲིབ་མ་སུས་མཐོང་སོང་ངམ

གཡག་མགྲོན་ཁང་གི་སྒོ་མདུན་དུ

ངས་ཇོ་ཇོའི་དངོས་ཟོག་རེ་རེ་མིག་ལམ་ལ་མངོན་ཡོང

ཀོ་གྲུ་གཏོང་བར་དགའ་བའི་མེས་པོ་རྣམས་ཀྱིས

གཟའ་ཕུར་བུའི་ངའི་སེམས་ཁམས་འདི་ཚོར་སྲིད་དམ

                              ༤

ཇོ་མདུན་ནས་མིག་ཟུང་བཙུམས་ཏེ

སྨོན་འདུན་གཙང་མ་ཤུར་ཤུར་ལབ་ནའང

འཁྱག་པའི་སྟེང་དུ་བགྲོད་པ་བཞིན

གོམ་པ་གང་རེ་མདུན་དུ་སྤོས་ན་སེམས་པ་འདར་འདར་བྱེད

                             ༥

ཞི་དུལ་གྱི་རྨི་ལམ་མཚར་བོ་འདི

སྟག་རྩེའི་ཨ་ཅག་དེས་འཆད་པ་སུ་ལའང་བཤད་མ་སྤོབས

སྐར་མ་ཨ་བརྟན་མཐོང་ཡོང་གི་འདུག

ཐག་རིང་དུ་ཡོད་པའི་ཚུལ་གྱིས་སྐབས་རེར་འཁྱུག་སྲིད་ནའང

གཡུ་ཡི་རྣ་ཆ་ཞིག་ཉོ་བའི་ཕྱིར་ཏུ

སྐྱ་རེངས་མ་གྲགས་གོང་ནས་ཚོང་ལ་ཉུལ་དགོས

བཙས་མེད་པའི་ངའི་བུ་མོ་ལ་གནང་ངམ

སྡེ་བས་གཞུང་བཞེས་གཏོང་བར་ཉར་ཚགས་བྱེད

                             ༦

དྲན་པའི་ངོས་སུ་བསུབ་ཐབས་མི་འདུག

ཤ་དང་ཁྲག་དང་ཀེང་རུས་ཕྱེ་ལེབ་ཀྱི་གཤོག་པར་འབྱར

ནམ་མཁའ་ཡར་ལ་བལྟས་ནས་མིག་འཕུར་ཙམ་བྱས

འཆི་འཕོའི་སྐོར་ལ་རྩད་འདྲི་གནང་མཁན་མ་བྱུང

                          ༧

གློ་སྙིང་མཆིན་གསུམ་འདུས་པའི་གཟུགས་དང་ཁ་དོག་སོགས

ནོར་བུ་གླིང་གའི་མཐའ་རུ་སྤྲད་དེ

གནམ་སྔོན་པོའི་ངོས་སུ་གསལ་ལེར་བཀྲམས

འབྲོང་གཡག་གི་དཔུང་ཚོགས་ཀྱང་དེའི་མཐའ་རུ་གཤར

སུས་ཀྱང་ཁེད་དཀའ་བའི་ངའི་གཞས་ཚིག་རིང་མོ་དེའང

ལུང་བསྟན་དུ་ཡང་ཡང་བབས།

                ༨

དྲི་བ་དྲིས་ལན་གྱིས་བསལ་བའི་ཚོགས་དྲུག་གི་དབུས་མཇལ་ཁྲོད

སྨྲ་ལྕེའང་རུལ་བར་ཉེ

སྐུ་མཁྱེན 

སྐུ་མཁྱེན

                             2015/10/6ཉིན་བྲིས།
                            2015/10/26ཉིན་བཅོས།

 

 རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།