སེང་རྡོར་གྱིས་ཚིགས་བཅད་སྐོར་ལ་བྲིས་པའི་རྩོམ་འཇིགས་གསུམ།

484

14805522_1201610699896428_542273154_n.jpg

དང་པོ། ཆོས་གཞུང་ཕལ་ཞིག་ཚིགས་བཅད་དུ་ཡོད་པ།


རྗོད་བྱེད་ཚིག་གི་བསྡུར་ཚད་སྟེང་ནས། །

སངས་རྒྱས་ཆོས་གཞུང་བརྒྱ་ཆར་བགོས་ན། །

དྲུག་ཅུ་བདུན་ཅུ་ཚིགས་བཅད་རྐྱང་སྟེ། །

ལྷག་མའི་བག་ཙམ་ལྷུག་སོགས་ལུས་གཞན། །

སྟོན་པས་ཚིགས་བཅད་ཏག་ཏག་གསུངས་ཡོད། །

ཁོང་གིས་ཚིགས་ལྷུག་དེ་ཙམ་མཛད་མེད། །

རྗེས་མཇུག་མཁས་པ་ཀླུ་ཐོགས་སོགས་ཀྱང་། །

སྐད་སྐུར་ཚུན་ཆད་ཚིགས་བཅད་རྩོམ་དགའ། །

བཀའ་པོད་ལྔར་གྲགས་དེ་ཚོའི་རྩ་བ། །

ལྔ་ཡི་བཞི་ནི་ཚིགས་སུ་བཅད་པ། །

བཅད་པ་དེ་ཡང་རབ་ཏུ་བསྡུས་པའི། །

སྙིང་པོའི་སྙིང་པོར་དྲིལ་བ་ཞིག་ཡིན། །

དྲི་མེད་འོད་ཟེར་ཀློང་ཆེན་མཛོད་བདུན། །

ཐེག་གྲུབ་གཉིས་ཕུད་གཞན་དག་ཚིགས་བཅད། །

རྒྱལ་བ་འཇམ་དཔལ་སྙིང་པོས་ཁྲིད་པའི། །

བཅུ་བདུན་གཞུང་གི་ཕལ་ཞིག་ཚིགས་བཅད། །

ལམ་རིམ་རྩ་བ་ལམ་སྒྲོན་ཡིན་ལ། །

ལམ་སྒྲོན་ཞེས་པ་ཚིགས་བཅད་འགའ་ཡིན། །

མཁས་པའི་ཁྱད་ཆོས“ཚིག་ཉུང་དོན་འདུས”། །

ཡིན་ཞེས་གནའ་རབས་མཁས་པ་གསུངས་སོ། །

“ཚིག་ཚོགས་མང་བར་འཇིགས་ཏེ”ཞེས་དང་། །

“ཚིག་གིས་ལོ་མས་མ་བསྒྲིབས”ཞེས་དང་། །

“ཚིག་འཁྲི་སྤངས་ཏེ་བྲིས་པ”ཞེས་སོགས། །

སྲོལ་རྒྱུན་དྲན་དབང་རྟག་པར་བརྣན་ནོ། །

སངས་རྒྱས་ཚིགས་བཅད་ཐུང་ཐུང་མཛད་དེ། །

འཁོར་འདས་གཉིས་ཀ་བཀྲལ་ཟིན་གསུངས་ན། །

ང་ཚོས་མགོ་བོ་ནང་དུ་ལྡེམ་བཞིན། །

ལག་པས་ཐལ་མོ་སྦྱོར་བར་བྱེད་དོ། །

རྒྱན་དྲུག་མཆོག་གཉིས་སངས་རྒྱས་ནང་བཞིན། །

ཚིགས་བཅད་འབྲི་ཞིང་འབྲི་ཞིང་གཤེགས་སོ། །

དེ་ལ་བདག་ཅག་མགོ་ལུས་གཏད་ཟིན། །

ཚིགས་ལྷུག་ཁྱེར་ཤོག་ལབ་མཁན་མ་བྱུང་། །

དེས་ན་ངས་ཀྱང་ཚིགས་བཅད་ལམ་ནས། །

“རྟུལ་ཕོད”བཏགས་པའི་བསྟན་བཅོས་བརྩམས་གང་། །

ཚིག་ཚོགས་ཉུང་ཞིང་དོན་གྱིས་བརྟན་པ། །

རླུང་ཆེན་དཀྱིལ་གྱི་རྡོ་བ་བཞིན་ནོ། །

སྟོན་པའི་ཟབ་རྒྱས་ཆོས་ཀྱི་ལན་ལ། །

ཁྱོད་ཀྱིས་ཚིགས་བཅད་འགའ་ཙམ་བྲིས་ཞེས། །

རྒྱུས་མེད་རྒྱུས་གཏམ་སྨྲ་མཁན་བྱུང་བས། །

ཡང་བསྐྱར་གོ་བདེའི་རིག་འཕྲུལ་འདི་བསྐོར། །

14804788_1201610723229759_1880733727_n.jpg

གཉིས་པ། ཆོས་གཞུང་ཕལ་ཞིག་ཚིགས་བཅད་དུ་ཡོད་དོན་ཅིའི་ཕྱིར་ཞེ་ན།


གནའ་རྩོམ་འབྲི་བའི་རྣམ་གཞག་ལ། །

སྡེབ་སྦྱོར་ཞེས་སུ་འབོད་པ་ཡིན། །

དགོས་པ་ཚིགས་བཅད་རྩོམ་ཕྱིར་ཏེ། །

བྲྀ་ཏྟ་དང་ནི་ཛཱ་ཏིར་དབྱེ། །

བཀའ་དང་བསྟན་བཅོས་ཟེར་བ་དག །

སྒྲོམ་དེར་མ་ཚུད་འགའ་ཡང་དཀའ། །

རྒྱ་གར་གླིང་ན་རིན་འབྱུང་དང་། །

ཐུབ་དམར་རྩ་བའི་མདོ་སོགས་ཡོད། །

ཀུན་ཀྱང་ཚིགས་བཅད་རྩལ་དུ་འདོན། །

ལྷུག་སྤེལ་གླེང་བ་སྲིད་མཐའ་ཙམ། །

འདིས་ཀྱང་སངས་རྒྱས་ཆོས་གཞུང་ཕལ། །

ཚིགས་སུ་བཅད་པར་གནས་དོན་ཤེས། །

བོད་དུ་ས་སྐྱ་པཎ་ཆེན་གྱིས། །

སྣ་ཚོགས་མེ་ཏོག་ཆུན་པོ་བརྩམས། །

དེ་ནི་ཚིགས་སུ་བཅད་པ་ཡིས། །

ཚིགས་བཅད་འབྲི་ཚུལ་བསླབས་པ་འོ། །

ཁོང་གིས་རོལ་མོའི་བསྟན་བཅོས་སོགས། །

ཚིགས་སུ་བཅད་པའི་གཏེར་སྒོ་ཕྱེས། །

ཞྭ་ལུ་ཆོས་སྐྱོང་བཟང་པོ་སོགས། །

རིན་འབྱུང་བསྒྱུར་ཏེ་སྤེལ་བར་མཛད། །

བོད་ལ་ཇི་བཞིན་མི་འཕྲོད་ཀྱང་། །

རྒྱ་བོད་གང་ཡང་ཚིགས་བཅད་དགའ། །

འདི་འདྲ་ཤེས་པས་ཅི་ཕན་ཡང་། །

ཆེད་དུ་དཔྱོད་དག་རྨོངས་མི་འཚལ། །

སྟོན་པས་ཚིགས་སུ་བཅད་པ་ཡིས། །

ཐུགས་ནི་བསྐྱེད་ཅིང་ཚོགས་ནི་བསགས། །

བདག་ཀྱང་དོ་ནུབ་ཚིགས་བཅད་འགས། །

མ་འདྲེས་ཆོས་ནི་འདི་ཙམ་བསྟན། །

འཆར་ཡན་ཐུན་མཚམས་འོག་གི་སྙན་ངག །

ང་ལ་ཚེ་རབས་ལས་ཀྱིས་འབྲེལ་མོད། །

དེ་ལ་མཁས་པར་མྱོང་མཁན་དཀོན་པས། །

སུས་ཀྱང་གོ་བའི་ཁ་བརྡ་འདི་བྱས། །

                                        ༢༠༡༣ ༡༡ ༨

14813619_1201610773229754_149532465_n.jpg

གསུམ་པ། ཚིགས་སུ་བཅད་པའི་སྐོར་ཡང་བསྐྱར་བརྗོད་པ་རྡོ་རྗེའི་གླུ་ལ་རྣམ་འགྱུར་ཟད་མཐའ་མེད་ཅེས་བྱ་བ།


༡ བརྡ་སུམ་རྟགས་གཉིས་ཀའི་སྡོམ་བྱང་ཚིགས་བཅད་རེད། །

གཞུང་ཟབ་མོའི་དཀའ་གནད་འཆད་ལ་མ་སྐྱོན་ཐལ། །

ཆོས་མདོ་སྔགས་གཉིས་ཀྱི་རྩ་བ་ཚིགས་བཅད་རེད། །

རྒྱུ་ཀུན་གཞིའི་ཕྲ་ཞིབ་སྟོན་ལ་མ་གནོད་ཐལ། །

༢ གཞུང་བཀའ་པོད་སྣ་ལྔར་གྲགས་པ་ཚིགས་བཅད་རེད། །

རྩོད་དགག་སྒྲུབ་རང་ཆས་ཡིན་པ་ཤེས་རྐྱང་བྱོས། །

སྒྲུང་གེ་སར་གླུ་མཛོད་ཅེས་པ་ཚིགས་བཅད་རེད། །

དཔེ་སྣང་སྲིད་ལག་ཐོགས་མེད་པ་གོ་རྐྱང་བྱོས། །

༣ རྗེ་མི་ལའི་མགུར་འབུམ་སྐད་པ་ཚིགས་བཅད་རེད། །

གང་མ་ཤོད་བསྐྱུར་བཞག་ཡོད་པ་ངས་མ་མཐོང༌། །

དཔལ་ཨོ་རྒྱན་བཀའ་ཐང་འབོད་པ་ཚིགས་བཅད་རེད། །

ཅི་མ་འཕྲོད་བརྫད་བཞག་ཡོད་པ་ངས་མ་རིག །

༤ ཁྲིམས་ཞལ་ལྕེ་བཅུ་དྲུག་ཟེར་བ་ཚིགས་བཅད་རེད། །

ལས་བདེན་རྫུན་ཧྲིལ་གྱིས་ཤོད་པའི་སྐྱིད་ཅིག་ཡོད། །

སྨན་གསོ་རིག་རྒྱུད་བཞི་ཟེར་བ་ཚིགས་བཅད་རེད། །

རོ་ཕན་ནུས་རྫོགས་ཀྱིས་འཁྲོལ་བའི་གདེང་ཞིག་ཡོད། །

༥ སེམས་སྤྲོས་པའི་གྲངས་ཚད་ཆིག་འབུམ་གཏན་ལ་འབེབས། །

ཡིད་ཤེས་པའི་འགྲོ་འོང་ས་ཡ་ཐིག་ལ་འདེབས། །

ཁམས་སྟོང་བའི་རང་བཞིན་དེ་ཡང་དངོས་སུ་སྨྲ། །

ཚིགས་བཅད་མས་གཤིས་ལུགས་ཨེ་སྟོན་དེ་ལྟར་དགོངས། །

༦ གཞུང་དབུ་མ་རྩ་ཤེས་ཀླུ་སྒྲུབ་ཞབས་ཀྱིས་མཛད། །

གཞུང་ཚད་མ་རྣམ་འགྲེལ་ཆོས་ཀྱི་གྲགས་པས་བྱས། །

གཞུང་ངག་གི་མེ་ལོང་དབྱུག་པ་ཅན་གྱིས་བཀོད། །

ཚིགས་བཅད་མས་གཞུང་ལུགས་ཨེ་ཤོད་དེ་ལྟར་དགོངས། །

༧ མཚར་ཐག་ཆོད་འདོད་པའི་བསྟན་བཅོས་ཚིགས་བཅད་ཡིན། །

འདི་སྙན་ངག་གཞུང་དུ་གྲུབ་པའི་མ་དཔེར་ལྟ། །

ཟབ་ཐག་ཆོད་འདོད་པའི་བསྟན་བཅོས་ཚིགས་བཅད་ཡིན། །

དེ་གཞུང་ལུགས་ངག་ཏུ་འབར་བའི་ཚད་གཞིར་འཇོག །

༨ བོད་རང་གི་ཆོས་དང་རིག་གཞུང་ཟེར་ལོ་དང༌། །

བོད་རང་གི་དེབ་དང་རྩོམ་ཡིག་ཟེར་ལོ་དང༌། །

བོད་རང་གི་གཏམ་དང་བརྗོད་པ་ཟེར་ལོ་ཕལ། །

ཚིགས་བཅད་མའི་གཟུགས་སུ་ཡོད་པར་ཅི་ལྟར་བསྙོན། །

༩ ཚིགས་བཅད་མར་སྦྱངས་པ་བྱས་པ་དམན་དྲགས་ན། །

བོད་རིག་པའི་སྐད་ཆ་འཆད་རྒྱུ་སྔ་ཙམ་འདུག །

ཚིགས་བཅད་མར་གོ་བ་བླངས་པ་ཞན་དྲགས་ན། །

བོད་མཁས་པའི་གསུང་རྩོམ་དགག་རྒྱུ་འཕྱི་ཙམ་བྱོས། །

༡༠ ལྷུག་སྤེལ་མའི་རྩོམ་སྟངས་དོན་ཆུང་མ་རེད་ཀྱང༌། །

བཅད་འགྲིག་མའི་བྲི་ཚུལ་དོ་གལ་ཅིར་ཡང་ཆེ། །

མཆོང་ལྡིང་མའི་མགུར་ལུགས་འདི་དང་འདི་འདྲ་ཡང༌། །

ཚིགས་བཅད་མའི་དཔེ་སྲོལ་བཀོལ་བདེ་སྤྱོད་དགའ་ཡིན། །

                                                                     ༢༠༡༠ ༠༢ ༡༢

 

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།