རས་པས་གསར་དུ་བྲིས་པའི་སྙན་ངག་འགའ།

314

IMG_2701.JPG

                            ༡ རྩྭ་ཕུང་། 

 

རྩྭ་གཟུགས་ཀྱི་ཕུང་པོ་ཙམ་ལ་ཞེན་ཆགས་ཅི་ལ་བྱེད

ནམ་མཁའི་ཁམས་ཀྱི་ཡིད་ཆེས་ནི་ཚ་བ་ཆེ་དུས་ཀྱི

སྐྲ་གསེང་ལ་རྒྱབ་པའི་རླུང་བུ་ཙམ་སྟེ

འཇིག་རྟེན་ནི   འཇིག་རྟེན་ནི་ངེས་མེད་ཀྱི་སྔུར་པ་དང་འདྲ

ད་དུང་ཡོད་དེ   མཚམས་ལན་རེར

སྒྱུ་རྩལ་ལྡན་པའི་མིག་ཆུ་ནི་དུས་མིན་དུ་བཞུར་ཞིང

སྐྱོ་གདུང་གི་ངུད་མོ་ཡང

འཇའ་ཚོན་ལྟར་བཞད་ངེས

ཁྱོད་ཀྱིས་ཉི་ཟླའི་རྣ་ཆ་གང་དུ་ཡོད་པ་ད་དུང་རྙེད་མེད

ཁྱོད་ཀྱིས་རང་བྱུང་ཁམས་ཀྱི་ཆགས་སྲེད་འབར་བའི་མྱོས་བུམ་ལ

རེག་རྒྱུ་བརྗེད་འདུག

ཚིམས་མེད་ཀྱི་འདོད་སྤྱོད་དེ་ནི

འཛུམ་མདངས་ཀྱི་བསྐྱེད་འབྲས་ཙམ་མ་ཡིན་ཏེ

གཏན་དུ་དྲན་གསོ་མ་བྱས་པའི་རླུང་གི་ཁ་དོག

ངེས་མེད་ཀྱི་ཚོར་ཤུགས་ཤིག་སྟེ

བདག་ཉིད་འཐམ་ནས་ཚིམས་པ་མེད་པའི་བདེ་སྣང་གི་འདོད་བློ་དེ་ལགས

ད་དུང་གཅིག་བརྗེད་ཡོད

དུས་གཏན་དུ་ཡིད་ཆེས་ཙམ་ཡང་བསྐྱེད་དཀའ་བའི་ཕོར་བ་ནི

ཁྱོས་རང་གི་མགོན་སྐྱབས་ལ་རུང་བའི་ལྐོག་དངུལ་ཡིན་པ་དྲན་གསོ་གནང་རོགས

                             ༢༠༡༥།༣།༢༡ལ་མྱི་སྲས་བཙན་པོར་ཕུལ། 
etet.jpg

            ༢ ཨེ་ཤ་ཡའི་ས་ཡོམ་ལ་ཕུལ་བ། 

 

ས་འགུལ་རྗེས

སེམས་འགུལ

             ༢༠༡༥།༤།༢༦ལ།
etetet.jpg

               ༣ འགུགས་འཁྱེར་ཀྱི་བང་སོ།  


ངས་ནམ་རྒྱུན་གདངས་ཀྱི་འགྱུར་ཁུགས་གཅིག་ལ་རྣ་བ་གཏད

མིག་ཟུང་གཅིག་གིས་བདག་ལ་ཧད་དེ་བལྟ་བཞིན་པར་བསམ

འཛུམ་ཆུང་ཞིག་རང་གི་མིག་ཁར་ཡལ་མེད་དུ་གནས་པ་ཡུན་རིང་བོར་མ་ཚོར

ངས་རང་གི་བྲང་ཁོག་རྩྭ་ཐང་དུ་ཞབས་བྲོ་འཁྲབ་ཀྱིན་པ་སུ་ཡིན་ཇི་ལྟར་ཚོར 

ངའི་རྣམ་ཤེས་ཀྱི་གཞུང་ལམ་ཏུ་ལྕགས་རྟས་བསྐོར་བསྐྱོད་བྱེད་བཞིན་པ་ཁྱོད་དུ་ག་ལ་ཤེས

ངས་རང་ཉིད་སྟོན་གྱི་སྡོང་ལོ་ཞིག་ཡིན་པ་ཚོར་དུས

ཁྱོད་ཀྱིས་མིག་ཟུང་བཙུམས་སྟེ་ཅི་ཞིག་ལ་རོལ་མྱོལ་བྱེད་ཀྱི་འདུག

ངས་རང་ཉིད་ལ་རྒྱང་བཀྱེད་ནས་ཕྱིར་བལྟ་དུས

ཁྱོད་ཀྱི་ཞལ་ལས་ཐོན་པའི་རོལ་དབྱངས་ཀྱི་བརྡ་རྟགས་ཤིག་ཡང་ཡང་མཁའ་རུ་འཕྱོ

ངས་ཁྱོད་རང་གཞས་གཏོང་མཁས་པའི་བུད་མེད་དེ་རེད་བསམ་བསམ་མ་བྱུང

                                                                                                                 ༢༠༡༥།༥།༡༣ཉིན།

 

      ༤ ལོ་ངོ་ཁ་ཤས་རྗེས་སུ། 


ལོ་ངོ་བདུན་གྱི་རྗེས་སུ

གནམ་གྱི་སྐར་ཚོགས་ས་ལ་ལྷུང

ཆུ་ཡི་མཆོད་པ་ནི་སྐད་ཤུགས་ཆེན་པོའི་ཟས་མཆོག་ཅིག

དེ་ལྟ་བུའི་དུས་སུ  ངས་རང་གི་སྙིང་གཏམ་ཚོར

ང་ཚོའི་སྙིང་གཏམ་ནི་ལག་འཇུ་གཅིག་གིས་གསལ་བར་ཞུས

ང་ཚོས  ཁ་ཁུ་སིམ་པོར་ཝུ་ཆང་གི་བརྩེ་གླུ་གྱེར

ཁྱོད་ཀྱིས་རང་གི་དགོད་སྒྲ་ལ་ཕྱི་ཤུན་ཡོད་པ་རྟོགས་མྱོང་ངམ

ལོ་ངོ་བདུན་གྱི་རྗེས་སུ

ས་མཐའི་ཁ་བརྡ་ནི་སྐད་ཆའི་ཕྱི་ཤུན་ཕུད་པའི་མཇལ་འཛོམས་ཤིག

                                                                                        ༢༠༡༥།༦།༢༤ཞོགས་པར། 
645646.jpg

              ༥ སེམས། 


རླུང་ཁའི་སེམས་པ་ནི་མར་མེ་འདྲ  

གང་ལ་སླེབས་ཡང 

གདམས་ངག་གཅིག་རང་གོ་སྟེ

ཨ་མས་གཏམ་རྒྱུད་དུ་མི་ཚེ་རླུང་ཁའི་མར་མེ་འདྲ་ཟེར

སེམས་པ་སྔར་བཞིན་ཏེ

རེ་བ་ཡོང་རྫོགས་ཀྱི་ཚད་དུ་སྤུངས

འཛད་དཀའ་བའི་སྨུག་སྤྲིན

ཡལ་བར་དཀའ་བའི་མགོ་ཐོག་གི་རི་མོ

དེ་ཡིན་ཡང

རླུང་ཁམས་ཡོད་ཚད་དུ

ངས་རང་གི་འདོད་འདུན་སྒྲོག་པར་འདོད

འོན་ཀྱང  ང་ལ་རྩྭ་ཐང་མེད

རྟ་མཆོག་ཀྱང་མེད

                  ༢༠༡༥།༧།༧ལ། 

                ༦ ཚོར་བ།


འདི་ནས་ཕར་ལ་འགྲོའམ་འདུག།

རྒྱབ་ནི་ཚེར་མའི་ཕུང་བོ་སྟེ།།

མདུན་ནི་མུན་ནག་གྲུ་བཞི་ཞིག།

འདི་ནས་ཙོག་གམ་ལངས་ནས་སྡོད།།

གནམ་ནི་ལྕགས་ཀྱི་ཁ་ཚུབ་སྟེ།།

ས་ནི་མེ་ཡི་གདན་དུ་ཤེས།།

འདི་ནས་བསམ་མམ་བག་ཡངས་བྱེད།།

བློ་ནི་སྒྱུ་མའི་འཕྲུལ་ཙམ་སྟེ།།

བག་ཡངས་འཚོ་བའི་དོན་དུ་ཚོར།།

                       ༢༠༡༥།༧།༡༣ཉིན།

             ༧ སྨུག་པ།

འཆར་ཡན་གྱི་རྩིག་ངོས་སུ་ད་དུང་གསལ་པོར་ཤར

རླུང་བུའི་འཁོར་ཕྱོགས་སུ་དྲི་བསུང་ཡངས་མོར་རྒྱུ

ལྗོན་པའི་ལོ་འདབ་ལས་ཟིལ་ཐིགས་འབབ་ཅིང

རི་བྱེའུ་དག་གིས་ང་དང་རྒྱང་བཀྱེད

སྨུག་པས་རི་ལུང་གཡོགས་ཤིང

ཆར་བའང་སྔར་བཞིན་འབབ

ཡལ་དཀའ་བའི་རྐང་རྗེས་སུ་ཞིག་གིས་བསུབས་ཡོད

རྩྭ་ཡི་འཛིང་རགས་དཀྱིལ་དུ

མིག་འོད་ཀྱིས་སྐམ་པར་བྱས་པའི་ཆར་གྱི་མེ་ཏོག

ངས་སླར་ཡང་རི་མོར་བྲིས་ཏེ་སྐྱེས་སུ་བཅུག

མེ་ཏོག  མེ་ཏོག  རྩྭ་ཡི་ཤོམ་ལྭ

འཇིག་རྟེན་ནི་སྔར་བཞིན་སྨུག་པའི་གསེང་གི་དངན་པ་ཞིག

ཁོ་ཚོས་ང་ལ་རི་རབ་ཀྱི་རྩེ་མོ་བསྟན

བརྒལ་དཀའ་བའི་སྒྲུང་བཤད

ངས་རང་ཉིད་ཀྱི་སྙིང་ལག་པར་བླངས་ཏེ

སྨུག་པའི་གསེང་དུ་ཤུགས་ཀྱིས་གཡུགས

ང་ཡི་འགྲུལ་བཞུད་ཀྱི་ལམ་ཁར

མིག་མདུན་དུ་ཆེན་པོ་ཆགས་བཞིན་པའི་རྒྱལ་པོ

ངས་ཁྱོད་ཀྱི་རྔུར་སྒྲ་ཡངས་མོ་གཅིག་པུ་གོ་ཐུབ

ཀྱེ  རི་ལུང་སྨུག་པས་བཟུང

སྨུག་པ  སྨུག་པ

                  ༢༠༡༥།༧།༢༩ཉིན། 

 རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།                             

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།