མང་ཡུལ་ལ་དྭགས་སུ་བསྐྱོད་པའི་ཟིན་ཐོ།(སྔ་དུམ)

67009

རྩོམ་པ་པོ། ཨ་འདུས་སྐལ་བཟང་རྒྱ་མཚོ།

༡༣.jpg
ཨ་ལྕེའི་ལྡེབས་རིས།  __ཁང་ཟླ་སྲས་ཀྱིས་པར་བླངས། 
༢༡.jpg
སྐྱིད་ལྡེ་ཉི་མ་མགོན་གྱིས་ཤེལ་བྲག་ལ་ས་རྟགས་སུ་བཞེངས་པའི་རྒྱལ་བ་རིགས་ལྔ།   ཁང་ཟླ་སྲས་ཀྱིས་པར་བླངས།

          རྒྱུད་ཉི་ཟླ་ཁ་སྦྱོར་ལས། དོན་གྱི་ལོ་རྒྱུས་མ་བཤད་ན།། གསང་ཆེན་བརྙེས་པའི་བཀའ་ཡིན་ཡང་།། ཡིད་མི་ཆེས་པའི་སྐྱོན་དུ་འགྱུར།། གྲུབ་ཐོབ་བརྒྱུད་པའི་ལོ་རྒྱུས་བཤད།། ཅེས་གསུངས་པ་ལྟར།གང་ཟག་དང་། ཡུལ། དུས། བྱ་བའི་འགྱུར་བ་སོགས་དངོས་ཡོད་ཀྱི་བྱུང་བ་རྣལ་མ་དག་ནི། དཔྱོད་ལྡན་ཚོ་དགྱེས་པའི་གཟིགས་མོར་འོས་པ་ཡིན་པས། གཤམ་ནས་སྔོན་དུས་བོད་ཀྱི་བཙན་པོ་རིམ་བྱོན་གྱིས་མཛད་པ་བསྐྱངས་པའི་གནས། མངའ་རིས་སྐོར་གསུམ་གྱི་ནང་ཚན་མང་ཡུལ་ལ་དྭགས་ཀྱི་རིས་མེད་ཆོས་སྡེ་ཁག་གི་གཙུག་ལག་ཁང་རྙིང་མ་རྣམས་དང་། གནའ་མཁར་རྣམས་སུ་མཇལ་སྐབས་རང་གིས་གང་མཐོང་བ་དག་བརྗེད་ཐོར་འགོད་པ་ལ།

22222.jpg

        ཕྱི་ལོ་༢༠༡༧།ཟླ་༧ཚེས་༢༩ཉིན་གྱི་ཞོགས་པ་ཆུ་ཚོད་ལྔ་བར་མི་ན་ལི་མགྲོན་ཁང་ནས་ལམ་ལ་བུད་ཅིང་། ཕྱི་དྲོ་ཆུ་ཚོད་བརྒྱད་དང་ཕྱེད་ཀར་ང་ཚོ་ལ་དྭགས་ཀྱི་རྒྱལ་ས་གླེ་རུ་འབྱོར། ཕྱི་ལོ་༡༩༤༤ཙམ་ནས། ཕྱི་ལོ་༡༨༣༤ལ་ཐུག་གི་བར་ལ་དྭགས་ཀྱི་རྒྱལ་སྲིད་ཁ་ཆེའི་རྒྱལ་པོའི་མངའ་འོག་ཏུ་ཚུད་ཅིང་། དེ་ནས་བཟུང་ལ་དྭགས་ཀྱི་གདོན་མའི་འཚོ་བ་དང་། དད་མོས། སྐད་ཡིག བཟའ་བཏུང་དང་། ཆས་གོས་སོགས་འཚོ་བའི་ཆ་ཤས་མང་པོ་ཞིག་གི་རང་དབང་ཤོར་མགོ་བརྩམས་ཡོད།

800.jpg
               འགྲུལ་ལམ།  སྒེའུ་ཁུང་ནས་མཐོང་བའི་དཔལ་མགོན་མཚོ།  ཁང་ཟླ་སྲས་ཀྱིས་པར་བླངས།                              

            ཆོས་ལ་དུག་ཏུ་ལྟ་བའི་དམར་པོའི་ལྟ་གྲུབ་དང་། རིག་གསར་གྱི་རླབས་རྒྱུན་འོག་ཕ་མེས་ཀྱི་ཤུལ་བཞག་ཕལ་ཆེར་གཏོར་བཤིགས་བཏང་ཟིན་པའི་བོད་ལ་མཚོན་ན། གནའ་བོའི་ཁྱད་ཆོས་མ་ཉམས་པའི་ཕྱིའི་བཟོ་བཀོད་དང་།བཅོས་མིན་གྱི་འཚོ་བར་ཕམ་ཉེས་ཆེན་པོ་བྱུང་ཡོད་པས།ད་ལྟའི་ཆར་ཡུལ་སྐོར་བ་དག་གིས་གདོད་མའི་བོད་ཀྱི་ངོ་བོ་འཚོལ་ཁག་པོ་གྱུར་ཡོད། འོན་ཀྱང་། ལ་དྭགས་ནི། བོད་ཀྱི་གདོན་མའི་འཚོ་བ་སྐྱེལ་ཚུལ་གྱི་དཔེ་མཚོན་གསོན་ཤོས་དེ་ཡིན་པས། ཕྱི་རྒྱལ་བའི་ཡུལ་སྐོར་བ་དག་གིས་དགའ་མོས་ཆེན་པོ་བྱེད་ཀྱི་ཡོད་ཅིང་། ལ་དྭགས་སུ་ལོ་རེར་ཕྱི་གླིང་གི་ཡུལ་སྐོར་བ་ཁྲི་ཕྲག་མང་པོ་ཡོང་གི་ཡོད།

༦.jpg
ལ་དྭགས་བྱང་ཐང་གི་ནོར་ནག    ཁང་ཟླ་སྲས་ཀྱིས་པར་བླངས།

           གལ་སྲིད་ཁྱོད་རང་ལ་དྭགས་སུ་འགྲོ་འདོད་ཡོད་ཚེ་ཕར་ཚུར་གང་རུང་གི་ལམ་ཀ་ངེས་པར་རླངས་འཁོར་བརྒྱུད་ནས་སོང་ན་ལེགས་ཏེ།ས་ལམ་དང་། རྡོ་ལམ། བྲག་ཕྲེང་། སྤང་ལམ།སྣུམ་ལམ། བྱེ་མའི་ལམ། ད་དུང་སྤྲུལ་ནག་འཁྱིལ་བ་ལྟ་བུའི་ངོ་མཚར་གྱི་ཕྲེང་ལམ་དེ་དག་དང་། ཁ་དོག་དང་རླབས་རྒྱུན་མི་གཅིག་པའི་གཙང་པོ། རིང་ཐུང་སྣ་ཚོགས་པའི་རྦབ་ཆུ། བཀོད་པ་སྣ་མང་གི་གངས་རི་དང་། བྲག་རི། ནགས་རི་སོགས་ངོ་མཚར་བའི་རང་བྱུང་ཁམས་ཀྱིས་ཡུལ་སྐོར་བ་དག་གི་བློ་མིག་དབང་མེད་དུ་འཕྲོག་ངེས་ཡིན། དེ་ལྟར་མི་ན་ལི་ནས་ལ་དྭགས་བར་དུ་སྤྱི་ལེ་༤༧༠ཙམ་ཡོད་ཅིང་། རླངས་འཁོར་ཅི་ཙམ་བཟང་རུང་ཆུ་ཚོད་བཅོ་ལྔ་ཙམ་འགོར་གྱི་ཡོད། ལྗང་མདོག་གི་ནགས་ཚལ་དང་། རྔམ་བརྗིད་ཀྱི་རི་ཚོགས། མཛེས་སྡུག་གི་རི་སུལ་དེ་དག་ལ་མིག་ཟུང་གཏད་ཀྱིན་མི་ན་ལིའི་རོ་ཐང་ལ་བརྒལ་རྗེས། སླར་ཡང་ཁྱོད་ཀྱི་མིག་སྔར་འཇིག་རྟེན་གསར་པ་ཞིག་མངོན་ཡོང་སྟེ། དེ་ནི་ཕ་མེས་ནས་བཟུང་ནང་བསྟན་ལ་དད་གུས་ཆེ་བའི་གར་ཤ་པ་དག་གི་ཕ་ཡུལ་ཡིན། གནས་དེ་ན་གར་ཞ་འཕགས་པ་དང་། དྲིལ་བུ་རི་སོགས་གནས་རྩ་ཆེན་མང་པོ་བཞུགས་ཡོད། གར་ཤ་ནི་སྤྱིའི་ཆ་ནས་ནང་པ་རང་ཡིན་ཞིང་། དེང་སྐབས་ཧིན་རྡུ་ཆོས་ལུགས་དད་མོས་བྱ་མཁན་ཡང་མང་བར་བཤད། དེ་ལྟར་ཡུན་རིང་སོང་མཐར་ཧི་མ་ཅལ་དང་། ཇ་མུ་ཀ་ཤི་མུར་གཉིས་ཀྱི་ས་མཚམས་ཏེ། ས་ཅུ་ཞེས་པ་དེར་འབྱོར། དུས་ཚོད་ཀྱི་ཆ་ནས་ཀྱང་ཉིན་ཡོལ་ཟིན་པས། ང་ཚོས་ས་དེར་གྲོས་ཇ་དལ་འཐུང་བྱས། དེ་ནས་རིམ་གྱིས་ལ་ཆུང་སོགས་ལ་དྭགས་ཀྱི་ས་ཁོངས་སུ་འབྱོར་བྱུང་།ཞོགས་པ་ཆུ་ཚོད་བརྒྱད་དང་ཕྱེད་ཐོག་ཞོགས་ཇ་བཏུང་ཚར་བ་དང་།ཞི་བའི་ཚལ་དུ་སོང་། དེར་ལ་དྭགས་དད་ལྡན་མང་ཚོགས་ཀྱིས་གཙོས་པའི་ཤར་ནུབ་ཀྱི་ཡུལ་སྐོར་བ་ཧ་ཅང་མང་།

ལ་དྭགས་ཀྱི་མིང་ཇི་ལྟར་ཐོག་ཚུལ།

༢༢༢༢.jpg
ཀླུ་འཁྱིལ་དགོན་གྱི་འདུ་ཁང་ནང་དུ།   ཁང་ཟླ་སྲས་ཀྱིས་པར་བླངས།

         བྱུང་རབས་ཁྲོད་ད་ལྟའི་བར་མིང་འབྲི་སྟངས་འགའ་སྤྱད་ཡོད་དེ། དང་པོ་དམར་ཡུལ་དང་། དེ་ཉིད་ཟུར་ཆགས་ནས་མར་ཡུལ། མང་ཡུལ། ཕྱིས་སུ་ལ་དྭགས་བཅས་བྲིས་ཡོད། དེ་ཡང་གངས་རི་ཀུ་ར་ཀུ་རམ་དང་། རི་བོ་ཧི་མ་ལ་ཡི་རི་བརྒྱུད་གཉིས་ཀྱི་བར་དུ་ཡོད་པའི་རི་རྣམས་མདོག་དམར་ཤས་ཆེ་བས་ན། དམར་ཡུལ་ཞེས་མིང་དུ་ཆགས་པར་བཤད། དེ་དག་ལས་ལ་དྭགས་ནི། ཕྱིས་ཀྱི་ཡི་གེ་ལས་བྱུང་བ་ཡིན་གྱི། སྔར་ནས་ཡོད་པ་མིན་ཞིང་། རི་བོ་དེ་དག་གི་མདུན་ནམ་ལར་གནས་ཤིང་ཆགས་པ་རྣམས་ལ་ལ་དྭགས་ཞེས་འབོད་པ་བྱུང་ཞེས་ཉེ་རབས་ཀྱི་ཞིབ་འཇུག་པ་དག་གིས་བཤད་ཡོད།

ལ་དྭགས་ཀྱི་གདོན་མིའི་མི་རིགས།

༡༠.jpg
 གླེ་མཁར་ནང་གི་དཔེ་རྙིང་།  ཁང་ཟླ་སྲ་ཀྱིས་པར་བླངས།

           ལོ་སྟོང་ཕྲག་མང་པོའི་སྔོན་དུ་ལ་དྭགས་ཀྱི་ཡུལ་གྲུ་ཧྲིལ་པོ་མཚོས་ཁེངས་ཤིང་། རིམ་གྱིས་མཚོ་བྲི་ནས་བྲག་རི་སོགས་སྐམ་ས་ཆེན་པོ་དག་བྱུང་ཞིང་། ད་ཡོད་ཀྱི་མཚོ་གྲགས་ཅན་དཔལ་མགོན་མཚོ་སོགས་ཀྱང་དེ་སྔོན་གྱི་མཚོ་བྲི་བའི་ལྷག་མ་ཡིན་པར་འདོད། དེ་ཡང་སྟོད་མངའ་རིས་སྐོར་གསུམ་གྱི་ནང་ཚན། མར་ཡུལ་ལམ། མང་ཡུལ་ལ་དྭགས་ནི། གངས་ཅན་བོད་ཀྱི་ཆོས་རྒྱལ་མེས་དཔོན་རྣམ་གསུམ་གྱི་གདུང་རྒྱུད་དྲི་མ་མེད་པ་སྟོད་མངའ་རིས་རྒྱལ་པོ། སྐྱིད་ལྡེ་ཉི་མ་མགོན་ལ་དྭགས་སུ་ཕེབས་ནས་ཤེལ་གྱི་བྲག་ལ་རྒྱལ་བ་རིགས་ལྔ་བརྐོས་ཏེ་ས་རྟགས་མཛད། ཁོང་གི་སྲས་ཆེ་བ་དཔལ་གྱི་མགོན་ལ་མར་ཡུལ་ལ་གནང་ཞིང་། དེ་ནི་ལ་དྭགས་ཀྱི་རྒྱལ་པོ་ཐོག་མ་དེ་ཡིན། རྒྱལ་ས་ཤེལ་ཏུ་བརྩིགས། བླ་མ་བསྟེན་ཅིང་དགེ་འདུན་གྱི་སྡེ་བཙུགས་ཏེ་གདུང་བརྒྱུད་རིམ་པར་བྱོན་པ་དག་གིས་མང་ཡུལ་ཧྲིལ་པོ་དབང་བསྒྱུར་བར་བཤད། ཉེ་རབས་ཀྱི་ལོ་རྒྱུས་སྨྲ་བ་འགས་ལ་དྭགས་སུ་མི་རིགས་གསུམ་བྱུང་བར་བཤད་དེ། དང་པོ་ནི་མོན་ཡུལ་ནས་བྱུང་ཞིང་། གཉིས་པ་ནི་སོག་པོ། གསུམ་པ་ནི་འབྲོག་པ་བཅས་ཡིན་ཟེར། དེ་དག་ལས་མོན་པ་དག་ནི་གར་ཤ་ནས་བྱུང་བར་བཤད་ཅིང་། འབྲོག་པ་ནི་ཨར་ཡན་ཏེ་འཕགས་རིགས་བྱ་བ་དེ་ཡིན་ཟེར། དེ་རྗེས་བོད་ནས་སོག་རིགས་རྣམས་བྱུང་སྟེ་སྔ་མ་དག་དང་གཡུལ་སྤྲད་དེ་དབང་བསྒྱུར་བྱས་ཤིང་། མོན་རྣམས་གཡོག་ཏུ་བཀོལ་ཏེ་ལས་ཕལ་བ་དག་བྱེད་བཅུགས་པས། དེང་སང་ཡང་ལ་དྭགས་པས་མོན་པ་རྣམས་རིགས་ངན་དུ་ལྟ་བ་ཡང་དེ་ནས་བྱུང་བ་ཡིན་ཟེར།

ལ་དྭགས་སུ་ནང་ཆོས་དར་ཚུལ།

༥.jpg
གླེ་རྒྱལ་མཁར།  ཁང་ཟླ་སྲས་ཀྱིས་པར་བླངས།

          ལོ་ཆེན་རིན་ཆེན་བཟང་པོས(༩༥༨/༡༠༥༥)ཁྲིག་སེ་ཉར་མ་དང་། ཏོག་གི་ཆོས་འཁོར། གླེའི་ཆོས་འཁོར་བཅས་ཕྱག་འདེབས་མཛད་ཅིང་། དུས་གཅིག་ལ་རབ་གནས་མཛད། བྱུང་རབས་ཀྱི་ངོས་ནས་བལྟས་ན་ལ་དྭགས་སུ་གསུང་རབ་འཆད་ཉན་དར་བའི་དགོན་པ་རྙིང་ཤོས་ནི། ལོ་ཆེན་གྱིས་ཕྱག་བཏབ་པའི་ཁྲིག་སེའི་ཉར་མ་ཡིན་པར་སྣང་། ཉེ་རབས་ཀྱི་ལོ་རྒྱུས་སྨྲ་བ་དག་གིས་བཤད་ན། ཕྱི་ལོའི་སྔོན་གྱི་༢༢༣ལ་ཆོས་རྒྱལ་མྱ་ངན་མེད་ཀྱིས་ནང་ཆོས་རྒྱ་གར་དུ་དར་སྤེལ་མཛད་ཅིང་། དེ་སྐབས་ཁ་ཆེའི་ཡུལ་བརྒྱུད་དེ་མར་ཡུལ་གྱི་སའི་ཆ་[དཀར་འཁྱིལ།]སུ་རུ་དཀར་རྩེར་ནང་པའི་གཙུག་ལག་ཁང་ཞིག་བཞེངས་པའི་བཤད་སྒྲོས་ཤིག་ཡོད་ཀྱང་། དེའི་ནང་དགེ་འདུན་གྱི་སྡེ་བྱུང་མིན་དང་། འཆད་ཉན་ཚུགས་མིན་གྱི་ཁུངས་ཞིབ་རྩད་མ་ཆོད་པས་ཤེས་ལྡན་དག་གིས་དཔྱད་པར་འཚལ། ད་ལྟའི་ཆར་ལ་དྭགས་སུ་བོད་ཀྱི་ཆོས་བརྒྱུད་ཆེན་པོ་བཞི་ཆ་དར་ཡོད་ཅིང་། དེའི་ཁྲོད་ཀྱི་བརྒྱ་ཆ་དྲུག་ཅུ་ཙམ་ནི་འབྲུག་པ་བཀའ་བརྒྱུད་པ་ཡིན། དེ་ནས་དགེ་ལྡན་པ་དང་། འབྲི་གུང་བཀའ་བརྒྱུད་གཉིས་གང་འཚམས་དང་། ས་རྙིང་གཉིས་ལ་ནི་དགོན་པ་གཅིག་རེ་མེད་པར་སྣང་།

         གླེ་ཞེས་པའི་དོན་ནི། སྐྱེད་ཚུལ་ཆུང་ངུའི་མིང་ཡིན་ཞིང་། ཧ་ཅང་སྐྱ་ཞད་ཆེ་བའི་ལ་དྭགས་ཀྱི་ས་བབ་སྤྱིའི་ཆ་ནས་བཤད་ན། ས་འདི་ནི་ལྡུམ་ར་ཞིག་དང་མཚུངས་པས་གླེ་ཞེས་བཏགས་པ་འདྲ།  གླེ་ནི་ལ་དྭགས་ཀྱི་ད་ལྟའི་རྫོང་ཆེ་ཤོས་དེ་ཡིན་ལ། འདིར་ལ་དྭགས་ཀྱི་དགོན་རྙིང་དང་། གནའ་མཁར། གྲོས་ཚོགས་ཁང་དང་། སློབ་ཆེན། དཔེ་མཛོད། འགྲེམ་སྟོན་ཁང་། ཟ་ཁང་། དངུལ་ཁང་། སྨན་ཁང་། གནམ་ཐང་། མགྲོན་ཁང་། ཉེན་རྟོག་ཁང་། ཁྲོམ་ར་སོགས་སྤྱི་ཚོགས་ཁྲོད་དགོས་ངེས་ཀྱི་གནའ་དེང་གི་སྡེ་ཚན་མང་པོ་ཞིག་ཕྱོགས་ཡོངས་ནས་འཕེལ་རྒྱས་སུ་འགྲོ་བཞིན་པའི་སྐབས་ཡིན།

          སྲིད་འཛིན་ས་ཁུལ་གྱི་ངོས་ནས་བཤད་ན། རྒྱ་གར་གཞུང་གིས་ལ་དྭགས་དེ་རྫོང་ཁག་གཉིས་སུ་ཆ་བགོས་བྱས་ཡོད་ཅིང་། རྫོང་ཁག་གཅིག་ནི། དཀར་འཁྱིལ་ཡིན་ཚུལ་བ་ཀུ་ལ་རིན་པོ་ཆེའི་རང་རྣམ་དུ་བྲིས་ཡོད། གླེ་རུ་གནའ་བོའི་ལོ་རྒྱུས་ལྡན་པའི་རྒྱལ་ཁང་དང་། དགོན་པ། མཆོད་རྟེན་སོགས་ལོ་རྒྱུས་ལྡན་པའི་རིག་དངོས་མང་ནའང་། གང་འཚམས་རེ་དུས་རབས་རིམ་པའི་དམག་འཁྲུག་དང་། ཆབ་འབངས་འཐབ་རྩོད་ཀྱི་བརྒྱུད་རིམ་ནང་འཐོར་ཞིག་ཏུ་སོང་ཡོད་ཀྱང་། ད་ལྟ་ཡང་དེ་དག་གི་རྗེས་ཤུལ་མང་པོ་ཉམས་གསོ་དང་། རྒྱུད་འཛིན་བྱས་དང་བྱེད་བཞིན་པ་ང་ཚོས་མཇལ་ཐུབ། ཁྱོད་རང་ལ་དྭགས་ཀྱི་ས་ཆ་གང་དུ་སོང་ཡང་། གདོང་པ་འཛུམ་དམུལ་གྱིས་ཁེངས་པའི་ལ་དྭགས་པ་ཚོས་ལག་གཡས་པའི་ཐལ་མོའི་གུས་ཞབས་དང་བཅས། ཇུ་ལེ་དང་། (ཁམས་བཟང་ཡིན་ནམ)ཞེས་དང་། གལ་སྲིད་ཁྱོད་རང་གྲྭ་བཙུན་ཡིན་ཚེ་ཕྱག་འཚལ་ཞེས་པའི་ཡུལ་སྲོལ་གྱི་འཚམས་འདྲི་རེ་བྱེད་པ་ནི། ཁོང་ཚོའི་ཡ་རབས་ཀྱི་གཤིས་ཀ་ཞིག་ཏུ་གྱུར་ཡོད་ཅིང་། ཤུགས་རྐྱེན་དེས་སྐབས་རེར་ཕྱི་གླིང་གི་ཡུལ་སྐོར་བ་ཚོས་ཀྱང་།  ཇུ་ལེ་ཞེས་ལ་དྭགས་པའི་འཚམས་འདྲིའི་ལད་ཟློས་བྱེད་ཀྱི་ཡོད།

                             གལ་ཆེའི་རྒྱུན་ཤེས་ཁག་ཅིག

                           སྦྲགས་ཨང་། 194 101

                             ས་ཁུལ་ཆེ་ཁག གླེ་དང་། དཀར་འཁྱིལ། ཟངས་དཀར། 

                             ས་ཁྱོན། སྤྱི་ལེ་གྲུ་བཞི་མ། 58,036 sq.kms

                             མི་འབོར། 2,20,000

                             སྐད་ཡིག ལ་དྭགས། བོད་སྐད། ཨུར་ཏུས། ཧིན་རྡུ། ཨིན་ཇི་བཅས།

                             ཆོས་ལུགས། ནང་པ། ཁ་ཆེ།

                             གངས་རི། ཀ་མ་ཀར་རམ།

                              མཚོ་དང་མཚེའུ། མཚོ་མོ་རི་རི། དཔལ་མགོན་མཚོ།

                             གཙང་པོ། སེངྒེ་ཁ་འབབ། རྟ་མཆོག་ཁ་འབབ།

                            མཁའ་འགྲུལ།  jet air ལྡི་ལི་ནས། གླེ་བར། ཉིན་རྒྱུན་གཉིས་རེ། Go airབཞི་རེ་དང་།airindiaགཟའ་འཁོར་རེར་གསུམ་རེ་བཅས་ཁྱོན་ཉིན་རེར་གནམ་གྲུ་བཅུ་གྲངས་ཡོད།

                             གལ་ཆེའི་འབྲེལ་གཏུགས་ཨང་གྲངས་ཁག

                             ཡུལ་སྐོར་སྣེ་ཤན་ལྟེ་གནས། 252097

                             གླ་བྱེད་རླངས་འཁོར། 252723

                             མངའ་སྡེའི་ལས་ཁུངས། 25210

                             སྨན་ཁང་། 252014

                             གནམ་ཐང་། 252723

                             རྒྱ་གར་མཁའ་འགྲུལ་ཁང་། 252076

                             ཇེ་ཏྲི་མཁའ་འགྲུལ་ཁང་། 250999

                             ཉེན་རྟོག་ཁང་། 252018

                             ཛ་དྲག་རླངས་འཁོར། 253629

                                    ཞི་བའི་ཚལ་དུ།

༢༢༢༢༢.jpg
ཏོག་མཁར།  ཁང་ཟླ་སྲས་ཀྱིས་པར་བླངས།

          དེ་རིང་སྟེ་དབྱར་ཟླ་༧པའི་ལ་དྭགས་ཀྱི་རྒྱལ་ས་གླེ་ནི། གནམ་གཤིས་དང་། འགྲིམ་ལམ་གང་ལ་མཚོན་ན་ཡང་། རྒྱལ་ཕྱི་ནང་གི་ཡུལ་སྐོར་བ་ཧ་ཅང་མང་པའི་སྐབས་ཡིན། ལ་དྭགས་ནི། དེང་གི་བོད་ཀྱི་ནུབ་རྒྱུད་དུ་གཏོགས་ཤིང་། བྱུང་རབས་ཀྱི་ངོས་ནས་བོད་ཀྱི་བཙན་པོ་རིམ་བྱོན་གྱིས་མངའ་འབངས་སྟོད་མངའ་རིས་སྐོར་གསུམ་གྱི་ནང་ཚན་ཡིན། གནས་འདིར་ད་ལྟ་ཡང་སངས་རྒྱས་ཀྱི་བསྟན་པ་ཧ་ཅང་དར་བར་མ་ཟད། སྤྱིའི་ཆ་ནས་ལ་དྭགས་བརྒྱ་ཆ་དགུ་བཅུ་ཙམ་ད་དུང་ཡང་ནང་ཆོས་ལ་དད་མོས་བྱེད་མཁན་ཡིན་པར་མ་ཟད།  གནས་འདིའི་ལོ་རྒྱུས་དང་། མིག་སྔའི་ཡ་རབས་ཚུལ་མཐུན་གྱི་གཤིས་ཀ་སོགས་ཁྱད་ཆོས་མང་པོ་ཞིག་གིས་ཡུལ་སྐོར་བ་ཚོས་Iittle tibet སྟེ་བོད་ཆུང་ཆུང་ཞེས་འབོད་ཀྱི་ཡོད།

༡༤.jpg
ཨ་ལྕེའི་ལྡེབས་རིས།  ཁང་ཟླ་སྲས་ཀྱིས་པར་བླངས།

          གླེ་ཡི་ལྷོ་ནུབ་མཚམས་ཀྱི་རི་རྩར་ཡོད་པའི་ཏོག་ཏུ་སོང་། ས་དེར་ལོ་རྒྱུས་རང་བཞིན་ལྡན་པའི་ཏོག་རྒྱལ་ཁང་དང་། ཉེ་ལམ་ལ་དྭགས་དམག་ཟུར་ཚོས་གསར་བཞེངས་བྱས་པའི་སྟོན་པའི་སྐུ་བརྙན་ཆེན་པོ་ཕི་ཏྲི་༧༠ཅན་ཡོད་ཅིང་། ཏོག་རྒྱལ་ཁང་ནི། ཡུལ་སྐོར་བ་འགྲོ་ས་གཙོ་བོ་ཡིན། རྒྱལ་ཁང་དེ་ནི། ཕྱི་ལོ་༡༨༢༥ལོར་རྒྱལ་པོ་ཚེ་དབང་དོན་གྲུབ་རྣམ་རྒྱལ་གྱིས་བཞེངས་ཤིང་། གླེ་ཡི་རྒྱལ་ས་གཉིས་པ་ཡིན། ལ་དྭགས་པའི་ཡུལ་སྐད་ལྟར་ན། འདི་ལ་སི་ཏོག་ཅེས་པའི་སྒྲ་གདངས་མངོན་པས། ཨིན་ཇི་བ་ཚོས་འགྲུལ་ཡིག་ཁག་ཏུ་ཡང་stokཅེས་བྲིས་ཡོད།རྒྱལ་ཁང་འདི་ནི་རྒྱབ་ངོས་ནས་ཐོག་བརྩེགས་གསུམ་དང་། མདུན་ངོས་ནས་ཐོག་བརྩེགས་བཞི་ཅན་དུ་བྱས་ཡོད། རྒྱབ་ངོས་ནས་སྒེའུ་ཁུང་ཆེ་ཆུང་ཁྱོན་སོ་དགུ་བཟོས་པ་དེས་རྒྱལ་ཁང་ལ་དམིགས་བསལ་གྱི་མཛེས་ཉམས་ཤིག་བསྣན་ཡོད། རྒྱལ་ཁང་འདིའི་ནང་དུ་དེ་སྔོན་རྒྱལ་པོའི་དབང་བསྒྱུར་སྐབས་ཀྱི་ཐང་ག་རྙིང་པ་དང་། སྐུ་རྟེན། དམག་ཆས། ཐབ་ཆས་སོགས་འགྲེམ་སྟོན་བྱས་ཡོད་ཅིང་། ཐོག་བརྩེགས་བཞི་བར་རྒྱལ་པོའི་མཆོད་ཁང་ཡོད། ཨིན་ཡིག་ནང་ཁ་ཡིག་ལ་KingsGrownཞེས་དུས་རབས་བདུན་པར་བྱོན་པའི་བོད་རྗེ་བཙན་པོ་སྲོང་བཙན་གྱི་དབུ་ཞྭ་ཡིན་སྐད་དུ་བྲིས་པ་ཞིག་ཀྱང་རྒྱལ་ཁང་འདིར་བཞུགས་ཡོད་ཅིང་། ཡོངས་གྲགས་ཏོག་བཀའ་འགྱུར་ཟེར་བ་དེ་ཡང་ཏོག་གི་རྒྱལ་པོ་ཞིག་གི་སྐུ་དུས་སུ་འབྲུག་ནས་གདན་པར་བཤད།འོན་ཀྱང་། ད་ལྟའི་ཆར་རྒྱལ་ཁང་འདིའི་ནང་ཏོག་བཀའ་འགྱུར་བཞུགས་ཡོད་པའི་གནས་ཚུལ་མ་མཇལ།

       དེ་རིང་ཡང་། གནམ་སྔོ་ཞིང་། མཁའ་རླུང་གཙང་བར་མ་ཟད། ཞོགས་པ་ནས་མགྲོན་ཁང་གི་འགྲུལ་བ་གཞན་དག་མིང་གྲགས་ཅན་གྱི་དཔལ་མགོན་མཚོར་གནས་སྐོར་སླད་ལམ་ལ་ཆས་བཞིན་འདུག ང་ཚོས་ཀྱང་ཆུ་ཚོད་བརྒྱད་པར་མགྲོན་ཁང་དུ་ཟ་མ་མངགས་ཏེ་སྣ་མང་མེ་ཏོག་གིས་བསྐོར་བའི་ལྡུམ་ར་ཆུང་ཆུང་དེ་ནས་ཞོགས་ཟས་ལ་རོལ་ཞིང་། དེ་རྗེས་གྲོགས་པོའི་རླངས་འཁོར་དུ་བསྡད་དེ་གླེ་རུ་ཡོད་པའི་རྒྱལ་ཁང་དང་། རྣམ་རྒྱལ་རྩེ་མོ་གཉིས་ལ་ལྟ་སྐོར་དུ་སོང་།

༢.jpg
ཉར་མའི་ལྡེབས་རིས། ཁང་ཟླ་སྲས་ཀྱིས་པར་བླངས།

    གླེ་ཆེན་དཔལ་མཁར།

          འདི་ནི་རྒྱལ་པོ་སེངྒེ་རྣམ་རྒྱལ་གྱིས་དུས་རབས་བཅུ་བདུན་པའི་ནང་བཞེངས། རྒྱལ་ཁང་འདི་ཐོག་བརྩེགས་དགུ་ལས་གྲུབ་ཡོད། དེང་སང་རྒྱལ་ཁང་ནང་གནའ་བོའི་རིག་གནས་བཤུལ་བཞག་མང་པོ་མེད་ནའང་། རྒྱལ་བོའི་ལྷ་ཁང་གི་རྟེན་གཙོ་ཐུབ་སྐུ་དང་། གདུགས་དཀར་ཅན་མའི་སྐུ་ཐོག་བརྩེགས་ཅན། གུ་རུ་པདྨ་སཾ་བྷ་ཝ་བཅས་ཀྱི་སྐུ་རྟེན་བཞུགས་ཤིང་། ལྷ་ཁང་གི་གཡས་ཕྱོགས་སུ་བཀའ་འགྱུར་སྡེ་དགེ་པར་རྙིང་མ་མང་པོ་དཔེ་སྒྲོམ་ནང་བཤམས་ཡོད། གཞན་ཡང་གསོལ་ཐབ།མཛོད་ཁང་སོགས་ཡོད། དེ་མིན་རྒྱལ་ཁང་གི་ཐོག་བརྩེགས་ཕལ་མོ་ཆེར་རྒྱ་གར་གྱི་གནས་རྩ་ཆེན་དག་གི་པར་རིས་དང་། ལ་དྭགས་ཀྱི་གནའ་བོའི་སྤྱི་ཚོགས་མཚོན་པའི་པར་རིས་གསར་རྙིང་འདྲ་མིན་འགྲེམ་སྟོན་བྱས་པ་ལས། ཧ་ཅང་གལ་ཆེ་བའི་རིག་དངོས་རྙིང་པ་དག་མཇལ་རྒྱུ་མེད་ལ། རྒྱལ་ཁང་གི་ཕྱི་ནང་པོ་ཞིག་ནི་ཉེ་རབས་ཡུལ་སྐོར་བ་དག་གི་ཆེད་རྒྱ་གར་གྱི་རིག་དངོས་དང་། གནའ་ཤུལ་རྙིང་པ་སྲུང་སྐྱོབས་ཚན་པས་བསྐྱར་གསོ་བྱས་པར་སྣང་།  འོག་ཏུ་ཆིབས་ར་དང་། ཆུ་ལེན་སའི་གསང་ལམ་བཅས་ཡོད།

བཟོ་བཀོད་དང་། རྒྱུ་ཆ།

         གླེ་རྒྱལ་ཁང་ནི། ཕལ་མོ་ཆེ་རྡོ་རྩིག་དང་།  ཤིང་ལས་གྲུབ་ཅིང་།  རྒྱལ་ཁང་གི་སྤེན་རྒྱན་དང་། གསེར་ཟམ། ལྕམ་ཤིང་། ཁ་མགོ སྒེའུ་ཁུང་། ཤམ་བུ། ཁྱམས་ར་བཟོ་སྟངས་སོགས་ནི་བོད་རང་གི་ལུགས་སུ་ཡོད་ཅིང་། དེ་བས་ཀྱང་ཕལ་མོ་ཆེ་ནི་བོད་ཀྱི་གནའ་བོའི་གཙུག་ཁང་གི་བཟོ་དབྱིབས་སུ་སྣང་། རྒྱུ་ཆ་གཙོ་བོ་རྡོ་དང་། ཤིང་གཉིས་ལས་གྲུབ་ཡོད་ཅིང་། ལ་དྭགས་ཀྱི་གཙུག་ལག་ཁང་དང་། མཁར་མང་ཆེ་བའི་རྒྱུ་ཆ་ཡང་དེ་ག་རང་ཡིན།

 རྣམ་རྒྱལ་རྩེ་མོ།

         གླེ་རྒྱལ་ཁང་གི་ཐད་ཀའི་རི་རྩེར་ཆགས་ཡོད་ཅིང་།  ཕྱི་ལོ་༡༤༣༠ཙམ་ལ་བཞེངས་པར་བཤད། འདི་ནི་བཟོ་དབྱིབས་ཀྱི་ཆ་ནས་བོད་ཀྱི་བཙན་པོའི་སྐུ་མཁར་ཐོག་མ་ཡུམ་བུ་བླ་སྒང་དང་འདྲ་བོ་ཡོད། དུས་རབས་རིམ་བྱོན་ནང་ཉམས་ཆག་མང་དུ་སོང་ཞིང་། ད་ལྟའི་ཆར་འདིའི་རྩེ་ལྷ་ཁང་ནང་དུ་རྟེན་གཙོ་བོ་རྒྱུ་ས་ལས་གྲུབ་པའི་ཐུགས་རྗེ་ཆེན་པོའི་སྐུ་ཐོག་བརྩེགས་གཅིག་ཙམ་དང་། རྣམ་རྒྱལ་མའི་སྐུ་ཆུང་ངུ་སོགས་བཞུགས། སྔ་དགོང་གང་རུང་ལ་རི་རྩེར་སོང་ན། གནམ་གཤིས་ཀྱི་དྲོད་ཚད་འཇམ་ཞིང་། དེ་མིན་ཉིན་གུང་ཚ་དྲོད་ཀྱིས་ཅུང་དཀའ་ཙམ་ཡོད། ལྷ་ཁང་རྩེ་ནས་བལྟས་ན། གླེའི་གྲོང་ཁྱེར་ཙམ་མ་ཟད། ཕྱོགས་བཞིའི་ཁོར་ཡུག་ཕལ་ཆེར་ལག་མཐིལ་ཏུ་བཞག་པ་ལྟ་བུར་ཡོད་པས། ཕྱི་རྒྱལ་གྱི་ཡུལ་སྐོར་བ་ཚོ་གླེ་གྲོང་ཁྱེར་ནས་རི་ངོས་ཀྱི་རྐང་ལམ་ཕྲ་མོ་བརྒྱུད་དེ་རྩེ་མོའི་མཐོང་རྒྱ་ལོངས་སྤྱོད་པར་ཡོང་གི་ཡོད།

ཤེལ་དཀར་ཕོ་བྲང་།

༢༠.jpg
 ཁྲིག་སེ་དགོན་པ། ཡར་ཆབ་ཕོ་ཉས་པར་བླངས།

         འདི་ནི་གླེ་ནས་སྤྱི་ལེ་༡༦སར་ཡོད་ཅིང་།ཕྱི་ལོའི་དུས་རབས་༡༧པར་བཞེངས། འདིའི་ནང་རྒྱུ་གསེར་ཟངས་ལས་གྲུབ་པའི་རྟེན་གཙོ་བོ་སྟོན་པའི་སྐུ་འདྲ་ཐེག་བརྩེགས་གསུམ་ཅན་བཞུགས་ཤིང་། དེ་ནི་རྒྱལ་པོ་སེངྒེ་རྣམ་རྒྱལ་གྱི་སྐལ་ལྡན་དུ་བཞེངས་པར་བཤད། གཙུག་ལག་ཁང་གི་གཡོན་ཕྱོགས་ཀྱི་མཁར་ཤུལ་རྙིང་པ་དེ་ནི། ལྷ་ཆེན་དཔལ་མགོན་གྱིས་བཞེངས་པའི་མཁར་ཤུལ་ཡིན་ཟེར། ཅི་ཙམ་རྙིང་མིན་མ་ཤེས་ཀྱང་ཐུབ་དབང་ལྷ་ཁང་གི་ཟུར་ན་མཆོད་རྟེན་ཆེན་མོ་ཞིག་བཞེངས་ཡོད། ཕོ་བྲང་གི་མདུན་སར་མཚེའུ་ཧ་ཅང་གཙང་མ་ཞིག་ཡོད་ཅིང་།གཙུག་ལག་ཁང་འདིའི་གཡས་གཡོན་གྱི་རྗེས་ཤུལ་ལ་བལྟས་ན་དེ་སྔོན་ཧ་ཅང་དར་རྒྱས་བྱུང་སྣང་ཡང་། ད་ལྟ་ནི་ཉམས་ཆགས་ཀྱི་རྗེས་ཤུལ་འགའ་རེ་ཞིག་གསོ་བྱས་པ་ཙམ་ལས་ཆེར་མེད།མཚེའུ་དང་ཉེ་བའི་ལམ་འགྲམ་གྱི་བྲག་ངོས་སུ་རྒྱལ་བ་རིགས་ལྔ་ཡོད་རྡོ་བརྐོས་བྱས་པ་ནི། སྐྱིད་སྡེ་ཉི་མ་དགོན་གྱིས་ས་རྟགས་སུ་བཞེངས་པར་བཤད། འདི་ནས་ཅུང་ཙམ་ཡར་སོང་ན། བལ་ཡུལ་མཆོད་རྟེན་བྱ་རུང་ཁ་ཤོར་དང་ཧ་ཅང་འདྲ་བའི་མཆོད་རྟེན་ཉིས་ཐོག་ཙམ་ཞིག་ཡོད་ཅིང་། དེ་ནི་སྔོན་བལ་བོའི་བཟོ་བ་དག་གིས་དྲན་རྟེན་ཆེད་བཞེངས་པར་བཤད།

         འདི་ནི་གླེ་ནས་སྤྱི་ལེ་༡༩སར་ཡོད་ཅིང་། ཆོས་བརྒྱུད་དགེ་ལྡན་པ་ཡིན། དགོན་པའི་མཚན་ཆ་ཚང་ལ་ཚུལ་ཁྲིམ་རྣམ་དག་གླིང་ཞེས་འབོད། འདི་ནི་རྗེའི་དངོས་སློབ་ཤེས་རབ་བཟང་པོས་ཕྱི་ལོའི་དུས་རབས་༡༦པའི་ནང་ཕྱག་འདེབས་མཛད། དགོན་པའི་གཙུག་ལག་ཁང་གི་ནང་རྟེན་གཙོ་བོ་བྱམས་ཆེན་དང་། སྒྲོལ་མ་ལྷ་ཁང་སོགས་བཞུགས།དགོན་པ་འདིའི་བྱམས་སྐུ་ནི་ཕྱི་ལོ་༡༩༨༠ལོར་གསར་བཞེངས་བྱས་ཤིང་། བལྟ་བའི་ཆོག་མི་ཤེས་པའི་བྱམས་སྐུ་འདིའི་མཚན་དཔེར་ཁོང་གིས་བསྔགས་བརྗོད་གནང་ཡོད། སེངྒེ་གཙང་པོའི་གཡས་ཕྱོགས་སུ་ཆགས་ཡོད་ཅིང་། རྒྱང་ནས་བལྟས་ན་ཕོ་བྲང་པོ་ཏ་ལའི་རྣམ་པ་ལྟ་བུར་མཛེས་ཉམས་དང་གཟི་བརྗིད་ཀྱིས་ཁེངས་ནས་ཡོད། དགོན་འདིའི་ཆོས་ཕྱོགས་ཀྱི་དུས་ཆེན་ཆེ་ཤོས་ནི། ཁྲིག་སེ་དགུ་གཏོར་ཡིན་པར་བཤད།

     གུར་མགོན་ཁང་།

༧༧.jpg

      གླེ་རྒྱལ་མཁར་གྱི་གཤམ་འོག་དེར་མགོན་ཁང་ཞིག་ཡོད་ཅིང་། དེ་ནི་ལ་དྭགས་ས་སྐྱ་དགོན་པའི་འཛིན་སྐྱོང་འོག་ཡོད། གུར་གྱི་མགོན་ཁང་འདིར་ནང་པ་ཙམ་མིན་པར་ལ་དྭགས་ཁ་ཆེ་བ་ཚོས་ཀྱང་དད་མོས་ཆེན་པོ་བྱེད་ཅིང་། སྐབས་མང་པོར་གསེམ་སྐྱེམས་འབུལ་སྲོལ་ཡོད།

          ལྷག་པར་དུ་ལ་དྭགས་ཀྱི་གཞོན་རབས་པ་ཚོས་དབུ་ཚད་སོགས་ནང་བསྟན་གྱི་གཞུང་ལུགས་ཤེས་དགོས་ཤིང་། དེ་ཤེས་ན་མཆོད་རྟེན་དང་། དགོན་པ་སོགས་མང་པོ་མེད་རུང་། སངས་རྒྱས་ཀྱི་བསྟན་པ་གནས་ངེས་ཡིན་པས། ཁོང་སྐུ་སྒེར་གྱི་ངོས་ནས་སྐུ་རྟེན་ཆེན་པོ་བཞེངས་རྒྱུར་རྒྱབ་སྐྱོར་གནང་གི་མེད་ཅིང་། དེའི་རྒྱུ་མཚན་ཡང་། དེ་འདྲ་ནི་ནམ་ཡང་སྐུ་འདྲ་རང་ཡིན་པས། དེས་གསུང་མི་འབྱོན།དེས་ན། ང་ཚོས་ངེས་པར་དུ་སངས་རྒྱས་ཀྱི་གསུང་ལ་གཅེས་སྤྲས་དང་། སློབ་གཉེར་བྱ་རྒྱུ་གལ་ཆེན་ཡིན་གསུངས། རང་ཉིད་ནང་པ་ཡིན་མིན་ཇི་ལྟར་ཡང་།ཆོས་འཇིག་རྟེན་གང་ཡིན་རུང་རྒྱུ་མཚན་ལྡན་པའི་སྒོ་ནས་དཔྱད་པ་གཏོང་པའི་རྒྱ་གར་ནཱལེནྡྲའི་མཁས་པ་ཚོའི་ཕྱག་སྲོལ་དེ། ངེས་པར་རྒྱུད་འཛིན་བྱ་དགོས་པའི་སློབ་དཔོན་མཆོག་གིས་ལམ་སྟོན་ཟབ་མོ་སྩལ།

        དེ་བཞིན་དུ་བདག་མེད་ཁས་ལེན་མིན་དང་། འཇིག་རྟེན་བྱེད་པ་པོ་ཁས་ལེན་པའི་ཆོས་ལུགས་གང་ཡིན་རུང་། རྩ་བ་རང་གི་ཁམས་དང་མོས་པར་རགས་ལས་ཤིང་། འཛམ་གླིང་གི་ཆོས་ལུགས་གང་ཡིན་རུང་དེ་དག་གིས་མི་སྟོང་ཕྲག་མང་པོའི་སེམས་ཁམས་གསོ་ཐུབ་པས།དེ་དག་ལ་ངེས་པར་གུས་བཀུར་དགོས་པ་ཡིན་གསུངས། ཁྱད་པར་དུ་མགོན་པོ་གང་ཉིད་ཀྱིས་དེ་སྔོན་རྒྱའི་དཔོན་རིགས་འགས་བོད་ལ་ཚན་རྩལ་དར་བར་བྱས་ན། ཆོས་དད་ག་ལེར་བརླགས་འགྲོ་གི་རེད་ཅེས་བཤད་ནའང་།དུས་རབས་ཕྱེད་ཙམ་འགོར་བའི་ད་ལྟའི་ཆར་སྐད་ཆ་དེ་ནི་རྦད་དེ་ལྡོག་ནས་ཡོད་པས། ང་ཚོས་ཅི་ཙམ་གྱིས་ནང་པའི་དབུ་ཚད་ཀྱི་གཞུང་ལ་སློབ་གཉེར་བྱེད་ཐུབ་ན། དེ་ཙམ་གྱིས་ནང་ཆོས་ཀྱི་རིན་ཐང་མཇལ་ཐུབ་ཅིང་།སྐུ་སྒེར་གྱིས་མི་ལོ་སུམ་ཅུ་ལྷག་ཙམ་གྱི་རིང་ཚན་རིག་པ་དང་མཉམ་དུ་ལྷག་བསམ་རྣམ་དག་གིས་བགྲོ་གླེང་བྱས་པའི་འབྲས་བུར། ནང་ཆོས་ནས་གསུངས་པའི་ནང་སེམས་ཀྱི་རྣམ་གཞག་གིས་ཚན་རིག་པ་ཤེས་རབ་ཅན་ཚོ་ཡང་ཡིད་འཕྲོག་བཞིན་ཡོད་ཅིང་།ནང་པའི་གཞུང་ནས་བྱུང་བའི་ལྟ་ཚུལ་མང་པོས་འཇིག་རྟེན་སྤྱི་ལ་སྨན་པས། ད་ལོ་ནས་བཟུང་ཆོས་དང་མ་འབྲེལ་བའི་དགེ་རྒན་གྱི་ཟབ་སྦྱོང་ཞིག་ཀྱང་གོ་སྒྲིག་བྱ་འཆར་ཡོད་ཅིང་། དེར་ཡེ་ཤུ་དང་། ཁ་ཆེ། ཧིན་རྡུ་བཅས་ཆོས་ལུགས་མང་པོ་ཡོད་སྐོར་བཅས་བཀའ་སྩལ།

༢༥.jpg
མང་སྤྲོ་རྒྱལ་ཁང་།  ཁང་ཟླ་སྲས་ཀྱིས་པར་བླངས།

          རྒྱ་གར་གྱི་ནང་ཆོས་དེ་འཛམ་གླིང་གི་རྒྱལ་ཁབ་དང་། སྐད་ཡིག་མང་པོའི་ནང་དར་ཡོད་ཀྱང་། ནཱལེནྡྲ་ཐོར་ཞིག་ཏུ་སོང་བའི་རྗེས་སུ་སྟོན་པའི་གསུང་རབ་བཀའ་འགྱུར་གྱི་དགོངས་དོན་ལ། གཏིང་ཟབ་མོའི་སྒོ་ནས་སློབ་གཉེར་རྒྱ་ཆེན་པོ་བྱེད་པའི་སྲོལ་དེ་བོད་གཅིག་པུ་མ་གཏོགས་མེད། རྒྱ་ནག་དང་། ཉི་ཧོང་ལྟ་བུར་ཆ་མཚོན་ན། གསང་སྔགས་ཀྱི་ཚིག་མང་པོ་ཞིག་འདོན་གྱི་ཡོད་ནའང་།དེའི་དོན་དག་ཇི་བཞིན་དུ་ཤེས་རྟོགས་ཆེད་གཞུང་ཆེན་སློབ་གཉེར་བྱེད་པའི་ལམ་སྲོལ་བྱུང་མེད། ཡེ་ཤུའི་གྲྭ་བཙུན་ཚོས་རང་ཉིད་བློས་བཏང་སྟེ་མི་སེར་ཉམ་ཐག་ཚོར་སྲི་ཞུ་སྒྲུབ་སྟངས་དེ་ནི། མིག་དཔེར་འོས་པའི་གཞན་ཕན་གྱི་བྱ་བ་ཞིག་ཡིན་ཞིང་།ང་ཚོ་བོད་ཀྱི་གྲྭ་བཙུན་ཚོས་ནི་ཇ་ཞིམ་པོ་བཏུང་ནས་སྡོད་པ་ལས་བྱ་བ་དེ་ལག་བསྟར་ཐུབ་མེད་པས། ནང་པའི་གྲྭ་བཙུན་ཚོས་སྤྱི་ཚོགས་ལ་སྲི་ཞུ་སྒྲུབ་རྒྱུ་དེ་ལ་དྭགས་ནས་མགོ་བཙུགས་ན་ལེགས་ཚུལ་སྐུ་རྩེད་དང་སྦྲགས་ནས་གསུངས། མཐའ་དོན་ཕྱིའི་ལྷ་ཁང་འཛུགས་སྐྲུན་བྱེད་པ་ལས་ཀྱང་ནང་གི་ཐོས་བསམ་སློབ་གཉེར་གལ་ཆེ་བས་མཚན་ཉིད་སློབ་གྲྭའི་སློབ་ཕྲུག་ཚོས་ངེས་པར་སློབ་གཉེར་ལ་འབད་དགོས་ཞེས་བཀའ་སྩལ་ཏོ།།

༢༤.jpg
ཁྲིག་སེ་དགོན་གྱི་ཟུར་ཞིག།  ཁང་ཟླ་སྲས་ཀྱིས་པར་བླངས།

         དགོན་པ་འདི་ནི། གླེ་ནས་སྤྱི་ལེ་༢༦གི་སར་ཡོད་ཅིང་། དུས་རབས་བཅོ་ལྔ་པའི་ནང་ས་སྐྱའི་བླ་བསྐོས་དྲུང་པ་རྡོ་རྗེ་དཔལ་བཟང་གནས་འདིར་ཕེབས་ཏེ། སྒོ་མོ་ཆེ་བྲག་ཕུག་ཏུ་བསྙེན་མཚམས་ལ་བཞུགས་ཤིང་། དེ་རྗེས་མང་སྤྲོ་དགོན་ཕྱག་བཏབ། འདི་ནི་ལ་དྭགས་ཀྱི་ས་སྐྱའི་དགོན་པ་གཅིག་པུ་དེ་ཡིན། མཚན་ཆ་ཚང་ལ་མང་སྤྲོ་དགོན་ཐུབ་བསྟན་ཤ་འཁོར་གླིང་ཞེས་འབོད། ས་སྐྱ་ངོར་ལུགས་སུ་གཏོགས་ཤིང་། གཙོ་བོ་ངོར་གྱི་མཁན་ཞབས་རྣམ་པའི་གཟིགས་རྟོགས་འོག་ཡོད། དགོན་འདིར་གཙུག་ལག་ཁང་གསར་རྙིང་གཉིས་དང་། ཀུན་རིག་ལྷ་ཁང་དང་། མགོན་ཁང་། བཀའ་འགྱུར་ལྷ་ཁང་། དཔེ་མཛོད་ཁང་། འགྲེམ་སྟོན་ཁང་སོགས་ཡོད་ཅིང་། འགྲེམ་སྟོན་ཁང་གསར་པ་ཞིག་གཙུག་ལག་ཁང་རྒྱབ་ངོས་སུ་གསར་བཞེངས་བྱེད་ཀྱི་ཡོད།རོང་བཙན་གྱི་སྐུ་རྟེན་དང་། མང་སྤྲོའི་གུར་ལྷ་བརྒྱད་ཀྱི་འཆམ་དེར་ལ་དྭགས་སུ་མང་སྤྲོའི་ནག་རིང་ཞེས་གྲགས་ཧ་ཅང་ཆེ་ཞིང་། ཉིན་དེར་རོང་བཙན་དཀར་ནག་གཉིས་ཀྱང་ཕེབས་སྲོལ་ཡོད།

          འདི་ནི་ཕྱི་ལོ་༡༨༤༢ཙམ་ལ་བཞེངས། མཁར་ཏོག་རྒྱལ་པོའི་སྲས་བསྟན་སྲུང་གཡུལ་རྒྱལ་གྱི་ཆེད་སྐྲུན་པར་བཤད། མཁར་འདི་ཐོག་བརྩེགས་གསུམ་ཅན་ཡིན་ཞིང་།  དེ་སྔོན་གྱི་ཞིག་རོ་ད་ལྟ་བསྐྱར་གསོ་བྱས་པ་ཙམ་ལས་ནང་དུ་རིགས་དངོས་རྙིང་པ་འགྲེམ་སྟོན་གྱི་རིགས་ཅི་ཡང་མེད། འོན་ཀྱང་། འདིའི་ནང་དུ་དགའ་ལྡན་ཁྲི་ཐོག་༡༠༢པ་རི་རྫོང་རིན་པོ་ཆེ་སྐུ་བལྟམས་ཤིང་། གནས་ཡིག་འགར་ཉིད་ཀྱི་སྐུ་ཞང་ལ་དྭགས་པར་ཆོས་སྲིད་གཉིས་ཐད་ནས་བཀའ་དྲིན་ཅན་གྱི་བླ་མ་སྐུ་ཞབས་བ་ཀུ་ལ་རིན་པོ་ཆེ་ཡང་མང་སྤྲོའི་མཁར་འདིར་འཁྲུངས་པར་བཤད།དེ་ལྟ་ན་མཁར་འདི་ནི་ཉེ་རབས་ཀྱི་དབང་དུ་བྱས་རུང་ལོ་རྒྱུས་མི་སྣ་འགངས་ཆེན་གྱི་ཕ་གཞིས་སུ་གྱུར་ཡོད།

0

One Response to མང་ཡུལ་ལ་དྭགས་སུ་བསྐྱོད་པའི་ཟིན་ཐོ།(སྔ་དུམ)

  1. རྩེ་རི་ཚེ་དབང་རྒྱལ་པོ། ལགས་ཀྱིས:

    ཨ་འདུས་སྐལ་བཟང་རྒྱ་མཚོས་བྲིས་པ་ཡག་སོང་།
    ལ་དྭགས་ཞེས་པ་འདི་ནི་ཡུལ་ཞིག་གི་མིང་སྟེ། བོད་ཀྱི་ནུབ་ཕྱོགས་ཀྱི་མཐའ་ཁུལ་ཏེ། སྟོད་མངའ་རིས་སྐོར་གསུམ་གྱི་ཡ་གྱལ་ལ་དྭགས་གངས་ཀྱིས་བསྐོར་ཞེས་པའི་ཡུལ་དེ་ཡིན། དེང་དུས་རྒྱ་གར་གྱི་མངའ་ཁོངས་དང་། ཆ་ཤས་ཙམ་པ་ཀི་སི་ཐན་གྱི་ཁོངས་སུ་ཚུད་ཡོད།
    བོད་ཀྱི་ལོ་རྒྱུས་ཀྱི་སྨྲ་བ་རྣམས་ཀྱིས་སྤྱི་ཁྱབ་སྒོ་ནས་འདི་ལྟར་བཤད་བཞིན་ཡོད་དེ། དེ་ཡང་དཔལ་འཁོར་བཙན་གྱི་སྲས་སྐྱིད་ལྡེ་ཉི་མ་མགོན་ཞང་ཞུང་ཁུལ་དུ་བྲོས་བྱོལ་དུ་བྱོན་ཏེ་མངའ་རིས་སུ་དབང་བསྒྱུར། ཕྱིས་སུ་སྔར་ཡབ་མེས་དག་སྲིད་ལ་མ་འཆམསཔའི་ངན་འབྲས་བསླབ་བྱར་བཟུང་སྟེ། མངའ་རིས་སྐོར་གསུམ་དུ་ཕྱེ་སྟེ་བུ་གསུམ་པོར་བགོས་པ་ལས། སྟོད་ཀྱི་མགོན་གསུམ་དུ་གྲགས་པ་བྱུང་། དེའང་སྲས་བགྲེས་པ་དཔལ་གྱི་མགོན་གྱིས་མང་ཡུལ་བཟུང་ནས་ལ་དྭགས་རྒྱལ་པོར་གྱུར། དཔལ་གྱི་མགོན་ནས་བློ་གྲོས་མཆོག་ལྡན་བར་ལྷ་ཆེན་རྒྱལ་རབས་དང་། ལྷ་ཆེན་བྷ་གན་ནས་ཀུན་དགའ་རྣམ་རྒྱལ་བར་རྣམ་རྒྱལ་རྒྱལ་རབས་ཞེས་ཁག་གཉིས་སུ་ཕྱེ། རྣམ་རྒྱལ་རྒྱལ་རབས་འཐོར་ཞིག་ཏུ་སོང་རྗེས་རྒྱལ་རྒྱུད་དབང་ཐང་ཉམས་དམས་སུ་སོང་། ད་ལྟའི་རྒྱལ་པོ་ནོར་བུ་ཡིན། སྤྱི་ལོ1979ལོར་སྲིད་འཛིན་མངའ་སྡེ་གཉིས་སུ་ཕྱེ། སྤྱི་ལོ1993ལོར་ལ་དྭགས་རང་སྐྱོང་ཨུ་ཡོན་ལྷན་ཁང་དུ་བསྒྱུར་བའོ།། འདི་ཡི་བསྐོར་ནས་རགས་ཙམ་དཔྱད་ན། སྤྱིར་བཏང་དུ་མངའ་བདག་དཔལ་འཁོར་བཙན་གྱི་སྲས་ཁྲི་བཀྲ་ཤིས་བརྩེགས་པ་དཔལ་དང་སྐྱིད་ལྡེ་ཉི་མ་མགོན་གཉིས་འཁྲུངས་པའི་དུས་ཚོད་ནམ་ཡིན་པ་ཞིབ་ཆ་འཁོད་པའི་ཡིག་ལམ་མ་རྙེད་རུང་རབ་ཀྱི་འཁྲུངས་འདས་ཀྱི་ལོ་ཚིགས་ལ་གཞིགས་ན་སྤྱི་ལོའི་དུས་རབས་བཅུ་བའི་ལོ་རབས་བཅུ་པ་ནས་ཉི་ཤིའི་བར་ཡིན་པར་བཤད་ལ། མངའ་བདག་དཔལ་འཁོར་བཙན་སྟག་རྩེ་སྙགས་ཀྱིས་བཀྲོངས་རྗེས་སྲས་གཉིས་རྒྱལ་སྲིད་ལ་དབང་བསྐུར་བའི་ཐད། ལོ་རྒྱུས་ཡིག་ཚང་མང་པོའི་བཞེད་ཚུལ་མི་མཐུན་ཏེ། 《ལྡེའུ་ཆོས་འབྱུང》ལས། གླང་ལོ་ལ་ཁེང་ལོག་བྱུང་། མཐའི་རྒྱ་དྲུག་རྒོད་དུ་ཤོར། ལྷ་སྲས(དཔལ་འཁོར་བཙན)ཉིད་ཀྱང་སྟག་རྩེ་སྙགས་ཀྱིས་བཀྲོངས། ལྷ་སྲས་མཆེད་གཉིས་གཙང་དུ་བྲོས། ཞེས་པ་དང་། བུ་སྟོན་དང་ངོར་བ་དཀོན་མཆོག་ལྷུན་གྲུབ་བཞེད་པ་མཐུན་པར་བཀྲ་ཤིས་བརྩེགས་པས་རྒྱལ་སྲིད་བཟུང་ཞེས་དང་། ས་ཆེན་རྒྱལ་རབས་ནང་བཀྲ་ཤིས་བརྩེགས་པས་ཡབ་གཤེགས་རྗེས་རྒྱལ་སྲིད་བཟུང་བར་བཞེད་མི་མཐུན་པ་མེད་མོད། ནམ་བཟུང་བའི་དུས་ཚོད་ཐད《ལྡེའུ་ཆོས་འབྱུང》དུ་ཡབ་བཀྲོངས་རྗེས་སྲས་གཉིས་གཙང་དུ་བྲོས་པར་བཞེད་ཀྱང་། སྐྱིད་ལྡེ་ཉི་མ་མགོན་སྐུ་ནར་སོན་རྗེས་ཁོང་གི་སྲིད་ཕལ་ཆེར་ཡུམ་བརྟན་རྒྱུད་ཀྱིས་ཁྱེར་བས་བཞུགས་བཟོད་མི་བདེ་བ་བྱུང་སྟེ་མངའ་རིས་སུ་བྱོན་ཁར་ཡབ་ཀྱི་ཞལ་ནས་ལྷོ་མོན་དོང་ཁ་ཕྱེ་བ་འདྲ་བ་དང་བྲུ་ཤ་དང་སྦལ་ཏི་དང་ས་སྒང་གི་གྲོག་མོ་ལ་སོགས་མི་དང་མི་མིན་པའི་གནོད་པ་མང་པོ་ཡོད་པས། ཡི་དམ་སྲུང་མར་མདོ་སྔགས་ཀྱི་ཆོ་ག་འདི་རྣམས་ཀྱིས་ཤིག་གསུངས་ནས་གནང་བས། མངའ་རིས་ཀྱི་བརྩད་པོ་རྣམས་ཆབ་སྲིད་དང་མངའ་རིས་མཐོ་བར་བྱིན་རླབས་ཆེ་བ་ཡིན་ཞེས་ཡབ་ཐུགས་ཕྲེང་བའི་རྣམ་པ་དང་བཅས་ཕྱིན་ཆད་གནང་སྒོའི་བསླབ་བྱ་ཞིབ་མོར་གནང་པ་སོགས་ལོ་རྒྱུས་ཡིག་ཚང་དུ་འཁོད་ཡོད་པས་མངའ་བདག་དཔལ་འཁོར་བཙན་དང་སྐྱིད་ལྡེ་ཉི་མ་མགོན་ཡབ་སྲས་གཉིས་གྱེས་པའི་ལོ་ཚིགས་དེ་དུས་རབས་བཅུ་བའི་ལོ་རབས་བཅུ་བའི(སྤྱི་ལོ༩༡༠)ཡས་མས་ཡིན་དགོས་ཏེ། 《བོད་བཙན་པོའི་གདུངས་རབས་ཚིག་ཉུང་དོན་གསལ་》དང《ལྡེའུ་ཆོས་འབྱུང》སོགས་སུ་མངའ་བདག་འོད་སྲུང་སྤྱི་ལོ༨༨༠ནས༨༨༡ལོར་འདས་པར་གསུངས་པ་ལ་དཔགས་ན། མངའ་བདག་དཔལ་འཁོར་བཙན་འོད་སྲུང་འདས་པའི་ལོར་འཁྲུངས་པའི་དབང་དུ་བཏང་ན་མཐར་དགུང་ལོ་སོ་གཅིག་སྟེང་གྲོམ་པ་ལ་རྩེར་སྟག་རྩེ་སྙགས་ཀྱི་བཀྲོངས་པ་ཞལ་མཐུན་ཕྱིར་དང་། གལ་ཏེ་མངའ་བདག་དཔལ་འཁོར་བཙན་དང་སྐྱིད་ལྡེ་ཉི་མ་མགོན་ཡབ་སྲས་གྱེས་པའི་ལོ་ཚིགས་དེ་མང་ཐོས་ཀླུ་སྒྲུབ་རྒྱ་མཚོས་བཞེད་པའི་ཆུ་འབྲུག་སྤྱི་ལོ༩༦༥ལོ་ཡིན་པའི་དབང་དུ་བཏང་ན། ལྷ་བླ་མ་ཡེ་ཤེས་འོད་སྤྱི་ལོ༩༦༥ལོར་འཁྲུངས་ནས་སྤྱི་ལོ༩༩༦ལོར་གུ་གེའི་མཐོ་ལྡིང་གསེར་གྱི་ལྷ་ཁང་ཆེན་མོ་བཞེངས་པ་དང་ལོ་ཙཱ་བ་རིན་ཆེན་བཟང་བོ་ས་རྟ་སྤྱི་ལོ༩༥༦ལོར་མངའ་རིས་གུ་གེར་འཁྲུངས་ཤིང་ལྷ་བླ་མའི་བཀའ་དང་དུ་བླངས་ཏེ་རྒྱ་གར་དུ་ཕེབས་པ་དང་ལ་དྭགས་ཁྲི་རྩེའི་ཉེར་མའི་ལྷ་ཁང་བཞེངས་པ་སོགས་ཀུན་གྱིས་བཞེད་པ་དེ་མངའ་རིས་ལ་དྭགས་དང་གུ་གེའི་རྒྱལ་རབས་ཚུགས་ཏེ་མི་རབས་གཉིས་འདས་རྗེས་ཀྱི་བྱ་བ་ཡིན་ལ། གལ་ཏེ་མངའ་བདག་དཔལ་འཁོར་བཙན་ཡབ་སྲས་གྱེས་པའི་ལོ་ཚིགས་དེ་སྤྱི་ལོ༩༩༢ཡིན་ན། ལྷ་བླ་མ་ཡེ་ཤེས་འོད་གུ་གེའི་རྒྱལ་ཐོག་གཉིས་པ་ཡིན་ཐབས་བྲལ་ཞིང་མཐོ་ལྡིང་མགོན་པ་བཞེངས་པའི་ལོ་ཚིགས་ཀྱང་ཡོངས་གྲགས་དང་མཐུན་ཐབས་མེད་པ་མ་ཟད། མངའ་རིས་སྤྱིའི་རྒྱལ་པོ་སྐྱིད་ལྡེ་ཉི་མ་མགོན་གྱིས་ཤིང་ཕོ་རྟ་སྤྱི་ལོ༩༣༤དང་ཤིང་འབྲུག་སྤྱི་ལོ༩༣༥ལོར་རིམ་བཞིན་མངའ་རིས་ར་ལ་ཁ་དམར་དང་རྩེ་ལོ་རྒྱ་རི་བརྩིགས་པ་སོགས་ལའང་མཐུན་ཐབས་མེད་པའི་ཕྱིར་རོ།།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།