རི་མོའི་འཕེལ་འགྱུར་ཁྲོད་ཀྱི་བསྟན་འཛིན་ནོར་བུ།

49757

                                                                                                                 རྩོམ་པ་པོ།    རྫ་སྐྱེས་ཕུར་བ།

     

            རི་མོ་པ་བསྟན་འཛིན་ནོར་བུ་ལགས་ནི།  ཕྱི་ལོ1971ལོར་མངའ་རིས་དོལ་པོ་བན་ཚང་དུ་སྐྱེས། ལོ་ཉི་ཤུ་མ་ཟིན་པར་ས་དེ་ནས་བསྡད་དེ། ཕའི་དྲུང་དུ་བོད་ཡིག་སློབ་ཞོར། ཐང་ག་དང་།  ལྡེབས་རིས་འབྲི་ལུགས་སྦྱང་།  ཁྱིམ་རྒྱུད་དེ་ནས་བསྟན་འཛིན་ནོར་བུ་བརྩིས་པའི་མི་རབས་ལྔའི་རིང་ལྷ་རིས་པའི་བརྒྱུད་པ་བར་མ་ཆད་དུ་བྱུང་ཞིང་། ཁོང་གི་སྤོ་ལགས་ཀརྨ་སྐུ་འཕྲེང་བཅོ་ལྔ་པ་མཁའ་ཁྱབ་རྡོ་རྗེའི་དངོས་སློབ་ཡིན་ལ། བན་ཚང་ཞེས་པའི་ས་ཆ་དེ་ནི་དོལ་པོ་བ་ཤེས་རབ་རྒྱལ་མཚན་གྱི་འཁྲུངས་ཡུལ་ཡང་ཡིན་པ་རེད།  དོལ་པོ་བན་ཚང་གི་སྔགས་ཁྱིམ་དཀྱུས་མ་ཞིག་ནས་སྐྱེས་པའི་བསྟན་འཛིན་ནོར་བུ་ཡིས་ཧི་མ་ལ་ཡའི་རི་རྒྱུད་ཀྱི་གནའ་བོའི་ལྷིང་འཇགས་ཀྱི་འཚོ་བ་དང་། གདོད་མའི་རང་བྱུང་གི་མཛེས་སྡུག་ལ་བློ་སེམས་གཅིག་ཏུ་ཤོར་དྲགས་ཏེ།  དེ་ཉིད་རི་མོའི་ལམ་ནས་ཇི་ལྟར་མཚོན་ཐབས་ལ་འབད་པ་བྱས་ཤིང་། སྲོལ་རྒྱུན་གྱི་རི་མོའི་ལྕགས་རི་ལས་ཕྱིར་བུད་པ་རེད།  མི་རྣམས་ཀྱིས་དེ་ལ《དོལ་པོ་བ་བསྟན་འཛིན་ནོར་བུའི་རི་མོ》ཞེས་ད་ཆ་འབོད་སྲོལ་ཆགས་ཡོད། 

66666666666666666.jpg

         ད་ལྟ་ཁོང་གི་རི་མོའི་བརྩམས་ཆོས་དག་ཤར་ནུབ་གང་སར་དར་བཞིན་པའི་སྒང་རེད་ལ། ཨ་རི་དང་།  ཧྥ་རན་སི། འཇར་པན།  ཐེ་ཝན་སོགས་ནས་སྤྱི་སྒེར་གྱི་རི་མོའི་འགྲེམ་སྟོན་སྣ་ཚོགས་སུ་ཐེངས་མང་ཞུགས་པ་དང་།  ཀྲུང་གོ་དང་། འཇར་པན།  བལ་པོ་སོགས་ཀྱི་རི་མོའི་དུས་དེབ་གྲགས་ཆེན་མང་པོར་ཁོང་གི་རི་མོའི་བརྩམས་ཆོས་ཆེད་འགོད་བྱས་ཡོད།  ཧྥ་རན་སིའི་གློག་བརྙན་འཁྲབ་ཁྲིད་པ་དང་།  པར་བ་གྲགས་ཅནEric Valliཡིས་འཁྲབ་སྟོན་བྱས་པའི་གློག་བརྙན《ཧི་མ་ལ་ཡ》འི་ནང་དུ་(ལྟ་འདོད་ཚེ།www.bilibili.com/mobile/video/av3538518.html)ཁོང་དང་། ཁོང་གི་ཨ་མ་འདས་མོ་གཡང་འཛོམས་ལགས་གཉིས་ཀྱིས་འཁྲབ་སྟོན་བྱས་མྱོང་། ཉེ་ཆར་དོལ་པོ་བན་ཚང་གི་ཡུལ་དུ་ཁོང་དང་གྲོགས་པོ་གཉིས་མཉམ་སྦྲེལ་གྱིས་སློབ་མ་ཉིས་བརྒྱ་ལྷག་འདུས་པའི་སློབ་གྲྭ་ཞིག་ཀྱང་བཙུགས་ཡོད། 

77777.jpg

          སྔོན་ནས་བསྟན་འཛིན་ནོར་བུ་ལགས་དང་འཛོམས་ཆད་བྱས་པ་བཞིན།  ཕྱི་ལོ2016ལོའི་ཟླ12ཚེས18ཉིན་བལ་པོའི་ཀ་ཐ་མན་གྲུ་ཡི《བསྟན་འཛིན་ནོར་བུའི་རི་མོ་འགྲེམ་སྟོན་ཁང》ནས་འཛོམས་ཏེ།  ཁོང་གི་གསར་རྩོམ་རི་མོའི་སྐོར་ནས་ཁ་བརྡ་བྱ་བའི་གོ་སྐབས་བྱུང་།  དོལ་པོ་ནི་ད་ལྟ་བལ་པོའི་ཁྱབ་ཁོངས་སུ་གཏོགས་མོད།  ཁ་བརྡ་བཤད་སྐབས་བསྟན་འཛིན་ནོར་བུས་དོལ་པོའི་ཡུལ་མི་བྱིངས་དང་འདྲ་བར་སྒྲ་དག་གསལ་གསུམ་གྱི་བོད་སྐད་ཆུ་རྒྱུག་རྒྱུག་བཤད་ཀྱིན་འདུག

8888.jpg

            ཁོང་ནི་གཤིས་ཀ་འཇམ་ཞིང་སྨྲ་སྒོ་ཧ་ཅང་ཡངས་མོ་ཅན་ཞིག་རེད།  དྲིས་ལན་རྣམས་ལྷོད་པོ་དང་སྟབས་བདེ་བོ་བྱས་ཏེ་གོ་རིམ་ལྡན་པ་ཞིག་ལབ་ཀྱི་འདུག ཁོང་གིས་བཤད་པ་བཞིན།  རི་མོ་དེ་དག་གི་ལྟག་རྒྱབ་ན་ལོ་རྒྱུས་རང་བཞིན་ལྡན་པའི་གཏམ་རྒྱུད་ཀྱི་བྱུང་བ་མང་ལ།  གནའ་དེང་འགལ་འབྲེལ་གྱི་འཚོ་བའི་ཟུར་ཁ་བདོག  མི་དང་མི་ཡི་བར་གྱི་བརྩེ་བའི་བསྡུས་གཟུགས་ཀྱི་ཆའང་མང་དུ་འདུས།  ཞིབ་འབྲི་སྤྱད་པ་དང་། རགས་བསྡུས་ཀྱི་བྲིས་པ་གང་ཡིན་རུང་རང་རང་གི་ཁྱད་ཆོས་དེ་མངོན་སུམ་དུ་མཐོང་ཐུབ། འཇིག་རྟེན་ན་སྙན་ངག་པ་དང་རྣལ་འབྱོར་པ་གཅིག་པུས་སྣང་ཚུལ་དང་མྱོང་བ་དབྱེར་མེད་བསྲེས་ཏེ།  བརྡ་དང་ཐ་སྙད་ཀྱིས་མཚོན་ནུས་ཀྱི་ཡོད་པ་བཞིན།  བསྟན་འཛིན་ནོར་བུས་ཀྱང་རང་གི་འཚོ་བ་དང་འཆར་རྟོག་གི་བརྙན་རིས་ཐམས་ཅད་ཚོན་ཁ་སྡེབ་སྟངས་དང་། གསལ་སྒྲིབ་ཀྱི་བཀོད་འདེམ་ལ་བརྟེན་ནས་གཟུགས་ཅན་དུ་བསྒྱུར་ཐུབ་ཀྱི་ཡོད།

        ཁོང་གིས་བཤད་རྒྱུར”ངའི་མི་ཚེ་དེ་ཅུང་ཁྱད་མཚར་བོ་ཞིག་ཡིན།  ལོ་ཉི་ཤུའི་གོང་དུ་ངས་གློག་དང་། ཤིང་ནགས་སོགས་མཐོང་མྱོང་མེད་པར་གྲོང་གསེབ་རང་ནས་འཚོ་བ་བསྐྱལ་བ་རེད།  ད་ལྟ་ཤར་ནུབ་ཀྱི་གྲོང་ཁྱེར་མང་དུ་བསྐྱོད་ཀྱིན་ཡོད་པ་རེད།  དེ་ལྟ་བུའི་ངའི་མི་ཚེའི་ནང་སྔོན་མ་སྔོན་མའི་གྲོང་བསེབ་ཀྱི་འཚོ་བའི་ཉམས་མྱོང་ཡོད་པ་དང་།  དེང་རབས་ཀྱི་འཚོ་བའང་ཡོད་པས།   ཤུགས་རྐྱེན་དེའི་འོག་ངའི་རི་མོ་ལའང་གཞན་དང་མི་འདྲ་བའི་ཆ་ཞིག་ཐོན་ཡོད་པ་རེད།

1010.jpg

             ད་ལྟ་ངའི་བུས་ཀྱང་རི་མོ་སློབ་ཀྱིན་ཡོད་མོད་ངའི་རི་མོ་ནང་བཞིན་ཡོང་ཐུབ་ཀི་མི་འདུག   གང་རེད་ཟེར་ན།  ཁོང་ཚོར་དོལ་པོ་ས་ཆའི་གནས་སྟངས་ལ་ཁྱོན་ནས་ཉམས་མྱོང་མི་འདུག  སློབ་གྲྭའི་ནང་ན་གཡག་དང་རི་ཡོད་པ་མ་རེད།  དེ་བས་སོ་སོས་དངོས་སུ་མཐོང་བ་དང་།  མིས་དེ་འདྲ་ཞིག་ཡོད་ཅེས་ལབ་པ་གཉིས་ཁྱོན་ནས་འདྲ་བ་མ་རེད།  ང་རང་གིས་ལོ་ཉི་ཤུ་ཐམ་པའི་བར་ཏུ་གཡག་འཚོས་པ་ཡིན།  གཡག་ལ་ཁལ་བཀལ་ནས་སོང་བ་ཡིན།  མདོར་ན་དོལ་པོའི་ཡུལ་གྱི་འཚོ་བ་ཆ་ཚང་བ་ཞིག་བརྒྱ་ཆ་བརྒྱས་མྱོང་ཡོད་པ་རེད།  དེའི་རྐྱེན་གྱིས་ད་ལྟ་ངས་རི་མོ་འབྲི་དུས་འཚོ་བ་དེ་དག་བསམ་བློའི་ནང་རང་བཞིན་གྱིས་སླེབས་ཡོང་གི་ཡོད་པ་རེད།  དོལ་པོ་ན་ཡོད་དུས་ནས་རི་མོ་བྲིས་མོད།  དོལ་པོ་ནི་དེ་འདྲའི་གལ་ཆེན་དང་རྩ་ཆེན་པོ་ཞིག་ཁྱོན་ནས་ཤེས་ཀི་མེད། ཕྱིས་སུ་ཕྱི་རྒྱལ་གྱི་མི་མང་པོས་དོལ་པོ་ནི་ལྷ་ཡུལ་ལྟ་བུ་ཞིག་ཡིན་ནམ་བསམས་ཏེ་ལྟ་ཞིབ་བྱས་པ་དང་མང་པོ་འོང་བ་རེད། ང་རང་ཡང་ཕྱི་ལོ1991ལོར།   Eric Valliདང་མཉམ་དུ་བལ་པོར་ཡོང་བ་ཡིན།  དེ་དུས་བལ་པོ་ན་གློག་ཀླད་སོགས་གང་ཡང་མེད་ནའང་། ཐང་གའི་དེབ་དང་རི་མོའི་དེབ་མིང་དུ་མཐོང་རྒྱུ་ཡོད་པ་རེད།  དེ་དུས་འཇར་པན་དུ་སྐད་གྲགས་ཡོད་པའི་རི་མོ་པ(Hokusai)ཧོ་གོའི་ས་སིའི་རི་མོ་མང་པོར་མཇལ་བྱུང་།  (ལྟ་འདོད་ཚེ།www.pinterest.com/alinerib7/hokusai/ )  ཁོང་ཡང་ང་ནང་བཞིན་ཆུང་དུས་གྲོང་བསེབ་རང་དུ་བསྡད་མྱོང་པའི་རི་མོ་པ་ཞིག་རེད།  དེ་ལྟར་མཐོང་ཐོས་དང་འབྲེལ་འདྲིས་མང་པོ་བརྒྱུད་དེ། ཕྱིར་ཕ་ཡུལ་ལ་བལྟ་དུས།  གཞི་ནས་ཕ་ཡུལ་དོལ་པོའི་རི་ལུང་ཐམས་ཅད་ནི་དངོས་གནས་རི་མོ་རེད་འདུག  སྙན་ངག་རེད་འདུག  དེ་ནས་ང་ལ་དམིགས་བསལ་གྱིས་བརྩེ་བ་ཞིག་སླེབས་སོང་།  ཕྱི་རྒྱལ་གྱི་རི་མོ་སོགས་རི་མོ་གཞན་དག་ལ་ཉམས་མྱོང་མེད་ལ་དགའ་ཞེན་ཡང་ཆུང་དུ་བུད་སོང་། དེ་ནས་ངས་དོལ་པོའི་ཡུལ་གྱི་བསམ་བློ་དང་འཚོ་བ་མཚོན་པའི་རི་མོ་བྲིས་པ་ཡིན།ཞེས”བཅར་འདྲིའི་ཁྲོད་དུ་བཤད་པ་བཞིན་བསྟན་འཛིན་ནོར་བུའི་རི་མོ་ནི་དོལ་པོ་མཐོང་སའི་མེ་ལོང་ཡིན་ལ།  དོལ་པོའི་གཟུགས་འགྱུར་གྱི་སྣང་བརྙན་གཞན་ཞིག་ཡིན།  

9999.jpg

          ཁོང་གི་རི་མོ་མང་དག་ལ་འདྲ་མཚུངས་སུ་བཀོལ་བའི་ཆ་ཞིག་ཀྱང་ཡོད་དེ།  དེ་ནི་དཀར་གཙང་མངོན་པར་འཕགས་པའི་ཟླ་འོད་ཀྱི་གཙང་པོའི་ཀློང་ན།  དལ་ཞིང་ལྷོད་པའི་མི་ཞིག་མངོན་ཆུང་ངང་བགྲོད་ཀྱིན་པ་དེ་རེད།   བསྟན་འཛིན་ནོར་བུས་ཕྱིར་དྲན་བྱས་ཏེ་ལབ་པ་བཞིན།  དོལ་པོའི་ཡུལ་དུ་གློག་གི་ཆ་རྐྱེན་མེད་སྟབས་ད་སྐབས་མི་རྣམས་ཀྱིས་གློག་གི་འོད་སྣང་ལ་ལོངས་སྤྱོད་པ་བཞིན།  དེ་ཀའི་མི་རྣམས་ཀྱིས་ཡར་ངོས་ཟླ་བ་ཤར་སྐབས། ཟླ་འོད་ཀྱི་ཀློང་ན་མཚན་ལས་བྱེད་ཀྱི་ཡོད་པ་རེད། དཀར་འོད་ཀྱིས་དབེན་པའི་བསྟན་འཛིན་ནོར་བུའི་བྱིས་དུས་ཀྱི་འཚོ་བ་དང་ཡུལ་གྱི་གནས་ཚུལ་ནི་དེ་འདྲ་ཞིག་ཡིན་པས། བསམ་གཟས་ཏེ་མྱོང་གྲུབ་ཀྱི་ངང་ཚུལ་དེ་ཉིད་རི་མོའི་རྣམ་པར་འཕོ་འགྱུར་བྱེད་དུ་བཅུག་པ་རེད།

66666.jpg

             དེ་མིན་ད་དུང་མཐོང་སྣེ་གཞན་དང་གཞན་ནས་བལྟས་ན།   གོ་རྒྱ་རྦད་དེ་ཐ་དད་དང་རྒྱ་ཆེན་པོ་ཡིན་པའི་ཆ་ཡང་བདོག་པར་སེམས་ཏེ།  མཚོན་དོན་གྱི་ཀློང་ཡངས་པའི་བརྩམས་ཆོས་ཤིག་ཡིན་ཚེ།   དེ་ལ་ཇི་ལྟར་གོ་ནུས་ན།  དེ་ལྟར་གོ་ཆོག་པའི་རྩ་དོན་གྱི་རང་བཞིན་ཡོད་པས་སོ།།

8965.jpg

             དོལ་པོ་ནི་རི་འགག་དོག་ལ་རྐང་ལམ་ཙམ་ལས་མེད་པའི་གངས་འདབ་ཀྱི་ཡུལ་གྲུ་ཆུང་ཆུང་ཞིག་སྟེ། དུས་ད་དུང་ཡང་སྔོན་མའི་ལུགས་ལྟར། གཡག་ལ་ཁལ་བཀལ་ཏེ་གངས་ཁྲོད་ཀྱི་ལམ་དུ་བསྐྱོད་ཀྱིན་ཡོད་པ་རེད།  སྣང་ཚུལ་དེ་ནི་བསྟན་འཛིན་ནོར་བུའི་སེམས་ལ་ཆེས་མཛེས་སྡུག་གི་སྣང་བརྙན་ཞིག་ཏུ་གྲུབ་ཡོད་པས། རི་མོའི་ཁྲོད་དུ་ཡུལ་དངོས་འཕོས་འགྱུར་བྱས་པ་བཞིན་གསོན་ཉམས་དོད་པོས་བྲིས་ཏེ།  ཡུལ་གདུང་འདུ་ཤེས་ཀྱི་སེམས་ཚོར་ཞིག་གིས་སྣོན་པ་བཏབ་ཡོད།

9852522.jpg

           བསྟན་འཛིན་ནོར་བུའི་རི་མོའི་གྲངས་འབོར་ཡང་གང་འཚམ་མང་ཞིང་སྔ་མ་ལས་ཕྱི་མ་དག་ནི་བྱང་རྩལ་དང་ཞིབ་ཆས་ཕྱུག་པ་ཡིན། རེད་དེ་སྔ་ཕྱིར་གཉིས་ཆར་ཐུན་མོང་རང་བཞིན་གྱི་ངོ་བོ་ཞིག་དང་།  གཅིག་མཚུངས་རྩ་དོན་གྱི་སྣང་བརྙན་ཞིག་ཡོད་དེ།  དེ་ནི་རླུང་གི་གཡོ་བའི་རྣམ་འགྱུར་དང་། ཟླ་བའི་འོད་ཀྱི་དཀར་མདངས།  ཡུལ་མིའི་སྲོལ་གྱི་ཆས་ལུགས་དག་དང་། བྱེ་བྲག་དོལ་པོའི་བུ་མོ་ཚོའི་དཔྱད་གཟུགས་དང་། དཔྱད་གཟུགས་དེ་དང་འབྲེལ་བའི་བརྩེ་དུང་གི་སྣང་བརྙན་ཞིག་ཀྱང་བདོག  ཧི་མ་ལ་ཡ་ནི་ཚ་གྲང་གཉིས་པོའི་བར་ཆོད་ཀྱི་ཡོལ་བ་འདྲ་བོ་ཞིག་དང་།  གླིང་སྣེ་ཡར་འདེགས་ཀྱི་ཀ་བ་ལྟ་བུར་ཡོད་ཙང་།  ཧི་མ་ལ་ཡའི་དུས་བཞི་ནི་འཁྱག་རླུང་གིས་བཟུང་ཞིང་འཁྱག་རླུང་རྒོད་པོ་རྟག་པར་ལྡང་པ་རེད།  བསྟན་འཛིན་ནོར་བུ་འཁྱག་རླུང་དེ་ཡི་ཁྲོད་དུ་འདུ་ཤེས་སྨིན་ཞིང་ནར་སོན་བརྒྱུད་པས།  ཁོས་བྲིས་པའི་རི་མོའི་ངོས་ལ་རླུང་གི་གཡོ་བའི་རྣམ་འགྱུར་དེ་བཅོས་མིན་ངང་ཐོན་ཞིང་།  རྣམ་འགྱུར་དེ་བརྩམས་ཆོས་བཞེངས་སྐྲུན་གྱི་སྲོག་ཤིང་དུ་གྱུར་ཡོད་པ་ཡིན། མ་གཞི་རླུང་གི་གཡོ་བ་དེ་རྩོལ་མེད་གྱི་སྣང་བརྙན་ཞིག་རེད་ལ།  རིམ་པ་གཉིས་པའི་སྐབས་འཆར་རྟོག་རྩོལ་བཅས་ཀྱི་ངོ་བོ་ཙམ་ཞིག་རེད།  རིམ་པ་གསུམ་པར་ཐོན་དུས་ད་གཟོད་དབང་བོའི་ཡུལ་ཏུ་སླར་ཡང་མངོན་པའི་གསར་བརྩམས་ཤིག་ཡིན་པ་རེད། ཏག་ཏག་གསར་རྩོམ་ནི་འཚོ་བ་དང་འདུ་ཤེས་ཀྱི་སྐྱེད་འབྲས་ཡིན་པའི་ཆོས་ཉིད་དེ་འདི་འདྲ་ལ་གོ་ཚོར་དགོས་པ་ལོས་ཡིན་ཏེ། དངོས་བཅར་གླེང་མོལ་ཁྲོད་དུ་ཁོང་གིས་བཤད་པ་བཞིན་ཆུང་དུས་ལུས་ཀྱིས་མྱངས་ཤིང་ནམ་རྒྱུན་དྲན་པར་འཁོར་བའི་རླུང་དེ་ད་ལྟ་ཁོ་ཡི་རི་མོའི་མཛེས་དཔྱད་གལ་ཆེན་དུ་གྲུབ་པ་ཡིན།   ཆུང་དུས་ཁོང་གི་ཡུལ་ན་གློག་མེད་ལ། སྣུམ་སྒྲོན་ཡང་མོད་པོ་ཞིག་ག་ལ་ཡོད།  ཁ་སྟབས་ཞན་པོ་ཡིན་པའི་ཧི་མ་ལ་ཡའི་ས་ཁུལ་དེ་དག་ལ་མཚན་མོར་འོད་ཀྱི་སྣང་བ་སྦྱིན་མཁན་གཅིག་རང་ཡོད་པ་ནི་ཡར་ངོས་ཟླ་བ་ཡིན་པ་རེད།  ཡར་ངོས་ཟླ་བ་ཤར་དུས་ཁོ་ཚོས་ཉིན་གྱི་ལས་འཕྲོ་སྐྱོང་ཆོག་གི་ཡོད་ལ། ན་ཆུང་ཚོས་ཆུང་འདྲོགས་དུས་ཆད་ལ་ལོངས་སྤྱོད་ཐུབ་ཀི་ཡོད་ཙང་།  བསྟན་འཛིན་ནོར་བུས་རྟག་ཏུ་བརྗེད་མི་སྲིད་ཅིང་གསར་བརྩམས་སྐབས་ལ་དབྱིངས་ཞུགས་ས་གཙོ་བོ་ཞིག་ནི་ཆུང་དུས་ཀྱི་ཟླ་བའི་དཀར་འོད་དེ་ཡིན་པ་རེད།     ད་དུང་ཡུལ་གྱི་ཆས་ལུགས་བཟའ་བཏུང་། མ་ཡི་བྱམས་བརྩེའི་དྲོད་འཇམ།   དགའ་མའི་བརྩེ་བའི་མཉེན་གཤིས་སོགས་ཀྱང་ཁོང་གི་བརྩམས་ཆོས་ཀྱི་གཞོགས་འདེགས་གདུང་མ་རུ་གྱུར་བ་ཡིན།   སྣང་བརྙན་དེ་རེ་རེ་ཁོང་གི་རྟོག་པའི་ལྡེབས་སུ་འཕོས་ཤིང་།  སྨྱུག་རྩེའི་ལས་སྣོན་བརྒྱུད་མཐར་གཟོད་འོ་སྐོལ་གསལ་ཆ་ཆེ་བའི་བསྟན་འཛིན་ནོར་བུའི་རི་མོ་དེ་བྱུང་བ་རེད།

             བསྟན་འཛིན་ནོར་བུས་རི་མོའི་བདག་དབང་ཐད་ནས”ཉེ་ཆར་ཀྲུང་གོའི་བོད་ལྗོངསས་དྲ་བའི་འཕྲིན་སྟེགས་སྟེང་ངའི་རི་མོ་སྐོར་ཞིག་བཀོད་འདུག  ངོ་སྤྲོད་ཀྱང་ཡག་པོ་བྲིས་བཞག  དོ་སྣང་གནང་པར་དངོས་གནས་ཐུགས་རྗེ་ཆེ་ཞུ་རྒྱུ་ཡིན།  ཡིན་ནའང་འཛམ་གླིང་གི་སྒྱུ་རྩལ་པ་ཚང་མར་རང་རང་གི་བརྩམས་ཆོས་རང་བདག་བྱེད་པའི་ཐོབ་ཐང་ཞིག་ཡོད་པ་རེད།  དང་པོ་བརྩམས་ཆོས་དེ་དྲ་བ་དང་རྒྱུད་ལམ་གང་དེར་འཇོག་འདོད་ཡོད་མེད་ཀྱི་བདག་པོ་ལ་སྐད་ཆ་དྲི་དགོས་པ་རེད། ང་ལ་སྐད་ཆ་གང་ཡང་དྲིས་མ་སོང་།  དེ་བློ་ཕམ་རེད།  རྗེས་ཕྱོགས་དྲ་བ་ཡིན་ན་རེད།  དུས་དེབ་ཡིན་ནའང་རེད་ངའི་རི་མོ་དག་ཆོག་མཆན་མེད་པར་གང་སར་མི་འགོད་པའི་རེ་བ་ཞུ་བཞིན་ཡོད”ཟེར།  དངོས་གནས་དེ་བཞིན་ཡིན་ཏེ། དྲ་བ་དང་འཕྲིན་སྟེགས་རྩོམ་སྒྲིག་པ་དག་གིས་རྩོམ་པ་པོ་དང་རྩོམ་སྒྲིག་ཁང་གི་ཆོག་མཆན་མེད་པར་བརྩམས་ཆོས་དག་གང་བྱུང་བཙན་འཕྲོག་མི་བྱེད་པའི་རེ་བ་ནན་གྱིས་ཞུ་བཞིན་ཡོད།  བྱེད་སྟངས་འདིས་ནི་ཡར་ཐོན་ཅན་གཞན་དང་འདྲ་བའི་ང་ཚོར་རིག་གནས་ཀྱི་ཁོར་ཡུག་ཅིག་ཆགས་པར་གཏོར་བརླག་ཧ་ཅང་བྱེད་ཀྱི་འདུག

3322.jpg
1234.jpg
963214.jpg
9852522.jpg
1478.jpg
1254.jpg
9+8741.jpg
444444.jpg

རྫ་ཆུའི་རླབས་སྒྲའི་རྩོམ་དབང་གཞན་གྱིས་དགོལ་བར་མི་བྱའོ།།

0

2 Responses to རི་མོའི་འཕེལ་འགྱུར་ཁྲོད་ཀྱི་བསྟན་འཛིན་ནོར་བུ།

  1. khangey ལགས་ཀྱིས:

    在别人的版权图片上放强行自家的水印,会不会显得格局有点小?ད་གཞན་གྱི་པར་རིས་སྟེང་ལ་རང་གི་དྲྭ་ཚིགས་མཚོན་རྟགས་བྱས་ན་ཡག་པོ་མ་རེད་བསམ།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།