མང་ཡུལ་ལ་དྭགས་སུ་བསྐྱོད་པའི་ཟིན་ཐོ།(ཕྱི་དུམ)

1189

རྩོམ་པ་པོ།   ཨ་འདུས་སྐལ་བཟང་རྒྱ་མཚོ།
༢༣.jpg
ཧེ་མི་དགོན།  ཁང་ཟླ་སྲས་ཀྱིས་པར་བླངས།

          ཧེ་མི་ནི་གནས་ཀྱི་མིང་ཡིན་ཞིང་། རྗེ་རྒོད་ཚང་བའི་སྒྲུབ་གནས་ཡིན། འདི་ནི་གླེ་ནས་སྤྱི་ལེ་༤༨སར་ཡོད་ཅིང་། ངོ་མཚར་བའི་བྲག་ལུང་ཞིག་ཏུ་ཆགས་ཡོད། ཕྱི་ལོ་༡༦༣༠ལོར་ཆོས་རྒྱལ་སེངྒེ་རྣམ་རྒྱལ་གྱིས་རྒྱབ་གཉེར་འོག་སྟག་ཚང་སྐུ་ཕྲེང་དང་པོས་ཕྱག་འདེབས་མཛད། སྟག་ཚང་སྐུ་ཕྲེང་དང་པོ་ནི་ས་སྐྱ་འཁོན་གྱི་གདུང་ཡིན། ཡབ་ཀྱིས་ཕ་མེས་ཀྱི་ཆོས་ལ་ཞུགས་ཞེས་གདམས་མོད། ཨ་མར་གཟིགས་རྟོགས་ཆེད་ས་སྐྱར་མ་བྱོན་པར་སྣང་། དགོན་པའི་མཚན་ཆ་ཚང་ལ་བྱང་ཆུབ་བསམ་གཏན་གླིང་ཞེས་འབོད།ཆོས་བརྒྱུད་འབྲུག་པ་བཀའ་བརྒྱུད། བསྟན་བདག་ནི་སྟག་ཚང་སྐུ་ཕྲེང་རིམ་བྱོན་ཡིན་ནའང་། སྟག་ཚང་བོད་ནས་ཞབས་སོར་འཁོད་མ་ཐུབ་པས།དེང་སང་ནི་འབྲུག་ཆེན་རིན་པོ་ཆེའི་གཟིགས་རྟོགས་འོག་ཡོད།ལ་དྭགས་ཀྱི་དགོན་པ་ཆེ་ཤོས་དེ་ཡིན། འོན་ཀྱང་དགོན་འདིར་སྒྲུབ་གྲྭ་གཙོ་བོར་གཉེར་བ་ལས་མཚན་ཉིད་ཀྱི་གྲྭ་མེད་པར་སྣང་། ཧེ་མིའི་དུས་མཆོད་ཀུན་ལས་སྦྲེལ་ལོའི་ཚེས་བཅུའི་དུས་མཆོད་དེ་གྲགས་ཆེ་ཞིང་།དེ་སྐབས་གལ་ཆེའི་སྐུ་རྟེན་ཚང་མར་མཇལ་ཁ་ཡོད། དེང་སང་དགོན་པ་འདིའི་སྐུ་རྟེན་དང་། རིགས་དངོས་རྙིང་རིགས་འགྲེམ་སྟོན་ཁང་བཟོས་ཏེ་ཡུལ་སྐོར་བ་ཚོར་མཇལ་ཁ་གཏོང་གི་ཡོད་ཅིང་། དགོན་པ་གང་ཡིན་རུང་ཆེ་ཆུང་ཙམ་མ་ཟད་རིགས་དངོས་འགྲེམ་སྟོན་ཁང་རེ་ཟུར་འཛུགས་བྱས་ཡོད་པ་དེ་ལ་དྭགས་དགོན་པ་ཕལ་ཆེ་བའི་ལུགས་སྲོལ་ཞིག་ཏུ་གྱུར་ཡོད།༡༡༡༡༡.jpg

 སྟག་སྣ་དགོན།   ཡར་ཆབ་ཕོ་ཉས་པར་བླངས།

                འདི་ནི་གླེ་ནས་སྤྱི་ལེ་༢༥སར་སེང་གེ་ཁ་འབབ་ཀྱི་ཕར་ངོའི་བྲག་རྩེར་ཆགས་ཤིང་། ཆོས་བརྒྱུད་འབྲུག་པ་བཀའ་བརྒྱུད་ཡིན། དུས་རབས་བཅུ་དྲུག་པའི་ནང་ཆོས་རྗེ་སྨུག་འཛིན་འབྲུག་ནས་ཕེབས་ཏེ་ཕྱག་བཏབ། དགོན་འདིས་ཀྱང་རིགས་དངོས་རྙིང་པ་དག་སྲུང་སྐྱོབས་ཆེད་འགྲེམ་སྟོན་ཁང་བཟོས་ཡོད་ཅིང་། དགོན་འདིའི་བསྟན་བདག་ལ་གནང་བའི་ཀུན་གཟིགས་པཎ་ཆེན་གྱི་བཀའ་ཤོག་རྙིང་མ་དེ་འདྲ་མཇལ་རྒྱུ་ཡོད། དགོན་འདིར་ཙན་དན་ལས་གྲུབ་པའི་འབྲུག་ཞབས་དྲུང་ངག་དབང་རྣམ་རྒྱལ་གྱི་སྐུ་དང་། ཞབས་དྲུང་རང་ཉིད་ཀྱིས་འབྲུག་ནས་གདན་པའི་སྣར་ཐང་བཀའ་འགྱུར་སོགས་བཞུགས་ཡོད།                                              ༢༢༢༢༢༡༡༡༡.jpg

རི་རྫོང་དགོན་པ།  ཁང་ཟླ་སྲས་ཀྱིས་པར་བླངས།

         འདི་ནི་གླེ་ནས་སྤྱི་ལེ་༦༢གྱི་སར་བྲག་རྫོང་ཤིན་ཏུ་ཧ་ཅང་དོག་མོ་ཞིག་ཏུ་ཆགས་ཡོད་ཅིང་། ཆོས་བརྒྱུད་ནི་དགེ་ལྡན་པ་ཡིན། འདི་ནི་ལ་དྭགས་ཀྱི་དགོན་པ་གསར་གྲས་ཤིག་ཡིན་ནའང་། འདི་ནས་ཉེ་བའི་དུས་རབས་ནང་ལ་དྭགས་པ་ཞིག་དགའ་ལྡན་ཁྲིར་ཕེབས་ཐུབ་པ་ཐོག་མ་དེ་ཆགས་ཡོད། དེ་ནི་ལ་དྭགས་ཀྱི་རྒྱལ་སྲས་བ་ཀུ་ལ་རིན་པོ་ཆེའི་སྐུ་ཚ་སྟེ་རི་རྫོང་རིན་པོ་ཆེ་ཡིན་ཞིང་། རིན་པོ་ཆེ་ནི་དགོན་པ་འདིའི་བསྟན་བདག་ཡིན། ད་ལྟའི་ཆར་དགེ་འདུན་པ་སུམ་ཅུ་ཙམ་དང་། དགོན་པའི་མར་གཤམ་དུ་བཙུན་དགོན་ཆུང་ངུ་ཞིག་ཡོད་པ་དེར་བཙུན་མ་བཅུ་གྲངས་ཤིག་ཡོད་ཟེར།ཝཝཝཝ.jpg

 ལོ་ཆེན་རིན་ཆེན་བཟང་པོ།  ཁང་ཟླ་སྲས་ཀྱིས་པར་བླངས།

          ཁོང་ནི་ཕྱི་ལོ་༩༥༨ལོར་མངའ་རིས་གུ་གེར་འཁྲུངས་ཤིང་། དགུང་ལོ་༩༨པ་ཕྱི་ལོ་༡༠༥༥ལོར་གཤེགས། སྐུ་ན་ཆུང་དུས་ནས་རྒྱ་གར་དུ་ཕེབས། བླ་མ་མང་པོ་བསྟེན་ནས་གསན་བསམ་རྒྱ་ཆེར་མཛད། ལོ་ཙཱ་བསླབ་ཏེ་བཀའ་བསྟན་གྱི་ཆོས་ཚན་བརྒྱ་དང་བརྒྱད་ཙམ་བསྒྱུར། བོད་དུ་འགྱུར་གསར་པའི་ལོ་ཙཱ་བ་ཐོག་མ་ཡིན། དུས་རབས་བཅུ་གཉིས་པའི་ནང་གི་ལོ་ཙཱ་བ་ཀུན་གྱི་ཚབ་མཚོན་ལྟ་བུར་གྱུར་ཞིང་། ཁོང་གི་ཤུགས་རྐྱེན་གྱིས་ལོ་བརྒྱ་ཕྲག་གཉིས་ཙམ་རིང་མངའ་རིས་སྐོར་གསུམ་དུ་བཤད་སྒྲུབ་ཀྱི་བསྟན་པ་ཤུགས་ཆེར་དར་ཡོད། ཨ་ལྕིའི་གནས་འདིར་ཁོང་གི་མཁར་དབྱུག་ས་ལ་བཙུགས་ནས་རྟེན་འབྲེལ་བརྟགས་པ་ན། དེར་ལོ་མ་སྐྱེས་ཏེ་སྡོང་རྒན་དུ་གྱུར་པ་ཡིན་ནོ་སྐད་ཅིག་ད་ལྟ་མཇལ་རྒྱུ་ཡོད། ལོ་ཆེན་རིན་ཆེན་བཟང་པོའི་སྐྱེ་སྤྲུལ་དུ་གྲགས་པ་ཞིག་དེང་སང་སྤྱི་སྟི་ན་བཞུགས་ཡོད། ལོ་ཆེན་འདིའི་དུས་སྐབས་སུ་ལྷ་བླ་མ་བྱང་ཆུབ་འོད་ཀྱིས་རྒྱ་གར་དང་། ཁ་ཆེའི་ཡུལ་ནས་ལོ་ཙཱ་བ་དང་པཎྜིཏ་མང་པོ་གདན་འདྲེན་ཞུས་ཏེ་ལོ་ཆེན་གྱི་ཡིག་འགྱུར་ཐད་གཞོགས་འདེགས་ཆེན་པོ་གནང་། ཁྱད་པར་དུ་ཕྱི་ལོ་༡༠༤༢ལོར་མཉམ་མེད་ཇོ་བོ་ཆེན་པོ་མཐོ་ལྡིང་དུ་གདན་འདྲེན་ཞུས་ཤིང་། ཇོ་བོ་ཆེན་པོ་མངའ་རིས་སུ་ལོ་གཉིས་རིང་བཞུགས་སྐབས་ལོ་ཆེན་རིན་ཆེན་བཟང་པོ་ཇོ་བོའི་ཐུགས་སྲས་གཙོ་བོར་གྱུར།ཇོ་བོ་ཆེན་པོའི་ཞལ་ནས། ཁྱོད་ལོ་ཙཱར་མཁས་གྲགས་ཆེ་བས་ངའི་གསུང་སྒྱུར་མཛད་རོགས་ཞུས་པར། ལོ་ཆེན་གྱིས་ཞལ་ནས། ཇོ་བོ་ཆེན་པོ། བདག་ནི་རང་ལོ་བརྒྱད་ཅུར་ཐལ། ད་ནི་ལྕེ་མི་གསལ་བས་ཆོས་ཀྱི་སྒྲ་དག་པོ་མི་ཡོང་གསུངས་ཏེ་དགོངས་ཞུ་མཛད་པར་ཇོ་བོ་ཐུགས་མུག་པར་པའི་ལོ་རྒྱུས་ཡོད།༡༡.jpg

ཨ་ལྕེའི་ཆོས་འཁོར།   ཡར་ཆབ་ཕོ་ཉས་པར་བླངས།

         གནས་འདི་ནི་གླེ་ནས་སྤྱི་ལེ་༦༩སར་སེངྒེ་ཁ་འབབ་དང་། རྟ་མཆོག་ཁ་འབབ་མཉམ་འདུས་བྱས་ཏེ་བཞུར་གྱིན་པའི་གཙང་འགྲམ་ན་ཆགས་ཡོད་ཅིང་། ལོ་ཆེན་རིན་ཆེན་བཟང་པོའི་རྟེན་འབྲེལ་བརྟགས་པ་ལྟར་དངོས་སློབ་ལོ་ཙཱ་བ་བློ་ལྡན་ཤེས་རབ་དང་། སློབ་དཔོན་ཚུལ་ཁྲིམས་འོད་གཉིས་ཀྱིས་ཕྱག་བཏབ་པར་བཤད་མོད་ཀྱང་། རིན་ཅེན་ལྷ་ཁང་གི་རྩིག་ངོར་བྲིས་པའི་ཡི་གེ་ལས་ལྷ་ཁང་འདི་དག་བཞེངས་པ་པོ་ནི། ལོ་ཆེན་གྱིས་བཞེངས་པའི་ཉར་མའི་གཙུག་ལག་ཁང་ནས་ཐོས་བསམ་གྱིས་མཁས་པར་གྱུར་ཅིང་། མཚན་ལ་སྐལ་ལྡན་ཤེས་རབ་བྱ་བ་ཞིག་གིས་བཞེངས་ཚུལ་_བྲིས་ཡོད།

         མར་ཡུལ་ན་ལོ་ཆེན་གྱི་དུས་སྐབས་སུ་བཞེངས་པའི་གཙུག་ལག་ཁང་འགའ་ཞིག་ཡོད་ཀྱང་།དུས་རབས་རིམ་པའི་ནང་ཉམས་ཆག་ཆེར་མ་བྱུང་བ་དང་།གྲགས་ཆེ་བ་ནི།ཨ་ལྕི་ཆོས་འཁོར་འདི་ཡིན་པར་སྣང་། ཡུལ་འདིར་ཤང་རོང་དང་། ཡུལ་འཁོར། ཆོས་འཁོར།དགོན་པ་བཅས་ཚོ་ཁག་བཞི་ཡོད། ཨ་ལྕིའི་གནས་གཙོ་བོ་ཁག་ནི། རིན་ཅེན་ལྷ་ཁང་། སུམ་བརྩེགས་ལྷ་ཁང་།ལོ་ཙཱ་བའི་ལྷ་ཁང་། འཇམ་དབྱངས་ལྷ་ཁང་། གཙུག་ལག་མདུན་གྱི་མཆོད་རྟེན་སོགས་ཡིན་ཞིང་། དེ་དག་གི་གྱང་རིས་ནི།རྒྱ་གར་ཁ་ཆེའི་ལུགས་སུ་བྲིས་པ་ཤ་སྟག་ཡིན། ཨ་ལྕིར་ཡོད་པའི་ལྷ་ཁང་དག་དེ་ཙམ་གཞི་རྒྱ་ཆེན་པོ་མིན་ནའང་། ནང་གི་རི་མོ་དག་བྲིས་པ་ཞིབ་ཆ་ཆེ་ཞིང་། སངས་རྒྱས་སྟོང་སྐུ་དང་། འཇམ་དབྱངས་རིགས་མང་པོ། སངས་རྒྱས་རིགས་ལྔ་། སྤྱན་རས་གཟིགས་དང་། བྱམས་པ་མགོན་པོ་ཕྱག་བཞི་པའི་སྐུ་ཤམ་གྱི་ངོས་སུ་ཤཱཀྱ་ཐུབ་པའི་མཛད་པ་བཅུ་གཉིས་བཞེངས་པ་སོགས་ཆོས་ལུགས་ཀྱི་བྱུང་རབས་དང་། སྒྱུ་རྩལ་གྱི་རི་མོ་སྤེལ་ཏེ་བྲིས་པ་ནི། བོད་ཀྱི་མེས་པོ་གོང་མ་ཚོས་རང་གི་དད་མོས་དང་། སྒྱུ་རྩལ། ཟབ་ཡངས་ཀྱི་ཤེས་རིག་ལ་བརྩི་བཀུར་བྱས་པའི་རྗེས་དྲན་གྱི་རྡོ་རིང་གལ་ཆེན་ཞིག་ཏུ་གྱུར་ཡོད།༡.jpg

 ཨ་ལྕེའི་ལྡེབས་རིས།  ཁང་ཟླ་སྲས་ཀྱིས་ཕར་བླངས།

          ཨ་ལྕེའི་གྱང་བྲིས་རི་མོ་དང་། འཇིམ་སྐུ་དག་ནི་ལ་དྭགས་ཀྱི་ཡུལ་འདིར་མི་ལོ་སྟོང་ཕྲག་ཡར་སྔོན་གྱི་ཤེས་རིག་དར་རིམ་དང་འབྲེལ་བ་ཡོད་ཅིང་། ཚོན་རྩི་དང་། འབྲི་རྩལ། འབྲི་ལུགས།རི་མོའི་གསོན་ཉམས། ལག་ལེན་སྐབས་རི་མོ་བའི་འཆར་ཡན་གྱི་ཆ་རང་དབང་གིས་བསྲེས་པ་ལྟ་བུར་སྣང་སྟེ། ཨ་ལྕིའི་གྱང་རིས་དག་ལ་ཞིབ་མཇལ་བྱས་ན། གྱང་རིས་དེ་དག་ནི་ཉེ་དུས་ཀྱི་རི་མོ་མཁན་ཞིག་གིས་སྒྱུ་རྩལ་དང་རྟོགས་བཏགས་བསྲེས་པའི་ཤེས་རབ་ཀྱིས་གསར་དུ་བྲིས་པ་ལྟ་བུའི་གསོན་ཉམས་ཀྱིས་ཁེངས་ནས་ཡོད་པ་ལས། མི་ལོ་སྟོང་ཕྲག་སྔོན་གྱི་རི་མོ་ཞིག་ཡིན་པའི་ཚོར་བ་སློང་དཀའ་བར་འདུག དེ་ཡང་གྱང་བྲིས་རི་མོ་འདི་དག་ནི། གཙོ་བོ་རྒྱུ་ཆ་རྡོ་ཚོན་སྤྱད་དེ་བྲིས་ཡོད་ཅིང་། རི་མོ་མཁན་པོས་གང་ཞིག་བྲི་བར་བྱའི་ཡུལ་གྱི་ལྷ་དང་དེའི་རྣམ་པར་ལྷ་བྲིས་པ་རང་ཉིད་ཀྱི་རང་དབང་སྤྱད་དེ་རྟོགས་བཟོ་དང་མཛེས་རྩལ་གཙོར་འདོན་བྱས་ཡོད་པས། སྲོལ་རྒྱུན་གྱི་རི་མོ་འབྲི་སྲོལ་གུ་དོག་པོའི་འཆིང་རྒྱ་ལས་རྦད་དེ་བརྒལ་བའི་སྣང་བ་འཆར་ཐུབ། གང་ལྟར་ལོ་རྒྱུས་སྨྲ་བ་དག་གིས་རི་མོ་འབྲི་ལུགས་འདིའི་མིང་ལ་གྷན་དྷ་རིའི་ལུགས་ཀྱི་རི་མོ་ཞེས་བྲིས་ཡོད། དཔེར་ན། ལོ་དྲུག་དཀའ་བ་སྤྱད་པའི་རྣམ་ཐར་གྱི་གྱང་རིས་དེར་ང་ཚོས་དུས་རྒྱུན་གྱི་རི་མོ་སྟོན་པ་གཅིག་པུས་དཀའ་སྤྱད་གནང་བཞིན་པ་བྲིས་པ་ཙམ་མིན་པར། བསམ་གཏན་ལ་བཞུགས་པའི་སྟོན་པའི་གཡས་སུ་ཡོད་པའི་དཀའ་ཐུབ་པ་དེས་བསོད་སྙོམས་ཀྱི་མཐའ་སྤངས་ཏེ། ལུས་ཧ་ཅང་སྐམ་རུད་དུ་གྱུར་པས་ནི། ཚེ་སྲོག་འཚོ་དཀའ་བའི་གནས་སུ་ལྷུང་བ་སྟེ་ངལ་ཞིང་དུབ་པའི་མཐའ་མཚོན་ཞིང་། གཡོན་པས་ཟས་ལ་སྲེད་པ་བྱས་དྲགས་ཏེ་ལྟོབ་ཡང་ས་རུ་དྲུད་པ་དེས།འདོད་པ་བསོད་སྙོམས་ཀྱི་མཐའ་མཚོན་པ་བྱས་ཡོད་ཅིང་། དཀྱིལ་དུ་སྟོན་པ་རང་ཉིད་མཐའ་གཉིས་སྤངས་པའི་དབུ་མའི་ལམ་གྱི་འཚོ་བས་ཏིང་འཛིན་ལ་རྩེ་གཅིག་ཏུ་བཞུགས་པ་མཚོན་ཡོད་པས། གནས་བབ་མི་འདྲ་བའི་རི་མོ་གསུམ་གྱིས་སྟོན་པའི་རྗེས་སུ་འཇུག་པའི་དགེ་འདུན་དག་གི་འཚོ་བའི་བཞུད་ལམ་རྣལ་མ་དེ་གསལ་སྟོན་བྱས་ཡོད།

          ད་ལྟའི་ཆར་ཨ་ལྕིའི་གཙུག་ལག་ཁང་འདི་དག་ནི་རྒྱལ་ཁབ་ཀྱི་རིག་དངོས་རྙིང་པ་སྲུང་སྐྱོབས་ཚན་པ་དང་། ས་གནས་ཚོགས་པ་ཐུན་མོང་གིས་འཛིན་སྐྱོང་འོག་ཡོད་ནའང་།གྱང་རིས་མང་པོ་ཞིག་ནི་དུས་ཚོད་ཀྱིས་དབང་གིས་ཧ་ཅང་མངོན་གསལ་མ་ཡིན་པའི་སྒོ་ནས་ཉམས་ཆག་གི་ལམ་བུར་འགྲོ་བཞིན་ཡོད་པ་ནི་ཞེ་ཕང་པའི་གནས་ཡིན། ལོ་རྒྱུས་འགར་ཨ་ལྕི་ཞེས་མིང་ཐོག་དོན་ནི། དེ་སྔོན་དམག་དཔུང་སླེབས་སྐབས་ཡ་ལན་ད་ེཙམ་བྱས་པས། དམག་མི་ཚོས་ཨ་ལན་འདོན་པར་ལྕི་བ་ལ་ཞེས་པས་ཨ་ལྕི་ཞེས་ཐོག་པར་བཤད་མོད་བདེན་མིན་ནི་མ་ཤེས།

ལོ་ཙཱ་བའི་སློབ་མ།

          ཀ་བཞི་གདུང་བརྒྱད་སོགས་བགྲང་རྒྱུ་ཡོད་པ་ལས། ཁ་ཙེ་བ་རིན་ཆེན་ཤེས་རབ། སྐྱིན་ཝེར་བ་ཤེས་རབ་དམ་པ། ཁྱི་ཐང་བ་ཡེ་ཤེས་དཔལ། དོལ་པོ་བ་བྱང་ཆུབ་སྙིང་པོ་བཅས་ནི་ཀ་བ་བཞི་དང་། ཝ་ཟན་པ་ཡོན་ཏན་ལེགས་པ། སྣུ་བུ་ལོ་ཙཱ་བ་བཟང་མཆོག གུར་ཤིང་པ་བརྩོན་འགྲུས་རྒྱལ་མཚན། མ་ནམ་པ་ཚུལ་ཁྲིམས་སྙིང་པོ། དགེ་ཐང་པ་དཔལ་གྱི་བྱང་ཆུབ། སས་པ་བ་གསེར་བཟང་། ཝ་གོ་བ་ཡོན་ཏན་ཤེས་རབ། སེང་དཀར་བ་བསོད་ནམས་ཤེས་རབ་བཅས་ནི་གདུང་མ་བརྒྱད་ཡིན་ནོ།།

༨.jpg

 བྲག་ཐོག་དགོན་གྱི་ལྡེབས་རིས།  ཁང་ཟླ་སྲས་ཀྱིས་པར་བླངས།

ལོ་ཙཱ་བའི་དུས་སྐབས་ཀྱི་ལྷ་ཁང་ཁག

          ལོ་རྒྱུས་ལྟར་ན། དུས་རབས་བཅུ་གཉིས་པའི་ནང་ལོ་ཙཱ་བ་དགོངས་པ་རྫོགས་ནས་ལོ་ཉིས་བརྒྱ་ཙམ་ལ། མངའ་རིས་སྐོར་གསུམ་གྱི་ནང་དུ་རྒྱལ་བསྟན་ཤུགས་ཆེར་དར་ནའང་། དེ་རྗེས་དུས་དབང་གིས་བསྟན་པ་ཉམས་ཏེ་ད་ཆ་སྐབས་དེའི་རྟེན་རྙིང་དང་། གཙུག་ལག་ཁང་དག་ནི་ཕལ་མོ་ཆེ་གྱང་རོ་ཙམ་དུ་གྱུར་ཡོད་པར་མ་ཟད། ལོ་ཙཱ་བ་ཉིད་ཀྱི་ཞལ་སློབ་དག་གིས་བཞེངས་པའི་གདན་ས་དག་ཀྱང་མིང་ཙམ་དུ་གྱུར་ཟིན་པ་ལས་འདིར་དཔེ་མཚོན་ཅུང་རེ་བགྲང་ན། ཨ་ལྕིིའི་ལྷ་ཁང་སོ་མའི་གྱང་རིས་སུ་མཁན་ཆེན་ཞི་འཚོ་དང་། སློབ་དཔོན་རིན་པོ་ཆེ་རྣམ་གཉིས་གཙོ་ལྷར་བཞེངས་པའི་ཁ་ཆེའི་བྲིས་མ། ཨ་ལྕི་ཚ་ཚ་པུ་རི་ཞེས་པའི་ལྷ་ཁང་གི་གྱང་ལྡེབས་སུ་དབུས་ན་རྡོར་དབྱིངས་ཀྱི་ཐུགས་འཁོར་དང་། དེའི་ཕྱོགས་བཞིར་སངས་རྒྱས་སྟོང་སྐུ་བཞུགས་པ། འདི་ཡང་ཁ་ཆེའི་བྲིས་མ་ཡིན། དེའི་ནང་དུ་བདེ་མཆོག་འཁོར་ལོ་དྲུག་བསྒྱུར་གྱི་དཀྱིལ་འཁོར་ཡང་བཞུགས་ཡོད།༣.jpg

དཔལ་མགོན་མཚོའི་མཛེས་སྡུག   ཡར་ཆབ་ཕོ་ཉས་པར་བླངས།

ཝ་མདའ་ལྷ་ཁང་། 

           འདིའི་ནང་རྟེན་གཙོ་བོ་ཐུགས་རྗེ་ཆེན་པོ་བཅུ་གཅིག་ཞལ་དང་། ཕྱག་བརྒྱད་པ་ཡིན། གཞན་ཡང་། ས་སྤོ་རྩེ་ལྷ་ཁང་དང་། གུ་རུ་ལྷ་ཁང་་སོགས་མང་དུ་ཡོད་ཅིང་། ད་ཡོད་ཨ་ལྕིའི་ལྷ་ཁང་གི་གྱང་ལྡེབས་སུ་ཀུན་རིག་རྣམ་པར་སྣང་མཛད་ཀྱི་ལྷ་ཚོགས་དང་། སྨན་བླ་བདེ་བཤེགས་བརྒྱད། མགོན་པོ་འོད་དཔག་མེད་སྲས་བྱང་སེམས་ཚོགས་ཀྱིས་བསྐོར་ནས་ཡོད་པ་བཅས་ཧ་ཅང་གསོན་ཉམས་དོད་པོས་བྲིས་ཡོད། ཨ་ལྕིའི་སྒོ་ཞོལ་སྟེང་དུ་ཤིང་ལས་བརྐོས་པའི་རྡོར་སེམས་ཀྱི་སྐུ་བརྙན་ཆུང་ངུ་ཞིག་བཞུགས་ཡོད། སུམ་བརྩེགས་ལྷ་ཁང་གི་སྐུ་རྟེན་གཙོ་བོ་གཅིག་ནི། འཕགས་པ་སྤྱན་རས་གཟིགས་ཡིན་ཞིང་། དེ་ཉིད་ཕྱག་བཞི་བའི་རྣམ་པར་བཞེངས་ཡོད། དེའི་སྐུ་ཤམ་དུ་རི་མོ་སྣ་ཚོགས་བྲིས་ཡོད།སྐུའི་རིང་ཚད་ལ་ཕི་ཏྲི་༡༤ཙམ་ཡོད་ཅིང་།སྐུ་མདོག་དཀར་པོ་དང་། ཕྱག་མཐིལ་དམར་ཞིང་།མགུལ་རྒྱན་དུ་མེ་ཏོག་སྔོ་དཀར་སྤེལ་མའི་ཕྲེང་བ་རིང་མོ་ཞིག་གིས་མཛེས་པར་བྱས་ཡོད།

         ལྷ་ཁང་དུ་འཇམ་དབྱངས་ཕྱག་བཞི་པ་བཞེངས་སྟབས་སུ་བཞུགས་པ་དང་། དེའི་སྐུ་སྨད་ཀྱི་ན་བཟར་གྲུབ་ཐོབ་བརྒྱད་ཅུ་རྩ་བཞི་བྲིས་ཡོད། གཞན་ཡང་ལྷ་ཁང་དེར་རྗེ་བཙུན་བྱམས་པ་བཞེངས་སྟབས་སུ་བཞུགས་པ་དང་། དེའི་སྐུ་སྨད་ཀྱི་ན་བཟར་སངས་རྒྱས་ཀྱི་མཛད་པ་བཅུ་གཉིས་བྲིས་ཡོད། ལྷ་ཁང་དེའི་སྤྱན་རས་གཟིགས་ཀྱི་གཡས་ཕྱོགས་སུ་བཞེངས་པའི་འཕགས་མ་ཡུམ་ཆེན་མོའི་སྐུ་བརྙན་ཞལ་གཅིག་ལ་ཕྱག་དྲུག་ཅན་དེའི་ཞལ་རས་ནི་ཧ་ཅང་གྲགས་ཆེ་བ་ཞིག་ཡིན། ལྷ་ཁང་གི་གྱང་རིས་སུ་རྒྱ་གར་གྱི་པཎ་ཆེན་རྣམས་དང་། སྐབས་དེའི་བོད་ཀྱི་ལོ་ཙཱ་བ་མཚོན་པའི་རི་མོ་བྲིས་ཡོད་ཅིང་། སྐབས་དེའི་རི་མོ་ལས་བོད་ཀྱི་ལོ་ཙཱ་བ་དགེ་སྦྱོང་གི་རྟེན་ཅན་དག་ལ་སྐུ་འགག་རང་མ་ཡིན་པའི་སྟོད་གོས་ཅུང་དམར་ཞད་ཅན་ཞིག་བྲིས་ཡོད། ད་དུང་ལྷ་ཁང་དེར། ལོ་ཙཱ་བ་རང་ཉིད་ཀྱི་སྲུང་མ་རྡོ་རྗེ་ཕྱི་མོ་བྱ་བ་བྲིས་ཡོད་ཅིང་། ཁོ་མོའི་ཞལ་ནི་སྔོ་ནག་དང་། ཕྱག་གཡས་སུ་རྡོ་རྗེ་དང་། གཡོན་ཏུ་ཐོད་པ་བཟུང་ཡོད།རྒྱན་དང་ལྡན་པའི་རྟ་མཆོག་སྔོ་ནག་ལ་བཅིབས་ཤིང་སྐུ་རྒྱབ་ཏུ་རྨ་བྱའི་སྒྲོ་མདོང་ལས་གྲུབ་པའི་སྟོད་གོས་བསྣམ་ཡོད། ལོ་ཆེན་རིན་ཆེན་བཟང་པོ་ཁོང་སྒེར་ལ་སྲུང་མ་ཞིག་ཡོད་པ་དེས་སྐབས་དེའི་བོད་ཀྱི་ལོ་ཙཱ་བ་ཚོ་རྒྱ་གར་དུ་ཆོས་ལེན་པར་ཕེབས་རིམ་བཞིན། ལམ་གྱི་བར་ཆད་སེལ་བ་དང་། ཆོས་མཐུན་གྱི་བྱ་གཞག་ལམ་འགྲོ་ཡོང་སླད་རང་ཉིད་སྐུ་སྒེར་གྱིས་དམིགས་བསལ་ཆོས་སྲུང་རེ་འདེམས་ནས་ཡོང་གི་ཡོད་པ་དེ་ཡང་ཧ་ཅང་སྤྱི་འགྲོས་ཤིག་ཏུ་གྱུར་མེད་དམ་སྙམ།༡༩.jpg

ཀླུ་འཁྱིལ་དགོན།  ཁང་ཟླ་སྲས་ཀྱིས་པར་བླངས།

         འདི་ནི་གླེ་ནས་སྤྱི་ལེ་༥༢གྱི་སར་ཡོད་ཅིང་། ཆོས་བརྒྱུད་དགེ་ལྡན་པ་ཡིན་ཞིང་། བསྟན་བདག་ནི་མངའ་རིས་རིན་པོ་ཆེ་སྐུ་ཕྲེང་རིམ་བྱོན་ཡིན། ལ་དྭགས་དགོན་པ་སྤྱི་མཚུངས་ལྟར་དགོན་པའི་ནང་རྟེན་དང་། བཀའ་ཤོག་སོགས་རིགས་དངོས་རྙིང་པ་ཁག་འགྲེམ་སྟོན་བྱས་ཡོད་ཅིང་། ང་ཚོ་གནས་མཇལ་སྐབས་ཀྱང་འཇིགས་བྱེད་ཀྱི་སྒྲུབ་མཆོད་དབུ་འཛུགས་ཆེད་དགེ་འདུན་པ་བགྲེས་པ་འགས་རྡུལ་ཚོན་གྱི་དཀྱིལ་འཁོར་བཞེངས་བཞིན་ཡོད། བསྟན་སྲུང་གཙོ་བོ་ནི་བསེ་ཁྲབ་ཡིན་ཞིང་། ལོ་རེའི་དུས་མཆོད་ཆེ་ཤོས་དེ་གཏོར་མོ་ཆེ་ཞེས་པ་དེ་ཡིན་པར་བཤད། དགོན་པའི་རྒྱབ་ཏུ་བྱམས་སྐུ་ཐེག་ཧ་ཅང་ཆེན་པོ་ཞིག་ཡོད་པ་དེ་དུས་ཕྱིས་བཞེངས་པའི་ལ་དྭགས་ཀྱི་སྐུ་ཆེ་ཤོས་ཡིན་ཟེར།༡༨.jpg

 དཔེ་ཐུབ་དགོན།  ཁང་ཟླ་སྲས་ཀྱིས་པར་བླངས།

          འདི་ནི་རྒྱལ་ས་གླེ་ནས་སྤྱི་ལེ་༨གྱི་སར་བྲག་རྩེ་ཧ་ཅང་ཉམས་དགའ་བ་ཞིག་ན་ཡོད་ཅིང་། ཆོས་བརྒྱུད་ནི་དགེ་ལྡན་པ་ཡིན།དགོན་པའི་མཚན་ལ་དགའ་ལྡན་དར་རྒྱས་གླིང་ཞེས་འབོད། དུས་རབས་བཅུ་བཞི་པའི་ནང་བླ་མ་ལྷ་དབང་བློ་གྲོས་བྱ་བས་བཞེངས།བསྟན་བདག་ནི། ཉེ་བའི་དུས་རབས་ནང་ལ་དྭགས་པ་ཡོངས་ལ་ཆོས་སྲིད་གཉིས་ཐད་ནས་བཀའ་དྲིན་གཞལ་མཐའ་བྲལ་བ་རྒྱལ་སྲས་བ་ཀུ་ལ་རིན་པོ་ཆེ་སྐྱེ་ཕྲེང་རིམ་བྱོན་ཡིན་ཞིང་། དགོན་པའི་སྒྲོལ་མ་ལྷ་ཁང་དུ་རྟེན་གཙོ་རྒྱང་རྩེ་ནས་གདན་ཞུ་བྱས་པའི་སྒྲོལ་སྐུ་བྱིན་ཅན་བཞུགས།དགོན་པའི་དུས་མཆོད་ཆེ་ཤོས་དེ་དཔེ་ཐུབ་དགུ་གཏོར་ཡིན། ཉིན་དེར་ཆོས་རྒྱལ་ཡུབ་ཡུམ་སོགས་ཀྱི་གར་འཆམས་རྒྱས་པ་བྱེད་སྲོལ་ཡོད། དགོན་འདིའི་ལྷ་མོ་ཁང་ནི་དམིགས་བསལ་དད་ལྡན་ཚོས་ཡིད་ཆེས་བྱ་ཡུལ་ཞིག་ཡིན་པས། རྒྱ་གར་བ་སོགས་ཀྱང་ལྷ་མོ་ཁང་དུ་རྒྱུན་པར་ཡོང་གི་ཡོད། བ་ཀུ་ལའི་མཚན་ཅན་གྱི་ལ་དྭགས་གནམ་ཐང་ཡང་དཔེ་ཐུབ་དགོན་པའི་མདུན་ངོས་སུ་ཆགས་ཡོད།ོོོོ.jpg

 ཕྱི་དབང་དགོན།   ཁང་ཟླ་སྲས་ཀྱིས་པར་བླངས།

         འདི་ནི་གླེ་ནས་སྤྱི་ལེ་༡༧གྱི་སར་ཡོད་ཅིང་། ཆགས་ཡུལ་ལུང་པའི་མིང་ལ་ཕྱི་དབང་ཞེས་འབོད། འོན་ཀྱང་། ཕྱི་དབང་ཞེས་འབོད་དོན་ཅི་ཡིན་ནི་གསལ་པོར་མ་ངེས། ཆོས་བརྒྱུད་འབྲི་གུང་པ་ཡིན། དགོན་པའི་མཚན་ཆ་ཚང་ལ་བཀྲ་ཤིས་ཆོས་རྫོང་ཞེས་འབོད། ཆོས་རྗེ་གནད་མ་ཀུན་དགའ་གྲགས་པ་བྱ་བས་ཕྱག་བཏབ་ཅིང་།ཆོས་རྗེ་རྟོགས་ལྡན་སྐུ་ཕྲེང་ན་རིམ་གྱིས་དགོན་བདག་མཛད། དགོན་འདིའི་གཙུག་ཁང་རྙིང་མར་ཐུབ་དབང་སོགས་ལྡེབས་བྲིས་འགའ་ནི་ཁ་ཆེའི་ལུགས་སུ་བྲིས་ཤིང་། ད་བར་ལོ་བདུན་བརྒྱ་མ་ཟིན་ཙམ་གྱི་ལོ་རྒྱུས་ཡོད་ཟེར།ལོ་རེའི་དུས་མཆོད་གཙོ་བོ་ནི་སྒང་སྔོན་ཚེ་སྒྲུབ་བྱ་བ་ཡིན་ཞིང་། དེ་སྐབས་སྲུང་མའི་གཙོ་བོ་ཨ་ཕྱི་ཆོས་ཀྱི་སྒྲོལ་མའི་འབག་འཆམ་སོགས་བྱེད་སྲོལ་ཡོད། ད་དུང་དགོན་འདིའི་མགོན་ཁང་དུ་དེ་སྔོན་སོག་དམག་ལ་དྭགས་སུ་འབྱོར་བ་དག་གི་མཚོན་ཆ་ཡང་བཞག་ཡོད།༧༧༧༧.jpg

 དཔལ་མགོན་མཚོ།   ཁང་ཟླ་སྲས་ཀྱིས་པར་བླངས།

          མཚོ་འདི་ནི་ཅང་ལ་བརྒལ་ཏེ་སོང་ན། གླེ་ནས་སྤྱི་ལེ་༡༥༠སར་ཡོད་ཅིང་། ཨེ་ཤ་ཡའི་ནང་གི་མཚོ་ཆེ་ཤོས་ཀྱི་གྲས་ཡིན། མཚོ་འདི་ཞིང་ཚད་དེ་ཙམ་རིང་པོ་མིན་ནའང་། རིང་ཚད་མི་ཏྲར་༤༤༢༠ཙམ་ཡོད་པར་བཤད། མཚོ་འདིའི་མཐའ་སྐོར་ཡོངས་རྫོགས་བྲག་རི་དཀར་རྐྱང་གིས་བསྐོར་ནས་ཡོད་ཅིང་། ཉི་མའི་འོད་ཟེར་འཆར་སྟངས་ཀྱིས་མཚོ་མདོག་མི་འདྲ་བ་སྣ་ཚོགས་སྣང་གི་ཡོད། སྤྱིར་བཏང་གིས་མཚོ་འཁྱིལ་ཕལ་མོ་ཆེ་ཚྭ་ཁུ་མིན་ནའང་། མཚོ་འདི་ནི་རྒྱ་མཚོ་ལྟར་ཚྭ་ཁུ་རང་གིས་གྲུབ་ཡོད། མཚོ་ཡི་ནུབ་རིར་ངོས་གང་སར་ཡུལ་སྐོར་བ་དག་གི་ཆེད་སྡོད་གནས་ཧ་ཅང་མང་ཞིང་། ཕལ་མོ་ཆེས་ནི་ཚད་གཞི་འདྲ་མིན་གྱི་སྡོད་གུར་ཕུབ་ཏེ་རང་རང་གི་མགྲོན་པོ་དག་སྣེ་ལེན་བྱེད་ཀྱི་ཡོད། སྔ་དགོང་གང་གཉིས་ཀར་མཚོ་འགྲམ་དུ་སྤྲོ་འཁྱམས་ལ་སོང་ན་། མཚོ་མོ་རླུང་གིས་སྐྱོམ་པའི་རླབས་ཀྱི་འགྱུར་བ་ངོ་མཚར་བ་དག་མཐོང་ཐུབ་པར་མ་ཟད།ཉི་ཟེར་གྱིས་མཚོ་མདང་འགྱུར་ཏེ་ལན་རེར་སྔོ་ནག་དང་། ལན་རེར་སྐྱ་བོ།སྐབས་རེར་སྔོན་རྐྱང་བཅས་པའི་སྣང་ཚུལ་དེས་ཡུལ་སྐོར་བ་དག་གི་ཡིད་དབང་འགུག་བཞིན་ཡོད་ཅིང་། དེ་ནི་ཐག་རིང་ནས་ཡོང་བའི་ཡུལ་སྐོར་བ་དག་གི་རྨི་ལམ་ཡང་ཡིན།༡༡༡༡༢༢.jpg

   བྲག་ཐོག་དགོན་པ།     ཁང་ཟླ་སྲས་ཀྱིས་པར་བླངས།

       འདི་ནི་གླེ་ནས་སྤྱི་ལེ་༥༠སར་ཡོད་ཅིང་། ཨོ་རྒྱན་གྱི་སློབ་དཔོན་པདྨ་འབྱུང་གནས་བོད་དུ་ཕེབས་སྐབས་གནས་འདིར་སྐུ་མཚམས་མཛད་ཅིང་། དེའི་སྒྲུབ་ཕུགས་རྨང་གཞིར་བྱས་ཏེ་དགོན་པ་ཧྲིལ་པོ་བྲག་ཐོག་ཏུ་ཆགས་ཡོད་པས། བྲག་ཐོག་དགོན་ཞེས་མཚན་ཐོག་པར་བཤད། ཀ་ཐོག་རིག་འཛིན་ཆེན་པོའི་སྐབས་ཤིག་ཏུ་ཕྱག་བཏབ། འདི་ནི་ལ་དྭགས་ཀྱི་རྙིང་མའི་དགོན་པ་གཅིག་པུ་དེ་ཡིན།༢༢༢.jpg

ཉར་མའི་གཙུག་ལག་ཁང་། ཡར་ཆབ་ཕོ་ཉས་པར་བླངས།

         འདི་ནི་གླེ་ནས་སྤྱི་ལེ་༢༠ཙམ་གྱི་སར་ཡོད་ཅིང་། འདི་ནི་ལོ་ཆེན་རིན་ཆེན་བཟང་པོས་ཕྱག་བཏབ་པའི་གདན་ས་གསུམ་གྱི་ནང་ཚན། ལ་དྭགས་ནང་གི་སློབ་གཉེར་གྱི་སྡེ་རྙིང་ཤོས་དེ་ཡིན། ཉར་མ་ནི་དགོན་པ་ཙམ་མིན་པར། ཐོས་བསམ་སློབ་གཉེར་གྱི་ཁོར་ཡུག་གཙང་མ་ཡོད་ས་ཞིག་ཡིན་པར་སྣང་སྟེ། ཨ་ལྕེ་བཞེངས་པ་པོ་སྐལ་ལྡན་ཤེས་རབ་ཀྱང་ཉར་མ་ནས་སློབ་གཉེར་མཐར་ཕྱིན་པའི་སྐོར་གྱང་ལྡེབས་ཡི་གེ་དེར་གསལ་ཡོད། ཉར་མ་ན་ལྷ་ཁང་དཀར་མོ་དང་། དཀྱིལ་འཁོར་ལྷ་ཁང་། ལྷ་ཁང་ཆེན་མོ། མཆོད་རྟེན་སྣ་ཚོགས་སོགས་སྔོན་དུས་འཛུགས་སྐྲུན་མང་པོ་ཞིག་བྱས་ཡོད་པར་སྣང་ཡང་། ད་ལྟའི་ཆར་ནི་དེ་དག་གི་གྱང་གོག་ཞིག་རོ་དང་། མཆོད་རྟེན་རྙིང་པ་ཞིག་གི་ནང་གྱང་ལྡེབས་སུ་ཁ་ཆེའི་ལུགས་ཀྱི་རི་མོ་བྲིས་པ་དག་གི་རྗེས་ཤུལ་ཧ་ཅང་ཉམ་ཆག་ཏུ་གྱུར་པ་ཕྲན་བུ་རེ་ལས་མཇལ་རྒྱུ་མེད། དེང་ནི་ཉར་མའི་གཙུག་ལག་ཁང་གི་རྗེས་ཤུལ་ཁྲིག་སེ་དགོན་པའི་ཡན་ལག་བཙུན་དགོན་གྱིས་གཟིགས་རྟོགས་འོག་ཡོད་ཅིང་། བཙུན་དགོན་དེར་བཙུན་མ་རྒན་གྲས་བཅུ་གྲངས་བཞུགས་ཡོད།༡༦.jpg

  སེང་གེ་ཁ་འབབ་དང་རྟ་མཆོག་ཁ་འབབ་འདྲེས་མཚམས། ཁང་ཟླ་སྲས་ཀྱིས་པར་བླངས།
  ལ་དྭགས་ཀྱི་མཁར།

         བྱུང་རབས་ཀྱི་ངོས་ནས་ལ་དྭགས་རྒྱལ་པོས་དབང་བསྒྱུར་མ་བྱས་གོང་ཇོ་རབས་ཞེས་པ་དར་བར་སྣང་སྟེ། ལོ་རྒྱུས་ཀྱི་ཡི་གེ་རྣམས་སུ་སྟོད་དུ་རྒྱ་པ་ཇོ་གྲགས་ཆེ་བ་དང་། སྨད་དུ་ཝ་མདའིི་ཇོ་བྷག་དར་སྐྱབས་གྲགས་ཆེ་ཞེས་དང་། ཏི་རི་ཇོ། ཚྭ་ཁའི་ཇོ། ཝ་ཁའི་ཇོ་ལྟ་བུ་དཔའ་མཛངས་གཉིས་ལྡན་གྱི་ཇོ་རབས་མང་དུ་བྱུང་བར་བཤད། དེ་དག་གི་སྐབས་སུ་དམིགས་བསལ་གཏན་འཇོགས་ཀྱི་སྡོད་གནས་སླད་མཁར་ལས་བྱས་པའི་ལོ་རྒྱུས་མ་མཇལ་ཡང་། ཕྱིས་སུ་བོད་བཙན་པོའི་གདུང་བརྒྱུད་དྲི་མ་མེད་པ་སྐྱིད་ལྡེ་ཉི་མ་མགོན་གྱི་སྲས་ཆེ་བ་ལྷ་ཆེན་དཔལ་གྱི་མགོན་ནི། ལ་དྭགས་སྤྱིའི་རྒྱལ་པོ་ཐོག་མ་ཡིན། དེ་ནས་བཟུང་ཕྱི་ལོ་༡༠༠༠ནས་༡༨༢༤བར་ཏེ་མི་ལོ་ཧྲིལ་པོ་བརྒྱད་བརྒྱའི་རིང་བཙན་པོའི་གདུང་བརྒྱུད་ཀྱིས་ལ་དྭགས་ལ་དབང་བསྒྱུར་བྱས་ཡོད་ཅིང་། དེ་དག་གིས་རང་གི་སྐབས་སུ་བྲག་རྩེ་དང་། ལ་སྐེད་དུ་བཞེངས་པའི་མཁར་དག་ནི་ད་ལྟ་གྱང་རོ་ཙམ་ལས་མཇལ་རྒྱུ་མེད། ཕྱི་ལོ་༡༨༣༤ནས་ལ་དྭགས་ཧྲིལ་པོ་ཁ་ཆེའི་མངའ་འོག་ཏུ་ཤོར་བ་ནས་བཟུང་ལ་དྭགས་ཀྱི་རྒྱལ་རྒྱུད་ཏོག་མཁར་དུ་བཞུགས་ཤིང་། དེའི་མྱི་རྒྱུད་ཕྱི་མ་དག་ལ་ཕྱི་ལོ་༡༨༤༢ལོར་མང་སྤྲོ་མཁར་བརྩེགས་པར་སྣང་།

༦༦༦༦༦༦.jpg

   མཁར་གྱི་ཁྱད་ཆོས།

          མཁར་ཞེས་པ་ནི་ས་རྡོས་བརྩིགས་པའི་སྡོད་ཁང་གི་སྤྱི་མིང་ལྟ་བུ་ཡིན་ནའང་། ལན་རེར་མཁར་ཞེས་པ་གྲོང་ཁྱེར་དུ་ཡང་གོ་རུང་བ་ཡིན། གནའ་སྔ་མོར་རྒྱལ་ཕྲན་སོ་སོའི་ཁྱབ་ཁུངས་འཛིན་སྐྱོང་དང་། གཞན་གྱི་བཙན་འཛུལ་དང་དམག་འཐབ་སོགས་ཕྱི་དགྲ་ལས་གཡོལ་ཆེད་རི་མཐོ་སར་ས་རྡོའི་སྡོད་ཁང་བརྩིགས་ཏེ། དེའི་ནང་སོ་ལྟ་ཁང་དང་། དབྱིབས་འདྲ་མིན་གྱི་སྐར་ཁུང་བཟོས་ཏེ་རྒྱང་རིང་ནས་དགྲ་བོའི་གནས་བབ་ལ་ཉེན་སྲུང་གི་ཁྱད་ཆོས་ཡོད་པ་བྱས་ཡོད། ལ་དྭགས་ཀྱི་ཕྱོགས་ཀྱི་ད་ཡོད་མཁར་དག་ཀྱང་རི་བོ་མཐོ་དང་།བྲག་རྫོང་བརྟན་ས་འབའ་ཞིག་ལ་བཟོས་ཡོད་ཅིང་། ད་ཡོད་མཁར་འགའ་ཞིག་འདིར་དཔེ་མཚོན་ཙམ་དུ་བཀོད་ན།ཤེལ་ན་ཁའི་ལྷ་ཆེན་དཔལ་མགོན་མཁར།གླེ་རྩེ་མོ་ཡི་གྲགས་པ་འབུམ་ལྡེ་དང་།བཀྲ་ཤིས་རྣམ་རྒྱལ་གྱི་མཁར། གྲགས་པ་འབུམ་ལྡེས་བཞེངས་པའི་བ་མགོའི་མཁར་རབ་བརྟན་ལྷ་རྩེ།གཏིང་སྒང་མཁར། ས་ནི་མཁར། གཅིག་བརྟན་རོ་ཟི་མཁར། རྒྱལ་པོ་སེངྒེ་རྣམ་རྒྱལ་གྱིས་བཞེངས་པའི་གླེ་ཆེན་དཔལ་མཁར། རྒྱལ་པོ་བདེ་ལྡན་རྣམ་རྒྱལ་གྱིས་བཞེངས་པའི་ཤེལ་མཁར་ཕོ་བྲང་།ཉི་མ་རྣམ་རྒྱལ་གྱིས་བཞེངས་པའི་ལྕགས་ར་སའི་མཁར། རྒྱལ་པོ་ཚེ་དཔལ་དོན་གྲུབ་རྣམ་རྒྱལ་གྱིས་ཕྱི་ལོ་༡༨༢༢ལོར་བཞེངས་པའི་ཏོག་མཁར་སོགས་ཞིག་རལ་དུ་གྱུར་པའི་མཁར་རྙིང་མང་དུ་ཡོད། མཁར་འདི་དག་ལ་དུས་རབས་སོ་སོའི་ལོ་རྒྱུས་ཀྱི་འཕེལ་འགྱུར་སྣ་ཚོགས་བཤད་རྒྱུ་ཡོད་པར་མ་ཟད། ཕྱི་རབས་པ་ཚོར་ཆོས་དང་།སྲིད་ལུགས་དར་རྒུད་ཀྱི་བྱུང་བ་ཉམས་ཞིབ་ཐད་རིན་ཐང་ངེས་ཅན་ཡོད་པར་སྣང་། མིག་སྔའི་ལ་དྭགས་ཀྱི་རྒྱལ་ཁང་ངམ། མཁར་ས་ཕལ་མོ་ཆེ་བྲག་རྩེར་བརྩིགས་པ་དེ་ཡང་། དེ་སྔོན་རྒྱལ་ཕྲན་དང་། ཚོ་ཁག་ཕན་ཚུན་བར་དམག་འཐབ་ཀྱི་ཉེན་ཟོན་དང་། དེའི་དགོས་མཁོར་དམིགས་ཏེ་ཁྱད་ཆོས་མི་འདྲ་བའི་མཁར་སྣ་ཚོགས་བརྩིགས་པ་ནི་གསལ་པོར་སྣང་།oooooo.jpg

 ལ་དྭགས་ཀྱི་མ་ཎི་རྡོ་བརྩེགས།

         ཁྱོད་རང་ལ་དྭགས་ཀྱི་ཡུལ་གང་དུ་སོང་ཡང་། དཀྱུས་རིང་པའི་མ་ཎིའི་རྡོ་བརྩེགས་མང་པོ་མཇལ་ཐུབ། དེ་ནི་མི་སྟོང་ཕྲག་རིང་ཉལ་ཚགས་བྱས་པའི་དད་གུས་ཀྱི་རྡོ་རིང་ཞིག་ཡིན་ཆོག་སྟེ། མ་ཎིའི་རྡོ་བརྩེགས་ཕྲན་བུ་ཞིག་བཟོ་བར་དཀའ་ངལ་གྱི་བརྒྱུད་རིམ་ག་འདྲ་ཞིག་དང་ལེན་དགོས་པ་དེ་ང་ཚོས་བསམ་ཤེས་ཐུབ་པ་ཡིན། དེ་བས་ཀྱང་ལ་དྭགས་ཀྱི་མ་ཎི་རྡོ་བརྐོས་འདིའི་རྒྱབ་ལྗོངས་སུ་དམིགས་བསལ་གྱི་གཏམ་རྒྱུད་ཅིག་ཀྱང་སྤས་ཡོད་དེ། སྔོན་ལ་དྭགས་ཀྱི་རྒྱལ་པོ་ཞིག་རང་གི་བློན་པོའི་བཙུན་མོ་མཛེས་མ་ཞིག་ཡོད་པར་ཡིད་ཆགས་ཏེ། དེ་ཉིད་ཐོབ་སླད་བྱ་བ་སྣ་ཚོགས་བརྩམས་ཀྱང་བཙུན་མོའི་ཡིད་མ་ཁུག་པར་མཐར་བླུན་པོ་ཐབས་ཀྱིས་བཀྲོངས། དེ་རྗེས་བཙུན་མོར་ད་ཁྱོད་གཅིག་པུར་སྡོད་པ་མི་འོས་པས་ངའི་བཙུན་མོར་ཤོག་ཅིག་ཅེས་བཀའ་བསྒོས་པ་ན། ཤེས་རབ་ཅན་གྱི་བཙུན་མོ་དེས་རྒྱལ་པོ་ལགས། གུས་མོའི་ཁྱོ་བོ་འདས་པོའི་ཆེད་མ་ཎིའི་རྡོ་བརྐོས་རིང་མོ་ཞིག་བྱ་དགོས་ཤིང་དེ་ཉིད་གྲུབ་ན་གུས་མོ་ཡོང་ཆོག་ཞུས་པས། རྒྱལ་པོས་མི་མང་བསྐུལ་ཏེ་བླུན་པོའི་དགེ་རྩར་མ་ཎིའི་རྡོ་རིང་བརྩིགས་ཤིང་། བཙུན་མོས་རྡོ་རིང་གི་དཔེར་ལ་དྭགས་ཀྱི་བུད་མེད་ཚོའི་མགོ་རྒྱན་གྱི་གཞུང་རྟ་དམར་པོ་དབྱིབས་གྲུ་བཞི་མ་ལྟ་བུ་ཞིག་དགོས་ཞེས་ཞུས་པས། མ་ཎིའི་རྡོ་བརྩེགས་ཀྱི་རྨང་གཞི་བཙུན་མོའི་རེ་བ་ལྟར་བཟོས་པར་བཤད། ད་ཡོད་ཀྱི་མ་ཎིའི་རྡོ་བརྩེགས་ཕལ་་མོ་ཆེ་ཡང་རྨང་གཞི་དཀྱུས་རིང་པའི་རྡོ་བརྩེགས་གྲུ་བཞི་མ་ཅན་ཁོ་ནར་སྣང་། མ་ཎིའི་རྡོ་བརྩེགས་གྲུབ་པ་དང་། བློན་པོའི་བཙུན་མོ་ཤེས་རབ་ཅན་དེས་རང་གི་སྐྲ་ལོ་བཅད་ནས་རྒྱལ་པོར་བསྐུར་ཏེ། ད་ནི་འཇིག་རྟེན་གྱི་ཆོས་ལ་ཡིད་བྱུང་བས་བཙུན་མ་བྱས་ཏེ་རི་ཁྲོད་དུ་ལྷ་ཆོས་བྱེད་དུ་སོང་ཡོད་ཅེས་བསྐུར་བས། རྒྱལ་པོ་ཅི་བྱ་གཏོལ་བྲལ་དུ་གྱུར་བར་བཤད། ངས་ནི་གཏམ་རྒྱུད་འདི་འདི་ཧ་ཅང་སྙན་པོར་མཐོང་སྟེ་འདིའི་ལོ་རྒྱུས་ཀྱི་ཡི་གེ་རྡོ་ལ་བརྐོས་པ་ལ་དྭགས་ཀྱི་གྲྭ་རྒན་འགས་མཇལ་མྱོང་བའི་ངག་སྒྲོས་གཞིར་བཟུང་གིས་བྲིས་པ་ཡིན་པས་ཁོམ་པ་ཅན་ཚོས་ཞིབ་ཏུ་དཔྱད་འཚལ།༠༠༠༠.jpg

དཀར་བོང་བོང་གི་མཆོད་རྟེན།        ཁང་ཟླ་སྲས་ཀྱིས་པར་བླངས།

          མཆོད་རྟེན་ནི་ནང་པ་སངས་རྒྱས་པའི་ཆོས་ལུགས་ཀྱི་སྟོན་པ་རྗེས་དྲན་གྱི་རྡོ་རིང་ལྟ་བུ་ཡིན་ཞིང་། མི་གྲངས་ཕལ་མོ་ཆེ་ནང་པ་ཡིན་པའི་ལ་དྭགས་ལ་མཚོན་ན། ལ་རྩེ་དང་། གངས་འདབས། མཚོ་ཁ། རྩྭ་ཐང་། སྤང་གཞུང་། གཙང་འགྲམ་གང་སར་མཆོད་རྟེན་མཇལ་རྒྱུ་ཡོད། དེ་བས་ཀྱང་ལ་དྭགས་ཀྱི་མཆོད་རྟེན་ཕལ་ཆེ་བ་ནི། རྩ་བ་གྲུ་བཞི་བྱས་ཤིང་ཆེ་ཆུང་འདྲ་མིན་སྣ་ཚོགས་སུ་ཡོད་ཅིང་། མང་པོ་ཞིག་ནི་དཀར་བོང་བོང་ཟླུམ་གཟུགས་སུ་ཡོད་པ་ཙམ་ལས་མཆོད་རྟེན་བྱིངས་ཀྱི་དབྱིབས་དང་མི་འདྲ་བར་ཡོད།--------.jpg

          ཁྱད་པར་དུ་ཨ་ལྕིར་བཞུགས་པའི་མཆོད་རྟེན་དེ་དག་ནི། ལ་དྭགས་ཀྱི་མཆོད་རྟེན་བྱིངས་དང་མི་འདྲ་བ་ཡོད་དེ།ཕྱི་ནས་མཆོད་རྟེན་འདྲ་བའི་ཁང་པ་ཟླུམ་པོ་རེའི་ནང་མཆོད་རྟེན་ཧྲིལ་པོ་རེ་བཞུགས་ཡོད། ཟླུམ་གཟུགས་ཅན་དེ་ནི་མཆོད་རྟེན་གྱི་ཆར་ཁེབས་ལྟ་བུར་གྱུར་ཡོད་ཅིང་། དེའི་ནང་ངོས་ཀྱི་ཟུར་བཞིར་སངས་རྒྱས་དང་། རི་དྭགས་ཆོས་འཁོར།མཐའ་ཧྲིལ་པོར་མེ་དཔུང་གི་དབུས་སུ་རྡོ་རྗེའི་ཕྲེང་བ། ཟུར་རེར་མཆོད་པའི་ལྷ་མོ་སོགས་སྔོ་དཀར་དམར་གསུམ་གྱི་ཚོན་རྩི་སྤྱད་དེ་རི་མོ་སྣ་ཚོགས་བྲིས་ཡོད། གྲོང་ཁྱིམ་དག་གི་གཡས་གཡོན་ན་བཞེངས་པའི་མཆོད་རྟེན་ཕལ་མོ་ཆེར་བང་རིམ་དང་། ཆོས་འཁོར་བཅུ་གསུམ་སོགས་ཀྱི་རྒྱས་སྤྲོས་མཇལ་རྒྱུ་མེད་པ་ནི། རི་མཐོ་ས་གཙང་གི་འཇིག་རྟེན་འདིར་མཆོད་རྟེན་བཞེངས་པར་མཐུན་རྐྱེན་ཚད་ལྡན་ཞིག་མེད་སོང་བས་ཡིན་ངེས།འོན་ཀྱང་། ལ་ལུང་གང་ལྟར་དཀར་བོང་བོང་གི་མཆོད་རྟེན་མཇལ་རྒྱུ་ཡོད་པ་དེས། གནའ་མྱི་རུས་པ་ཅན་དེ་དག་གི་དཀའ་སྤྱད་ཀྱི་སྙིང་སྟོབས་དྲན་འོང་ཞིང་། ཁྲ་ཁྲ་ཟང་ཟིང་ལ་མགོ་བོ་འཁོར་བའི་དེང་གི་སྐྱེ་བོ་ཚོས་ནི་ཁོང་ཚོའི་རྒྱུ་འབྲས་བཀུར་བའི་སྙིང་སྟོབས་རྣལ་མ་དེ་ངོས་ཟིན་དཀའ་བར་སྣང་།པཔ.jpg

དེང་རབས་ཀྱི་ལ་དྭགས།  ཁང་ཟླ་སྲས་ཀྱིས་པར་བླངས།

         བྱུང་རབས་ཀྱི་ངོས་ནས་སྐུ་ཞབས་པ་ཀུ་ལ་རིན་པོ་ཆེའི་དཀའ་སྤྱད་དང་། ཕྱོགས་སུ་མ་ལྷུང་བའི་ཐུགས་རྗེའི་གཟིགས་སྐྱོང་འོག་མང་ཡུལ་ལ་དྭགས་ཀྱི་ཆེས་ཐོག་མའི་ཤེས་ཡོན་ཅན་གྱི་མི་སྣ་ཁག་རིམ་གྱིས་སྤྱི་ཚོགས་ཁྲོད་འབུར་ཐོན་བྱུང་ཞིང་། དེ་དག་གིས་རང་མི་རིགས་ཀྱི་སྐད་ཡིག་དང་། རིག་གནས། དད་མོས། ཆབ་སྲིད་འཛིན་སྐྱོང་བཅས་ལ་གཅེས་སྤྲས་དང་འགན་འཁུར་གྱི་འདུ་ཤེས་ངོས་ཟིན་པ་བྱས་ཡོད་ཅིང་། ད་ལྟའི་ཆར་ལ་དྭགས་ཁྱོན་ཡོངས་སུ་གཞུང་འབྲེལ་དང་གཞུང་འབྲེལ་མ་ཡིན་པའི་སློབ་གྲྭ་ཆེ་ཆུང་སུམ་བརྒྱ་ལྷག་ཡོད། ལ་དྭགས་དབུས་མཚན་ཉིད་སློབ་གྲྭ་གཅིག་པུར་ཡན་ལག་སློབ་གྲྭ་ལྔ་བཅུ་བརྒལ་བ་བྱུང་ཡོད་ཅིང་། སྤྱིའི་ཆ་ནས་བཤད་ན། ལ་དྭགས་ཀྱི་མི་རབས་གསར་པ་དག་ནི་ཡིག་རྨོངས་ཀྱི་གནས་བབ་ལས་རྦད་དེ་གྲོལ་ཡོད།

 ལ་དྭགས་ཀྱི་ཁམ་བུ།

          ལ་དྭགས་ཀྱི་ས་ཆའི་བརྒྱ་ཆ་བདུན་ཅུ་ལྷག་ཚོན་མདང་སྣ་ཚོགས་པའི་བྲག་རི་ཡིན་པས། བཟའ་འབྲུའི་ཐོན་ཁུངས་ཀྱི་ཆ་ནས་རང་ཁ་རང་གསོ་ཐུབ་ཙམ་ལས་ཚོང་ཟོག་ཕྱིར་འདྲེན་ཐད་དེ་ཙམ་ཤུགས་རྐྱེན་མེད་ནའང་། ལ་དྭགས་ཀྱི་ཁམ་བུ་ནི། ལ་དྭགས་ཙམ་མ་ཟད་ཁ་ཆེ་དང་། རྒྱ་གར་ཡུལ་དབུས།བོད། བལ་ཡུལ། སོག་པོ་སོགས་ལུང་པ་མང་པོའི་ནང་སྐད་གྲགས་ཅན་ཞིག་ཡིན་ཞིང་། གནའ་སྔ་མོ་ནས་བོད་དུ་མངའ་རིས་ཁམས་བུ་ཞེས་གྲགས་ཆེ་བར་བཤད། ཁྱད་པར་དུ་དབྱར་ཟླ་བདུན་པར་གླེ་རྒྱལ་སའི་གྲོང་ཁྱིམ་དང་། མགྲོན་ཁང་གི་གཡས་གཡོན་གང་དུ་སོང་ཀྱང་། ཁམ་སྡོང་གི་དག་གི་ངོས་སུ་ཁམ་བུ་དམར་པོ་དང་། དམར་སེར།སེར་སྐྱ། ཟང་སྐྱ་སོགས་ཁ་དོག་འདྲ་མིན་མཐོང་རྒྱུ་ཡོད་ཅིང་། ཁྱོན་ལ་དྭགས་ཀྱི་ཁམ་བུ་འདྲ་མིན་བཅུ་གྲངས་ཤིག་ཡོད། ཡུལ་སྐོར་ཧ་ཅང་མང་པའི་སྲང་ལམ་གྱི་གཡས་གཡོན་གང་སར། ལོ་རེའི་ཁམ་བུ་གསར་པ་ཚོང་མཁན་གྱི་བུད་མེད་ཚོས་བང་བསྒྲིགས་ནས་ཁམ་བུ་འཚོང་བཞིན་པ་མཐོང་ཐུབ།ད་དུང་། སྔར་ལོ་ནས་ཉི་མར་སྐམ་ཏེ་ཉལ་ཚག་བྱས་པའི་ཁམ་བུ་དག་འགྱིག་དྲིལ་བྱས་ཏེ་འཚོང་གི་ཡོད་ཅིང་། མདོག་དམར་ནག་ཏུ་གྱུར་ཟིན་པའི་ཁམ་བུ་དེ་དག་ནི། རྒྱ་མ་རེར་ཧིན་སྒོར་དྲུག་བརྒྱ་ལྷག་རེ་གནས་ཀྱི་ཡོད། ཁམ་བུར་ཡང་ནང་བཅུད་བྱུང་ཟིན་པ་དང་། ཚོན་རྩིས་བྱུག་ཟིན་པ་སོགས་འདྲ་མིན་སྣ་ཚོགས་ཡོད་ཅིང་། ལ་དྭགས་ཀྱི་ཁམ་བུ་ཞེས་ཡུལ་སྐོར་བ་ཚོས་ཧ་ཅང་དགའ་མོས་བྱེད་ས་ཞིག་ཡིན།

ལ་དྭགས་ཀྱི་ཁ་ཆེ།

                  ཕྱི་ལོ་༡༨༤༠ཙམ་ནས་ལ་དྭགས་མི་མང་གི་རང་དབང་ཀཱཤིསྨིར་གྱི་མངའ་འོག་ཏུ་ཤོར་བ་ནས་བཟུང་། ལ་དྭགས་ཀྱི་མི་རིགས་ཁྲོད་ཁ་ཆེའི་ཆོས་བརྒྱུད་པ་ཡོང་མགོ་བརྩམས་ཡོད་པ་ང་ཚོས་ཚོད་དཔག་མེད་བྱེད་ཐུབ་པ་ཡིན། ད་ལྟའི་ཆར་ལ་དྭགས་ཀྱི་མི་གྲངས་བརྒྱ་ཆའི་བཅོ་ལྔ་ཙམ་ཁ་ཆེ་ཡིན་ཞིང་། དེ་དག་གི་རང་གི་ཆོས་ལུགས་ཀྱི་ལྟ་གྲུབ་དང་། བཟང་སྤྱོད་རྒྱུད་འཛིན་བྱས་ཡོད་པར་མ་ཟད། གླེ་རྒྱལ་སར་ཁ་ཆེ་ལྷ་ཁང་ཆེན་པོ་གཉིས་ཡོད་ཅིང་། གཅིག་བསྐྱར་གསོ་བྱེད་བཞིན་པའི་སྒང་ཡིན།༩༩༩.jpg

ལ་དྭགས་ཀྱི་ཡུལ་ལྗོངས།  ཁང་ཟླ་སྲས་ཀྱིས་པར་བླངས།

གླེའི་འཚོ་ཐབས།

          ད་ལྟའི་ཆར་ལ་དྭགས་མི་མང་གི་ཡོང་འབབ་གཙོ་བོ་ནི། ཡུལ་སྐོར་བར་བརྟེན་ཡོད་དེ། གལ་སྲིད་འཛམ་གླིང་གི་ས་ཆ་གང་ས་ནས་ཡོང་བའི་ཡུལ་སྐོར་བ་དག་མེད་ན། གླེ་གཙོ་བོར་གྱུར་པའི་ལ་དྭགས་ཀྱི་དེང་རབས་གྲོང་ཁྱེར་དག་འཕེལ་རྒྱས་སུ་ཁག་པོར་གྱུར་ཡོད་དེ། གླེ་ལྟ་བུར་མཚོན་ན། འཚོ་བའི་ཐོན་ཁུངས་བརྒྱ་ཆ་བརྒྱད་ཅུ་ཙམ་ནི་ཡུལ་སྐོར་བའི་ཆེད་མགྲོན་ཁང་དང་། སྣེ་ཤན་ཁང་། ཟ་ཁང་། ཚོང་ཁང་གཉེར་མཁན་ཁོ་ན་ཡིན་པས། མགྲོན་པོ་མེད་ཚེ་ཚོང་ལས་དེ་དག་ཀྱང་རང་བཞིན་གྱིས་གཉེར་ཐབས་མེད་པར་གྱུར་ཡོད། སྤྱིར་བཏང་རྒྱ་གར་གྱི་ཆབ་སྲིད་འཛིན་སྐྱོང་དེ་ཧ་ཅང་བརྟན་པོ་དང་། ངོས་སྙོམས་ཅན་ཡིན་པའི་ཆ་ནས་ས་གནས་འདི་དག་ལ་ཆབ་སྲིད་ཀྱི་དུས་ཟིང་ཡོང་ཉེན་ཅུང་ཆུང་ནའང་། ངོས་གཞན་ཞིག་ནས་ནི། ལ་དྭགས་ཀྱི་ས་བབ་མང་པོ་ཞིག་རྒྱ་གར་གྱི་དགྲ་ཟླར་གྱུར་པའི་པ་ཁི་སི་ཐན་དང་། བྱེ་བྲག་རྒྱ་གར་གྱི་དྲག་དམག་གིས་སྲུང་སྐྱོབས་འོག་ཡོད་པའི་ཁ་ཆེའི་གྲོང་ཁྱེར་ཀ་ཤི་སྨིར་གྱི་ཆབ་ཁོངས་དང་འབྲེལ་ནས་ཡོད་པས། ཆོས་ལུགས་སྒེར་གཅོད་པ་དང་། ཆབ་སྲིད་སྒེར་གཅོད་པ་དག་གིས་དོན་མེད་མི་གསོད་ཁྲག་སྦྱོར་གྱི་བྱ་ངན་མང་པོ་ཞིག་གི་ཤུགས་རྐྱེན་ཀྱང་ས་ཁུལ་འདིར་ཡོང་མི་སྲིད་པ་གཏན་ནས་མིན་པས། ས་མཚམས་དེ་དག་ཏུ་དུས་ཟིང་འདྲ་བྱུང་ཚེ།དེས་ལ་དྭགས་མི་མང་གི་འབྱུང་འགྱུར་གྱི་ཡར་ཐོན་དང་དེང་རབས་ཀྱི་འཚོ་ཐབས་ལ་ཡང་གྱོང་གུན་ཆེན་པོ་ཡིང་སྲིད་པ་ཡིན།20938828_1518071334917028_1810433043_n.jpg

 ལ་དྭགས་ཀྱི་རི་ལམ།

 ཞི་བའི་མཆོད་རྟེན།

         འདི་ནི་ཉི་ཧོང་ནང་བསྟན་ཚོགས་པ་ཞིག་གིས་འཛམ་གླིང་གི་ས་ཆ་གང་སར་མཆོད་རྟེན་བརྒྱ་ཕྲག་བཞེངས་ཡོད་པའི་གྲས་ནས་གཅིག་ཡིན། གླེའི་ཁྲོམ་ལམ་གཙོ་བོ་ནས་སྤྱི་ལེ་༣་ཙམ་གྱི་རི་རྩེར་བཞེངས་ཡོད་ཅིང་། མཆོད་རྟེན་གྱི་ཟུར་ནས་གླེ་ཧྲིལ་པོར་ལྟ་ཐུབ་པས་ཉིན་རྒྱུན་ཡུལ་སྐོར་བ་དག་གིས་འཚང་ཀ་བྱེད་ཀྱི་ཡོད། ཕྱི་ལོ་༡༩༨༥ལོར་ཐོག་མའི་རྨང་གཞིར་༧གོང་ས་མཆོག་ནས་རབ་གནས་མཛད། མི་རྣམས་ཀྱིས་ཉི་ཧོང་དགོན་པ་ཞེས་འབོད། མཆོད་རྟེན་གྱི་ཕྱོགས་བཞིར་སངས་རྒྱས་སྐུ་བལྟམས་པ་སོགས་མཛད་ཆེན་བཞིའི་སྐུ་བརྙན་འབུར་བཟོས་བྱས་ཏེ་བཞེངས་ཡོད་པས། མཆོད་རྟེན་འདིས་ཉི་ཧོང་དང་བོད་བརྒྱུད་ནང་བསྟན་ཟུང་འབྲེལ་གྱིས་ཞི་བདེའི་ནུས་ཤུགས་ལ་རྗེས་དྲན་བྱས་ཡོད།

                                                         དཔྱད་གཞི།

༡]ལ་དྭགས་ཀྱི་དགོན་པ་ཁག་གི་ལོ་རྒྱུས། ཌོཀ་ཌར་འཇམ་དབྱངས་རྒྱལ་མཚན་གྱིས་རྩོམ་བསྒྲིགས་བྱས་པ།
༢] ལ་དྭགས་ཀྱི་རྟེན་རྙིང་ཐོ་ཡིག་ས་ཕུད་ངག་དབང་དཔལ་ལྡན་གྱིས་བརྩམས།
༣] ལ་དྭགས་ཀྱི་འགྲུལ་ཡིག་བེན་དྷར་ཁལ་རཱས་བརྩམས།
༤] www. the map of Ladakh
༥] alchi ཨ་ལྕི། བརྙན་དེབ། the living heritage of Ladakh

 

རྫ་ཆུའི་རླབས་སྒྲ་རྩོམ་སྒྲིག་ཁང་གིས་ཆོག་མཆན་མེད་པར་གཞན་དུ་དགོད་མི་རུང་།

0

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།